1. ¿Bin yuʼun ya amulan sjokinel te machʼatik lamal yoʼtanik?

 JPISILTIK ya jmulantik sjokinel te machʼatik lamal yoʼtanik. ¿Bin yuʼun? Melel ya kichʼtik ta mukʼ te machʼatik ya xmaliywanik sok slamalil yoʼtanik. Jaʼnix jich, mukʼ skʼoplal ya kiltik te ya yakʼik ta ilel lamal oʼtanil kʼalal ay bin ma lek ya jpastik. Sok ya kaltik wokol ta stojol te machʼa la yakʼbotik nojptesel ta Biblia, melel la yakʼ ta ilel lamal oʼtanil kʼalal ay bin wokol la kaʼiytik yichʼbeyel swentail sok te kʼalal ay bin wokol la kaʼiytik spasel. ¡Ya kaltik wokol ta stojol Jehová te ya yakʼ ta ilel lamal oʼtanil ta jtojoltik! (Rom. 2:4).

2. ¿Bantiwan wokol ya kaʼiytik yakʼel ta ilel lamal oʼtanil?

² Jpisiltik mukʼ skʼoplal ya kiltik te machʼatik ay slamalil yoʼtanik. Pero ayniwan wokol ya kaʼiytik te kʼalal joʼotik ya kakʼtik ta ilel te talelil-abi. Wokolniwan ya kaʼiytik yakʼel ta ilel lamal oʼtanil kʼalal ay banti ma xkʼaxotik ta ora sok te jcarrotik, kʼaxtoxan-a teme ay banti ya skʼan ya xkʼootikixe. Te kʼalal ay bin ma jmulantik ya spasik te yantike, yaniwan x-ilinotik yuʼun. Sok yaniwan jnoptik te yak ta jalajel te achʼ balumilal te sjapoj te Jehová. ¿Mabal jichuk te ya skʼan ya kakʼtikxan ta ilel slamalil oʼtanil? Ta artículo ini ya kiltik bin smakbeyoj skʼoplal te talelil-abi, sok bin yuʼun mukʼ skʼoplal. Jaʼnix jich ya xbajt jnoptik te bin ya xjuʼ ya skoltayotik yuʼun ya kakʼtikxan ta ilel lamal oʼtanil.

3. ¿Bin ya spas te machʼa lamal yoʼtan kʼalal ay bin ma lek ya yichʼ pasbeyel?

³ Kiltik chanchajp talelil te ya yakʼ ta ilel te machʼa lamal yoʼtane. Sbabial, maba ya x-ilin ta ora. Ya spas tulan yuʼun ya yakʼ ta ilel lamal oʼtanil manchukme tenbil ya yaʼiy sba sok maba ya yakʼbey spakol kʼalal ay bin ma lek ya yichʼ pasbeyel.  Te talelil-abi, ya xchiknaj ta sbabial buelta ta Biblia kʼalal ya yichʼ albeyel te Jehová «te ay bayel scʼuxul yoʼtan soc te ay yutsil yoʼtan, ma orahuc ya xʼilin, mero mucʼ scʼuxul yoʼtan soc stalel jun yoʼtan» (Éx. 34:6).

4. ¿Bin-utʼil ya yakʼ ta ilel te ya snaʼ smaliyel te machʼa lamal yoʼtan?

⁴ Schebal, te machʼa lamal yoʼtan ya snaʼ smaliyel. Maba ya x-ilin kʼalal ay bin ma orauk ya xkʼot ta pasel (Mat. 18:26, 27). Bayal bin-utʼil ya kakʼtik ta ilel te slamalil oʼtanil. Jich bitʼil te kʼalal ay machʼa ay bin ya scholbotik ya skʼan ya jchʼam kaʼiytik sok slamalil koʼtantik sok te ma jtuchʼbeytik te skʼope (Job 36:2). Jaʼnix jich ya skʼan lamaluk koʼtantik kʼalal ya jkoltaytik te machʼa ya jnojptestik ta Biblia yuʼun ya xkʼot ta yoʼtan o yuʼun ya yijkitay ta spasel te bin ma lek.

