1. Hebræerit 12:1 naapertorlugu inuunivimmut arpannerput naammas­siniarlugu qanoq iliortariaqarpugut?

 BIIBILIMI kristumiutut inuunerput arpaliunnermut assersuun­neqarpoq. Apuuffissamut apuuttut inuunermik naassaan­ngitsumik akissarsisin­neqassapput. (Tim 2. 4:7, 8) Sapinngisamik arpaannar­tariaqarpugut, pingaartumik apuuffis­satsinnut aatsaat taama qanitsigileratta. Apustilip Paulusip, arpannerminik naammas­sinnissimasup, arpannermi apuunnis­satsinnut iluaqutigisin­naasarput eqqaavaa. Kajumis­saarpaatigut ‘oqimaaqutit tamaasa piiarlugillu arpaliunnermi peqataaf­figilik­katsinni pinertusaarluta arpassasugut’. – Hebræerit 12:1 atuaruk.

2. ‘Oqimaaqutit tamaasa piiarnissaat’ qanoq isumaqarpa?

² Paulusi allammat ‘oqimaaqutit tamaasa piiassagigut’ isumaqarpa kristumiut nammataqar­tariaqan­ngitsut? Naagga, una pivaa: Oqimaaqutit pisariaqan­ngitsut tamaasa piiassagigut. Oqimaaqutit taamaattut arreequtigiin­narlugillu qasusaatigiin­narsinnaavagut. Tunniutiin­nassanngikkutta pisariaqan­ngitsunik nammataqar­nerluta paasiniar­tariaqarparput piiarlugillu. Aappaatigulli nammatassagut pisariaqartut nammaan­nassavagut, taamaaliun­ngikkuttami arpaqataajun­naarsin­neqarsin­naavugut. (Tim 2. 2:5) Taavami suut nammassavagut?

3. (a) Galaatiamiut 6:5 naapertorlugu suna nammassavarput? (b) Allaaserisami matumani suut sammissavagut, aamma sooq?

 ³ Galaatiamiut 6:5 atuaruk. Uani Paulusip inuttut tamatta immikkut nammatatsinnik Guutimut akisussaaf­feqarnerput pivaa. Akisussaaf­fippullu taanna inuup allap tigummiarsin­naanngilaa. Allaaserisami matumani sammissavarput suut nammineq nammatatsinnut ilaanersut qanorlu nammassin­naagigut. Aamma paasissavarput oqimaaqutit suut pisariaqan­ngitsumik nammannerlugit qanorlu milorius­sinnaanerlugit. Nammatassagut kisiisa nammakkutsigit pisariaqan­ngitsullu miloriullugit arpannitsinni inuunivimmut apuutissaagut.

4. Sooq Jehovamut tunniul­luinnarsimanerput nanertuutaanngila? (Aamma asseq takuuk).

⁴ Jehovamut pisussaaffipput. Jehovamut tunniul­luinnaratta neriorsorparput kiffartorfigiumallugu piumasaatullu iliorniarluta. Neriorsuuterpullu eqqortit­tariaqarparput. Tamanna akisussaaf­fiugaluartoq annertooq nanertuutaanngilaq. Jehovammi piumasaatut  iliorsin­naatitaalluta pinngor­titaavugut. (Saqq 4:11) Anersaakkut pisariaqar­titaqar­tilluta imminullu assililluni pinngor­timmatigut tassunga qanillisin­naavugut taassumalu piumasaa malillugu iliortarnerput nuannaarutigalugu. (Tuss 40:9) Aamma taamaalioraangatta Jiisusilu ilaaraangatsigu nakussatsit­tarpugut. – Mat 11:28-30.

5. Jehovamut neriorsuutinnik eqqortitsinissannut suna iluaqutigisin­naaviuk? (Johannesimit 1. 5:3)

⁵ Nammagassaq qanoq nammassin­naaviuk? Uku marluk iluaqutigisin­naavatit. Siullertut, Jehovamut asanninnerit nakussatsittuaruk. Taamaaliorsin­naavutit ilinnut ajunngitsuliarpassuisa iliuuseriumaagas­saasalu eqqarsaatigeq­qissaar­tarnerisigut. Guuti asanerujar­tortillugu naalannissaa ajornan­nginnerutissavat. (Johannesimit 1. 5:3 atuaruk). Aappaattut, Jiisusi ilaaruk. Jehovamut ikioqqulluni qinujuartarami akissarsiassanilu siunerminiittoq eqqarsaatigiuar­taramiuk Guutip piumasaa malittuaannarpaa. (Hebr 5:7; 12:2) Jiisusitut Jehovamut nakussatseq­qullutit qinusarit inuunermillu naassaan­ngitsumik neriuut eqqarsaatin­niitittuarlugu. Guutimut asanninnerit ineriar­tortittuarukku Erneralu ilaarlugu Jehovamut neriorsuutitit tamaasa eqqortis­sinnaas­savatit.

