1. Wer mayse ga naa da jar maaga gor wo desãy là?

 NAA ɓuy naa da ga jar mo hay gorge desãy. Wer maylà? Naa hoo sug ti jar maaga gor wo desãy bay sõõ ɓil mono. Naa kee jar maaga ɗaw wo see ɓaara see naa de maaga naa joŋ mopo we ti ngeel ɓe ga no. Naa hay kee jee had Bible ne naa de maaga á hay gorge desãy, de maaga naa hay durgi maa laa hadge no, maa yããge ɓe lan maa joŋ joŋre de ɓe mono. De daŋ sen ɓuy pa so yaw, naa joŋ suse’ ne Jeofa ti maaga á gor naa desãy mono!​—Rom. 2:4

2. Gorge desãy de gayri ti ngeel maa hõn wo là?

² Koh de maaga naa da jar maaga gor wo desãy mo laybla’ no, naa ti see naa naa de koge ga gorge desãy bay gus wa. Ko ba ɗa, naa mo hay dur maa gorge desãy de maaga ngaɓa yaŋ jag dawna (masiŋ maa naŋge no), debaŋ ɓe de maaga naa yaŋ le blam hãã no. Maapo naa ig sõõ ɓil ga de maaga jobo joŋ mopo maaga coo jag naa we ga no. Day de ngar ngeel maa po wo gorge sir maa defay ga Jeofa de ngaɓge ɓe ne naa kol see naa de gayri. Ndo de sãy maaga ndo ya’ wer gorge desãy de peel ti ni yawlà? Ɓil hadge sen la naa ko maaga naa naa nen gorge desãy go naage la, lan wer mayse ga à de el là yaŋ. Naa ko fẽn maaga kay naa maaga naa mo kol gorge desãy de peel ni yaŋ lay.

3. Jee maaga gor desãy joŋ joŋge de maaga jobo ma’ ɓil ɓe we là?

³ Naa ko deŋ po wo 4 maaga naa naa nen gorge desãy go de ɓaara ɗa. Taŋgu ɗa mono, jobo maaga gor desãy sõõ ɓil gus ga. Á ɗaw see ɓe maaga se mo hoo waŋ wa, lan maaga se mo sa’ bol wa de maaga à du’ ne we noga de maaga ɓil ɓe yaŋ de sõõge no. À tõõ da’ wããre maaga “bay sõõ ɓil gus wa” ɓil Bible  diŋ de maaga à wãã ti Jeofa ga “Baa ma ɓil de ele, ma ko decoo jare, bay sõõ ɓil gus wa, de el debaŋ, bay ndar gog wa lay”​—Laa. 34:6.

4. Jee maaga gor desãy joŋ na joŋge de maaga mopo maaga á de gorge ɓe bay we nduugi gus wa là?

⁴ Maa de ɓog no, jee maaga gor desãy gor de hayge eŋ. Fẽn po maaga á hay gorge ɓe nduu we ti wur ɓe ga no, á tem ga, sõõ ɓil ga lay (Mat. 18:26, 27). Re maaga naa mo hay gorge desãy ti ɓaara mbaara ngaɓa deŋ. Ko ba ɗa, naa mo hay co’ sug desãy bay caa wããre ne jobo jag de maaga á yaŋ ti wããre no (Job 36:2). Naa de sãy gorge desãy ti maaga naa yaŋ kay jee maaga naa de had wããre Baa ne hẽn maaga á mo laa hadge po, noga mo men joŋre po maa de bay woore go.

5. Ɗeŋ maa tigriŋ maa naa nen gorge desãy go diŋ maa hõn pa là?

⁵ Maa de swa’ no, jee maaga gor desãy joŋ mopo bay ɗiggi ti ɓe ga. Á mbe cwãy ga fẽẽre maa po yaŋ wo ga naa mo hay joŋ ra go deparday. Amaa, jobo maaga gor desãy yaŋ de joŋre do maa joŋge no, á tem maa tĩĩ wer ɓe, noga maa tawge ɓe go deparday ga. Ane, á car ɓil joŋren go maa koge ga wur yaŋ ɓe do se pur maa tawge ɓe go. Blam carge ɓil joŋren wo mo taɗ taɗ se hã wur ne maa hõnla ɓuy.

