1. Hebreos 12:1​ba jarabʉdebara, ¿kʼãrẽta odaibara wẽbaita dayirã jʉ̃ẽibaraidu jʉ̃ẽita?

 DAIZEZE Bedʼeaba jarabʉ kristianorãra ẽbẽrarã wẽbabʉ kĩrãkʼapanʉta akʉza yi ẽbẽra wẽbabʉra iyi jʉ̃ẽibaraidu jʉ̃ẽita, Jeowaba diayi ewari jõmaʉ̃nẽ bʼaita (2 Tim. 4:7, 8). Dayirãra zarea odaibara wẽba takeraita naʉ̃ ewari jõira audre arakʼaita ba baera. Apostol Pabloba jarasi kʼãrẽta oibarata wẽbaita dayirã jʉ̃ẽibaraidu jʉ̃ẽita: «Zʉgʉara […] ãĩ bʉedaibara mõbe zarea wẽbadadrʉ o dayirã nããbʉde» (akʉra Hebreos 12:1).

2. ¿Kʼãrẽta jarakĩrãbʉ zʉgʉa ãĩ bʉeibara?

² Pabloba jaraside zʉgʉa ãĩ bʉemarẽãra ¿naʉ̃ba jarakĩrãbasika dayirãbara zʉgʉara atʉ ẽ baibarata? Mawũã ẽ, awuarabʉrʉ jarakĩrãbasi bʉta ʉ̃kʉrʉ zʉgʉara kʼãrẽ ẽ kĩrãkʼabʉta akʉza naʉ̃bara mapaebiseabʉta, maʉ̃ra ãĩ bʉedaibara. Dayirã wẽbabʉde mapae ẽ baira kʼawuaibara saʉ̃rata maʉ̃ra zʉgʉa dayirãba ãĩ bʉeibarara. Mamina kĩrãbedaibara bʉta ʉ̃kʉrʉ zʉgʉara dayirãba ãĩ bʉebe ẽãta. Maʉ̃ta ãĩ bʉedara ewari jõmaʉ̃nẽ babe ẽ bayi (2 Tim. 2:5). ¿Kʼãrẽ zʉgʉata edeibara?

3. (1) Gálatas 6:5​ba jarabʉdebara, ¿kʼãrẽta atʉdaibara? (2) ¿Kʼãrẽta kʼawuadai naʉ̃ artikulodera akʉza kʼãrẽa?

³ (Akʉra Gálatas 6:5). Pablobara jara ũrĩbisi kʼãrẽ zʉgʉata edeibarata. Iya bʉsi «abakaʉba edeibara mara zʉgʉara». Pabloba nama jarakĩrãbasi dayirã aba abakaʉba oibarata Jeowaba omarẽã jarabʉta. Naʉ̃ artikulode kʼawuadayi kʼãrẽta jarakĩrãbʉta bedʼea «mara zʉgʉara». Akʉza sãwũã atʉibarata naʉ̃ zʉgʉara. Akʉza kʼawuadayi saʉ̃rata maʉ̃ra zʉgʉara dayirãba atʉbe ẽãra, adewara akʉdayi sãwũã ãĩ bʉeseapanʉta. Dayirãba zʉgʉa edeibarata  atʉpanʉbʉrʉ akʉza yi zʉgʉa ãĩ bʉeibarata ãĩ bʉeipanʉbʉrʉ, naʉ̃ba kʼarebayi bia wẽbaita ewari jõmaʉ̃nẽ bʼaita ũduyeda.

4. ¿Kʼãrẽa zare ẽ oita dayirãba Jeowaʼa oya adata? (Akʉra potota).

⁴ Dayirã bebʉ Jeowa diaside iya zokʼabʉ oya adata. Dayirãba jarasida oita iya zokʼabʉta akʉza iyi abapaiʼabʉrʉ yiwidʼita. Naʉ̃ oira jipade yibia. Mamina zare ẽ Jeowaba zokʼabʉ oira. Jeowaba parãsi baera dayirãba iya zokʼabʉta omarẽã (Apoc. 4:11). Iya dayirã parãsidera osi iyita ũdu kʼawuakĩrãnamarẽã akʉza iyi abapaiʼa yiwidʼidamarẽã, adewara iyi kĩrãkʼa parãsi (Sal. 40:8). Dayirãba Jeowaba kãgabʉta opanʉbʉrʉ akʉza yi warrade kĩrãkʼa opanʉbʉrʉ aduʼa sentidayi (Mat. 11:28-30).

