1. Sima sta na Ebreus 12:1, kuzê ki nu meste faze pa nu tirmina nos korida pa vida?

 BÍBLIA ta konpara vida di kenha ki ta sirbi Deus ku un korida. Kes algen ki ta kóre i ki ta konsigi txiga na méta, ta resebe vida pa tudu ténpu. (2 Tim. 4:7, 8) Nu meste faze tudu sforsu pa kontinua ta kóre, prinsipalmenti pamodi nu sta kuazi ta txiga na méta. Apóstlu Paulu konsigi tirmina se korida pa vida i el fla-nu kuzê ki ta djuda-nu ganha es korida. El fla pa “nu libra di tudu pézu... i nu kóre sen dizisti na kel korida ki nu ten nos dianti”. — Lé Ebreus 12:1.

2. Kuzê ki “libra di tudu pézu” krê fla?

² Kantu Paulu fla ma nu debe “libra di tudu pézu”, el krê flaba ma ka ten ninhun karga ki un sérvu di Jeová debe leba? Nau, é ka kel-li ki el krê flaba. Envês di kel-li, el krê flaba ma nu debe libra di kalker pézu ki nu ka meste. Kel tipu di pézu li pode trapadja-nu i pô-nu ta fika kansadu. Pa nu aguenta firmi, nu debe odja si nu sta ta karega algun pézu ki nu ka meste i bota-s lógu. Má omésmu ténpu, nu ka krê dexa di leba kes karga ki nu debe leba. Pamodi si nu faze kel-li, nu ta sai di kel korida. (2 Tim. 2:5) Ki kargas ki nu debe leba?

3. (a) Sima sta na Gálatas 6:5, kuzê ki nu debe leba? (b) Kuzê ki nu ta ben odja na kel studu li i pamodi?

³ Lé Gálatas 6:5. Paulu pâpia di un kuza ki nu debe  leba. El fla ma “kada un ta leba se própi karga di responsabilidadi.” Li Paulu staba ta pâpia di kuzê ki Jeová ta spera di kada un di nos, i ningen ka pode faze kel-li pa nos. Na kel studu li, nu ta ben odja kuzê ki ta faze párti di nos “karga di responsabilidadi” i modi ki nu pode leba-l. Tanbê, nu ta ben odja alguns pézu ki nu ka meste, ki nu pode sta ta karega, i modi ki nu pode bota-s. Leba nos karga di responsabilidadi i bota kes pézu ki nu ka meste, ta djuda-nu tirmina korida pa vida.

4. Pamodi ki promésa di sirbi Jeová pa tudu ténpu é ka pizadu? (Odja fotu.)

⁴ Promésa di sirbi Jeová pa tudu ténpu. Kantu nu da nos vida pa Jeová, nu promete ma nu ta adora-l i ma nu ta faze se vontadi. Nu debe kunpri kel promésa li. Kel-li é un responsabilidadi grandi, má el é ka pizadu pamodi Jeová kria-nu pa faze se vontadi. (Apo. 4:11) El faze-nu ku dizeju di konxe-l i adora-l i el kria-nu sima se imajen. É pur isu ki nu ta konsigi faze amizadi ku el i faze se  vontadi ku alegria. (Sal. 40:8) Tanbê, óras ki nu ta faze vontadi di Deus i nu ta sigi se Fidju, nu “ta xinti aliviadu.” — Mat. 11:28-30.

