1. Lande na kangɛnangɛnayɛ anto wele la solo dia lotutsha?

 SHO TSHƐ ngɛnangɛnaka anto wele la solo dia lotutsha. Lande na? Sho nɛmiyaka wanɛ wele l’akoka wa nkonga dui dimɔtshi aha la momala. Sho ngɛnangɛnaka di’anto akina monga la solo dia lotutsha oya le so etena kasalaso wandja. Ndo sho mongaka la lowando efula lo woho waki ombetsha aso wa Bible la solo dia lotutsha le so etena kakiso l’okakatanu wa mbeka, mbetawɔ kana nkamba la wetshelo ɔmɔtshi w’oma lo Bible. Laadiko a laasɔ, tekɔ la lowando efula otsha le Jehowa Nzambi lo woho wende la solo dia lotutsha oya le so!​—Rɔmɔ 2:4.

2. Lo awui akɔna ondo wele mongaka wolo dia monga la solo dia lotutsha?

² Kaanga kangɛnangɛnaso la solo dia lotutsha diele l’anto akina, ondo sho mɛnaka dia hatongaka nshi tshɛ wɔdu monga la solo dia lotutsha. Ɛnyɛlɔ, sho mbeyaka monga l’okakatanu wa nkonga etena keso l’ɔnɔngɔ takonga di’etena kaso nkoka dia ntahola ashi, djekoleko naka tekɔ lo nsala dui dimɔtshi ko taya l’ɔkɔngɔ. Sho mbeyaka ndjoshishɛ solo diaso dia lotutsha naka anto akina wotomadia. Ndo nto, lo ntena dimɔtshi, sho mbeyaka ndjonga l’okakatanu wa ntetemala nkonga daka diaki Jehowa diakandalake di’andja w’oyoyo. Onde wɛ ayolanga nyomoleka monga la solo dia lotutsha? Lo sawo nɛ, tayɔsɛdingola kɛnɛ kalembetshiya monga la solo dia lotutsha ndo lande na kele dui sɔ ohomba. Tayovusola nto kɛnɛ kakoka tokimanyiya dia nyomoleka monga la solo dia lotutsha.

3. Ngande wasala onto lele la solo dia lotutsha akambo etena kosolawɔ?

³ Tɔsɛdingole toho tɔ nɛi takokaso mɛnya solo dia lotutsha. Yoho ya ntondo, onto lele la solo dia lotutsha hoke nkɛlɛ esadi. Nde salaka la wolo dia ntshikala ki ndo nde hakaloyɛ anto awui  wa kɔlɔ wosalɛwɔ kana salɛ anto akina akambo la djawudi kaanga etena kende l’ekiyanu. Etelo k’ɔnɛ “hoke nkɛlɛ esadi” tanemaka mbala ka ntondo lo Bible etena katɛkɛtama lo dikambo dia Jehowa ɔnɛ “Nzambi ka kɛtshi ndo kokana kandji, kahoke nkɛlɛ esadi ndo koludi tɔɔ la ngandji ka kɔlamelo ndo la mɛtɛ.”​—Eto. 34:6.

4. Ngande watosalaka onto lele la solo dia lotutsha akambo etena kawotɛwɔ dia nkonga?

⁴ Yoho ya hende, onto lele la solo dia lotutsha kokaka nkonga la wɔlamu. Naka dui dimɔtshi diamboviya oleki woho walongamɛso, onto langasɔ salaka la wolo dia mbewɔ diaha dikambo dimɔtshi ndjootshindja wɔɔngɔ kana ndjowomadia. (Mat. 18:26, 27) Ekɔ awui efula wɛnya dia sho pombaka nkonga la solo dia lotutsha tshɛ. Ɛnyɛlɔ, tekɔ l’ohomba wa pokamɛ la solo dia lotutsha tshɛ etena katɛkɛta onto ɔmɔtshi, aha la mbohembola ɔtɛkɛta. (Jɔbɔ 36:2) Sho mbeyaka monga nto l’ohomba wa solo dia lotutsha etena kakimanyiyaso ombeki ɔmɔtshi dia nshihodia wetshelo ɔmɔtshi wa lo Bible kana dia ntondoya mbekelo kɛmɔtshi.

