1. Ngei tecipfarira anhu ano mwoyo unononoka kutsamwa?

 ZVAKANAKA maningi kugara no anhu ano mwoyo unononoka kutsamwa. Uye isusu tinoreremedza anhu anokwanisa kuetsera ciro asikanyangadzwi. Isusu tinotenda maningi kana munhu akapangidza mwoyo unononoka kutsamwa kunyazi takaita ciro cakashata. Uye tinotenda maningi munhu wakatifundisa Bhaibhei ngo kuetsera no mwoyo unononoka kutsamwa pataipeta masimba kuti tifundire, titendere kana kuti kuseenzesa muupenyu wedu zvataifunda. Kupinda zvese izvi tinotenda maningi Djehovha no mwoyo unononoka kutsamwa waanotipangidzira!—Aro. 2:4.

2. Migariro ipi ingatishuphira kupangidza mwoyo unononoka kutsamwa?

² Kunyazi tecikoshesa munhu paanopangidza mwoyo unononoka kutsamwa, pamweni zvingatishuphira kupangidzawo mwoyo uwona. Ngo muezaniso, pamweni zvingatishuphira kurumbwa takaterama pa mbuto ino karu dzakawanda maningi dziri kuda kudarika. Maka-maka panguwa yekuti tinonga tanonoka paciro catinonga takapangana no munhu. Uyewo, tingatama kugara no mwoyo unononoka kutsamwa kana munhu akaita ciro cinotinyangadza uye nguwa dzimweni kuetsera zvipikirhwa zvakaringana no nyika ipsva, zvingagara zvisiripi nyore. Imwimwi maizoda kutunhudzira kugara no mwoyo unononoka kutsamwa here? Mu fundo ino, ticaona kuti zvinoreyei kugara no mwoyo unononoka kutsamwa uye ngei izvona zvecikosha. Uyewo ticaona kuti ngazvipi zvicatibetsera kutunhudzira kuti tigare no mwoyo unononoka kutsamwa.

3. Munhu uno mwoyo unononoka kutsamwa unoitei anhu paanomuitira ciro cinomunyangadza?

³ Onai mishobo mirongomuna yatingapangidza mwoyo unononoka kutsamwa. Cekutanga, munhu uno mwoyo unononoka kutsamwa aakasiki kunyangadzwa. Uye aahwirinziri cakashata no cakashata  uye paanobatana no migariro inonyangadza iyena aabati anhu amweni ngo mushobo usikazi kunaka. Soko rokuti “anononoka kutsamwa” rinooneka kekutanga mu Bhaibheri Djehovha paanopanganidzwa hinga “Mwari ano upfawi uye usisi, anononoka kutsamwa, akadzara no rudo rakagondeka uye no cokwadi.”—Eki. 34:6.

4. Munhu uno mwoyo unononoka kutsamwa unoitei paanodikana kuetsera?

⁴ Cecipiri, munhu uno mwoyo unononoka kutsamwa unoetsera akaterama. Munhu uno mwoyo unononoka kutsamwa aavhunduki uye aanyangadzwi zviro pazvinononoka kuitika maererano no zvaanoda. (Mat. 18:26, 27) Pano migariro yakawanda yatinodikana kuetsera no mwoyo unononoka kutsamwa. Ngo muezaniso, tinodikana kupurutana no unononoka kutsamwa munhu paanonga ecireketa tisikamuguriri. (Djobo 36:2) Pamweni tinodikana kugara no mwoyo unononoka kutsamwa patinonga tecibetsera mufundi weBhaibheri kuti azwisise cokwadi ce Bhaibheri kuti akunde muitiro wakashata.

5. Tingapangidzazve mwoyo unononoka kutsamwa nge mushobo upi?

⁵ Cecitatu, munhu uno mwoyo unononoka kutsamwa aaiti zviro asikazi kurangarira. Izvirokwazvo kuti pa migariro imweni tinodikana kuita zviro no kukasika. Asi munhu uno mwoyo unononoka kutsamwa paanonga ecida kuita ciro cinokosha, iyena aaiti asikazi kunyasa kurangarira; kana kuti aaiti zviro no kukasika kuti acipedze. Pano kudaro, iyena unotora nguwa ecinyasa kurangarira kuti ungaciitisa kudini. Pedzepo, iyena unoseenzesa nguwa yakawanda kuti aite zviro ngemushobo kwawo.

