1. Uyon sa Hebreo 12:1, ano an kaipuhan tang gibuhon para makaabot kita sa finish line kan paurumbasan para sa buhay?

 IINAAGID kan Bibliya an satong buhay bilang mga Kristiyano sa sarong paurumbasan. An mga paradalagan na mapangganang makakaabot sa finish line tatawan nin premyo na buhay na daing katapusan. (2 Tim. 4:7, 8) Kaipuhan tang gibuhon an pinakamakakaya ta para padagos na magdalagan, lalo na ta haranihon na kita sa finish line. Si apostol Pablo, na mapangganang natapos an saiyang pagdalagan sa paurumbasan para sa buhay, nagsambit kun ano an makakatabang sa sato na manggana sa paurumbasan. Ipinagbuot niya sa sato na “iapon . . . an lambang pagabat asin . . . magdalagan kita na may pakatagal sa daralaganan na ibinugtak sa atubangan ta.”—Basahon an Hebreo 12:1.

2. Ano an buot sabihon kan “iapon . . . an lambang pagabat”?

² Kan isurat ni Pablo na dapat tang “iapon . . . an lambang pagabat,” an buot daw niyang sabihon mayo na nin pasan na dapat darahon an sarong Kristiyano? Dai, bako iyan an punto niya. Imbes, an buot niyang sabihon iyo na kaipuhan tang halion an lambang dai kinakaipuhan na pagabat. An klase nin pagabat na ini makakaulang sa sato asin magigin dahilan para mapagal kita. Para makatagal, dapat na aramon ta tulos asin halion an ano man na dai kinakaipuhan na pagabat na makakapaluway sa satong pagdalagan. Pero, kasabay kaiyan, dai ta man babaliwalaon an mga pasan na dapat tang darahon. Ta kun gigibuhon niyato iyan, puwede kitang madiskuwalipikar sa paurumbasan. (2 Tim. 2:5) Anong mga pasan an dapat tang darahon?

3. (a) Uyon sa Galacia 6:5, ano an dapat tang darahon? (b) Ano an pag-uulayan ta sa artikulong ini, asin taano?

 ³ Basahon an Galacia 6:5. Sinambit ni Pablo kun ano an dapat tang darahon. Isinurat niya na “an kada saro magdadara kan sadiri niyang pasan.” An pinapanungdan digdi ni Pablo iyo an personal niyatong pasan nin paninimbagan sa Diyos, na kita mismo an dapat na magdara. Sa artikulong ini, pag-uulayan ta kun ano an kaiba sa “sadiri [tang] pasan” asin kun paano ta iyan dadarahon. Aaramon ta man an dai kinakaipuhan na mga pagabat na tibaad dara-dara ta asin kun paano ta iaapon an mga iyan. An pagdara niyato kan sadiri tang pasan asin pag-apon kan dai kinakaipuhan na pagabat makakatabang sato na matapos an paurumbasan para sa buhay.

4. Taano ta an satong pagdusay bakong pagabat? (Hilingon man an ritrato.)

⁴ An satong pagdusay. Kan idusay ta an satong sadiri ki Jehova, nagpromesa kitang sasambahon ta siya asin gigibuhon an kabutan niya. Dapat tang utubon an promesang iyan. An pag-utob sa satong pagdusay sarong seryosong paninimbagan, pero bako iyan sarong pagabat. An totoo, linalang kita ni Jehova para gibuhon an kabutan  niya. (Kap. 4:11) Ginibo niya kitang igwa nin espirituwal na pangangaipo asin linalang kita uyon sa saiyang ladawan. Bilang resulta, nagigibo tang rumani sa saiya asin nakakamati kita nin dakulang kaugmahan sa paggibo kan kabutan niya. (Sal. 40:8) Siring man, pag ginigibo ta an kabutan nin Diyos asin sinusunod an saiyang Aki, ‘nagiginhawahan’ kita.—Mat. 11:28-30.

5. Ano an makakatabang saimo na utubon an saimong pagdusay? (1 Juan 5:3)

⁵ Paano mo dadarahon an pasan? Duwang bagay an makakatabang. Inot, padagos na pakusugon an pagkamuot mo ki Jehova. Magigibo mo iyan paagi sa paghurop-hurop sa gabos na marahay na bagay na ginibo niya saimo asin sa mga bendisyon na itinatagama niya saimo. Mantang mas nagkukusog an pagkamuot mo sa Diyos, mas magigin pasil man sa saimo na sunudon siya. (Basahon an 1 Juan 5:3.) Ikaduwa, arugon si Jesus. Nagin mapanggana siya sa paggibo kan kabutan nin Diyos huling namibi siya ki Jehova para sa tabang asin padagos na nagpokus sa saiyang balos. (Heb. 5:7; 12:2) Arog ni Jesus, mamibi ki Jehova para sa kusog asin papagdanayon na malinaw sa isip an paglaom na buhay na daing katapusan. Mantang nagkukusog an pagkamuot mo sa Diyos asin inaarog an saiyang Aki, magigibo mong utubon an saimong pagdusay.

