1. ¿Tuku xlakata lakgatiya katalalipina latamanin tiku kgalhkgalhinankgo?

 KIMPUTUMKAN lakgatiyaw katalalinaw latamanin tiku kgalhkgalhinankgo. Akgtum liʼakxilhtit, tlan makgkatsiyaw akxni kalakgapasaw tiku kgalhkgalhinankgo chu ni sitsikgo. Nachuna, lu xtapalh liʼakxilhaw akxni amakgapitsin ni kinkasitsinikgoyan maski tlawayaw tuku nitlan. Chu lu paxtikatsiniyaw tiku kinkalimakgalhtawakgen Biblia xlakata ni kinkalitlakgwan akxni ni xʼakgatekgsaw tuku xkinkamasiyaniman, ni xmakgamakglhtinanaw o tuwa xmakgkatsiyaw nalilatamayaw tuku xkatsinimaw kBiblia. ¡Chu lu paxtikatsiniyaw Jehová xlakata ni kinkatasitsiyan! (Rom. 2:4).

2. ¿Tuku titaxtuyaw niku tuwa makgkatsiyaw nakgalhkgalhinanaw?

² Putum akinin xtapalh akxilhaw pi amakgapitsin kgalhkgalhinankgo. Pero max akxni talakaskin pi akinin nakgalhkgalhinanaw tuwa namakgkatsiyaw. Akgtum liʼakxilhtit, max tuwa namakgkatsiyaw ni nasitsiyaw akxni nila titaxtuyaw ktiji xlakata anan lhuwa putlaw, liwaka komo lu lakapalamaw. Max nasitsiyaw komo wi tiku nakinkamakglhuwiyan. Chu max min kilhtamaku lakpuwanaw pi xasasti kakilhtamaku nema Jehová malaknunit ni lakapala chin. Chuna la akxilhaw, max wi niku tlakg talakaskin nalimasiyayaw pi kgalhkgalhinanaw. Kʼuma artículo naʼakxilhaw tuku kilhchanima kgalhkgalhinankan chu tuku xlakata lu xlakaskinka. Na nalichuwinanaw tuku nakinkamakgtayayan tlakg nakgalhkgalhinanaw.

3. ¿Tuku tlawa tiku kgalhkgalhinan akxni nitlan likatsinikan?

³ Kaʼakxilhwi pulaktati tuku litalakgapasa tiku kgalhkgalhinan. Pulana, ni lakapala sitsi. Lu liskuja xlakata ni nasitsi akxni tuwa tuku titaxtuma chu ni natamakgapuspita akxni nitlan likatsinikan. Xapulana akxni Biblia lichuwinan tiku ni lakapala sitsi, wa akxni lichuwinan Jehová la chatum Dios «tiku xalakgalhamana chu tiku tlan likatsi, ni makgxtakgnan, ni lakapala sitsi chu kgalhi  lhuwa tapaxkit nema ni makgxtakgnan» (Éx. 34:6, xliʼakgtiy nota).

4. ¿La limasiya chatum lataman pi kgalhkgalhinan?

⁴ Xlipulaktiy, tiku kgalhkgalhinan ni lu lakgaputsa. Ni lisitsi komo ni lakapala kgantaxtu tuku kgalhkgalhima (Mat. 18:26, 27). Pulaklhuwa tuku titaxtuyaw niku talakaskin nakgalhkgalhinanaw chu ni nalakgaputsayaw. Akgtum liʼakxilhtit, komo wi tuku kinkalitachuwinamakan, liwana kakgaxmatniw tiku chuwinama chu ni kamalaktlawiw (Job 36:2). Na talakaskin nakgalhkgalhinanaw xlakata namakgtayayaw tiku makgalhtawakgemaw naʼakgatekgsa pulaktum tuku masiya Biblia o nalakgmakgan akgtum nixatlan xtalismanin.

5. ¿Tuku atanu tlawa tiku kgalhkgalhinan?

⁵ Xlipulaktutu, tiku kgalhkgalhinan ni lakapala tuku tlawa. Xlikana pi min kilhtamaku talakaskin lakapala wi tuku natlawayaw. Pero akxni wi tuku xlakaskinka xlitlawat, tiku kgalhkgalhinan ni kaj xalakapala wi tuku tlawa chu ni katokgosun masputu. Wata limaxtu kilhtamaku xlakata liwana nalakkaxwili tuku natlawa chu alistalh limaxtu kilhtamaku xlakata liwana namakgantaxti.

6. ¿Tuku tlawa tiku kgalhkgalhinan akxni titaxtu tuku tuwa?

