1. მუშენ მოსიამოვნუნა თი ადამიანეფწკუმა ურთიერთობა, მით მოთვინებას გიმირჩქინანა?

 ᲐᲠᲫᲐᲡ მოსიამოვნუნა თიცალ ადამიანეფწკუმა ურთიერთობა, მით მოთვინებას გიმირჩქინანა. მაგალთო, ჩქი ვაფასენთ თი ადამიანეფს, მით მოთვინებათ იჯინენა დო თინეფს ხოლო, მით ჩქინ მიმართ თე თვისებას გიმირჩქინანა, მუჟამსით შეცდომა მუმალენა. მარდულ ვორეთ ჩქინ ბიბლიაშ მასწავლებერიშ ხოლო, მით მოთვინებას გიმირჩქინანდჷ, მუჟამსით მიჭირდეს ნამდგაინ ბიბლიურ საკითხიშ გაგება, გათვალისწინება დო ცხოვრებას გიმორნაფა. მარა არძაშ უმოს მარდულ იეჰოვას ვაფუთ, მუშენდა კაცობრიობაშ ისტორიაშე მოჸუნაფილ მოთვინებას გიმირჩქინანს ჩქინ მიმართ (რომ. 2:4).

2. მუჟამ შილებე გამჭირდან მოთვინებაშ გიმორჩქინაქ?

² მართალ რე, არძას მობწონა, მუჟამსით შხვეფ მოთვინებას გიმირჩქინანა, მარა პირადო ჩქი შილებე ირიათო ადვილ ვა მაფდან თე თვისებაშ გიმორჩქინა. მაგალთო, შილებე გამჭირდან მიფთვინათ დო ვორდათ მშვიდას, მუჟამსით შარა მანგარ გინოხარგელ რე, წოხოლე ქიანაშ მანქანა ეწომრენა დო ავრე სოდგარენ მოჩქარნა. ვარდა შილებე ვამმათვინებუან, მუჟამსით მიდგაინ თიცალ მუდგარენს თქუანს ვარდა გაკეთენს, მუდგათ გუმაღიზიანენა. თეს გეძინელ, მინშა შილებე ჩქინო რთულ რდას, მოთვინებათ ვუჯინათ იეჰოვაშ დუნაპირებ ახალ ქვეყნიერებას. ქუგოკონანო, უმოსო გეგმირჩქინათ მოთვინება? თე სტატიას გუვარჩიენთ, მუს ნიშნენს ვორდათ მომთმენეფ? მუშენ რე მოთვინებაშ გიმორჩქინა თეცალ მნიშვნელოვან? დო მუ მიმეხვარებნა, გუვავითარათ უმოს მოთვინება?

3. მუჭო იქციებ მომთმენ პიროვნება, მუჟამსით შხვეფ გლახათ ოქცუნა?

³ გუვარჩუათ ოთხ მხარე, სოვრეშეთ შემლებნა ვოძირათ, ნამდა გიმიფრჩქინანთ მოთვინებას. პირველ, მომთმენ პიროვნება ადვილო ვერისხებ. თინა ოცად, სიმშვიდე ვადინუას, მუჟამსით გლახათ ოქცუნა ვარდა აღიზიანენა. თეს გეძინელ, ვართ თიწკუმა  ოქცუ გლახათ შხვეფს, მუჟამსით განერვიანებულ რე. იეჰოვა ზუსტას თეცალ ღორონთ რე, თინა ადვილო ვერისხებ. თიშ გურშენ ბიბლიას ბკითხულენთ: „იეჰოვა მოჭყოლოფე, შხვეფიშ გაჭირებაშ გურშა მიმაღალარ დო სულგრძელ ღორონთ რე, გურხვე რე სიკეთეს დო ჭეშმარიტებას“ (გამ. 34:6; ქოძირით სიტყვა „სულგრძელწკუმა“ მოჩამილ სქოლიო).

4. მუჭო იქციებ მომთმენ პიროვნება, მუჟამსით ოჯინე აფჷ?

