1. Aha do na porlu taulahon asa sahat tu garis finis di parlumbaan tu hangoluan? (Heber 12:1)

 DI BIBEL, dipatudos do hangoluan ni halak Kristen tu parlumbaan. Molo marhasil nasida marlojong sahat tu garis finis, dapotna ma hangoluan na salelengna. (2 Tim. 4:7, 8) Alani i, ikkon berupaya do hita asa torus marlojong di parlumbaan i, tarlumobi ala nga jonok hita tu garis finis. Dipaboa Apostel Paulus do aha na mambahen ibana marhasil di parlumbaan i. Didok ibana, ‘Tabolokkon ma boban na boi mangabbati hita di parlumbaatta. Toktong ma hita marsitutu marlojong di parlumbaan naung ditottuhon tu hita.’​—Jaha Heber 12:1.

2. Aha do maksud ni si Paulus tikki didok ibana ‘ikkon tabolokkon boban’?

² Tikki didok si Paulus ‘ikkon tabolokkon boban’, maksudna na gabe so adong be boban manang tanggung jawab ni halak Kristen? Daong. Na didok si Paulus dison, boban na boi mangabbati hita di parlumbaan i do na ikkon tabolokkon. Alana boban on boi mambahen hita gabe lambat manang gabe loja marlojong di parlumbaan i. Asa boi hita torus marlojong, ikkon taboto do boban na dia na ikkon taboan jala na dia na ikkon tabolokkon. Alai sipata dang taboto boban manang tanggung jawab na dia do na ikkon taboan. Hape massai penting do i asa boi torus hita marlojong di parlumbaan i. (2 Tim. 2:5) Attong boban manang tanggung jawab aha ma i?

3. (a) Songon na disurat di Galatia 6:5, aha do tanggung jawabta? (b) Aha do na lao tabahas di artikel on, jala boasa?

³ Jaha Galatia 6:5. Dipaboa si Paulus do boban manang  tanggung jawab aha na ikkon taboan. Didok ibana, “Ganup do halak martanggung jawab tu na diulahon ibana.” Maksud ni si Paulus disi i ma tanggung jawabta sandiri tu Debata, dang boi halak na asing mangulahon i tu hita. Di artikel on, tabahas ma aha do tanggung jawabta, jala boha caratta mangulahon i. Asing ni i, ikkon taboto do akka boban na so porlu taboan jala boha carana mambolokkon i. Jadi molo taulahon tanggung jawabta i jala tabolokkon boban na so porlu, gabe boi ma hita toktong marlojong sahat tu garis finis jala mandapot hangoluan salelengna.

4. Boasa dang maol mangulahon tanggung jawabta tu Jahowa? (Ida gambar.)

⁴ Tanggung jawabta tu Jahowa. Tikki talehon diritta tu Jahowa, marjanji do hita manomba Ibana jala mangulahon lomo ni rohana. Ikkon torus do taulahon i. Tanggung jawab na balga do on, alai dang maol mangulahon i. Alana ditoppa Jahowa do hita asa boi mangulahon lomo ni rohana.  (Pgk. 4:11) Nungnga disuanton Jahowa tu rohatta lao mananda dohot manomba Ibana, jala ditoppa do hita asa boi maniru Ibana. Hasilna boi ma hita jonok tu Ibana jala marlas ni roha ala mangulahon lomo ni rohana. (Ps. 40:8) Asing ni i, molo taulahon lomo ni roha ni Debata jala taihutton Anakna, gabe ‘dipargogoi’ ma hita.​—Mat. 11:28-30.

