1. Metwokumwe nOvaheberi 12:1, oshike twa pumbwa okuninga, opo tu hange efikilo mefiyafanepo letu lomwenyo?

 OMBIIBELI oya faafanifa onghalamwenyo yOmukriste nefiyafanepo. Ovatondoki, ovo tava ka fika nomupondo kefikilo, otava ka pewa ondjabi yomwenyo waalushe. (2 Tim. 4:7, 8) Otwa pumbwa okuninga eenghendabala, opo tu twikile okutondoka, unene tuu eshi tu li popepi nokuhanga efikilo. Omuyapostoli Paulus oo a li a fika kefikilo nomupondo mefiyafanepo lomwenyo, okwa popya osho tashi dulu oku tu kwafela tu findane mefiyafanepo. Okwa ti kutya ‘natu tulei po omutengi keshe nokutondoka nelididimiko mefiyafanepo olo tu li mulo.’ — Lesha Ovaheberi 12:1.

2. Osha hala okutya ngahelipi ‘okutula po omutengi keshe’?

² Eshi Paulus a ti kutya “natu tulei po omutengi keshe,” mbela okwa hala okutya Omukriste ke na okuhumbata omutengi nandenande? Hasho a li a hala okutya ngaho. Ponhele yaasho, okwa li a hala okutya otwa pumbwa okweefa po omutengi keshe inau pumbiwa. Omutengi wa tya ngaho otau dulu oku tu endifa kanini noku tu lolola. Opo tu lididimike, otwa pumbwa okudidilika diva nokweefa po omutengi keshe inau pumbiwa, oo tau dulu oku tu endifa kanini. Pefimbo opo tuu opo, otwa pumbwa okuhumbata omitengi odo tu na okuhumbata. Ngeenge otwa efa po okuhumbata omitengi da tya ngaho, itatu ka kala twa wana okukala mefiyafanepo. (2 Tim. 2:5) Omitengi dilipi tu na okuhumbata?

3. (a) Metwokumwe nOvagalati 6:5, oshike tu na okuhumbata? (b) Oshike hatu ka kundafana moshitukulwa eshi, nomolwashike?

³ Lesha Ovagalati 6:5. Paulus okwa popya oshinima osho tu na okuhumbata. Okwa ti kutya “keshe umwe oku na okuhumbata  omutengi waye mwene.” Apa Paulus okwa li ta popi komutengi wetu wopaumwene oo Kalunga a hala tu humbate, oo keshe umwe e na okuhumbata kuye mwene. Moshitukulwa eshi, ohatu ka kundafana kutya oshike sha kwatelwa mo ‘momutengi wetu’ nanghee hatu dulu oku u humbata. Natango, ohatu ka didilika mo omitengi inadi pumbiwa, odo tashi dulika tu humbate nokulihonga nghee hatu dulu oku di tula po. Ngeenge otwa humbata omitengi detu nokutula po odo inadi pumbiwa, otashi ke tu kwafela tu tondoke nomupondo mefiyafanepo lomwenyo.

4. Omolwashike eano letu lokuliyapulila Jehova lihe fi omutengi? (Tala yo efano.)

⁴ Eano letu lokuliyapulila Jehova. Ngeenge otwe liyapulile Jehova, ohatu ane tu mu longele notu longe ehalo laye. Otu na okudiinina eano olo. Okukala metwokumwe neliyapulo letu oshi li oshinakuwanifwa sha kwata moiti, ashike kashi fi omutengi. Komesho yaaishe, Jehova okwe tu shita tu longe ehalo laye. (Eh. 4:11) Okwe tu shita tu na ehalo loku mu shiiva noku mu longela, nokwe tu shita yo oshifeka shaye. Oshidjemo, ohatu dulu okweehena  popepi naye nokumona ehafo olo hali di mokulonga ehalo laye. (Eps. 40:8) Shikwao vali, ngeenge hatu longo ehalo laKalunga nokushikula Omona waye, ohatu “ke limonena etulumuko.” — Mat. 11:28-30.

5. Oshike tashi dulu oku ku kwafela u kale metwokumwe neliyapulo loye? (1 Johannes 5:3)

⁵ Ongahelipi to dulu okuhumbata omutengi? Ope na oinima ivali oyo tai dulu oku ku kwafela. Shotete, twikila okupameka ohole yoye yokuhola Jehova. Oto dulu okuninga ngaho mokudilonga koinima aishe iwa oyo e ku ningila nosho yo komanangeko noupuna oo e ku tuvikilila. Eshi ohole yoye yokuhola Kalunga tai ende tai kulu, otashi ke shi ningifa shipu kwoove okudulika kuye. (Lesha 1 Johannes 5:3.) Oshitivali, hopaenena Jesus. Okwa longa ehalo laJehova nomupondo, molwaashi okwa li ha ilikana kuye e mu kwafele nokwa li ha yandje elitulemo kondjabi yaye. (Heb. 5:7; 12:2) Ngaashi Jesus, ilikana kuJehova e ku pe eenghono nou kaleke eteelelo lomwenyo waalushe la twa momadiladilo. Eshi ohole yoye yokuhola Kalunga tai ende tai kulu noto hopaenene Omona waye, oto ka dula okukala metwokumwe neliyapulo loye.