5. ¿Kʼãrẽba kʼarebaseabʉ bʉa aripe oita Jeowaʼa oya adata? (1 Juan 5:3).

⁵ ¿Sãwũã atʉseabʉ naʉ̃ zʉgʉara? Nekʼãrẽ ũmeba kʼareabaseabʉ. Nããra, dayirãba Jeowa kãgabʉta audre zarea  erbaibara. Maʉ̃ra oseabʉ bʉa krĩchabʉrʉde Jeowaba bʉ sãwũã kʼareba zebʉrʉ ʉ̃rʉ akʉza kʼãrẽ nebia dia zebʉrʉ ʉ̃rʉ. Bʉa Daizeze kãgabʉta audre kãga wãbʉrʉ zare ẽ bayi oita iya omarẽã jarabʉta (akʉra 1 Juan 5:3). Yi ũmeta, Jesude kĩrãkʼa ora. Iyara Jeowaba zokʼabʉra osi Jeowaʼa kʼareba widibasi baera akʉza krĩchabasi baera iya kʼãrẽ nebia ũdui ʉ̃rʉ (Heb. 5:7; 12:2). Bʉabida Jesude kĩrãkʼa Jeowaʼa widira so zarea diamarẽã akʉza krĩchara iya bʉaʼa nebiata diaya abʉ ʉ̃rʉ. Bʉa Jeowa oya adara, aripe oyi bʉa iyi kãgabʉta audre kãga wãne akʉza Jesude kĩrãkʼa obʉde.

6. ¿Kʼãrẽã akʉibara dayirã mebẽrãra? (Akʉra potota).

⁶ Dayirã mebẽrã akʉita. Dayirãbara audre kãgaibara Jeowata akʉza Jesuta dayirã mebẽrãira (Mat. 10:37). Maʉ̃ba jarakĩrãbʉ ẽ bʉra Jeowaita trajai baera akʉ ẽ baibarata bʉ mebẽrãra, awuarabʉrʉ Jeowaba dayirãta bia akʉmarẽãra biʼia akʉibara dayirã mebẽrãsida (1 Tim. 5:4, 8). Juwa jidapanʉrabara ãyirai wawia ũdubidaibara. Yibarirabara ãyi wũãwũãra jaradiaibara akʉza wũãwũãrabara ũrĩbara yibarira bedʼeata, ãya naʉ̃ta opanʉbʉrʉ sobiapanañi. Jeowabara parãsi mebẽrãra sobiapanamarẽã (Efes. 5:33; 6:1, 4).

7. ¿Bʉara sãwũã oseabʉ Jeowaba zokʼabʉra bʉ mebẽrã akʉita?

⁷ ¿Sãwũã atʉseabʉ naʉ̃ zʉgʉara? Bʉta kima barabʉbʉrʉ, yibaribʉrʉ, mawũã ẽ bʉrʉ wũãwũãbʉrʉ, ũrĩda Daizeze Bedʼeaba jarabʉta. Bʉma biabʉ kĩrãkʼabʉta orãra, bʉ kulturaba jarabʉta orãra akʉza naʉ̃ ʉ̃rʉ biʼia kʼawuabʉ apanʉraba jarabʉta orãra (Prov. 24:3, 4). Zokʼara dayirã kartara Daizeze Bedʼeadebemata, naʉ̃rabara erbʉ baera ũrãgʼa bia dayirã kʼarebaseabʉta. Bari jaraita, artikulora «Ayudas para las familias» abʉba, erbʉ ũrãgʼa bia juwa jidapanʉraita, yibariraita akʉza wũãwũãraita, ãya bedʼea zroma erbʉde kʼarebaita. b Zarea ora Jeowaba zokʼabʉta oita bʉ mebẽrãnebemaba okĩrã ẽ mina, bʉa maʉ̃ta obʉbʉrʉ Jeowaba nebiata diayi (1 Ped. 3:1, 2).