5. Naa yoho kina yahombaso mɛnya solo dia lotutsha?

⁵ Yoho ya sato, onto lele la solo dia lotutsha hasale akambo esadi esadi aha la nkanyiya. Koko, ekɔ awui amɔtshi walɔmbama dia nsala esadi esadi. Laasɔ, naka onto lele la solo dia lotutsha ekɔ la dui dimɔtshi di’ohomba dia nsala, nde hadisale esadi esadi; kana nsamanya dia dishidiya. Koko, nde ndjashikikɛka dia nde ekɔ l’etena kakoka ka nkongɛ kɛnɛ kayondosala. Oma laasɔ, nde tshikɛka olimu akɔ etena kakoka dia mbosala.

6. Ngande wasala onto lele la solo dia lotutsha akambo etena kahomanande l’ehemba kana l’ekakatanu?

⁶ Yoho ya nɛi, onto lele la solo dia lotutsha salaka la wolo dia mbikikɛ ehemba aha la ndjakiyanya. Lo yoho yɔtɔnɛ la dui sɔ, solo dia lotutsha mbɔtɔnɛka tshɛ lo tshɛ la ekikelo. Eelo, keema kɔlɔ mbutɛ ɔngɛnyi ayɛ wa ma ma awui hwe hwe ndo mbɔkɛnɛmɔlɛ woho wayaokaso lo dikambo di’ohemba ɔmɔtshi. Koko, onto lele la  solo dia lotutsha ayosala kɛnɛ tshɛ kakokande nsala dia ntetemala mbikikɛ l’etena kakɔ kaamɛ atetemala monga la yimba ya dimɛna. (Kɔl. 1:11) Oko Akristo, tekɔ l’ohomba wa mɛnya solo dia lotutsha l’awui asɔ tshɛ. Lande na? Tɔsɛdingole ɛkɔkɔ engana.

7. Lo ndjela Jakɔba 5:7, 8, lande na kele solo dia lotutsha ohomba? (Enda ndo osato.)

⁷ Solo dia lotutsha diekɔ ohomba efula dia sho ndjohanda. L’ɛnyɛlɔ k’ekambi wa kɔlamelo wa lo nshi y’edjedja, tekɔ l’ohomba wa nkonga la solo dia lotutsha tshɛ dia Nzambi nkotsha sangwelo diande. (Hɛb. 6:11, 12) Bible tɛdikaka la okambi wa dikambɔ. (Adia Jakɔba 5:7, 8.) Okambi wa dikambɔ kambaka la wolo dia monɛ ndo mbitɛ ashi lo diangɔ diande, koko nde heye etena shikaa kayodiola. Ɔnkɔnɛ, okambi wa dikambɔ ɔsɔ kongaka la solo dia lotutsha tshɛ, ele l’eshikikelo dia nde ayona diangɔ dionɛnde. Woho akɔ waamɛ mbele, sho kambaka olimu wa wolo efula dia monga ambeki wa Yeso, kaanga mbeso “[hateye] lushi layoya Nkumɛso.” (Mat. 24:42) Sho kongaka la solo dia lotutsha tshɛ, tele l’eshikikelo dia l’etena kakandashikikɛ, Jehowa ayokotsha alaka tshɛ wakandalake. Naka taya bu la solo dia lotutsha, kete sho mbeyaka ndjɔkɔmɔ nkonga ndo ndjotatɛ la ndjaanganya oma l’akambo wa mɛtɛ. Sho kokaka nto ntatɛ mbesa diangɔ diasha ɔngɛnɔngɛnɔ wa lo tshanda mɔtshi tsho. Koko naka sho monga la solo dia lotutsha, sho kokaka mbikikɛ polo l’ekomelo ndo ndjoshimbamɛ.​—Mika. 7:7; Mat. 24:13.