6. Sooq ilaqutariinnut akisussaaffipput eqqortit­tariaqarparput? (Aamma asseq takuuk).

⁶ Ilaquttatsinnut pisussaaffipput. Inuunivimmut arpannitsinni Jehova Jiisusilu ilaquttatsinnit asanerus­savagut. (Mat 10:37) Tamannali isumaqanngilaq Guutimit Jiisusimillu iluarisaanis­satsinnut akornutaasoralugit ilaquttatsinnut pisussaaffipput sumigin­nassagipput. Tassami Guutimit Jiisusimillu iluarisaas­sagutta ilaquttatsinnut pisussaaffipput eqqortit­tariaqarparput. (Tim 1. 5:4, 8) Taamaalioruttalu pilluaatigis­savarput. Jehovammi nalunngilaa aappariit asaqatigiil­lutillu ataqqeqatigiikkunik, angajoqqaat meeqqaminnik asannillutik perorsaagunik aamma meeqqat angajoq­qaaminnut naalakkunik ilaqutariittut pilluarlutik inuusinnaasut. – Ef 5:33; 6:1, 4.

7. Jehovap ilinnut iliuusereqqusai qanoq ilaqutariinni naammas­sisinnaavigit?

⁷ Nammagassaq qanoq nammassin­naaviuk? Eqqortuusorisannut, kulturinni nalingin­naasunut ilisimatuul­luunniit siunnersuutaannut maleruutiinnarnak ilaqutariinni uiuguit, nuliaaguit qitornaaguil­luunniit Biibilimi siunnersuutitsialaat tutsuigikkit. (Uss 24:3, 4) Biibililersaarutaatigut atorluartakkit. Taakkunani najoqqutassianik Biibilimeersunik maleruaasin­naanermut atoriaan­naasunik siunnersuuteqarpoq. Assersuutigalugu aappariit, angajoqqaat inuusut­tuaqqallu unamminiar­nartitaat pillugit nittartak­katsinni jw.org-imi atorluarsin­naasunik paasissutis­saqarpoq. b Ilaquttatit maleruaan­ngikkaluarpataluunniit illit Biibilimi siunnersuutit maleruar­niarlugit aalajangiusimajuk. Taamaalioruit aamma ilaquttavit iluaqutigissavaat, illillu Jehovap pilluaq­qusinera nuannaarutigissavat. – Pet 1. 3:1, 2.

8. Aalajangikkagut uagutsinnut qanoq sunniuteqarsin­naappat?

⁸ Aalajangik­katsinnut akisussaanerput. Jehovap nammineq aalajangiisin­naatippaatigut, kissaatigaalu ajunngitsumik aalajangiinitta kinguneri iluaqutigis­sagigut. Ajortumilli aalajangiinitta kinguneranut sernigineq ajorpaatigut. (Gal 6:7, 8) Taamaattumik aalajangiinerlus­simagutta, isumaal­liorluta  oqarsimagutta iliuuseqarsimagut­taluunniit kingunipilui atortariaqarpagut. Apeqqutaatillugu susimanerluta immaqa ilerasuutigis­savarput. Nalunngin­natsiguli aalajangik­katsinnut akisussaasuulluta ajortuliatta nassuerutiginis­saannut, iluarsiniar­nissaannut kukkussutigeq­qinngin­nissaannullu kajumis­sissutigisin­naavarput. Taamaaliorneq inuunivimmut arpaqataajuaan­narnissatsinnut iluaqutigisin­naavarput.

9. Aalajangiinerlus­simaguit qanoq iliorsinnaavit? (Aamma asseq takuuk).

⁹ Nammagassaq qanoq nammassin­naaviuk? Aalajangiinerlus­simaguit qanoq iliorsinnaavit? Akueriuk pereersut allanngor­tissinnaan­nginnakkit. Aalajangiinerlunnerit pillugu imminut illersornikkut imminul­luunniit pisuutinnikkut allalluunniit pisuutin­nerisigut nukitit atulussin­naqinagit. Akerlianilli kukkussutitit nassuerutigikkit, maannamiillu pissutsini atukkanni sapinngisamik iliuuseqarit. Kukkusimanerit pillugu pisuusutut misigiguit maniguullutit qinunikkut Jehova saaffigiuk, kukkusimanerit nassuerutigiuk isumakkeerfigeq­qullutillu. (Tuss 25:11; 51:5, 6) Ajuallatsis­simasatit utoqqatserfigikkit, pisariaqarpallu utoqqaanertanut ikioqqugit. (Jaak 5:14, 15) Kukkussutitit ilinniutigikkit iliuusereq­qinnaveersaarlugillu. Taamaalioruit qularis­sanngilat Jehovap nallittorumaaraatit pisariaqar­titannillu tapersersorumaarlutit. – Tuss 103:8-13.

