1. Xeeni munsiveliwa anyu ni atthu ampixa murima?

 TI VOOHAKALALIHA okhala ni atthu anooniherya opixa murima. Nave hiyo ninnisiveliwa ni atthu anwerya olipelela etthu moohinyoonyiheya. Nave ti vooloka okathi mutthu onnipixerya awe murima hata nimutthekenle ene. Ninnimuxukhurela mutthu onisominhe Biibiliya mwaha woonipixerya murima okathi naimananiha ahu wiixutta, weemererya ele niixutte ahu, aahiiso ovarihela muteko ele Biibiliya onihimya awe. Nave ninnitepa omuxukhurela Yehova mwaha woonipixeryaka murima! — aRom. 2:4.

2. Okathi xeeni vanivila aya wooniherya opixa murima?

² Ekeekhai wiira ootheene ahu vanninsivela okathi atthu annipixerya aya murima, masi ikwaha sikina pooti onivilaka wooniherya mukhalelo owo. Mwa ntakiheryo, pooti onivilaka wooniherya opixa murima vakhala wiira niri mbiixani ni nnimwaakuveyasa. Nave ikwaha sikina pooti onivilaka olipelela elapo esya Yehova oleihenrye awe. Niireke mwaaniphavela wuuncererya opixa wanyu murima? Mwaha ola, nnooweha etthu enitaphulela aya opixa murima ni xeeni mukhalelo owo ori aya wa faita. Nave, nnooweha etthu enrowa onikhaliherya otepa wooniherya opixa murima.

3. Exeeni mutthu oopixa murima onipaka awe okathi atthu akina animunyoonyiha aya?

³ Nrowe niwehe inamuna xexe nikhanle ahu owooniherya opixa murima. Yoopacerya, mutthu oopixa murima khonaakuva onanariwa. Okathi mutthu mukina onimunyoonyiha awe,  owo onkhala oomaleeleya ni khonimuttikiherya ni yootakhala ele iireliwe awe. Nave khonaathokorerya atthu akina moohikhalela okathi oninyoonyiheya awe. Ekwaha yoopacerya Biibiliya onirumeela awe nuulumo nno ‘opixa murima’, eniphwanyaneya eliivuru ya Okhuma 34:6, yeeyo enimuhimya Yehova okhala Muluku “òmoriwa ikharari ni òvilela, òpisa onanariwa, òrera murima ni òroromeleya”.

4. Exeeni mutthu oopixa murima ompaka awe okathi onilipelela awe etthu masi enapisa?

⁴ Ya nenli, mutthu oopixa murima onnilipelela etthu moomaaleleya. Mutthu oopixa murima, khoninyoonyiheya aahiiso khoninanariwa vakhala wiira etthu aalipelela awe ennipisa wiiraneya. (Math. 18:26, 27) Sookhala itthu ninreerela ahu olipelelaka moopixa murima. Mwa ntakiheryo, nihaana ompixeraka murima okathi mutthu mukina onilavula awe ni ohimukwasa masu. (Yob. 36:2) Nave-tho, nihaana ompixerya murima naxikola ahu a Biibiliya okathi nimmukhaliherya ahu wiiwexexa etthu Biibiliya oniixuttiha awe ni oxintta yoolema yoohiloka orina awe.

5. Mwa enamuna xeeni ekina nikhanle ahu oowooniherya opixa murima?

⁵ Ya neeraru, mutthu oopixa murima khonipaka etthu ohuupuwenle. Ekeekhai wiira ikwaha sikina nihaana opaka etthu moowakuveya. Masi okathi mutthu oopixa murima oniphavela awe opaka etthu yuulupale aahiiso ya faita, owo khompaka etthu eyo moowakuveya aahiiso ohuupuwenle, ophavelaka omaliha paahi. Ohiya-vo, onniivaha okathi wiira wuupuwele moota onrowa awe opaka etthu eyo. Nuumala-vo, owo onnikuxa okathi wooreerela wiira ovare saana etthu eyo.