8. Ngande watokimanyiya solo dia lotutsha lo diɔtɔnganelo diasaso l’anto akina? (Kɔlɔsayi 3:12, 13)

⁸ Tekɔ l’ohomba wa solo dia lotutsha dia sho monga la diɔtɔnganelo dia dimɛna l’anto akina. Dui sɔ tokimanyiyaka dia pokamɛ la yambalo tshɛ etena katɛkɛta anto akina. (Jak. 1:19) Solo dia lotutsha kimanyiyaka nto dia wɔladi monga. Naka sho monga la solo dia lotutsha, kete hatotosala akambo esadi esadi kana mbuta dui dia kɔlɔ etena keso l’okiyanu. Ndo naka sho monga la solo dia lotutsha, kete hatotoka nkɛlɛ esadi etena katosalɛ onto ɔmɔtshi kɔlɔ. Lo dihole dia nkaloya kɔlɔ lo kɔlɔ, ‘tayotetemala mbikikanɛ kɔlɔ ndo dimanyiyana l’otema ɔtɔi lam’asaso.’​—Adia Kɔlɔsayi 3:12, 13.

9. Ngande watokimanyiya solo dia lotutsha etena keso l’ohomba wa mbɔsa tɛdikɔ? (Tokedi 21:5)

⁹ Solo dia lotutsha koka nto tokimanyiya dia mbɔsa tɛdikɔ t’amɛna. Lo dihole dia nsala akambo l’esasesase kana aha la nkanyiya, tayɔsa etena ka nsala eyangelo ndo oma laasɔ ndjɔsa yɛdikɔ yoleki tshɛ dimɛna. (Adia Tokedi 21:5.) Ɛnyɛlɔ, naka tekɔ lo tayange olimu, sho mbeyaka monga suke dia mbetawɔ olimu tshɛ wɛnaso ntondo, oyadi kaanga olimu akɔ todjɛka wekamu lo woho watɛmɔlaso Jehowa. Koko, naka sho monga la solo dia lotutsha, kete tayɔsa etena ka nsɛdingola awui wele oko dihole diele olimu akɔ, wenya wayowɔsaka ndo shɛngiya yakoka monga l’olimu ɔsɔ lo nkumbo kaso ndo lo lonyuma laso. Naka sho monga la solo dia lotutsha, kete sho mbeyaka mbewɔ ndjɔsa yɛdikɔ ya kɔlɔ.

10. Ngande wakoka Okristo nkɛnɛmɔla ndo ntetemala monga la solo dia lotutsha?

¹⁰ Lɔmba dia ndeka monga la solo dia lotutsha. Solo dia lotutsha ekɔ woho ɔmɔtshi w’olowa wa lo nyuma. (Ngal. 5:22, 23) Laasɔ sho kokaka nɔmba nyuma k’ekila ndo nɔmba Jehowa ekimanyielo dia nkɛnɛmɔla olowa akɔ. Naka tambohomana la dui dimɔtshi diadja solo diaso dia lotutsha l’ohemba, kete sho pombaka ‘ntetemala nɔmba’ nyuma k’ekila dia tokimanyiya dia monga la solo dia lotutsha. (Luka 11:9, 13) Sho kokaka nto nɔmba Jehowa dia nde  tokimanyiya dia sho mɛna akambo lo ndjela woho wa waɛnande. Oma laasɔ, l’ɔkɔngɔ wa sho nɔmba, tekɔ l’ohomba wa nsala tshɛ kakokaso nsala dia mongaka la solo dia lotutsha lushi tshɛ. Etena tshɛ kayotɔlɔmbaka dia monga la solo dia lotutsha ndo katatasale la wolo dia monga la solo dia lotutsha, mbayotalekaka dionga sɔ mbika edio l’otema aso ndo diɔ diayonga etenyi kɛmɔ ka lonto laso.

11-12. Ngande wambɛnya Jehowa solo dia lotutsha?

¹¹ Kanaka yimba la bɛnyɛlɔ diele lo Bible. Bible kekɔ la bɛnyɛlɔ efula di’anto waki la solo dia lotutsha. Naka sho kanaka yimba la ɛkɔndɔ ɛsɔ, kete sho koka mbeya toho ta nkɛnɛmɔla solo dia lotutsha. La ntondo ka sho nsɛdingola bɛnyɛlɔ dimɔtshi l’atei a diɔ, nyɛsɔ tende ɛnyɛlɔ koleki tshɛ ka solo dia lotutsha ka Jehowa.