5. ¿Binxan-utʼil ya kakʼtik ta ilel lamal oʼtanil?

⁵ Yoxebal, te machʼa lamal yoʼtan ma orauknax ay bin ya skʼan ya spas. Melelnix-a te ay bin ya skʼan ya yichʼ pasel ta orae. Pero teme mukʼ skʼoplal te bin ya yichʼ pasel, te machʼa lamal yoʼtan ma orauknax ya spas sok ma orauknax ya skʼan ya slajin spasel. Ya skʼan ya slokʼes tiempo ta snopel te bin ya spas, ta patil ya slokʼes tiempo ta spasel ta lek te aʼtelil-abi.

6. ¿Bin ya spas te machʼa ay slamalil yoʼtan te kʼalal ya xkʼax swokole?

⁶ Schanebal, te machʼa ay slamalil yoʼtan ya stsʼijk yuʼun te swokole sok maʼyuk bin ya yal yuʼun. Te slamalil oʼtanil snitoj sba skʼoplal sok te ya xkujch kuʼuntik. Leknix-a te ya jcholbeytik te kamigotaktik te bin yak ta kʼaxel ta jtojoltike. Pero te kʼalal ay slamalil koʼtantik ya jpastik tulan te tseʼeluk koʼtantik sok te ya x-abatinotik ta stojol te Jehová (Col. 1:11). Te j-abatetik yuʼun te Jehová ya skʼan ya yakʼik ta ilel ta spisil-ora te ay slamalil yoʼtanik. ¿Bin yuʼun? Kiltik cheʼoxeb swentail.

7. Jich bitʼil ya yal Santiago 5:7, 8, ¿bin yuʼun mukʼ skʼoplal te lamal oʼtanile? (Jaʼnix jich ilawil te dibujoetik).

⁷ Te lamal oʼtanil mukʼ skʼoplal yuʼun ya jta jkoleltik. Jich bitʼil te j-abatetik yuʼun te Dios ta namey la snaʼik smaliyel, jaʼnix jich te joʼotike ya skʼan te ay slamalil koʼtantik yuʼun ya jmaliytik te ya skʼotes ta pasel te bin jamal yaloj te Diose (Heb. 6:11, 12). Te Biblia ya spajaltayotik jich bitʼil te machʼa ya yaʼiy tsʼunbajel (kʼopona Santiago 5:7, 8). Te machʼa ya yaʼiy tsʼunbajel tulan ya x-aʼtej, ya yakʼbey yaʼlel manchukme ma snaʼ bin-ora ya xchʼi te tsʼunube. Jaʼ yuʼun ya smaliy sok slamalil yoʼtan, melel ya snaʼ te ya stsobey te site. Jichnix ya spasik te j-abatetik yuʼun te Diose: tulan ya x-aʼtejik ta stojol te Jehová manchukme ma snaʼik bin kʼajkʼalil ya xtal te Yajwalike (Mat. 24:42). Jaʼ yuʼun ya jmaliytik sok slamalil koʼtantik, ya jnaʼtik te ya skʼotes ta pasel te Jehová te bin jamal yaloje. Teme ya xlujbotik ta smaliyel, yaniwan xjuʼ te ya xnamajotik ta stojol te Jehová. Jaʼniwan ya xbajt ta koʼtantik spasel te bin ya yakʼbotik stseʼelil koʼtantik ta ora ini. Pero teme ay slamalil koʼtantik, ya xkujch kuʼuntik kʼalalto ta slajibal kʼajkʼal sok yame jta jkoleltik (Miq. 7:7; Mat. 24:13).

8. ¿Bin-utʼil ya skoltayotik te lamal oʼtanil yuʼun lek ya kil jbatik sok te yantik? (Colosenses 3:12, 13).

