1. ¿Baʼaxten uts t-tʼaan k-bisikba yéetel máaxoʼob yaan u pacienciaʼob?

 TULÁAKLOʼON uts t-tʼaan k-bisikba yéetel máaxoʼob yaan u pacienciaʼob. ¿Baʼaxten? Tumen le máakoʼob beyaʼ maʼ tu desesperaroʼob kex ka xáanak táan u páaʼtkoʼob wa baʼax yéetel maʼ tu séeb kʼuuxiloʼob wa k-beetik baʼax maʼ maʼalobiʼ. Por ejemploeʼ le máax tsʼáatoʼon xook yéetel le Bibliaoʼ jach tu yeʼesajtoʼon paciencia tumen yaʼab u téenel tu tsolajtoʼon le baʼaxoʼob maʼ t-jach naʼatikoʼ yéetel tu yáantoʼon utiaʼal k-tsʼáaik ichil k-kuxtal. ¡Pero maas k-tsʼáaik gracias tiʼ Jéeoba tumen sáamsamal ku yeʼesiktoʼon paciencia! (Rom. 2:4).

2. ¿Tiʼ baʼax súutukiloʼob jeʼel u talamtal k-eʼesik pacienciaeʼ?

² Jatsʼuts k-ilik ka eʼesaʼaktoʼon paciencia tumen u maasil. Pero u jaajileʼ wa toʼon kʼaʼabéet k-eʼesikeʼ maʼ chéen chʼaʼabil k-beetkiʼ. Por ejemploeʼ maʼ fácil k-eʼesik paciencia wa táan k-bin wa tuʼux yéetel jach yaan yaʼab tráficoiʼ, maases wa tsʼoʼok u tardetaltoʼon. Wa maʼ xaaneʼ jeʼel k-kʼuuxil kéen beetaʼaktoʼon wa baʼax tumen wa máaxeʼ. Yéetel jeʼel xan u káajal k-desesperar kéen k-il maʼ u taas Jéeoba le túumben luʼumoʼ. Jeʼex k-ilkoʼ maʼ fácil k-eʼesik pacienciaiʼ. Le beetkeʼ teʼ xookaʼ yaan k-ilik baʼaxten kʼaʼanaʼan ka yanaktoʼon paciencia yéetel bix jeʼel k-eʼesikeʼ. Yaan xan k-ilik jujunpʼéel baʼaloʼob jeʼel u yáantkoʼon ka yanaktoʼon le jatsʼuts modosaʼ.

3. ¿Baʼax ku beetik juntúul máak yaan u paciencia kéen beetaʼak wa baʼax tiʼ?

³ Koʼox ilik cuatro baʼaloʼob ku beetik juntúul máak yaan u paciencia. Yáaxeʼ maʼ tu séeb kʼuuxil. Kex táan u beetaʼal wa baʼax tiʼ tumen u maasileʼ maʼ tu sutik u jeel, tsʼoʼoleʼ kex estresadoeʼ maʼ tu kʼeʼekʼeyik u maasil. Le yáax ken chʼaʼchiʼitaʼak  teʼ Biblia le tʼaan «maʼatech u séeb pʼuʼujul[oʼ]», letiʼe kéen aʼalaʼak de ke Jéeobaeʼ «juntúul Dios ku chʼaʼik óotsilil yéetel jach uts, maʼatech u séeb pʼuʼujul yéetel nojoch u yaabilaj, tsʼoʼoleʼ mantatsʼ ku beetik baʼax ku yaʼalik» (Éxo. 34:6).

4. Juntúul máax yaan u pacienciaeʼ, ¿bix u yeʼesik maʼ tu desesperar?

⁴ U kaʼapʼéeleʼ le máax yaan u pacienciaoʼ maʼ tu desesperar mix tu kʼuuxil kex ka xáanak táan u beetik wa táan u páaʼtik wa baʼax (Mat. 18:26, 27). U jaajileʼ tiʼ yaʼab súutukiloʼob kʼaʼabéet k-ilik maʼ k-desesperar. Por ejemploeʼ wa yaan máax táan u tsikbaltiktoʼon wa baʼaxeʼ kʼaʼabéet k-jach chʼenxikintik yéetel maʼ k-jáan xotʼik le tsikbaloʼ (Job 36:2). Kʼaʼabéet xan k-eʼesik paciencia kéen k-áant juntúul j-xoknáal u naʼat junpʼéel baʼax ku kaʼansik le Bibliaoʼ wa kéen k-áant utiaʼal u pʼatik junpʼéel baʼax kʼaas táan u beetik.

