1. Sɔgbe xá Eblée lɛ́ 12:1 ɔ, étɛ́ é ka byɔ́ ɖɔ mǐ ní wa bo ná dó kpé wú bá kán gbɛ wezun e kán wɛ mǐ ɖe é yi fó?

 BIBLU jlɛ́ klisánwun gbɛ zínzán mǐtɔn dó wezun kínkán wú. Wezunkántɔ́ e ná kán wezun ɔ káká yi vivɔnu lɛ́ é wɛ è ná dó gbɛ mavɔmavɔ sín ajɔ. (2 Tim. 4:7, 8) Mǐ ɖó ná wa nǔ e wú mǐ kpé é bǐ, bo kpo ɖo wezun ɔ kán wɛ, tají ɔ, din e mǐ ko ɖibla kán wezun ɔ kpé é. Mɛsɛ́dó Pɔ́lu e kán gbɛ wezun ɔ bo fó é ɖɔ nǔ e ná d’alɔ mǐ bɔ mǐ ná kán gbɛ wezun ɔ yi fó é nú mǐ. É ɖɔ nú mǐ ɖɔ ‘mǐ ní jó nǔ e nɔ dó tagba nú mǐ ɖo Aklúnɔ lixo ɔ bǐ dó, bo dɛ ɖo wezun e è sɔ́ ɖó te nú mǐ bɔ mǐ ɖo kínkán wɛ ɔ nu.’—Xa Eblée lɛ́ 12:1.

2. Étɛ́ ɖɔ wɛ è ka ɖe bo ɖɔ ɖɔ mǐ ní ‘jó nǔ e nɔ dó tagba nú mǐ lɛ́ é dó’?

² Hwenu e Pɔ́lu ɖɔ ɖɔ mǐ ɖó ná ‘jó nǔ e nɔ dó tagba nú mǐ lɛ́ é bǐ dó’ é ɔ, ɖiɖɔ wɛ é ka ɖe ɖɔ nǔɖé kún sɔ́ ɖe nú klisánwun ɖé ná wa ó a? Éǒ. Nǔ e ɖɔ wɛ é ɖe é wɛ nyí ɖɔ, mǐ ɖó ná jó nǔ ɖěɖěe ma ɖo dandan ǎ lɛ́ é bǐ dó. Nǔ énɛ́ lɛ́ sixú dɔn mǐ dó gǔdo, bo lɛ́ zɔ́n bɔ nǔ ci kɔ nú mǐ. Bo ná dó dɛ ɔ, mǐ ɖó ná yá wǔ ɖ’ayi nǔ ɖěbǔ e ma ɖo dandan ǎ, bo sixú dɔn mǐ dó gǔdo lɛ́ é wú, lobo yá wǔ jó yě dó. Amɔ̌, hwe ɖokpó ɔ nu ɔ, mǐ ba bo ná jó nǔ ɖěɖěe mǐ ɖó ná wa lɛ́ é dó ǎ. Ényí mǐ ɖó nǔ énɛ́ lɛ́ wiwa te ɔ, mǐ sɔ́ sixú jɛxá bo ná kpo ɖo wezun ɔ kán wɛ ǎ. (2 Tim. 2:5) Nǔ tɛ́ lɛ́ mǐ ka ɖó ná wa?

3. (a) Sɔgbe xá Galátinu lɛ́ 6:5 ɔ, étɛ́ mǐ ka ɖó ná wa? (b) Étɛ́ lɛ́ mǐ ka ná gbéjé kpɔ́n ɖo xóta élɔ́ mɛ? Aniwú?

