36-زەرتتەۋ ماقالاسى
كەرەكتى جۇكتى عانا ارقالاپ، ارتىعىنان ارىلىڭىز
«ٴبىز دە اۋىرتپالىق بولاتىن كەز كەلگەن نارسەدەن... ارىلىپ، الدىمىزداعى قاشىقتىقتى تاباندىلىقپەن جۇگىرىپ وتەيىك» (ەۆر. 12:1).
33-ٵن ۋايىمىڭدى ەحوباعا ارت
اڭداتپا a
1. ەۆرەيلەرگە 12:1 گە ساي، ماڭگىلىك ٶمىر ٷشىن جارىستا مارەگە جەتۋ ٷشىن نە ىستەۋىمىز كەرەك؟
كيەلى كىتاپ ٴماسىحشىنىڭ ٶمىر جولىن جارىسقا تەڭەيدى. مارە سىزىعىن اتتاپ وتكەندەرگە جۇلدەگە ماڭگى ٶمىر بەرىلەدى (ٴتىم. 2-ح. 4:7، 8). قازىر بۇل سىزىق قولسوزىم جەردە تۇرعاندىقتان، بىزگە الدىمىزعا جان سالماي جۇگىرۋ كەرەك. بۇل جارىستا جەڭىسكە جەتكەن ەلشى پاۋىل جەڭۋدىڭ سىرىن ايتىپ كەتكەن. «كەز كەلگەن نارسەدەن... ارىلىپ، الدىمىزداعى قاشىقتىقتى تاباندىلىقپەن جۇگىرىپ وتەيىك»،— دەدى ول (ەۆرەيلەرگە 12:1 وقىڭىز).
2. «كەز كەلگەن نارسەدەن ارىلۋ» دەگەن نەنى بىلدىرەدى؟
2 ەلشى پاۋىل «كەز كەلگەن نارسەدەن ارىلىڭدار» دەگەندە، ەشتەڭەسىز، بوس جۇگىرۋدى ايتقان با؟ جوق. ول اۋىرتپالىق بولاتىن نارسەدەن، ياعني اياعىمىزدان شالاتىن يا شارشاتاتىن نارسەلەردەن ارىلۋدى ايتقان. الدىمىزداعى قاشىقتىقتى تاباندىلىقپەن جۇگىرىپ وتكىمىز كەلسە، ٴبىز مۇنداي اۋىرتپالىقتى تەز انىقتاپ، بىردەن قۇتىلعانىمىز ٴجون. سونداي-اق بۇل جارىستا تاستاۋعا بولمايتىن، كوتەرۋىمىز كەرەك جۇك تە بار. ايتپەسە، ەرەجەسىن بۇزىپ، جارىستان شەتتەتىلەمىز (ٴتىم. 2-ح. 2:5). سوندا ولار قانداي جۇكتەر؟
3. ا) عالاتتىقتارعا 6:5 كە ساي، ٴبىز قانداي جۇكتى كوتەرىپ ٴجۇرۋىمىز كەرەك؟ ٵ) بۇل ماقالادا نە قاراستىرامىز جانە ول نە ٷشىن ماڭىزدى؟
3 عالاتتىقتارعا 6:5 وقىڭىز. «اركىم ٶز جۇگىن ٶزى كوتەرەدى» دەگەندە، پاۋىل الىپ ٴجۇرۋىمىز كەرەك جۇگىمىز جايلى ايتقان. بۇل جۇك ٵربىر ٴماسىحشىنىڭ قۇداي الدىنداعى جاۋاپكەرشىلىگىن بىلدىرەدى، ٵرى ونى ٴبىز ٷشىن باسقا ەشكىم كوتەرمەيدى. بۇل جۇككە نە جاتادى جانە ونى قالاي الىپ جۇرەمىز؟ ال اۋىرتپالىق بولاتىن جۇككە نە جاتادى جانە ولاردان قالاي ارىلامىز؟ بۇل سۇراقتاردىڭ جاۋابىن بىلگەنىمىز وتە ماڭىزدى. ويتكەنى جۇكتەردىڭ كەرەگىن الىپ، كەرەك ەمەسىن تاستاساق، ٶمىر جارىسىندا مارەگە جەتەمىز.
