1. Hebre 12:1 hku nga yang, asak gat shingjawng poi hta bandung du lu hkra hpa galaw ra na kun?

 HKRISTAN prat hkrun lam hpe gat shingjawng poi hte Chyum Laika hta shingdaw da ai. Bandung du hkra gat ai ni gaw htani htana asak lu na re. (2 Tm 4:7, 8) Bandung du na grai ni sai majaw, n-gun shadat nna matut gat ra ai. Asak gat shingjawng poi hta, bandung du hkra gat wa ai kasa Pawlu gaw, bandung du hkra karum ya na lam hpe tsun dan ai. “Numdaw numdan re ai lit nlang . . . kau da nna, . . . gat na matu san da ai lam hpe shakut sharang rai, gat shadu wa ga” ngu nna n-gun jaw da ai.—Hebre 12:1 hpe hti u.

2. “Numdaw numdan re ai lit nlang . . . kau da” ngu ai lachyum gaw hpa rai kun?

² “Numdaw numdan re ai lit nlang . . . kau da” ra ai ngu Pawlu tsun ai. Hkristan ni hpa lit mung n gun ra sai ngu tsun mayu ai kun? N re. N ra ai lit ni hpe kau da na matu tsun nga ai re. Dai n ra ai lit ni gaw gat lanyan shangun chye ai. Masha hpe mung pu ba shangun ai. Dai majaw, hkamjan let gat lu na matu numdaw numdan byin shangun ai lit ni gun nga ai kun? ngu ai hpe alawan chye hkra galaw ra ai. Alawan kau da ra ai. Raitim, gun ra na lit ni hpe n kau da hkrup na matu gaw sadi ra ai. Gun ra na lit hpe kau da hkrup yang, shingjawng poi tara hte nhtan shai mat na re. (2 Tm 2:5) Dai lit ni gaw hpa ni kun?

3. (a) Galati 6:5 hku nga yang, hpa lit hpe gun ra na kun? (b) Ndai sumhpa hta hpa lam bawngban na kun? Hpa majaw kun?

 ³ Galati 6:5 hpe hti u. Gun ra na lit langai hpe Pawlu tsun dan ai. “Langai hte langai gaw tinang a lit gun hpai shajang” ra ai ngu tsun ai. Karai Kasang gun shangun ai lit, tinang nan gun ra na lit hpe tsun nga ai re. “Tinang a lit” ngu ai hta hpa ni lawm ai kun? Gara hku gun ra na kun? Gun hkrup chye ai n ra ai lit ni gaw hpa ni kun? Gara hku kau da ra na kun? ngu ai hpe ndai sumhpa hta bawngban na re. Tinang gun ra na lit hpe gun ai, n ra ai lit ni hpe kau da ai gaw, gat shingjawng poi hta bandung du hkra gat na matu karum ya na re.

4. Apnawng hkalup hkam ai ga shaka gaw hpa majaw grai li ai lit n re ai kun? (Sumla hpe mung yu u.)

⁴ Apnawng hkalup hkam ai ga shaka. Yehowa hpe tinang hkum tinang apnawng ai shaloi, Karai Kasang hpe nawku na, shi a myit ra ai lam hpe galaw na ngu ga sadi jaw wa ai. Dai ga sadi grin ra ai. Ga sadi hte maren nga ai gaw lit kaba raitim, grai li ai lit gaw n re. Anhte  hpe Yehowa hpan da ai gaw, shi a myit ra ai hpe galaw na matu re. (Shr 4:11) Shi hpe nawku mayu ai myit nga hkra bang da ya nna, shi a hkrang sumla hte maren hpan da ai. Dai majaw, shi a myit ra ai hpe galaw ai shaloi, shi hte hku hkau wa ai. Pyaw wa ai. (Shk 40:8) Yehowa a myit ra ai lam hpe galaw ai, shi Kasha a hpang hkan ai gaw, “ban sa” lam lu shangun ai.—Mat 11:28-30.

5. Apnawng hkalup hkam ai ga shaka grin na matu hpa gaw karum ya ai kun? (1 Yawhan 5:3)

⁵ Dai lit hpe gara hku gun na? Lam lahkawng gaw karum ya lu ai. Langai, Yehowa hpe grau tsawra wa hkra galaw u. Tinang a matu shi galaw ya wa ai ni, naw galaw ya na lam ni hpe myit ai hku nna, shi hpe grau tsawra wa hkra galaw lu ai. Grau tsawra yang, Karai a ga madat na matu loi wa na re. (1 Yawhan 5:3 hpe hti u.) Lahkawng, Yesu hpe kasi la u. Karum shingtau lu hkra Yehowa kaw akyu hpyi ai majaw, lu na kumhpa hpe galoi mung myit maju jung ai majaw, Karai a myit ra ai lam hpe Yesu awng dang let gun hpai lu wa ai. (Heb 5:7; 12:2) Dai majaw, Yesu zawn n-gun atsam lu na matu Karai Kasang kaw hpyi u. Htani htana asak myit mada lam hpe myit maju jung nga u. Karai Kasang hpe grau tsawra wa yang, Kasha hpe kasi la yang, apnawng hkalup hkam ai ga shaka grin na matu loi na re.