6. Jee maaga gor desãy joŋ joŋge de maaga á yaŋ nen bon là?

⁶ Maa de naa no, jobo maaga gor desãy soɗ re maa de gayri wo bay ngrum jage. Ti ngeel maa sen la gorge desãy de maŋ soɗge re. Á mbe cwãy ga wããge re maaga ndo nen ɓe ne bar ɓo maaga ndo de hã ɓil ti ɓe bay diŋ ɓlagge wa. Amaa, jee maaga gor desãy dur maaga se mo hay soɗ re sen de ɗiggi maa de woore (Kol. 1:11). Jar maa ni Baa hay ngaɓ wo go ga saara gor desãy go de ɗeŋ se maa 4 wo ɓuy. Wer mayse ne? Naa ko re maa po wo ɗa.

7. Doo maaga à da’ ɓil Jag 5:7, 8 ne mono, wer mayse ga gorge desãy de el debaŋ là? (Ko foton lay.)

⁷ Maaga naa mo da’ tenen maa tum mono, naa mo hay gorge desãy. Doo jar maaga hay wo le goŋ Baa ɓaa ɓaa ne mono, naa mo hay gor bagge jag fẽẽre maaga Baa de ngaɓ ra ge ne naa desãy (Heb. 6:11, 12). Bible ngaɓ naa doo jee jeege ne no (Jaŋ Jag 5:7, 8). Jee jeege dur maaga se mo jo’ pay no, se gor ga bii mo ra ti ɓe, amaa bay de ko wur maaga à tĩĩ mo wa. Jee jeege gor desãy, de kaŋ ɗiggi ta’ ga se weege pay sen yaŋ. Doo sen ne lay mono, naa joŋ de baa wuu ti joŋre maa ti nentersen wo, koh de maaga naa bay “de ko wur maga Waŋ [naa] fer le de ɓe mo wa” (Mat. 24:42). Naa gor desãy de kaŋ ɗiggi ta’ ga ti wur maaga de ngaɓge mono, Jeofa bagge jag fẽẽre maaga se de ngaɓ rage wo go ɓuy. Hayga naa bay we gorge desãy wa so no, maapo naa gay do gorge, ya’ naa men cwãyn go. Maapo naa ya’ kiɗgi diŋ fẽẽre maaga naa ɗig ga fruy wo naa yaŋ go do do tu mono. Amaa hayga naa yaŋ gor ge desãy no, sen kay naa yaŋ maa soɗ ren wo lan maa da’ yããge go​—Mis. 7:7; Mat. 24:13.

8. Gorge desãy kay naa ti holaŋ naa de jar na kayge là? (Kolos wo 3:12, 13).

⁸ Gorge desãy kay naa maaga holaŋ naa mo hay de jar de woore. Á kay naa maaga naa mo hay co’ sug jar de maaga á yaŋ wo wãã wããre no (Jag 1:19). Gorge desãy kay naa maaga naa mo hay jam de jar pa. Hayga naa yaŋ gorge desãy no, naa tem joŋ mopo noga wãã mopo ga bay de woore de maaga ɓil naa yaŋ de sõõge no ga. Naa yaŋ gorge desãy no, jiili naa sõõ gus de maaga jobo joŋ naa we de ɓlagge no ga. Ti ngar maaga naa mo hay sa’ bole, naa “mo hay we tum soɗ kããra, lan fug ɓil go ne kããra ti de dage naa” ​—Jaŋ Kolos wo 3:12, 13, [NWT].

9. Gorge desãy kay naa de maaga naa yaŋ de sãy maŋ ɗiggi ti naa na kayge là? (Jag jõõ wo 21:5)

⁹ Gorge desãy kay naa maaga naa mo hay far ɗiggi maa de woore wo pa. Ti ngar maaga naa hay tem de re po mono, naa ɗig go ti ɓe de woore, kiɗ wer ɓe, lan ko ɗeŋ maaga sen see yaŋ de woore mono (Jaŋ Jag jõõ wo 21:5). Ko ba ɗa, hayga naa yaŋ kiɗ joŋre no, maapo naa yãã joŋre maaga naa da’ taŋgu mo tu, koh à mo hay baa maŋ jag naa go ti joŋre goŋge Jeofa no. Amaa, hayga naa yaŋ gorge desãy no, naa maŋ wur maa ɗiggi ti ngeel joŋre no, ti wur ɓe no, ti maaga à hãyge feele naa lan joŋre maa ti nenterse naan wo na hãyge là. Hayga naa yaŋ gorge desãy no, naa day go maa maŋ ɗiggi maa de baywoore ga.