6. Omolwashike tu na okuwanifa po oinakuwanifwa yomoukwaneumbo? (Tala yo efano.)

⁶ Oinakuwanifwa yetu yomoukwaneumbo. Mefiyafanepo letu lomwenyo, otu na okukala tu hole Jehova naJesus shi dulife eshi tu hole ovapambele vetu. (Mat. 10:37) Ashike osho inashi hala okutya otu na okweefa po oinakuwanifwa yomoukwaneumbo, ya fa ngeno oyo tai tu imbi tu hafife Kalunga naKristus. Mepingafano naasho, opo tu kale twa hokiwa kuKalunga nokuKristus, otwa pumbwa okuwanifa po oinakuwanifwa yetu yomoukwaneumbo. (1 Tim. 5:4, 8) Ngeenge otwa ningi ngaho, ohatu ka kala twa hafa neenghono. Komesho yaaishe, Jehova oku shii kutya omaukwaneumbo otaa ka kala a hafa, ngeenge omushamane nomukulukadi ohava ungaungafana pahole nonefimaneko, nongeenge ovadali ove hole nohava deula ovana nosho yo ngeenge ounona ohava dulika kovadali vavo. — Ef. 5:33; 6:1, 4.

7. Ongahelipi to dulu okuwanifa po oshinakuwanifwa shoye moukwaneumbo?

⁷ Ongahelipi to dulu okuhumbata omutengi woye? Kashi na nee mbudi kutya ou na oshinakuwanifwa shilipi moukwaneumbo, lineekela mounongo oo u li mOmbiibeli, ponhele yokulineekela omaliudo ongaho, eputuko, ile osho tashi dulika hashi popiwa kwaavo hava ifanwa ovanawino. (Omayel. 24:3, 4) Longifa nawa oishangomwa yetu ya kanghamena kOmbiibeli. Oishangomwa oyo oi na omayele taa longo e na sha nanghee u na okutula moilonga omafinamhango Ombiibeli. Pashihopaenenwa, oitukulwa ya pambafana i na oshipalanyole “Ekwafo koukwaneumbo” oi na ouyelele wa denga mbada u na sha nomashongo okondadalunde oo a taalelwa kunena kovalihomboli, kovadali nosho yo kovanyasha. b Kala wa tokola toko okutula moilonga osho Ombiibeli tai ti, nokuli nonande oilyo imwe moukwaneumbo weni itai shi ningi. Ngeenge owa ningi ngaho, oukwaneumbo weni otau ka mona ouwa noto ka hafela enangeko noupuna laJehova. — 1 Pet. 3:1, 2.

8. Ongahelipi omatokolo etu taa dulu oku tu kuma?

⁸ Otu na oshinakuwanifwa shomatokolo oo hatu ningi. Jehova okwe tu pa emanguluko lokuninga omatokolo, nokwa hala tu hafele ouwa oo hau di mokuninga omatokolo opandunge. Ashike ihe tu amene koilanduliko yomatokolo ehe li pandunge. (Gal. 6:7, 8) Omolwetomheno  olo, ohatu tambula ko oilanduliko yomatokolo etu ehe li pandunge, eendjovo inadi diladilwa nosho yo eenghatu domeendelelo. She likolelela kwaasho twa ninga, otashi dulika tu kale tu na eliudo tali tu nyenyetele. Ndele okushiiva kutya otu na oshinakuwanifwa shomatokolo oo hatu ningi, otashi tu linyengifa tu hepaulule omatimba etu, tu yukife omapuko etu notu henuke oku a endulula. Okukatuka eenghatu odo otaku tu kwafele tu kale mefiyafanepo lomwenyo.

