1. Mwaha wa heeni ninsiveliwaahu ni atthu oopixa murima?

 TIWOOREERA okhala vamoha ni atthu oopixa murima. Ni hiyo ninnaattittimiha atthu ale enweherera itthu moopixa murima nave tho hiyo ninnaaxukurela atthu ale ennipixera murima nnaamweera naatthekenleene. Opwaha mwa yeeyo, hiyo ninnaaxukurela vantxipale ale ennixuttiha Biblya mwaha wookhala oopixa murima vaavo nniilipiheraahu weera nixuttere, waakhulela ni ovarihela muteko ele ninxutteraahu. Opwaha mwa yeeyo, hiyo ninneera asantte vantxipale Yehova mwaha woonipixera murima! — Arom. 2:4.

2. Mwa ekwaha heeni onrowaaya onixupaka okhala oopixa murima?

² Moohihovela, hiyo ninnamutikhina mutthu onoonihera mukhalelo woopixa murima, nnaamweera vareene hiiho, hiyo pooti onxupa woonihera mukhalelo owo. Mwa ntakihero, pooti ohikhala wookhweya okhala oopixa emaara nintthunaahu ovira nipuro noowaatta atthu otepaxa wene naatrasanreene omutekoni. Opwaha mwa yeeyo, pooti oxupaka okhala oopixa murima emaara ninnyoonyihiwaahu. Mwa ikwaha ikina pooti okhala wooxupa oweherera yoolaihera ya Yehova ya elapo enyowani. Mene nto nyuwo munnatthuna okhala mutthu oopixa murima? Mwa yoosoma ela, nnimoona okhala oopixa murima ontaphulela eheeni ni mwaha wa heeni oraaya wootthuneya, ni nnimoona etthu enrowa onikhavihera wunnuwihera mukhalelo ahu woopixa murima.

3. Mutthu oopixa murima onoonela hayi vaavo atthu akina emmunyoonyihaaya?

³ Nrowe noone mathowa mararu enrowa onikhavihera woonihera mukhalelo woopixa murima. Nthowa noopatxera, mutthu oopixa murima khonnyoonyiwa moowaakuveya. Ni etempu onnyoonyihiwaawe ni atthu akina owo onnakhala oomaaleleya ni khonammira supi. Owo tho nnaamweera avirihaka maxupo khonaathokorora atthu moohireerela. Ekwaha yoopatxera emphwanyeyaaya  mBiblyani masu ooweera “opixa murima,” Yehova onnahimmwa okhala “Muluku opixa murima ni òsapwanyeya, òtxerewa osarasareya ni òsareya mahala ni ororomeleya.” — Ott. 34:6.

4. Mutthu oopixa murima onkhala hayi vaavo onwehereraawe etthu?

⁴ Nthowa nanaaveeli, mutthu oopixa murima onnaweherera moomaleleya. Mutthu oopixa murima onniilipihera weera ahinyoonyiwe vaavo anoonaawe opisa ele onwehereraawe. (Math. 18:26, 27) Sookhala itthu sintxipale nintthuneyaahu oweherera moomaleleya. Mwa ntakihero, nintthuneya okhala oopixa murima vaavo nnuulumaahu na atthu akina nihimukwasaka masu. (Yobi. 36:2) Apaale tho ninnitthuneya okhala oopixa murima vaavo nimmukhaviheraahu namasomaahu a Biblya wiiwexexa sooxuttiha sa Biblya ni ohiya sookhovelela soonanara.

5. Mwa etthu heeni ekina nintthuneyaahu woonihera mukhalelo woopixa murima?

⁵ Nthowa nanaararu, mutthu oopixa murima khonpaka etthu ohuupuwelenleene. Ekhaikhai weera mwa ikwaha ikina hiyo nintthuneya opaka etthu moowaakuveya mene nto wakhala weera mutthu ookhalano mukhalelo woopixa murima, owo khanpaka itthu ahuupuweleleene naari khonpaka itthu moowaakuveya ni yootthuna weera etthu eyo emale. Ohiya opaka eyo, owo onniihiyera etempu weera uupuwelele etthu yoopaka opwaha mwa yeeyo weera apake moomaaleleya.

