1. Sünainjee tü sümakat Hebreokana 12:1, ¿kasa waaʼinrajatka süpüla wakanajüin tü ayoujirawaakat?

 SAASHIN tü Bibliakat müshii sünainkai waya wanee ayoujirawaa. Na ajaʼttirakana shia aapüneerü namüin tü kataakalü oʼuu süpüla kaʼikat süpüshuaʼa (2 Tim. 4:7, 8). Ayatüinjatü wachecherüin waaʼin sünain tü ayoujirawaakat, jama sülüʼülüin süpüla sajaʼttüin. Chi aluwataaushikai Pablo najaʼttirüin tü ayoujirawaakat otta nüküjain tü waaʼinrajatkat süpüla wakanajüin shia. Müshi nia: «Anakajaʼa müle wasünneʼerakai saaʼin woulia tü kasa jawatakat wamüin [...] sümaa wachecherüin waaʼin sünain tü ayoujirawaa niʼitaakat Maleiwa wapüleerua» (paashajeʼera Hebreokana 12:1, TNM).

2. ¿Kasa nüküjeeka achiki Pablo wanaa sümaa nümüin «Anakajaʼa müle wasünneʼerakai saaʼin woulia tü kasa jawatakat wamüin»?

² ¿Kasa nüküjeeka achiki Pablo wanaa sümaa nümüin «Anakajaʼa müle wasünneʼerakai saaʼin woulia tü kasa jawatakat wamüin»? Tü nüküjeekalü achiki shia wasünneʼerüinjatüin woulia waneirua kasa jawataka wamüin suulia sajaʼttüin waaʼin jee mapüsain waya, shia tü kasa nnojotkat choʼujaain maʼin. Süpüla müin ayatakai waaʼin sünain tü ayoujirawaakat, jülüjainjatü waaʼin jaralüin tü kasa jawatakat anaka süpüla wasünneʼeramaatüin woulia. Eepejeʼe waneirua kasa nnojoluinjatka wasünneʼerüin woulia suulia amüloulin waya (2 Tim. 2:5). Wekirajaa süchiki tia.

3. (1) ¿Kasa waaʼinrajatka waneʼewai wakua saashin Galacia 6:5? (2) ¿Kasa wekirajaainjatka anain sünain ekirajaayakat tüü? (3) ¿Jamüsü anaka wekirajaale sünain tia?

³ (Paashajeʼera Galacia 6:5, TNM). Nüküjain Pablo suluʼu tia wetsiikulokot «susouteerüin waneʼewai sukua wayuu saaʼu tü kasa saaʼinrakat». Tü nüküjeekalü achiki Pablo sükajee tia shia tü waaʼinrajatkat süpüla anain wakuwaʼipa noʼuluʼu Maleiwa, nnojotsü süpüla saainjünüin tia wooʼopünaa. Wekirajaa süchiki waneirua kasa waaʼinrajatka otta süchiki tü sukuwaʼipainjatkat watuma  süpüla wekeraajüin shia. Wekirajaajeerü anain jaralüin tü kasa jawatakat anaka süpüla wasünneʼeramaatüin woulia otta jaralüin tü anakat süpüla walüʼüjain. Waaʼinrüinjatü tia süpüla katüin woʼu otta süpüla wakanajüin tü ayoujirawaakat.

4. ¿Jamüsü nnojotka kapüleein wamüin wekeraajüin tü wamakat nümüin Jehová? (Piirakaa sümüin tü ayaakuaakat).

⁴ Wekeraaja tü wamakat nümüin Jehová. Wanaa sümaa waapüin waaʼin nümüin Jehová, waküjain nümüin waʼwaajüinjachin nümüiwaʼa otta waaʼinrüinjatüin tü keeʼireekat naaʼin. Kasataalejeseʼe wekeraajüin tia wamakat nümüin. Mayaainjeʼe kaawain tia aʼyatawaakat, nnojotsü isain wachiki. Wounteerü tia süka nukumajüin waya Jehová süpüla waaʼinrüinjatüin tü keeʼireekat naaʼin (Alat. Map. 4:11). Niʼitaain suluʼu waaʼin weʼraajeein nia. Akaʼaya joo nia, nukumajüin waya maʼaka saaʼin nukuwaʼipa. Suluʼujee tia, eeshii süpüla aleewain waya nümaa otta kamalain wamüin waaʼinrüin tü nüchekakat wapüleerua (Sal. 40:8). Waaʼinrüle tü keeʼireekat naaʼin Jehová otta washatüle nukuwaʼipa chi Nüchonkai, jimateerü waaʼin (Mat. 11:28-30).