6. Mutthu oopixa murima ompaka exeeni okathi sinimphwanya aya mixankiho?

⁶ Ya neexexe, mutthu oopixa murima oniimananiha oxintta mixankiho ohiya omakela wiikhupanyerya paahi. Ti maana aya opixa murima onlikanyihiwa aya ni ovilela. Ekeekhai wiira khahiyo vootthekeya omuleela mixankiho  sirina ahu mpatthani ahu aahiiso omuleela moota nnoonela ahu etthu eyo. Ohiya-vo, mutthu oopixa murima onniimananiha opaka khula etthu eniwerya awe mookumini mwawe. Nave onniimananiha ohihiya omurumeela Yehova moohakalala. (aKol. 1:11) Arumeyi a Yehova ahaana wooniherya opixa murima mwa inamuna iya sootheene. Mwaha wa xeeni? Nrowe nthokorerye mathowa vakhaani.

7. Moovarihana ni Yakobo 5:7, 8, xeeni opixa murima orya aya wa faita? (Nwehe eteseenyo.)

⁷ Nihaana opixa murima wiira niphwanye okumi woohimala. Ntoko arumeyi a Yehova a khalai, nihaana olipelela moopixa murima itthu Yehova oleihenrya awe. (aHeeb. 6:11, 12) Biibiliya onnaalikanyiha arumeyi a Yehova ni mulipa oolima. (Mmusome Yakobo 5:7, 8.) Mulipa oolima onnivara muteko muulupale wowaala ni orekari masi khonsuwela silini ipyo sawe sinrowa aya wunnuwa. Nto mulipa oolima owo, ohaana olipelela moopixa murima, okupaliki wiira onoohepha etthu aalale awe. Mwa enamuna emosa-ru, hiyo nihaana wiimananiha okhala atthareli a Yesu, nnaamwi nihisuwelaka “nihiku ninrwa awe Pwiya ahu”. (Math. 24:42) Ninnilipelela moopixa murima wiira Yehova onoomaliherya itthu sootheene oleeihenrya awe okathi wooreerela. Nto vakhala wiira khaninrowa opixa murima nnootemwa olipelela nihiku nno, vakhaani-vakhaani nihiyeke omurumeela Yehova. Nihaana opacerya owehexexa itthu sinniiriha ohakalala nenna-va. Masi nakhala oopixa murima, nnoowerya ovilela mpakha wanikisa. — Mik. 7:7; Math. 24:13.

8. Opixa murima onrowa onikhaliherya sai ni moota nnaathokorerya ahu atthu akina? (aKolosi 3:12, 13.)

⁸ Opixa murima onninikhaliherya okhalana ompatthani wooloka ni atthu akina. Onninikhaliherya waawiriyana ni ephoole okathi atthu akina anilavula aya. (Yak. 1:19) Nave onninikhaliherya okhalana murettele naawo. Opixa murima onoonikhaliherya ohilavula etthu nihuupuwenle yeeyo yaarowa waawereya atthu akina. Nave khaninrowa opaka etthu ninanariwe ene. Vakhala wiira mutthu mukina onninyoonyiha ohiya omuttikiherya etthu yoohiloka oniirenle awe, nnoovilelaka, omulevelela “ni murima wotheene ikwaha sotheene”. — Mmusome aKolosi 3:12, 13.

9. Opixa murima onrowa onikhaliherya sai opaka soothanla? (Miruku 21:5.)

⁹ Opixa murima onoonikhaliherya opaka soothanla sooloka ohiya othanla opaka etthu naakuveyasaka. Nihaana oviriha okathi wiira nuupuwelele itthu sootheene ninreerela ahu opaka. Niira siiso, nnoowerya opaka yoothanla yooloka. (Musome Miruku 21:5.) Mwa ntakiheryo, vakhala wiira nimphavelasa muteko, hiyo pooti weemererya muteko woopacerya nimphwanya ahu, hata muteko owo orowaka oniiriha oyeleela mithukumano sikina aahiiso ohirowa olaleerya. Masi nakhala oopixa murima nnimwaavya okathi wiira nuupuwelele opuro ninrowa ahu ovaraka muteko owo ni iwoora ikavi ninrowa ahu ovirihaka nivaraka muteko. Nave nnimuupuwelelaka akhala wiira nnookhalanaka okathi woovirihaka ni emusi ahu ni moota onrowa aya okhala ompatthani ahu ni Yehova. Opixa murima onninikhaliherya opaka soothanla sooloka.