⁸ Te lamal oʼtanil ya skoltayotik yuʼun lek ya kil jbatik sok te yantike. Teme ay slamalil koʼtantik, ya jchʼam kaʼiytik te bin ya yalik te yantik (Sant. 1:19). Jaʼnix jich ya kakʼtik te ayuk lamalkʼinale. Maʼyuk bin-oranax ya kaltik o ya jpastik te ya xjuʼ ya x-ejchenteswan kʼalal tenbil ya kaʼiy jbatik. Jaʼnix jich kʼalal ay bin ma lek ya kichʼtik pasbeyel, ma skʼan te oranax ya x-ilinotik o te ya kakʼbeytik spakol te bin ya kichʼtik pasbeyele. Te bin ya jpastike, jaʼ te talel kʼaxel ya jtsʼikbey jbatik sok te ya jpasbey jbatik perdón sok spisil koʼtantik (kʼopona Colosenses 3:12, 13).

9. ¿Bin-utʼil ya skoltayotik te lamal oʼtanil kʼalal ay bin ya jtatik ta nopel spasel? (Proverbios 21:5).

⁹ Te lamal oʼtanil, jaʼnix jich ya skoltayotik ta snopel ta lek te bin ya jpastike. Ma orauknax ay bin ya jpastik o te jkʼaxel maba ya jnoptik, te bin ya jpastike, jaʼ te ya jlokʼestik tiempo ta snopel te bin lekxan ya jpastike (kʼopona Proverbios 21:5). Teme yakotik ta sleel kaʼteltik, ayniwan ya jchʼuuntik spasel te aʼtelil te ya kichʼtik albeyel ta orae, manchukme ya xjuʼ ya jchʼaytik tsoblejetik o te ma xyakʼ xlokʼotik ta scholel skʼop Dios. Pero teme lamal koʼtantik, ya kichʼtik ta wenta te banti ay te aʼtel, jayeb ora ya x-aʼtejotik sok teme ya yutsʼin te jfamiliatik sok te bitʼil lek kiloj jbatik sok te Jehová. Te lamal oʼtanil ya skoltayotik ta snopel ta lek te bin ya jpastik.

10. ¿Bin ya skʼan ya jpastik yuʼun ya jchʼijtestikxan te lamal oʼtanil?

¹⁰ Jkʼanbeytik te Jehová te yakuk skoltayotik ta yakʼelxan ta ilel lamal oʼtanil. Te lamal oʼtanil jaʼ sit te chʼul espíritu (Gál. 5:22, 23). Jaʼ yuʼun jkʼanbeytik te schʼul espíritu te Jehová yuʼun ya skoltayotik ta schʼitesel te taleliletik ya yakʼe. Teme yak ta kʼaxel jun wokolil ta jtojoltik te banti tulan ya kaʼiytik yakʼel ta ilel te lamal oʼtanil, jkʼanbeytikxan te schʼul espíritu te Dios (Luc. 11:9, 13). Jkʼanbeytik koltayel te Jehová yuʼun jichuk ya kiltik te wokolil te bitʼil ya yil stukele. Kʼalal la jkʼopontikix-a, jpastik ban kʼalal ya xjuʼ kuʼuntik yuʼun ya kakʼtik ta ilel lamal oʼtanil ta jujun kʼajkʼal.  Teme maba ya jkom jbatik ta skʼanbeyel koltayel te Jehová sok teme ya jpastik tulan ta yakʼel ta ilel te lamal oʼtanil, jich kʼunkʼun ya kakʼtikxan ta ilel te lamal koʼtantik.

11, 12. ¿Bin-utʼil yakʼoj ta ilel te ay slamalil yoʼtan te Jehová?

¹¹ Jnopilantik ta koʼtantik te ejemploetik te ay ta Biblia. Ta Biblia ya jtatik relatoetik yuʼun ants winiketik te la yakʼik ta ilel te ay slamalil yoʼtanik. Teme ya jnopilan ta koʼtantik, jichnix ya kakʼtik ta ilel-euk. Kiltik cheʼoxebuk ejemploetik, pero nail kilbeytik skʼoplal te machʼa spisil-ora yakʼoj ta ilel slamalil yoʼtan, jaʼ te Jehová.

