1. Еврейлерге 12:1-ле болзо, биске финишке једерге нени эдер керек?

 АГАРУ БИЧИК христиан јӱрӱмди јӱгӱришке тӱҥдештирет. Финишке једип барган улуска кайрал эдип, ӱргӱлји јӱрӱм берилер (2 Тим. 4:7, 8). Оныҥ да учун финиш чек јууктап келерде, колысты бош салбай учына јетире јӱгӱректер. Мыны эдерге финишке јеткен апостол Павелдиҥ јӧби болужар: «Чаптык эдип турган кандый ла јӱкти... бойыбыстаҥ туура таштап, бистиҥ алдыста јаткан јолды учына јетире јӱгӱректер». (Еврейлерге 12:1, ЈТ кычырыгар.)

2. Биске бойыстаҥ кандый «чаптык эдип турган... јӱкти» чачар керек?

² Апостол Павелдиҥ бу сӧстӧри нени темдектейт? Ол дезе кереги јок ончо јӱкти бойыстаҥ туура таштаарын темдектейт. Нениҥ учун дезе ол бистиҥ кӱчисти айрыыр ла тӱрген јӱгӱрерге чаптыгын јетирер. Финишке јетире јӱгӱрерге биске кандый јӱк чаптыгын јетирип турганын капшай билип алала, оноҥ айрылар керек. Бу ок ӧйдӧ биске керектӱ јӱкти таштабас керек. Таштап ийзеес, бисти бу јолдоҥ чыгарып салар (2 Тим. 2:5). Ол кандый јӱк? Оноҥ ары кӧрӱп ийектер.

3. а) Галаттарга 6:5 аайынча биске кандый јӱкти апарар керек? б) Бу јӧрмӧлдӧ нени кӧрӧрис ле оны кандый амадулу кӧрӧрис?

³ Галаттарга 6:5 кычырыгар. Павел: «Кажы ла кижи бойыныҥ јӱгин апарар» — деп айткан. Мында, Кудайдыҥ алдында, бис учун кем де эдип болбос молјулар керегинде айдылат. Бу јӧрмӧлдӧ «бойыстыҥ јӱгиске» не кирип турган ла бис оны канай апарар аргалу деп кӧрӧрис. Анайда ок биске кандый кереги јок јӱктеҥ айрылар керек деп, билип аларыс. Бис бойыстыҥ јӱгисти апарып, кереги  јок јӱктеҥ айрылзаас, финишке једип барарыс.

4. Кудайга иштеерге берген сӧзис биске нениҥ учун јӱк болбой јат? (Јурукты база кӧрӱгер.)

⁴ Иеговага иштеерге берген сӧзис. Кудайга учурланган тужыста, јажын-чакка оныҥ ишчизи болорго ло оныҥ табын бӱдӱрип јӱрерге сӧзисти бергенис. Берген сӧзисти бӱдӱрер керек. Бис айткан сӧзис учун каруулу. Је ол биске јӱк эмес, нениҥ учун дезе Иегованыҥ табын бӱдӱргенистеҥ бистиҥ јӱрӱмис камаанду (Ачыл. 4:11). Кудай бисти бойыныҥ кылык-јаҥына тӱҥей эдип ле оны билер кӱӱндӱ эдип јайаган. Оныҥ учун бис Кудайга јууктаар аргалу. Биске оныҥ табын бӱдӱрерге сӱреен јарап јат (Сар. 40:8). Анайда ок Кудайга сӧсуккур болгоныс ла оныҥ Уулыныҥ айтканыла јӱргенис биске ийде-кӱч берет (Матф. 11:28—30).

5. Иеговага берген сӧзисти бӱдӱрерге биске не болужар? (1 Иоанн 5:3).

⁵ Бу јӱкти апарарга не болужар? Баштапкызы,  Иеговага сӱӱжигерди оноҥ ло ары тыҥыдыгар. Кудайга сӱӱжисти тыҥыдарга, бӱгӱнги кӱнде берген кӧп сыйларды ла келер ӧйдӧги беретен сыйларды шӱӱп сананганы болужар. Канча ла кире Кудайга сӱӱжис тыҥ болзо, ончо ло кире оныҥ сӧзин угарга јеҥил болор. (1 Иоанн 5:3 кычырыгар.) Экинчизинде, Иисустаҥ тем алыгар. Ол Кудайдыҥ табын бӱдӱрерге нени эткен? Иисус јаантайын Кудайдаҥ болуш сурап туратан. Анайда ок ол Кудайдыҥ берерге турган кайралын сакыган (Евр. 5:7; 12:2). Биске Иисус ла чылап јаантайын ла Кудайдаҥ ийде-кӱч сурап турар керек. Анайда ок Кудайдыҥ берерге турган кайралын, ӱргӱлји јӱрӱмди, бир де ундыбас керек. Айдарда, Кудайга сӱӱжисти оноҥ ло ары тыҥыдып турзаас ла Иисустыҥ јолыла барзаас, берген сӧзисти бӱдӱрип саларыс.

