1. Sɔ gbe koɖo Ebretɔwo 12:1 ɖe, nyi mìɖo awa keŋ aɖe gbɔ nɔ agbeju lɔɔ?

 BIBLA sɔ mìwo Kristotɔwo gbenɔnɔ sɔ sɔ koɖo ejulɔlɔ. Woasɔ agbe mavɔ cu fɛn nɔ mɛ ciwo yí wa ɖaŋ lɔ eju lɔ keke yi vɔvɔnu. (2 Tim. 4:7, 8) Mìɖo aje agbla ɖekpokpui keŋ akpɔtɔ le eju lɔ lɔkɔ, ɖo mìgogo vɔvɔnu nɔ ejulɔlɔ lɔ. Apotru Pɔlu ci yí wa ɖaŋ ɖe gbɔ nɔ agbeju lɔ lɔlɔ nu enu ciwo yí akpedo mì nu mìaɖu ji. Énu mɔ, “mì ɖo a shiju yí a xotɔ enu ci yí le ŋkɔ nɔ mì. . . Mì ɖo a sɔ enushanu ci yí a ɖote mì danŋkpe.”​—Hlɛn Ebretɔwo 12:1.

2. “Mì ɖo a sɔ enushanu danŋkpe” gɔnmɛ ɖe?

² Ci Pɔlu ŋwlɛ mɔ “mì ɖo a sɔ enushanu danŋkpe” ɖe, nu enukɔ mɔ Kristotɔwo deɖo agban ɖe ahɛn yɔa? Oo, de nyɔ ci ejikɔ anu nɛ o. Vɔ éxoxoɔ nuxu so agban ciwo yí deʒan nu yí mìɖo atashi wo. Agban ŋtɔ́ hanwo sɔsɔ agble ka kpɔtɔ nɔ eju ci yí mìlɔlɔ yí enu acikɔ nɔ mì. Nɔ mìado ji le ejulɔlɔ lɔ mɛɔ, mìɖo ado jeshi agban ɖekpokpui ci yí aɖe ka kpɔtɔ nɔ ejulɔlɔ lɔ yí atashi blaŋ. Ele ahan gan, mìdeɖo atashi agban ciwo ele mɔ mìahɛn o. Nɔ denyi ahan ɔ, mìdagbeje nɔ ejulɔlɔ lɔ o. (2 Tim. 2:5) Agban ciwo yí ele mɔ mìahɛn ɔ?

3. (a) Sɔ gbe koɖo Galatitɔwo 6:5 ɖe, nyi ele mɔ mìahɛn ɔ? (b) Nyi nu mìaxo nuxu so le nyɔta cɛ mɛɔ, yí nyi yí taɖoɔ?

³ Hlɛn Galatitɔwo 6:5. Pɔlu yɔ agban ɖeka ci mìɖo adro. Éŋwlɛ mɔ “amɛ ɖeka ɖeka ɖo a dro yi gban.” Le lɛɔ, Pɔlu xokɔ nuxu so agban ci yí le mɛɖekaɖeka ji le ŋmɛ nɔ Mawu nu, agban ci yí mìwoŋtɔwo aje agbla asɔ. Le nyɔta cɛ mɛɔ, mìaxo nuxu so agban ciwo yí nyi amɛ ŋtɔ gban nu koɖo lé mìawɛ asɔ wo. Mìagbexo nuxu so agban ciwo  yí deʒan nu yí taŋfuin mìhɛnkɔ koɖo lé mìawɛ asɔ wo danŋkpe. Nɔ mìsɔ mìwoŋtɔwo gbanwo yí sɔ agban ciwo deʒan o danŋkpeɔ, mìasun ji alɔ agbeju lɔ nywiɖe yi vɔvɔnu.