5. ¿Kasa paaʼinrajatka süpüla pikeraajüin tü pümakat nümüin Jehová? (1 Juan 5:3).

 ⁵ ¿Kasa paaʼinrajatka süpüla pikeraajüin tü pümakat nümüin Jehová? Pükooʼomüinra naalin Jehová püpüla. Jülüjale paaʼin süpüshuaʼa tü naaʼinrakat püpüleerua otta tü kasa anasü piʼreetkat mapeena, akooʼomüinraajeerü naalin püpüla. Aire maʼin püpüla chi Maleiwakai, mapüleejeerü pümüin poonooin sümaa nünüiki (paashajeʼera 1 Juan 5:3). Püshata nukuwaʼipa Jesús. Nuuntuin Jesús nikeraajüin tü keeʼireekat naaʼin Maleiwa nüpüleerua süka nuchuntuin kaalinwaa nümüin otta süka naaʼinmaain tü kasa anasü niʼreetkat nutuma (Heb. 5:7; 12:2). Maʼaka naaʼinrüin shia Jesús, puchunta katsüinwaa aaʼin nümüin Jehová otta paaʼinmaa kateerüin poʼu süpüla kaʼikat süpüshuaʼa. Pükooʼomüinrüle naalin Jehová püpüla otta püshatüle nukuwaʼipa chi Nüchonkai, shiimainshaata pikeraajeerüin tü pümakat nümüin Jehová.

6. ¿Jamüsü anaka waaʼinrüle waneʼewai wakua tü achuntunakat wamüin süpüleerua wapüshi? (Piirakaa sümüin tü ayaakuaakat).

⁶ Waaʼinrajatka süpüleerua wapüshi. Sünain tü ayoujirawaa antirüinjanakat waya sünainmüin tü kataakalü oʼuu, alanaʼaleeinjatü naalin Jehová otta Jesús wapüla suulialeʼeya naalin wapüla na wapüshikana (Mat. 10:37). Nnojotpejeʼe mojutuyaainjatüin wamüin tü wakuwaʼipakat sümaa wapüshi. Talateere naaʼin Maleiwa otta Jesús watuma, waaʼinrüinjatü tü nachuntakat wamüin süpüleerua wapüshi (1 Tim. 5:4, 8). Waaʼinrüle tia, talateena maʼin waya. Nukumajüin Jehová na wayuukana süpüla aijiraainjanain jee kojutujiraainjanain sümaa naʼwayuuse otta müsia süpüla alinjanain nachonnii napüla sümaa nekirajüinjanain naya. Nukumajüin Jehová na tepichikana süpüla noonooin sümaa nanüiki nashi jee sünüiki nei (Éf. 5:33; 6:1, 4).

7. ¿Kasa paaʼinrajatka süpüla pikeraajüin tü nuchuntakat Maleiwa pümüin?

⁷ ¿Kasa naaʼinrajatka na kaʼwayuuseshiikana otta na tepichikana? Kaʼwayuusere jia otta tepichire jia, kachiirua jaaʼin jaaʼinrüin tü sümakat tü Bibliakat. Nnojo juʼunuin süchiirua tü anakat neʼe saaʼin jümüin, nnojo juʼunuin süchiirua sukuwaʼipa wayuu otta süchiirua tü namakat na atüjashiikana naaʼinruʼu (Prov. 24:3, 4). Suluʼu tü karaloʼuta wamaʼanakat, puusüteerü anain pütchiirua jalouijeetka pümüin süpüla paaʼinrüin tü sümakat tü Bibliakat. Suluʼu tü pütchikat «Ayuda para las familias» ojuʼitaka suluʼu jw.org, b eesü pütchi jalouijeetka namüin na kaʼwayuuseshiikana, namüin na kachonshiikana otta namüin na tepichikana. Nekirajaale sünain tia, natüjaajeerü aaʼu tü naaʼinrajatkat soʼunnaa wanee kasa. Kachiirua paaʼin paaʼinrüin tü sümakat tü Bibliakat, jaʼitashi piain aaʼinrüin tia pümüiwaʼa. Piʼreetkalaka anain nakuwaʼipa na püpüshikana pünainjee otta anakuwaʼipaleechi pia nutuma Jehová (1 Ped. 3:1, 2).

8. ¿Kasa weʼreetka suluʼujee tü kasa waneekakat?

