1. Kala kyosoneke mu divulu dya Jihebelewu 12:1, ihi itwatokola kubhanga phala kulenga kate bhu mbambe?

 O BIBIDYA isokesa o mwenyu wa Jikidistá ni kulenga. Oso alenga kate bhu kididi kya axindi anda tambula o mwenyu wakalelaku. (2 Ti. 4:7, 8) Twatokala kubhanga yoso phala kusuluka ni kulenga, bengebenge mu kwijiya kwila twazukama kya bhu kididi kyatuxindi. Poxolo Phawulu watena kulenga kate bhu mbambe, yu wazwela ihi itena kutukwatekesa ku bhanga kiki. Mwene wa tutendelesa ‘kutula o ima yoso ya tunemena . . . ni tu lenge ni kukolokota o dikanga dya tukala kupholo.’—Tanga Jihebelewu 12:1.

2. Ihi ilombolola kutula ‘o ima yoso ya tunemena’?

² Kyoso poxolo Phawulu kya zwela kwila twatokala ‘kutula o ima yoso ya tunemena,’ o kwila mwene wexile muzwela kuma o Jikidistá katokala kwambata kima kyoso kyoso kyaneme? Kana. Muveji dya kiki, mwene wexile muzwela kwila ki twatokala kwambata o imbamba yaneme ki twayibhindamena. O imbamba yaneme kala yiyi, itena kututohokesa. Phala kukolokota twatokala kuditonginina ni lusolo, ni kuxisa kimbamba kyoso kyoso kyaneme, kyeji tuzozesa. Maji sayi imbamba yaneme itwatokala kwambata. Mukonda se ki tukibhange kyanda londekesa kwila ki twamesena dingi kulenga. (2 Ti. 2:5) Maji imbamba yebhi itwatokala kwambata?

3. (a) Kala kilondekesa o divulu dya Ngalásya 6:5, kima kyebhi kitwatokala kwambata? (b) Ihi itwandadilonga mu milongi yiyi ni mukonda dyahi?

³ Tanga Ngalásya 6:5. Poxolo Phawulu wa jimbulula kimbamba kitwatokala kwambata. Mwene wambe kwila, “kala muthu  wanda kwambata o kimbamba kyê.” Phawulu bhabha wamesenene kuzwela kwila etwenyoso twala ni ikalakalu, ikingila Jihova kwila tu ibhanga. Mu milongi yiyi twandamona se o kwambata o ‘kimbamba kyetu’ kwalungu ni ihi, ni kyebhi ki tutena kubhanga kiki. Twandamona we imbamba yaneme maji ki twayibhindamena, nange itutena kwambata se kukijiya, ni kyebhi kitutena ku itula. O kwambata o imbamba yetu ni kuxisa o ima yaneme, kyanda tukwatekesa kusuluka mu kulenga kate ki twanda bhixila bhu mbambe ya mwenyu wakalelaku.

4. Mukonda dyahi o kukumbidila o kikanenu kyetu kya kudibhakula ki kima kya bhonzo kyavulu? (Tala we ofoto.)

⁴ O kikaknenu kitwabhange mu kudibhakula. Kyoso kitwadibhakula kwa Jihova, twamukanena kwila tweji mubheza ni ku bhanga o vondadi ye kate ku hadya ni hadya. Twatokala kukumbidila o kikanenu kiki. O kubhanga yoso itwakanena kwa Jihova, ki kima kyakutonoka, maji ki kyabhonzo kyavulu. Tuzwela kiki mukonda Jihova wa tubhange phala kubhanga o vondadi ye. (Dij. 4:11) Mwene wa  tubhange ni vondadi ya ku mwijiya ni kumubheza, wa tubhange we mu kidifwanganu kye. Mukonda dya kiki tutena kuzukama kwa Jihova, ni kusanguluka mu kubhanga o vondadi ye. (Jisá. 40:8) Kyoso kitubhanga o vondadi ya Nzambi ni kubelesela Mon’e, tu ‘sanga kutululuka’ ku mwenyu wetu.—Mat. 11:28-30.

5. Ihi itena ku kukwatekesa kukumbidila i wakanena mu kudibhakula? (1 Nzwá 5:3)

⁵ Kyebhi kitutena kwambata o kimbamba kiki? Kwala ima iyadi itena kukwatekesa. Kyadyanga, suluka mu kukolesa o henda ye kwa Jihova. Eye utena kubhanga kiki, mu kuxinganeka mu ima yoso yambote yakubhangela kya Jihova, ni mu mabesá oso anda kubhana. Kyoso o henda ye kwa Jihova iya ni kukula, ki kyanda kubhonza kumubelesela. (Tanga 1 Nzwá 5:3.) Kyakayadi, kayela o phangu ya Jezú. Mwene watenene kubhanga o vondadi ya Jihova mukonda wexile musamba mukubhinga kikwatekesu, yu walungile o muxima mu mabesá eji tambula. (Jih. 5:7; 12:2) Kala kyabhangele Jezú, samba kwa Jihova mukubhinga nguzu, kana kutexa o kidyelelu kya mwenyu wakalelaku. Mu kukolesa o henda kwa Jihova ni kukayela Jezú, wandatena kukumbidila yoso i wakanena kwa Jihova.