كوتەرۋ كەرەك جۇكتەر
ٶز جۇگىمىزدى ٶزىمىز الىپ ٴجۇرۋ دەگەن ەحوباعا باعىشتالعاندا بەرگەن انتىمىزدا تۇرۋدى، وتباسىلىق مىندەتتەرىمىزدى اتقارۋدى جانە قولىمىزبەن ىستەگەندى موينىمىزبەن كوتەرۋدى بىلدىرەدى (4—9-ابزاستاردى قاراڭىز)
4. باعىشتالۋ انتىمەن ٶمىر ٴسۇرۋ نەگە اۋىرتپالىق ەمەس؟ (سۋرەتتى دە قاراڭىز.)
4 باعىشتالۋ انتىمىز. ٴبىز ٶمىرىمىزدى ەحوباعا باعىشتاعاندا، وعان عيبادات ەتىپ، ەركىن ورىندايمىز دەپ انت ەتتىك. ەندى، وسى انتىمىزعا ساي ٶمىر ٴسۇرۋىمىز كەرەك. بۇل — ۇلكەن جاۋاپكەرشىلىك، دەسە دە اۋىرتپالىق ەمەس. ويتكەنى ادام بولىپ جاراتىلعانداعى ماقساتىمىز — ەحوبانىڭ ەركىن ورىنداۋ (ايان 4:11). ٴبىز وعان ۇقساس ەتىپ جاراتىلعانبىز جانە بىزدە ونى تانىپ-ٴبىلۋ قالاۋى بار. سوندىقتان ٴبىز وعان جاقىنداي الامىز ٵرى بىزگە ونىڭ ەركىن ورىنداعان ۇنايدى (ٴزاب. 40:8). بۇعان قوسا، قۇدايدىڭ ەركىن ورىنداۋ جانە ونىڭ ۇلىنىڭ ىزىمەن ٴجۇرۋ «جانىمىزدى سەرگىتەدى» (مات. 11:28—30).
(4—5-ابزاستاردى قاراڭىز)
5. باعىشتالۋ انتىمىزدا تۇرۋعا نە كومەكتەسەدى؟ (جوحاننىڭ 1-حاتى 5:3)
5 وسى جۇكتى كوتەرىپ جۇرۋگە نە كومەكتەسەدى؟ بىرىنشىدەن، ەحوبانى ودان سايىن جاقسى كورۋگە ۇمتىلىڭىز. ول ٷشىن ونىڭ سىزگە جاساعان بار جاقسىلىعى جايلى جانە الدا توگەتىن باتالارى جايلى وي جۇگىرتىڭىز. سوندا ەحوبانى ودان سايىن جاقسى كورىپ، وعان قۋانىشپەن مويىنسۇناتىن بولاسىز (جوحاننىڭ 1-حاتى 5:3 وقىڭىز). ەكىنشىدەن، يسادان ۇلگى الىڭىز. ول نەنىڭ ارقاسىندا قۇدايدىڭ ەركىن ورىنداپ شىققان ەدى؟ ول ەحوبادان كومەك سۇرادى جانە بار ويى الار جۇلدەسىندە بولدى (ەۆر. 5:7؛ 12:2). ٴبىز دە ەحوبادان كۇش سۇراپ، دۇعا ەتەيىك جانە ونىڭ بىزگە ساقتاپ وتىرعان سيى — ماڭگى ٶمىردى ويىمىزدا ۇستايىق. وسىلاي ەحوباعا سۇيىسپەنشىلىگىمىزدى وسىرسەك جانە ونىڭ ۇلىنا ەلىكتەسەك، باعىشتالعاندا بەرگەن انتىمىزدا تۇرا الامىز.
6. وتباسىلىق مىندەتتەرىمىزدى نە ٷشىن اتقارۋىمىز كەرەك؟ (سۋرەتتى دە قاراڭىز.)