6. Dinghku lit hpe hpa majaw gun ra ai kun? (Sumla hpe mung yu u.)

⁶ Dinghku lit. Asak gat shingjawng poi hpe gat ai shaloi, kanu kawa, jinghku jingyu ni hta na Yehowa hte Yesu hpe grau tsawra ra ai. (Mat 10:37) Raitim, dinghku lit ni gaw dingbai dingna jaw ai zawn re ai majaw, lit ni hpe n gun ai sha n mai nga ai. Karai Kasang hte Hkristu a sharawng awng ai lam lu mayu yang, dinghku lit ni hpe kangka hkra gun hpai ra ai. (1 Tm 5:4, 8) Rai yang she, anhte grau pyaw na re. Madu jan hte madu wa shada tsawra hkungga ai shaloi, kasha ni hpe kanu kawa ni tsawra myit hte sharin ya ai shaloi, kanu kawa ni a ga hpe kasha ni madat ai shaloi, kun dinghku ngwi pyaw na hpe Yehowa chye ai majaw re.—Ehp 5:33; 6:1, 4.

7. Dinghku hta tinang a lit hpe gara hku kangka hkra galaw mai ai kun?

⁷ Dai lit hpe gara hku gun hpai na? Nang gaw, madu wa rai rai, madu jan rai rai, kasha rai rai, Chyum Laika lam matsun hpe kam u. Hkamsha lam, htung hking lailen ni a hpang hkum hkan. Grai chye dum ai zawn galaw ai ni a tsun ai ga hpe hkum madat. (Gsh 24:3, 4) Chyum Laika hta madung tawn ai laili laika ni kaw na akyu lu hkra galaw u. Dai ni hta, Chyum npawt tara ni hpe gara hku tatut hkan sa ra na ngu ai hpaji jaw ga ni lawm ai. Ga shadawn, “Dinghku A Matu Karum Shingtau” (Myen) ngu ai daw matut sumhpa ni hta dinghku num la, kanu kawa, ramma ni a matu hpaji jaw ga ni lawm ai. b Chyum Laika hta tsun da ai lam ni hpe nta masha ni n hkan sa yang pyi, nang hkan sa na matu dawdan da u. Rai yang, na a dinghku akyu lu na, nang mung Yehowa a shaman chyeju lu na re.—1 Pe 3:1, 2.

8. Dawdan lam ni gaw tinang hpe gara hku akyu shabyin ya lu ai kun?

⁸ Dawdan lam a majaw lu wa na akyu ni. Wanglu wanglang lata nna dawdan lu ai ahkang anhte hpe Yehowa jaw da ai. Kaja ai  dawdan lam jahkrat nna pyaw nga ai hpe shi mu mayu ai. Raitim, shut ai hku dawdan hkrup ai majaw, hkra machyi ai lam ni hkrum ai shaloi n makawp maga ya ai. (Gal 6:7, 8) Dai majaw, shut ai dawdan lam ni jahkrat hkrup ai shaloi, n myit yu ai sha tsun hkrup galaw hkrup ai shaloi, hkra machyi ai lam hpe tinang nan hkamsha ra na re. Mara nga ai zawn hkamsha chye ai. Raitim, tinang a dawdan lam hpe lit la ra na ngu ai hpe chye ai myit gaw akyu nga ai. Mara hpe yin la na matu, sharai na matu, kahtap nna bai n galaw na matu karum ya ai majaw re. Rai yang, asak gat shingjawng poi hta matut gat lu na re.