³ Xa Galátinu lɛ́ 6:5. Pɔ́lu ɖɔ nǔ e mǐ ɖó ná wa é ɖé xó. É wlán ɖɔ: “Mɛ ɖokpó ɖokpó wɛ ná hɛn agban éɖésúnɔ tɔn.” Nǔ  e mǐ mɛ ɖokpó ɖokpó ɖó ná wa ɖo Mawu nukɔn é xó ɖɔ wɛ Pɔ́lu ɖe ɖo fí, nǔɖé wɛ bɔ mɛ ɖěvo ɖěbǔ sixú wa dó tɛn mǐtɔn mɛ ǎ. Ðo xóta élɔ́ mɛ ɔ, mǐ ná gbéjé nǔ ɖěɖěe ɖo ‘agban mɛɖésúnɔ tɔn’ nyí wɛ lɛ́ é, alǒ nǔ ɖěɖěe è ɖó ná wa lɛ́ é kpɔ́n, bo ná lɛ́ gbéjé lěe mǐ sixú hɛn agban énɛ́ lɛ́, alǒ wa nǔ énɛ́ lɛ́ gbɔn é kpɔ́n. Mǐ ná lɛ́ mɔ nǔ ɖěɖěe ma ɖo dandan ǎ, bɔ mǐ sixú ko ɖo wiwa wɛ lɛ́ é, bo ná lɛ́ kplɔ́n lěe mǐ sixú jó yě dó gbɔn é. Ényí mǐ nɔ wa nǔ ɖěɖěe mǐ ɖó ná wa lɛ́ é, bo nɔ jó nǔ ɖěɖěe ma ɖo dandan ǎ lɛ́ é dó ɔ, é ná d’alɔ mǐ bɔ mǐ ná kán gbɛ wezun ɔ yi fó ganjí.

4. Aniwú zě e mǐ zé mǐɖée jó nú Mawu é ma ka nyí agban bo nɔ kpɛn mǐ ǎ? (Lɛ̌ kpɔ́n fɔtóo ɔ.)

⁴ Zě e mǐ zé mǐɖée jó nú Jexóva é. Hwenu e mǐ zé mǐɖée jó nú Jexóva é ɔ, mǐ d’akpá n’i ɖɔ mǐ ná sɛn ɛ, lobo lɛ́ wa jlǒ tɔn. Mǐ ɖó ná ɖe akpá énɛ́. Gbɛ zínzán sɔgbe xá zě e mǐ zé mǐɖée jó nú Jexóva é ɔ, azɔ̌ kpinkpɛn wɛ, amɔ̌, é nyí agban bo ɖo kɔ jí nú mǐ ǎ. È ná ɖɔ ɔ, Jexóva dá mǐ bónú mǐ ná wa jlǒ tɔn. (Nǔɖe. 4:11) É dá mǐ kpó jlǒ ɔ kpó bɔ mǐ nɔ ba ná sú hudó nǔ gbigbɔ tɔn e mǐ ɖó lɛ́ é tɔn sín do;  é dá mǐ ɖo akpajlɛ́ éɖésúnɔ tɔn mɛ. Wǎgbɔ tɔn ɔ, mǐ nɔ kpé wú bo nɔ zun xɔ́ntɔn vívɛ́ xá ɛ, bɔ jlǒ tɔn e wa wɛ mǐ ɖe é nɔ lɛ́ dó xomɛhunhun nú mǐ. (Ðɛh. 40:9) Ényí mǐ nɔ wa jlǒ Mawu tɔn, bo nɔ lɛ́ sɔ́ afɔ dó afɔdo Vǐ tɔn tɔn mɛ ɔ, mǐ “ná mɔ kɔ dó sa fún”.—Mat. 11:28-30.

5. Étɛ́ ka sixú d’alɔ we bɔ a ná wa nǔ sɔgbe xá zě e a zé hwiɖée jó nú Mawu é? (1 Jaan 5:3)