5. Kuzê ki pode djuda-u kunpri bu promésa di sirbi Jeová pa tudu ténpu? (1 Juan 5:3)

⁵ Modi ki bu pode leba kel karga li? Ten dôs kuza ki pode djuda-u. Primeru, kontinua ta bira bu amor pa Jeová más fórti. Bu pode faze kel-li, óras ki bu ta midita na tudu kes kuza bon ki dja el faze pa bo i na kes benson ki el tene guardadu pa bo. Óras ki bu amor pa Deus bira más fórti, ta ser más fásil bu obi ku el. (Lé 1 Juan 5:3.) Sugundu, imita Jizus. El konsigi faze vontadi di Deus, pamodi el ora pa Jeová ta pidi se ajuda i el kontinua konsentradu na se rekonpensa. (Ebr. 5:7; 12:2) Sima Jizus, ora pa Jeová ta pidi forsa i kontinua konsentradu na speransa di vive pa tudu ténpu. Óras ki bu amor pa Deus bira más fórti i bu imita se Fidju, bu ta konsigi kunpri bu promésa di sirbi Jeová pa tudu ténpu.

6. Pamodi ki nu debe kunpri nos responsabilidadis na família? (Odja fotu.)

⁶ Responsabilidadis na família. Na nos korida pa vida, nu debe ama Jeová i Jizus más di ki kes algen di nos família. (Mat. 10:37) Má kel-li ka krê fla ma nu pode dexa di kunpri nos responsabilidadis na família, sima si kes kuza li ta inpidi-nu di agrada Deus i Jizus. Pa nu agrada Deus i Jizus, nu meste kunpri nos responsabilidadis na família. (1 Tim. 5:4, 8) Óras ki nu ta faze kel-li, nu ta ser más filís. Jeová sabe ma famílias ta ser filís, óras ki maridu ku mudjer ta trata kunpanheru ku ruspetu, óras ki pai ku mai ta ama i ta trena ses fidjus i óras ki fidjus ta obi ku ses pai i ku ses mai. — Efé. 5:33; 6:1, 4.

7. Modi ki bu pode kunpri bu responsabilidadi na família?

⁷ Modi ki bu pode leba kel karga li? Ka ta inporta si bo é maridu, mudjer ô fidju, kunfia na kes konsedju di Bíblia ki ten sabedoria. Kel-li é midjór ki faze kel ki bu ta atxa ma é dretu, kel ki é normal na undi ki bu ta mora ô kuzê ki spesialistas ta fla pa bu faze. (Pro. 24:3, 4) Uza dretu nos publikasons ku bazi na Bíblia. Es ten bons sujiston di modi ki bu pode sigi prinsípius di Bíblia. Pur izénplu, na nos site jw.org ten bons informason sobri prublémas ki maridu ku mudjer, pai ku mai i jóvens ta pasa pa el gósi. b Sta disididu na faze kel ki Bíblia ta fla, sikrê otus algen na bu família ka ta faze kel-li. Asi, bu ta djuda bu família i bu ta ten bensons di Jeová. — 1 Ped. 3:1, 2.

8. Modi ki disizons ki nu ta toma pode afeta-nu?

⁸ Rezultadu di disizons ki nu ta toma. Jeová da-nu prezenti di liberdadi di skodje i el krê pa nu ser filís pamodi nu ta toma bons disizon. Má tanbê, el ka ta proteje-nu di rezultadu di kes mau disizon ki nu ta toma. (Gál. 6:7, 8) Pur isu, nu ta seta rezultadu di kes mau disizon ki nu ta toma, kes kuza ki nu ta fla sen  pensa i algun kuza mariadu ki nu ta faze. I ta dipende di kuzê ki nu faze, nu pode fika ku un konsénsia pizadu. Má sabe ma é nos ki ten responsabilidadi di disizons ki nu ta toma, pode pô-nu ta konfesa nos pekadu, koriji nos éru i ka faze-s más. Faze kes kuza li pode djuda-nu kontinua na korida pa vida.