6. Taano ta dapat tang asikasuhon an mga responsabilidad sa pamilya? (Hilingon man an ritrato.)

⁶ An satong mga responsabilidad sa pamilya. Sa satong paurumbasan para sa buhay, dapat tang mamutan si Jehova asin si Jesus nin urog pa sa pagkamuot ta sa satong mga kapamilya. (Mat. 10:37) Pero, dai kaini buot sabihon na puwede ta nang pabayaan an satong mga responsabilidad sa pamilya, na garo baga nakakaulang an mga ini sa sato para mapaugma an Diyos asin si Cristo. An totoo, para mapaugma an Diyos asin si Cristo, kaipuhan tang utubon an satong papel sa laog kan pamilya. (1 Tim. 5:4, 8) Pag ginibo ta iyan, magigin mas maugma kita. Sa katunayan, aram ni Jehova na magigin maugma an mga pamilya pag an agom na lalaki asin agom na babayi tinatratar nin may pagkamuot asin paggalang an kada saro, pag namumutan asin sinasanay kan mga magurang an saindang mga aki, asin pag sinusunod kan mga aki an mga magurang ninda.—Efe. 5:33; 6:1, 4.

7. Paano mo mauutob an saimong papel sa laog kan pamilya?

⁷ Paano mo dadarahon an pasan? Ano man an papel mo sa laog kan pamilya, magtiwala sa kadunungan na yaon sa Bibliya imbes na magsarig sa mga pagmati mo sana, sa kultura, o sa sinasabi kan mga eksperto daa. (Tal. 24:3, 4) Gamiton na marhay an satuyang mga publikasyon na basado sa Bibliya. Igwa iyan nin praktikal na mga suhestiyon kun paano iaaplikar an mga prinsipyo sa Bibliya. Halimbawa, an mga artikulo sa serye na “Tabang Para sa Pamilya” igwa nin marahayon na impormasyon manungod sa espesipikong mga kadipisilan na inaatubang ngunyan kan mga mag-agom, mga magurang, asin mga tin-edyer. b Magin determinado na iaplikar kun ano an sinasabi kan Bibliya, dawa pa dai iyan ginigibo kan ibang miyembro kan pamilya. Kun gigibuhon mo iyan, makikinabang an pamilya mo asin mag-aako ka kan bendisyon ni Jehova.—1 Ped. 3:1, 2.

8. Ano an puwedeng magin epekto sa sato kan satong mga desisyon?

⁸ An paninimbagan sa ginigibo tang mga desisyon. Tinawan kita ni Jehova nin regalong libertad na magdesisyon, asin gusto niya na ikaugma ta an mga pakinabang huli sa paggibo nin tamang mga desisyon. Alagad dai niya kita poprotektaran sa mga problema na resulta kan satong salang mga desisyon. (Gal. 6:7, 8) Huli kaiyan, inaako niyato an mga konsekwensiya kan satuyang salang mga desisyon, dai pinag-isipan na mga tataramon, asin pabigla-biglang mga paghiro. Depende  sa ginibo ta, tibaad mapurisaw kita huli sa pagkakonsiyensiya. Pero, huling aram niyatong paninimbagan ta an ginigibo tang mga desisyon, mapapahiro kita kaiyan na ituga an satong mga kasalan, itanos an satong mga sála, asin likayan na mautro an mga iyan. An paggibo kan mga iyan makakatabang sa sato na magdanay sa paurumbasan para sa buhay.

9. Ano an puwede mong gibuhon kun nakagibo ka nin salang desisyon? (Hilingon man an ritrato.)

⁹ Paano mo dadarahon an pasan? Kun dai mo na mareremedyuhan an salang desisyon na ginibo mo, akuon an saimong presenteng kamugtakan. Admitiron na dai mo na mababago an nakaagi. Dai mo pagsayangon an panahon saka kusog mo para patunayan na tama ka o para pagparabasulon an sadiri mo o an iba sa salang mga desisyon na ginibo mo. Imbes, akuon an mga sála mo asin gibuhon an pinakamarahay na magigibo mo sa saimong presenteng kamugtakan. Kun nakokonsiyensiya ka sa salang nagibo mo, mapakumbabang dumulok ki Jehova sa pamibi, admitiron an saimong sála, asin hagadon saiya na patawadon ka. (Sal. 25:11; 51:3, 4) Maghagad nin tawad sa mga nagibuhan mo nin salá, asin kun kinakaipuhan, maghagad nin tabang sa mga elder. (Sant. 5:14, 15) Makanuod sa mga salang ginibo mo, asin hinguwahon na dai na mautro iyan. Pag ginibo mo iyan, makakasigurado ka na papahilingan ka ni Jehova nin pagkahirak asin itatao niya sa saimo an tabang na kaipuhan mo.—Sal. 103:8-13.

