TƆM ÑƲƲ ŊGƲ ÐƖKPƐLƖKƖƔ YƆ 36
Sɩɣlɩ mbʋ pɩpɔzʋʋ yɔ, nɛ ŋlɔ mbʋ pɩkazaa yɔ
«Iyele ɖɔɖɔ nɛ ɖɩlɔ sʋʋtʋ kpeekpe . . . , nɛ ɖise seya wena pasɩ ɖɛ-ɛsɩndaa yɔ nɛ laŋɩyɛ ɖɔkʋʋ.»—EBR. 12:1.
HENDU 33 Sʋʋ Yehowa ña-sʋʋtʋ
LƖMAƔZA SƆSƆNA a
1. Ɛzɩ Ebree mba 12:1 yɔɔdʋʋ yɔ, ɛbɛ pɩpɔzʋʋ se ɖɩla nɛ ɖɩtɛ wezuu seya?
BIBL kpaɣ ɖa Krɩstʋ mba ɖe-wezuu caɣʋ nɛ kɩmaɣzɩnɩ seya. Seyaa mba peseɣ nɛ pɛtɛ seya yɔ pakaɣ-wɛ haʋ wezuu maatɛŋ. (2 Tim. 4:7, 8) Pɩpɔzʋʋ se ɖɩla mbʋ payɩ ɖɩpɩzɩɣ yɔ nɛ ɖiwolo seya yɔɔ mbʋ pʋyɔɔ yɔ seya ana awɩzɩ tɛm. Apostoloo Pɔɔlɩ se wezuu seya nɛ ɛtɛm-yɛ camɩyɛ; ɛyɔɔdɩ mbʋ pɩkaɣ-ɖʋ sɩnʋʋ nɛ ɖɩtɛ seya ana yɔ pɩ-tɔm. Eheyi-ɖʋ se: «Ðɩlɔ sʋʋtʋ kpeekpe . . . , nɛ ɖise seya wena pasɩ ɖɛ-ɛsɩndaa yɔ nɛ laŋɩyɛ ɖɔkʋʋ.»—Kalɩ Ebree mba 12:1.
2. Ye pɔtɔm se «ɖɩlɔ sʋʋtʋ kpeekpe» yɔ, pʋ-tɔbʋʋ lɛ suwe?
2 Pɔɔlɩ maʋ se pɩwɛɛ se «ɖɩlɔ sʋʋtʋ kpeekpe» yɔ, ɛzɩ ɛcaɣ ɛyɔɔdɩ se sʋʋtʋ natʋyʋ fɛyɩ se Krɩstʋ tʋ ɛsɩɣlɩ? Aayɩ, pɩtɩkɛ ndʋ ɛcaɣ yɔɔdʋʋ. Ɛlɛ ɛcaɣ ɛyɔɔdɩ se ɖɩlɔ sʋʋtʋ ndʋ payɩ tɩ-tɔm tɩcɛyɩ yɔ. Sʋʋtʋ ndʋ, tɩpɩzɩɣ nɛ tɩpɩsɩnɩ-ɖʋ nɛ wayɩ nɛ tiyele nɛ pɩnɩɩ-ɖʋ. Pɩsa nɛ ɖɩɖɔkɩ ɖa-laŋɩyɛ lɛ, pɩpɔzʋʋ se ɖɩtɩlɩ sʋʋtʋ ndʋ payɩ tɩ-tɔm tɩcɛyɩ nɛ tɩpɩzɩɣ nɛ tɩpɩsɩnɩ-ɖʋ nɛ wayɩ yɔ lɛɛ lɛɛ nɛ ɖɩlɔ-tʋ. Ɛlɛ alɩwaatʋ kʋɖʋmtʋ ndʋ tɩ-taa lɛ, ɖɩtɩsɔɔlɩ se ɖɩlɔ sʋʋtʋ ndʋ pɩpɔzʋʋ se ɖɩsɩɣlɩ yɔ. Ye ɖɩlɔ-tʋ yɔ, ɖɩɩkaɣ pɩzʋʋ nɛ ɖiwolo pɩ-yɔɔ nɛ ɖiseɣ. (2 Tim. 2:5) Sʋʋtʋ ndʋ pɩpɔzʋʋ se ɖɩsɩɣlɩ?
3. (a) Ɛzɩ Galaatii mba 6:5 yɔɔdʋʋ yɔ, sʋʋtʋ ndʋ pɩpɔzʋʋ se ɖɩsɩɣlɩ? (b) Ɛbɛ ɖɩkaɣ naʋ tɔm ñʋʋ kʋnɛ kɩ-taa, nɛ ɛbɛ yɔɔ?