6 وتباسىلىق مىندەتتەرىمىز. ماڭگىلىك ٶمىر ٷشىن جارىستا ەحوبا مەن يسانى تۋىستارىمىزدان دا ارتىق جاقسى كورۋىمىز كەرەك (مات. 10:37). بىراق بۇل وتباسىلىق مىندەتتەرىمىزگە نەمقۇرايدى قاراۋعا بولادى دەگەندى بىلدىرمەيدى. كەرىسىنشە، ەحوبا مەن يساعا ۇنامدى بولۋ ٷشىن وتباسىنداعى ٴرولىمىزدى دۇرىس اتقارۋىمىز كەرەك (ٴتىم. 1-ح. 5:4، 8). سوندا ٶزىمىز دە باقىتتى بولامىز. ويتكەنى ەحوبا ويلاستىرعان قۇرىلىم بويىنشا، كۇيەۋى مەن ايەلى ٴبىر-ٴبىرىن ٴسۇيىپ، قۇرمەتتەسە، اتا-انالار بالالارىن ٴسۇيىپ، ٴتالىم-تاربيە بەرسە، ال بالالارى اتا-اناسىنىڭ ٴتىلىن السا، شاڭىراقتارى شاتتىققا تولادى (ەفەس. 5:33؛ 6:1، 4).
(6—7-ابزاستاردى قاراڭىز)
7. وتباسىلىق مىندەتتەرىمىزدى اتقارۋعا نە كومەكتەسەدى؟
7 وسى جۇكتى كوتەرىپ جۇرۋگە نە كومەكتەسەدى؟ كۇيەۋلەر، ايەلدەر مەن بالالار، وزدەرىڭىز دۇرىس دەپ ويلاعانىڭىزعا، كورىپ-ەستىگەنىڭىزگە جانە ساراپشىسىماقتارعا ەمەس، كيەلى كىتاپ دانالىعىنا جۇگىنىڭىزدەر (ناق. س. 24:3، 4). كيەلى كىتاپقا نەگىزدەلگەن ادەبيەتتەرىمىزدى بارىنشا پايدالانىڭىزدار. وندا كيەلى كىتاپ پرينسيپتەرىن قالاي قولدانۋعا بولاتىنى جاقسى تۇسىندىرىلەدى. مىسالى، سايتىمىزداعى ماقالالاردا جۇبايلار، اتا-انالار مەن جاسوسپىرىمدەر كەزدەسەتىن قيىندىقتاردىڭ كوبىسى قاراستىرىلادى b. وتباسىڭىزداعى ادامدار ۇستانباي جاتسا دا، كيەلى كىتاپتىڭ ايتقانىن مىقتاپ ۇستانا بەرىڭىز. سوندا بۇنىڭ يگىلىگىن بۇكىل وتباسىڭىز كورىپ، ٶزىڭىز دە ەحوبانىڭ شاپاعاتىنا بولەنەسىز (پەت. 1-ح. 3:1، 2).
8. جاساعان تاڭداۋلارىمىز بەن قابىلداعان شەشىمدەرىمىز ومىرىمىزگە قالاي اسەر ەتەدى؟
8 قولىمىزبەن ىستەگەندى موينىمىزبەن كوتەرۋ. ەحوبا بىزگە ەرىك بوستاندىعىن بەرگەن. ول ٴبىزدىڭ جاقسى تاڭداۋ جاساپ، دۇرىس شەشىمدەر قابىلداپ، سونىڭ جەمىسىنە قۋانعانىمىزدى قالايدى. ال دۇرىس ەمەس شەشىم قابىلداساق، سونىڭ سالدارىنان قورعامايدى (عال. 6:7، 8). دەمەك، اڭداماي سويلەپ، ارتىن ويلاماي بىردەڭە ىستەپ قويساق، سونىڭ سالدارىمەن ٶمىر سۇرۋگە تۋرا كەلەدى. ار-ۇجدانىمىز دا قيناۋى مۇمكىن. بىراق ىستەگەن ٸسىمىز ٷشىن جاۋاپتى ەكەنىمىزدى تۇسىنسەك، قاتەلىگىمىزدى مويىندايمىز، تۇزەلۋگە جانە ونى قايتالاماۋعا تىرىسامىز. سونىڭ ارقاسىندا جارىستان شىعىپ كەتپەيمىز.