9. Oshike to dulu okuninga, ngeenge owa ninga etokolo lihe li pandunge? (Tala yo efano.)

⁹ Ongahelipi to dulu okuhumbata omutengi? Ngeenge ito dulu okuningulula etokolo loye lihe li pandunge, tambula ko onghalo oyo u li muyo paife. Didilika kutya ito dulu okulundulula onakudiwa. Ino mana po efimbo nosho yo eenghono doye mokukendabala okuyukipalifa eenghatu doye, ile u pe vamwe ombedi omolwomatokolo oye ehe li pandunge. Ponhele yaasho, dimina omapuko oye nokuninga ngaashi to dulu monghalo oyo u li muyo paife. Ngeenge ou udite etimba omolwepuko olo wa ninga, ilikana kuJehova nelininipiko, dimina epuko loye noku mu pula e ku dimine po. (Eps. 25:11; 51:3, 4) Yandja ombili kwaavo tashi dulika wa nyona kuvo, nongeenge osha pumbiwa, konga ekwafo kovakulunhuongalo. (Jak. 5:14, 15) Lihonga komapuko oye, nokukendabala uhe a endulule vali. Ngeenge owa ningi ngaho, oto dulu okukala noushili kutya Jehova ote ke ku fila onghenda note ke ku pa ekwafo olo wa pumbwa. — Eps. 103:8-13.

10. Omolwashike etimaumbwile lihe li pandjele li li omutengi mudjuu? (Ovagalati 6:4)

¹⁰ Etimaumbwile lihe li pandjele. Ohatu dulu okulitwika omutengi mudjuu netimaumbwile lihe li pandjele, ngeenge ohatu liyelekanifa navakwetu. (Lesha Ovagalati 6:4.) Ngeenge ohatu twikile okuliyelekanifa navamwe, ohatu ka kwatwa kondubo nokomhepo yefiyafanepo. (Gal. 5:26) Ngeenge ohatu kendabala okuninga osho vakwetu tava ningi, nonande itatu dulu oku shi wanifa po, ohatu ke liyahameka fye vene. Diladila yo kwaashi: Ombiibeli oya ti kutya “okuteelela efimbo lile taku kulaukifa omwenyo.” Onghee ohatu ka teka omukumo, ngeenge otwa teelela oshinima osho itatu ka mona nandenande. (Omayel. 13:12) Ngeenge otwa ningi ngaho, otashi ke tu lola notashi ke tu endifa kanini mefiyafanepo letu lomwenyo. — Omayel. 24:10.

11. Oshike tashi dulu oku ku kwafela u henuke etimaumbwile lihe li pandjele?

¹¹ Ongahelipi to dulu okutula po omutengi oo? Ino teelela u ninge shihapu shi dulife pwaasho Jehova a teelela u ninge. Ina teelela nandenande u yandje osho uhe na. (2 Kor. 8:12) Kala u na oushili kutya Jehova iha yelekanifa osho to ningi naasho tashi ningwa kuvamwe. (Mat. 25:20-23) Okwa lenga oilonga yoye oyo to mu longele nomutima aushe, oudiinini woye nosho yo elididimiko loye. Dimina nelininipiko kutya omido doye, oukolele nosho yo eenghalo doye otashi dulika di ngabeke osho to dulu okuninga paife. Ngaashi Barsillai, kala u na ehalo lokweefa po oinakuwanifwa yonhumba, ngeenge omangabeko opalutu okwe shi ningifa shidjuu oku i wanifa po. (2 Sam. 19:35, 36) Ngaashi Moses, tambula ko ekwafo kuvamwe nokuyandja oinakuwanifwa kuvamwe, ngeenge otashi dulika. (Ex. 18:21, 22) Elininipiko la tya ngaho otali ke ku kwafela, opo uha kale u na etimaumbwile lihe li pandjele, olo tali ke ku lolola mefiyafanepo loye lomwenyo.

12. Mbela otu na oshinakuwanifwa shomatokolo ehe li pandunge oo a ningwa kuvamwe? Shi yelifa.

¹² Okukala u udite u na oshinakuwanifwa shomatokolo ehe li pandunge oo a ningwa kuvamwe. Ihatu dulu okuningila ko vamwe omatokolo, noihatu dulu alushe oku va  amena koilanduliko yomatokolo avo a puka. Pashihopaenenwa, omonamati, ile omonakadona otashi dulika a tokole okweefa po okulongela Jehova. Etokolo la tya ngaho otali dulu okunyikifa oluhodi neenghono ovadali. Ovadali ovo have lipe oushima omolwomatokolo ehe li pandunge ovana, ohava humbata omutengi mudjuu. Jehova ina teelela va humbate omutengi wa tya ngaho. — Rom. 14:12.

13. Ongahelipi omudali ta dulu okuungaunga netokolo lihe li pandunge lomona?

¹³ Ongahelipi to dulu okutula po omutengi oo? Didilika kutya Jehova okwa pa ovanhu aveshe emanguluko lokuninga omatokolo. Okwa pitika keshe umwe a ninge etokolo kuye mwene. Osho osha kwatela mo ngeenge ohatu ke mu longela, ile hasho. Jehova oku shii kutya ku fi omudali a wanenena, ashike okwa hala u ninge ngaashi to dulu. Etokolo olo tali ningwa kokaana koye oli li oshinakuwanifwa shako, ndele kashi fi shoye. (Omayel. 20:11) Natango, otashi dulika to lipula nomapuko oo wa ninga u li omudali. Ngeenge osho, lombwela Jehova nghee u udite noku mu pula e ku dimine po. Oku shii kutya ito dulu okulundulula onakudiwa nosho yo osho sha ningwa po. Pefimbo opo tuu opo, ita teelele u kelele okaana koye ka teye osho ka kuna. Kaleka momadiladilo kutya ngeenge okaana koye oka ningi eenghendabala ka alukile kuJehova, ote ke ka tambula ko nehalo liwa. — Luk. 15:18-20.