9. Shut ai hku dawdan hkrup yang hpa galaw lu ai kun? (Sumla hpe mung yu u.)

⁹ Dai lit hpe gara hku gun hpai na? Shut ai hku dawdan hkrup ai majaw byin wa ai masa hpe hkap la u. Lai wa sai aten hpe n lu galai shai sai hpe hkap la u. Tinang shut ai hpe lawt ga tsun nna, tinang hkum tinang (sh) kaga ni hpe mara shagun let aten hte n-gun atsam hkum shama kau. Tinang a mara hpe hkap la u. Ya galaw lu ai hpe kaja htum galaw u. Mara a matu myit malai lu yang, Yehowa kaw shagrit shanem let akyu hpyi nna, mara hpe yin la u. Mara raw ya na matu hpyi shawn u. (Shk 25:11; 51:3, 4) Tinang galaw shut wa ai masha ni hpe tawngban u. Ra ang yang, myitsu salang ni hpe karum hpyi u. (Yak 5:14, 15) Shut ai lam kaw na sharin la u. Bai n galaw hkrup hkra shakut u. Rai yang, Yehowa matsan dum la na, ra ai hku madi shadaw ya na hpe kam mai ai.—Shk 103:8-13.

10. Tatut n re ai lam ni hpe myit mada ai gaw hpa majaw grai li ai lit rai kun? (Galati 6:4)

¹⁰ Tatut n re ai lam ni hpe myit mada ai. Kaga ni hte hkan shingdaw ai gaw, tinang hkrai lit shali la ai re. (Galati 6:4 hpe hti u.) Aten tup shingdaw taw yang, manawn ai, shingjawng mayu ai myit ni nga wa na re. (Gal 5:26) “Myit mada ala jin yang, myit daw wa na ra ai” ngu Chyum Laika hta tsun da ai. (Gsh 13:12) Tatut byin mai ai lam ni hpe pyi, grai na hkra myit mada ra yang, myit daw wa chye ai rai yang, tatut n re ai lam ni hpe myit mada ai gaw, grau pyi myit daw shangun chye ai. Myit pu ba nna, asak gat shingjawng poi hta gat lanyan shangun chye ai.—Gsh 24:10.

11. Tatut n re ai lam ni myit mada ai hpe koi lu hkra hpa gaw karum ya lu ai kun?

¹¹ Dai lit hpe gara hku kau da ra na kun? Tinang kaw na Yehowa n hpyi shawn ai lam ni hpe tinang hkrai hkum hpyi shawn. N dang di ai hpe Karai Kasang n hpyi shawn ai. (2 Ko 8:12) Nang hpe kaga ni hte n shingdaw ai. (Mat 25:20-23) Nang myit masin mahkra hte magam gun ai, nang sadi dung ai, nang hkamjan lu ai hpe shi manu shadan ai. Asak aprat, hkamja lam hte kaga masa ni a majaw galaw mayu ai daram n lu galaw ai hpe shagrit shanem let hkap la u. Hkam n kaja ai shaloi, asak grai kaba wa ai shaloi, Barazili zawn laksan ahkaw ahkang ni hpe sharawng awng let nyet kau u. (2 Sa 19:35, 36) Mawshe zawn kaga ni a karum shingtau hpe hkap la u. Mai byin yang lit garan ya u. (Pru 18:21, 22) Shagrit shanem yang, tatut n re ai lam ni hpe myit mada ai majaw, asak gat shingjawng poi hta n-gun yawm ai baw n byin sai.

12. Kaga ni a shut ai dawdan lam ni a matu tinang gaw lit nga ai kun? Sanglang dan u.

¹² Kaga ni a shut ai dawdan lam ni a matu tinang gaw lit nga ai ngu hkamsha ai. Kaga ni a matu anhte n mai dawdan ya ai. Shanhte shut ai hku dawdan hkrup ai majaw, hkra machyi ai lam ni n hkrum hkra, ayan na makawp  maga ya lu na n re. Ga shadawn, tinang a kasha langai Yehowa hpe matut n nawku mat ai shaloi, kanu kawa ni grai hkamsha chye ai. Raitim, kasha ni shut ai hku dawdan ai majaw tinang hkum tinang mara shagun nga ai gaw lit shali la ai re. Dai gaw, Yehowa gun shangun mayu ai lit n re.—Rom 14:12.

13. Kasha ni shut ai hku dawdan ai shaloi kanu kawa ni hpa galaw mai ai kun?

¹³ Dai lit hpe gara hku kau da na? Wanglu wanglang dawdan lu ai ahkang anhte yawng hpe Yehowa jaw da ai hpe dum u. Karai Kasang gaw kadai hpe raitim, tinang sa ra na lam hpe tinang nan lata na ahkang jaw da ai. Dai hta, Karai Kasang hpe nawku na, n nawku na ngu ai hpe lata ai lam lawm ai. Nang gaw hkum tsup ai kanu kawa n re ai hpe Yehowa chye ai. Dang lu ai made shakut ai hpe sha myit mada ai. Kasha ni lata ai hpe kasha ni sha lit la ra na re. Nang n re. (Gsh 20:11) Raitim, tinang hta mara nga ai ngu hkamsha nga yang Yehowa hpe tsun dan u. Mara raw ya na matu hpyi shawn u. Lai wa sai aten hpe n mai galai shai ai hpe Karai Kasang chye ai. Maga mi hta mung, kasha ni gaw shanhte hkai ai hte maren dan la ra nga ai hpe, tinang a majaw re ngu hkam la taw ai hpe Yehowa n ra ai. Na kasha bai myit kayin wa yang, kabu gara hte hkap la ya na re.—Luk 15:18-20.