⁵ Nɛ̌ a ka sixú wa énɛ́ gbɔn? Nǔ we sixú d’alɔ we. Nukɔntɔn, kpo ɖo hlɔ̌nhlɔ́n ná wǎnyíyí e a ɖó nú Jexóva é wɛ. Ényí a nɔ lin tamɛ dó nǔ ɖagbe ɖěɖěe é ko wa nú we lɛ́ é kpó nyɔ̌ná ɖěɖěe é sɔ́ ɖó sɛxwetɛn nú we lɛ́ é kpó bǐ jí ɔ, a ná ná hlɔ̌nhlɔ́n wǎnyíyí mɔ̌hun. Lě do a yí wǎn nú Mawu sɔ é ɔ, mɔ̌ do wɛ é ná bɔ wǔ nú we bɔ a ná se tónú n’i sɔ. (Xa 1 Jaan 5:3.) Wegɔ́, nɔ xwedó kpɔ́ndéwú Jezu tɔn. Jezu kpé wú bo wa jlǒ Mawu tɔn ganjí, ɖó é nɔ xo ɖɛ sɛ́dó Jexóva dó byɔ́ alɔdó, lobo lɛ́ sɔ́ ayi ɖó ajɔ e é sɔ́ ɖó te n’i é jí. (Ebl. 5:7; 12:2) Jezu ɖɔhun ɔ, nɔ xo ɖɛ sɛ́dó Jexóva dó byɔ́ hlɔ̌nhlɔ́n bónú nukúnɖíɖó gbɛ mavɔmavɔ tɔn towe ní ma sɛ do ó. Ényí wǎnyíyí e a ɖó nú Mawu é ɖo jijɛjí wɛ, bónú a nɔ lɛ́ wa nǔ Vǐ tɔn ɖɔhun ɔ, a ná kpé wú bo wa nǔ sɔgbe xá zě e a zé hwiɖée jó n’i é.

6. Aniwú mǐ ka ɖó ná nɔ w’azɔ̌ e mǐ ɖó ɖo xwédo mɛ lɛ́ é? (Lɛ̌ kpɔ́n fɔtóo ɔ.)

⁶ Xwédo sín azɔ̌ lɛ́. Ðo gbɛ wezun e kán wɛ mǐ ɖe é mɛ ɔ, mǐ ɖó ná yí wǎn nú Jexóva kpó Jezu kpó hú gǎn hɛ̌nnumɔ mǐtɔn lɛ́. (Mat. 10:37) Amɔ̌, énɛ́ ɖo xlɛ́xlɛ́ wɛ ɖɔ mǐ ná wɔn ya nú xwédo sín azɔ̌ mǐtɔn lɛ́ cí nǔ ɖɔ yě ɖo mǐ dɔn dó gǔdo wɛ, bɔ nǔ mǐtɔn ná gɔn Mawu kpó Klísu kpó nukúnmɛ nyɔ́ ɖɔhun ǎ. É nyɔ́ wa ɔ, cóbónú nǔ mǐtɔn ná nyɔ́ Mawu kpó Klísu kpó nukúnmɛ ɔ, mǐ ɖó ná nɔ wa azɔ̌ e mǐ ɖó ɖo xwédo mɛ lɛ́ é. (1 Tim. 5:4, 8) Ényí mǐ nɔ wa mɔ̌ ɔ, mǐ ná ɖó awǎjijɛ hú gǎn. È ná ɖɔ ɔ, Jexóva tuun ɖɔ ényí xwédo lɛ́ nɔ wa nǔ élɔ́ lɛ́ ɔ, yě ná ɖó awǎjijɛ: Asú kpó asi kpó ɖó ná wa nǔ xá yěɖée kpó wǎnyíyí kpó, kpódó sísí kpán, mɛjitɔ́ lɛ́ ɖó ná yí wǎn nú vǐ yětɔn lɛ́ bo ná nɔ kplɔ́n nǔ yě, lobɔ vǐ lɛ́ ɖó ná nɔ se tónú nú mɛjitɔ́ yětɔn lɛ́.—Efɛ́. 5:33; 6:1, 4.