9. Kuzê ki pode djuda-u lida ku un disizon mariadu? (Odja fotu.)

⁹ Modi ki bu pode leba kel karga li? Si bu toma mau disizon, seta kel situason ki bu sta na el gósi. Lenbra ma bu ka pode muda pasadu. Ka bu perde bu ténpu i forsa ta tenta prova pamodi ki bu ten razon ô ta kulpa otus pa maus disizon ki bu toma. Envês di kel-li, seta ma bu fadja i faze bu midjór na situason ki bu sta na el gósi. Si bu sta xinti kulpadu pamodi algun kuza mariadu ki bu faze, ora pa Jeová ku umildadi, seta ma bu fadja i pidi-l pa el purdua-u. (Sal. 25:11; 51:3, 4) Pidi kes algen ki bu mágua diskulpa i si meste pidi ajuda di ansions. (Tia. 5:14, 15) Prende ku bus éru i tenta ka faze-s más. Si bu faze si, bu pode ten serteza ma Jeová ta mostra-u mizerikórdia i el ta djuda-u na kel ki bu meste. — Sal. 103:8-13.

10. Pamodi ki spera dimás di nos é un karga pizadu? (Gálatas 6:4)

¹⁰ Spera dimás di bo. Konpara ku otus pode ser un kuza pizadu pa nos. (Lé Gálatas 6:4.) Si sénpri nu ta konpara ku otus, nu pode bira invejozu i ta konpiti. (Gál. 5:26) Si nu tenta faze kuzê ki otus sta ta faze, enbóra nu ka ta pode faze-l, nu pode prujudika nos kabésa. I si ‘un speransa ki dimora pa realiza, ta poi korason ta fika duenti’, spera dimás di nos ta dizanima algen más inda! (Pro. 13:12) Faze kel-li pode pô-nu ta fika kansadu dimás i nu ta atraza na nos korida pa vida. — Pro. 24:10.

11. Kuzê ki pode djuda-u ivita spera dimás di bo?

¹¹ Modi ki bu pode bota kel pézu li? Ka bu spera más di ki kel ki Jeová ta iziji di bo. Nunka el ka ta spera pa bu da-l kel ki bu ka ten. (2 Kor. 8:12) Ten serteza ma Jeová ka ta konpara kel ki bu ta faze ku kuzê ki otus ta faze. (Mat. 25:20-23) El ta da valor pamodi bu ta sirbi-l di tudu alma, pamodi bu lialdadi, i pamodi bu ta aguenta firmi. Ku umildadi, rekonhese ma bu idadi, bu saúdi i bu situason pode ka dexa-u faze kel ki bu ta krê faze. Sima Barzilai, ka bu seta un priviléjiu si bu idadi ô saúdi ka ta dexa-u faze-l dretu. (2 Sam. 19:35, 36) I sima Muizés, seta ajuda, i óras ki ta fika dretu, dividi responsabilidadi ku otus. (Êxo. 18:21, 22) Óras ki bo é umildi, bu ka ta spera dimás di bo. Asi, bu ka ta fika kansadu na korida pa vida.

12. Nos é kulpadu pa disizons mariadu ki otus ta toma? Splika.

¹² Xinti kulpadu pa disizons mariadu ki otus algen ta toma. Nu ka pode toma disizons pa otus. Nen nu ka pode proteje-s sénpri di rezultadu di kes mau disizon ki es ta toma. Pur izénplu, un fidju matxu ô un fidju-fémia pode disidi para di sirbi Jeová. Kel disizon li pode poi pai ku mai ta sufri txeu. Má pai ku mai ki ta xinti kulpadu pamodi disizons mariadu ki ses fidjus ta toma, sta ta  leba un karga pizadu. I kel-li é ka un pézu ki Jeová krê pa es leba. — Rom. 14:12.

13. Modi ki un pai ku mai pode lida ku un disizon mariadu di ses fidju?

¹³ Modi ki bu pode bota kel pézu li? Rekonhese ma Jeová da tudu algen liberdadi di skodje. El ta dexa kada algen toma se própi disizon. Kel-li ta inklui skodje sirbi-l ô nau. Jeová sabe ma bo é ka un pai ô un mai perfeitu. Má kuzê ki el krê é pa bu faze kel midjór ki bu ta konsigi. Disizon ki bu fidju ta toma é se responsabilidadi, é ka di bo. (Pro. 20:11) Má simé, bu pode preokupa ku fadjas ki bu da na kria bus fidju. Nton, fla Jeová modi ki bu sta xinti i pidi-l pa el purdua-u. El sabe ma bu ka pode volta pa pasadu i muda kuzê ki kontise. I el ka ta spera pa bu inpidi bu fidju di kodje kel ki el símia. Lenbra ma si bu fidju faze kalker sforsu pa volta pa Jeová, el ta resebe-l ku brasu abértu. — Luk. 15:18-20.