5. Boha do carana mangulahon tanggung jawabmuna tu Jahowa? (1 Johannes 5:3)

⁵ Boha do carana mangulahon i? Adong dua carana. Na parjolo, torus ma patogu holongmuna tu Jahowa. Rimangi ma sude akka na denggan naung dilehon Jahowa tu hamu dohot pasu-pasu di ari na naeng ro. Molo lam balga holongmuna tu Jahowa, gabe lam mura ma hamu mangoloi parettana. (Jaha 1 Johannes 5:3.) Na paduahon, tiru ma Jesus. Marhasil do Jesus mangulahon lomo ni roha ni Debata, alana martangiang do ibana mangido bantuan ni Jahowa jala asa fokus tu upa na lao jaloonna. (Heb. 5:7; 12:2) Songon Jesus, martangiang ma hamu mangido gogo sian Jahowa jala asa sai diingot hamu janji taringot hangoluan salelengna. Molo lam balga holongmuna tu Debata jala ditiru hamu Jesus Anakna, gabe boi ma hamu mangulahon tanggung jawabmuna tu Jahowa.

6. Boasa ikkon tadalatton tanggung jawabta di keluarga? (Ida gambar.)

⁶ Tanggung jawab di keluarga. Di parlumbaan lao mandapot hangoluan na salelengna, ikkon tahaholongi do Jahowa dohot Jesus, lobi sian keluargatta. (Mat. 10:37) Alai maksudna, dang na gabe taabaihon tanggung jawabta di keluarga. Sebalikna, ikkon tadalatton do tanggung jawabta di keluarga asa las roha ni Debata dohot Kristus tu hita. (1 Tim. 5:4, 8) Molo taulahon i, gabe lam marlas ni roha ma hita. Asing ni i, diboto Jahowa do boha carana asa marlas ni roha keluarga. Ikkon marsihaholongan do suami istri, ikkon dihaholongi jala dilatik natua-tua do ianakkonna, jala ikkon dioloi ianakkonna do natua-tuana.​—Eps. 5:33; 6:1, 4.

7. Boha do carana mandalatton tanggung jawabta di keluarga?

⁷ Boha do carana mangulahon i? Dang soal hita suami, istri, manang ianakkon, ikkon pos do rohatta tu nasehat ni Bibel. Unang ma olo hita dipengaruhi budaya, perasaan, manang na didok akka penasehat perkawinan. (Poda 24:3, 4) Manfaatton ma publikasitta na marisi akka saran na mangurupi hita mangulahon prinsip ni Bibel. Misalna, brosur Keluargamuna Boi do Martua dohot bukku Mangolu Saleleng ni Lelengna pelajaran 49 dohot 50. Adong do disi akka prinsip ni Bibel na boi mangurupi pasangan suami istri, natua-tua, dohot akka na poso. b Berupaya ma hita mangulahon prinsip ni Bibel nang pe adong anggota keluargatta na so mangulahon i. Molo taulahon i, gabe mandapot manfaat ma keluargatta, jala gabe tahilala ma pasu-pasu ni Jahowa.​—1 Ptr. 3:1, 2.

8. Aha do pengaruh ni keputusanta tu hita?

⁸ Martanggung jawab tu keputusan na tabahen. Dilehon Jahowa do tu hita kebebasan lao mambahen keputusan sandiri, jala lomo do rohana asa marlas ni roha hita tu keputusan na denggan na tabahen. Alai molo sala keputusan na tabahen,  dipasombu Jahowa do hita manaon akibatna. (Gal. 6:7, 8) Alani i molo gabe susa hita ala sala tindakanta, pilihanta, dohot hatatta, tanggung jawabta do i. Olo do ra merasa bersalah hita alani kesalahanta i. Alai molo martanggung jawab hita tu keputusan na tabahen, gabe tergerak ma hita mangakkui dosatta, padenggatton pangalahotta, jala dang taulahon be kesalahan i. Molo taulahon i, boi ma hita toktong marlojong di parlumbaan i.