6. Mutthu oopixa murima onkhala hayi emaara onvirihaawe maxupo?

⁶ Nthowa nanaaxexe, mutthu oopixa murima onniilipihera weera avilele maxupo ahiikhupanyeraka. Ekhaikhai weera khaiyene woonanara hiyo omulela nthamwene ahu etthu ennixupa. Mene nto mutthu oopixa murima oneereke owehexexe itthu sooreera onpakaawe ni oneereke wiilipihera weera amukokhorele Yehova ahiyeleelaka ohakalala wawe. (Akol. 1:11) Arumeyi a Yehova entthuneya woonihera mumukhalelo woopixa murima mwa itthu sootheene. Mwaha wa heeni? Nrowe noone mathowa makina.

7. Moovarihana ni Yakobe 5:7, 8, Mwaha wa heeni oraaya wootthuneya opixa murima?

⁷ Nintthuneya okhala atthu oopixa murima weera nikhale mahiku ootheene. Hiihaale ntoko arumeyi oororomeleya akhalayi, hiyo nintthuneya omuweherera Yehova moopixa murima niroromelaka weera onookwanihera ele olaihenraawe. (Aheb. 6:11, 12) Biblya onnanilikanxera ni namalima. (Mmusome Yakobe 5:7, 8.) Namalima onniilipihera ovara muteko woowaala ni ohela maahi, nnaamweera ahisuwelaka liini enrowaaya omela ele aaliyaawe. Mene nto owo ontthuneya oweherera moopixa murima aroromelaka weera onoohepa ele aaliyaawe. Emoha-moharu, hiyo tho nintthuneya ovirelela waatteliwa ni miteko soomunepani nnaamweera ‘nihisuwelaka liini aphwiya enrowaaya owa.’ (Math. 24:42) Hiyo ninnaweherera moopixa murima niroromelaka weera etempu yoophwanelela Yehova onookwanihera itthu sootheene onilaihenraawe. Ni wakhala weera khanimpixa murima, hiyo nnookhulumuwa ni vakhaani-vakhaani nnooyeleela onthamwene nraahuno ni Yehova, opwaha mwa yeeyo nneereke owehexexa itthu sa mulaponi. Mene nto nakhala oopixa murima, nnoowera ovilela mpaka okhwipi wa elapo ela ni ovuluwa. — Mik. 7:7; Math. 24:13.

8. Opixa murima onnikhavihera moota heeni okhala ni murettele ni atthu akina? (Akolosi 3:12, 13)

⁸ Opixa murima onnanikhavihera okhalano murettele ni atthu akina, nave tho onnanikhavihera okhala oowiiwelela vaavo atthu akina enuulumaaya ni hiyo. (Yak. 1:19) Opwaha mwa yeeyo, opixa murima onnanikhavihera okhala a murettele ni atthu akina. Wakhala weera nnookhala atthu oopixa murima nnaamweera nnyoonyiheñyeene khaninrowa opakaka itthu moohireerela naari ohima etthu yaakela waanyoonyiha atthu akina. Nave tho khaninrowa opaka itthu moohirelela vaavo mutthu mukina onannyoonyihaawe. Ohiya ommira supi, nintthuneya ‘ovirelela ovilelana ni olevelelana mukina ni mukhwaawe moomalela.’ — Mmusome Akolosi 3:12, 13.

9. Moota heeni opixa murima onrowaaya onikhavihera emaara nintthunaahu opaka soothanla sooreera?

⁹ Opixa murima pooti onikhavihera emaara nintthunaahu opaka yoothanla. Ohiya opaka itthu nihuupuwelenleene, nintthuneya wiihiyera etempu weera nuupuwelele ni weera niwere opaka yoothanla yooreera. (Musome Miruku 21:5.) Mwa ntakihero, wakhala weera nnaasa muteko, hiyo naahuupuwelele nnene hiyo pooti waakhulela muteko waarowa oneeriha otxompela mithukumano ni muteko woolaleera. Mene naakhalaka oopixa murima, nneereke wuupuwelela nihinaaye waakhulela muteko ori poothe, ohela mpuwa woowi ninrowaahu ovara, iwoora ikavi ninrowaahu ovaraka va nihkuni, opwaha mwa yeeyo ,nintthuneya wuupewelela waari weera khenvoleela emusi ahu ni othamwene nraahuno ni Yehova. Emaara ninkhalaahu oopixa murima ninnapaka soothanla sooreera.