⁴ მაჟია, მომთმენ პიროვნებას შეულებ მშვიდას ქიჯინას. მუჟამსით მუდგარენ უცფას ვა ხვადუ, მომთმენ პიროვნება ოცად, სვანჯ ვადინუას დო ვეგეღიზიანას (მათ. 18:26, 27). ირდღას შეფხვადუთ თიცალ სიტუაციეფს, სოდეთ საჭირო რე, მოთვინება გიმიფრჩქინათ დო მშვიდას იბჯინათ. მაგალთო, მოთვინება მოსაჭირნა, ნამდა შხვეფს რაგად ქუვაცალათ დო ვემშუოსხაპათ ჩიებას (იობ. 36:2). თეს გეძინელ, მოთვინება თიმწკუმა ხოლო მოსაჭირნა, მუჟამსით ბიბლიაშ მაგურაფალს ვოხვარუთ, ქინანჭას ბიბლიურ გურაფას ვარდა გიორჯგინას გლახა ჩვევას.

5. ხოლო მუჟამ გიმიფრჩქინანთ მოთვინებას?

⁵ მასმა, მომთმენ პიროვნება ვა ჩქარენს მუდგარენიშ კეთებას. მუშო ოკო რაგად, ნამთინე სიტუაციას ხეთეშე მოქმედება რე საჭირო, მარა მომთმენ პიროვნებას მუდგარენ მნიშვნელოვან საქმე უღდასინ ხოლო, უცფას ვეჭყანს თიშ კეთებას დო ვართ თიშ თებას ჩქარენს. თეშ მანგიორო, წინასწარ ჯგირო აგეგმენს, მუს მუჭო გაკეთენს დო უკულ საჭირო დროს გიმურთუნს თე საქმეშ კეთებას.

6. მუ რეაქცია უღჷ მომთმენ ადამიანს, მუჟამსით სირთულეეფშა აფჷ გარზებელ?

⁶ მანთხა, მომთმენ პიროვნება ოცად, ჭირებაშ უმშო გურზას განსაცდელს. მოთვინება დაკავშირებულ რე გარზებაწკუმა. მუშო ოკო რაგად, გლახა მუთუნ ვა რე თის, ნამდა ხოლოშიან მეგობარს გურ გეგნუფაჩათ დო ვეჩუათ თიშე, მუთ მაწუხენა. მარა, მომთმენ ადამიან ირნერო ოცად, გურზას განსაცდელს დო ვადინუას დადებით განწყობა (კოლ. 1:11). ქრისტიანეფს ბრელ საკითხის მოსაჭირნა მოთვინებაშ გიმორჩქინა. მუშენ იფჩიებუთ თეს? მორთ ქობძირათ თეშ მუსხირენ მიზეზ.

7. მუჭოთ იაკობიშ 5:7, 8-შე იძირე, მუშენ რე მოთვინება მნიშვნელოვან? (ქოძირით სურათ).

⁷ მოთვინება მანგარ მნიშვნელოვან რე, მუშენდა თის რსხება მოუღ. ულირს მახორუ ართგურ მსახურეფცალო, საჭირო რე, ჩქი ხოლო მოთვინებათ ველდათ თი დროს, მუჟამსით ღორონთ მუშ არძა დუნაპირებუს შეასრულენს (ებრ. 6:11, 12). ბიბლია ჩქინ სიტუაციას უდარენს დიხაშ დუმამუშებელს (წეკითხით იაკობიშ 5:7, 8). დიხაშ დუმამუშებელ ხანდას ვარკენს თასუას დო თიშ წყარუას, თიშ უმკუჯინუო, ნამდა ზუსტას ვა უჩქჷ, მუჟამ ფალუნს ნათასა. თინა მოთვინებათ იჯინე დო ჯერს, ნამდა მოსავალიშ ეჭოფუაშ დრო ხოლო ქუდოდირთუ. ჩქი ხოლო, დიხაშ დუმამუშებელცალო, დუდის ვა ბზოგენთ, ნამდა მონაწილება მიბღათ ღორონთიშ მსახურებას, თიშ უმკუჯინუო, ნამდა ზუსტას ვა მიჩქნა, „ნამ დღას მოურს [ჩქინ] უფალ“ (მათ. 24:42). ჩქი მოთვინებათ იბჯინეთ დო ბჯერა, ნამდა მუშ დროს იეჰოვა შეასრულენს არძა დუნაპირებუს. მოთვინებას ვეგმიფრჩქინანთ-და, შილებე ჯინათ დოფშურდათ, ჭიე-ჭიეთ გეგნურთათ ჭეშმარიტებაშ შარაშე დო ყურადღება თიცალ მუდგარენეფშა გეგნიბღათ, მუდგას დროებით სიამოვნება მოუღ. მარა, თეშ გინაწონს, მოთვინებას გეგმიფრჩქინანთ-და, შემალებენა ქიმვოჭირინუათ თე უბადო ქვეყნიერებაშ აღსასრულშახ დო მიბღათ რსხება (მიქ. 7:7; მათ. 24:13).