14. Pamodi ki xinti kulpadu dimás é un pézu ki nu debe bota?

¹⁴ Xinti kulpadu dimás. Óras ki nu ta peka é normal nu xinti kulpadu. Má xinti kulpadu dimás é un pézu ki nunka nu ka debe karega. É un pézu ki nu debe bota. Modi ki nu ta sabe si nu sta xinti kulpadu dimás? Si nu konfesa nos pekadu, nu rapende i nu faze tudu kel ki nu pode pa ka ripiti-l, nu pode kunfia ma Jeová ta purdua-nu. (Atus 3:19) Dipôs ki nu faze kes kuza li, Jeová ka krê pa nu kontinua ta xinti kulpadu. El sabe ma kontinua ta kulpa nos kabésa pode prujudika-nu. (Sal. 31:10) Si nu dexa tristéza dizanima-nu, nu pode dizisti di nos korida pa vida. — 2 Kor. 2:7.

15. Kuzê ki ta djuda-u ka xinti kulpadu dimás? (1 Juan 3:19, 20) (Odja fotu.)

¹⁵ Modi ki bu pode bota kel pézu li? Si  bu kontinua ta xinti kulpadu, konsentra na kel ‘verdaderu perdon’ ki Deus ta da. (Sal. 130:4) Óras ki el ta púrdua kes ki ta rapende di korason, el ta promete: ‘N ka ta lenbra más di ses pekadu.’ (Jer. 31:34) Kel-li krê fla ma nunka Jeová ka ta pensa na kes pekadu ki dja el purdua-u. Nton, ka bu atxa ma kes rezultadu di bus pekadu é próva ma el ka purdua-u. I ka bu fika xatiadu pamodi talvês bu perde algun priviléjiu na kongregason. Jeová ka ta kontinua ta pensa na pekadus ki bu faze i bo tanbê bu ka debe faze kel-li. — Lé 1 Juan 3:19, 20.

16. Kuzê ki nu meste intende na nos korida pa vida?

¹⁶ Na nos korida pa vida, nu debe “kóre di un manera ki [nu] ta pode ganha-l.” (1 Kor. 9:24) Nu pode faze kel-li si nu intende diferénsa entri kes karga ki nu debe leba i kes pézu ki nu debe bota. Na kel studu li, nu odja izénplu di alguns kuza ki nu debe karega i otus kuza ki nu debe bota. Má é ka sô kes-li. Jizus fla ma nu pode “fika txeu okupadu na kume i na bebe dimás i ku preokupasons di vida”. (Luk. 21:34) Kel testu li i otus pode djuda-u odja kuzê ki bu meste midjora na bu korida pa vida.

17. Pamodi ki nu pode ten serteza ma nu ta ben ganha korida pa vida?

¹⁷ Nu pode ten serteza ma nu ta ben ganha korida pa vida pamodi Jeová ta da-nu forsa ki nu meste. (Isa. 40:29-31) Pur isu, ka bu para di kóre! Imita apóstlu Paulu ki sforsa txeu pa ganha kel prémiu ki staba se frenti. (Fil. 3:13, 14) Ningen ka pode kóre na bu lugar, má ku ajuda di Jeová bu pode ganha. Jeová pode djuda-u leba bus karga i bota kes pézu ki bu ka meste. (Sal. 68:19) Ku Jeová na bu ladu, bu ta konsigi kóre sen dizisti i ganha!