1. Ukulingana na mashiwi yaba pa AbaHebere 12:1, finshi tufwile ukucita pa kuti twingabutuka ukufika na ku mpela?

 BAIBO ilinganya fwe Bena Kristu ku muntu uulebutuka ulubilo. Abakatwalilila ukubutuka ukufika na ku mpela, bakabalambula umweo wa muyayaya. (2 Tim. 4:7, 8) Tufwile ukubombesha pa kuti tutwalilile ukulabutuka, pantu tuli mupepi no kufika ku mpela ya lubilo lwesu. Umutumwa Paulo uwapwishishe ulubilo lwakwe ulwa ku mupashi, alilandileko pa fintu fimo ifingalenga twabutuka ukufika na ku mpela. Atwebele ukuti tufwile ‘ukufuula conse icafina . . . no kubutuka no kushipikisha ulubilo ulwabikwa pa ntanshi yesu.’—Belengeni AbaHebere 12:1.

2. Calola mwi ‘ukufuula conse icafina’?

² Ilyo Paulo alembele ukuti “tufuule conse icafina,” bushe aloseshe mu kuti takuli icili conse ico Umwina Kristu engasenda? Awe te mo aloseshe. Lelo atile tatufwile ukusenda ifyo tushilekabila ilyo tulebutuka. Nga twasenda ifyo tushilekabila, kuti twanaka ica kuti twafilwa no kubutuka. Pa kuti tutwalilile ukubutuka, tufwile ukwangufyanya ukumona nga ca kuti natusenda ifyo tushilekabila. Na lyo line, tatufwile ukulaba ukusenda ifyo tulekabila pa kuti tulebutuka. Nga tatulesenda ifyo tulingile ukusenda pa kubutuka, kuti twaleka ukubutuka. (2 Tim. 2:5) Finshi ifyo fine tulingile ukusenda?

3. (a) Ukulingana na mashiwi yaba pa Abena Galatia 6:5, finshi tufwile ukusenda? (b) Finshi twalasambilila muli cino cipande, kabili mulandu nshi?

³ Belengeni Abena Galatia 6:5. Paulo alilandile ukuti kwaliba fimo ifyo tulingile ukusenda. Alembele ukuti “cila muntu ali no kuisendela icipe cakwe umwine.” Pali ili lembo Paulo alelanda pa fyo Lesa enekela ababomfi bakwe ukulacita cila muntu. Muli cino cipande twalasambilila pa fyo tufwile ukubika  mu “cipe” ico tufwile ukusenda, e lyo ne fyo twingasenda ico cipe. Kabili twalasambilila na pa fipe fimo ifishacindama ifyo tushifwile ukusenda, e lyo ne fyo twingafisha. Ukuisendela icipe cesu e lyo no kusha ifyo tushilingile ukusenda, kuti kwalenga twatwalilila ukubutuka ulubilo lwesu ulwa ku bumi.

4. Mulandu nshi ukucita ifyo twalaile Yehova ukuti tukalamubombela kushabela cisendo? (Moneni ne cikope.)

⁴ Ifyo twalaya Lesa ukuti tukalamubombela umuyayaya. Ilyo twaipeele kuli Yehova, twalimwebele ukuti tukalamupepa e lyo no kulacita ifyo afwaya. Tufwile ukucita ifyo twalaile. Ukufikilisha ifyo twalaile takwa-anguka, na lyo line, ukucita ifi te cisendo. Na kuba, Yehova atubumbile ukuti tulecita ukufwaya kwakwe. (Ukus. 4:11) Atubumbile mu nshila ya kuti tulefwaya ukumwishiba e lyo no kumupepa. Na kabili twapangilwe mu cipasho cakwe. Ne ci calilenga tulepalama sana kuli ena, kabili tulesekelela ilyo tulemubombela. (Amalu. 40:8) Nga tulecita ifyo Lesa afwaya, kabili tulepashanya Umwana wakwe, ‘tulasanga ukutuusha.’—Mat. 11:28-30.

5. Finshi mwingacita ifingalenga mwafikilisha ifyo mwalaile Lesa ukuti mukalamubombela umuyayaya? (1 Yohane 5:3)

 ⁵ Kuti mwafikilisha shani ifyo mwalaile ukubombela Yehova? Ifintu fibili kuti fyalenga mwafishapo ifyo mwalaile. Ica kubalilapo, muletwalilila ukukosha bucibusa mwakwata na Yehova. Kuti mwacita ifi nga muletontonkanya pa fisuma fyonse ifyo amucitila, e lyo na mapaalo amukwatila ku ntanshi. Nga mwatemwa sana Yehova, cikamwangukila ukumumfwila. (Belengeni 1 Yohane 5:3.) Icalenga bubili, mulepashanya Yesu. Alikumanishe ukubombela Lesa, pantu alelomba kuli Lesa ukuti alemwafwa kabili alibikile na mano ku fyo ali no kumulambula ku ntanshi. (Heb. 5:7; 12:2) Nga filya Yesu alecita, mulepepa kuli Yehova ukuti alemukosha. Na kabili mulebika amano kwi subilo mwakwata ilya kuti ku ntanshi mukekala umuyayaya. Nga muletemenwako Yehova kabili mulepashanya no Mwana wakwe, mukafikilisha ifyo mwamulaile ukuti mukalamubombela umuyayaya.

