1. Según Ebüréu 12:1, ka lunbei wadügüni lun wagumuchuni éibaaguni lánina ibagari?

 ARIÑAGATU Bíbülia lídanñadiwa lan aban éibaaguni wagía kristiánugu. Ha agumuchubalin éibaaguni le heresibirubei ibagari magumuchaditi keisi afayeiruahaü (2 Tim. 4:7, 8). Mosu wáfaagun saragu lun wasigirun lidan éibaaguni le ladüga yarafatimahadiwa lun wachülürün lidoun lébeha éibaaguni le. Gumú lumuti apostolu Pábulu éibaaguni le ani írida lumuti ka lan gayaraabei líderaguniwa lun wachülürün lumoun lébeha éibaaguni le. Ariñagati: “Gidá waméi sun le eredehabaliwa wawariua […], adüga waméi éibaaguni le wabaabei lau erei” (aliiha huméi Ebüréu 12:1).

2. Ka labusenrubei Pábulu lariñagun dan le lariñagunbei “gidá waméi sun le eredehabaliwa wawariua”?

² Ka mini lubéi dimurei “gidá waméi sun le eredehabaliwa wawariua”? Mariñagunti Pábulu manügünbadiwa lan wagía kristiánugu ni kata, le lariñagubei, lunti lan wagidaruni wawariua furumiñeguarügü anügüni le memegeirun wamuti. Ladüga adügati burí ihürügu le lun hámaru lan wéibugun ani adügati giñe lun labuchadun wawagu. Lun wasigirun lidan éibaaguni le, lunti warihini anhein wanügüña lubéi somu anügüni le memegeirun wamuti lun wígiragüdüni lau lóufudagun. Gama lumoun, anihein amu anügüni megei wamuti ani siñati wígiruni. Anhein hamuga wígira, gayaraabei wasagarún lídangiñe éibaaguni (2 Tim. 2:5). Ariha waméi ka lan uagu wayanuha.

3. a) Según Galasiana 6:5, ka lunbei lanügüni kada kristiánu? b) Kaba wariha lidan aturiahani le, ani ka uagu?

³ (Aliiha huméi Galasiana 6:5). Lidan bérusu le, ayanuhati Pábulu luagu aban anügüni le lunbei lanügüni kada kristiánu: “lanügün guánarügü”. Ka labusenrunbei lariñagun? Lariñaguña luagu le lunbei wadügüni lidan weseriwidun lun Bungiu le lunbei  ladügüni kada aban wádangiñe kei lubúeingu Bungiu, aban anügüni le siñá habéi amu anüga wawagu. Lidan aturiahani le, warihuba fiu lídangiñe katei le lídanbei ‘wanügün guánarügü’ luma kaba lan íderaguawa anügei. Lanwoun lira, wayanuhaba giñe luagu fiu anügüni le másiñati wanügüñein lan ani memegeirun wamuti luma kaba lan wadüga lun wagidaruni wawariua. Súdiniti lun manügün wamá lóugiñe le wayaraati, lunti wanügüni lérügü wemegeirubei, ladüga ítara luba gayara lan wachülürün lumoun lébeha éibaaguni luma lun weresibiruni ibagari magumuchaditi.

4. Ka uagu mama lubéi aban anügüni güreweiti füramasei lánina ederegeraguni unguaü? (Ariha humóun giñe iyawaü).

⁴ Füramasei lánina wederegeragun woungua. Dan le wederegeragun woungua lun Heowá, füramasetiwa lun luagu wáhuduraguba lan lun ani wadügübei lan lugundan. Lunti wagunfulirun lau füramasei le wadügübei. Lau sun aban lan katei sériuti wadügüni sun le füramase wabéi lun Heowá, mama aban anügüni güreweiti ederegeraguni unguaü. Ka uagu? Ladüga adüga lumutiwa Heowá lun wadügüni lugundan  (Aruf. 4:11). Adüga lumutiwa lau ayumahani lun wasubudiruni luma lun wáhuduragun lun, ani adüga lumuti giñe lenege guánarügü. Ligía gayara lubéi wayarafadun lun luma lun wagundaarun lau wadügüni lugundan (Sal. 40:8). Mámarügüñein le, dan le giñe wadügüni le labusenrunbei Heowá ani sigí waméi lani Liráü hénpulu, daritiwa awalidaguni (Mat. 11:28-30).