8. მუჭო მოხვარნა მოთვინება შხვეფწკუმა ურთიერთობაშ დროს? (კოლ. 3:12, 13).

⁸ მოთვინება მოხვარნა, ჯგირ ურთიერთობა მიღდან შხვეფწკუმა. თე თვისებაშ ჭყოლოფათ, ვემშვაჭკირუთ შხვეფს ჩიებაშ დროს დო ყურადღებათ მურჩქილუანთ თინეფს (იაკ. 1:19). მოთვინება მშვიდობას ხოლო უნწყუნს ხეს. მაგალთო, მუჟამსით განერვიანებულ ვორეთ, თე თვისება მოხვარნა, უდუფიქრებუო ვემიფქცუათ დო ვა ფთქუათ თიცალ მუდგარენ, მუთ ორაგადე ვა მაფდეს. თეს გეძინელ, მოთვინებას გეგმიფრჩქინანთ-და, ადვილო ვამმალედან იჸი გურ, მუჟამსით მიდგარენ გურს ქელმოჭუანა დო თიშ მანგიორო, ნამდა თეცალ პიროვნებას მანგიორ გინუგათ, შემალებენა მუთვინათ დო მთელ გურით ვაპატუათ (წეკითხით კოლოსელეფიშ 3:12, 13).

9. მუჭო მოხვარნა მოთვინება, მუჟამსით გადაწყვეტილება მაფნა მიოღებელ? (იგავ. 21:5).

⁹ მოთვინება უჯგუშ გადაწყვეტილებეფიშ მეღებას ხოლო მოხვარნა. მომთმენეფ ქიპჸუაფუთ-და, ხეთეშე ვეგნობჭყვიდუნთ მუდგარენს. თეშ მანგიორო, ჯგირო დეფიფქრებუთ დო უკულ გეგნობჭყვიდუნთ, მუშ კეთება იჸუაფ არძაშ უჯგუშ (წეკითხით იგავეფიშ 21:5). მაგალთო, სამუშას ქობგორუნთ-და, შილებე ქიგებდირთათ ცდუნებაშ წოხოლე — დევეთანხმათ თი სამუშას, ნამდგას პირველო შემოფთავაზენა, თიშ უმკუჯინუო, ნამდა შილებე თიქ სულიერ საქმეეფს მონაწილებაშ მეღებას მეცილან. მომთმენეფ ქიპჸუაფუთ-და, დროს გეგმურთუნთ თე საკითხწკუმა დაკავშირებულ მუსხირენ დეტალშე დაფიქრებას. მაგალთო, სო დო მუსხი ხანს მაჸინა ომუშებელ დო მუჭო იმოქმედენს თე სამუშა ოჯახ დო იეჰოვაწკუმა ჩქინ ურთიერთობაშა. ვეფჩქარენთ დო მოთვინებას გეგმიფრჩქინანთ-და, დუდის ევუჩილითუანთ გლახა გადაწყვეტილებაშ მეღებას.

10. მუჭო შემლებნა გუვავითარათ დო გეგმიფრჩქინათ მოთვინება?