3 Kalɩ Galaatii mba 6:5. Pɔɔlɩ yɔɔdɩ mbʋ pɩpɔzʋʋ se ɖɩsɩɣlɩ yɔ pɩ-taa nabʋyʋ tɔm. Ɛmawa se: «Paa weyi lɛ, ɛkaɣ sɩɣlʋʋ ɛ-maɣmaɣ ɛ-sʋʋtʋ.» Mayaɣ ŋga ka-taa, Pɔɔlɩ yɔɔdʋʋ sʋʋtʋ ndʋ pɩwɛɛ se ɖa-maɣmaɣ ɖɩsɩɣlɩ yɔ tɩ-tɔm na, ndʋ lɛ mbʋ Ɛsɔ sɔɔlaa se ɖa-taa paa weyi lɛ ɛla yɔ. Tɔm ñʋʋ kʋnɛ kɩ-taa, ɖɩkaɣ naʋ mbʋ ‘ɖa-maɣmaɣ ɖa-sʋʋtʋ’ kɛnaa yɔ pɩ-taa nabʋyʋ nɛ ɛzɩma ɖɩpɩzɩɣ nɛ ɖɩsɩɣlɩ-tʋ yɔ. Pɩtasɩ lɛ, pɩtɩla ɖɩsɩɣlɩ sʋʋtʋ natʋyʋ nɛ tɩ-tɔm tɩcɛyɩ, ɖɩkaɣ naʋ ɛzɩma ɖɩpɩzɩɣ nɛ ɖɩlɔ-tʋ yɔ. Ye ɖɩsɩɣlɩ ɖa-maɣmaɣ ɖa-sʋʋtʋ nɛ ɖɩlɔ sʋʋtʋ ndʋ tɩ-tɔm tɩcɛyɩ yɔ, pɩkaɣ-ɖʋ sɩnʋʋ nɛ ɖise wezuu seya nɛ ɖɩtɛm-yɛ.
SƲƲTƲ NDƲ PƖPƆZƲƲ SE ÐƖSƖƔLƖ YƆ
Sʋʋtʋ ndʋ pɩpɔzʋʋ se ɖɩsɩɣlɩ yɔ tɩ-taa natʋyʋ lɛ se ɖɩɖɔ ɖuutu ndʋ ɖiɖuwaa nɛ ɖɩha ɖa-tɩ Yehowa yɔ tɩ-yɔɔ, ɖɩsɩɣlɩ ɖɔ-hɔʋ taa sʋʋtʋ, nɛ ɖɩsɩɣlɩ mbʋ pɩlɩɣ lɩmaɣza wena ɖɩkpakɩɣ yɔ a-taa yɔ pɩ-sʋʋtʋ (Cɔnɩ tayʋʋ 4-9)
4. Ɛbɛ yɔɔ pɔtɔŋ se ɖuutu ndʋ ɖiɖuwaa nɛ ɖɩha ɖa-tɩ Yehowa yɔ tɩ-yɔɔ ɖɔm tɩkɩlɩ kaɖɛ? (Cɔnɩ ɖɔɖɔ kɩlɛmʋʋ.)
4 Ðuutu ndʋ ɖiɖuwaa nɛ ɖɩha ɖa-tɩ Yehowa yɔ. Alɩwaatʋ ndʋ ɖɩha ɖa-tɩ Yehowa yɔ, ɖiɖuwaa se ɖɩsɛɣ-ɩ nɛ ɖɩla ɛ-sɔɔlɩm. Pɩpɔzʋʋ se ɖɩɖɔ ɖuutu ndʋ tɩ-yɔɔ. Ðuutu ndʋ ɖiɖuwaa nɛ ɖɩha ɖa-tɩ Yehowa yɔ pɩtɩkɛ aleɣya tɔm, ɛlɛ tɩ-yɔɔ ɖɔm tɩkɩlɩ kaɖɛ. Pɩtɩkɩlɩ-ɖʋ kaɖɛ mbʋ pʋyɔɔ yɔ Yehowa lɩzɩ-ɖʋ se ɖɩla ɛ-sɔɔlɩm. (Natʋ 4:11) Ɛlɩzɩ-ɖʋ lɛ, ɛɖʋ ɖa-taa sɔɔlɩm mbʋ pituyuu-ɖʋ se ɖɩtɩlɩ-ɩ nɛ ɖɩsɛɛ-ɩ yɔ. Nɛ ɛlɩzɩ-ɖʋ ɛ-lɛzʋʋ. Pʋyɔɔ lɛ, ɖɩpɩzɩɣ nɛ ɖɩñɔtɩnɩ-ɩ nɛ ɖihiɣ taa leleŋ ɛ-sɔɔlɩm labʋ taa. (Keɣ. 40:8) Pɩtasɩ lɛ, alɩwaatʋ ndʋ ɖɩlakɩ Ɛsɔ sɔɔlɩm nɛ ɖɩtɩŋɩɣ Yesu wayɩ yɔ ‘ɖihikiɣ laŋɩyɛ hɛzʋʋ.’—Mat. 11:28-30.
