1. No te aha mea au na outou te taata faaoromai?

 PAUROA tatou te au nei i te taata faaoromai, e roaa hoi ia ˈna i te tiai maite ma te ore e iria noa. E faaoromai atoa o ˈna i ta tatou mau hape. Te mauruuru atoa nei tatou i te taata i haapii ia tatou i te Bibilia, ua titauhia hoi te taime no tatou no te haapii, no te farii e no te faaohipa i ta te Bibilia e parau ra. Hau atu â, e mauruuru rahi to tatou i te Atua ra ia Iehova no to ˈna faaoromairaa ia tatou.—Roma 2:4.

2. I roto i teihea tupuraa e mea fifi ia faaoromai?

² Noa ˈtu e faahiahia tatou i te taata faaoromai, mea fifi paha no tatou ia faaite i teie huru maitai. E haraooo paha tatou a mau ai te tereraa pereoo, e taerehia hoi tatou. E nehenehe tatou e iria ua fiu roa anaˈe tatou i te taata. E i te tahi taime, mea fifi no tatou ia tiai ia tae mai te ao apî ta Iehova i fafau. E hinaaro anei oe e faatupu atu â i te faaoromai? I roto i teie tumu parau haapiiraa, e hiˈo tatou eaha mau na te faaoromai e no te aha e huru maitai faufaa roa teie. E hiˈo atoa tatou e nafea ia faaoromai atu â.

3. Eaha te huru o te taata faaoromai ia aa te taata ia ˈna?

³ E maha ravea e nehenehe ai tatou e faaite i te faaoromai. A tahi, eita te taata faaoromai e riri oioi. E vai hau noa o ˈna e eita oia e tahoo ia aa te taata ia ˈna aore ra ia  ahoaho o ˈna. Te taime matamua e itehia ˈi te parau e “ore e riri oioi” i roto i te Bibilia, i te taime ïa e faataahia ˈi te huru o Iehova. Te na ôhia ra no ˈna e “e Atua aroha hamani maitai e te aumihi, o te ore e riri oioi, o tei rahi i te here taiva ore e te parau mau.”—Exo. 34:6.

4. Eaha te huru o te taata faaoromai ia titauhia ia ˈna ia tiai?

⁴ A piti, e roaa i te taata faaoromai ia tiai ma te hau. Ia taerehia te hoê ohipa, eita te taata faaoromai e haraooo aore ra e ru noa. (Mat. 18:26, 27) Mea rahi te tupuraa e titauhia ˈi ia tatou ia tiai ma te hau. Ei hiˈoraa, ia paraparau te hoê taata, eita tatou e tâpû i ta ˈna parau, e faaroo maite râ tatou ia ˈna. (Ioba 36:2) E titau-atoa-hia te faaoromai no te tauturu i te hoê piahi ia taa i te hoê haapiiraa Bibilia aore ra ia haapae i te tahi peu ino.

5. E nafea ˈtu â tatou ia faaite i te faaoromai?

⁵ A toru, eita te taata faaoromai e ru hanoa. Parau mau, i te tahi taime, e tia ia haa oioi. Tera râ, e hopoia faufaa anaˈe ta te taata faaoromai, eita o ˈna e ru hanoa i te haamata e i te faaoti i ta ˈna ohipa. E faanaho maite râ oia i te reira no te ite eaha te rave. I muri iho, e rave oia i te taime no taua ohipa ra.

6. Eaha te huru o te taata faaoromai i mua i te haafifiraa?

⁶ A maha, e faaruru te taata faaoromai i te haafifiraa ma te ore e amuamu. Parau mau, ia faaruru tatou i te fifi, e hinaaro paha tatou e haamahora i to tatou aau i te hoê hoa piri. Tera râ, e faaoromai tamau o ˈna i te fifi ma te tapea i te hoê feruriraa maitai. (Kol. 1:11) Ei Kerisetiano, e tia ia tatou ia faaite i teie mau tuhaa atoa o te faaoromai. E hiˈopoa anaˈe i te tahi mau tumu e na reira ˈi tatou.