10. Mukristu ontthuneya opaka eheeni weera akhaleno mukhalelo woopixa murima?

¹⁰ Nvekeleke weera opixa wanyu murima waatxeerereyeke. Opixa murima onneerela eparte soowiima sa munepa. (Agal. 5:22, 23) Nto, nintthuneya onvekela Yehova munepa woottela weera onikhavihere okhalano mikhalelo sineerela eparte soowiima sa munepa. Vaavo ninkelaahu oviriha maxupo a weereriwa opixa wahu murima, nnavirelele ‘oveka’ weera munepa woottela onikhavihere woonihera opixa murima. (Luka 11:9, 13) Opwaha mwa yeeyo, hiyo pooti onvekela Yehova nikhavihero weera nooneke itthu moota owo onoonelaawe. Ohiya paahi ovekela, nintthuneya opaka ele ninweraahu weera nikhaleke oopixa murima mahiku ootheene. Vaavo ninvirelelaahu ovekela weera nikhale oopixa murima ni nnapaka ele ninweraahu weera noonihere opixa murima, mukhalelo owo oneereke wunnuwa mmurimani mwahu ni oneereleke eparte omutthu ahu.

11-12. Yehova onoonihera moota heeni opixa murima?

 ¹¹ Mphimeleleke matakihero a mBiblyani. Biblya onnuuluma sa atthu antxipale yoonihenre opixa murima. Vaavo ninphimelelaahu matakihero a mBiblyani, hiyo pooti oxuttera moota woowoonihera mukhalelo wa opixa murima. Mene nihinaaye woona mamoha a matakihero awo, ninrowa woona ntakihero na opixa murima wa Yehova.

¹² OJardim wa Éden, Satana aahimoothera Yehova, ahimaka weera, owo namalamulela oowisunnuwiha ni oohixariya. Yehova aatthunne, saano amunyaanyalene emtepu ene yeele. Mene owo ohoonihera opixa murima, mwaha wooweera, owo aasuwela weera yanvira etempu yintxipale weera atthu esuwele weera olamulelo wa Yehova ti wooreera opwaha sootheene. Ni awehereraka, Yehova onnapixa murima mwa itthu sootheene onootheriwaawe. Opwaha mwa yeeyo, Yehova onnaweherera moopixa murima mwaha wooweera owo ontthuna weera atthu ootheene ekhaleno eparakha yookhalano ekumi yoohimala. (2 Ped. 3:9, 15) Yookhumelelaaya ti yooweera atthu imiliyawu sintxipale aakhalano eparakha yoomusuwela Yehova. Opixa murima wa Yehova onnaruuha mareeliho mantxipale. Vaavo nnuupuwelelaahu eyo, onnakhala wookhweya oweherera moopixa murima emalihero ya elapo ela.

13. Yesu moota heeni otakinhaawe moomalela opixa murima wa atithawe? (Nwehe efootu.)

¹³ Yesu aatakiha moomalela mukhalelo woopixa murima wa atiithi awe emaara aaraawe elapo ela ya vathi. Khawaari wookhweya woonihera mukhalelo owo ikwaha sootheene, otepaxawene Afarisi ni alipa oolepa, yaari atthu ootepaxa wootha ni oovanyiha. (Yoh. 8:25-27) Hiihaale ntoko atiithi awe, Yesu khaakuveya onyoonyiwa. Emaara Yesu aatannyiwaawe owo khaakhula. (1 Ped. 2:23) Ni Yesu aaviriha weereriwa moopixa murima, ni khaamakela okhupanyaru. Vano ti wookhweya wiiwexexa mwaha wa heeni Biblya onhimaawe weera “mùpuwele mota Yesu  ovilenlaiye mwerutthuni mwawe ovanya wa anamattheka.” (Aheb. 12:2, 3) Nikhaviheriwaka ni Yehova, hiyo tho nnoowera oviriha weereriwa wootheene moopixa murima.