4 Nyi yí taɖo amɛɖekisɔsɔna Mawu gbe ci mìɖo denyi agban yí akpɛn mìɔ? (Kpɔ foto lɔ hɛnnɛ.)

⁴ Amɛɖekisɔsɔna Mawu gbe ci mìɖo. Hwenu mìsɔ mìwoɖekiwo jo nɔ Yehowa ɔ, mìɖo gbe ni mɔ mìasɛn yiɖekɛ yí awa yi dro. Mìɖo akpɔtɔ awakɔ do egbe ŋtɔ́ ci mìɖo ji. Wawa do amɛɖekisɔsɔna Mawu gbe ci mìɖo ji nyi agban vevi ɖeka vɔ de agban enyi akpɛn mì o. Enu ci yí taɖo yí nyi mɔ Yehowa wa mì nɔ mìawa yi dro. (Enyɔ. 4:11) Éwa mì koɖo edro mɔ mìajeshi ɖɛ keŋ asiin, égbewa mì do yi nɔnɔmɛ nu, eyi na mìsun ji yí tenɔ gogui yí gbekpɔnɔ jijɔ le edro yitɔ wawa mɛ. (Eha. 40:8) Nɔ mìwakɔ Mawu dro yí kplɔ Eviɛ doɔ, mìkpɔnɔ “gbɔndomɛ.”​—Mt. 11:28-30.

5. Nyi yí akpedo eo nu nawa do amɛɖekisɔsɔna Mawu gbe ci èɖo jiɔ? (1 Ʒan 5:3)

⁵ Lé àtɛnŋ asɔ agban cɛ doɔ? Enu  amɛve akpedo eo nu. Ŋkɔtɔ, kpɔtɔ adodoɔ ŋsɛn lɔnlɔn ci èɖo nɔ Yehowa. Àtɛnŋ awa cɛ nɔ èbunɔ tamɛ kpɔ so enunywi ciwo Mawu wa nɔ eo koɖo ciwo avawa nɔ eo le esɔ mɛ nu. Nɔ lɔnlɔn ci èɖo nɔ Mawu gangankɔ dojiɔ, ahanke agbenɔ fafɛɖe nɔ eo mɔ àse tonu ni nɛ. (Hlɛn 1 Ʒan 5:3.) Amɛvetɔ, wa Yesu tɔ han. Ésun ji yí wa Mawu dro, ɖo édonɔ gbe ɖaɖa nɔ Yehowa yí biɛni kpekpedonu yí kpɔtɔ sɔ susu ɖo fɛncu ci avaxɔ ji. (Ebre. 5:7; 12:2) Shigbe Yesu nɛɔ, donɔ gbe ɖaɖa nɔ Yehowa nɔ ado ŋsɛn eo yí agbe mavɔ mɔkpɔkpɔ lɔ le kpɔtɔ anɔ susu mɛ nɔ eo jaan. Nɔ lɔnlɔn ci èɖo nɔ Yehowa gangankɔ doji yí ègbewakɔ Yesu tɔ han ɔ, àsun ji yí awa do amɛɖekisɔsɔna Mawu gbe ci èɖo ji.

6. Nyi yí taɖo mìɖo asɔ agban ciwo le mì ji le xomu lɔ mɛɔ? (Kpɔ foto lɔ hɛnnɛ.)

⁶ Agban ciwo yí le mì ji le xomu lɔ mɛ. Le agbeju ci mìlɔkɔ lɔ mɛɔ, mìɖo alɔn Yehowa koɖo Yesu wu mìwo xomumɛtɔwo. (Mt. 10:37) Vɔ ecɛ dedasɛ mɔ mìami agban ciwo yí le mì ji le xomu lɔ mɛ sɔsɔ o yí abubuɔ mɔ wowo sɔsɔ adɔ mìwo nu dagbekpe nɔ Mawu koɖo Kristo o. Ewaɖeɔ, gbɔxwe mìwo nu ajɔ ji nɔ Mawu koɖo Kristo ɔ, mìɖo asɔsɔ agban ciwo yí le mì ji le xomu lɔ mɛ. (1 Tim. 5:4, 8) Nɔ mìwɛni ahan ɔ, eji ajɔnɔ mì. Yehowa nya mɔ xomuwo akpɔ jijɔ nɔ asu koɖo ashi lɔnnɔ wowonɔnɔwo yí gbebunɔ nɔnɔ, nɔ jilawo lɔn wowo viwo yí gbekplanɔ enu wo yí ɖeviwo can senɔ tonu nɔ wowo jilawo.​—Efe. 5:33; 6:1, 4.