10. Iliuuseqar­nerusariaqartutut misigiuaannarneq sooq nanertuutaava? (Galaatiamiut 6:4)

¹⁰ Iliuuseqar­nerusariaqartutut misigiuaannarneq. Allanut naleqqiut­tarutta nanertuutigilersin­naavarput. (Galaatiamiut 6:4 atuaruk). Taamaalior­tuarutta usorulerlutalu unammil­lerumatulersin­naavugut. (Gal 5:26) Allat iliuuserisartagaat uagut saperlugit iliuuseriniar­tuarutsigit ajoqutigisin­naavarput. Aamma una eqqarsaatigiuk: Biibilimi allassimavoq ‘sivisunaartumik pissamaarneq’ nikallor­narsinnaasoq. (Uss 13:12) Piviusun­ngortis­sinnaan­ngisarpullu anguniar­tuarutsigu angunagulu nikallor­neruliin­nassaagut. Taamaaliorutta inuunivimmut arpannitsinni qasulerluta arriillisin­naavugut. – Uss 24:10.

11. Sapikkannik imminut piumaffigival­laanngin­nissannut suna iluaqutigisin­naaviuk?

¹¹ Qanoq peersin­naaviuk? Jehovamit piumaffigineqarnerit sinnerlugu imminut piumaffigeqinak. Jehovap iliuuserisin­naanngisannik piumaffigin­ngisaan­narpaatit. (Kor 2. 8:12) Eqqaamajuk iliuutsitit allat iliuusiinut naleqqiun­navianngimmagit. (Mat 25:20-23) Illit uummatit tamakkerlugu kiffartornerit, aalajaannerit pinertusaar­nerillu pingaartippai. Anneruniajuillutit akueriuk utoqqalinerit, peqqissutsit atukkatillu pissutigalugit iliuusererusutatit tamaasa iliuuserisin­naannginnakkit. Barzillajitut timikkut pisinnaasavit killeqarnera nassuerutigalugu suliassin­neqarninnut naaggaarsin­naassuseqarit. (Sam 2. 19:36, 37) Moorsisitut ikiorneqarnissat akueriuk naleqquppallu suliassat allanut agguataarlugit. (Mos 2. 18:21, 22) Anneruniajuitsuuguit inuunivimmut arpanninni nukillaarsaatigisannik imminut piumaffigival­laassan­ngilatit.

12. Allat aalajangiinerlun­nerannut akisussaavugut? Nassuiaruk.

¹² Allat aalajangiinerlun­nerannut akisussaasutut misigineq. Allat aalajangiisus­sinnaan­ngilagut. Aamma aalajangiinerlunnerisa kingunerinut tamatigut illersorsin­naanngilagut. Assersuutigalugu erneq panilluunniit Jehovamut kiffartorun­naarniarluni aalajangerpat angajoqqaat aliasuutigingaarsin­naavaat. Angajoqqaalli qitornamik aalajangiinerlun­neranut  imminut pisuutittut oqimaangaartumik nammagas­sittarput. Taama oqimaatsigisumik nammataqar­nissaannik Jehovap piumaffiginngilai. – Rom 14:12.

13. Qitornaq aalajangiinerluppat angajoqqaap suut eqqarsaatigissavai?

¹³ Qanoq peersin­naaviuk? Akueriuk Jehovap tamatta inuttut ataasiakkaatut nammineq aalajangiisin­naatimmatigut. Tassa imminut kiffartus­sanersugut nammineq aalajangiisin­naatippaatigut. Nalunngilaa angajoqqaatut kukkujuitsuun­ngitsutit, sapinngisannik iliuuseqarnissat kissaatigiinnarpaa. Qitornavit aalajangikkani nammineq akisussaaf­figissavaa, illiunngitsoq. (Uss 20:11) Immaqali angajoqqaatut kukkussutitit isumakuluutigaatit. Taamaappat Jehova ilisimatiguk qanoq misiginerlutit isumakkeerfigeq­qullutillu. Nalunngilaa pereersut allanngor­tissinnaan­ngikkitit. Aammali piumaffigin­ngilaatit qitornat aalajangiinerlunnerisa kingunipiluinut illersussagit. Eqqaamajuk qitornat Jehovamut uterniarluni iliuuseqalerpat Jehovap tikilluaq­qungaassagaa. – Luk 15:18-20.