7. Ia au i te Iakobo 5:7, 8, no te aha mea faufaa te faaoromai? (A hiˈo atoa i te hohoˈa.)

⁷ Mea faufaa roa te faaoromai no te fanaˈo i te ora mure ore. Mai te mau tavini haapao maitai no tahito ra, e titauhia ia tatou ia tiai maite ia faatupu te Atua i ta ˈna mau parau fafau. (Heb. 6:11, 12) Te faaau ra te Bibilia i to tatou tupuraa i to te hoê taata faaapu. (A taio i te Iakobo 5:7, 8.) E rohi te taata faaapu no te tanu e no te pîpî i ta ˈna maa i te pape, aita râ o ˈna i ite afea te reira e tupu ai. E tiai maite ïa o ˈna ma te tiaturi e e ooti mai iho â o ˈna. Hoê â huru no tatou. E tamau tatou i te rohi i roto i te taviniraa, noa ˈtu aita tatou “i ite eaha te mahana e haere mai ai to [tatou] Fatu.” (Mat. 24:42) E tiai maite tatou ma te tiaturi e ia tae i te taime faataahia, e faatupu Iehova i ta ˈna i fafau. Ia ore tatou e faaoromai, e fiu paha tatou i te tiai a atea ê atu ai i te parau mau. E haamata atoa paha tatou i te tapi i te mau mea navenave o te oraraa. Ia faaoromai râ tatou, e tapea tatou i te feruriraa maitai e tae roa ˈtu i te hopea.—Mika 7:7; Mat. 24:13.

8. E nafea te faaoromai e tauturu mai ai ia vai hau noa e te taata? (Kolosa 3:12, 13)

⁸ Mea faufaa te faaoromai no te vai hau noa e te taata. E tauturu te reira ia faaroo maite a paraparau ai te hoê taata. (Iak. 1:19) E tupu atoa te hau ia faaite tatou i te faaoromai. Eita tatou e iria aore ra e taora parau ia tâhiti roa tatou. E eita tatou e riri oioi ia mauiui tatou. Eita tatou e tahoo, e pee râ tatou i teie aˈoraa: “A faaoromai noa i te tahi e te tahi, e ia hapa noa mai te tahi ia oe, a faaore noa ˈtu ïa i ta ˈna hapa.”—A taio i te Kolosa 3:12, 13.

9. No te aha mea faufaa te faaoromai ia rave tatou i te hoê faaotiraa? (Maseli 21:5)

⁹ E tauturu atoa mai te faaoromai ia rave i te mau faaotiraa maitai. E rave tatou i te taime no te maimi e no te feruri i te ravea e vai ra ia tatou. Eita tatou e ru noa i te rave i te faaotiraa. (A taio i te Maseli 21:5.) Ei hiˈoraa, ia imi tatou i te ohipa, eita tatou e farii i te ohipa na mua mai. Mai te peu e haafifi te reira ia tatou ia tae i te putuputuraa e i roto i te taviniraa, to mua ïa tatou i te haapao. Ia faaoromai râ tatou, e rave tatou i te taime no te feruri i te atea o te vahi raveraa ohipa, ehia hora ohipa e te faahopearaa i nia i to tatou utuafare e to tatou oraraa Kerisetiano. Maoti te faaoromai, e rave ïa tatou i te faaotiraa maitai.

10. E nafea te hoê Kerisetiano e faatupu e e tamau ai i te faaoromai?

¹⁰ A pure no te faaoromai atu â. E tuhaa te faaoromai o te mau huru maitatai ta te varua moˈa e faatupu. (Gal. 5:22, 23) E pure tatou ia Iehova no te ani i to ˈna varua no te faaite i te faaoromai. I mua i te tamataraa, e “tamau [anaˈe] i te ani” i te varua moˈa no te faaoromai. (Luka 11:9, 13) E ani atoa tatou ia Iehova ia tauturu mai ia pee i ta ˈna huru hiˈoraa. Ia oti ta tatou pure, e tutava anaˈe i te faaite i te faaoromai i te mau mahana atoa. Rahi atu â tatou i te faaoromai e i te tamau i te na reira, rahi atu â ïa teie huru maitai i te aˈa i roto i to tatou aau.