7. Nɛ̌ a ka sixú w’azɔ̌ e nyí towe é ɖo xwédo mɛ gbɔn?

⁷ Nɛ̌ a ka sixú wa énɛ́ gbɔn? Asú, asi alǒ vǐ wɛ nú we hǔn, nɔ ɖeji dó wěɖexámɛ Biblu tɔn e nǔnywɛ́ kpé lɛ́ é wú. Ma nɔ wa nǔ e a lin ɖɔ é sɔgbe, kabǐ mɛ lɛ́ ɖo wiwa wɛ kpaa alǒ akɔwé lɛ́ ɖɔ hwi ɖó ná wa é kpowun ó. (Nǔx. 24:3, 4) Nɔ zán wěma jínjɔ́n Biblu jí mǐtɔn lɛ́ ganjí. Wěɖexámɛ ɖaaɖagbe e kɛ nu dó lěe mǐ sixú zán nǔgbódodó Biblu tɔn lɛ́ gbɔn é wú é ɖo wěma énɛ́ lɛ́ mɛ. Ði kpɔ́ndéwú ɔ, a sixú mɔ wěɖexámɛ ɖaaɖagbe lɛ́ dó lěe asú kpó asi kpó lɛ́, mɛjitɔ́ lɛ́ kpó mɛ wínnyáwínnyá lɛ́ kpó sixú ɖí xwi xá tagba tawun tawun lɛ́ ɖo égbé gbɔn é wú, ɖo xóta ɖěbɔdóɖěwú “Alɔdó nú xwédo lɛ́” mɛ. b Kán ɖ’é jí bo ná zán nǔ e Biblu ɖɔ lɛ́ é, ényí mɛ ɖěɖěe ɖo xwédo towe mɛ lɛ́ é ná bo ma tlɛ ɖo mɔ̌ wa wɛ ǎ ɔ nɛ́. Ényí a nɔ wa mɔ̌ ɔ, xwédo towe ná ɖu le tɔn, bɔ a ná lɛ́ ɖu vǐví nyɔ̌ná Jexóva tɔn lɛ́ tɔn.—1 Pi. 3:1, 2.

8. Nɛ̌ gbeta e kɔn mǐ nɔ wá lɛ́ é ka sixú wa nǔ dó mǐ wú gbɔn?

⁸ Gbeta e kɔn mǐ nɔ wá lɛ́ é sín agban hinhɛn. Jexóva ná mǐ mɛɖésúsíninɔ, bo nɔ ba ɖɔ mǐ ní ɖu vǐví le ɖěɖěe nɔ tɔ́n sín gbeta ɖagbe lɛ́ kɔn wíwá mɛ é tɔn. Amɔ̌, é nɔ cyɔ́n alɔ mǐ jí bɔ mǐ nɔ gɔn xɔxɔ gbeta nyanya e kɔn mǐ wá lɛ́ é tɔn se ǎ. (Ga. 6:7, 8) Énɛ́ wú ɔ, mǐ nɔ yí gbe nú nǔ  e mɛ nǔ élɔ́ lɛ́ e mǐ nɔ wa lɛ́ é nɔ tɔ́n kɔ dó lɛ́ é: Gbeta nyanya e kɔn mǐ nɔ wá lɛ́ é, xó e mǐ nɔ ɖɔ ma lin tamɛ lɛ́ é kpó nǔ nyanya e mǐ nɔ wa lɛ́ é kpó. Nǔ e mǐ nɔ wa é sín hwɛ wɛ ayi mǐtɔn nɔ dó mǐ. Amɔ̌, tuun e mǐ tuun ɖɔ mǐ ɖó ná hɛn gbeta e kɔn mǐ nɔ wá lɛ́ é sín agban é sixú sísɛ́ mǐ bɔ mǐ ɖɔ hwɛ e mǐ hu lɛ́ é, bló hǔzúhúzú lɛ́, lobo lɛ́ nyi alɔ nú nǔ ɖokpó ɔ lɛ́ wiwa nyi do hweɖévonu. Nǔ mɔ̌hun lɛ́ wiwa sixú d’alɔ mǐ bɔ mǐ ná kpo ɖo gbɛ wezun ɔ kán wɛ.

9. Ényí a wá gbeta nyanya ɖé kɔn bɔ é ɖo wǔvɛ́ hɛn wá nú we wɛ ɔ, étɛ́ ka sixú d’alɔ we? (Lɛ̌ kpɔ́n fɔtóo ɔ.)