⁸ Tü weʼrakat sünainjee tü waneekakat. Nuuʼulaain waya Jehová waneeküin süka waaʼin wamüiwaʼa tü waaʼinrajatkat. Niʼreein waya suluʼu anain wakuwaʼipa sünainjee tü kasa waneekakat. Nnojoliipejeʼe naaʼinmajüin waya suulia weʼrüin wamüliala saaʼu tü kasa mojusü waneekakat (Gal. 6:7, 8). Mayaainjeʼe mojuin waaʼin sutuma nnojoluin anain tü waneekakat, sutuma nnojoluin wayaawatüin saaʼu wanüiki otta sutuma washapajaain sünain aaʼinraa wanee kasa, watüjaa aaʼu wasouteenain saaʼu tia. Sutuma watüjaain saaʼu tia, eesü süpüla waküjain süchiki tü kasa mojusü waaʼinrakat, eesü süpüla wanouteʼerüin wakuwaʼipa otta wachajaale maʼin sukuwaʼipa süpüla nnojoluin waaʼinrüin tia piantua. Waaʼinrüle  tia, ayateena waya sünain tü ayoujirawaa antirüinjanakat waya sünainmüin tü kataakalü oʼuu.

9. ¿Kasa paaʼinrajatka mojule putuma tü kasa püneekakat? (Piirakaa sümüin tü ayaakuaakat).

⁹ ¿Kasa paaʼinrajatka suulia mojuin maʼin paaʼin saalinjee tü kasa mojusü püneekakat? Nnojo jülüjakuʼu müin paaʼin tü kasa mojusü paaʼinrüitpakat, jama isaitpain püchiki punouteʼerüin shia. Nnojo paapüin paaʼin sümüin tü mojuukalü aaʼin. Nnojo piʼitaain naaʼu na waneinnua nayain kasirüin tü alatakat pümüin otta nnojo kanüikiyaain pia saaʼujee tü paaʼinrakat. Anasü maʼin piyaawatüle saaʼu piain kasirüin tü alatakat pümüin otta püchajaa maʼin sukuwaʼipa süpüla punouteʼerüin shia. Mojule maʼin paaʼin saalinjee tü kasa paaʼinrakat, puʼuraaja nümüin Jehová, püküja nümüin tü mojukat putuma otta puchunta nümüin motoiwa naaʼin paainjala (Sal. 25:11; 51:3, 4). «Nnojotsü taaʼinjeein tia», püma namüin na wayuu airuʼutkana pünüiki namüin. Isalejeʼe maʼin püchiki punouteʼerüin tia, puchunta kaalinwaa namüin na laülaashiikana (Sant. 5:14, 15). Pütüja sünainjee tü kasa mojukuwaʼipatkat putuma otta eeja paaʼin suulia paaʼinrüin shia süchikuaʼa. Nükaalinjeechi pia Jehová otta nümüliajeechi pia (Sal. 103:8-13).

10. ¿Jamüsü mojeetka waaʼin waʼyataale süchiirua wanee kasa isaka wachiki? (Galacia 6:4).

¹⁰ Tü kasa isakat wachiki. Mojeerü waaʼin wayoujireʼerüle wakuwaʼipa namaa na waneinnua (paashajeʼera Galacia 6:4, TNM). Kiʼrale waya sünain aaʼinraa tia, eeshii süpüla wootüin na waneinnua sünain aaʼinraa tia wamaa otta kachumüraliijeena waya (Gal. 5:26). Wanaaweere tü wountakat sümaa tü nountakat na waneinnua, eesüjaʼa süpüla waʼyataain süchiirua waneirua kasa iseetka wachiki. Mojusü maʼin saaʼin wayuu sutuma nnojoluin shikeraajüin shiʼrüin tü kasa saʼatapajakat, shialeekajaʼa isale süchiki saaʼinrüin wanee kasa (Prov. 13:12). Müle wakuwaʼipa mayaa, eesü süpüla sümalajaain waaʼin otta sajaʼlajaain waaʼin suulia tü ayoujirawaakat (Prov. 24:10).

11. ¿Kasa paaʼinrajatka suulia piʼyataain süchiirua kasa iseetka püchiki?