6. Munhu uno mwoyo unononoka kutsamwa unoitei paanobatana no miedzo?

⁶ Cecirongomuna, munhu uno mwoyo unononoka kutsamwa unopeta masimba kuti akurire miedzo asingagurunguti. Ndiyo ndaa, kajinji kakhona mwoyo unononoka kutsamwa wakabatana no kushingirira. Izvirokwazvo kuti azvizi kushata kufungura mwoyo wedu toreketa no shamwari yedu zviro zviri kutinetsa, asi munhu unoetsera no munhu uno mwoyo  unononoka kutsamwa iyena unokanda ndangariro pa zviro zvakanaka zvaanazvo uye unoita zvese zvaanokwanisa kuti arumbwe eciseenzera Djehovha no mupfaro. (Ako. 1:11) Aseenzi a Djehovha anodikana kupangidza mwoyo unononoka kutsamwa pa migariro ii yese. Ngei mecidikana kuita kudaro? Ngatione zvikonzero zvinganani.

7. Maererano na Tiyago 5:7, 8, ngei mwoyo unononoka kutsamwa unokosha maningi? (Onaiwo foto.)

⁷ Tinodikana kugara no mwoyo unononoka kutsamwa kana tecida kurarama nokusikaperi. Kuita hinga aseenzi e kare, tinodikana kugara no mwoyo unononoka kutsamwa, toetsera kuti Djehovha adzadzise zvaakapikira. (Aheb. 6:11, 12) Bhaibheri rinoezanisa mugarire wedu no mugarire we murimi. (Erengai Tiyago 5:7, 8.) Murimi unoseenza no simba kuti arime, nokudirira zviro zvaanonga asima asi iyena aazii kuti zvicakura rini. Hino, murimi unodikana kuetsera no mwoyo unononoka kutsamwa ecigonda kuti ucakorora zvaakasima. Nge mushobo umwewo, tinodikana kugara takabatikana pa zviro zvekunamata, kunyazi “tisikazii zuwa ricauya tenzi” wedu. (Mat. 24:42) Tinoetsera no mwoyo wese, tino rugondo rekuti Djehovha acadzadzisa zviro zvese zvaakapikira. Kana tikatama kugara no mwoyo unononoka kutsamwa, ticaremba uye padoko no padoko ticagara kure na Djehovha, totanga kukanda ndangariro dzedu pa zviro zvatinoona kuti zvinotipasa mupfaro zvino. Asi kana tikagara no mwoyo unononoka kutsamwa, ticakwanisa kushingirira dakara kumugumo uye toponeswa.—Mik. 7:7; Mat. 24:13.

8. Mwoyo unononoka kutsamwa unotibetsera kudini kuti tigarisane no amweni? (Akorosi 3:12, 13)

⁸ Mwoyo unononoka kutsamwa unotibetsera kuti tigarisane zvakanaka no amweni uye tinyase kuapurutana paanonga ecireketa. (Tig. 1:19) Kusiya izvona, mwoyo unononoka kutsamwa unotibetsera kuti tigare murunyararo no amweni. Tingagara no mwoyo unononoka kutsamwa kunyazi patinonga tecinetseka mundangariro. Atizoiti zviro tisikazi kurangarira, kureketa zviro zvaizokuwadza amweni uye atizoitiwo zviro no shungu kana amweni akatinyangadzisa. Pano kuita zviro kuti tihwirinzire cakashata no cakashata, ticapeta masimba kuti “tishingirire zvishaishi zvaizwa no amweni edu uye torekerera umwe na umwe wedu.”—Erengai Akorosi 3:12, 13.

9. Mwoyo unononoka kutsamwa ungatibetsera kudini patinonga tecida kuita zvisananguro? (Zvierengo 21:5)

⁹ Mwoyo unononoka kutsamwa unngatibetsera patinonga tecida kuita cisananguro. Pane kuti tikasikire uye kuita zviro tisikazi kunyasa kurangarira, tinodikana kutora nguwa toona zviro zvatingaita kuti tikwanise kuita cisananguro cakanaka. (Erengai Zvierengo 21:5.) Ngo muezaniso, patinonga tecipsvaka basa, pamweni tingazotenda basa rekutanga ratinonga taona, kunyazi hazvo zvecizoita kuti tiruze misangano imweni kana kuti kuthurudza nguwa yataiita basa rekuparidzira. Asi tikagara no mwoyo unononoka kutsamwa, ticatanga kurangarira mbuto yaticaitira basa, nguwa yaticapedza tiri ikona uye kuti izvona zvicabata-bata kudini mhuri yedu no ukama wedu na Djehovha. Tikagara anhu ano mwoyo unononoka kutsamwa, ticakwanisa kuita zvisananguro zvakanaka.