⁶ Xlipulaktati, tiku kgalhkgalhinan liskuja xlakata natayani tuku tuwa titaxtu chu ni litaʼakglhuwi. Uma limasiya pi nila katitayaniw komo ni kgalhkgalhinanaw. Xlikana pi ni talakgalhin nalitachuwinanaw chatum amigo tuku makgkatsiyaw akxni titaxtumaw tuku tuwa. Pero tiku kgalhkgalhinan tlawa putum tuku matlani xlakata chuntiya xatapaxuwan naskujnani Jehová (Col. 1:11). Talakaskin pi akinin kskujnin Jehová nalimasiyayaw pi kgalhkgalhinanaw chuna la lichuwinanitaw. ¿Tuku xlakata? Kalichuwinaw.

7. Chuna la wan Santiago 5:7, 8, ¿tuku xlakata lu xlakaskinka nakgalhkgalhinanaw? (Na kaʼakxilhti dibujos).

⁷ Lu xlakaskinka nakgalhkgalhinanaw xlakata tlan nalakgtaxtuyaw. Xtachuna la kskujnin Dios xalamakgasa tiku ni makgxtakgkgolh,  talakaskin nakgalhkgalhiyaw asta akxni Dios namakgantaxti tuku malaknunit (Heb. 6:11, 12). Biblia kinkatamalakxtumiyan chuna la chatum chanana (kalikgalhtawakga Santiago 5:7, 8). Chatum chanana lu palha skuja xlakata wi tuku nachan chu namunuwili, pero ni liwana katsi tuku kilhtamaku namakgala xtawakat tuku chanit. Maski chuna, lu kgalhkgalhinan xlakata liwana katsi pi namin kilhtamaku namakgala xtawakat tuku chalh. Xtachuna la uma, kstalaninanin Cristo lu skujnaniyaw Jehová maski “ni katsiyaw tukuya kilhtamaku namin kiMalanakan” (Mat. 24:42). Chuna, lu kgalhkgalhinanaw xlakata liwana katsiyaw pi Jehová namakgantaxti tuku malaknunit akxni chuna xlilat. Komo natlakgwanaw, max nialh katikgalhkgalhiputuw chu tsinu tsinu natamakgatliniyaw xaxlikana. Nachuna, max wa natsukuyaw putsayaw tuku kaj puntsu nakinkamakgapaxuwayan. Pero komo ni natlakgwanaw, natayaniyaw asta kxlisputni uma kakilhtamaku chu nalakgtaxtuyaw (Miq. 7:7; Mat. 24:13).

8. Komo kgalhkgalhinanaw, ¿la nakinkamakgtayayan tlan nakatalalinaw amakgapitsin? (Colosenses 3:12, 13).

⁸ Akxni kgalhkgalhinanaw kinkamakgtayayan tlan nakatalalinaw amakgapitsin. Komo kgalhkgalhinanaw, kaks nakgaxmataw akxni amakgapitsin nachuwinankgo (Sant. 1:19). Na namakgtayananaw naʼanan takaksni. Ni katiwaniw tuku nitlan nalimakgkatsi achatum maski tuwa tuku titaxtumaw. Nachuna, komo wi tiku nakinkatlawaniyan tuku nitlan, ni lakapala katisitsiw chu ni katitamakgapuspitniw, wata chuntiya nalatatayaniyaw chu xatapaxuwan nalatapatiyaw (kalikgalhtawakga Colosenses 3:12, 13).

9. Komo kgalhkgalhinanaw, ¿la nakinkamakgtayayan tlan tuku nalaksakaw? (Proverbios 21:5).

⁹ Komo kgalhkgalhinanaw, na nakinkamakgtayayan tlan tuku nalaksakaw. Ni kaj lakapala wi tuku katilaksakwi natlawayaw, wata nalimaxtuyaw kilhtamaku nalakputsananiyaw tuku tlan xtlawaw chu tuku tlakg tlan xkinkakitaxtunin (kalikgalhtawakga Proverbios 21:5). Akgtum liʼakxilhtit, komo putsamaw akgtum taskujut, max namakglhtinamputunaw taskujut nema kinkamalaknunimakan maski uma natlawa pi nialh naʼanaw kputum tamakxtumit o nialh lu nalichuwinanaw Dios. Pero komo kgalhkgalhinanaw, ni lakapala tuku katitlawaw. Wata pulana naʼakxilhaw la xlilakgamakgat wi taskujut, la akglit hora naskujaw chu la nakitaxtuni kifamiliajkan komo namakglhtinanaw uma taskujut chu komo ni katilaktlawalh chuna la talalinaw Jehová. Komo kgalhkgalhinanaw, ni katilaksakwi tuku nitlan.

10. ¿Tuku tlan natlawayaw xlakata chuntiya tlakg tlan nakgalhkgalhinanaw?