(8—9-ابزاستاردى قاراڭىز)
9. قاتەلىك جاساپ قويساق، نە ىستەۋگە بولادى؟ (سۋرەتتى دە قاراڭىز.)
9 وسى جۇكتى كوتەرىپ جۇرۋگە نە كومەكتەسەدى؟ شالىس قادام باسقان بولساڭىز، نە ىستەسەڭىز بولادى؟ بولار ٸس بولدى، ەندى وتكەندى وزگەرتە المايسىز. ٶزىڭىزدى اقتاپ نە كەرىسىنشە كىنالاپ، يا باسقا بىرەۋدى ايىپتاپ، كۇش كەتىرمەي-اق قويىڭىز. قايتا، قاتەلىگىڭىزدى مويىنداپ، قازىر قولىڭىزدان نە كەلەدى، سونى جاساي بەرىڭىز. ىستەگەن جامان ٸسىڭىز ٷشىن ار-ۇجدانىڭىز قيناپ جاتسا، ەحوباعا كىشىپەيىلدىلىكپەن دۇعا ەتىڭىز. قاتەلىگىڭىزدى مويىنداپ، ودان كەشىرىم سۇراڭىز (ٴزاب. 25:11؛ 51:3، 4). بىرەۋدى جارالاعان بولساڭىز، ودان دا بارىپ كەشىرىم سۇراڭىز. قاجەت بولسا، اقساقالداردىڭ كومەگىنە جۇگىنىڭىز (جاق. 5:14، 15). قاتەلىگىڭىزدەن ساباق الىپ، قايتالاماۋعا تىرىسىڭىز. سوندا ەحوبا سىزگە مىندەتتى تۇردە راقىم تانىتىپ، قاجەتتى كومەگىن بەرەدى (ٴزاب. 103:8—13).
ارىلۋ كەرەك اۋىرتپالىقتار
10. شامامىز جەتپەيتىنگە ۇمتىلۋ نەگە اۋىرتپالىق بولىپ تابىلادى؟ (عالاتتىقتارعا 6:4)
10 شامامىز جەتپەيتىنگە ۇمتىلۋ. ٶزىمىزدى جۇرتپەن سالىستىرساق، وزىمىزدەن تىم كوپ تالاپ ەتىپ، اۋىر جۇك ارقالاپ الامىز (عالاتتىقتارعا 6:4 وقىڭىز). ٶزىڭدى سالىستىرا بەرۋدىڭ ٴبىر قاۋپى — بىرەۋدىڭ جەتىستىگىن كورە الماي، باقتالاسىپ كەتۋىمىز مۇمكىن (عال. 5:26). ٴسۇيتىپ، «بىرەۋدىڭ ىستەگەنىن مەن دە ىستەيمىن» دەپ تىراشتانساق، ٵلىن بىلمەگەن الەك بولىپ، جانىمىزدى قيناپ جىبەرەمىز. ەگەر «ۇزاق كۇتتىرگەن ٷمىتتىڭ» ٶزى جۇرەكتى اۋىرتسا، ەشقاشان قول جەتپەيتىن نارسەنى كۇتۋ ودان دا اۋىر تيەدى ەمەس پە!؟ (ناق. س. 13:12). وزىمىزگە اۋىر جۇكتى ارتىپ العاندىقتان، ابدەن قاجىپ، ٴتىپتى سول جۇكتىڭ استىندا قالىپ كەتۋىمىز مۇمكىن (ناق. س. 24:10).