11-12. Mea nafea to Iehova faaiteraa i te faaoromai?

¹¹ A feruri i te mau hiˈoraa Bibilia. E  rave rahi hiˈoraa maitai i roto i te Bibilia tei faaite i te faaoromai. Ma te feruri i nia iho, e nehenehe tatou e haapii e nafea ia faaoromai. Hou a hiˈopoa ˈi i te tahi mau hiˈoraa, e tuatapapa anaˈe i te hiˈoraa faahiahia roa ˈˈe o te faaoromai, oia hoi o Iehova.

¹² I roto i te ô i Edene, ua faaino Satani i te iˈoa o Iehova e ua tuino atoa i to ˈna roo ma te parau e e faatere ino o ˈna e te parau-tia ore. Aita Iehova i haamou ia Satani i tera iho â taime, ua faaoromai râ o ˈna e ua haavî oia ia ˈna iho. Ua ite hoi o ˈna e e titauhia te taime no te haapapu e ta ˈna te faatereraa maitai roa ˈˈe. A tiai noa ˈi râ, te faaoromai tamau ra oia i te faainoraa atoa tei tuino i to ˈna roo. Hau atu, te tiai maite ra oia ia nehenehe hau atu â taata e fanaˈo i te ora mure ore. (Pet. 2, 3:9, 15) No reira, e mirioni taata tei haapii no nia ia ˈna. Ia feruri tatou i te mau maitai ta te faaoromai o Iehova i hopoi mai, e ohie aˈe no tatou ia tiai i te taime ta ˈna i faataa ia tae mai te hopea.

13. Mea nafea Iesu i te peeraa i te faaoromai o to ˈna Metua ma te tia roa? (A hiˈo atoa i te hohoˈa.)

¹³ Ua pee Iesu i te faaoromai o to ˈna Metua ma te tia roa, e ua faaite o ˈna i te reira a ora ˈi i te fenua. E ere paha i te mea ohie no Iesu ia faaoromai noa, i mua iho â râ i te mau papai parau e te mau Pharisea haavarevare. (Ioa. 8:25-27) Tera râ, mai ia Iehova, aita Iesu i riri oioi e i tahoo i te taata tei parau ino e tei aa ia ˈna. (Pet. 1, 2:23) Ua faaoromai tamau Iesu ma te ore e amuamu. Eita ïa tatou e maere ia parau te Bibilia ia “haamanaˈo maite i tei faaoromai rahi i te mau parau patoi a te feia rave hara.”  (Heb. 12:2, 3) Maoti te tauturu a Iehova, e nehenehe atoa tatou e faaoromai tamau noa ˈtu eaha te tupuraa.