(Cɔnɩ tayʋʋ 4-5)
5. Ɛbɛ kaɣ-ŋ sɩnʋʋ nɛ ŋɖɔ ño-ɖuutu yɔɔ? (1 Yohanɛɛsɩ 5:3)
5 Ɛzɩma ŋpɩzɩɣ nɛ ŋsɩɣlɩ sʋʋtʋ ndʋ? Ŋpɩzɩɣ nɛ ŋkpɛzɩ nɩŋgbanzɩ nasɩyɩ 2 nɛ pɩsɩnɩ-ŋ. Kajalaɣ lɛ, wolo pɩ-yɔɔ nɛ ŋsɔɔlʋʋ Yehowa nɛ pɩkɩlɩɣ. Ye ŋmaɣzɩɣ kɩbam mbʋ payɩ ɛlabɩ-ŋ yɔ nɛ wazasɩ nzɩ ɛñɔɔzaa nɛ ɛsɩ-ŋ yɔ sɩ-yɔɔ yɔ, ŋpɩzɩɣ nɛ ŋla mbʋ. Ŋwɛɣ nɛ ŋsɔɔlʋʋ Yehowa nɛ pɩkɩlɩɣ lɛ, pɩwɛɣ-ŋ kɛlɛʋ se ŋñamɩ-ɩ nɛ pɩkɩlɩ. (Kalɩ 1 Yohanɛɛsɩ 5:3.) Nabʋlɛ lɛ, maɣzɩnɩ Yesu. Ɛpɩzaa nɛ ɛla Ɛsɔ sɔɔlɩm mbʋ pʋyɔɔ yɔ ɛtɩmaɣnɩ-ɩ se ɛsɩnɩ-ɩ, nɛ ɛɛkam ɛ-lɩmaɣza kɩhɛyʋʋ ŋgʋ kɩɖaŋɩ-ɩ yɔ kɩ-yɔɔ. (Ebr. 5:7; 12:2) Ɛzɩ Yesu yɔ, tɩmɩɣnɩ Yehowa tam se ɛha-ŋ ɖoŋ nɛ ŋka ña-lɩmaɣza wezuu maatɛŋ lidaʋ yɔɔ. Ŋwɛɣ nɛ ŋsɔɔlʋʋ Ɛsɔ nɛ ŋmaɣzɩɣnɩ ɛ-Pɩyalʋ nɛ pɩkɩlɩɣ lɛ, ŋkaɣ pɩzʋʋ nɛ ŋɖɔ ño-ɖuutu yɔɔ.
6. Ɛbɛ yɔɔ pɩpɔzʋʋ se ɖɩsɩɣlɩ hɔʋ taa sʋʋtʋ? (Cɔnɩ ɖɔɖɔ kɩlɛmʋʋ.)
6 Ðɔ-hɔʋ taa sʋʋtʋ. Wezuu seya taa, pɩpɔzʋʋ se ɖɩsɔɔlɩ Yehowa nɛ Yesu nɛ pɩkɩlɩ ɖɔ-hɔʋ taa mba. (Mat. 10:37) Pɩɩwɩlɩɣ se ɖɩpɩzɩɣ nɛ ɖɩla kaakendu hɔʋ taa sʋʋtʋ yɔɔ; ɛlɛ pɩsa nɛ ɖɔ-tɔm kɛdɩnɩ Ɛsɔ nɛ Krɩstʋ lɛ, pɩpɔzʋʋ se ɖɩla tʋma wena paɖʋ-ɖʋ hɔʋ taa yɔ. (1 Tim. 5:4, 8) Ye ɖɩlakɩ mbʋ yɔ, ɖɩkaɣ hiɣu taa leleŋ. Yehowa nawa se ye halʋ nɛ ɛ-walʋ pɔsɔɔlɩ ɖama nɛ pañaŋ ɖama, ye lʋlɩyaa ɩsɔɔlɩ pe-piya nɛ pafalɩsɩɣ-sɩ, nɛ ye piya ɩñaŋ sɩ-lʋlɩyaa yɔ, hɔŋ kaɣ wɛʋ koboyaɣ taa.—Efɛz. 5:33; 6:1, 4.
(Cɔnɩ tayʋʋ 6-7)
7. Ɛzɩma ŋpɩzɩɣ nɛ ŋla tʋmɩyɛ nɖɩ Yehowa ɖʋ-ŋ hɔʋ taa yɔ?
7 Ɛzɩma ŋpɩzɩɣ nɛ ŋsɩɣlɩ sʋʋtʋ ndʋ? Paa lone nɖɩ ŋtɩɩwɛnɩ hɔʋ taa yɔ, taa liu Bibl lɔŋ tasʋʋ; taalaa mbʋ ŋmaɣzɩɣ se pɩwɛ ɖeu yɔ, yaa mbʋ ñe-egeetiye taa ɛyaa hɔɔlʋʋ sɔsɔʋ lakɩ yɔ, yaa mbʋ lɔŋ tasɩyaa yɔɔdʋʋ se pɩpɔzʋʋ se ŋla yɔ. (Adu. 24:3, 4) Labɩnɩ tʋmɩyɛ ɖɛ-ɛgbɛyɛ takayɩsɩ camɩyɛ. Sɩtasɩɣ-ɖʋ lɔŋ kɩbaŋ pɩlɩɩnɩ ɛzɩma ɖɩlabɩnɩ tʋmɩyɛ Bibl paɣtʋ kila yɔ pɩ-yɔɔ. Kɩɖaʋ nakʋyʋ yɔ: Tɔm sakɩyɛ wɛ tɔm ñʋŋ «De l’aide pour les familles» taa nɛ titukuuni kala wena ɖeyi ɖeyi halaa nɛ pa-walaa, lʋlɩyaa nɛ piya evelisi pakatɩɣ sɔnɔ yɔ. b Tɛ ña-taa se ŋɖɔŋ tɔm ndʋ Bibl yɔɔdʋʋ yɔ tɩ-yɔɔ paa hɔʋ taa mba lalaa ɩɩlakɩ mbʋ yɔ. Ye ŋlakɩ mbʋ yɔ, pɩkaɣ wazʋʋ ñɔ-hɔʋ nɛ Yehowa kaɣ-ŋ wazʋʋ.—1 Pɩy. 3:1, 2.