11. شامامىز جەتپەيتىنگە ۇمتىلماس ٷشىن نە ىستەسەك بولادى؟
11 بۇل اۋىرتپالىقتان قالاي ارىلامىز؟ ەحوبا ەشقاشان سىزدە جوق نارسەنى تالاپ ەتپەيدى. سوندىقتان ول كۇتپەگەن نارسەنى وزىڭىزدەن كۇتپەڭىز (قور. 2-ح. 8:12). ەحوبا ٴسىزدىڭ ەڭبەگىڭىزدى باسقالاردىكىمەن سالىستىرمايدى (مات. 25:20—23). وعان ٴسىزدىڭ جان-تانىڭىزبەن اتقارىپ جاتقان قىزمەتىڭىز، ٴسىزدىڭ ادالدىعىڭىز جانە ٴسىزدىڭ تاباندىلىعىڭىز اسا قىمبات. دەنساۋلىعىڭىزدى، جاسىڭىزدى، جاعدايىڭىزدى ەسكەرىپ، بۇرىنعىداي كوپ بەرە المايتىنىڭىزدى مويىنداڭىز. كورپەڭىزگە قاراي كوسىلىپ، قاراپايىم بولىڭىز. بالكىم، بارزيلاي سياقتى سىزگە كەيبىر تاپسىرمالاردان باس تارتۋ كەرەك شىعار (سام. 2-ج. 19:35، 36). يا بولماسا مۇسا سياقتى وزگەلەردىڭ كومەگىن قابىلداپ، مىندەتتەرىڭىزدى باسقالارمەن ٴبولىسۋ كەرەك بولار (مۇس. 2-ج. 18:21، 22). وسىلاي قاراپايىم بولساڭىز، شاماڭىز كەلمەيتىن نارسەگە ۇمتىلمايسىز جانە ٶمىر جارىسىن جۇگىرىپ وتۋگە كۇش ساقتايسىز.
12. ٴبىز وزگەنىڭ قاتە شەشىمىنە جاۋاپتىمىز با؟ ٴتۇسىندىرىڭىز.
12 وزگەنىڭ قاتە شەشىمى ٷشىن ٶزىمىزدى كىنالاۋ. ٴبىز وزگەلەر ٷشىن شەشىم قابىلداي المايمىز. بۇرىس تاڭداۋلارىنىڭ سالدارىنان دا قورعاي المايمىز. مىسالى، بىرەۋدىڭ ۇلى يا قىزى ەحوباعا قىزمەت ەتۋدى دوعارۋى مۇمكىن. مۇندايدا اتا-اناسىنىڭ جۇرەگى سىزدايدى، ارينە. بىراق ولار بالاسىنىڭ وسى شەشىمىنە وزدەرىن كىنالاسا، بۇل ولارعا زىلدەي اۋىرتپالىق بولادى. ال ەحوبا اتا-انالاردىڭ وسىنداي جۇكپەن جۇرگەنىن قالامايدى (ريم. 14:12).
13. بالاسى بۇرىس تاڭداۋ جاساسا، اتا-اناسى نە ىستەسە بولادى؟
13 بۇل اۋىرتپالىقتان قالاي ارىلامىز؟ ەحوبا بارلىعىمىزعا تاڭداۋ ەركىندىگىن بەرگەن. ٵربىر ادام ٶزى ٷشىن ٶزى شەشىم قابىلدايدى. ٴتىپتى ەحوباعا قىزمەت ەتۋ-ەتپەۋدى دە ٶزى شەشەدى. ەحوبا سىزدەن ٴمىنسىز اتا-انا بولۋدى تالاپ ەتپەيدى. قايتا، قولىڭىزدان كەلگەنشە تاربيەلەيدى دەپ كۇتەدى. بالاڭىز ٶزى جاساعان تاڭداۋىنا ٶزى جاۋاپتى، ٴسىز ەمەس (ناق. س. 20:11). سوندا دا ٴسىز بالا تاربيەسىندە جىبەرگەن قاتەلىكتەرىڭىزدى ويلاپ، ۋايىمدايتىن شىعارسىز. وندا ەحوباعا دۇعا ەتىپ، كەشىرىم سۇراڭىز. ىشتەگى سەزىمدەرىڭىزدى وعان اقتارىپ ايتىڭىز. وتكەندى قايتارىپ، جاعدايدى وزگەرتە المايتىنىڭىزدى ول تۇسىنەدى. بالاڭىز ٶزى ەككەندى ٶزى ورىپ جاتسا، ەحوبا سىزدەن ونى سالدارىنان قورعايدى دەپ كۇتپەيدى. سونداي-اق مىنانى ۇمىتپاڭىز: بالاڭىز ەحوباعا ورالۋدى شەشسە، ول ونى قۇشاق جايا قارسى الادى (لۇقا 15:18—20).