8. Bʉa nekʼãrẽ oita jidabʉrʉdera ¿kʼãrẽta berabariseabʉ?

⁸ Dayirãba jidabʉ kʼarea tẽã nekʼãrẽ berabarita. Jeowaba dayirã diasi dayirãdobaʉba jidamarẽã kʼãrẽta okĩrãbʉta akʉza kãgabʉ sobiapanamarẽã dayirãba nei biʼia krĩcha kʼãrãpe jidabʉrʉ kʼarea. Mamina dayirãba bia jida ẽ bʉrʉ, iyara iduaribibʉ zʉbʉriamarẽã maʉ̃ dayirãba aña jidada kʼarea (Gál. 6:7, 8). Maʉ̃ba kʼawuapanʉ dayirãba bia jida ẽ bʉrʉ akʉza bia jara ẽ bʉrʉ zʉbʉria ũduita. Dayirãba kʼãrẽ obʉdeba mejãcha krĩcha oseabʉ. Dayirãba kʼawuaiba daya nekʼãrẽ obʉba zʉbʉriabiseabʉta, kʼarebayi jaraita daya kayirua odata akʉza jẽda krĩchaita, adewara maʉ̃ta wua oẽ baita. Naʉ̃ oiba kʼarebayi wẽbaita ewari jõmaʉ̃nẽbayeda.

9. ¿Bʉa nei aña jidasibʉrʉ kʼãrẽta oseabʉ? (Akʉra potota).

⁹ ¿Sãwũã atʉseabʉ naʉ̃ zʉgʉara? Bʉa nei aña jidasibʉrʉ ¿kʼãrẽta oseabʉ? Bʉa nei aña oda kʼarea jʉrʉrãra wuabemara  jara ũrĩbita bʉa kʼãrẽa mawũã osita maʉ̃ra, mawũã ẽ bʉrʉ jararãra bʉara maʉ̃ra osita awuruba omarẽã jarasi baera. Awuarabʉrʉ kʼawuara maʉ̃ra mawũã berabarisita bʉa bia jida ẽ basi baera akʉza zarea ora audre bia jida kʼawuaita. Bʉa nei aña osibʉrʉ soiduba jẽda krĩchara maʉ̃ ʉ̃rʉ akʉza Jeowaʼa widira kĩrãduamarẽã maʉ̃ta (Sal. 25:11; 51:3, 4). Bʉa mebẽã abaʉta sopʉabisibʉrʉ widira iyaʼa maʉ̃ta kĩrãduamarẽã akʉza zõrãrã kʼarebata jʉrʉra (Sant. 5:14, 15). Bʉa kayirua odadeba kʼawuara kʼãrẽta obe ẽãta mõbe maʉ̃ta wua orãra. Bʉa maʉ̃ta ora kʼawuabara Jeowabara so zʉbʉria akʉita akʉza diaita bʉa kʼareba nesidabʉta (Sal. 103:8-13).

10. ¿Kʼãrẽa ewari jõmaʉ̃nẽ bia oita krĩchaibara mapaebiseabʉ? (Gálatas 6:4).

¹⁰ Krĩchaita jõma ewari jõmaʉ̃nẽ bia oita. Dayirãra aukʼara krĩcha zroma oseapanʉ wuabemarane kĩrãkʼa daucha okĩrãpanʉne (akʉra Gálatas 6:4). Krĩchapanʉbʉrʉ wuabemarane kĩrãkʼa daucha oita, naʉ̃ba oseabʉ daya erbakĩrãita wuabemaraba nebia erbʉta akʉza jʉrʉita sãwũã ãyide audre bia oita (Gál. 5:26). Jʉrʉpanʉbʉrʉ wuabemarane daucha oita, mamina maʉ̃ta oau ẽ bʉrʉ maʉ̃ba dayikʉza zʉbʉriabiseabʉ, maʉ̃ra wãrĩnu Daizeze Bedʼeaba jarabʉ «dayirãba jʉ̃ãbʉta mesera berabari ẽ bʉrʉ dayi sota kayabibʉ» (Prov. 13:12). Naʉ̃bara dayirãra mapaebiyi akʉza bia wẽbabi ẽ bayi (Prov. 24:10).

11. ¿Kʼãrẽba kʼarebaseabʉ krĩcha ẽ baita bʉa jõma oseabʉta?