¹² Ta tsʼunbil kʼinal Edén, te Satanás la sbolobtesbey skʼoplal sbiil te Jehová, la yakʼ ta naʼel te malaj jaʼuk lekil ajwalil sok te malaj ayuk skʼuxul yoʼtan. Pero te Jehová, maba la slajin ta oranax te Satanás, la yakʼ ta ilel slamalil yoʼtan sok te ya snaʼ skomel sba, melel snaʼoj te ya skʼan tiempo yuʼun ya yakʼ ta ilel te jaʼ lekil ajwalil. Te bitʼil yak ta smaliyel te Jehová ya xkujch yuʼun te ayto ta bolobtesbeyelxan skʼoplal te sbiile. Ta swenta te slamalil yoʼtan te Jehová, bayal millón ta tul ants winiketik la snaʼbeyikix sba sok ya xjuʼ ya xkuxinik ta sbajtelkʼinal (2 Ped. 3:9, 15). Teme ya jnoptik spisil te bin spasoj te Jehová te bitʼil ay slamalil yoʼtan, maba wokol ya kaʼiytik smaliyel te ya yichʼ talel te slajibal te chopol balumilal.

13. Kʼalal xtaluk te Balumilal te Jesús, ¿bin-utʼil la skʼayinbey slamalil yoʼtan te sTate? (Jaʼnix jich ilawil te foto).

¹³ Te Jesús ya skʼayinbey te slamalil yoʼtan te sTat, jich la yakʼ ta ilel te kʼalal xtaluk te Balumilal. Wokolniwan la  yaʼiy yakʼel ta ilel slamalil yoʼtan, kʼaxtoxan-a sok te escribaetik, te fariseoetik te jaʼik jchebal-oʼtanetik (Juan 8:25-27). Jich bitʼil te sTate, te Jesús ma orauk ilin. Maba la sutbey te sbolkʼopik te skontratak (1 Ped. 2:23). Kujch yuʼun sok slamalil yoʼtan sok maʼyuk bin la yal. Jaʼ yuʼun te Biblia jich ya yalbotik: «Nopilana ta awoʼtanik ta stojol te machʼa kujch yuʼun te la yichʼ bolkʼoptayel yuʼun te jmulawiletik» (Heb. 12:2, 3). Ta swenta te koltayel yuʼun te Jehová, jaʼnix jich ya xkujch kuʼuntik sok slamalil koʼtantik teme ya xtal pruebaetik ta jtojoltik.

14. ¿Bin ya yakʼ jnoptik te slamalil yoʼtan te Abrahán? (Hebreos 6:15; Jaʼnix jich ilawil te fotoetik).

¹⁴ ¿Bin ya skoltayotik yuʼun lamal koʼtantik ya jmaliytik te slajibal kʼajkʼal? Laniwan jkuytik te kʼalal xkʼootik ta tiempo ini koemix ta pasel o yaniwan ya jnoptik te maba ya kiltikix. Kiltik te ejemplo yuʼun Abrahán. Te kʼalal jich albot yuʼun Jehová «Mucʼul nación ya xcʼohat cuʼun», te Abrahán ayix 75 yaʼbilal-a sok maʼyuk yal snichʼnab (Gén. 12:1-4). ¿Labal yil te kʼot ta pasele? Maba spisiluk. Yuʼun ya yil la smaliy 25 jaʼbil jaʼto te kʼalal kʼax ta mukʼul jaʼ Éufrates. Ta swenta jun milagro ayin te snichʼan Isaac, 60 jaʼbil ta patil ayin te smamatak o yil-al te jaʼik Esaú sok Jacob (kʼopona Hebreos 6:15). Pero te Abrahán maba la yil te kʼotik ta jun mukʼul nación te stsʼumbal sok te ya x-akʼbotik te Kʼinal te albil skʼoplal ya yichʼik. Manchukme jich-abi, leknax la yamigoin sba sok te Jpaswanej (Sant. 2:23). ¿Yabal xtal ta awoʼtan jayebto stseʼelil yoʼtan te Abrahán kʼalal ya xchaʼkuxaje? Ta yorail-abi ya xbajt snaʼ te la staik bendición spisil te nacionetik ta swenta te schʼuunel yoʼtan sok te slamalil yoʼtan  (Gén. 22:18). ¿Bin ya yakʼ jnoptik? Manchukme ma ya kiltik te ya xkʼot ta pasel spisil te bin yaloj te Jehová ta ora ini. Pero teme lamal koʼtantik jich bitʼil te Abrahán, ya jnaʼtik te ya yakʼbotik bendición te Jehová ta ora ini, kʼaxtoxan-a ta achʼ balumilal (Mar. 10:29, 30).