¹⁰ ქილოცით. მოთვინება წმინდა შურიშ ნაყოფ რე (გალ. 5:22, 23). ათეშენ, იეჰოვას ოკო ფთხუათ წმინდა შურ, ნამდა ქიმმეხვარან თე თვისებაშ გავითარებას. მაგალთო, მუჟამსით ჩქინ მოთვინება გიმიცადებ, იეჰოვას მუშ წმინდა ძალას ფთხინთ, ნამდა ვა ვოდინუათ მოთვინება (ლუკ. 11:9, 13). შემლებნა იეჰოვას თინა ხოლო ფთხუათ, ნამდა ქიმმეხვარან საკითხეფს თიშ თოლით ვუჯინათ. მუშო ოკო რაგად, ლოცვაშ უკულ ირნერო ოკო ვეცადათ, ირდღას გეგმიფრჩქინათ მოთვინება. მუთ უმოსო ფთხინთ იეჰოვას ქიმმეხვარან თე თვისებაშ გავითარებას დო მუთ უმოსო ვეცადებუთ თეშ კეთებას, თით უმოსო გიდგუნს მოთვინება ჩქინ გურს ჩხვიჩხვეფს დო გინირთუ ჩქინ პიროვნებაშ ნაწილო.

11, 12. მუჭო გიმირჩქინანს იეჰოვა მოთვინებას?

 ¹¹ ჯგირო დეფიქრით ბიბლიას მოჩამილ მაგალითეფშე. ბიბლიას ბრელ თიცალ ადამიანიშ მაგალით რე ინოჭარილ, მით გიმირჩქინანდეს მოთვინებას. თინეფშე დაფიქრება, ჩქი ხოლო მოხვარნა თე თვისებაშ გიმორჩქინას. ონდო თე ბიბლიურ შემთხვევეფშე ნამთინეს გუვარჩიენდათ, თეიშახ ქობძირათ იეჰოვაშ მაგალით, მით სრულყოფილო გიმირჩქინანს თე თვისებას.

¹² ედემიშ ბაღის სატანაქ ტყურა ქეკაწამ იეჰოვაშ სახელს დო ეჭვიშ თუდო ქიგიორინუ თიშ, მუჭოთ სამართლიან დო მოჸოროფე მართველიშ რეპუტაცია. თიშ მანგიორო, ნამდა იეჰოვაქ ხეთეშე განადგურკო სატანა, მოთვინება დო დუდშეკება გიმირჩქინ, მუშენდა უჩქუდ, დრო ოსაჭირუდ თიშ დამტკიცებას, ნამდა მუშ მართველობა არძაშ უჯგუშ რე. ონდო თე დრო დოდირთუდას, იეჰოვა მოთვინებათ ურზუ სატანაშ შხვა ტყურეფს ხოლო, ნამდგას თინა ეკაწამენს. თეს გეძინელ, ონდო იეჰოვა მოთვინებათ იჯინე, ბრელ ადამიანს ერზიებ თიშ შესაძლებლობა, ნამდა მიღას მარადიულ სიცოცხლე (2 პეტ. 3:9, 15). შედეგო, მილიონობით ადამიან იჩინებაფუანს ღორონთის. თაშ ნამდა, მუჟამსით ყურადღებას თი ჯგირ შედეგეფშა გეგნიბღანთ, მუთ იეჰოვაშ მოთვინებას მოჸუნს, უმოს ადვილ მაჸინა, ჩქი ხოლო მოთვინებათ იბჯინათ აღსასრულიშ მოულაშახ.

13. მუჭო მეჸუნდჷ იესო სრულყოფილო მუამუშიშ მოთვინებაშ მაგალითის? (ქოძირით სურათ).