5. ¿Bix uláakʼ jeʼel k-eʼesik yaantoʼon pacienciaeʼ?

⁵ U yóoxpʼéeleʼ juntúul máax yaan u pacienciaeʼ maʼ tu jáajan beetik wa baʼax, baʼaxeʼ táanil ku kutal u tukult bix ken u beetil. Le máax yaan u pacienciaoʼ u yojel yaan baʼaxoʼob jeʼel u páajtal u séeb beetkeʼ. Pero wa ku kʼubéentaʼal tiʼ junpʼéel baʼal jach kʼaʼanaʼaneʼ maʼ tu jaranchʼaktik, baʼaxeʼ ku jóoʼsik tiempo utiaʼal u tuklik bix ken u beetil utiaʼal u jóokʼol tubeel.

6. ¿Baʼax ku beetik juntúul máax yaan u paciencia kéen u aktáant pruebaʼob?

⁶ U kanpʼéeleʼ le máax yaan u pacienciaoʼ maʼ tu quejarkuba kéen u aktáant pruebaʼob. U jaajileʼ maʼ kʼaas ka k-tsikbalt tiʼ juntúul k-amigo bix k-uʼuyikba kéen k-aktáant wa baʼax problemailiʼ. Pero le máax yaan u pacienciaoʼ ku yilik u tuukul tiʼ le bendiciónoʼob yaantiʼoʼ yéetel ku meyajtik Jéeoba yéetel kiʼimak óolal (Col. 1:11). Le máaxoʼob meyajtik Jéeobaoʼ maʼalob ka u beetoʼob le  cuatro baʼaloʼob tsʼoʼok k-xakʼaltikoʼ. Koʼox ilik baʼaxten.

7. Jeʼex u yaʼalik Santiago 5:7 yéetel 8, ¿baʼaxten kʼaʼabéet u yantaltoʼon paciencia? (Ilawil xan le dibujoʼoboʼ).

⁷ Kʼaʼabéet k-eʼesik paciencia utiaʼal u yantaltoʼon le kuxtal minaʼan u xuuloʼ. Jeʼex tu beetil le máaxoʼob meyajt Dios úuchjeakiloʼ, toʼon xaneʼ kʼaʼabéet u yantaltoʼon paciencia utiaʼal k-páaʼtik u béeytal le promesaʼob u beetmaj Diosoʼ (Heb. 6:11, 12). Le Bibliaoʼ ku yaʼalikeʼ beyoʼon juntúul j-kolnáaleʼ (xok Santiago 5:7, 8). Le j-kolnáaloʼ ku paakʼal yéetel ku jóoyabtik le baʼax u pakʼmoʼ, pero maʼ u yojel baʼax kʼiin kéen u tsʼáa u yichiʼ. Chéen baʼax u yojleʼ yaan u kʼuchul u kʼiinil u cosechartik, chéen kʼaʼabéet u páaʼtik. Teʼ kʼiinoʼobaʼ toʼon xaneʼ beyoʼon jeʼex le j-kolnáaloʼ tumen k-tsʼaamaj k-óol meyajt Jéeoba kex «maʼ k-ojel baʼax kʼiin kéen taalak Yuumtsiliʼ» (Mat. 24:42). K-eʼesik paciencia tumen k-ojel kéen kʼuchuk u kʼiinileʼ Jéeobaeʼ yaan u láaj béeykuntik le baʼaxoʼob u prometermoʼ. Chéen baʼaleʼ kʼaʼabéet k-kanáantikba tumen wa maʼeʼ jeʼel u náakal k-óoleʼ yéetel jujunpʼíitil jeʼel k-náachtal tiʼ Jéeobaeʼ. Tsʼoʼoleʼ jeʼel k-bin tu paach baʼaloʼob maʼ kʼaʼabéettoʼoneʼ. Pero wa k-páaʼtik le baʼax u prometermaj Diosoʼ yaan u chúukpajak k-óol yéetel yaan k-salvartikba (Miq. 7:7; Mat. 24:13).

8. ¿Bix u yáantkoʼon le paciencia utiaʼal k-bisikba maʼalob yéetel u maasiloʼ? (Colosenses 3:12, 13).