6. Mukonda dyahi twatokala kudikila o ibhindamu ya mwiji wetu? (Tala we ofoto.)

⁶ O Ikalakalu yetu ku mwiji. Mu kulenga kwetu phala kutambula o mwenyu, twatokala kuzola dingi Jihova ni Jezú, o jindandu jetu ndenge. (Mat. 10:37) Maji kiki, ki kilombolola kwila ki twabhingi kukumbidila o ikalakalu yetu ku mwiji. Mu kidi, se twamesena kusangulukisa Jihova ni Jezú, twatokala kudikila o ibhindamu ya mwiji wetu. (1 Ti. 5:4, 8) Se kyene kitubhanga, o kusanguluka kwetu kwanda dibandekesa. Jihova wejiya kwila o miji isanguluka ngo, kyoso o munumi ni muhatu aditalatala ni henda ni kudixila, o jitata a zola o twana ni kwalonga, anga o twana we abelesela o jitata.—Efe. 5:33; 6:1, 4.

7. Kyebhi ki utena ku kumbidila o kikalakalu kye ku mwiji?

⁷ Kyebhi kitutena kwambata o kimbamba kiki? Kikale se u munumi, muhatu mba mona, kayela o itendelesu ya unjimu itusanga mu Bibidya. Kana kudyelela mu unjimu we, mba kukayela o ima ibhanga o athu oso mu dyembu mu watungu. Kana kukayela o jindunge jibhana o athu amba kwila ala jingijiye. (Jisa. 24:3, 4) Kalakala kyambote ni madivulu m’etu alungu ni Bibidya. Ene ala ni jindunge javulu jitukwatekesa kumona kyebhi kitutena kukayela o itumu ya Bibidya. Mu kifika, mu sayte jw.org mwala milongi yavulu yalungu ni ibhidi yene mudibhana nayu o makaza, jitata ni minzangala mu izuwa ya lelu. b Kayela o itumu ya Bibidya, ne mwene se athu amukwa ku mwiji ka mesena kukibhanga. Mu kubhanga kiki, o mwiji we wanda katula mbote yavulu, eye wanda tambula o mabesá a Jihova.—1 Ph. 3:1, 2.

8. O ima itusola itena kutubhekela ihi?

⁸ Kuxikina o ibhidi mba o mbote ijila mu ima itusola. Jihova watubhana o ufolo wa kusola, yu wamesena kwila tusola kyambote ni tusanguluke. Maji se tusola kyayibha, mwene ka ndafidisa o ibhidi yanda tubhekela o kima kitwasolo. (Nga. 6:7, 8) Mukonda dya kiki, twabhingi kuxikina o ibhidi ijila mu ima yayibha itusola, ituzwela mba itubhanga. O kima kitwabhange kitena kutubhangesa kukala ni kitongolwelu kyaneme. Maji o kwijiya kwila  twatokala kuxikina o ibhidi ijila mu ima itusola, kitena kutukwatekesa kufisala o ituxi yetu, ni kubhanga yoso phala ki tukivutukile dingi. Kubhanga kiki, kitena kutukwatekesa kusuluka mu kwenda mu njila ya mwenyu.

9. Ihi i utena kubhanga se wasolo kima mu ukexilu wayibha? (Tala we ofoto.)

⁹ Kyebhi kitutena kwambata o kimbamba kiki? Se wasolo mu ukexilu wayibha maji wadyela, ihi i utena o kubhanga? Xikina kwila ki utena kulungulula o ima yabhiti kya. Kana kudibotesa kithangana ni nguzu mu kujimbulula o kima kiwabhange mba kutatela akwenu mukonda dya kitondalu kye. Mu veji dya kiki, xikina kwila walweza, anga dikwatenene mu ima i utena kubhanga kindala. Se wamuditatela mukonda dya kima kiwabhange, londekesa o kulenduka, samba kwa Jihova, xikina o kitondalu kye, mubhinge n’akuloloka. (Jisá. 25:11; 51:3, 4) Bhinga we muloloki ku athu uwaluwalesa, sota o kikwatekesu kya tufunga, se kwabhingi. (Tiy. 5:14, 15) Dilonge ni itondalu ye, bhanga yoso phala ku ivutukile dingi. Se kyene ki ubhanga, ijiyakyu kwila Jihova wanda kulondekesa henda ni ku kukwatekesa.—Jisá. 103:8-13.

10. Mukonda dyahi o kuxinganeka kwila o itwamubhanga ki yasoko kitena kukala kimbamba kyaneme kyavulu? (Ngalásya 6:4)

¹⁰ Kuxinganeka kwila o itwamubhanga ki yasoko. Tutena kuluwala kyavulu kyoso ki tudisokesa ni akwetu. (Tanga Ngalásya 6:4.) Se tuya ni kudisokesa ni akwetu, tutena kukala tu akwa lwimbi ni kumesena ku kala kota akwetu ndenge. (Nga. 5:26) Se tusota kubhanga o ima yamubhanga we akwetu, maji ki twala ni kutena kwa ku ibhanga, tutena kudibhekela ibhidi. O Bibidya itutangela kwila o “kudyelela kwa kokoloka, ku sukisa o muxima.” (Jisa. 13:12) Kyenyiki, xinganeka phe ngo o kuluwala kutena kwijila mu kudyelela mu kima kitwejiya kwila nuka twandatena kukala nakyu! Se tubhanga kiki, tutena kuluwala kyavulu mba kubhwila ni kutunda mu njila ya mwenyu.—Jisa. 24:10.