8. Ðoŋ weyi lɩmaɣza wena ɖɩkpakɩɣ yɔ awɛnɩ ɖɔ-yɔɔ?
8 Mbʋ pɩlɩɣ lɩmaɣza wena ɖɩkpakɩɣ yɔ a-taa yɔ. Yehowa ha-ɖʋ tɩ-yɔɔ wɛʋ lɩzʋʋ waɖɛ, nɛ ɛsɔɔlaa se ɖɩkpaɣ lɩmaɣza kɩbana nɛ pɩha-ɖʋ taa leleŋ. Ɛlɛ ye ɖɩkpaɣ lɩmaɣza kɩdɛkɛda yɔ, eehuuzuu ɖɔ-yɔɔ se mbʋ pɩlɩɣ pɩ-taa yɔ pɩtaatalɩ-ɖʋ. (Gal. 6:7, 8) Pʋyɔɔ lɛ, ye ɖɩkpaɣ lɩmaɣza kɩdɛkɛda naayɛ, ye ɖɩtɩmaɣzɩ ɖa-ñʋʋ taa pʋcɔ nɛ ɖɩyɔɔdɩ tɔm natʋyʋ, yaa ye ɖɩlabɩ lakasɩ kɩdɛkɛdɩsɩ nasɩyɩ yɔ, ɖɩsɩɣlɩɣ mbʋ pɩlɩɣ pɩ-taa yɔ pɩ-sʋʋtʋ. Mbʋ ɖɩlaba yɔ pɩpɩzɩɣ piyele nɛ ɖɛ-ɛhʋyɛ cɛyɩɣ-ɖʋ. Ɛlɛ ye ɖɩnawa se ɖɩsɩɣlɩɣ mbʋ pɩlɩɣ lɩmaɣza wena ɖɩkpakɩɣ yɔ a-taa yɔ pɩ-sʋʋtʋ yɔ, piseɣtiɣ-ɖʋ nɛ ɖikuli ɖa-kɩwɛɛkɩm yɔɔ, ɖɩñɔɔzɩ mbʋ ɖɩwɛɛkaa yɔ, nɛ ɖiyele mbʋ ɖɩlaba nɛ pɩfɛyɩ ɖeu yɔ pɩ-labʋ. Ye ɖɩlakɩ mbʋ yɔ pɩpɩzɩɣ nɛ pɩsɩnɩ-ɖʋ nɛ ɖiwolo pɩ-yɔɔ nɛ ɖiseɣ wezuu seya.
(Cɔnɩ tayʋʋ 8-9)
9. Ye ŋŋkpaɣ lɩmaɣzɩyɛ kɩdɛkɛdɩyɛ naɖɩyɛ yɔ, ɛbɛ ŋpɩzɩɣ nɛ ŋla? (Cɔnɩ ɖɔɖɔ kɩlɛmʋʋ.)
9 Ɛzɩma ŋpɩzɩɣ nɛ ŋsɩɣlɩ sʋʋtʋ ndʋ? Ye ŋŋkpaɣ lɩmaɣzɩyɛ kɩdɛkɛdɩyɛ naɖɩyɛ yɔ, ɛbɛ ŋpɩzɩɣ nɛ ŋla? Tisi se ŋŋpɩzɩɣ nɛ ŋlɛɣzɩ mbʋ pɩtɛm ɖɛʋ yɔ. Taalesi ña-alɩwaatʋ nɛ ño-ɖoŋ nɛ ŋñakɩ pana se ŋwɩlɩ se ŋwɛnɩ toovenim yaa se ŋsʋʋ lalaa kɩwɛɛkɩm mbʋ ŋlaba yɔ. Ɛlɛ tisi se picoɖi-ŋ nɛ ŋla ño-ɖoŋ ɖeɖe lɛɛlɛɛyɔ. Ye ŋlabɩ kɩwɛɛkɩm nabʋyʋ nɛ ñɛ-ɛhʋyɛ wɛɛ nɛ ɖɩcɛyɩɣ-ŋ yɔ, luzi ña-tɩ nɛ ŋtɩmnɩ Yehowa nɛ ŋtisi se picoɖi-ŋ nɛ ŋpɔzɩ-ɩ se ɛkpaɣ nɛ ekpeɣ-ŋ. (Keɣ. 25:11; 51:3, 4) Pɔzɩ mba ŋyʋsɩnaa yɔ se pakpaɣ nɛ pekpeɣ-ŋ, nɛ ye pɩcɛyaa yɔ, pɔzɩ ɛgbɛyɛ taa ɛzʋtʋyaa nɛ pasɩnɩ-ŋ. (Yak. 5:14, 15) Kpɛlɩkɩ lɔŋ hɔɔlɩŋ weyi ɩ-taa picoɖi-ŋ yɔ, nɛ ŋñaɣ pana se pɩtaatasɩ-ŋ coɖuu ɩ-taa. Ye ŋlabɩ mbʋ yɔ, ña-taa pɩzɩɣ nɛ pɩtɛ se Yehowa naɣ ña-pʋtɔdɩyɛ nɛ ɛsɩnɩ-ŋ hɔɔlɩŋ weyi ɩ-taa pɩpɔzʋʋ se pasɩnɩ-ŋ yɔ.—Keɣ. 103:8-13.