⁹ Nɛ̌ a ka sixú wa énɛ́ gbɔn? Ényí a ma sixú vɔ́ gbeta nyanya e kɔn a wá é ɖé jlá ɖó ǎ hǔn, yǐ gbe nú ninɔmɛ e mɛ a ɖe din é. Hɛn dó ayi mɛ ɖɔ émí kún sixú ɖyɔ́ nǔ e ko jɛ wá yi lɛ́ é ó. Ma gú hwenu towe kpó hlɔ̌nhlɔ́n towe kpó dó xlɛ́ ɖɔ hwɛ émítɔn jɛ́n jɔ, alǒ tɛ́n kpɔ́n bo dó hwɛ mɛ ɖěvo lɛ́ ɖó nǔwanyido towe lɛ́ wú ó. É nyɔ́ wa hǔn, yǐ gbe nú nǔwanyido towe lɛ́ bo tɛ́n kpɔ́n bo wa nǔ e wú a kpé é ɖo ninɔmɛ towe din tɔn ɔ mɛ. Ényí a nɔ ɖo hwɛ dó hwiɖée wɛ ɖó nǔ e a wa nyi do é ɖé wú hǔn, xo ɖɛ sɛ́dó Jexóva kpó mɛɖéesɔ́hwe kpó, yǐ gbe nú nǔ e a wa nyi do é, lobo byɔ́ ɛ ɖɔ é ní sɔ́ hwɛ kɛ we. (Ðɛh. 25:11; 51:5, 6) Sa vo nú mɛ ɖěɖěe a sixú ko jɛ do ná lɛ́ é, bɔ ényí é byɔ́ ɖó mɔ̌ hǔn, ba alɔdó mɛxó agun tɔn lɛ́ tɔn. (Ja. 5:14, 15) Nǔwanyido towe ní kplɔ́n nǔ we, bónú a ní tɛ́n kpɔ́n bo nyi alɔ nú nǔ ɖokpó ɔ lɛ́ wiwa nyi do hweɖévonu. Ényí a nɔ wa mɔ̌ ɔ, a sixú kú d’é jí ɖɔ Jexóva ná nyɔ́ xomɛ dó wǔ we, lobo nɔ gǔdo nú we.—Ðɛh. 103:8-13.

10. Aniwú nukún e è nɔ ɖó nǔ ɖo mɛɖée sí zɛ xwé wú é ka nyí agban kpinkpɛn ɖé? (Galátinu lɛ́ 6:4)

¹⁰ Nukún e è nɔ ɖó nǔ ɖo mɛɖée sí zɛ xwé wú é. Ényí mǐ nɔ jlɛ́ mǐɖée dó mɛ ɖěvo lɛ́ wú ɔ, é sixú zɔ́n bɔ mǐ ná mɔ ɖɔ é kpo nǔ nú mǐ dín bɔ mǐ ná wa. (Xa Galátinu lɛ́ 6:4.) Ényí mǐ nɔ jlɛ́ mǐɖée dó mɛ ɖěvo lɛ́ wú hwebǐnu ɔ, é sixú zɔ́n bɔ mǐ nɔ jló mɛ ɖěvo lɛ́ sín nǔ, lobo nɔ lɛ́ hwlɛ́n agba xá mɛ ɖěvo lɛ́. (Ga. 5:26) Ényí mǐ ɖo tíntɛ́nkpɔ́n wɛ bo ná wa nǔ e wa wɛ mɛ ɖěvo lɛ́ ɖe é bo ka hwe d’é wú ɔ, mǐ sixú wa nǔ dó mǐɖée wú. Ényí “è ɖo nǔɖé ɖó nukún wɛ bo ma ɖo mimɔ wɛ ǎ ɔ, azɔn wɛ é nɔ dó mɛ.” Mi bo dó nukún lě do nǔ ɖěɖěe wú mǐ ma sixú kpé gbeɖé ǎ lɛ́ é gbé nyinya sixú wa nǔ dó ayi mǐtɔn wú sɔ é mɛ kpɔ́n! (Nǔx. 13:12) Mɔ̌ wiwa sixú zɔ́n bɔ hlɔ̌nhlɔ́n ná hwedó mǐ, bo ná lɛ́ zɔ́n bɔ mǐ sɔ́ ná sixú kán gbɛ wezun ɔ ganjí ǎ.—Nǔx. 24:10.

11. Étɛ́ ka sixú d’alɔ we bɔ a ma ná nɔ ɖó nukún nǔ zɛ xwé wú ɖo hwiɖée sí ǎ?