10. Kretiyẽ joŋ joŋge maaga se mo ya’ wer gorge desãy de peel ni, lan se mo hay tum gorge desãy là?

¹⁰ Tos maaga ndo mo ya’ wer gorge desãy de peel ni. Gorge desãy diŋ joŋre maa de woore yoo le’ge maa ti nenterse wo no (Gal. 5:22, 23). Naa tos Jeofa maa wii nenterse maa bay ɗagn ga kay naa maa le’ le’ge se no. Hayga naa yiŋ we de re po maaga gorge desãy kol de gayri see naa no, naa “wii” nenterse maa bay ɗagn maaga naa mo hay desãy (Lug 11:9, 13). Naa de kããge maa tos Jeofa ga naa mo hay ko fẽẽren diŋ de ɗiggi maa ɓe no pa. Blam maaga naa tos we no, naa dur maaga naa mo hay gorge desãy tum tum tu. Hayga naa yaŋ tosge tum lan naa yaŋ durgi maaga naa mo hay gorge desãy no, Jeofa kay naa yaŋ maaga naa mo ya’ wer gorge desãy de peel ni, koh naa mo hay ba seeɓaa bay diŋ jobo maaga gor desãy wa.

11-12. Jeofa hay naa nen gorge desãy go na naage là?

 ¹¹ Ɗig ti saɓlaŋ maa ɓil Bible wo. Saɓlaŋ jar maaga hay wo gorge desãy mbaara ɓil Bible ngaɓa deŋ. Hayga naa ɗig we ti saɓlaŋ sen wo no, naa had ɗeŋ maaga naa gorge desãy na gorge la yaŋ. Taŋgu maaga naa wãã ti saɓlaŋ sen wo mono, naa ko wee saɓlaŋ po maaga teeɓe bay wa ɗa: saɓlaŋ maa ni Jeofa no.

¹² Le ti pay sugnee Eden, Manhúulí caa wer Jeofa lan dem ɗuu ɓe de wããge ga Jeofa diŋ waŋ maaga bay de deele wa, lan bay de dage wa lay. Nen maaga Jeofa mo hay caa wer jee gete’e sen la go, se naa nen gorge desãy go lan ɗaw see ɓe. Á hay de koge ga maaga ko go ga se diŋ waŋ maa de deele, se hay men wur hresge go debaŋ ɗa. De maaga á de gorge mono, se hay mbe soɗ re sõõre maaga á hay wããge ti ɗu ɓe mono. De peel ni pa mono, Jeofa hay gorge desãy maaga jar ngaɓa mo da’ tenen maa tum (2 Pi 3:9, 15). Wer joŋre ɓe sen so, jar miliyon pur da’ wo wer ne hẽne. Hayga naa kaŋ ɗiggi we ti fẽẽre maa de el wo ga naa da’ wer gorge desãy maa ni Jeofan no, á kol yaŋ go see naa gus maa gor wur maaga á nduu taw fẽẽre maa de ɓlaggen wo go mono.

13. Yeso hay maŋ gorge desãy maa ni pan ɓen de deele na maŋge là? (Ko foton lay)

¹³ Yeso maŋ gorge desãy maa ni pan ɓen tew tew tu, lan se naa nen ɓe go de maaga á hay gesiŋ lam no. Á hay bay see ɓe tum gus maaga á mo naa nen gorge desãy go wa, debaŋ ɓe de maaga á hay peel farisiyẽẽ wo de jar ndar wer wããre Baa wo mono (Jaŋ 8:25-27). Doo pan ɓe ne lay, Yeso hay bay sõõ ɓil gus wa. Á hay bay joŋ jar de bay woore de maaga á hay ɗarge ɓe, noga duɗgi ɓem wa (1 Pi. 2:23).  Yeso soɗ mbe ren wo desãy bay ngrum jage. Ɗiŋ wersen so ga Bible wii naa ga naa mo “ɗig we ti ɓe, ɗig we ti ree bon maga jar ma de ɓlaggen jõŋ wo bon ɓe mo deŋ no” (Heb. 12:2, 3)! De kayge maa ni Jeofa, naa mbe de kããge maa soɗ re maa hõnla ɓuy tu sen.