SƲƲTƲ NDƲ PƖPƆZƲƲ SE «ÐƖLƆ» YƆ
10. Ye pɩlakɩ-ɖʋ ɛzɩ ɖɩɩlakɩ sakɩyɛ yɔ, pɩpɩsɩɣ-ɖʋ sʋʋtʋ yuŋ ñɩndʋ. Ɛzɩma tɩyɛ? (Galaatii mba 6:4)
10 Alɩwaatʋ ndʋ pɩlakɩ-ɖʋ ɛzɩ ɖɩɩlakɩ sakɩyɛ yɔ. Alɩwaatʋ ndʋ ɖɩkpakɩɣ ɖa-tɩ nɛ ɖɩmaɣzɩɣnɩ ɛyaa lalaa yɔ, pɩpɩzɩɣ piyele nɛ pɩlakɩ-ɖʋ ɛzɩ ɖɩɩlakɩ sakɩyɛ yɔ. (Kalɩ Galaatii mba 6:4.) Ye ɖɩkpakɩɣ ɖa-tɩ nɛ ɖɩmaɣzɩɣnɩ ɛyaa lalaa paa ɛzɩmtaa yɔ, pɩpɩzɩɣ piyele nɛ ɖɩɖʋʋ pɔ-yɔɔ ɛsɩyɛ nɛ ɖɩlʋkɩnɩ-wɛ. (Gal. 5:26) Ye ɖɩñakɩ pana se ɖɩla mbʋ lalaa lakɩ yɔ ŋgʋ toovenim taa lɛ ɖɩɩpɩzɩɣ se ɖɩla mbʋ yɔ, pɩpɩzɩɣ piyele nɛ ɖɩkɔnɩ ɖa-tɩ kaɖɛ. Maɣzɩ tɔm tʋnɛ tɩ-yɔɔ nɛ ŋna. Bibl heyiɣ-ɖʋ se ‘ye ɖɩɖaŋ nabʋyʋ nɛ pɩɩkɔŋ lɔŋ yɔ,’ pɩpɩzɩɣ nɛ pitibi-ɖʋ yɔɔɔ. (Adu. 13:12) Ye mbʋ, ye ɖɩɖaŋ nabʋyʋ nɛ pɩtɩla ɖɩɩkaɣ-pʋ hiɣu wiɖiyi kpa yɔ, pɩkaɣ-ɖʋ tibu yɔɔɔ nɛ pɩkɩlɩ. Ye ɖɩwɛ wɛtʋ ndʋ tɩ-taa yɔ, pɩpɩzɩɣ nɛ pɩnɩɩ-ɖʋ siŋŋ nɛ ɖɩhɛtɩ wezuu seya.—Adu. 24:10.
11. Ɛbɛ pɩzɩɣ pɩsɩnɩ-ŋ nɛ ŋtaamaɣzɩ se ŋŋlakɩ sakɩyɛ?
11 Ɛzɩma ŋpɩzɩɣ nɛ ŋlɔ sʋʋtʋ ndʋ? Taañɩnɩ se ŋla nɛ pɩcɛzɩ mbʋ Yehowa pɔzʋʋ-ŋ yɔ. Ɛɛɖaŋɩɣ se ŋha-ɩ mbʋ ŋfɛyɩna yɔ. (2 Kɔr. 8:12) Ña-taa ɛtɛ se Yehowa ɛɛkpakɩɣ mbʋ ŋlakɩ yɔ nɛ ɛmaɣzɩɣnɩ mbʋ lalaa lakɩ yɔ. (Mat. 25:20-23) Ñe-siɣsiɣ wɛtʋ, ña-laŋɩyɛ ɖɔkʋʋ nɛ mbʋ ŋlakɩnɩ ña-kalɩzaɣ pilim yɔ, pɩmʋ ñɩm siŋŋ ɛ-ɛsɩndaa. Tisini tɩ luzuu se ña-pɩnzɩ, ñɔ-tɔnʋʋ taa alaafɩya, nɛ wɛtʋ ndʋ tɩ-taa ŋwɛ lɛɛlɛɛyɔ yɔ pɩpɩzɩɣ piyele nɛ ŋŋpɩzɩɣ se ŋla mbʋ payɩ ŋsɔɔlaa se ŋla lɛɛlɛɛyɔ yɔ. Ɛzɩ Barizilayii yɔ, ye pacaɣ se paɖʋ-ŋ tʋma naayɛ nɛ ñɔ-tɔnʋʋ taa alaafɩya yaa ña-pɩnzɩ iyeki se a-labʋ ɛlabɩ-ŋ kaɖɛ yɔ, kizi-yɛ. (2 Sam. 19:35, 36) Ɛzɩ Moyizi yɔ, ye pɩpɔzʋʋ yɔ tisi nɛ lalaa sɩnɩ-ŋ nɛ ŋɖʋ lalaa tʋma wena ŋlakɩ yɔ a-taa naayɛ. (Ejl. 18:21, 22) Ye ŋtɩlɩ ño-ɖoŋ kamaɣ mbʋ yɔ, piyeki nɛ ŋŋɖaŋɩɣ se ŋla mbʋ pɩcɛzɩ ño-ɖoŋ kamaɣ yɔɔ nɛ piyeki se wezuu seya ɛnɩ-ŋ yɔ.