15. ¿Bin ya xjuʼ ya kilbeytik skʼoplal te kʼalal ya jnoptik te Biblia ta jtukeltik?

¹⁵ Ta Biblia bayal machʼatik ya yalbey skʼoplal te la yakʼik ta ilel lamal oʼtanil (Sant. 5:10). ¿Bin yuʼun te maba ya awilbey skʼoplal te relatoetik ini? b Jich bitʼil te David te jchʼielto-a te la yichʼ tsael yuʼun ya x-och ta ajwalil ta Israel, pero la smaliy bayal jaʼbil yuʼun ya x-och ta ajwalil. Te Simeón sok te Ana, jun yoʼtan abatinik ta stojol te Jehová kʼalal yakik ta smaliyel-a te Mesiase (Luc. 2:25, 36-38). Kʼalal ya awilbey skʼoplal te relatoetik ini, pasbeya aba te jojkʼoyeletik ini: «¿Bin koltayot yuʼun ya yakʼ ta ilel lamal oʼtanil? ¿Bintik lek la sta yuʼun te la yakʼ ta ilel te talelil ini? ¿Bin-utʼil ya xjuʼ ya jkʼayinbey te ejemplo yuʼun?». Jaʼnix jich bayal bin ya xjuʼ ya anop ta swenta te machʼatik ma la yakʼik ta ilel lamal oʼtanil (1 Sam. 13:8-14). Jojkʼoybeya aba ini: «¿Bin yuʼun ma la yakʼik ta ilel lamal oʼtanil? ¿Bintik wokolil la staik kʼalal ma la yakʼik ta ilel te talelil-abi?».

16. ¿Bintik lekilaletik ya jtatik kʼalal ya kakʼtik ta ilel lamal oʼtanil?

¹⁶ Te lekilal ya jtatik kʼalal ya kakʼtik ta ilel lamal oʼtanil. Te lamal oʼtanil ya yakʼ stseʼelil koʼtantik, ya skoltayotik yuʼun ma stsakotik chamel sok ya skoltayotik ta jpensartik. Jaʼnix jich ya skoltayotik yuʼun lek ya kil jbatik sok te yantik sok te junuknax ayotik sok te congregación. Teme maba ya x-ilinotik ta oranax te kʼalal ay bin ma lek ya kichʼtik pasbeyel, ya kakʼtik te ya xlamaj te kʼope (Sal. 37:8; Prov. 14:29). Pero te bin lekxan ya jtatik kʼalal ya kakʼtik ta ilel lamal oʼtanil, jaʼ te ya jkʼayinbeytik stalel te jTatik te ay ta chʼulchan sok ya xnoptsajotikxan ta stojol.

17. ¿Bin ya skʼan ayuk ta koʼtantik spasel?

¹⁷ Jich bitʼil la kiltikix, te lamal oʼtanil jaʼ jun tʼujbil talelil te bayal bin lek ya yakʼbotik teme ya kakʼtik ta ilel. Manchukme ay wokol ya kaʼiytik, te Jehová ya skoltayotik ta schʼitesel te talelil-abi. Te bitʼil ayotik ta smaliyel sok slamalil koʼtantik te achʼ balumilal jnaʼojtik «te sit te Jehová ay ta stojol te machʼatic ya yichʼic [ta] mucʼ, te machʼatic ha smucʼulinej yoʼtanic te scʼuxul yoʼtan» (Sal. 33:18). Jaʼ yuʼun ya skʼan ya jpastik tulan te ya jlaptik te lamal oʼtanil.