7. Lé àwɛ asɔ agban ci yí le eo ji le xomu lɔ mɛɔ?

⁷ Lé àtɛnŋ asɔ agban cɛ doɔ? Nɔ ènyi asu, ashi alo eviɔ, wanɔ do nunya ci yí le Bibla mɛ ji. Ŋgbewanɔ do enu ciwo eoŋtɔ èkpɔ mɔ yɛnyɔ, alo enu ciwo yí bɔ le fini míle abi enyɔ ciwo yí mɛ ciwo nunɔ mɔ yewonyi nunyatɔwo nunɔ ji kpoŋ ahan o. (Elo. 24:3, 4) Zannɔ Bibla nukplawema mìwotɔ lɔwo nywiɖe. Nukplamu nywiwo le wema cɛwo mɛ so lé woawa do Bibla gɔnmɛɖosewo ji do. Le kpɔwɛ mɛ, “Nu Si Akpe Ðe Ƒomewo Ŋu” nu enyɔ adodwiwo so cukaɖa ciwo koŋ asu koɖo ashi, jilawo koɖo jajɛwo donɔ go le egbɛ mɛ nu. b Kpɔtɔ awakɔ do enyɔ ci Bibla nu ji nɔ xomumɛtɔ kpɛtɛwo dewakɔ do ji can. Nɔ èwɛkɔ ahan ɔ, ao xomu akpɔ nyɔna so mɛ yí Yehowa can acu shi nɔ eo.​—1 Piɛ 3:1, 2.

8. Lé gbeta ciwo yí mìsɔnɔ kpɔnɔ ŋsɛn do mì ji doɔ?

⁸ Agban le mì ji mɔ mìasɔ enu ciwo yí tonɔ le gbeta ciwo yí mìsɔnɔ mɛ. Yehowa tashi mì nɔ mìasɔnɔ gbetawo mìwoŋtɔwo yí gbeji mɔ mìwo le kpɔ jijɔ ci yí tonɔ so gbeta nywiwo sɔsɔ mɛ. Vɔ nɔ mìsɔ gbeta dɔndɔnwoɔ, étanɔshi mì nɔ mìaɖu alɔzu ciwo yí to le wo mɛ. (Gal. 6:7, 8) Eyi taɖoɔ, mìaxɔ gbe do alɔzu ciwo yí tonɔ so gbeta dɔndɔn ciwo yí mìsɔ alo nuxu ci mìxo koɖo enu ciwo mìwa tamɛmabukpɔtɔ mɛ. Enu ci mìwa atɛnŋ adɔ mìadodoɔ hwɛ mìwoɖekiwo. Ci mìnya mɔ mìaɖu alɔzu ciwo yí tonɔ le gbeta ciwo mìsɔnɔ mɛɔ, édɔ yí mìhunnɔ mìwo nuvɔnwo mɛ, dranɔ afɛn ciwo yí mìwa do yí minɔ wo wawa.  Afɔɖeɖe cɛwo kpenɔdo mì nu mìkpɔtɔ yí lɔnɔ agbeju lɔ.

9. Nyi àwa nɔ èsɔ gbeta dɔndɔn ɔ? (Kpɔ foto lɔ hɛnnɛ.)

⁹ Lé àtɛnŋ asɔ agban cɛ doɔ? Nɔ datɛnŋ atrɔ ŋɖe le gbeta dɔndɔn ci èsɔ nuɔ, lɔn do lé enu lɔwo le do yɛ ji. Nya mɔ yedatɛnŋ atrɔ enu ci yí jɔ vayi o. Ŋgbegu ao gamɛ koɖo ŋsɛn yí atekpɔ mɔ yeadasɛ mɔ enu ci yewa nyi nunywi alo adodoɔ hwɛ eoɖeki koɖo mɛbuwo do afɛn ciwo èwa nu o. Ewaɖeɔ, lɔn do ao fɛnwo ji yí ado gbla veviɖe keŋ atɔ nunywi wawa hɔntɔn. Nɔ èdokɔ hwɛ eoɖeki do enudɔndɔn ɖe ci èwa nuɔ, sɔ eoɖeki hwe keŋ ado gbe ɖaɖa nɔ Yehowa yí alɔn do afɛn ci èwa ji yí abiɔɛ mɔ yɛ le sɔ ke ye. (Eha. 25:11; 51:3, 4) Ðe kuku nɔ mɛ ciwo yí ao nuwanawo do vevisese nɔ yí aji kpekpedonu so hamɛmɛshinshinwo gbɔ nɔ eʒan. (Ʒaki 5:14, 15) Kpla nu so afɛn ciwo èwa mɛ yí aɖui mɔ yedagbewa afɛn hunnɔwo ke o. Kando ji mɔ nɔ èwɛ ahan ɔ, Yehowa aku ŋshishi nɔ eo yí ana eo kpekpedonu ci èʒan.​—Eha 103:8-13.