5. Kaba íderaguaün lun hagunfulirun lau hederegeragun hungua? (1 Huan 5:3).

⁵ Kaba íderaguaün anügei anügüni le? Furumiñe, derebugugüda huméi hínsiñehabu luagu Heowá. Anhaün araramagua asaminara luagun sun katei le adüga láalibei Heowá huagu luma luagun abiniruni le lunbei líchuguni hun ámuñegü, laganwounduba ínsiñeni le hasandirubei luagu. Ani éibume línsiñedun Bungiu hun, ménrenguntimabei hun gaganbadi humá lun. Hasandiruba ménrengun lan lagunfulirúniwa lugumadin (aliiha huméi 1 Huan 5:3). Libiaman, áyeiha huméi Hesusu. Adüga lumuti meha Hesusu lugundan Bungiu ladüga furíei lan lun amuriaha ídemuei luma ani gabaroun lumuti meha giñe afayeiruahaü le lunbei libihini (Ebü. 5:7; 12:2). Ítara kei meha Hesusu, amuriaha humá erei luma Heowá ani gabaroun huméi emenigini lun hawinwandun lun súnwandan. Anhein hederebudagüda ínsiñeni le hasandirubei luagu Heowá ani áyeiha humeime Lisaani, gayaraabei hagunfulirun lau le füramase hubéi lun Heowá.

6. Ka uagu lunti lubéi wagunfulirun lau dasi lánina letenirún houn iduheñu? (Ariha humóun giñe iyawaü).

⁶ Letenirún houn iduheñu. Lidan éibaaguni lánina ibagari, mosu hínsiñetima lan Heowá luma Hesusu woun sügǘ hau waduheñu (Mat. 10:37). Íbini ítara, úati mini lan lira metenibadiwa lan houn waduheñu. Lubaragiñe lira, mosu wagunfulirun lau le yuubei woun hadan waduheñu anhein busén wabéi wagundaaragüdüni Bungiu luma Hesusu (1 Tim. 5:4, 8). Anhein wadüga ítara, gúndaatimabadiwa. Ani lagumuhóun, subudi lumuti Heowá buídubei lan lidin houn iduheñu ánhaña hínsiñegua maríeitiña hámagua ani inebegua hagíame hámagua, ánhaña hóusera agübürigu hasaanigu lau ínsiñeni ani arufudaha hagía houn, ani ánhaña giñe gaganbadi isaanigu houn hagübürigu (Efe. 5:33; 6:1, 4).

7. Kaba íderaguaün lun hagunfulirun lau dasi le yuubei hun hadan iduheñu?

⁷ Kaba íderaguaün anügei anügüni le? Meberesenga ka lan yebe hidasinbei hadan hiduheñu, afiñe humá luagu adundehani huuti le tídanbei Bíbülia. Maritagua humá luagu le lan hisaminanbei ligíatima lan buídutimabei, ladüga hechun o ladügarügü le hariñagubei subudihabútiña ha lánina ubouagu le (Ari. 24:3, 4). Aturiaha humóun wani agumeiraguagüdüni, ladüga hadariruba adundehani huuti tidan luagu ida luba lan hafalaruni le tariñagubei Bíbülia. Kei hénpulu, lidan fánreinti le gíribei “Ayuda para las familias”, hadariruba ariñahani le lunbei líderaguniña maríeitiña, agübürigu hama nibureintiña lun hasubudiruni kaba lan hadüga dan le hagagibudagun luma turobuli. b Winwan huméi adundehani le tídanbei Bíbülia meberesenga anhein huguyarügüñein lubéi adügei hadan hiduheñu. Harihibei lanügüba lan buiti houn sun tílana huban, ani harihuba giñe labinirubadün lan Heowá (1 Fe. 3:1, 2).