¹³ იესო სრულყოფილო მეჸუნს მუშ მუმაშ მოთვინებაშ მაგალითის, მუთ დედამიწას ცხოვრებაშ დროს ჯგირო ოძირუ. მუშო ოკო რაგად, თიშო ირიათო ადვილ ვეჸუაფუდ მოთვინებაშ გიმორჩქინა, განსაკუთრებულო მწიგნობარეფ დო ფარისეველეფიშ მიმართ (იოან. 8:25—27). მარა თეშ უმკუჯინუო, იესო მეჸუნდჷ მუმაშ მაგალითის, ადვილო ვერისხებუდ დო მანგიორს ვეგნუგანდჷ თინეფს, მით შეურაცხყოფას მიორინუანდჷ დო ოცადუდ გაღიზიანკო თინა (1 პეტ. 2:23). იესო ჭირებაშ უმშო, მოთვინებათ ურზუდ  სირთულეეფს. ათეშენ ვამკვენა, მუჟამსით ბიბლია თიშ გურშენ იჩიებ: „იფიქრით თიშე, მიდგაქ სიტყვიერ შეურაცხყოფა მითვინ ცოდვილეფშე“ (ებრ. 12:2, 3). იეჰოვაშ მოხვარათ ჩქი ხოლო შემალებენა, მოთვინებათ გაურზათ ნებისმიერ განსაცდელს.

14. მუს ბგურაფლენთ აბრაამიშ გიმორჩქინელ მოთვინებაშე? (ებრ. 6:15; ქოძირით სურათ).

¹⁴ შილებე ფიფქრენდით, ნამდა აღსასრულქ ბრელ ხანიშ წოხოლე ოკო ქუდოდირთკო, მარა თაშ ვეჸუ დო ასე მაფიქრუაფნა, შურო ქიმმართენანო თი დღაშა. მუ მიმეხვარებნა თეცალ დროს, მოთვინებათ გუვაგრძელათ ჯინა? გუვარჩუათ აბრაამიშ შემთხვევა. მუჟამსით თინა 75 წანერ რდჷ დო სქუალეფ ვა ჸუნდჷ, იეჰოვაქ თეცალ მუდგარენს დეპირ: „დიდ ხალხ გიშელენს სქანდე“ (დაბ. 12:1—4). ქოძირუო აბრაამქ მუშ თოლით თე დუნაპირებუშ შესრულება? ბოლოშახ ვა უძირ. ევფრატიშ გინოკვათუაშ უკულ, აბრაამს ხოლო 25 წანაქ აჸუ ოჯინექ, ონდო ისაკ ქაშიდ, ნამდგაშ დაბადება მართალო სასწაულ რდჷ. თეშ უკულ, ხოლო 60 წანას აჸუ ოჯინექ, ონდო მოთალეფ, ესავ დო იაკობ ქეშეძინებუდ (წეკითხით ებრაელეფიშ 6:15). მართალ რე, აბრაამს მუშ თოლით ვა უძირ, მუჭო გინირთჷ მუშ გამნარყიქ დიდ ხალხო დო მუჭო დემკვიდრეს თინეფქ დუნაპირებ ქიანა, მარა თეშ უმკუჯინუო, თე ართგურ კოჩ ხარენდჷ მუშ გუმაჭყაფალწკუმა ხოლოშიან ურთიერთობათ (იაკ. 2:23). წერმიდგინით, მუნერ ბედნერ იჸუაფ აბრაამ, მუჟამსით გეთელებ დო ქიგეგენს, ნამდა მუშ გიმორჩქინელ რწმენაშ დო მოთვინებაშ ჭყოლოფათ, იეჰოვაქ აკურთხჷ არძა ერ დედამიწას (დაბ. 22:18). ჩქი მუს ბგურაფლენთ აბრაამიშ შემთხვევაშე? შილებე ჩქინ თოლით ვა ბძირათ, მუჭო შისრულებ იეჰოვაშ არძა დუნაპირებ, მარა აბრაამცალო მოთვინებას გეგმიფრჩქინანთ-და, შემლებნა დარწმუნებულ ვორდათ, ნამდა იეჰოვა დუმაჯილდოვენა ამდღა დო უმოს კურთხევეფით ემოფშანა მომავალს, მუჟამსით დევმკვიდრენთ დუნაპირებ ახალ ქვეყნიერებას (მარ. 10:29, 30).

15. მუ შემლებნა გიმიბრკვიათ პირად გურაფაშ დროს?