10. Nyi yí taɖo emɔkpɔkpɔ nɔ enu ciwo datɛnŋ avamɛ nyi agban kpɛnkpɛn ɔ? (Galatitɔwo 6:4)

¹⁰ Emɔkpɔkpɔ nɔ enu ciwo datɛnŋ avamɛ o. Nɔ mìsɔ mìwoɖekiwo sɔ sɔnɔ kpɔ koɖo mɛbuwoɔ, anyi mìdrodroɔ agban kpɛnkpɛnwo do mìwoɖekiwo ji. (Hlɛn Galatitɔwo 6:4.) Nɔ èsɔnɔ eoɖeki sɔnɔ kpɔ koɖo mɛbuwo kabakabaɔ, wowo nuwo atɔ ŋmɛ cici nɔ eo yí natɔ ehwlɛn wawa koɖo wo. (Gal. 5:26) Nɔ mìjejeɛ agbla mɔ mìawa enu ci mɛbuwo wakɔ gan yí mìdeɖo enujikpekpe awɛɔ, mìado vevisese nɔ mìwoɖekiwo gbaagbali. Eyi nɔ ‘mìkpɔkpɔ emɔ nɔ ŋɖe yí devamɛ blaŋ ɔ, éna yí eji senɔ vevi’; vevisese ŋtɔteŋ anyi nɔ mì nɔ mìdrɔdrɔ ŋɖewo ciwo mìdatɛnŋ avawa gbeɖe mɔ mìawa. (Elo. 13:12, NWT) Nɔ mìwɛ ahan ɔ, adɔ yí ŋsɛn avɔ nɔ mì yí mìagbɔjɔ le agbeju lɔ lɔlɔ mɛ.​—Elo. 24:10.

11. Nyi yí atɛnŋ akpedo eo nu nami emɔkpɔkpɔ nɔ enu ciwo yí datɛnŋ avavamɛ gbeɖeɔ?

¹¹ Lé àsɔ agban ŋtɔ́ danŋkpe doɔ? Ŋgbekpɔkɔ emɔ mɔ yeawa enu wu enu ci Yehowa jikɔ mɔ eɔ le wa o. Dejinɔ gbeɖe mɔ eɔ le na ye enu ci yí dele eo shi o. (2 Kor. 8:12) Kando ji mɔ Yehowa desɔnɔ enu ciwo èwakɔ sɔ sɔnɔ kpɔ koɖo mɛbuwo tɔwo o. (Mt. 25:20-23) Sɛnsɛn ci èsɔ nikɔ so ji mɛ, egbejinɔnɔ aotɔ koɖo ejidodo aotɔ le veviɖe ni. Sɔ eoɖeki hwe yí alɔn do ji mɔ ao xwe, ao lanmɛsɛn koɖo nɔnɔmɛ ciwo mɛ èle atɛnŋ ana yí datɛnŋ awa sugbɔ o. Shigbe Bazilai nɛɔ, lɔn agbenɔ edɔ ɖewo wawa, nɔ ao xwe koɖo ao lanmɛsɛn adɔ yí edɔ lɔ wawa aɖe fun nɔ eo. (2 Sam. 19:35, 36) Shigbe Moizi nɛɔ, lɔn nɔ mɛbuwo akpenɔdo eo nu yí nagbemanɔ ao dɔwo koɖo mɛbuwo. (Hun. 18:21, 22) Nɔ èsɔ eoɖeki hwenɔ ahan ɔ, adɔ yí dajinɔ mɔ yeawa enu ciwo yí adɔ enu acikɔ nɔ eo le agbeju lɔ lɔlɔ mɛ o.