¹⁰ Kaskiniw Jehová kakinkamakgtayan xlakata tlakg nakgalhkgalhinanaw. Kgalhkgalhinankan akgtum tayat nema espíritu santo tlawa pi latamanin nakgalhikgo (Gál. 5:22, 23). Wa xlakata kaskiniw Jehová pi kakinkamaxkin espíritu santo chu kakinkamakgtayan nakgalhiyaw xatlan tayat. Komo wi tuku titaxtumaw niku tlakg talakaskin nakgalhkgalhinanaw, chuntiya kaskiw espíritu santo (Luc. 11:9, 13). Na tlan naskiniyaw Jehová pi kakinkamakgtayan naʼakxilhaw tuku titaxtumaw chuna la xla akxilha. Chu akxni tlawanitawa nawan oración, katlawaw putum tuku matlaniyaw xlakata chali chali tlakg nakgalhkgalhinanaw. Komo chuntiya naskiniyaw xtamakgtay Jehová chu naliskujaw nalimasiyayaw uma tayat, naʼakxilhaw pi tsinu tsinu tlakg nakgalhkgalhinanaw.

11, 12. ¿La limasiyanit Jehová pi kgalhkgalhinan?

¹¹ Kakalilakpuwaw liʼakxilhtit nema kalichuwinan Biblia. Biblia kalichuwinan lhuwa latamanin tiku limasiyakgolh pi xkgalhkgalhinankgo. Komo nalilakpuwanaw xliʼakxilhtitkan, na tlan nalimasiyayaw uma tayat. Nakalichuwinanaw  makgapitsi umakgolh latamanin, pero pulana kalichuwinaw xliʼakxilhtit Jehová, tiku tlakg katsini kgalhkgalhinan.

¹² Anta kjardín xaʼEdén, Satanás maxkajwilh xtukuwani Jehová chu limawakalh pi xla nitlan mapakgsina chu ni paxkinan. Pero Jehová ni tunkun malakgsputulh Akgskgawini, wata limasiyalh pi kgalhkgalhinan chu ni lakapala sitsi, xlakata liwana xkatsi pi xtalakaskin kilhtamaku xlakata nalimasiya pi wa tiku tlakg tlan mapakgsinan. Xlakata nina lakgchan kilhtamaku namalakgsputu Satanás, chuntiya tayanima la maxkajwimaka xtukuwani. Pero xlakata Jehová kgalhkgalhinan, lhuwa latamanin lakgapaskgonit chu uma kamaxkinit takgalhkgalhin pi tlan nalatamakgo putum kilhtamaku (2 Ped. 3:9, 15). Komo nalilakpuwanaw putum tuku tlan kitaxtunit xlakata Jehová kgalhkgalhinan, ni tuwa katimakgkatsiw chuntiya nakgalhkgalhiyaw asta akxni nachin kilhtamaku nema Jehová laklhkawilinit xlakata namasputu uma kakilhtamaku.

13. ¿La stalanilh Jesús xliʼakxilhtit xTlat akxni kilatamachi kKatiyatni? (Na kaʼakxilhti dibujo).

¹³ Jesús stalanilh xliʼakxilhtit xTlat chu limasiyalh pi xkgalhkgalhinan akxni kilatamachi unu kKatiyatni. Xlikana pi max tuwa xmakgkatsi ni tunkun nasitsi, liwaka akxni xkatachuwinan fariseos chu lakgtsokgkinanin tiku xlakgaputiyunankgo (Juan 8:25-27). Pero chuna la xTlat, Jesús ni lakapala ksitsi. Ni lakapala kakgalhtilh akxni xtalamakgasitsin xwanikgo laklixkajnit tachuwin chu akxni xtlawanikgo tuku nitlan (1 Ped. 2:23). Wata xatapaxuwan tayanilh putum tuku titaxtulh. Wa xlakata Biblia kinkawaniyan: «Liwana kalilakpuwantit tiku tayanilh lhuwa laklixkajni xtachuwinkan makglakgalhinanin» (Heb. 12:2, 3). Akinin na tlan natayaniyaw putum tuku tuwa natitaxtuyaw xlakata Jehová nakinkamakgtayayan.

14. ¿Tuku kinkamasiyaniyan chuna la kgalhkgalhinalh Abrahán? (Hebreos 6:15; na kaʼakxilhti dibujos).