14. Sooq pisuusutut misigiuaannarneq peertariaqarparput?

¹⁴ Pisuusutut misigiuaannarneq. Ajortuliorsimatilluta pisuusutut misiginerput pissusis­samisoorpoq. Pisuusutulli misigiuaan­narnissarput Jehovap kissaatiginngilaa. Oqimaaqut taanna peertariaqarparput. Qanoq nalussan­ngilarput pisuusutut misigiuaan­narnerput pisariaqan­ngikkaluartoq? Ajortuliarput nassuerutigisimagutsigu peqqissimillutalu aamma sapinngisatsinnik ajortuliarput ajortuliareq­qinnaveersaarutsigu nalussan­ngilarput Jehovap isumakkeerfigisimagaatigut. (ApS 3:19) Taamaalioreerutta pisuusutut misigiuaan­narnissarput Jehovap kissaatiginngilaa. Nalunngilaa taamatut misigiuaannarneq qanoq ajoqutaatigisoq. (Tuss 31:11) Aliasun­nerujus­suarmik sapilersitaagutta inuunivimmut arpannitsinni tunniutiin­nartoorsin­naavugut. – Kor 2. 2:7.

15. Pisuusutut misigiuaannaruit suut eqqarsaatigisin­naavigit? (Johannesimit 1. 3:19, 20) (Aamma asseq takuuk).

 ¹⁵ Qanoq peersin­naaviuk? Pisuusutut misigiuaannaruit Guutip ilumoorluni isumakkeerfigin­nittarnera eqqarsaatigiuk. (Tuss 130:4) Ilumoorlutik peqqissimisut isumakkeerfigisimasani neriorsorpai ‘ajortuliaat eqqaaqqin­niarnagit’. (Jer 31:34) Tassa imaappoq: Ajortuliannik isumakkeerfigereersimagunitit eqqaaqqin­ngisaan­nassavai. Taamaattumik ajortuliavit kingunipilui atorukkit eqqarsas­sanngilatit Jehovamit isumakkeerfigineqarsimanak. Ajortuliarisimasatillu pillugit ilagiinni immikkut pisinnaatitaaffitit annaasimagukkit nikallus­sanngilatit. Ajortuliatit Jehovap eqqarsaatigiuaan­nanngilai, aamma illit taamaalius­sanngilatit. – Johannesimit 1. 3:19, 20 atuakkit.

16. Inuunivimmut arpannitsinni suna paasisariaqarparput?

¹⁶ Inuunivimmut arpaliunnermi ‘ajugaajumalluta arpattariaqarpugut’. (Kor 1. 9:24) Taamaaliorsin­naavugut suut nammattariaqar­nerlugit oqimaaqutillu suut piissanerlugit paasigutsigu. Allaaserisami matumani nammattariaqakkatta peertariaqak­kattalu ilaannaat sammivagut. Allalli aamma eqqaaneqarsin­naagaluarput. Jiisusi oqarpoq ‘nerival­laarneq, imerpal­laarneq inuunermilu isumakuluutit’ nanertuutigilersin­naagigut. (Luk 21:34) Allassimaffiit eqqaariikkagut allallu iluaqutigalugit inuunivimmut arpanninni sutigut allannguisariaqar­nerlutit paasisinnaavat.

17. Sooq qularin­ngilarput inuunivimmut arpannitsinni ajugaas­salluta?

¹⁷ Jehovap pisariaqar­titatsinnik nakussatsim­matigut qularis­sanngilarput inuunivimmut arpannitsinni ajugaas­salluta. (Es 40:29-31) Taamaattumik arriilleqinak! Apustili Paulusi, akissarsiassaq pissarsiariumallugu tamaviaarluni arpattoq, ilaaruk. (Flp 3:13, 14) Allap arpassus­sinnaan­ngilaatit. Jehovalli ikiuineratigut sapernavianngilat. Nammanninni oqimaaqutinillu pisariaqan­ngitsunik piiaaninni taassuma ikiorsin­naavaatit. (Tuss 68:20) Jehovap najormatit arpanninni pinertusaarsin­naavutit ajugaal­lutillu!