9. Molo sala keputusanmuna, aha ma na boi diulahon hamu? (Ida gambar.)

⁹ Boha do carana mangulahon i? Molo sala keputusanmuna jala dang boi be diuba, aha ma na boi diulahon hamu? Sadari ma dang boi diuba hamu aha naung masa. Unang ma gabe habis tikki dohot gogomuna lao mambuktihon dang hamu na sala, manang gabe disalahon hamu na asing alani keputusanmuna i. Alai akkui ma kesalahanmuna, jala sian saonari berupaya ma hamu mambahen na terbaik. Molo merasa bersalah hamu, martangiang ma tu Jahowa. Serep ma rohamuna mangakkui i, jala pangido ma asa disalpuhon kesalahanmuna i. (Ps. 25:11; 51:3, 4) Minta maaf ma hamu tu halak na haccit rohana dibahen hamu. Jala molo porlu, pangido ma bantuan ni akka sintua. (Jak. 5:14, 15) Marsiajar ma hamu sian kesalahanmuna i, jala unang be ulangi. Molo diulahon hamu i, hilalaonmuna ma asi ni roha ni Jahowa jala urupanna do hamu.​—Ps. 103:8-13.

10. Boasa boi gabe boban di hita molo dang masuk akkal cara marpikkirta? (Galatia 6:4)

¹⁰ Cara marpikkir na so masuk akkal. Boi do gabe boban di hita molo tabandingkon diritta dohot na asing. (Jaha Galatia 6:4.) Molo torus songon i hita, boi do gabe cemburu hita tu nasida jala gabe bersaing. (Gal. 5:26) Molo berupaya hita mangulahon songon na diulahon halak na asing, hape dang tolap hita, gabe susa do hita. Pikkirhon ma on: Didok Bibel boi do gabe metmet rohatta molo ‘sundat na tapaima-ima’. (Poda 13:12) Tarlumobi ma molo dang dapotta na tapaima-ima i. Akibatna gabe loja ma hita jala gabe lambat ma hita marlojong di parlumbaan i.​—Poda 24:10.

11. Boha do carana mambolokkon cara marpikkir na so masuk akkal?

¹¹ Boha do carana mambolokkon i? Unang ma paksahon dirimuna mangulahon lobi sian na tolapmuna. Alana dang hea dipangido Jahowa hita mangulahon na so tolapta. (2 Kor. 8:12) Pos ma rohatta, dang olo Jahowa mambandingkon hita dohot halak na asing. (Mat. 25:20-23) Diargai Jahowa do upayatta, kesetiaanta, dohot ketekunanta melayani Ibana. Serep ma rohatta mangakkui dang boi sude taulahon alani umur, kesehatan, manang situasitta. Songon si Barsilai, bisa jadi ikkon tatolak do tugas na dilehon tu hita ala marsahit manang ala nga matua hita. (2 Sam. 19:35, 36) Songon si Musa, tajalo ma bantuan jala molo cocok situasina, boi do talean tugas i tu na asing. (2 Mus. 18:21, 22) Jadi molo serep rohatta dang tapaksahon diritta mangulahon na so tolapta, asa unang gabe lam lambat hita marlojong di parlumbaan i.

12. Hita do na martanggung jawab molo sala keputusan na dibahen halak na asing? Patorang ma.

¹² Merasa martanggung jawab tu keputusan na sala na dibahen na asing. Dang boi hita mambahen keputusan tu halak na asing. Jala hita pe dang boi melindungi nasida sian akibat keputusan ni  nasida na sala. Misalna, olo do gellengta mamutusson maninggalhon Jahowa. Pasti lungun do rohatta molo songon i keputusan ni gellengta. Alai boi do i gabe boban tu natua-tua molo sai disalahon nasida dirina. Dang lomo roha ni Jahowa molo gabe boban i di hita.​—Rom 14:12.

13. Aha do na ikkon diingot natua-tua molo dibahen gellengna keputusan na sala?

¹³ Boha do carana mambolokkon i? Ingot ma, dilehon Jahowa do tu hita kebebasan lao mamillit. Jadi ganup hita boi do mamillit manomba Ibana manang na dang. Diboto Jahowa do dang adong natua-tua na sempurna. Na dipangido Ibana, asa dibahen natua-tua na terbaik na boi diulahon nasida. Tanggung jawab ni gellengmuna do tu keputusan na dibahen nasida, dang tanggung jawabmuna. (Poda 20:11) Olo do ra sai dipikkiri hamu kesalahanmuna. Alai molo tung pe songon i, paboa ma sude perasaanmuna tu Jahowa jala pangido ma asa disalpuhon kesalahanmuna i. Diboto Jahowa do dang boi diuba hamu aha naung masa. Alai dang dipangido Jahowa hamu asa melindungi gellengmuna sian akibat ni kesalahan ni nasida. Ingot ma molo berupaya do gellengmuna asa mulak tu Jahowa, pasti olo do Jahowa manjalo nasida muse.​—Luk. 15:18-20.