¹² L’ekambɔ k’Ɛdɛna, Satana akamamatanyiyɛ lokombo laki Jehowa akambo ndo akalanya lokumu la Nde lo mpemba nkonya Eva dia nde mbidja taamu lo akoka wele la Jehowa wa monga Ɔnɔmbɔdi w’ɔlɔlɔ ndo wa ngandji. Lo dihole dia nde ndjaka omamanyishi ɔsɔ mbala kakɔ ɔtɔi, Jehowa akɛnya solo dia lotutsha ndo ndjakimɛ, lo mbetawɔ dia ayɔsa etena dia mɛnya dia lowandji Lande mbele lowandji loleki tshɛ dimɛna. Ndo etena kakongande dui sɔ, nde ambokikɛ awui tshɛ wa kashi wakawamamatanyiyɛ lokombo lande. Ndo nto, Jehowa ambokonga la solo dia lotutsha tshɛ di’anto efula nkondja diaaso dia nkondja lɔsɛnɔ la pondjo. (2 Pe. 3:9, 15) Etombelo wambonga ele, miliyɔ y’anto wamboweya. Naka sho ndeka mbidja yimba lo wahɔ waya lo woho wele Jehowa la solo dia lotutsha, kete ondo tayɛna dia ekɔ wɔdu sho nkonga etena kakandashikikɛ dia mbela ekomelo.

13. Ngande wakokoya Yeso lo yoho ya kokele solo dia lotutsha diaki She? (Enda ndo osato.)

¹³ Yeso mbokoyaka solo dia lotutsha diaki  She lo yoho ya kokele, ndo nde akɛnya dionga sɔ etena kakinde la nkɛtɛ. Komongaka dui dia wɔdu le nde dia mɛnya solo dia lotutsha, djekoleko otsha le afundji ndo Afarisɛ wa dungi pende. (Jni. 8:25-27) Koko l’ɛnyɛlɔ ka She, Yeso kombokaka nkɛlɛ esadi. Nde kokaloyɛka kɔlɔ lo kɔlɔ etena kakawɔtɛngaka kana kakawosolaka. (1 Pe. 2:23) Yeso akakikɛ la solo dia lotutsha tshɛ ehemba aha la ndjakiyanya. Aha la taamu, Bible totɛka dia sho “[kanaka] yimba dimɛna dikambo dia ɔnɛ lakakikɛ ɛtɛkɛta wa kɔlɔ wa ngasɔ oma le atshi wa pɛkato”! (Hɛb. 12:2, 3) L’ekimanyielo ka Jehowa, sho la wɔ nto koka mbikikɛ la solo dia lotutsha ohemba tshɛ wahomana la so.

14. Wetshelo akɔna wakokaso nkondja oma lo solo dia lotutsha diaki Abrahama? (Hɛbɛru 6:15) (Enda ndo osato.)

¹⁴ Kayotota naka ekomelo kakongaso kataye? Ondo mbeyaka monga ko aya edja kakongaso dia ekomelo ndja. Sho mbeyaka mboka wɔma ɔnɛ aya bu edja kete tambovɔ ko ekomelo kataye. Kakɔna kakoka tokimanyiya dia ntetemala nkonga la solo dia lotutsha tshɛ? Tɔsɛdingole ɛnyɛlɔ kaki Abrahama. Etena kakakotsha Abrahama ɛnɔnyi 75 aha la nde monga la ɔna, Jehowa akolake ate: “Dimi layoketɛ wodja wa woke.” (Eta. 12:1-4) Onde Abrahama akɛnyi ekotshamelo ka daka sɔ? Ndooko nde hɛnyi tshɛ lo tshɛ. L’ɔkɔngɔ wa nde ntenyanya Ɔkɛdi wa Efaratɛ ndo nkonga ɛnɔnyi 25, Abrahama akɛnyi woho wakotɔ Isaka lo yoho ya dihindo ndo l’ɔkɔngɔ w’ɛnɔnyi ekina 60, tokanula tande, Esao nde la Jakɔbɔ wakotɔ. (Adia Hɛbɛru 6:15.) Koko Abrahama kɔmɛna tokanula tande wakoma wodja wa woke ndo wakita Nkɛtɛ ya Daka. Koko, pami ka kɔlamelo kɛsɔ akangɛnangɛna lɔngɛnyi la ma ma lakinde la Otungi ande. (Jak. 2:23) Ndo etena kayolɔ Abrahama, nde ayamba mɛtɛ efula dia mbeka dia mbetawɔ  kande ndo solo diande dia lotutsha mbakayokonyaka dia wedja tshɛ tshɔkwama! (Eta. 22:18) Wetshelo akɔna wambotokondja? Sho tshɛ onto l’onto, ondo hatotɛna ekotshamelo k’alaka tshɛ wa Jehowa mbala kakɔ ɔtɔi. Koko, naka sho monga la solo dia lotutsha oko Abrahama, kete sho koka monga l’eshikikelo dia Jehowa ayotɔtshɔkɔla l’etena kɛnɛ ndo ayoleka tɔtshɔkɔla lo andja Ande w’oyoyo watolakande.​—Makɔ 10:29, 30.