¹¹ Nɛ̌ a ka sixú ɖe kɔ sín agban énɛ́ glɔ́ gbɔn? Ma nɔ ɖó nukún nǔ ɖo hwiɖée sí zɛ nǔ e Jexóva nɔ byɔ́ mǐ lɛ́ é wú ó. É nɔ ɖó nukún ɖɔ a ní wa nǔ zɛ nǔ e a hɛn ɔ, a ná wa é wú gbeɖé ǎ. (2 Kɔ. 8:12) Kú d’é jí ɖɔ Jexóva kún nɔ jlɛ́ nǔ e a nɔ wa lɛ́ é dó nǔ e mɛ ɖěvo lɛ́ nɔ wa lɛ́ é wú ó. (Mat. 25:20-23) Sinsɛnzɔ́ e a nɔ wa kpó lǐndɔ̌n towe bǐ kpó é nɔ su nukún tɔn mɛ; gbejíninɔ towe kpó didɛ towe kpó lɔ nɔ xɔ akwɛ́ n’i. Jlɛ̌jíninɔ ní d’alɔ we bónú a ní yí gbe ɖɔ xwe towe, lanmɛ towe kpó ninɔmɛ ɖé lɛ́ kpó sixú ɖó dogbó nú nǔ e a sixú wa din lɛ́ é. Ényí lanmɛ towe alǒ xwe towe zɔ́n bɔ wǔjɔmɛzɔ́ ɖé wiwa ná vɛ́ wǔ nú we hǔn, ɖo gbesisɔmɛ bo ná gbɛ́ azɔ̌ ɔ Baaziláyi ɖɔhun. (2 Sam. 19:36, 37) Yǐ gbe nú alɔdó bo sɔ́ azɔ̌ d’así nú mɛ ɖěvo lɛ́ hwenu e é byɔ́ dó é, Mɔyízi ɖɔhun. (Tín. 18:21, 22) Ényí a nɔ nɔ jlɛ̌ jí ɔ, a ná nɔ ɖo nǔ ɖěɖěe sixú zɔ́n bɔ agbɔ̌n ná kpé we ɖo gbɛ wezun e kán wɛ a ɖe é kɔn lɛ́ é gbé nya wɛ ǎ.

12. Mǐ wú wɛ gbeta nyanya e kɔn mɛ ɖěvo lɛ́ nɔ wá lɛ́ é nɔ sín a? Tínmɛ.

¹² Hwɛ dídó mɛɖée ɖó gbeta nyanya e kɔn mɛ ɖěvo lɛ́ wá é wú. Mǐ sixú wá gbeta lɛ́ kɔn nú mɛ ɖěvo lɛ́ ǎ; mɔ̌ jɛ́n mǐ ma sixú cyɔ́n alɔ yě jí  hwebǐnu bónú yě gɔn xɔxɔ gbeta nyanya e kɔn yě wá lɛ́ é tɔn se ǎ é nɛ́. Ði kpɔ́ndéwú ɔ, vǐ ɖé sixú wá gbeta ɔ kɔn, bo jó Jexóva sinsɛn dó. Gbeta énɛ́ e kɔn é wá é sixú dɔn mɛjitɔ́ tɔn lɛ́ dó aluwɛ ɖaxó mɛ. Amɔ̌, mɛjitɔ́ ɖěɖěe nɔ ɖo hwɛ dó yěɖée wɛ ɖó gbeta nyanya e kɔn vǐ yětɔn wá é wú lɛ́ é nɔ dó agban kpinkpɛn nú yěɖée. Jexóva nɔ ɖó nukún ɖo yě sí ɖɔ yě ní hɛn agban énɛ́ ǎ.—Hlɔ̌. 14:12.