10. Mukristu unodikana kuitei kuti atunhudzire uye arumbwe ano mwoyo unononoka kutsamwa?

¹⁰ Itai munamato mecikumbira kuti mutunhudzirhwe mwoyo unononoka kutsamwa. Mwoyo unononoka kutsamwa unobatanidzwa pa zvibereko zve mwiya mucena. (Aga. 5:22, 23) Ndiyo ndaa tinodikana kuita munamato tecikumbira kuti Djehovha atipase mwiya mucena uye atibetsere kuti tigare no mawara e zvibereko zve mwiya mucena. Patinobatana no mugariro unoita kuti mwoyo unononoka kutsamwa wedu uedzwe, isusu “ticarumbwa tecikumbira” mwiya mucena kuti utibetsere kuti tipangidze mwoyo unononoka  kutsamwa. (Ruka 11:9, 13) Kusiya izvona tingakumbira Djehovha kuti atibetsera kuti tione zviro ngo mushobo waanozviona. Pano kuita munamato basi, tinodikana kupeta masimba kuti tiite zviro zvatinokwanisa zuwa no zuwa. Patinorumbwa teciita munamato tecikumbira mwoyo unononoka kutsamwa uye topeta masimba kuti tikwanise kugara no mwoyo uona, wara iri ricagara no nzinde mu mwoyo medu uye ricagara dii re mawara edu.

11-12. Djehovha anosopangidza mwoyo unononoka kutsamwa ngo mushobo upi?

¹¹ Nyasai kurangarira miezaniso yo mu Bhaibheri. Bhaibheri rinoreketa ngezve anhu akawanda akapangidza mwoyo unononoka kutsamwa. Patinorangarira ngezve miezaniso ii, tinofundira mishobo yakasiyana-siyana ye kupangidza mwoyo unononoka kutsamwa. Tisati taongorora ngezve miezaniso ii, ngatimbofunde kubva ku muezaniso mukuru wekupangidza mwoyo unononoka kutsamwa—Djehovha.

¹² Mu munda we Edheni, Sathani wakaedza kubararisa manyepo eciedza kusvipisa unhu wa Djehovha ecireketa kuti iyena ndimutungamiriri asiripi mu natsi uye unondodzirangarira. Kudai Djehovha naaida iyena aizoparadza Sathani pa nguwa iyona kamare. Asi iyena wakapangidza mwoyo unononoka kutsamwa ngekuti waiziya kuti zvaizotora nguwa kuti zvibude pamhene kuti utongi wake diwo wakanaka kupinda wese. Paanonga etsietsera kuti zviro izvi zviitike iyena unogara no mwoyo unononoka kutsamwa eciona anhu ecibararisa manyepo nge zvake. Nge dii rimweni, Djehovha unogara no mwoyo unononoka kutsamwa ngekuti unoda kuti anhu ese aone upenyu usikaperi. (2 Ped. 3:9, 15) Mugumisiro wakhona ngewe kuti, mamiriyonji e anhu akaguma pakuziya Djehovha. Mwoyo unononoka kutsamwa wa Djehovha unotiunzira makomborero akawanda. Patinokanda ndangariro dzedu pakunononoka kutsamwa ka Djehovha zvinotibetsera kuti isusuwo tietsere no mwoyo unononoka kutsamwa kuguma ke mugariro uno we zviro.

13. Djesu akateedzera kudini zvakakwana muezaniso wa Djehovha wekupangidza mwoyo unononoka kutsamwa? (Onaiwo foto.)

 ¹³ Djesu akateedzera zvakakwana muezaniso wekupangidza mwoyo unononoka kutsamwa wa Baba ake, uye iyena akaita izvona paainga ari panyika pano. Zvainga zvisiripi nyore kupangidza mwoyo unononoka kutsamwa nguwa dzese, maka-maka ku atari no afarisi ainga asikazwiri mutemo. (Juau 8:25-27) Kuita hinga baba ake, Djesu ainga asikanyangadzwi nokukasika. Anhu paaimuyambira, ainga asikawhirinziri. (1 Ped. 2:23) Uye Djesu akakurira muedzo no mwoyo unononoka kutsamwa asikagurunguti. Hino, zvinozwisisika kuona kuti ngei Bhaibheri recibhuya kuti tinodikana “kuongorora nge padhuze muezaniso we munhu wakakwanisa kukurira masoko e ashaishi”! (Aheb. 12:2, 3) No rubetso ra Djehovha, isusu tingakwanisa kukurira dambudziko ripi haro no mwoyo unononoka kutsamwa.