10. Makristau anrowa wuncererya sai olipa murima? Anrowa owerya sai ohihiya okhala oopixa murima?

¹⁰ Munvekeleke Yehova wiira muncererye opixa wanyu murima. Opixa murima oniirela mpantta mikhalelo sinikumiheriwa ni munepa woowaarya. (aGal. 5:22, 23) Nihaana onvekela Yehova wiira onivahe munepa woowaarya ni onikhaliherye okhalana mikhalelo sinikumiheriwa ni munepa awe. Vakhala wiira wooniphwanya muxankiho oneehererya opixa wahu murima,  ‘nithipeleleke ovekela’ munepa woowaarya wiira onikhaliherye okhalana mukhalelo owo. (Luka 11:9, 13) Ohiya-vo, hiyo pooti onvekela Yehova wiira onikhaliherye oweha itthu ntoko yena onoonela awe. Ohiya ovekela paahi, khula nihiku nihaana wiimananiha opaka etthu eniwerya ahu wiira nikhale atthu oopixa murima. Nto nihihiye onvekela Yehova wiira onikhaliherye okhala oopixa murima ni wiimananiha wooniherya mukhalelo owo. Niira siiso, nnimuncererya opixa wahu murima ni khaninrowa ohiya.

11-12. Yehova oonihenrye sai opixa murima?

¹¹ Muupuweleleke matakiheryo ari mbiibiliyani. Biibiliya onnaalavula atthu anceene yaari oopixa murima. Okathi nnuupuwelela ahu matakiheryo awo, nnimwiixuttaka inamuna sowooniherya opixa murima. Masi nihinatthi oweha matakiheryo awo, nrowe niwehe ntakiheryo nuulupale na opixa murima, ntakiheryo na Yehova.

¹² Oxardim ya wEdeni, Satana aahimootherya Yehova ni aahimananiha onanariha nsina nawe, ophavelaka omwiiriha Eva wuupuwela wiira Yehova namalamulela a milili ni oohixariya. Yehova aatthunne, aamumpwetexa Satana okathi ene yoolexa. Masi Yehova ahooniherya opixa murima maana aanisuwela wiira wanvira okathi wiira atthu yoone wiira Yehova tori namalamulela oolokexa. Nlelo olipelelaka, Yehova onnivilela itthu sootheene onootheriwa awe. Ohiya-vo, owo onnihiya moopixa murima maana oniphavela wiira atthu anceene aphwanye okumi woohimala. (2 Ped. 3:9, 15) Moohakalaliha, atthu imilyau sinceene aakhalana eparakha yoomusuwela. Opixa murima wa Yehova onniniphwanyiha mireerelo sinceene. Vakhala wiira nnimuupuwelelaka eyo, vanoonikhweelaka olipelela wanikisa wa olumwenku ola.

13. Yesu aatakinhe sai moomalela opixa murima wa tiithi awe? (Nwehe efootu.)

¹³ Yesu aahitakiha moomalela opixa murima wa Tiithi awe, owo aahooniherya eyo okathi aari awe valaponi va. Khivakhweya okathi  wootheene wooniherya opixa murima, vanceenexa waapixerya murima alipa-oowiixuttiha nlamulo ni afaresi. (Yoh. 8:25-27) Omutakihaka Tiithi awe, Yesu khaakuva onanariwa. Okathi aapaciwa awe yena khaakhula. (1 Ped. 2:23) Yesu aahivilela mixankiho moopixa murima ni moohiixinliha. Ninniwerya woona nthowa naya Biibiliya onihimya awe wiira “mmuupuweleke saana ole aavilenle moolumo ootakhala yaalavuliwa ni anatampi”! (aHeeb. 12:2, 3) Nikhaliheriwaka ni Yehova ni hiyo-tho nnoowerya ovilela khula muxankiho onrowa oniphwanya moopixa murima.