15. Awui akɔna wakokaso nsɛdingola lo wekelo w’onto ndamɛ?

¹⁵ Bible kekɔ la bɛnyɛlɔ dikina efula di’anto waki la solo dia lotutsha. (Jak. 5:10) Ondo ayonga dui dia dimɛna dia salaka eyangelo wendana la bɛnyɛlɔ sɔ. b Ɛnyɛlɔ, kaanga mbakakitama Davidɛ esɔ etena kakinde eke dikɛnda dia nde ndjonga nkumekanga k’Isariyɛlɛ, nde akahombe nkonga l’edja k’ɛnɔnyi efula la ntondo ka nde ndjolongola lowandji. Simɛyɔna nde la Anna wakatɛmɔlaka Jehowa la kɔlamelo tshɛ l’etena kakɔ kaamɛ wakonga Mɛsiya wakalakema. (Luka 2:25, 36-38) Etena katayeke ɛkɔndɔ ɛsɔ, yanga ekadimwelo lo ambola wayela anɛ: Kakɔna ondo kakakimanyiya onto ɔnɛ dia mɛnya solo dia lotutsha? Ngande wakandakondja wahɔ oma lo solo dia lo tutsha? Ngande wakokaso mbookoya? Wɛ mbeyaka nto nkondja wahɔ lo mbeka awui wendana la wanɛ waki kɔmɛnya solo dia lotutsha. (1 Sam. 13:8-14) Wɛ mbeyaka ndjambola ɔnɛ: ‘Kakɔna kakaakonya diaha vɔ monga la solo dia lotutsha? Etombelo akɔna wakawahomana la wɔ?’

16. Naa wahɔ ɛmɔtshi waya lo monga la solo dia lotutsha?

¹⁶ Sɛdingola wahɔ waya lo monga la solo dia lotutsha. Etena keso la solo dia lotutsha, sho ndekaka monga l’ɔngɛnɔngɛnɔ ndo la wɔlamu. Solo dia lotutsha koka ndowanya yimba ndo yoonge yaso. Etena keso la solo dia lotutsha otsha le anto akina, sho ngɛnangɛnaka la diɔtɔnganelo dia dimɛna diele lam’asaso la wɔ. Tshumanelo diaso ndekaka monga kaamɛ. Naka onto ɔmɔtshi ambotosola, hatotomala esadi esadi, hatotosala dia nkonya dui diakɔ dia diɔ nyomoleka monga woke. (Os. 37:8, nɔtɛ.; Tok. 14:29) Koko djekoleko, etena keso la solo dia lotutsha, sho mbokoyaka Shɛso lele l’olongo ndo ndekaka ndjasukanya la nde.

17. Kakɔna kahombaso ndjashikikɛ dia nsala?

¹⁷ Solo dia lotutsha ekɔ mɛtɛ dionga di’olangala efula diatokondjiyɛ sho tshɛ wahɔ! Hatongaka nshi tshɛ ɔtɔmbɔ l’esɔ dia monga la solo dia lotutsha, koko l’ekimanyielo ka Jehowa sho koka ntetemala nkɛnɛmɔla dionga sɔ. Ndo etena kakongɛso la solo dia lotutsha tshɛ andja w’oyoyo, sho kokaka monga l’eshikikelo ɔnɛ “washo wa Jehowa mendaka wanɛ wawooka wɔma, wanɛ wakonga ngandji kande ka kɔlamelo.” (Os. 33:18) Nyɛsɔ sho tshɛ toyashikikɛ dia ntetemala ndɔta solo dia lotutsha.