¹¹ ¿Kasa paaʼinrajatka suulia piʼyataain maʼin süchiirua waneirua kasa iseetka püchiki? Nnojo piʼyataain maʼin süchiirua waneirua kasa nnojotka nuchuntuin Jehová pümüin. Nnojotsü nuchuntuin Jehová pümüin wanee kasa iseetka püchiki (2 Cor. 8:12). Nnojo shapaain paaʼin, nnojoleerü niyoujireʼerüin Jehová tü paaʼinrakat sümaa tü naaʼinrakat na waneinnua (Mat. 25:20-23). Kojutusü maʼin nümüin tü paaʼinrakat nüpüleerua, maʼaka saaʼin piʼyataain nümüin süka süpüshuaʼa paaʼin, waneepiain pia nümaa otta süka püchecherüin paaʼin. Piyaawatüle saaʼu tü kasa isakat püchiki, pütüjaweerü aaʼu tü eekat süpüla puuntuin maaʼulu wanaapünaa sümaa pukuwaʼipa. Püshata nukuwaʼipa Barzilái, nnojo paapaain wanee aʼyatawaa iseerüle püchiki paaʼinrüin sutuma ayuulin pia (2 Sam. 19:35, 36). Püshata nukuwaʼipa Moisés, ana pümüin pükaalinjünüin otta paapa aʼyatawaa namüin na waneinnua (Éx. 18:21, 22). Piyaawatüle saaʼu tü isakat püchiki, nnojoleechi pia aʼyataain süchiirua kasa iseetka püchiki, tü ajaʼtteetkalü atuma paaʼin suulia ayatüin piyoujiraain.

12. ¿Wayache kasitka tü kasa mojusü naneekakat na waneinnua?

¹² Mojule waaʼin sutuma jülüjain waaʼin wayain kasirüin tü kasa mojusü naneekakat na waneinnua. Nnojoishii wayainjanain aneeküin nooʼopünaa na waneinnua tü naaʼinrajatkat otta nnojoishii süpüla waaʼinmajüin naya suulia neʼrüin namüliala saaʼujee tü naaʼinrakat. Jamüshijaʼa nuuʼulaale wanee jüchon suulia aʼyatawaa nümüin Jehová, eesüjaʼa mojule jaaʼin saalinjee tia. Jülüjale jaaʼin jiain kasirüin tü kasa mojusü nüneekakat chi jüchonkai, meerü joʼotokoi jaaʼu wanee kasa jawataka maʼin, tü wasünneʼerüinjatkat woulia naashin Jehová (Roma 14:12).

13. ¿Kasa jaaʼinrajatka mojule tü kasa nüneekakat wanee jüchon?

 ¹³ ¿Kasa jaaʼinrajatka suulia jülüjakuʼu müin jaaʼin jiain kasirüin tü kasa nüneekakat chi jüchonkai? Soto jaaʼin, nuuʼulaain Jehová waneeküin süka waaʼin wamüiwaʼa tü waaʼinrajatkat. Nuuʼulaain waneeküin waʼyataainjanale jee nnojoliinjanale waʼyataain nümüin. Nütüjaa aaʼu Jehová nnojoluin lotuin maʼin jukuwaʼipa. Tü keeʼireekat naaʼin jüpüleerua shia anainjatüin sukuwaʼipa jutuma nepijia jüchonnii. Nuuʼulaale wanee jüchon suulia aʼyatawaa nümüin Jehová, niainjachi asoutaka saaʼu tia, nnojoishii jiainjanain jiakana (Prov. 20:11). Eesüjaʼa ayatüle jülüjain jaaʼin nnojoluin anain jukuwaʼipa jutuma nipijia jüchon. Müle tia, jüküja nümüin Jehová jamüin jaaʼin otta juchunta nümüin motoiwa naaʼin tü mojukat jutuma. Nütüjaa aaʼu Jehová isaitpain jüchiki junouteʼerüin tü alatüitpakat. Nütüjaa aaʼu Jehová nnojoluin süpüla jaaʼinmajüin chi jüchonkai suulia niʼrüin nümüliala saaʼujee tü kasa naaʼinrakat. Niyaawajaale chi jüchonkai suulia tü naaʼinrakat, nümüliajeechi nia Jehová (Luc. 15:18-20).

14. ¿Jamüsü wooʼulaainjatka suulia mojukuʼu müin waaʼin saalinjee waainjala?