⁸ Wa yaantoʼon pacienciaeʼ yaan k-bisikba maʼalob yéetel u maasil. Por ejemploeʼ yaan k-chʼenxikintikoʼob kéen tsikbalnakoʼob t-éetel (Sant. 1:19). Tsʼoʼoleʼ kex wa estresadoʼoneʼ yaan k-kanáantik maʼ k-jáajan beetik mix k-jáajan k-aʼalik wa baʼax jeʼel u beetik u yaatal u yóol wa máaxeʼ. Wa yaan máax xan ku ofenderkoʼoneʼ yaan k-ilik maʼ k-séeb pʼuʼujul mix k-sutik u jeel le baʼax ku beetaʼaltoʼonoʼ, baʼaxeʼ yaan k-perdonar yéetel u jaajil k-óol (xok Colosenses 3:12, 13).

9. ¿Le pacienciaoʼ bix u yáantkoʼon utiaʼal k-chʼaʼik maʼalob decisiónoʼob? (Proverbios 21:5).

⁹ Wa yaantoʼon pacienciaeʼ yaan k-chʼaʼik maʼalob decisiónoʼob. Tu lugar k-jáajan beetik wa baʼaxeʼ yaan k-kutal k-tukult baʼax maas maʼalob ka k-beete (xok Proverbios 21:5). Wa táan k-kaxtik meyajeʼ maʼ xaaneʼ jeʼel u taaktal k-jáan kʼamik le yáax kun aʼalbiltoʼonoʼ kex ka k-pʼax k-reunión wa le kʼaʼaytajoʼ. Pero wa yaantoʼon pacienciaeʼ yaan k-chʼaʼik en cuenta jujunpʼéel baʼaloʼob, por ejemploeʼ bukaʼaj náachil le meyajoʼ, bukaʼaj tiempo ken k-meyaj, wa yaan u yantal tiempo utiaʼal k-antal yéetel k-familia bey xan utiaʼal k-maas meyajtik Jéeoba. Jeʼex k-ilkoʼ le pacienciaoʼ ku yáantkoʼon utiaʼal k-chʼaʼik maʼalob decisiónoʼob.

10. ¿Baʼax unaj u seguer k-beetik utiaʼal k-eʼesik paciencia?

¹⁰ Unaj k-kʼáatik tiʼ Jéeoba ka u yáantoʼon k-eʼes paciencia. Le pacienciaoʼ junpʼéel jatsʼuts modo ku taal tiʼ le espíritu santooʼ (Gál. 5:22, 23). Le oʼolal maʼalob ka k-kʼáat tiʼ Jéeoba u espíritu santo utiaʼal ka yanaktoʼon le jatsʼuts modos ku tsʼáaikoʼ. Wa táan k-aktáantik junpʼéel baʼal beetik u talamtal k-eʼesik pacienciaeʼ unaj u seguer k-kʼáatik u espíritu santo Jéeoba (Luc. 11:9, 13). Maʼalob xan ka k-kʼáattiʼ ka u yáantoʼon utiaʼal k-ilik le baʼaloʼob jeʼex u yilik letiʼoʼ. Kéen tsʼoʼokok k-orar túuneʼ, kʼaʼabéet k-beetik tuláakal le páajtal utiaʼal k-eʼesik paciencia. Wa maʼ tu  xuʼulul k-tsʼáaik k-óol yéetel ku seguer k-kʼáatik tiʼ Jéeoba ka u yáantoʼoneʼ jujunpʼíitil ken k-maas eʼes le jatsʼuts modosaʼ.

11, 12. ¿Bix tsʼoʼok u yeʼesik Jéeoba jach yaan u paciencia?

¹¹ Tuukulnakoʼon tiʼ le ejemploʼob yaan teʼ Bibliaoʼ. Le Bibliaoʼ ku tʼaan tiʼ yaʼab máaxoʼob tu yeʼesoʼob paciencia. Wa k-tuukul tiʼ le baʼax tu beetoʼoboʼ yaan k-ilik bix jeʼel k-eʼesik le jatsʼuts modosaʼ. Koʼox ilik jujunpʼéel ejemploʼob, pero táanileʼ koʼox tʼaan tiʼ Jéeoba, le máax maas yaan u pacienciaoʼ.