13. Nɛ̌ mɛjitɔ́ ɖé ka sixú wa nǔ gbɔn hwenu e vǐ tɔn wá gbeta nyanya ɖé kɔn é?

¹³ Nɛ̌ a ka sixú ɖe ta sín agban énɛ́ glɔ́ gbɔn? Tuun ɖɔ mǐ mɛ bǐ wɛ Jexóva ná mɛɖésúsíninɔ. É nɔ jó mɛ ɖokpó ɖokpó dó ɖɔ é ní wá gbeta éɖésúnɔ tɔn kɔn. È ná sɛn ɛ kpó è ná gbɔ kpó lɔ ɖo gbeta énɛ́ lɛ́ mɛ. Jexóva tuun ɖɔ hwɛhutɔ́ wɛ nú we; nǔ e ba wɛ é ɖe kpowun é wɛ nyí ɖɔ a ní wa nǔ e wú a kpé é bǐ. Vǐ towe ɖésú wɛ ná hɛn agban gbeta e kɔn é wá é tɔn, hwi wɛ ná hɛn ǎ. (Nǔx. 20:11) Amɔ̌, hwi mɛjitɔ́ ɔ sixú nɔ ɖo tamɛ lin dó nǔ e a ko wa nyi do wá yi lɛ́ é jí wɛ. Ényí mɔ̌ hǔn, ɖɔ lěe nǔ cí nú we é nú Jexóva, bo byɔ́ ɛ ɖɔ é ní sɔ́ hwɛ kɛ we. É tuun ɖɔ nǔ e ko wá yi é ko wá yi, bɔ hwi kún sɔ́ sixú húzú nǔ e ko jɛ wá yi lɛ́ é ó. Ðo hwe ɖokpó ɔ nu ɔ, é nɔ ɖó nukún ɖɔ a ní ma cyɔ́n alɔ vǐ towe jí, bónú é gɔn nǔ e é dó é ya ó. Hɛn dó ayi mɛ ɖɔ, ényí vǐ towe dó gǎn e wú é kpé é bǐ bá lɛ́ kɔ wá Jexóva gɔn ɔ, Jexóva ná yí i kpó akpakpa sɔ́ mɛ kpó.—Luk. 15:18-20.

14. Hwɛ dídó mɛɖée zɛ xwé wú ɔ, agban wɛ é nyí bɔ mǐ ɖó ná ɖe ta sín glɔ́. Aniwú?

¹⁴ Hwɛ dídó mɛɖée zɛ xwé wú. Ényí mǐ hu hwɛ ɔ, é nyɔ́ ɖɔ mǐ ní nɔ dó hwɛ mǐɖée. Amɔ̌, Jexóva ba ɖɔ mǐ ní nɔ ɖo hwɛ dó mǐɖée wɛ zɛ xwé wú ǎ. Agban e glɔ́ mǐ ɖó ná ɖe ta sín é ɖokpó wɛ. Ényí mǐ ɖɔ hwɛ e mǐ hu é, bɔ hwɛ mǐtɔn vɛ́ nú mǐ, lobɔ mǐ lɛ́ ɖe afɔ tawun tawun lɛ́ bo ná dó nyi alɔ nú nǔ ɖokpó ɔ wiwa nyi do hweɖévonu ɔ, mǐ sixú ɖeji ɖɔ Jexóva ko sɔ́ hwɛ mǐtɔn lɛ́ kɛ mǐ. (Mɛ. 3:19) Ényí mǐ ko ɖe afɔ énɛ́ lɛ́ gúdo ɔ, Jexóva sɔ́ nɔ ba ɖɔ mǐ ní kpo ɖo hwɛ dó mǐɖée wɛ ǎ. É tuun azɔn e hwɛ dídó mɛɖée magbokɔ nɔ dó mɛ é. (Ðɛh.  31:11) Ényí mǐ jó aluwɛ e mɛ mǐ ɖe é dó nú é ɖí bú mǐ ɔ, mǐ sixú jó gbe dó gbɛ wezun e kán wɛ mǐ ɖe é wú.—2 Kɔ. 2:7.

15. Étɛ́ ka sixú d’alɔ we bɔ a ná ɖí xwi xá hwɛ dídó mɛɖée zɛ xwé wú? (1 Jaan 3:19, 20) (Lɛ̌ kpɔ́n fɔtóo ɔ.)