¹⁴ Ayatüle mojuin waaʼin saalinjee waainjala. Mojusü waaʼin kaainjarale waya. Nnojotpejeʼe keeʼireein naaʼin Jehová ayatüinjatüin mojukuʼu müin waaʼin saalinjee tia. Anasü wasünneʼerüle shia woulia. Waküjale süchiki waainjala sümaa wayaawajaain suulia otta eejüle waaʼin suulia waaʼinrüin shia piantua, anasü jülüjale waaʼin motuitpain shia naaʼin Jehová (Aluw. 3:19). Nücheküin Jehová nnojoluinjatüin jülüjakuʼu müin waaʼin tü kasa mojusü waaʼinrapuʼukat, jama nütüjaain saaʼu eein süpüla mojuin wakuwaʼipa sutuma (Sal. 31:10). Ayatüle mojukuʼu müin waaʼin saalinjee waainjala, eesü süpüla sümalajaain waaʼin otta wooʼulaain suulia tü ayoujirawaa antirüinjanakat waya sünainmüin tü kataakalü oʼuu (2 Cor. 2:7).

15. ¿Kasa paaʼinrajatka suulia mojukuʼu müin paaʼin saalinjee paainjala? (1 Juan 3:19, 20; piirakaa sümüin tü ayaakuaakat).

¹⁵ ¿Kasa waaʼinrajatka suulia mojukuʼu müin waaʼin saalinjee waainjala? Ayatüle mojuin waaʼin saalinjee waainjala, anasü jülüjale waaʼin  motuitpain shia naaʼin Jehová (Sal. 130:4). Müshi Jehová nümüin chi wayuu ayaawajaakai suulia naainjala: «Nnojorüleejeeria sotuin taaʼin tü kasa mojusü naainjakat» (Jer. 31:34). Tü wayaawatakat sünainjee tia pütchikat shia nnojoluin jülüjakuʼu müin naaʼin Jehová tü waainjalakat motopa shia naaʼin. Mayaainjeʼe niʼreechin nümüliala chi kaainjalakai, nnojotsü anain jülüjale naaʼin nnojoluin motuin naaʼin Jehová tü naainjalakat. Amülouire piʼyataain suluʼu tü outkajaaleekat saalinjee wanee kasa paaʼinraka, nnojo piyüülajaain. Motule naaʼin Jehová paainjala, anasiaʼaya motule shia paaʼin (paashajeʼera 1 Juan 3:19, 20).

16. ¿Kasa eejüinjatka oulia waaʼin süpüla wakanajüin tü ayoujirawaakat?

¹⁶ Anuu tü waaʼinrajatkat süpüla saapünüinjatüin wamüin tü kataakalü oʼuu: «Shiakalaka anain aluʼu juwataale shiiʼiree jükanajüinjanain» (1 Cor. 9:24, TNM). Süpüla wountuin tia, watüjaainjatü aaʼu jaralüin tü kasa jawatakat nnojoluinjatka wasünneʼerüin woulia otta jaralüinjatüin tü wasünneʼerüinjatkat woulia. Sünain ekirajaayakat tüü, wekirajaaitpa anain soʼutku neʼe tia. Nüküjain Jesús eejüinjatüin waaʼin suulia waaʼinmaain maʼin wainmainjatüin weküin, suulia miyoʼuinjatüin wasüin otta suulia waaʼinmaain maʼin tü kasa alatawaikat wamüin (Luc. 21:34). Sutuma wetsiikulokot tia jee suluʼu waneirua wetsiikulo, wayaawata aaʼu tü wanouteʼerüinjatkat sünain wakuwaʼipa süpüla wakanajüin tü ayoujirawaa antirüinjanakat waya sünainmüin tü kataakalü oʼuu.

17. ¿Jamüsü watüjaaka maʼin saaʼu wakanajeerüin tü ayoujirawaa antirüinjanakat waya sünainmüin tü kataakalü oʼuu?

¹⁷ Watüjaa maʼin aaʼu eein süpüla wakanajüin tü ayoujirawaakat süka ayateerüin nükatsüinrüin waaʼin Jehová wajaʼttiraleepa shia (Is. 40:29-31). Ayataʼaya waʼyataain süchiirua süpüla naapüinjatüin wamüin Maleiwa tü kasa anasükat maʼaka niʼyataain süchiirua tia chi aluwataaushikai Pablo (Filip. 3:13, 14). Mayaainjeʼe nnojolin eein wanee wayuu eekai süpüla niyoujiraain pooʼopünaa, nükaalinjeechi pia Jehová sünain awatawaa. Nükaalinjeechi pia sünain alüʼüjaa tü kasa choʼujaakat pümüin otta süpüla püsünneʼerüin puulia tü nnojotkat choʼujaain (Sal. 68:19). Sutuma nükaalinjain pia, puunteerü püchecherüin paaʼin sünain tü ayoujirawaakat pükanajaleepa shia.