6. Mulandu nshi tulingile ukubikila amano ku milimo twakwata mu lupwa? (Moneni ne cikope.)

⁶ Imilimo iyo twakwata mu lupwa. Mu lubilo lwesu ulwa ku bumi tufwile ukutemwa sana Yehova na Yesu ukucila ifyo twatemwa balupwa lwesu. (Mat. 10:37) Lelo ici tacipilibula ukuti tufwile ukulekelesha imilimo twakwata mu lupwa. Nomba pa kuti tulelenga Yehova na Yesu ukulasekelela, tufwile ukulabomba imilimo twakwata mu lupwa. (1 Tim. 5:4, 8) Nga twacita ifi, tukaba ne nsansa. Na kuba, Yehova alishiba ukuti aba mu lupwa kuti baba ne nsansa nga ca kuti abalume na bakashi baletemwana kabili balecindikana, abafyashi baletemwa no kusambilisha abana babo, kabili abana nabo nga baleumfwila abafyashi babo.—Efes. 5:33; 6:1, 4.

7. Finshi mwingacita pa kuti mulebomba imilimo yenu mu lupwa?

⁷ Ifyo mwingacita pa kuti mulebomba imilimo mwakwata mu lupwa. Nampo nga muli balume, abakashi, nelyo abana, mufwile ukukonka ifyo Baibo ilanda. Tamufwile fye ukucita ifyo mumona ukuti e fili bwino, e fyo abantu abengi bacita uko mwikala, nelyo ifyo abasambilila bamo balanda. (Amapi. 24:3, 4) Mulebelenga impapulo shilanda pali Baibo. Muli shi mpapulo mwaliba ifyo twingacita pa kukonka amashinte ya mafunde aya mu Baibo. Ku ca kumwenako, icipande icitila “Ifingafwa Indupwa” calikwata ifyebo ifilanda pa baupana, abafyashi, e lyo na baice. b Mulecita ifyo Baibo ilanda nangu ca kuti balupwa lwenu bamo te fyo bacita. Nga mulecita ifi, ulupwa lwenu lukanonkelamo kabili Yehova akamupaala.—1 Pet. 3:1, 2.

8. Bushe ifyo tusalapo ukucita fitukuma shani?

⁸ Ukusumina nga twalufyanya. Yehova alitupeela insambu sha kuisalilapo ifyo tulefwaya ukucita. Kabili afwaya tuleba ne nsansa nga twasalapo ukucita ifisuma. Nomba nga twalufyanya, Lesa tatucingilila ku mafya ayafumamo. (Gal. 6:7, 8) Kanshi tufwile ukusumina ifyabipa fyonse ififumamo nga tatusalilepo bwino ifya kucita, twalanda amashiwi ayabipa, nelyo twalufyanya. Nga ca kuti twacita ifyabipa, kampingu kuti yalatucusha. Nomba ukwishiba ukuti tufwile ukusumina fyonse ififuma mu fyo tusalapo ukucita, kuti kwalenga twasokolola imembu tucitile, kabili twabombela pa cilubo tucitile no kukanabwekeshapo.  Ukucita ifi kuti kwalenga twatwalilila ukulabutuka ulubilo lwa ku bumi.

9. Cinshi mufwile ukucita nga mwalufyanya? (Moneni ne cikope.)

⁹ Ifyo twingacita pa kuti tulesumina nga twalufyanya. Nga ca kuti mwalicitile fimo ifyabipa, finshi mulingile ukucita? Muleibukisha ukuti te kuti mwalule ifyo mwacitile kale. Mwilapoosa inshita yenu na maka ukuipokolola, nelyo ukulaeba abantu bambi ukuti e balengele mulufyanye. Lelo mulesumina ifilubo mucitile kabili mulebombelapo nga mwalufyanya. Nga muleumfwa ububi pa fyo mwalufyenye, mulepepa kuli Yehova, mulesumina ifyo mwalufyenye, kabili mulemulomba ukuti amwelele. (Amalu. 25:11; 51:3, 4) Mulelomba ubwelelo kubo mwalufyenyeko kabili kuti mwaeba na baeluda ukuti bamwafwe. (Yako. 5:14, 15) Mulesambililako ku filubo mwalufyenye no kwesha na maka ukukanabwekeshapo. Nga mulecita ifi kuti mwacetekela ukuti Yehova akamubelela uluse, kabili akulamutungilila.—Amalu. 103:8-13.