10. Taano ta an bakong realistikong mga inaasahan sarong pagabat? (Galacia 6:4)

¹⁰ Bakong realistikong mga inaasahan. Puwede niyatong mapagabatan an satong sadiri nin bakong realistikong mga inaasahan pag ikinukumparar ta an satong sadiri sa iba. (Basahon an Galacia 6:4.) Kun parati tang ikinukumparar an satong sadiri sa iba, puwede kitang magin maurihon asin makamati nin pakikipagkompetensiya sa iba. (Gal. 5:26) Sa paghihinguwa tang magibo man an nagibo kan iba, tibaad piriton tang gibuhon an mga bagay-bagay dawa dai ta man talaga kaya iyan asin wara kita sa kamugtakan na gibuhon iyan. Asin kun “an inaantisipar na naaatraso nagpapasakit sa puso,” mas nakakapangluya nanggad sa buot an pagkaigwa nin mga inaasahan na dai ta nuarin man makakamtan! (Tal. 13:12) Puwedeng makaubos iyan kan satong kusog asin makapaluway sa satong pagdalagan sa paurumbasan para sa buhay.—Tal. 24:10.

11. Ano an makakatabang saimo para malikayan an bakong realistikong mga inaasahan?

¹¹ Paano mo iaapon an pagabat na iyan? Dai magin sobra an inaasahan mo sa sadiri mo kisa sa hinahagad ni Jehova. Dai niya nuarin man inaasahan sa saimo na itatao mo an mga bagay na mayo man sa saimo. (2 Cor. 8:12) Makakasigurado ka na dai ikinukumparar ni Jehova an mga ginigibo mo sa ginigibo kan iba. (Mat. 25:20-23) Pinapahalagahan niyang marhay an saimong bilog na kalag na paglilingkod, an saimong kaimbudan, asin an saimong pakatagal. Mapakumbabang akuon na an puwede mong gibuhon ngunyan tibaad malimitaran na kan saimong edad, salud, asin kamugtakan. Arog ni Barzilai, dai mag-alangan na sayumahan an mga pribilehiyo pag dai mo na magigibo iyan huli sa pisikal na mga limitasyon. (2 Sam. 19:35, 36) Arog ni Moises, mag-ako nin tabang asin idelegar sa iba an mga paninimbagan kun angay iyan. (Exo. 18:21, 22) Tatabangan ka kan siring na kapakumbabaan na dai magbugtak nin bakong realistikong mga inaasahan na makakapapagal saimo sa pagdalagan sa paurumbasan para sa buhay.

12. May paninimbagan daw kita sa salang mga desisyon na ginibo kan iba? Ipaliwanag.

¹² Pakamati na may paninimbagan sa salang mga desisyon na ginibo kan iba. Dai kita puwedeng gumibo nin mga desisyon para sa iba; dai ta man pirming maililikay sinda sa mga konsekwensiya kan salang mga desisyon na ginigibo ninda. Halimbawa, tibaad pag-abot nin panahon magdesisyon an aking lalaki o babayi na magpundo na sa paglilingkod ki Jehova. An desisyon  na iyan puwedeng magtao nin grabeng kamunduan sa mga magurang. Minsan siring, an mga magurang na pigbabasol an sadiri ninda huli sa salang desisyon kan saindang aki pinapagabatan an sadiri ninda. Bako iyan sarong pagabat na inaasahan ni Jehova na dadarahon ninda.—Roma 14:12.

13. Paano aatubangon nin sarong magurang an salang desisyon kan saiyang aki?

¹³ Paano mo iaapon an pagabat na iyan? Aram tang gabos kita tinawan ni Jehova nin libertad na magdesisyon. Pinapabayaan niya an lambang tawo na gumibo nin sadiring desisyon. Kaiba diyan an desisyon kun baga malingkod sa saiya. Aram ni Jehova na bako kang perpektong magurang; an gusto niya sana iyo na gibuhon mo an pinakamarahay na magigibo mo. An desisyon na ginigibo kan aki mo paninimbagan niya, bako mo. (Tal. 20:11) Pero, tibaad pagparaisipon mo pa man giraray an mga salang nagibo mo bilang magurang. Kun arog kaiyan, sabihon mo ki Jehova an namamati mo asin maghagad sa saiya nin kapatawadan. Aram niyang dai mo na mababalikan an nakaagi asin dai mo na mababago an nangyari. Siring man, dai niya inaasahan saimo na ililikay mo an saimong aki sa pagsapar sa mga resulta kan ginibo kaini. Tandaan na kun maggibo nin ano man na paghihinguwa an saimong aki na bumalik ki Jehova, maugma Niyang aakuon giraray siya.—Luc. 15:18-20.