14. Omolwashike okukala tu udite etimba neenghono shi li omutengi, oo tu na okutula po?

¹⁴ Okukala tu udite etimba neenghono. Oshi shii okuudiwa ko, eshi hatu kala tu udite etimba, ngeenge twa nyona. Ashike okukala tu udite etimba neenghono oshi li omutengi, oo inatu pumbwa okuhumbata. Oshi li omutengi, oo twa pumbwa okutula po. Ongahelipi hatu dulu okushiiva ngeenge otu udite etimba neenghono? Ngeenge otwa hepaulula enyono letu, twe livela ombedi nokukatuka eenghatu, opo tuhe li endulule vali, ohatu dulu okukala nelineekelo kutya Jehova okwe tu dimina po. (Oil. 3:19) Konima eshi twa katuka eenghatu odo, Jehova ina hala tu twikile okukala tu udite  etimba. Oku shii kutya otashi ke tu ehameka, ngeenge otwa ningi ngaho. (Eps. 31:10) Ngeenge otwa wililwa po koluhodi, otashi dulika tu ka sholole mefiyafanepo letu lomwenyo. — 2 Kor. 2:7.

15. Oshike tashi dulu oku ku kwafela u ungaunge nokukala u udite etimba neenghono? (1 Johannes 3:19, 20) (Tala yo efano.)

¹⁵ Ongahelipi to dulu okutula po omutengi oo? Ngeenge ou udite etimba neenghono, yandja elitulemo ‘kekufilo,’ ile tu tye kediminepo lashili, olo hali di kuKalunga. (Eps. 130:4) Ngeenge ta dimine po ovo ve livela ombedi shili, okwa udaneka, a ti: “Itandi dimbulukwa vali omatimba avo.” (Jer. 31:34) Osho osha hala okutya Jehova ita ka dimbuluka nandenande omanyono oye omonakudiwa oo e ku dimina po. Onghee hano, ino diladila kutya oilanduliko yomanyono oye otai ulike kutya ine ku dimina po. Ino lihandukila yo molwaashi tashi dulika wa kanifa omaufembanghenda amwe meongalo. Jehova iha kala ta diladila shi na sha nomanyono oye, naave ku na oku shi ninga. — Lesha 1 Johannes 3:19, 20.

16. Tu li ovatondoki, oshike tu na okushiiva?

¹⁶ Eshi hatu tondoka mefiyafanepo lomwenyo, otu na ‘okutondoka twa mana mo opo tu ka mone ondjabi.’ (1 Kor. 9:24) Ohatu dulu okuninga ngaho, ngeenge otwa shiiva eyooloko olo li li pokati komitengi odo tu na okuhumbata naado tu na okutula po. Moshitukulwa eshi, otwa kundafana ashike oihopaenenwa inini yaasho tu na okuhumbata nosho yo osho tu na okutula po. Ashike ope na yo ikwao. Jesus okwa ti kutya ohatu dulu ‘okupwila mokulya nokunwa sha pitilila nokuwililwa po koisho yonghalamwenyo.’ (Luk. 21:34) Omushangwa oo nosho yo dimwe vali otadi dulu oku ku kwafela u didilike opo wa pumbwa okuninga omalunduluko, eshi to tondoka mefiyafanepo lomwenyo.

17. Omolwashike hatu dulu okukala noushili kutya ohatu dulu okufindana mefiyafanepo lomwenyo?

¹⁷ Ohatu dulu okukala noushili kutya ohatu dulu okufindana mefiyafanepo lomwenyo, molwaashi Jehova ote tu pe eenghono odo twa pumbwa. (Jes. 40:29-31) Onghee hano, pula komesho! Hopaenena omuyapostoli Paulus oo a li a tondoka a mana mo, opo a pewe ondjabi oyo a li a tuvikililwa. (Fil. 3:13, 14) Kape na umwe ta dulu okutondoka ko ponhele yoye mefiyafanepo, ashike kekwafo laJehova oto dulu okufindana. Jehova ota dulu oku ku kwafela u humbate omitengi doye nou tule po odo inadi pumbiwa. (Eps. 68:19) Kekwafo laJehova, oto dulu okutondoka nelididimiko mefiyafanepo nokufindana.