10. Mulandu nshi ukutontonkanya ukuti tufwile ukulabomba nge fyo bambi babomba kwabela cisendo? (Abena Galatia 6:4)

¹⁰ Ukulamona kwati tufwile ukulabomba nge fyo bambi babomba. Kuti twaleka ukubombesha nga ca kuti lyonse tuleilinganya kuli bambi. (Belengeni Abena Galatia 6:4.) Nga ca kuti lyonse tuleilinganya kuli bambi, kuti twatendeka ukulabafimbila, kabili kuti twalacimfyanya nabo. (Gal. 5:26) Nga tule-esha ukulacita ifyo bambi bacita nangu ca kutila te kuti tukumanishe ukucita ifyo, kuti twatendeka ukukalifiwa. Na kabili tontonkanyeni pali ici, Baibo itila “icile-enekelwa nga cakokola ukwisa cilalwalika umutima,” kanshi kuti twafuupuka nga tule-esha ukucita ifintu ifyo tushingakumanisha ukucita. (Amapi. 13:12) Nga tuleilinganya kuli bambi, kuti twanaka ica kuti twaleka no kubutuka ulubilo lwa ku bumi.—Amapi. 24:10.

11. Finshi ifingalenga mwaleka ukulamona ukuti mufwile fye ukulabombesha?

¹¹ Ifyo twingacita pa kuti twilamona kwati tufwile ukulabomba nge fyo bambi babomba. Mwilaenekela ukulacita ifyacilamo, ukucila pa fyo Yehova enekela ukutila kuti mwakumanisha ukucita. Tenekela ukutila kuti mwamupeela ifyo mushikwete. (2 Kor. 8:12) Yehova talinganya ifyo mumubombela ku fyo abantu bambi bamubombela. (Mat. 25:20-23) Alitemwa ifyo mumubombela apapela amaka yenu, ifyo mwaba ne cishinka, e lyo ne fyo mushipikisha. Muleicefya kabili muleibukisha ukutila te kuti mucite fye fyonse ifyo mufwaya ukucita pa mulandu no mushinku wenu, ubumi bwenu, nelyo ifintu fye fimbi. Nga filya Barsilai acitile, mwilasumina ukubomba imilimo imo iyo mumwene ukuti pa mulandu no mushinku wenu e lyo no bumi bwenu, te kuti mukumanishe ukuibomba. (2 Sam. 19:35, 36) Mulepeelako bambi imilimo nga filya Mose acitile. (Ukufu. 18:21, 22) Nga namuicefya tamwakale-enekela ukucita ifintu ifingalenga mwanaka ica kuti mwafilwa no kulabutuka ulubilo lwa ku bumi.

12. Bushe ni fwe tulenga abantu bamo ukusalapo ukucita ifyabipa? Londololeni.

¹² Ukulaumfwa kwati ni fwe tulengele bambi basalepo ukucita ifyabipa. Tekuti tusalileko bambi ifya kucita, kabili tekuti tubacingilile ku mafya yesako nga basalapo ukucita ifyabipa. Ku ca kumwenako, umwana umwaume nelyo umwana umwanakashi, mu kuya kwa nshita kuti asalapo ukuleka ukubombela Yehova. Ici kuti calenga abafyashi ukumfwa ububi icine cine. Nomba ici ciba cisendo icafina, ku bafyashi abalemona  kwati e balengele umwana asalepo ukuleka ukubombela Yehova. Yehova tafwaya abafyashi ukulaumfwa ukuti e balengele umwana ukuleka ukumubombela.—Rom. 14:12.

13. Finshi umufyashi engacita umwana nga asalapo ukucita ifyabipa?

¹³ Finshi mwingacita pa kuleka ukumfwa ukuti nimwe mulenga abantu bamo ukusalapo ukucita ifyabipa? Muleibukisha ukuti Yehova alipeela ifwe bonse insambu sha kuisalila. Alaleka umuntu uuli onse ukuisalilapo ifya kucita, pamo ngo kusalapo ukumubombela. Yehova alishiba ukuti muli bafyashi abashapwililika, kanshi amwenekela ukubomba apo mwingapesha. Ifyo abana bacita, bene baisalilapo te imwe mubasalilako ifya kucita. (Amapi. 20:11) Na lyo line, kuti mwatwalilila ukumfwa ububi pa fyo mwalufyenye pamo nga bafyashi. Ifi nga e fyo mwalaumfwa, mule-eba Yehova ifyo muleumfwa kabili mulemulomba ukuti amwelele. Alishiba ukuti tekuti mwalule ifyo mwacitile kale. Na kabili tenekela mwe bafyashi ukucingilila umwana wenu ku fibi ififuma mu fyo asalilepo ukucita. Muleibukisha ukuti umwana nga asalapo ukubwelela kuli Yehova, akamupokelela nga nshi.—Luka 15:18-20.