14. نەگە ٶزىمىزدى تىم قاتتى كىنالاۋدان ارىلۋىمىز كەرەك؟
14 ٶزىمىزدى كىنالاپ، جەگىدەي جەۋ. كۇنا جاساعاندا، ٶزىمىزدى ايىپتى سەزىنگەنىمىز ورىندى. بىراق شەكتەن تىس مۇڭعا باتىپ كەتكەنىمىزدى ەحوبا قالامايدى. بۇنداي اۋىرتپالىقتان ارىلعانىمىز ٴجون. ٶزىمىزدى تىم قاتتى كىنالاپ كەتتىك پە، جوق پا، ونى قالاي بىلۋگە بولادى؟ ٴسىز جاساعان كۇناڭىزدى مويىندادىڭىز با؟ وكىندىڭىز بە؟ قايتالاماۋعا بار كۇشىڭىزدى سالىپ جاتىرسىز با؟ سولاي بولسا، ەحوبا ٴسىزدى كەشىرگەنىنە سەنىمدى بولىڭىز (ەل. ٸس. 3:19). وسى قادامداردى جاساعاننان كەيىن دە ٶزىڭىزدى ايىپتاي بەرگەنىڭىزدى ەحوبا قالامايدى. ويتكەنى بۇل ادامدى جەپ تاستايتىنىن ەحوبا جاقسى بىلەدى (ٴزاب. 31:10). بۇنىڭ زيانى سونشا، ٴبىز قايعىعا باتىپ، ٶمىر ٷشىن جۇگىرەتىن جارىستان شىعىپ كەتە سالۋىمىز مۇمكىن (قور. 2-ح. 2:7).
ٴسىز شىن جۇرەكتەن وكىنگەن سوڭ، ەحوبا كۇناڭىزدى ەندى قايتىپ ويىنا المايدى، ٴسىز دە ويلاي بەرمەڭىز (15-ابزاستى قاراڭىز)
15. ٶزىمىزدى تىم شەكتەن تىس كىنالى سەزىنبەۋگە نە كومەكتەسەدى؟ (جوحاننىڭ 1-حاتى 3:19، 20) (سۋرەتتى دە قاراڭىز.)
15 بۇل اۋىرتپالىقتان قالاي ارىلامىز؟ ٶزىڭىزدى كىنالاپ، جەگىدەي جەپ جۇرسەڭىز، ەحوبانىڭ «تولىقتاي كەشىرەتىنىن» ويدا ۇستاڭىز (ٴزاب. 130:4). ول شىن وكىنەتىندەرگە: «مەن ولاردىڭ كۇناسىن ەسىمە المايمىن»،— دەپ ۋادە ەتەدى (ەرم. 31:34). دەمەك، ەحوبا ٴسىزدى كەشىرسە، ول ٴسىزدىڭ كۇناڭىزدى ۇمىتتى دەگەن ٴسوز. سوندىقتان كۇنالارىڭىزدىڭ سالدارىن تارتىپ جاتقانىڭىزدى ەحوبانىڭ ٴسىزدى كەشىرمەگەنى دەپ قابىلداماڭىز. سونداي-اق قاۋىمداعى جاۋاپكەرشىلىكتەردەن ايىرىلىپ قالعانىڭىزعا ٶزىڭىزدى توقپاقتاي بەرمەڭىز. ەحوبا كۇنالارىڭىزدى ويىنان شىعارىپ تاستاعان، سوندىقتان ٴسىز دە ويلاي بەرمەڭىز (جوحاننىڭ 1-حاتى 3:19، 20 وقىڭىز).