8. Ida liña lanügün le wanúadirubei buiti o wuribati woun?

⁸ Katei le lanügübei le wanúadirubei. Aban idewesei lúmagiñeti Heowá iarani lun wanúadahan, ani busenti lun wasagarun buiti lídangiñe wanúadirun buidu. Ánheinti dan le wuriba lan le wanúadirubei, ígirati Bungiu lun wasufuriruni wuribani le lanügübei le wanúadirubei (Gal. 6: 7, 8). Ligíati, ánhawa anúadira wuriba, o wariñagun o wadügün somu katei masaminarunga, mosu wánharun lun le lanügübei le wanúadirubei. Anihein dan gayara lan wasandirun weiri lan wadurun ani mederaguagüdünti wasaminan. Lau wasubudiruni wagíaba lan afayeira luagu katei wuribati le wadügübei, gayaraabei línchahaniwa lun wagufeseruni luma lun wígiruni luriban igaburi ligía, áfaagua wagíame lun madügündigia wamani charati ligía. Ítararügübei gayara lan wasigirun lidan éibaaguni lánina ibagari.

9. Kaba íderaguaün anhein wuriba lubéi le hanúadirubei? (Ariha humóun giñe iyawaü).

⁹ Kaba íderaguaün anügei anügüni le? Anhein wuriba lubéi le hanúadirubei, ka gayaraabei hadügüni? Masaminara humá saragu luagu katei le, ani míchiga huméi duru huougua ni hawagu amu. Le buídutimabei lun hadügüni, lun hánharun lun hichara ani houcha huguyame lun hadügüni sun hiaraati lun habuiduragüdüni le gádanbalün. Anhein wuriba lubéi hasandiragun hungua ladüga katei wuribati le hadügübei, furíei humá lun Heowá lau ǘnabuguni, anha humá lun hichara ani amuriaha humá ferudun luma (Sal. 25:11; 51:3, 4). Anhein charaadün lubéi lun somu gürigia, amuriaha humá ferudun luma. Anhein megei hubéi ídemuei, amuriaha humá hama wéiyaaña lidan afiñeni (Sant. 5:14, 15). Furendei humá lídangiñe hichara ani áfaagua humá lun madügündigia humani. Gayaraabei hachoururuni líderagubadün lan Heowá ani lóuserubadün lan lau gudemehabu (Sal. 103:8-13).

10. Ka uagu aban lubéi ihürügu wabusenrun wadügün lóugiñe le wayaraati? (Galasiana 6:4).

¹⁰ Wagurabun wadügün lóugiñe le wayara. Aban katei le gayaraabei ladügün lun wagurabun wadügün lóugiñe le wayaraati dan le wagoubaguagüdüni le gayaraabei hadügüni amu lumoun le gayaraabei wadügün (aliiha huméi Galasiana 6:4). Anhein hechu wabéi adügei katei le, wasaminaruba buídutima wamá hawéi amu ani gayaraabei giñe gagaburi wamani wásügüragun hama amu (Gal. 5:26). Dan le wáfaagun lun wadügüni le hadügübei amu, íbini siñá wamani adüga, gayaraabei wadügün damichi wóuniwagua. Ariñagatu Bíbülia: “Emenigini masaliti, anigi nidiheritu” (Ari. 13:12). Ligíati, wéiritimabei maguraasuni wawagu ánhawa aguraba somu katei le lunbei mibihin wamani. Gayaraabei lagidaruni katei le were ani gayaraabei giñe ladügün lun hámaru lan wéibaagun lidan éibaaguni le (Ari. 24:10).