12. Ɛzɩ ɖɔ-cɔlɔ pɩlɩɣna nɛ lalaa kpakɩɣ lɩmaɣza kɩdɛkɛda na? Lɩzɩ pɩ-taa.
12 Alɩwaatʋ ndʋ pɩlakɩ-ɖʋ ɛzɩ ɖɔ-cɔlɔ pɩlɩnaa nɛ lalaa kpaɣ lɩmaɣza kɩdɛkɛda yɔ. Ðɩɩpɩzɩɣ nɛ ɖɩkpaɣ lɩmaɣza lalaa lone taa; nɛ ɖɩɩpɩzɩɣ ɖɔɖɔ nɛ ɖɩkandɩyɩ pɔ-yɔɔ paa ɛzɩmtaa se mbʋ pɩlɩɣ pa-lɩmaɣza kɩdɛkɛda kpaɣʋ taa yɔ, pɩtaatalɩ-wɛ. Kɩɖaʋ nakʋyʋ yɔ: Pɩɣa nakɛyɛ pɩzɩɣ nɛ kakpaɣ lɩmaɣzɩyɛ se keyeki Yehowa sɛʋ. Lɩmaɣzɩyɛ nɖɩ, ɖɩpɩzɩɣ nɛ ɖɩkɔnɩ lʋlɩyaa laŋwɛɛkɩyɛ siŋŋ. Ɛlɛ, lʋlɩyaa mba pakʋʋ pa-tɩ tɔm lɩmaɣza kɩdɛkɛda wena pa-pɩɣa kpaɣaa yɔ a-yɔɔ yɔ, pasʋkɩ pa-tɩ sʋʋtʋ ndʋ tɩwɛ yuŋ yɔ. Pɩtɩkɛ sʋʋtʋ ndʋ Yehowa sɔɔlaa se pasɩɣlɩ.—Roma 14:12.
13. Ɛzɩma lʋlɩyʋ nɔɔyʋ pɩzɩɣ nɛ ɛla alɩwaatʋ ndʋ ɛ-pɩɣa kpakɩɣ lɩmaɣzɩyɛ kɩdɛkɛdɩyɛ yɔ?
13 Ɛzɩma ŋpɩzɩɣ nɛ ŋlɔ sʋʋtʋ ndʋ? Tɩlɩ se Yehowa ha ɖa-tɩŋa tɩ-yɔɔ wɛʋ lɩzʋʋ waɖɛ. Eyeki paa ɛyʋ weyi lɛ se ɛkpaɣ ɛ-maɣmaɣ ɛ-lɩmaɣza, pɩkpɛndɩnɩ lɩmaɣzɩyɛ nɖɩ ɛyʋ kpakɩɣ se ɛsɛɣ-ɩ yaa ɛɛsɛɣ-ɩ yɔ. Yehowa nawa se ŋkɛ lʋlɩyʋ weyi ɛtɩtalɩ pilim yɔ; mbʋ ɛsɔɔlaa yɔ lɛ se ŋla ño-ɖoŋ ɖeɖe. Ña-pɩɣa sɩɣlɩɣnɩ lɩmaɣza wena kakpakɩɣ yɔ a-sʋʋtʋ, pɩtɩkɛ ña. (Adu. 20:11) Ɛlɛ, pɩtɩla ŋwɛɛ nɛ ŋmaɣzɩɣ hɔɔlɩŋ weyi ɩ-taa picoɖi-ŋ lʋlɩyʋ tʋmɩyɛ labʋ taa yɔ ɩ-yɔɔ. Ye mbʋ yɔ, yele nɛ Yehowa tɩlɩ ɛzɩma pɩlakɩ-ŋ yɔ nɛ ŋpɔzɩ-ɩ se ɛkpaɣ nɛ ekpeɣ-ŋ. Ɛnawa se ŋŋpɩzɩɣ nɛ ŋpɩsɩnɩ wayɩ nɛ ŋlɛɣzɩ mbʋ pɩtɛm labʋ yɔ. Nɛ ɛnawa ɖɔɖɔ se ŋŋpɩzɩɣ ŋyele nɛ ña-pɩɣa ɛtaakʋ mbʋ koɖuwa yɔ. Taasɔɔ se ye ña-pɩɣa ɛñakɩ pana se kapɩsɩ Yehowa cɔlɔ yɔ, ɛkaɣ ɖaŋʋʋ kpam se ɛmʋ-kɛ nesi naalɛ.—Luka 15:18-20.