6. Нениҥ учун биледеги молјуларды ундыбас керек? (Јурукты база кӧрӱгер.)

⁶ Биледеги молјулар. Агару Бичикте христиандар Иегова ла Иисусты бойыныҥ јуук улузынаҥ артык сӱӱр учурлу деп айдылат (Матф. 10:37). Је бу Иегованы ла Иисусты сӱӱндирерге, бойыстыҥ јуук улузыска ајару этпес керек деп кӧргӱспей јат. Карын, Иегова ла Иисус сӱӱнзин деп турган болзоос, биске биледеги молјуларысты ундыбас керек (1 Тим. 5:4, 8). Бу бисти ырысту эдет, нениҥ учун дезе Иегова билелер ырысту болзын деп јӧптӧр берген. Ӧбӧӧни ле ӱйи бой-бойын сӱӱр ле тоор учурлу, ада-энелер балдарын сӱӱр, ӱредер, а балдар — ада-энезиниҥ сӧзин угар учурлу (Эф. 5:33; 6:1, 4).

7. Слерге биледеги молјугарды бӱдӱрерге не болужар?

⁷ Бу јӱкти апарарга не болужар? Адалар, энелер, балдар, Агару Бичиктеги ойгор јӧптӧрди тузаланып туругар. Бойыгардыҥ сезимдереерге, культурагардыҥ чӱм-јаҥдарына, анайда ок биле јанынаҥ сурактарда ӱзени билетен эксперттер деп адалып турган улустарга иженбегер (Укаа 24:3, 4). Организацияныҥ берип турган материалдарын толо тузаланыгар. Ондогы јӧптӧр библиялык принциптерди оҥдоорго болужып јат. Темдектезе, «Помощь семье» деген статьялардыҥ јуунтызында кӱчтерге туштаган эш-нӧкӧрлӧргӧ, ада-энелерге ле балдарга керектӱ јӧптӧр бар b. Слер бу јӧптӧрди, билегердиҥ улузы керексибей де турза, тузаланыгар. Анайып, бу јӧптӧр билегерге тузазын јетирер, а слер Иегованыҥ јарадузын алараар (1 Пётр 3:1, 2).

8. Бистиҥ чыгарган јӧптӧрис неге экелер аргалу?

⁸ Чыгарган јӧптӧрис учун каруулу болгоны́с. Иегова биске јайым кӱӱн сыйлаган. Ол бисти јакшы јӧптӧр чыгарып, оныла сӱӱнип јӱрзин деп кӱӱнзейт. Је бис јаман јӧптӧр чыгарзаас, Иегова бисти оныҥ каршузынаҥ корулабас (Гал. 6:7, 8). Оныҥ учун бис сананбай айткан сӧстӧристеҥ ле меҥдей-шиҥдей эткен керектеристеҥ шыралап јӱрӱп јадыс. Анайда ок бисти уйадыс та јиирдеҥ айабас. Бис чыгарган јӧптӧристеҥ Кудайдыҥ алдына каруулу деп, оҥдоп турзаас, кинчектерди алынарга, тӱзединерге ле база андый кинчек этпеске болужар.  Анайып этсеес, бис бу јолдоҥ чыкпазыс.

9. Слер кинчек эткен болзоор, нени эдер аргалу? (Јурукты база кӧрӱгер.)

⁹ Бу јӱкти апарарга не болужар? Темдектезе, слер кинчек эдип ийгенеер. Эмди нени де солыыр арга јок то болзо, ундыбагар, болуп калган немени кайра эдип болбозоор. Оныҥ учун кӱчигерди јылыйтып, бойоорды тегин јерге бурулабагар эмезе актабагар. Анайда ок јастырагар учун улусты да бурулабагар. Андый ӧйдӧ бойыгардыҥ јастырагарды алынып, база анайда этпеске албаданыгар. Јастырагар учун бойыгарды бурулап турган болзоор, јобош тудунып, Иеговага јастырагарды таштазын деп мӱргӱгер (Сар. 25:11; 51:3, 4). Ачындырып ийген кижигердеҥ јаманыгарды таштазын деп сурагар. Керек болзо, аксагалдаҥ да болуш сураарга јараар (Иак. 5:14, 15). Јастыралараардаҥ ӱренигер. Ол тушта Иегова слерди килеер ле болужар деп, бир де алаҥзыбагар (Сар. 103:8—13).