11. Kaba íderaguaün lun málugun humá hadügün lóugiñe le gayara hubéi adüga?

¹¹ Kaba íderaguaün agidarei ihürügu le huáriua? Mafosuragua humá hungua adüga lóugiñe le lamuriahabei Heowá huma lugundun maweiyasunbei Heowá amuriaha le úabei huma (2 Ko. 8:12). Gayaraati darangilu humá, magoubaguagüdün lumutiwa Heowá hama amu (Mat. 25:20-23). Gebegiti le hadügübei lun: heseriwidun lun tídangiñe sun hanigi, úaraguni luma awanduni le harufudubei. Líderagubadün ǘnabuguni lun hasubudiruni siñá lan hadügüni sun le habusenrubei lidan dan le ladüga hirumudiri, hátuadi luma le gádanbalün. Ítara humá kei Bárüsilai ani márügüda humá dasi le siñá hubéi agunfulira ladüga hátuadi (2 Sam. 19:35, 36). O ítara humá kei Moisesi, anha humá lun ídemuei ani ígira huméi dasi houn amu dan le megei humá híderawagun (Afu. 18:21, 22). Anhein ǘnabugu hubéi, málugunbadün hadügün lóugiñe le hiyaraabei adüga, ladüga gayaraabei lagidaruni here lun hasigirun éibaagua.

12. Wagía san gadurunbei luagu hanúadirun amu wuriba? Afuranguagüda huméi.

¹² Wasandiragun woungua wuriba ladüga luriban hanúadirun amu. Siñati wanúadirun hawagu amu ni lun wesefuruniña luéi wuribani le lanügübei luriban hanúadirun. Másiñati lanúadirun aban isaani lígiruni leseriwidun  lun Heowá, gayaraati lanügün katei le saragu igarigu houn lagübürigu. Lau sun lira, agübürigu ha íchugubaña duru hawougua ladüga luriban lanúadirun hasaani, aba híchugun aban anügüni hǘrüti hawougua, aban ihürügu le magurabun lumuti Heowá hanügübei lan (Rom. 14:12).

13. Ka gayaraabei ladügüni aban úguchili anhein wuriba lubéi le lanúadirubei lisaani?

¹³ Kaba íderaguaün agidarei ihürügu le huáriua? Haritagua waméi rúhali lan Heowá iarani woun lun wanúadahan ani ígirati lun lanúadiruni kada aban wádangiñe kaba lan ladüga, íbini anhein weseriwiduba lubéi lun Heowá o meseriwidunbadiwa lan. Lanwoun lira, subudi lumuti Heowá chará wamá burí. Busenrügüti lun háfaagun lun aban humá úguchili buiti. Anhein lígira hisaani inarüni, ligía gadurunbei, mama huguya (Ari. 20:11). Íbini ítara, gayaraati ladügün katei le lun hadiheridun saragu luagu hichara kei úguchili. Abahüdaha huméi lun Heowá ida liña lan hasandiragun hungua ani amuriaha humá ferudun luma. Subudi lumuti siñá lan hagiribudagüdüni dan lárigoun lun hasansiruni le ásügürübei. Luéigiñe le aban oubaü, magurabunti Heowá lun hesefuruni hisaani luéi lalubahani le lábunagubei, mini lan le, mesefu hubéi lan luéi wuribani le lanügübei le lanúadirubei. Haritagua huméi anhein lan áfaagua hisaani lun lagiribudun lun Heowá, leresibirubei lan Heowá lau saragu ugundani (Luk. 15:18-20).