14. Tinang hkum tinang ladu lai mara shagun nga ai hpe hpa majaw kau da ra ai kun?

¹⁴ Tinang hkum tinang ladu lai mara shagun ai. Mara galaw ai majaw mara nga ai ngu hkamsha chye ai. Raitim, tinang hkum tinang ladu lai mara shagun ai baw Karai Kasang n byin shangun mayu ai. Kau da ra na lit hta dai lawm ai. Tinang hkum tinang ladu lai mara shagun nga ai kun? ngu ai hpe gara hku chye lu ai kun? Gaja nga yang, mara hpe yin la ngut sai, myit malai lu ngut sai, mara bai n galaw sai nga yang, Karai Kasang mara raw ya ai hpe kam mai sai. (Kas 3:19, 20) Mara nga ai ngu Karai Kasang n hkamsha shangun mayu sai. Dai zawn hkamsha ai gaw shoihpa nga ai hpe  chye ai majaw re. (Shk 31:10) Asak gat shingjawng poi hta anhte asum jaw hkrup chye ai.—2 Ko 2:7.

15. Ladu lai hkra mara n shagun na matu hpa gaw karum ya lu ai kun? (1 Yawhan 3:19, 20) (Sumla hpe mung yu u.)

¹⁵ Dai lit hpe gara hku kau da na? Tinang hkum tinang ladu lai mara shagun nga yang, Karai Kasang gaw “mara hpe raw dat kau ya” ai ngu ai hpe myit maju jung u. (Shk 130:4) Myit majing hte myit malai lu ai ni a “yubak hpe bai dum ya na ni ai, n rai” ngu ga sadi jaw da ai. (Yer 31:34) Mara raw ya ngut sai nga yang, dai hpe bai alun ai baw n galaw sai ngu ai lachyum re. Dai majaw, tinang a mara a majaw hkra machyi ai lam ni hkrum nga ai hpe, Karai Kasang mara n raw ya ai ngu hkum mu. Mara a majaw laksan ahkaw ahkang ni tat kau ra ai rai yang mung, tinang hkum tinang mara hkum shagun. Na a mara ni hpe Yehowa malap kau sai majaw, nang mung malap kau u.—1 Yawhan 3:19, 20 hpe hti u.

16. Asak gat shingjawng poi hta gat ai ni hpa hpe chye da ra ai kun?

¹⁶ Asak gat shingjawng poi hta gat ai shaloi, “kumhpa . . . lu la hkra gat shingjawng” ra ai. (1 Ko 9:24) Gara lit hpe gun ra na, gara lit hpe kau da ra na hpe atsawm ginhka chye yang, dai zawn gat lu ai. Ndai sumhpa hta, gun ra na lit, kau da ra na lit nkau mi hpe sha tsun dan da ai. Kaga lam ni naw nga ai. “Lu lai sha lai ai, chyaru nang ai, dinghta ga myit ru myit tsang ai hte nanhte a myit masin li nga” chye ai ngu Yesu tsun ai. (Luk 21:34) Asak gat shingjawng poi hta gat ai shaloi, gara lit hpe gun ra na, gara lit hpe kau da ra na ngu ai hpe ginhka chye na matu, dai chyum daw ni hte kaga chyum daw ni gaw karum ya lu ai.

17. Asak gat shingjawng poi hta kumhpa lu na hpe hpa majaw kam mai ai kun?

¹⁷ Ra nga ai n-gun atsam Yehowa jaw na re ai majaw, asak gat shingjawng poi hta kumhpa lu na hpe kam mai ai. (Esa 40:29-31) Dai majaw, asum hkum jaw. Kumhpa lu hkra shakut wa ai kasa Pawlu hpe kasi la u. (Hpl 3:13, 14) Ndai gat shingjawng poi hpe na a malai kadai mung gat ya lu na n re. Raitim, gun ra na lit hpe gun nna, kau da ra na lit hpe kau da na matu Yehowa karum ya lu ai. (Shk 68:19) Yehowa gaw na maga hta nga yang, kumhpa lu ai du hkra nang hkamjan let gat lu na re.