¹¹ ¿Sãwũã ãĩ bʉeseabʉ naʉ̃ zʉgʉara? Jeowabara jʉ̃ã ẽ bʉa oseabʉde wueta omarẽã, bʉabida abarika oibara (2 Cor. 8:12). Jeowabara akʉ ẽ bʉa wuabemarane kĩrãkʼa abarika obʉ kʼawuaita (Mat. 25:20-23). Bʉa nekʼãrẽ Jeowa kʼarea soiduba obʉra iyara biʼia akʉbʉ, bʉ iyiare kʼẽrẽpabʉta akʉza awuantabʉta. Bʉ sõbe poagabʉ kʼãrẽa, bʉ sãwũã kayabʉ kʼarea akʉza bʉ sãwũã berabarinʉmʉ kʼarea, kʼawuabaibara sainʉ oseabʉta. Bʉaʼa trajota Jeowaita omarẽã jaradara, mamina bʉ kayabʉ kʼarea akʉza bʉ sõbe poagabʉ kʼarea obe ẽ bʉrʉ Barziláide kĩrãkʼa jarara obe ẽãta (2 Sam. 19:35, 36). Akʉza Moisésde kĩrãkʼa, wuabemara jarara kʼãrẽne kʼarebaseapanʉta (Éx. 18:21, 22). Bʉa kʼawuabʉbʉrʉ sainʉ oita, jʉrʉ ẽ bayi oita nekʼãrẽ bʉ mapaebiseabʉta.

12. ¿Awururaba aña jidabʉrʉdera maʉ̃ra dayi kʼarea mawũã berabaribʉka? Jara ũrĩbira.

¹² Awururaba aña jidabʉrʉde krĩchaita maʉ̃ra dayi kʼarea mawũã osita. Dayirãbara wuabemabari jidabe ẽ akʉza krĩchabe ẽ ãya aña jidabʉrʉdera maʉ̃ra dayi kʼarea mawũã berabarisita. Bari jaraita, wũãwũã abaʉba jidaseabʉ Jeowadeba jĩga bʼaita, mamina yi yibarirabara krĩcha ẽ baibara maʉ̃ra mawũã berabarisita ãya bia akʉ ẽ baera, mawũãsidu yibariraba krĩchadara maʉ̃ra berabarisita ãyi kʼãrẽa, naʉ̃ra ãyitara zʉgʉa zroma kĩrãkʼabayi. Jeowabara kãga ẽ ãya mawũã krĩchamarẽãra (Rom. 14:12).

13. ¿Kʼãrẽta oibara yibarirabara yi wũãwũãba bia jida ẽ bʉrʉ?

¹³ ¿Sãwũã ãĩ bʉeseabʉ naʉ̃ zʉgʉara? Kʼawuabara Jeowabara iduaribibʉta aba abakaʉba jidamarẽã iya kʼãrẽ  okĩrãbʉta. Bari jaraita iya iduaribibʉ bʉa jidamarẽã iyi ode bʼaita mawũã ẽ bʉrʉ ba ẽ baita. Jeowabara kʼawuabʉ yibarirãra kayirua omiarata, maʉ̃ba iya kãgabʉ zarea odamarẽã ãya oseabʉta oita. Bʉ wũãwũãba kʼãrẽ oita jidabʉrʉde neida berabarira, maʉ̃ra mawũã berabariyi iya mawũã jidasi baera (Prov. 20:11). Mamina bʉa krĩchabʉbʉrʉ bʉ wũãwũã bia akʉ ẽ basita Jeowaʼa widira kĩrãduamarẽã bʉa aña odara. Iyara kʼawuabʉ baera bʉra jẽda wãbe ẽãta maʉ̃ ara oita mawũã bʉ wũãwũã zʉbʉria ẽ marẽã iya kayirua jidada kʼarea. Kĩrãbera bʉ wũãwũãta zarea obʉbʉrʉ jẽda Jeowama zeita iyara bia edayi (Luc. 15:18-20).

14. ¿Kʼãrẽa aukʼara krĩcha oẽ baibara dayirãba oda kʼarea?