12. Nɔ mɛbuwo sɔ gbeta dɔndɔnwo ɖe, mìwo fɛn yɔa? Dre mɛ.

¹² Kpɔkpɔɛ mɔ mìwo fɛn enyi nɔ mɛbuwo sɔ gbeta dɔndɔnwo. Mìdatɛnŋ asɔ gbetawo do nu nɔ mɛbuwo o alo mìdatɛnŋ awɛ nɔ woŋgbeɖu alɔzu ci yí ato so gbeta dɔndɔn ci wosɔ mɛ o. Le kpɔwɛ mɛ, ŋsuvi ɖe alo nyɔnuvi ɖe tɛnŋ sɔ gbeta mɔ yedagbesɛn Yehowa o. Gbeta ŋtɔ́ ci  esɔ tɛnŋ na yí yi jilawo ase vevi sugbɔ. Vɔ agban kpɛnkpin enyinɔ le kɔ nɔ jila ciwo yí donɔ hwɛ wowoɖekiwo do gbeta dɔndɔn ci wowo viwo sɔ ŋci. Yehowa deji mɔ wo le sɔ agban ŋtɔ́ o.​—Rɔm. 14:12.

13. Lé jila ɖe awa nu do nɔ eviɛ sɔ gbeta dɔndɔn ɖeɔ?

¹³ Lé àsɔ agban ŋtɔ́ danŋkpe doɔ? Nya mɔ Yehowa na amɛɖekishinɔnɔ blɔɖe mì pleŋ. Étanɔshi mɛɖekamɛɖeka sɔnɔ yiŋtɔ gbetawo. Gbeta sɔsɔ mɔ mìasɛn Yehowa can le mɛ. Yehowa nya mɔ denyi jila ci nu afɛn dele o, éji kpoŋ mɔ eɔ le wa ci ji àkpe. Gbeta ci vio sɔɔ, yiŋtɔ gban yɔ, denyi ao gban yɔ o. (Elo. 20:11) Vɔ shigbe jila nɛɔ, ètɛnŋ kpɔtɔ bukɔ afɛn ciwo èwa kpɔ. Nɔ enyi ahan yɔ nɛɔ, nu lé ewakɔ do nɔ eo nɔ Yehowa yí abiɛ mɔ yi le sɔ ke ye. Énya mɔ datɛnŋ atrɔ yi godu yí atrɔ enu ci yí jɔ vayi o. Yí nɛnɛke dekpɔkpɔ emɔ mɔ, eɔ awɛ nɔ vio ŋgbeɖu alɔzu nɔ enu ci edo shi lɔ o. Le nɔ susu mɛ nɔ eo mɔ, nɔ evio do gbla keŋ trɔ va Yehowa gbɔɔ, átrɔ axɔɛ koɖo jijɔ.​—Luiki 15:18-20.

14. Nyi yí taɖo ehwɛdoamɛɖeki ɖoɖu nyi agban ci mìɖo asɔ danŋkpeɔ?

¹⁴ Ehwɛdoamɛɖeki ɖoɖu. Nɔ mìwa nuvɔn ɔ, esɔgbe mɔ mìado hwɛ mìwoɖekiwo. Vɔ Yehowa dejinɔ mɔ mìadonɔ hwɛ mìwoɖekiwo ɖoɖu o. Mìɖo asɔ agban ŋtɔ́ danŋkpe. Lé mìawɛ anya mɔ mìdodoɔ hwɛ mìwoɖekiwo ɖoɖuɔ? Mìatɛnŋ akando ji mɔ Yehowa sɔ nuvɔn ci mìwa sɔ ke mì, nɔ mìnu nuvɔn ci mìwa, trɔ ji mɛ yí gbeɖeɖeɛ afɔ ciwo yí adɔ mìdagbewa nuvɔn lɔ ke o. (Edɔ. 3:19) Nɔ mìɖe afɔ ŋtɔ́wo ɖegbɔɔ, Yehowa deji mɔ mìwo le kpɔtɔ adodoɔ hwɛ mìwoɖekiwo o. Énya lé ehwɛdoamɛɖeki ɖoɖu atɛnŋ adahɛn nu le amɛ nu do. (Eha. 31:10) Nɔ mìvaci ŋshishi mɛ ɖoɖuɔ, mìtɛnŋ vami agbeju lɔ lɔlɔ.​—2 Kor. 2:7.