14. Taano ta an sobrang pagkakonsiyensiya sarong pagabat na dapat tang iapon?

¹⁴ Sobrang pagkakonsiyensiya. Pag nagkasala kita, natural sana na nakokonsiyensiya kita. Minsan siring, an sobrang pagkakonsiyensiya sarong pagabat na dai ta talaga dapat na mamatian. Saro iyan na pagabat na dapat tang iapon. Paano ta maaaraman kun sobra na an satong pagkakonsiyensiya? Kun itinuga na niyato an satong kasalan, nagsulsol na, asin naggigibo nin mga lakdang para dai na mautro an satong kasalan, makakapagtiwala kita na pinatawad na kita ni Jehova. (Gibo 3:19) Pagkatapos na magibo an mga bagay na iyan, habo ni Jehova na padagos kitang makamati nin pagkakonsiyensiya. Aram niya na makakaraot sa sato an dai mahali-haling pagkakonsiyensiya. (Sal. 31:10) Kun dai ta na haros makayanan an kamunduan, tibaad magpundo na kita sa pagdalagan sa paurumbasan para sa buhay.—2 Cor. 2:7.

15. Ano an makakatabang saimo para maatubang an sobrang pagkakonsiyensiya? (1 Juan 3:19, 20) (Hilingon man an ritrato.)

 ¹⁵ Paano mo iaapon an pagabat na iyan? Pag napupurisaw huli sa sobrang pagkakonsiyensiya, magpokus sa “tunay na kapatawadan” na itinatao nin Diyos. (Sal. 130:4) Pag pinapatawad niya an mga tunay na nagsusulsol, nanunuga siya: “Dai ko na gigirumdumon an kasalan ninda.” (Jer. 31:34) Nangangahulugan ini na dai na uungkaton ni Jehova an mga kasalan mo kaidto. Kaya dai mo pag-isipon na an mga konsekwensiya kan saimong mga kasalan nangangahulugan na dai ka pa niya pinapatawad. Asin dai ka madisganar kun huli sa nakaagi mong mga sála tibaad malimitaran na an mga magigibo mo ngunyan sa paglilingkod sa saiya. Dai ni Jehova padagos na ginigirumdom an saimong mga kasalan, asin iyo man dapat an gibuhon mo.—Basahon an 1 Juan 3:19, 20.

16. Bilang mga paradalagan, ano an dapat na nasasabutan ta?

¹⁶ Sa pagdalagan ta sa paurumbasan para sa buhay, dapat na “dumalagan [kita] sa paagi na makakamit [ta] iyan.” (1 Cor. 9:24) Magigibo ta iyan kun nasasabutan ta an pagkakalain kan mga pasan na dapat tang darahon asin kan mga pagabat na dapat tang iapon. Sa artikulong ini, pinag-ulayan niyato an pira sana sa mga halimbawa kan mga dapat tang darahon asin kan mga dapat tang iapon. Pero may iba pang bagay na puwede tang sambiton. Sinabi ni Jesus na puwede kitang “mapagabatan nin sobrang pagkakan asin sobrang pag-inom saka mga kahaditan sa buhay.” (Luc. 21:34) An mga ini saka an iba pang mga teksto makakatabang saimo para maaraman mo kun anong mga pagbabago an kaipuhan mong gibuhon mantang nagdadalagan ka sa paurumbasan para sa buhay.

17. Taano ta makakasigurado kitang manggagana kita sa paurumbasan para sa buhay?

¹⁷ Makakasigurado kitang manggagana kita sa paurumbasan para sa buhay huling tatawan kita ni Jehova kan kusog na kaipuhan ta. (Isa. 40:29-31) Kaya, dai magluway-luway sa pagdalagan! Arugon si apostol Pablo, na ginibo an bilog na makakaya niya para makua an premyo na ibinugtak sa atubangan niya. (Fil. 3:13, 14) Mayo nin siisay man an puwedeng dumalagan para sa saimo sa paurumbasan na ini, pero sa tabang ni Jehova manggagana ka. Matatabangan ka ni Jehova na darahon an saimong mga pasan asin iapon an dai kinakaipuhan na mga pagabat. (Sal. 68:19) Huling nasa kampi mo si Jehova, magigibo mong dumalagan sa paurumbasan na may pakatagal asin manggana diyan!