¹² Satanáseʼ jach tu pʼataj kʼaasil u kʼaabaʼ Jéeoba tu jardínil Edén tumen tu yaʼalaj jach maʼ maʼalob bix u gobernariʼ. Pero Jéeobaeʼ maʼ tu jáan xuʼulsiʼ, baʼaxeʼ tu yeʼesaj paciencia yéetel tu controlartuba. Kex yaan u seguer u pʼaʼatal kʼaasil u kʼaabaʼeʼ u yojel kʼaʼabéet u máan tiempo utiaʼal u yilaʼal maʼ jaaj le baʼax tu yaʼalaj Satanásoʼ. Lelaʼ tsʼoʼok u taasik yaʼab utsil tumen yoʼolal le paciencia ku yeʼesik Jéeobaoʼ u millonesil máakoʼob tsʼoʼok u kaanbaloʼob tiʼ letiʼ yéetel jeʼel u páajtal u yantaltiʼob le kuxtal minaʼan u xuuloʼ (2 Ped. 3:9, 15). Le baʼax ku beetik Jéeobaoʼ ku yáantkoʼon utiaʼal ka k-páaʼt yéetel chúukaʼan óolal le xuʼulsajiloʼ.

13. ¿Bix úuchik u yeʼesik paciencia Jesús jeʼex u Taataeʼ? (Ilawil xan le fotooʼ).

¹³ Jesúseʼ jach tu yeʼesaj paciencia jeʼex u Taataeʼ. Por ejemploeʼ le ka taal way Luʼumeʼ jach tu yeʼesaj paciencia tiʼ le kʼasaʼan escribaʼob yéetel le fariseoʼoboʼ (Juan 8:25-27). Kex maʼ tratartaʼab maʼalob yéetel poʼopochʼaʼabeʼ Jesúseʼ mix juntéen tu sutaj u jeel le baʼax beetaʼabtiʼoʼ (1 Ped. 2:23). Letiʼeʼ chúukpaj u yóol yéetel mix juntéen tu quejartuba. Le oʼolal le Bibliaoʼ ku yaʼaliktoʼon:  «Tuukulneneʼex tiʼ le máax tsʼoʼok u chúukpajal u yóol u muʼyajt le baʼax ku yaʼalik le j-kʼeban máakoʼoboʼ» (Heb. 12:2, 3). Yéetel u yáantaj Jéeobaeʼ, toʼon xaneʼ jeʼel u chúukpajal k-óol k-aguantart jeʼel baʼalak pruebaileʼ.

14. ¿Baʼax k-kanik tiʼ u ejemplo Abrahán? (Hebreos 6:15; ilawil xan le dibujooʼ).

¹⁴ Maʼ xaaneʼ úuch joʼopʼok k-páaʼtik ka taalak le xuʼulsajiloʼ, le oʼolal jeʼel u káajal k-tuklik: «Míin maʼ ten in wile». ¿Baʼax túun jeʼel u yáantkoʼon utiaʼal u yantaltoʼon pacienciaeʼ? Koʼox tuukul tiʼ u ejemplo Abrahán. Jéeobaeʼ tu yaʼalajtiʼ: «Yaan in beetik u jóokʼol junpʼéel nojoch nación tiʼ teech». Ka aʼalaʼabtiʼ lelaʼ 75 años yaan tiʼ Abrahán, tsʼoʼoleʼ mix juntúul u hijo yaan (Gén. 12:1-4). ¿Tu yilaj wa u béeytal le baʼax aʼalaʼabtiʼoʼ? Maʼ tuláakaliʼ. ¿Baʼaxten bey k-aʼalikoʼ? Tumen le ka tsʼoʼok u kʼáatmáansik le río Éufratesoʼ, anchaj u máan 25 años tak ka síij Isaak. Tsʼoʼoleʼ máan uláakʼ 60 años ka síij Esaú yéetel Jacob, u yáabiloʼob Abrahán (xok Hebreos 6:15). Pero Abraháneʼ maʼ tu yilaj u pʼáatal junpʼéel nuxiʼ kaaj u chʼiʼibaliʼ mix u tiaʼalintikoʼob le luʼum aʼalaʼab u tsʼaʼabaltiʼoboʼ. Kex beyoʼ chúukpaj u yóol tiʼ Jéeoba yéetel jach maʼalob tu bisiluba tu yéetel (Sant. 2:23). Kéen kaʼa kuxkíintaʼak Abraháneʼ máans ta tuukul bix kun kiʼimaktal u yóol kéen u yojéelteʼ tuláakal le kaajoʼob yanoʼob tiʼ tuláakal yóokʼol kaab bendecirtaʼaboʼob yoʼolal u fe bey xan yoʼolal le paciencia tu yeʼesoʼ (Gén. 22:18). ¿Baʼax k-kanik tiʼ le ejemploaʼ? K-kanikeʼ maʼ xaaneʼ maʼ ken k-il tuláakal u promesaʼob Jéeoba teʼ kʼiinoʼobaʼ. Pero wa k-eʼesik paciencia jeʼex Abraháneʼ, Jéeobaeʼ yaan u bendecirkoʼon bejlaʼeʼ bey xan teʼ túumben luʼumoʼ (Mar. 10:29, 30).