14. Opixa murima wa Abrahamu onniixuttiha exeeni? (aHeeberi 6:15.) (Nwehe efootu.)

¹⁴ Woonasa wene mpacenrye khalai olipelela wanikisa wa olumwenku ola! Vano munuupuwela wiira khamunrowa okhala okathi munceene wiira moone eyo yiiraneyaka. Exeeni enrowa onikhaliherya ohihiya olipelela moopixa murima? Nwehe ntakiheryo na Abrahamu. Okathi aarina awe iyaakha 75 nlelo ohimuyanre mwaana, Yehova aahimuleiherya so: “Miyo kinimokhalihani nloko nulupale”. (Maph. 12:1-4) Niireke Abrahamu aahiweha yooleiherya eyo yiiraneyaka? Aahiweha vakhaani. Nuumala olapuwa muro Eufrate ni olipelela iyaakha 25, Abrahamu aahimuyara Isakhi. Nuuvira iyaakha 60, Abrahamu aahiyareliwa axisulu awe anli Esawu ni Yakobe. (Mmusome aHeeberi 6:15.) Masi Abrahamu khaawenhe osuulu awe opakeyaka nloko nuulupale ni waakhelaka elapo yooleiheriwa. Hata vari siiso, mulopwana ole oowaamini aahikhalana ompatthani woolipa ni mpattuxa awe. (Yak. 2:23) Okathi Abrahamu onrowa awe ohihimuxiwa, onoohakalala osuwela wiira mwaha wa waamini wawe ni opixa wawe murima, maloko ootheene a valaponi aareelihiwa. (Maph. 22:18) Nniixutta-ni? Hiyo pooti ohiwerya woona siiraneyaka itthu sootheene Yehova oleihenrye awe niinaano-va. Masi nakhala oopixa murima ntoko Abrahamu,  nikupaliki wiira Yehova onoonitthuvela nenna-va, vanceenexa muhoolo elapo esya oleihenrye awe. — Mar. 10:29, 30.

15. Okathi nimpaka ahu yoosoma ahu ya omwaneene, exeeni ninreerela ahu othokoreryaka?

¹⁵ Biibiliya onniromola matakiheryo a atthu anceene yoonihenrye opixa murima. (Yak. 5:10) Vanooreera opaka eprograma wiira musome matakiheryo awo. b Mwa ntakiheryo, Davidi aari mmiravo mwaamukhaani okathi aathanliwe awe wiira okhale mwene a wIsarayeli, masi aahaana olipelela iyaakha sinceene wiira opacerye olamulela. Ntakiheryo nikina ti na Simeyoni ni Ana, yaawo yaamurumeela Yehova moororomeleya alipelelaka orwa wa Mesiya aaleiheriwe. (Luka 2:25, 36-38) Okathi munrowa anyu osomaka soowiiraneya iyo, mmananihe ophwanya waakhuliwa wa makoho ala: Exeeni yaamukhalihenrye wooniherya opixa murima? Mireerelo xeeni aaphwannya awe? Kinrowa omutakiha sai? Nave-tho nyuwo pooti wiixutta etthu ni ale yahoonihenrye opixa murima. (1 Sam. 13:8-14) Okathi munrowa anyu osomaka matakiheryo awo mwiikoheke so: ‘Xeeni yahoonihenrye aya opixa murima? Mixankiho xeeni saaphwannye mwaha woohooniherya opixa murima?’

16. Mireerelo xeeni nimphwanya ahu mwaha woohihiya okhala atthu oopixa murima?

¹⁶ Nweheke mireerelo sinikhumelela mwaha wookhala oopixa murima. Mutthu oopixa murima toohakalala ni toomaaleleya. Ohiya-vo, opixa murima pooti onikhaliherya mookumini mwahu ni mmuupuweleloni mwahu. Okathi nnaapixerya ahu murima atthu akina, ninnikhala apatthani aya. Ohiya-vo, muloko ahu onnikhala woowiirana. Okathi mutthu mukina onninyoonyiha awe, hiyo khannaakuva onanariwa, nave khannihiya wiira mwaha owo winnuwe. (Esal. 37:8; Mir. 14:29) Etthu yuulupale okhala wiira vaavo nnooniherya ahu opixa murima, nimmutakiha Tiithi ahu a wiirimu Yehova nave ninnitepa omwaattamela.

17. Exeeni ninreerela ahu ohihiya?

¹⁷ Opixa murima mukhalelo wooreera ni onnikhaliherya ootheene ahu. Ekeekhai wiira khivanikhweya okathi wootheene wooniherya opixa murima. Masi nikhaliheriwaka ni Yehova, nnoowerya ohihiya wooniherya mukhalelo owo. Nlelo nlipelelaka elapo esya, nikupaliki wiira “Apwiya t’anasuka ale aniwova: ale anroromela [anlipelela] orera waya murima”. (Esal. 33:18.) Nto nihihiye okhalana mukhalelo ola wooreera wa opixa murima.