 ¹⁵ ბიბლიას ხოლო ბრელ ადამიანიშ გურშენ ბკითხულენთ, მით გიმირჩქინანდეს მოთვინებას (იაკ. 5:10). ჯგირ იჸუაფ, დრო გეგმურთათ პირად გურაფაშ დროს თინეფიშ შემთხვევეფიშ გიმორკვიებას. b მაგალთო, შეილებნა გეგმირკვიათ დავითიშ გურშენ. თინა მანგარ ახალგაზრდა რდჷ, მუჟამსით ისრაელიშ მომავალ მეფეთ იჸუ ცხებულქ, მარა წანეფქ აჸუ ოჯინექ, ონდო საბოლათ მიღენდკო მეფობას. ღორონთიშ ართგურ მსახურეფს, სიმონ დო ანას ხოლო ბრელ ხანს აჸუეს ოჯინექ, ონდო ძირუნდეს დუნაპირებ მესიას (ლუკ. 2:25, 36—38). ბიბლიას მოჩამილ თეცალ შემთხვევეფიშ გიმორკვიებაშ დროს, ქოკითხით თქვან დუდის: „მუქ შილებე მეხვარკო თე პიროვნებას, მოთვინებაშ გიმორჩქინას? მუ ჯგირ შედეგეფ მოუღ თის მოთვინებაშ გიმორჩქინაქ? მა მუჭო შემლებ მივაჸუნე თიშ მაგალითის?“. ხვალე თენა ვარინ, თინეფიშ მაგალითშე ხოლო შეილებნა ბრელ მუდგარენიშ გურაფა, მით ვეგმირჩქინანდეს მოთვინებას (1 სამ. 13:8—14). თეცალ გიმორკვიებაშ დროს ხოლო ქოკითხით თქვან დუდის: „მუშენ ვეშიალებეს თინეფს მოთვინებაშ გიმორჩქინაქ? მუ გლახა შედეგ მიღეს, მუჟამსით ვეგმირჩქინეს მოთვინება?“.

16. მუ ჯგირობუა მოუღ მოთვინებაშ გიმორჩქინას?

¹⁶ დეფიქრით თი ჯგირ შედეგეფშე, მუთ მოთვინებაშ გიმორჩქინას მოჸუნს. მუჟამსით მოთვინებას გიმიფრჩქინანთ, უმოს მშვიდას ბგინაფლენთ დუდის დო ბედნერეფ ვორეთ. თეს გეძინელ, მიღნა უჯგუშ ფიზიკურ ჯამრთელობა დო ემოციურ მდგომარეობა. მუჟამსით შხვეფიშ მიმართ მოთვინებას გიმიფრჩქინანთ, თეთ ხეს ვუნწყუნთ ართიანშქას ჯგირ ურთიერთობას დო კრებაშ ართობას. მიდგაინ ჩქინ გაღიზიანებას ქაცადუნ-და, ადვილო ვებრისხებუთ, მუთ ხოლო უმოსო გაუფრაშენს სიტუაციას (ფსალმ. 37:8; იგავ. 14:29). დო მუთ არძაშ უმოს მნიშვნელოვან რე, მუჟამსით მოთვინებას გიმიფრჩქინანთ, მეპჸუნთ ჩქინ ზეციერ მუმაშ მაგალითის დო ხოლოშიან ურთიერთობას ვავითარენთ თიწკუმა.

17. მუშ კეთება ოკო მაფდან გინოჭყვიდილ?

¹⁷ მოთვინება მართალო მანგარ ჯგირ თვისება რე, ნამდგაშ გიმორჩქინას ჯგირობუა მოუღ არძაშო. მართალ რე, ირიათო ვა რე ადვილ, ვორდათ მომთმენეფ, მარა იეჰოვაშ მოხვარათ შემალებენა, ხოლო უმოსო გუვავითარათ თე თვისება დო გიმიფრჩქინათ თინა. ჩქი მოთვინებათ ველუთ ღორონთიშ დუნაპირებ ახალ ქვეყნიერებას დო შემლებნა დარწმუნებულ ვორდათ, ნამდა „იეჰოვა ოკვირ თინეფს, მიდგას მუშ შიშ უღჷ, თინეფს, მით თიშე სიკეთეს ელჷ“ (ფსალმ. 33:18). მორთ გინოჭყვიდილ მაფდან, ირიათო გიმიფრჩქინათ მოთვინება.