15. Nyi yí atɛnŋ akpedo eo nu yí dadonɔ hwɛ eoɖeki ɖoɖuɔ? (1 Ʒan 3:19, 20) (Kpɔ foto lɔ hɛnnɛ.)

 ¹⁵ Lé àsɔ agban ŋtɔ́ danŋkpe doɔ? Nɔ èkpɔtɔ dokɔ hwɛ eoɖeki ɖoɖuɔ, sɔ susu ɖo lé Mawu ‘sɔnɔ agɔjeje kenɔ amɛ nyɔnɔnwitɔ’ ji. (Eha. 130:4) Nɔ Yehowa sɔ enu ke mɛ ciwo yí trɔ ji mɛ nyɔnɔnwitɔɔ, éɖo gbe mɔ: “Ŋ da ɖoŋwi wowo gɔjejewo o.” (Ʒer. 31:34) Ecɛ dasɛ mɔ Yehowa dagbeva bubuɔ nuvɔn ciwo èwa vayi kpɔ o. Eyi taɖo ŋgbenu mɔ ci yekpɔkpɔ alɔzu nɔ nuvɔn ciwo yí yewaɔ, anyi kpɔ mɔ Yehowa desɔ ke eye o. Eyi nɔ nuvɔn ciwo yí èwa vayi na yí datɛnŋ agbewa ŋɖewo le Yehowa sɛnsɛn mɛ kakacɛɔ, ŋgbeci ŋshishi mɛ o. Yehowa degbebukɔ tamɛ kpɔ so ao nuvɔnwo nu o, eyi eɔŋtɔ can deɖo agbebu tamɛ kpɔ so wo nu o.​—Hlɛn 1 Ʒan 3:19, 20.

16. Ci mìnyi ejulɔtɔwo ɖe, nyi mìɖo anyaɔ?

¹⁶ Ci mìle agbeju lɔ lɔkɔɔ, mìɖo ‘ashi ju lɔ mɔ mìaɖu ji.’ (1 Kor. 9:24) Nɔ mìasun jiɔ, mìɖo anya evototo ci yí le gblamɛ nɔ agban ciwo mìɖo ahɛn koɖo ciwo mìɖo asɔ danŋkpe. Le agban ciwo mìɖo ahɛn koɖo ciwo mìɖo asɔ danŋkpe mɛɔ, hwɛɖeka nu yí mìxo nuxu so le nyɔta cɛ mɛ. Vɔ ebuwo gbeli. Yesu nu mɔ, “Sukaɖuɖuwo, koɖo ahanumuwo, koɖo tamɛ sugbɔ bukpɔwo so xexe mɛ enuwo nu” tɛnŋ dɔ yí nu aci kɔ nɔ mì. (Luiki 21:34) Bibla kpukpui cɛwo koɖo buwo atɛnŋ akpedo eo nu nado jeshi trɔtrɔ ciwo èɖo awa keŋ akpɔtɔ ale agbeju lɔ lɔkɔ.

17. Nyi yí taɖo mìkando ji mɔ mìatɛnŋ aɖu ji le agbeju lɔ lɔlɔ mɛɔ?

¹⁷ Mìkando ji mɔ mìatɛnŋ aɖu ji le agbeju lɔ lɔlɔ mɛ, ɖo Yehowa ana mì ŋsɛn ci yí ʒan. (Ezai 40:29-31) Eyi taɖo, ŋgbegbɔjɔ o! Wa apotru Pɔlu tɔ han, éwa ci ji ekpe pleŋ keŋ atɛnŋ axɔ fɛncu ci woɖo ɖɛ ni. (Fili. 3:13, 14) Mɛɖe datɛnŋ alɔ ju lɔ do nu nɔ eo o, vɔ Yehowa akpedo eo nu naɖu ji. Yehowa akpedo eo nu nasɔ ao gbanwo yí asɔ ci yí deʒan wo sɔ kɔnŋgbe. (Eha. 68:19) Yehowa ado alɔ eo yí nasun ji alɔ ju lɔ koɖo ejidodo yí aɖu ji.