10. Нениҥ учун чек бӱтпейтен ижемјини сакып турганы уур јӱк болот? (Галаттарга 6:4).

¹⁰ Качан да бӱтпейтен сакылта. Бис ӧскӧ улусла бойысты јаантайын тӱҥдештирип турзаас ла ӧткӱре кӧп немени бойыстаҥ сакып турзаас, ийде-кӱчис чыгып калар. (Галаттарга 6:4 кычырыгар.) Анайда ок ӧскӧ улустыҥ једимдерин јаантайын сананып турзаас, бис олорго кӱйӱнип баштаарыс ла андый ла једимдӱ болорго јӱткӱп баштаарыс (Гал. 5:26). Бис бойыстыҥ аргабысты ла айалгабысты сананбай, олор ло чылап эдип баштазаас, бойыска ла јаман болор. Бистиҥ јӱрегис «узак ӧйгӧ бӱтпей турган ижемјини» сакып, ооруп јат, је качан да бӱтпейтен ижемјини сакызаас, бистиҥ јӱрегис оноҥ тыҥ ооруп баштаар (Укаа 13:12). Мынай эдип турзаас, ийде-кӱчис чыгып калар ла бу јолдо араайлай берерис (Укаа 24:10).

11. Качан да бӱтпес немелерди сакыбаска не болужар?

¹¹ Бу јӱктеҥ канайып айрылар? Бойыгардаҥ Иегова сакып турган неменеҥ кӧп неме сакыбагар. Ол слердеҥ эдип болбос немени некебей јат (2 Кор. 8:12). Анайда ок Иегова слерди кемле де тӱҥдештирбей турганында алаҥзыбагар (Матф. 25:20—23). Ол слердиҥ ижеерди, слердиҥ чындык болгоноорды, слердиҥ турумкайаарды сӱреен тыҥ баалап јат. Оныҥ учун јажаардаҥ, су-кадыгардаҥ эмезе айалгалараардаҥ улам, алдындагы чылап, кӧп неме эдип болбозыгарды оҥдоп турыгар. Барзиллай чылап, јажаардаҥ эмезе су-кадыгардаҥ улам јакылтаны бӱдӱрип болбос болзоор, оны албаска белен болугар (2 Сам. 19:35, 36). Анайда ок Моисей чылап, улустыҥ болужын аларга белен болугар ла арга бар болзо, молјулараарла ӱлежип туругар (Чыг. 18:21, 22). Мынайып эдип турзаар, слер бойоордоҥ эдип болбос немени сакыбазыгар ла ийде-кӱчтерди тегин јерге јылыйтпазаар.

12. Бис улустыҥ јастыра чыгарган јӧби учун каруулу ба? Јартап беригер.

¹² Улустыҥ чыгарган јастыра јӧби учун каруулу болоры. Бис улус учун јӧп чыгарып болбозыс. Кезикте бис олорды јастыра керектердеҥ де корулап болбой јадыс. Темдектезе, кемниҥ де уулы эмезе кызы чындыкты артыргызып салат. Бу дезе ада-энелердиҥ јӱрегине јаан ачу экелет. Мынаҥ улам олор бойын бурулап, уур јӱкке бастыртып ийет. Иегова  ада-энелерди мындый јӱктеҥ јыгылып калзын деп, кӱӱнзебей јат (Рим. 14:12).

13. Балдар јастыра јӧп чыгарза, ада-энелер нени эдер?

¹³ Бу јӱктеҥ канайып айрылар? Иегова кажы ла кижиге јайым кӱӱн берген. Оныҥ учун кажы ла кижи нени талдаарын, нени эдерин, ол тоодо Иеговага иштеерин, иштебезин, бойы кӧрӧт. Иегова ада-энелерди толо кемдӱ эмес деп оҥдоп јат. Је андый да болзо, ада-энелер балдарына эҥ јакшызын берип, чыдадар учурлу. Балагар нени де талдап алган болзо, ол оныҥ кӱӱни болуп јат (Укаа 20:11). Је слер бойоорды тӱҥей ле јинип турган болороор. Андый болзо, Иеговага сезимдереерди куучындап, јаманыгарды таштазын деп сурагар. Ӧткӧн ӧйдӧ болгон немени солып болбозыгарды ол оҥдоп јат. Анайда ок Иегова слер балагарды оныҥ чыгарган јӧбиниҥ каршузынаҥ корулап болбозоор деп билип јат. Је балагар Иеговага ойто кайра јанар деп шӱӱп алза, Иегова оны јектебей, билезине кожуп алар деп, бир де алаҥзыбагар (Лука 15:18—20).