14. Tingafundei kubva pa mwoyo unononoka kutsamwa wa Abrahamu? (Ahebheru 6:15) (Onaiwo foto.)

¹⁴ Pamweni imwimwi muri kuetsera kupera ke nyika ino ke nguwa yakareba. Pamweni zvino maakurangarira kuti amucararami nguwa yakareba kuti muone mugumo uu wecikhwedera. Ngazvipi zvingatibetsera kuti tietsere no mwoyo unononoka kutsamwa? Onai muezaniso Abrahamu. Abraham paainga ano makore anokwana kuita 75 uye wainga asati aano mwana, Djehovha akamupikira kuti: “Ndicaita kuti kuoneke dzinza guru kubva kauri.” (Gen. 12:1-4) Kodi Abrahamu wakakwanisadi kuona cipikirhwa ici cecidzadzika here? Nge dii rimweni honde. Mumasure mekudarika Murambo we Eufrati uye mumasure mekuetsera makore anokwana kuita 25, Abrahamu wakaona kubarhwa ke mwana wake Izaki, ici cainga ciri cishamiso cakakura. Uye paapadarikazve makore 60 iyena wakaona kubarhwa ke azukuru ake airi Isau na Djakobo. (Erengai Ahebheru 6:15.) Asi Abrahamu aazi kuona ana ake ecigara  dzinza guru uye aazi kuona anhu ecipinda mu Nyika Yakapikirhwa. Kunyazi zvakadaro, mwanarume uu wakagondeka wakarumbwa ano ushamwari we padhuze no Musiki wake. (Tig. 2:23) Abrahamu paacamutswa, ucapfara maningi ngokuziya kuti ngo ndaa yekutenda kake madzinza ese akakomborerhwa! (Gen. 22:18) Tinofundei? Pamweni atizooni zvipikirhwa zvese zva Djehovha zvecidzadzika mu nguwa yedu ino. Asi tikagara no mwoyo unononoka kutsamwa hinga Abrahamu, tingagara no rugondo kuti Djehovha acatikomborera zvino uye acatikomborera zvakatunhudzirika munyika ipsva.—Mark. 10:29, 30.

15. Ngazvipi zvatingafunda pa fundo yedu ye munhu ega?

¹⁵ Mu Bhaibheri, tinogumira miezaniso yakawanda ye anhu akapangidza mwoyo unononoka kutsamwa. (Tig. 5:10) Munorangarira kudini ngezve kugara no urongwa wekufunda uye mokwarakwatisa zvakawanda? b Ngo muezaniso, Dhavhidhi wakasanangurhwa kuti agare mutungamiriri we Aisraeri aciri djaha kamare uye iyena waidikana kuetsera ke makore akawanda kuti azogare mambo. Muezaniso umweni ngewa Simeyau na Ana. Awona akanamata Djehovha akagondeka paaietsera kuuya ka Mesiya. (Ruka 2:25, 36-38) Pamunonga mecifunda ngano idzi, dziitei mibvunzo inoteera: Ngei munhu uu wakapangidza mwoyo unononoka kutsamwa? Kugara no mwoyo unononoka kutsamwa kakabetsera kudini munhu uu? Ndingamuteedzerawo kudini? Imwimwi mungafundawo kubva ku anhu aya asikazi kupangidza mwoyo unononoka kutsamwa. (1 Sam. 13:8-14) Pamunoongorora miezaniso ii, dzibvunzisei kuti: ‘Ngei munhu uu asikazi kugara no mwoyo unononoka kutsamwa? Zviro zvipi zvakashata zvakaitika ngokutama kupangidza mwoyo unononoka kutsamwa?’

16. Ngaapi makomborero atingaona nge kupangidza mwoyo unononoka kutsamwa?

¹⁶ Rangaridzai ngezve makomborero ekupangidza mwoyo unononoka kutsamwa. Munhu uno mwoyo unononoka kutsamwa i munhu uno pfara uye wakaterama. Kusiya izvona, mwoyo unononoka kutsamwa ungaita kuti tigare no uthongo uri nane. Patinopangidza mwoyo unononoka kutsamwa tinogara no shamwari dzakanaka uye tinogarisana zvakanaka no amweni. Kusiepo izvi, ungano yedu inogara yakabatana. Munhu paanotinyangadzisa, tinopeta masimba kuti zviro zvisabambirire kushata. (Pis. 37:8, masoko e pasi; Zvie. 14:29) Cinonyanya kukosha, patinopangidza mwoyo unononoka kutsamwa, tinonga teciteedzera Djehovha Baba uye torumbwa tecibambisa ukama wedu naye.

17. Tinodikana kushinga kuitei?

¹⁷ Zvezvirokwazvo, mwoyo unononoka kutsamwa iwara rakanaka maningi uye rinobetsera tese isusu! Izviro kwazvo kuti azviripi nyore nguwa dzese kupangidza mwoyo unononoka kutsamwa. Asi no rubetso ra Djehovha, tingarumbwa tecipangidza wara iri. Patinonga tecietsera nyika ipsva, tingagara no rugondo kuti “madziso a Djehovha anoringira aya anomuthya no aya anoetsera rudo rake rakagondeka.” (Pis. 33:18) Hino tinodikana kushinga kurumbwa tecipangidza mwoyo unononoka kutsamwa.