14. Ye ɖɩkʋʋ ɖa-tɩ tɔm kadadayaɣ yɔ pɩkɛ sʋʋtʋ ndʋ pɩpɔzʋʋ se ɖɩlɔ yɔ. Ɛbɛ yɔɔ?
14 Alɩwaatʋ ndʋ ɖɩkʋʋ ɖa-tɩ tɔm kaahɛzaɣ yɔ. Alɩwaatʋ ndʋ ɖɩlakɩ kɩwɛɛkɩm nabʋyʋ yɔ, pɩ-taa wɛ nɩʋ se ɖɩkʋ ɖa-tɩ tɔm. Ɛlɛ, Yehowa tɩsɔɔlɩ se ɖɩkʋʋ ɖa-tɩ tɔm kadadayaɣ. Pɩkɛ sʋʋtʋ ndʋ pɩwɛɛ se ɖɩlɔ yɔ. Ɛzɩma ɖɩpɩzɩɣ ɖɩla nɛ ɖɩna se ɖɩwɛɛ nɛ ɖɩkʋʋ ɖa-tɩ tɔm kadadayaɣ? Ye ɖikuli ɖa-kɩwɛɛkɩm yɔɔ, ɖikpiɖi, nɛ ɖɩkpɛzɩ nɩŋgbanzɩ nzɩ siyeki se ɖɩtaatasɩ labʋ kɩwɛɛkɩm mbʋ yɔ, ɖa-taa pɩzɩɣ nɛ pɩtɛ se Yehowa kpaɣaa nɛ ekpeɣ-ɖʋ. (Tʋma 3:19) Ðɩkpɛzɩɣ nɩŋgbanzɩ nzɩ nɛ pɩtɛ lɛ, Yehowa tɩsɔɔlɩ se ɖiwolo pɩ-yɔɔ nɛ ɖɩkʋʋ ɖa-tɩ tɔm. Ɛnawa se ye ɖɩwɛɛ nɛ ɖɩkʋʋ ɖa-tɩ tɔm yɔ, pɩpɩzɩɣ nɛ pɩkɔnɩ-ɖʋ kaɖɛ. (Keɣ. 31:10) Ye ɖɩwɛ laŋwɛɛkɩyɛ sɔsɔɖɛ taa yɔ, pɩpɩzɩɣ piyele nɛ ɖiyele wezuu seya seu.—2 Kɔr. 2:7.
Ŋkpiɖiɣ ña-kɩwɛɛkɩm yɔɔ siŋŋ nɛ pɩtɛ lɛ, Yehowa eewoki pɩ-yɔɔ nɛ ɛmaɣzɩɣ pɩ-yɔɔ; nɛ pɩfɛyɩ se ña ɖɔɖɔ ŋwɛɛ nɛ ŋmaɣzɩɣ pɩ-yɔɔ (Cɔnɩ tayʋʋ 15)
15. Ɛbɛ pɩzɩɣ pɩsɩnɩ-ŋ nɛ ŋtaakʋʋ ña-tɩ tɔm kadadayaɣ? (1 Yohanɛɛsɩ 3:19, 20) (Cɔnɩ ɖɔɖɔ kɩlɛmʋʋ.)
15 Ɛzɩma ŋpɩzɩɣ nɛ ŋlɔ sʋʋtʋ ndʋ? Ye ŋwɛɛ nɛ ŋkʋʋ ña-tɩ tɔm kadadayaɣ yɔ, pʋbʋ ka ña-lɩmaɣza «kpaɣʋ nɛ kpeɣu siŋŋ» mbʋ pɩlɩɣnɩ Ɛsɔ cɔlɔ pɩ-yɔɔ. (Keɣ. 130:4) Ɛsɔ labɩ tamaɣ se ye ɛkpaɣaa nɛ ekpeɣ mba pekpiɖi siŋŋ yɔ yɔ, ‘ɛɛkaɣ tasʋʋ tɔzʋʋ pa-kɩwɛɛkɩm yɔɔ.’ (Yer. 31:34) Pɩwɩlɩɣ se Yehowa ɛɛtasɩɣ maɣzʋʋ kɩwɛɛkɩm mbʋ ɛkpaɣaa nɛ ekpeɣ-ŋ yɔ pɩ-yɔɔ. Ye mbʋ, taamaɣzɩ se kala wena ña-kɩwɛɛkɩm yeba nɛ ŋkatɩɣ yɔ, awɩlɩɣ se Yehowa tikpeɣ-ŋ. Nɛ ña-taa ɛtaawɛɛ nɛ pɩwɩɣnɩ ña-tɩ mbʋ pʋyɔɔ yɔ ña-kɩwɛɛkɩm yeba nɛ ŋlesi wala naayɛ ɛgbɛyɛ taa. Yehowa eewoki pɩ-yɔɔ nɛ ɛmaɣzɩɣ ña-kɩwɛɛkɩm yɔɔ, nɛ ña ɖɔɖɔ pɩfɛyɩ se ŋwɛɛ nɛ ŋmaɣzɩɣ pɩ-yɔɔ.—Kalɩ 1 Yohanɛɛsɩ 3:19, 20.
SE NƐ ŊPƖZƖ ŊMƲ KƖHƐYƲƲ
16. Ða mba ɖɩwɛɛ nɛ ɖiseɣ wezuu seya yɔ, ɛbɛ pɩpɔzʋʋ se ɖɩtɩlɩ?