14. Бойын ӧйинеҥ ӧткӱре бурулаарынаҥ нениҥ учун айрылар керек?

¹⁴ Бойын ӧйинеҥ ӧткӱре бурулаары. Качан бис кинчек этсеес, бойысты бурулап јадыс. Је Иегова бисти бойысты ӧйинеҥ ӧткӱре бурулабазын деп кӱӱнзейт. Карын, бу јӱктеҥ айрылар керек. Бис бойысты ӧйинеҥ ӧткӱре бурулап турганыс па, јок по деп канайып билип алар? Бис кинчегисти ачыгынча айдып, алынып, база этпеске албаданып турзаас, Иегова бистиҥ јаманысты таштап салган деп алаҥзыбас аргалу (Ап. ижи 3:19). Бу алтамдарды эткен кийнинде, Иегова бисти бойысты бурулабазын деп кӱӱнзеп јат. Нениҥ учун дезе бойын бурулаары коркышту каршулу болот (Сар. 31:10). Бис кунуга берзеес, јӱрӱмниҥ јолынаҥ чыга берердеҥ айабазыс (2 Кор. 2:7).

15. Ӧйинеҥ ӧткӱре јинбеске нени эдер керек? (1 Иоанн 3:19, 20). (Јурукты база кӧрӱгер.)

 ¹⁵ Бу јӱктеҥ канайып айрылар? Јастыралардаҥ улам бойоорды ӧйинеҥ ӧткӱре јинип турган болзоор, Иегова — «јаманды таштап турган Кудай» деген сӧстӧрди ундыбагар (Сар. 130:4). Ол бойыныҥ кинчектерин акту јӱрегинеҥ алынып турган улуска: «Мен олордыҥ... кинчектерин де эске албазым» — деп, сӧзин берет (Иер. 31:34). Бу дезе Иегова слерди алдындагы эткен керектереер учун бурулабай турганын темдектейт. Оныҥ учун јастыралараардаҥ улам шыралап турзаар, Иегова слердиҥ јаманыгарды таштабаган деп сананбагар. Анайда ок јуунда кандый бир јакылталар берилбей турза, бойоорды јинбегер. Айдарда, Иегова слердиҥ кинчегерди ундып саларда, слер де оны ундып салыгар. (1 Иоанн 3:19, 20 кычырыгар.)

16. Биске оноҥ ло ары јӱгӱрерге нени эдер керек?

¹⁶ Бис јӱрӱм учун јӱгӱрип јадыс. Је бу кайралды аларга биске канайып јӱгӱрер керек? (1 Кор. 9:24). Керектӱ јӱкти апарар керек, керек јогын таштап салар керек. Бис бу јӧрмӧлдӧ андый јӱктердиҥ јӱк ле кезигин кӧрдис. Је мынаҥ да ӧскӧлӧри бар. Темдектезе, Иисус бистиҥ јӱрӱмисти «ӧйинеҥ ӧткӱре ажангыр болоры, аракызак болоры ла јадын-јӱрӱмниҥ сурактары слерди олјолобозын» деген (Лука 21:34, ЈТ). Бу да, бого до тӱҥей библиялык ӱлгерлер јӱрӱмниҥ јолынаҥ туура јӱре бербеске, биске кандый солунталар эдер керек деп кӧрӱп ийерге болужар.

17. Јӱрӱм учун јолды бис учына јетире јӱгӱрип ийерис деп, нениҥ учун алаҥзыбай јадыс?

¹⁷ Бис финишке једерис деп алаҥзыбай јадыс. Нениҥ учун дезе Иегова биске керектӱ кӱчти берер (Иса. 40:29—31). Оныҥ учун јӱгӱрижеерди араайлатпагар! Бастыра ийде-кӱчинеҥ албаданып, финишке јеткен апостол Павелдеҥ тем алыгар (Флп. 3:13, 14). Бу јолды кем де слер учун јӱгӱрип болбос, је Иегованыҥ болужыла слерде ӱзе келиже берер. Ол слерге апаратан јӱкти апарарга ла айрылатан јӱктеҥ айрыларга болужар (Сар. 68:19). Иегованыҥ болужыла слер учына јетире јӱгӱрип, јеҥип алар аргалу!