14. Mulandu nshi ukumfwila ububi kwabela pa fisendo ifyo tushifwile ukusenda?

¹⁴ Ukutwalilila ukumfwa ububi. Caliba fye bwino ukumfwa ububi nga twalufyanya. Nomba Yehova tafwaya tulecishamo ukumfwa ububi. Ukumfwa sana ububi kwaba pa fisendo ifyo tushilingile ukusenda. Kuti twaishiba shani nga natucishamo ukumfwa ububi? Nga twalisokolwele imembu, twalapila, kabili tulecitapo na cimo pa kuti twikabwekeshapo ifyo twacitile, kuti twacetekela ukuti Yehova alitwelela. (Imil. 3:19) Nga twacita ifi, Yehova tafwaya twatwalilila ukumfwa ububi. Alishiba ifyabipa ifingafumamo nga twacishamo ukumfwa ubulanda. (Amalu. 31:10) Nga twacishamo ukumfwa ububi, kuti twaleka ukubutuka ulubilo lwa ku bumi.—2 Kor. 2:7.

15. Finshi fingalenga mwaleka ukumfwa sana ububi pa fyo mwacitile? (1 Yohane 3:19, 20) (Moneni ne cikope.)

 ¹⁵ Kuti mwacita shani pa kuti mwilaumfwa sana ububi? Nga muleumfwa sana ububi, muletontonkanya pa “kwelela kwa cine” uko Lesa eleela. (Amalu. 130:4) Lesa nga aelela abalapila ukufuma pa nshi ya mutima, alanda ukuti: “Nshakebukishe ne membu shabo.” (Yer. 31:34) Ici calola mu kuti Lesa nga aelela umuntu imembu, tashibukisha lelo alalabako. Kanshi mwilamona ifyabipa ififuma mu fyo mwalufyenye ukuti filelanga ukuti Lesa tamwelela. Kabili tamulingile no kulaipeela imilandu nga ca kuti balimupoka ne milimo imo mu cilonganino iyo mwalebomba. Yehova tekalila fye ukutontonkanya pa membu mwacitile, na imwe bene mwilatontonkanya pa fyo mwalufyenye.—Belengeni 1 Yohane 3:19, 20.

16. Finshi tufwile ukulaibukisha ilyo tulebutuka?

¹⁶ Ilyo tulebutuka ulubilo lwa ku bumi, ‘tulebutuka bwino pa kuti tukapoke icilambu.’ (1 Kor. 9:24) Kuti twalabutuka bwino nga twaishiba bwino ifipe tufwile ukusenda, e lyo ne fisendo tufwile ukusha. Muli cino cipande twalanda fye pa finono ifyo tufwile ukusenda, e lyo ne fisendo ifyo tufwile ukupoosa. Lelo kuli na fimbi ifyo twingalandapo. Yesu atile, kuti ‘twafinininwa ku buliili na kuli bucakolwa na ku masakamika ya mikalile.’ (Luka 21:34) Ukucita ifi twalandapo e lyo ne filanda amalembo yambi, kuti kwalenga mwaishiba apo mulekabila ukubombela pa kuti mulebutuka ulubilo lwa ku bumi.

17. Mulandu nshi twingacetekelela ukutila tukacimfya ulubilo lwa ku bumi?

¹⁷ Twalicetekela ukutila, kuti twacimfya ulubilo lwa ku bumi pantu Yehova akulatupeela fyonse ifyo tulekabila. (Esa. 40:29-31) E ico tekwesha ukuleka ukubutuka! Natulepashanya umutumwa Paulo, uwalebutukisha pa kuti apoke icilambu. (Fil. 3:13, 14) Takuli uwingamubutukilako ulu lubilo, nomba Yehova nga amwafwa kuti mwacimfya. Yehova kuti amwafwa ukusenda ifipe ifyo mulingile ukusenda pa kubutuka, no kumwafwa ukupoosa ifisendo ifyo mushilekabila. (Amalu. 68:19) Nga amwafwa, mukatwalilila ukubutuka ulubilo lwa ku bumi, kabili mukacimfya!