¹⁵ Nɛ̌ a ka sixú ɖe ta sín agban énɛ́ glɔ́ gbɔn? Ényí a nɔ ɖo hwɛ dó hwiɖée wɛ zɛ xwé wú hǔn, sɔ́ ayi ɖó hwɛ e Mawu nɔ sɔ́ kɛ mɛ nǔgbó nǔgbó é jí. (Ðɛh. 130:4) Ényí é sɔ́ hwɛ kɛ mɛ ɖěɖěe hwɛ yětɔn lɛ́ vɛ́ ná nǔgbó nǔgbó lɛ́ é ɔ, é nɔ d’akpá élɔ́ nú yě: ‘Un sɔ́ ná flín hwɛ e yě hú dó mì lɛ́ é ǎ.’ (Jel. 31:34) Énɛ́ ɖo xlɛ́xlɛ́ wɛ ɖɔ Jexóva kún sɔ́ ná dɔn tó nú we ɖó nǔ e a ko wa wá yi lɛ́ é wú ó. Énɛ́ wú ɔ, ma nɔ lin ɖɔ Jexóva kún sɔ́ hwɛ kɛ émí ó wɛ zɔ́n bɔ émí ɖo wǔvɛ́ lɛ́ mɔ wɛ din ó. Gɔ́ ná ɔ, ma nɔ ɖo xomɛ sin dó hwiɖée wɛ ɖó dogbó e nǔwanyido towe lɛ́ sixú ɖó nú we din lɛ́ é wú ó. Jexóva sɔ́ kpo ɖo nǔ énɛ́ e a wa nyi do é flín wɛ ǎ, hwi lɔ sɔ́ ɖó ná kpo ɖo flínflín wɛ ǎ.—Xa 1 Jaan 3:19, 20.

16. Wezunkántɔ́ lɛ́ ɖɔhun ɔ, étɛ́ mǐ ka ɖó ná tuun?

¹⁶ Ée mǐ ná ɖo gbɛ wezun ɔ kán wɛ é ɔ, mǐ ɖó ná “kán wezun ɔ gbɔn alɔkpa ɖé, bo ná dó sixú ɖu ɖ’é jí.” (1 Kɔ. 9:24) Ényí mǐ tuun vogbingbɔn e ɖo nǔ ɖěɖěe mǐ ɖó ná wa lɛ́ é kpó nǔ ɖěɖěe mǐ ɖó ná jó dó lɛ́ é kpó tɛ́ntin ɔ, mǐ sixú kpé énɛ́ wú. Ðo xóta élɔ́ mɛ ɔ, mǐ ɖɔ xó dó nǔ ɖěɖěe mǐ ɖó ná wa lɛ́ é kpó nǔ ɖěɖěe mǐ ɖó ná jó dó lɛ́ é kpó ɖé lɛ́ wú. Amɔ̌, é lɛ́ kpo nǔ ɖěvo lɛ́. Jezu ɖɔ ɖɔ mǐ sixú “sɔ́ nǔ ɖu díngan, ahan nu díngan kpó adohu adohu gbɛ ɔ tɔn kpó dó dó agban kpinkpɛn nú ayi [mǐtɔn] lɛ́.” (Luk. 21:34) Wěmafɔ énɛ́ lɛ́ kpó ɖěvo lɛ́ kpó sixú d’alɔ we, bɔ a ná tuun hǔzúhúzú e é sixú byɔ́ ɖɔ a ní bló hwenu e a ná ɖo gbɛ wezun ɔ kán wɛ lɛ́ é.

17. Aniwú mǐ ka sixú kú d’é jí ɖɔ mǐ ná ɖu ɖo gbɛ wezun e kán wɛ mǐ ɖe é jí?

¹⁷ Mǐ sixú kú d’é jí ɖɔ, mǐ ná ɖu ɖo gbɛ wezun e kán wɛ mǐ ɖe é jí, ɖó Jexóva ná ná mǐ hlɔ̌nhlɔ́n e sín hudó mǐ ɖó é. (Eza. 40:29-31) Énɛ́ wú ɔ, ma dɔn yonu dó gǔdo ó. Nɔ wa nǔ mɛsɛ́dó Pɔ́lu e dó gǎn syɛ́nsyɛ́n, bo ɖu ajɔ e è sɔ́ ɖó te n’i é sín le é ɖɔhun. (Filí. 3:13, 14) Mɛ ɖěbǔ sixú kán wezun ɔ ɖó tɛn towe mɛ ǎ, amɔ̌, kpó alɔdó Jexóva tɔn kpó ɔ, é sixú kpa we. Jexóva sixú d’alɔ we bɔ a ná w’azɔ̌ e nyí towe lɛ́ é, lobo jó nǔ e ma ɖo dandan ǎ lɛ́ é dó. (Ðɛh. 68:20) Ényí Jexóva ɖo ahwan towe mɛ ɔ, a ná kpé wú bo kán wezun ɔ kpó didɛ kpó, lobo ɖu ɖ’é jí!