14. Naa da’ mayse see saɓlaŋ gorge desãy maa ni Abraham là? (Hebre wo 6:15) (Ko foton lay).

¹⁴ Naa joŋ joŋge hayga tawge tamsir bay we age gus wa là? Maapo ga naa go de gorge ɓe hãã ɓaa ɓaa. Maapo naa joŋ hẽẽne ga á da’ naa tenen ga so. Mayse kay naa maaga naa mo hay tum gorge desãy là? Ko saɓlaŋ Abraham ɗa. De maaga kiŋgi Abraham hay 75, ga á hay bay de mbaarga wa ɗa mono, Jeofa wãã ne hẽn ga: “Ndi joŋge sir ma kluu ti’ yaŋ de ɓo” (Tĩĩ. 12:1-4). Abraham ko bagge jag fẽn maaga Baa wãã ne hẽn mbe we yawlà? bay ɓuy wa. Blam maaga á cegaɗ maarog maa Efrade go, se gor blam kiŋgi 25 taŋgu maaga Jeofa joŋ fẽn mbuɗgi maaga á mo da’ mbarga ɓe Isage mono. Lan kiŋgi maa tigriŋ blam 60 pa ga moore ɓe Esaw wo de Jakobe biŋ wo kay (Jaŋ Hebre wo 6:15). Amaa Abraham ko moore ɓe wo tesge ngaɓa ga, lan ko ra laage ɓil sir maaga Jeofa hay hãn ne hara mono ga. Amaa, blo se de hã ɓil hay maŋ see Jeofa (Jag 2:23). Day ti birgi Abraham mono, á fruy yaŋ debaŋ ti maaga ko ga sir ngaɓa hay da’ bosa’ wer hãge ɓil wo de gorge desãy ɓe mono (Tĩĩ. 22:18)! Á had mayse ne naa là? Maapo ga naa ko fẽẽre maaga Jeofa ngaɓ ra go bag jag wara ɓuy ga. Amaa hayga naa gor we desãy doo Abraham no lay no, naa joŋ yaŋ go de bawge jag jiili naa ga Jeofa poɗ naa yaŋ patala, lan debaŋ ɓe wo ɓil sir maa defay no​—Mark 10:29, 30.

15. Naa frug nen mayse ti hadge maaga naa de see naa là?

 ¹⁵ Ɓil Bible naa da’ saɓlaŋ jar maaga hay wo gorge desãy ni ngaɓa debaŋ (Jag 5:10). Á bay ba de woore maaga naa mo frug nen saɓlaŋ se ɓil Biblen wo wa? b Ko ba ɗa, Dafid hay klee de maaga à baa ne ga á mo hay waŋ Israyel mono; amaa á gor desãy kiŋgi pur taŋgu maaga se hay ti paale waŋ no. Simeyoŋ wo de Ane joŋ wo joŋre ne Jeofa de deele de maaga á hay wo gor Mesi maaga hay age mono (Lug 2:25, 36-38). De maaga ndo frug nen wããre maa ti jar sen wo we no, wii jag see ɓo ga: Mayse kay jee sen maaga á mo hay gorge desãy là? Á da’ mayse wer gorge desãy là? Ndi joŋ doo se ne na joŋge lay là? Maapo ndo da’ mbo see saɓlaŋ jar maaga naa wo nen gorge desãy go ga lay (1 Sam. 13:8-14). Wii jag see ɓo ga: ‘Mayse joŋ ga á mo hay wo gorge desãy wa là? Re mayse wo de baywoore da’ wo ra wer maaga á hay bay wo gorge desãy wa là?’

16. Da’ge maa hõn wo ga ndo da’ hayga ndo yaŋ gorge desãy là?

¹⁶ Ko da’ge maa wer gorge desãy no. Naa yaŋ gorge desãy no, ɓil naa joŋ go feh debaŋ, nen ti desãy lay. Doo sen ne kay gorge desãy joŋ ga ti naa mo hay de wooge, lan ga naa mo hay jam. Hayga naa yaŋ gor jar desãy no, holaŋ naa joŋ yaŋ de ɓaara de woore debaŋ. Laage jag joŋ ɓil tiŋ-Baa naan debaŋ lay. Hayga à du’ naa we, de bay sõõge ɓil gus kay yaŋ maaga ren mo ya’ wer ti holaŋ ɓay de peel ni wa (Siŋ. 37:8; Jõõ. 14:29). De daŋ sen ɓuy, naa yaŋ gorge desãy no, naa de joŋge diŋ doo Pan naa maa ciŋn ne no, day naa ya’ yaŋ see ɓe maŋ debaŋ lay.

17. Naa go de baa wer see naa maa joŋ mayselà?

¹⁷ Gorge desãy diŋ joŋre maa de woore ga naa da’ wer ɓe ɓuy! Á bay tum gus maaga naa mo hay gorge desãy wa, amaa wer kayge maa ni Jeofan mono, naa joŋ yaŋ de kããge maa kolge gorge desãy. Day werga naa de gor sir maa defayn desãy so mono, naa go de bawge jag jiili naa ga “Nen Manwur[Jeofa] de kaŋge ti jar maga joŋ wo hẽẽne ɓe mono, nen ɓe ti jar maga wo de gor ɓil de el ɓen mono.” (Siŋ. 33:18). Nen da ga naa mo hay go de baa wer see naa maaga naa mo hay tum grag see naa de gorge desãy.