 ¹⁴ ¿Tuku nakinkamakgtayayan chuntiya nakgalhkgalhiyaw asta akxni namin xlisputni kakilhtamaku? Max xlakaskinawa pi xchilha xlisputni kakilhtamaku chu max lakpuwanaw pi ni katiʼakxilhwi la nakgantaxtu putum uma. Kalilakpuwaw xliʼakxilhtit Abrahán. Akxni Jehová malaknunilh pi «lanka kachikin» xʼama limaxtu, Abrahán xkgalhi 75 kata chu ni xkgalhi kamanan (Gén. 12:1-4). ¿Pero akxilhli Abrahán la kgantaxtulh uma? Ni putum akxilhli. Titaxtulh 25 kata lata xpatakutnit kgalhtuchokgo Éufrates chu lakachilh xkgawasa, Isaac. Chu 60 kata alistalh lakachinkgolh xnatanatni, Esaú chu Jacob (kalikgalhtawakga Hebreos 6:15). Pero Abrahán ni akxilhli la xkamanan lanka kachikin litaxtukgolh chu ni akxilhli akxni tanukgolh kTiyat nema xKawanikanit pi Nakamaxkikan. Maski chuna, Abrahán lu tlan talalilh xMalakatsukina (Sant. 2:23). Chu kalilakpuwanti la napaxuwa Abrahán akxni nalakastakwanan. Nakatsi pi xlakata tliwakga kgalhilh xtakanajla chu kgalhkgalhinalh, putum kachikin makglhtinankgolh lanka tasikulunalin (Gén. 22:18). ¿Tuku kinkamasiyaniyan? Max ni katiʼakxilhwi la nakgantaxtu putum xtamalaknun Jehová kkinkilhtamakujkan. Pero komo nakgalhkgalhinanaw chuna la Abrahán, liwana kakatsiw pi Jehová nakinkasikulunatlawayan la uku chu liwaka kkilhtamaku nema aku mima (Mar. 10:29, 30).

15. ¿Tuku tlan xlakputsananiw akxni kiʼakstukan kgalhtawakgayaw?

¹⁵ Biblia kalichuwinan atanu tiku na limasiyakgolh pi xkgalhkgalhinankgo (Sant. 5:10). ¿Tlan xlimaxtuw kilhtamaku xlakata xlikgalhtawakgaw xliʼakxilhtitkan? b Akgtum liʼakxilhtit, David  lu kgawasaku xwanit akxni laksakka xlakata mapakgsina xlitaxtulh kʼIsrael, pero talakaskilh nakgalhkgalhi akglhuwa kata asta akxni tlan xmapakgsinalh. Simeón chu Ana ni makgxtakgkgolh Jehová chu chuntiya skujnanikgolh akxni xkgalhkgalhimakgo pi xmilh Mesías (Luc. 2:25, 36-38). Akxni nalikgalhtawakgaya umakgolh liʼakxilhtit, kalilakpuwanti umakgolh takgalhskinin: «¿Tuku makgtayalh uma lataman nakgalhkgalhinan? ¿Tuku tlan kitaxtunilh xlakata kgalhkgalhinalh? ¿La tlan nakstalani xliʼakxilhtit?». Na lhuwa tuku tlan nakatsiniyaw xlakata tiku ni kgalhkgalhinankgolh (1 Sam. 13:8-14). Akxni nalikgalhtawakgayaw xliʼakxilhtitkan, tlan nalilakpuwanaw: «¿Tuku xlakata ni kgalhkgalhinankgolh? ¿Tuku nitlan kakitaxtunilh xlakata ni kgalhkgalhinankgolh?».

16. Kalichuwinanti makgapitsi tuku tlan kitaxtu akxni kgalhkgalhinankan.

¹⁶ Kalilakpuwaw tuku tlan kitaxtu akxni kgalhkgalhinankan. Akxni kgalhkgalhinanaw kinkamakgtayayan tlakg napaxuwayaw chu ni nalakgaputsayaw. Wa xlakata tlan nawanaw pi uma tayat kinkamakgtayayan ni lu natatatlayaw. Na kinkamakgtayayan tlakg tlan nakatalalinaw amakgapitsin chu congregación makxtum natawila. Komo ni lakapala nasitsiyaw akxni wi tiku tlawa tuku ni lakgatiyaw, makgtayananaw ni nastaka taʼakglhuwit (Sal. 37:8, nota; Prov. 14:29). Pero tuku tlakg tlan kitaxtu akxni kgalhkgalhinanaw wa pi stalanimaw xliʼakxilhtit kinTlatkan xalak akgapun chu uma tlawa pi tlakg natalakatsuwiniyaw.

17. ¿Tuku kililakkaxwilitkan natlawayaw?

¹⁷ Chuna la akxilhnitaw, lu tlan kitaxtu komo nalimasiyayaw pi kgalhkgalhinanaw. Maski namin kilhtamaku tuwa namakgkatsiyaw nalimasiyayaw, Jehová nakinkamakgtayayan chuntiya nalimasiyayaw pi kgalhkgalhinanaw. Chu xlakata nina chin xasasti kakilhtamaku, kimputumkan liwana kakatsiw pi «Jehová kaʼakxilhma tiku pekuanikgo, tiku kgalhkgalhimakgo xtapaxkit nema ni makgxtakgnan» (Sal. 33:18). Wa xlakata, kimputumkan lu kaliskujwi xlakata tlakg nakgalhkgalhinanaw.