15. Kéen xakʼalxooknakecheʼ, ¿baʼax maʼalob ka a beete?

 ¹⁵ Le Bibliaoʼ ku tʼaan tiʼ uláakʼ máaxoʼob tu yeʼesoʼob paciencia (Sant. 5:10). Maʼalob ka k-xakʼalt u tsikbalil u kuxtaloʼob. b Por ejemploeʼ Davideʼ kex desde tu táankelmil yéeyaʼab utiaʼal u beetik u reyil Israeleʼ, anchaj u páaʼtik yaʼab años utiaʼal ka páajchajak u gobernar. Simeón yéetel Ana xaneʼ chúukpaj u yóol u meyajtoʼob Jéeoba le táan u páaʼtkoʼob u taal le Mesíasoʼ (Luc. 2:25, 36-38). Kéen a xakʼalt u tsikbalil u kuxtaloʼobeʼ maʼalob ka a tukult lelaʼ: «¿Baʼax áant utiaʼal u yantaltiʼ paciencia? ¿Baʼax utsil tu kʼamaj úuchik u yeʼesik le jatsʼuts modosaʼ? ¿Bix jeʼel in beetik jeʼex letiʼeʼ?». Chéen baʼaleʼ yaʼab baʼax jeʼel k-kanik xan tiʼ le máaxoʼob maʼ tu yeʼesoʼob pacienciaoʼ (1 Sam. 13:8-14). Kéen k-xakʼalt bix kuxlajikoʼobeʼ maʼalob ka tuukulnakoʼon tiʼ lelaʼ: «¿Baʼaxten maʼ anchajtiʼob pacienciaiʼ? ¿Bix biniktiʼob?».

16. Aʼal jujunpʼéel utsiloʼob ku taasik k-eʼesik paciencia.

¹⁶ Tuukulnakoʼon tiʼ le utsiloʼob ku taasik u yeʼesik máak pacienciaoʼ. Le pacienciaoʼ ku yáantkoʼon utiaʼal u kiʼimaktal k-óol yéetel utiaʼal maʼ k-sen chiʼichnaktal. Hasta ku yáantkoʼon utiaʼal maʼ k-sen kʼojaʼantal. Ku yáantkoʼon xan utiaʼal k-bisikba maʼalob yéetel u maasil bey xan utiaʼal u yantal jeetsʼelil teʼ múuchʼuliloʼ. Tsʼoʼoleʼ wa ku beetaʼaltoʼon wa baʼaxeʼ ku yáantkoʼon utiaʼal maʼ k-séeb kʼuuxil, beyoʼ maʼ tu nojochtal le problemaoʼ (Sal. 37:8; Pro. 14:29). Pero u maas maʼalobileʼ kéen k-eʼes pacienciaeʼ k-seguertik u ejemplo Jéeoba yéetel k-maas natsʼikba tiʼ.

17. ¿Baʼax unaj u seguer k-beetik?

¹⁷ Jeʼex tsʼoʼok k-ilkoʼ le pacienciaoʼ junpʼéel jatsʼuts modos ku taasiktoʼon yaʼab utsil. Kex maʼ fácil u yeʼesaʼaleʼ Jéeobaeʼ jeʼel u yáantkoʼon utiaʼal ka yanaktoʼoneʼ. Tsʼoʼoleʼ mientras k-páaʼtik u suʼutul paraísoil le Luʼumaʼ, k-creertik baʼax ku yaʼalik le Bibliaaʼ: «Jéeobaeʼ mantatsʼ táan u paktik le máaxoʼob meyajtikoʼ, letiʼobeʼ táan u páaʼtkoʼob u yeʼesaʼal nojoch yaabilaj tiʼob» (Sal. 33:18). Le oʼolal tuláakloʼon unaj u seguer k-eʼesik paciencia.