جەڭىسكە جەتەتىندەي جۇگىرىڭىز
16. ٶمىر ٷشىن جارىستا نەنى ٴتۇسىنۋىمىز قاجەت؟
16 ماڭگىلىك ٶمىر ٷشىن «جارىستا جۇلدەنى جەڭىپ الاتىنداي بولىپ جۇگىرۋىمىز» كەرەك (قور. 1-ح. 9:24). ول ٷشىن ٴبىز قانداي جۇكتى ارقالاۋعا ٴتيىستى ەكەنىمىزدى، ال قانداي اۋىرتپالىقتان ارىلۋ كەرەك ەكەنىن ٴتۇسىنۋىمىز قاجەت. بۇل ماقالادا سونىڭ كەيبىرىن قاراستىردىق. بىراق بۇدان دا باسقا اۋىرتپالىقتار بار. مىسالى، يسا: «مەشكەيلىك، ىشىمدىككە سالىنۋ جانە كۇندەلىكتى تۇرمىس ۋايىمى جۇرەكتەرىڭدى جاۋلاپ الماسىن»،— دەگەن (لۇقا 21:34). وسى جانە باسقا دا تارماقتاردان ٴسىز جارىستى اياعىنا دەيىن جۇگىرىپ ٶتۋ ٷشىن قاي جاعىنان جاقسارا الاتىنىڭىزدى بىلەسىز.
17. الدىمىزداعى قاشىقتىقتى جۇگىرىپ وتە الاتىنىمىزعا نەگە سەنىمدىمىز؟
17 ەحوبا بەرەتىن كۇشپەن ٶمىر ٷشىن جارىستا مارەگە جەتە الاتىنىمىزعا سەنىمدىمىز. سوندىقتان جىلدامدىعىڭىزدى ەش باسەڭدەتپەڭىز! (يشايا 40:29—31). جۇلدە الۋ ٷشىن بار كۇشىن سالىپ جۇگىرگەن ەلشى پاۋىلدان ۇلگى الىڭىز (ٴفىلىپ. 3:13، 14). بۇل جارىستا ٴسىزدىڭ ورنىڭىزعا باسقا بىرەۋ جۇگىرىپ بەرە المايدى، بىراق ەحوبانىڭ كومەگىمەن ٴسىز جەڭىمپاز بولا الاسىز. ەحوبا سىزگە كەرەكتى جۇكتى الىپ جۇرۋگە، ال كەرەك ەمەسىنەن ارىلۋعا كومەكتەسەدى (ٴزاب. 68:19). ەحوبانىڭ قولداۋىمەن ٴسىز الداعى قاشىقتىقتى تاباندىلىقپەن جۇگىرىپ ٶتىپ، مارە سىزىعىنان اتتاپ وتەسىز!
65-ٵن العا ۇمتىل!
a ٴبارىمىز ماڭگىلىك ومىرگە اپاراتىن جولدا جۇگىرىپ كەلەمىز. بىراق كادىمگى جۇگىرۋشىلەردەن ايىرماشىلىعىمىز — ٴبىزدىڭ ارقالاعان جۇگىمىز بار. ول — ەحوباعا باعىشتالعاندا بەرگەن انتىمىزدا تۇرۋ، وتباسىلىق مىندەتتەرىمىزدى اتقارۋ جانە قولىمىزبەن ىستەگەندى موينىمىزبەن كوتەرۋ. الايدا لاقتىرىپ جىبەرەتىن، كەرەك ەمەس جۇكتەر دە بار. ولارعا نە جاتادى؟ بۇل ماقالا سونى انىقتاۋعا جانە ماڭگىلىك ٶمىر ٷشىن جارىستا جۇگىرە بەرۋگە كومەكتەسەدى.
b jw.org تور بەكەتىنەن «وتباسىڭىز بەرەكەلى بولسىن» دەگەن ماقالالار توپتاماسىن، «نەكە جانە وتباسى»، «جاستارعا كومەك» دەگەن ساناتتاردى قاراپ كورىڭىز. مىسالى، ەرلى-زايىپتىلارعا: «سيلاستىق»، «ريزاشىل بولىڭىز»؛ اتا-انالارعا: «بالاعا سمارتفوندى دۇرىس پايدالانۋدى ۇيرەتۋ»، «جاسوسپىرىم بالاڭىزبەن سويلەسە ٴبىلىڭىز»؛ جاستارعا: «كيبەر بۇزاقىلىققا كەزىكسەم، نە ىستەيمىن؟»، «كوڭىل كۇيىمدى قالاي قاداعالاسام بولادى؟» دەگەن ماقالالار بار.