16 Ðiiseɣ wezuu seya lɛ, pɩpɔzʋʋ se ‘ɖise ɛzɩ pɩpɔzʋʋ yɔ nɛ ɖɩpɩzɩ nɛ ɖɩmʋ kɩhɛyʋʋ.’ (1 Kɔr. 9:24) Ye ɖɩtɩlɩ tʋkaɣ ŋga kɛwɛ sʋʋtʋ ndʋ pɩpɔzʋʋ se ɖɩsɩɣlɩ nɛ sʋʋtʋ ndʋ pɩpɔzʋʋ se ɖɩlɔ yɔ tɩ-hɛkʋ taa yɔ, pɩsɩɣnɩ-ɖʋ nɛ ɖɩpɩzɩ nɛ ɖɩla mbʋ. Tɔm ñʋʋ kʋnɛ kɩ-taa, ɖɩyɔɔdɩ sʋʋtʋ ndʋ pɩpɔzʋʋ se ɖɩsɩɣlɩ nɛ sʋʋtʋ ndʋ pɩpɔzʋʋ se ɖɩlɔ yɔ tɩ-taa natʋyʋ tɔm pazɩ yem na. Ɛlɛ ɖɩpɩzɩɣ nɛ ɖɩtasɩ yɔɔdʋʋ lɛɛtʋ tɔm. Yesu yɔɔdaa se «tɔkɩyɛ kadadayaɣ nɛ sʋlʋm ñɔtʋ kadadayaɣ nɛ wezuu caɣʋ taa nɩɣzɛ» papɩzɩɣ nɛ pañɩɣ ɖa-laŋa yɔɔ. (Luka 21:34) Masɩ nzɩ nɛ masɩ lɛɛsɩ pɩzɩɣ pɩsɩnɩ-ŋ nɛ ŋna lɛɣzɩtʋ ndʋ pɩpɩzɩɣ nɛ pɩpɔzɩ se ŋla alɩwaatʋ ndʋ ŋwɛɣ nɛ ŋseɣ wezuu seya yɔ.
17. Ɛbɛ yɔɔ ɖa-taa pɩzɩɣ nɛ pɩtɛ se ɖɩkaɣ seu wezuu seya nɛ ɖɩtɛm-yɛ?
17 Ða-taa pɩzɩɣ nɛ pɩtɛ se ɖɩkaɣ seu wezuu seya nɛ ɖɩtɛm-yɛ mbʋ pʋyɔɔ yɔ Yehowa kaɣ-ɖʋ haʋ ɖoŋ weyi pɩpɔzʋʋ-ɖʋ yɔ. (Iza. 40:29-31) Ye mbʋ, taahɛtɩ seya! Maɣzɩnɩ apostoloo Pɔɔlɩ; ɛɛñaɣ pana siŋŋ nɛ ese seya se pɩsa nɛ ɛmʋ kɩhɛyʋʋ ŋgʋ paasɩ ɛ-ɛsɩndaa yɔ. (Filp. 3:13, 14) Nɔɔyʋ ɛɛkaɣ seu seya ana ño-lone taa, ɛlɛ Yehowa sɩɣnɩ-ŋ nɛ ŋpɩzɩ ŋse seya ana nɛ ŋtɛm-yɛ. Yehowa pɩzɩɣ ɛsɩnɩ-ŋ nɛ ŋsɩɣlɩ ña-sʋʋtʋ nɛ ŋlɔ sʋʋtʋ ndʋ tɩ-tɔm tɩcɛyɩ yɔ. (Keɣ. 68:19) Yehowa kaɣ wɛʋ ñɔ-cɔlɔ nɛ ɛsɩnɩ-ŋ nɛ ŋpɩzɩ nɛ ŋse seya ana nɛ laŋɩyɛ ɖɔkʋʋ nɛ ŋtɛm-yɛ!
HENDU 65 Wobini ɛzɩdaa!
a Tɔm ñʋʋ kʋnɛ, kɩkaɣ-ɖʋ sɩnʋʋ nɛ ɖise wezuu seya. Ðɩkɛ seyaa, nɛ pɩwɛɛ se ɖɩsɩɣlɩ sʋʋtʋ natʋyʋ. Sʋʋtʋ ndʋ tɩ-taa natʋyʋ lɛ ɖuutu ndʋ ɖiɖuwaa nɛ ɖɩha ɖa-tɩ Yehowa yɔ, hɔʋ taa sʋʋtʋ, nɛ mbʋ pɩlɩɣ lɩmaɣza wena ɖɩkpakɩɣ yɔ a-taa yɔ. Pɩwɛɛ se ɖɩsɩɣlɩ sʋʋtʋ ndʋ. Ɛlɛ pɩpɔzʋʋ se ɖɩlɔ sʋʋtʋ ndʋ payɩ tɩ-tɔm tɩcɛyɩ nɛ tɩpɩzɩɣ nɛ tɩpɩsɩnɩ-ɖʋ nɛ wayɩ yɔ. Sʋʋtʋ ndʋ lɛ ndʋ? Tɔm ñʋʋ kʋnɛ, kɩkaɣ tɔm ndʋ tɩ-yɔɔ cosuu.
b Ŋpɩzɩɣ nɛ ŋna tɔm ñʋŋ «De l’aide pour les familles» jw.org yɔɔ. Tɔm ñʋŋ weyi itukuuni halaa nɛ pa-walaa yɔ ɩ-taa nɩɩyɩ yɔ: «Comment témoigner du respect» nɛ «Comment se montrer reconnaissant»; weyi itukuuni lʋlɩyaa yɔ ɩ-taa nɩɩyɩ yɔ: «Enseigner à ses enfants à se servir d’un smartphone avec bon sens» nɛ «Comment communiquer avec mon adolescent?»; weyi itukuuni piya evelisi yɔ ɩ-taa nɩɩyɩ yɔ: «Comment résister à la pression du groupe» nɛ «Comment surmonter le sentiment de solitude.»