14. Eheeni ninxutteraahu ni opixa murima wa Abrahamu? (Aheberi 6:15) (Nwehe efootu.)

¹⁴ Apaale nyuwo mpatxenre khalayi oweherera woona omala wa elapo ela, apaale vano munnoona weera khamunrowa okhala mpaka woona emalihero ya elapo ela. Eheeni enkela onikhavihera ovirelela oweherera moopixa murima? Moone ntakihero na Abrahamu. Emaara aaraaweno iyaakha 75 ni khaarino anamwane, Yehova aamulaihera weera: “Kini kòpankihe weyo muloko mutokotoko.” (Eph. 12:1-4) Neereke Abrahamu aahoona okwaniheriwa wa yoolaihera ela? Aahoona eparte emoha. Elapuwakaru mooloko Eufrate ni oweherera mwa iyaakha 25, Abrahamu aahoona oyariwa wa mwanawe Isakhi. Eyo yaari etthu yootikhiniha. Sivirakaru iyaakha 60, owo aahoona oyariwa wa asisulu awe, Esawu ni Yakobe. (Mmusome Aheberi 6:15.) Mene Abrahamu khaawonne asisulu awe ekhalaka muloko mutokweene ni evolowaka elapo yoolaiheriwa. Nnaamweera vareene hiiho, mulopwana ole oororomeleya aakhalano onthamwene woolipa ni Mpattuxaawe. (Yak. 2:23) Vaavo Abrahamu ankelaawe ovinyererihiwa, owo onkela ohakalala vantxipale asuwela weera, mwaha wa nroromelo ni opixa wawe murima, maloko ootheene a elapo ya vathi yaareelihiwa! (Eph. 22:18) Ninxuttera eheeni? Apaale hiyo pooti ohoona viinaano va soolaihera sootheene sikwanelaka. Mene nakhala oopixa murima, ntoko Abrahamu, nnoorowa okhalano nroromelo weera Yehova ononreeliha viinaani vaava ni muhoolo mwa elapo enyowani. — Mar. 10:29, 30.

15. Vaavo nimpakaahu yoosoma ya omeekha, itthu heeni ninthuneyaahu ohela mpuwa?

¹⁵ MBilyani ninnaphwanya matakihero aatthu  yoonihenre mukhalelo woopixa murima. (Yak. 5:10) Nyuwo munoonela hayi ompaka programa weera mupake ipesquisa woohima sa atthu awo? b Mwa ntakihero, mwene Davidi aari mmiravo ooyevaxa emaara aathanliwaawe okhala mwene a wIsraeli, nto owo annatthuneya oweherera mwa iyaakha sintxipale weera apatxere olamulela. Ntakihero nikina ti na Simeyoni ni Hana. Awosa yannamukokhorela Yehova moororomeleya ewehereraka orwa wa Mesiya. (Luka 2:25, 36-38) Mwaasomaka sooweereya iya, mweerere waakhula makoho ala: ‘Etthu heeni yaamukavihere mutthu owo woonihera mukhalelo woopixa murima? Opixa murima waamukhavihenre moota heeni mutthu owo? Ni miyo kinrowa omutakiha moota heeni?’ Nyuwo pooti oxuttera etthu ni atthu ale yahoonihenre mukhalelo woopixa murima. (1 Sam. 13:8-14) Mwaasoma matakihero ala, mwiikoheke ha: ‘Mwaha wa heeni mutthu owo ahoonihenraawe opixa murima? Ni maxupo heeni yaamukhumelenle mwaha woohoonihera mukhalelo woopixa murima?’

16. Mareeliho heeni nnaakhelaahu vaavo nnooniherahu mukhalelo woopixa murima?

¹⁶ Muupuwele mareeliho munkelaanyu waakhela wakhala weera munnoonihera mukhalelo woopixa murima. Mutthu oopixa murima toohakalala ni toomaaleleya. Opwaha mwa yeeyo, okhala oopixa murima pooti oniruuhela murettele wa mmuupuweloni ni okhalano ekumi yooreera. Nakhala atthu oopixa murima, ninnakhalano asinthamwene a mikhalelo sooreera ni ninniiraana ni atthu akina. Opwaha mwa yeeyo, muloko ahu onnakhala woowiiraana. Wakhala weera mutthu onnyoonyiha, hiyo ninnasepa onyoonyiwa. (Nsal. 37:8, enoota; Mir. 14:29) Ni etthu yootepa otthuneya, vaavo ninkhalaahu oopixa murima, nimmutakiha Tiithi ahu a wiirimu ni ninnalipiha nroromelo nahu ni owo.

17. Nilakenle opaka eheeni?

¹⁷ Moohihovela, opixa murima mukhalelo wooreera, onnivaha mareeliho! Ekhaikhai weera ikwaha ikina khonkhweya woonihera opixa murima, mene ni nikhavihero na Yehova nnoovirelela wunnuwihera mukhalelo owo. Ni emaara yeeyo ninwehereraahu elapo enyowani moopixa murima, hiyo ninkela ororomela weera “nitho na Yahvéh nri va yale anamòva Muluku ni anaroromela othunku awe”. (Nsal. 33:18) Vano nto hiyo nilakeleke ovirelela woonihera mukhalelo woopixa murima.