14. Eaha te haapii mai i te faaoromai o Aberahama? (Hebera 6:15) (A hiˈo atoa i te hohoˈa.)

¹⁴ Eaha te rave aita anaˈe te mea ta tatou i tiai noa na e tupu? Peneiaˈe ua tiai noa tatou i te ao apî, e aita â i tae mai atura. E taiâ paha tatou ahani tatou e pohe ai hou te hopea o teie nei ao. Na te aha râ e tauturu ia tatou ia tiai maite? Maoti ïa te hiˈoraa o Aberahama. E 75 matahiti to ˈna i to Iehova fafauraa ia ˈna e: “E faariro vau ia oe ei nunaa rahi.” Te tahi atoa fifi, aita ta Aberahama e tamarii i tera taime. (Gen. 12:1-4) Ua ite anei Aberahama i te tupuraa teie parau fafau? Aita. Ia ˈna i haere i te tahi atu pae o te anavai Eupharate, ua tiai o ˈna e 25 matahiti hou a fanauhia mai ta ˈna tamaiti ra o Isaaka. E i muri aˈe e 60 matahiti, ua fanauhia mai ta ˈna na mootua o Esau raua Iakoba. (A taio i te Hebera 6:15.) Aita râ Aberahama i ite i to ˈna huaai i te riroraa ei nunaa rahi a fatu ai i muri iho i te Fenua tǎpǔhia. Tera râ, ua riro teie tavini haapao maitai ei hoa piri no to ˈna Atua poiete. (Iak. 2:23) Ia tia faahou mai Aberahama, eita e ore e e oaoa roa o ˈna ia ite e maoti to ˈna faaroo e to ˈna faaoromai, ua haamaitaihia te mau nunaa atoa. (Gen. 22:18) Eaha te haapiiraa? Eita paha tatou e ite mata roa i te mau parau fafau atoa a Iehova ia tupu. Ia faaoromai râ tatou mai ia Aberahama, e haamaitai iho â Iehova ia tatou i teie nei â e hau atu â i roto i te ao apî ta ˈna i fafau.—Mar. 10:29, 30.

15. Eaha te nehenehe e tuatapapa i roto i ta tatou iho haapiiraa?

 ¹⁵ I roto i te Bibilia, e rave rahi hiˈoraa maitai tei faaite i te faaoromai. (Iak. 5:10) E faufaa-rahi-hia outou ia tuatapapa outou i te reira. b Ei hiˈoraa, te apî noa ra Davida i to ˈna faatavairaahia no te riro ei arii no Iseraela. Ua tiai râ oia e rave rahi matahiti hou a fanaˈo roa ˈi i te tiaraa arii. Te vai atoa ra o Simeona raua Ana tei tavini ia Iehova ma te taiva ore a tiai noa ˈi ia fa mai te Mesia fafauhia. (Luka 2:25, 36-38) Ia tuatapapa outou i teie mau aamu, a feruri i to muri nei mau uiraa: Na te aha i tauturu i teie tavini ia faaoromai? Mea nafea o ˈna i te faufaaraahia a faatupu ai i te faaoromai? E nafea vau e pee ai i to ˈna hiˈoraa? Mea rahi atoa te haapii mai i te hiˈoraa o te feia tei ore i faaoromai. (Sam. 1, 13:8-14) A ui ia outou iho: ‘No te aha aita ratou i faaoromai? Eaha te mau fifi ta ratou i faaruru?’

16. Eaha te haamaitairaa ia faaite i te faaoromai?

¹⁶ A feruri i te mau haamaitairaa e fanaˈohia ia faaoromai. Ia faaoromai tatou, e vai hau e e oaoa noa tatou. Hau atu, eita tatou e hepohepo a maˈihia ˈtu ai. Ia faaite tatou i te faaoromai i te taata, e fanaˈo tatou i te mau hoa maitai e e tahoê atoa te amuiraa. Ia aa noa mai te tahi ia tatou, eita teie tupuraa e uˈana inaha ua haapii tatou i te ore e riri oioi. (Sal. 37:8, nota; Mas. 14:29) Te mea faufaa roa ˈtu â, ia faatupu tatou i te faaoromai, e pee ïa tatou i te hiˈoraa o to tatou Metua i te raˈi a vai piri noa ˈi tatou ia ˈna.

17. Eaha ta tatou e faaoti papu i te rave?

¹⁷ E huru maitai nehenehe mau te faaoromai. Noa ˈtu e ere i te mea ohie ia faaoromai, e haere ia tatou maoti te tauturu a Iehova. A tiai noa ˈi i te ao apî, e nehenehe tatou e papu “tei nia te mata o Iehova i te feia e mǎtaˈu ra ia ˈna, te feia o te tiaturi nei i to ˈna here taiva ore.” (Sal. 33:18) E faaoti papu anaˈe ïa i te ahu noa mai i te faaoromai.