14. Ka uagu lunti lubéi wagidaruni ihürügu lánina wasandirun gadurun wamá súnwandan wawariua?

¹⁴ Dan le wasandiragun woungua lau duru súnwandan. Dan le wafigouhan, maribanti wasandiragun woungua lau duru. Gama lumoun, dan le wasandiragun woungua lau duru súnwandan ligía aban ihürügu le mabuseerun lubéi Heowá lun wanügüni, aban ihürügu le lunbei wagidaruni wawariua. Ida liña wasubudiruni anhein wéiriya lubéi duru le wasandirubei? Anhein gúfese wamaali lubéi wafigoun, ani asakürihaadiwa ani wáfaaguña lunya madügün wamani, gayaraati wachoururuni feruduna láadiwa lan Heowá (Adü. 3:19). Anhein adüga wamaali lubéi sun burí katei le, busenti Heowá lun wagidaruni  duru wawariua ladüga subudi lumuti ánhawa lan asandiragua woungua lau duru saragu dan gayaraabei lan ladügün katei le saragu damichi woun (Sal. 31:10). Ánhawa ígiraguagüda woungua lun wabuinchun lau íruni gayaraabei ladügün katei le lun lábürühan warüna ani ábanme wígiruni éibaaguni lánina ibagari (2 Ko. 2:7).

15. Kaba íderaguaün anhein sandigua hubéi hungua lau duru súnwandan? (1 Huan 3:19, 20, ariha humóun giñe iyawaü).

¹⁵ Kaba íderaguaün agidarei ihürügu le huáriua? Anhoun íchiga hanigi duru huagun, le gayaraabei hadügüni hetenirun lun “ferudun” inarüniti le líchugubei Bungiu (Sal. 130:4). Dan le hasakürihan gürigia tídangiñe sun hanigi, gúnfuli lumuti Heowá füramase le: “Maritagundigiaadiname luagun hafigoun” (Her. 31:34). Mini lan lira, dan lan le feruduna lan Heowá, aba labulieidagun luéi. Inarüni barǘ lan figóu wuribani lúmagua, gama lumoun, úati mini lan lira ua lan feruduna lanün Heowá. Ánheinti siñá lubéi hadügün fiu dasi lidan damuriguaü guentó, madiherida humá. Maritagunhaali Heowá luagu figóu le meha hadügübei…, ka uagu madügün hubalin ligiaméme? (Aliiha huméi 1 Huan 3:19, 20).

16. Kei éibaagutiña, ka katei lunbei wasubudiruni?

¹⁶ Lun weresibiruni idewesei lánina ibagari, mosu wafalaruni adundehani le: “Éibaagua humá lubeiti […] lun gayaraabei lan hagañeiruni” éibaaguni (1 Ko. 9:24). Aban katei le lunbei líderaguniwa ibihei, wasubudiruni furangu ka lan katei lunbei wanügüni luma ka lan katei lunbei wagidaruni wawariua. Lau sun arihaadiwa lan fiu lídangiñe lidan aturiahani le, mámarügüñein ligía. Ariñagati Hesusu: “Mígira humá lun tabuinchun hanigi lau katei málati kei saragu fedu, bacharuaü, luma burí idiheri luagu burí katei lánina ibagari le” (Luk. 21:34). Líderagubadiwa bérusu le luma burí amu lun wasubudiruni ka lan asansiruni lunbei wadügüni lun wasigirun lidan éibaaguni lánina ibagari.

17. Ka uagu chouru wabalin gayaraabei lan wagañeiruni éibaaguni lánina ibagari?

¹⁷ Chouru wamuti gayara lan wagañeiruni éibaaguni lánina ibagari ladüga líchugubei lan Heowá erei le wemegeirubei woun lun wachülürün darí lébeha (Isa. 40:29-31). Ligíati mábürühala harüna. Áyeiha huméi apostolu Pábulu, le adügübalin sun liyaraati lun leresibiruni idewesei le (Fili. 3:13, 14). Inarüni siñá lan léibaagun amu gürigia huagu, lau sun lira, anihein Heowá ñein lun líchugun ídemuei hun. Líderagubadün anügei hanügün hau luma lun lagidaruni ihürügu huéi (Sal. 68:19). Lau Heowá luéigiñe hóubadina, gayaraabei héibaagun lau awanduni ani gayaraabei giñe hagañeiruni éibaaguni le.