¹⁴ Ewari jõmaʉ̃nẽ krĩchabʉta daya kayirua oda ʉ̃rʉ. Dayirãba kayirua obʉrʉdera sopʉa sentipanʉ, mamina biga ẽ daya naʉ̃ ʉ̃rʉ ewari jõmaʉ̃nẽ krĩcha bʼaita, naʉ̃ra nezʉgʉa kĩrãkʼabʉ baera. ¿Sãwũã kʼawuapanʉ aukʼara sopʉapanʉta daya kayirua oda kʼarea? Jeowabara dayirã kayiruara kĩrãduayi daya kayirua odata jarabʉbʉrʉ akʉza soiduba jẽda krĩchabʉbʉrʉ, adewara maʉ̃ta wua oẽ bʉrʉ (Hech. 3:19). Naʉ̃ jõma oda tẽãra Jeowabara kãga ẽ dayirã waidide sopʉa bamarẽã daya oda kʼarea. Iya kʼawuabʉ baera naʉ̃ra jipade yibia ẽãta dayirãitara (Sal. 31:10). Dayirãta aukʼara sopʉapanʉbʉrʉ dayirãba oda kʼarea ãĩ wãseapanʉ Jeowa odeba (2 Cor. 2:7).

15. ¿Kʼãrẽba kʼarebaseabʉ bʉa aukʼara krĩcha ẽ marẽã bʉa kayirua oda ʉ̃rʉ? (1 Juan 3:19, 20 akʉza akʉra potota).

¹⁵ ¿Sãwũã ãĩ bʉeseabʉ naʉ̃ zʉgʉara? Bʉa kayirua oda kʼarea aukʼara krĩcha zroma obʉbʉrʉ kĩrãbera Jeowabara kĩrãduabʉta dayirã kayiruara (Sal. 130:4). Jeowaba dayirã kayirua kĩrãduabʉrʉdera  dayirã naʉ̃ta jarabʉrʉ kĩrãkʼabʉ: «Jẽda kĩrãbe ẽ bayi ãyi kayiruara» (Jer. 31:34). Naʉ̃ba jarakĩrãbʉ bʉa kayirua nãã odara Jeowabara jẽda kĩrãbe ẽ baita. Maʉ̃ba bʉa kayirua oda kʼarea bia wã ẽ bʉrʉ krĩcharãra Jeowaba bʉ kayiruata kĩrãdua ẽ baera mawũãbʉta. Bʉyikʉzaʉ̃me kĩrʉrãra bʉa kayirua oda kʼarea pribilegio nãã erbadata aduasibʉrʉ, Jeowabara bʉa kayirua oda ʉ̃rʉ krĩcha ẽ baera bʉabida krĩcha ẽ baibara (akʉra 1 Juan 3:19, 20).   

16. ¿Dayirãbara kʼãrẽta kʼawuadaibara?

¹⁶ Dayirã ewari jõmaʉ̃nẽ bʼaita zarea odaibara wẽba takeraita mainʉ jʉ̃ẽñena (1 Cor. 9:24). Maʉ̃itara kʼawuadaibara saʉ̃ra zʉgʉata atʉibarata akʉza saʉ̃rata ãĩ bʉeibarata. Adewara kĩrãbedaibara Jesuba naʉ̃ ũrãgʼa diadata: «Mayi soba krĩchabʉde panaraidua, aukʼara nekopanaraidua akʉza ituaba bei panaraidua, naʉ̃ ẽjũãnẽbʉta krĩcha panaraidua» (Luc. 21:34). Naʉ̃ ũrãgʼaba akʉza awururaba kʼarebayi bʉa kʼawuaita kʼãrẽta oibarata wẽba takeraita.

17. ¿Sãwũã kʼawuapanʉ ewari jõmaʉ̃nẽ bʼai ũduseapanʉta?

¹⁷ Dayirãbara kʼawuapanʉ Jeowa kʼarebadeba wẽba takeraseabʉta ewari jõmaʉ̃nẽ bʼai ũduyeda (Is. 40:29-31). Maʉ̃ kʼarea pikãga wẽbaraidua awuarabʉrʉ Pablode kĩrãkʼa oidua. Iyira wẽbasi nebia ũduyeda (Filip. 3:13, 14). Mia abaʉta wẽba ẽ bayi bʉbarira, mamina Jeowa kʼarebadeba bʉra wẽba takeraseabʉ. Jeowaba kʼarebayi zʉgʉara bʉa atʉibarata bia edemarẽã akʉza bʉa ãĩ bʉeibarata ãĩ bʉemarẽã (Sal. 68:19). Jeowa kʼarebadeba dayirãra zarea wẽbaseapanʉ ewari jõmaʉ̃nẽ bʼai ũduyeda.