14. Boasa dang porlu torus hita merasa bersalah?

¹⁴ Torus merasa bersalah. Dung mangulahon dosa hita, wajar do molo merasa bersalah hita. Alai, dang lomo roha ni Jahowa molo torus hita merasa bersalah. Boban na ikkon tabolokkon do i. Olo do ra torus hita merasa bersalah, hape nungnga taakkui dosatta, bertobat, jala berupaya dang taulangi be i. Alai pos ma rohatta molo nungnga taulahon i, disalpuhon Jahowa do dosatta. (Ul. 3:19) Dang lomo roha ni Jahowa sai merasa bersalah hita. Diboto Ibana do boi do gabe susa hita molo songon i torus perasaanta. (Ps. 31:10) Molo sai lungun rohatta, ujungna gabe menyerah do hita di parlumbaan i.​—2 Kor. 2:7.

15. Boha do carana asa unang torus hamu merasa bersalah? (1 Johannes 3:19, 20) (Ida gambar.)

 ¹⁵ Boha do carana mambolokkon i? Molo sai torus do hamu merasa bersalah, sai ingot ma na olo do Jahowa manesa dosamuna. (Ps. 130:4) Tikki disalpuhon Jahowa dosa ni halak na bertobat sian ias ni rohana, didok Ibana do, “Dang ingotokku be akka dosa ni nasida.” (Jer. 31:34) Maksudna, dang sai diingot Jahowa be dosamuna i. Jala molo tung pe susa hamu alani dosamuna i, dang na berarti dang diampuni Jahowa dope hamu. Dung i, unang ma sai diuhumi hamu dirimuna molo dicabut tanggung jawabmuna di huria. Molo Jahowa sandiri dang mangingot-ingot dosamuna, hamu pe ikkon songon i ma.​—Jaha 1 Johannes 3:19, 20.

16. Aha do na ikkon taboto asa boi monang di parlumbaan i?

¹⁶ Ikkon ‘marlojong ma hita sian nasa gogotta asa boi monang’ di parlumbaan i. (1 Kor. 9:24) Boi do hita monang molo taboto aha tanggung jawab na ikkon taulahon dohot boban na ikkon tabolokkon. Di artikel on, nungnga tabahas taringot i. Alai adong dope boban na asing na dipaboa Jesus. Didok ibana olo do gabe ‘dirajai sipanganon dohot siinumon na marlobi-lobi hita manang gabe holsoan mamikkiri akka na porlu di ngolutta’. (Luk. 21:34) Ayat on dohot ayat na asing boi mangurupi hita mamboto aha na porlu tapadenggan di ngolutta asa boi toktong marlojong di parlumbaan i.

17. Boasa pos rohatta na boi do hita monang di parlumbaan i?

¹⁷ Boi do hita monang di parlumbaan tu hangoluan ala dilehon Jahowa gogo tu hita. (Jes. 40:29-31) Alani i, unang ma lambat hita marlojong di parlumbaan i! Tatiru ma Apostel Paulus na toktong marlojong lao mandapot upa. (Plp. 3:13, 14) Nang pe dang boi halak na asing manggattihon hita marlojong, alai diurupi Jahowa do hita asa sahat tu garis finis. Diurupi Jahowa do hita mangulahon tanggung jawabta jala mambolokkon boban na boi mangabbati hita. (Ps. 68:19) Pos ma rohatta molo didongani Jahowa hita, boi do hita toktong marlojong di parlumbaan i jala monang!