11. Ihi i utena kubhanga phala ki ukingile ima ki yanda dikumbidila?

¹¹ Kyebhi ki utena kweha o kimbamba kiki kyaneme? Bhanga ngo o ima ikubhinga Jihova, muveji dya kusota kubhanga o ima yatundu o nguzu ye. Mwene ka kingila kwila umubhana kima k’wala nakyu. (2 Ko. 8:12) Ejiya kyu kwila, Jihova ka sokesa o ima i ubhanga ni ibhanga akwenu. (Mat. 25:20-23) Jihova ubhana valolo yavulu mu sidivisu iwene mubhanga ni muxima woso, mu kixikanu kiwala nakyu ni mu kukolokota kwe. Kala u muthu walenduka, xikina kwila kindala nange ki wandatena kubhanga yoso iwamesena mukonda dya kitala kye, sawidi mba kima kyengi. Kala Badizilayi, kana kuxikina kikalakalu nange kyanda ku kubhonza kukibhanga mukonda dya sawidi ye mba kitala kye. (2 Sam. 19:35,36) Kala Mozé, bhinga kikwatekesu anga wana o ikalakalu ni akwenu, se kibhana. (Mak. 18:21, 22) O kulenduka kwanda kulanga phala ki ukingile ima ki yandadikumbidila anga ikubhangesa kubhwila mu kwenda mu njila ya mwenyu.

12. O kwila twatokala kuditatela mukonda dya ima yayibha isola akwetu? Jimbulula.

¹² Kudivwa kwila eye wala ni kikuma kya ima yayibha yasolo akwenu. Etu ki tutena kusola o ima bhu kididi kya akwetu, ki tutena we kwa langa ku ibhidi ijila mu ima yasolo. Mu kifika, mona wa muhatu mba wa diyala, nange usola kweha kusidivila Jihova. Kiki kitena kubhekela ndolo yavulu ku jitata. Maji, se ene a ditatela mukonda dya kima kyabhange o  mona, kiki kitena kukala kimbamba kyaneme kyavulu phala ku kyambata. Maji ki kyene kyamesena Jihova ku jitata.—Lom. 14:12.

13. Kyebhi o jitata kyatena kudibhana ni ima yayibha yasolo o twana twawu?

¹³ Kyebhi ki utena kweha o kimbamba kiki kyaneme? Lembalala kwila Jihova wabhana o ufolo wa kusola ku athu oso. Mwene wehela kwila kala muthu udisolela mudye. Kiki kyalungu we ni kusola kumusidivila mba kana. Jihova wejiya kwila eye u mama mba u tata, ki u muthu wayuka kana. Mwene wamesena kwila ubhanga ngo yoso i utena kubhanga. O mon’e mwene wala ni kikuma mu ima yasolo, k’eye kana. (Jisa. 20:11) Ne kiki, eye nange usuluka hanji mu kuxinganeka kwila sayi kilwezu kiwate mu kusasa mon’e. Kyenyiki, samba kwa Jihova, mutangele kyebhi kiwamudivwa, mubhinge muloloki. Jihova wejiya kwila eye ki utena kuvutuka kudima ni kulungulula o ima. Ku mbandu yamukwa, Jihova ka mesena kwila eye usuluka mu kulanga mon’e ku ibhidi yejila mu ima yayibha yasolo. Lembalala kwila, se mon’e ubhanga nguzu phala kuvutuka kwa Jihova, mwene wanda mutambulula ni henda yoso.—Luk. 15:18-20.

14. Mukonda dyahi o kuditatela ithangana yoso kimbamba kyaneme kitwatokala kuxisa kudima?

¹⁴ Kuditatela ithangana yoso. Kyoso kituta kituxi, ki kyayibha kuditatela. Maji Jihova ka mesena kwila tusuluka mu kudivwa mu ukexilu yu. Kiki kimbamba kyaneme kitwatokala kuxisa kudima. Maji kyebhi kitutena kwijiya se twamuditatela kyavulu mba kana? Se twafisala o kituxi kyetu, twadyela, anga twabhange yoso itutena phala ki tuvutuke dingi mu itondalu yiyi, tutena kudyelela kwila Jihova wa tuloloka. (Ika. 3:19) Kyoso kituzubha kubhanga o ima yoso yiyi, Jihova ka mesena kwila tusuluka mu kuditatela. Mwene wejiya kwila o ibanzelu yiyi itena kutubhanga kyayibbha. (Jisá. 31:10) Se twehela kwila o kuluwala kututolola, ki twanda tena kusuluka mu njila ya mwenyu.—2 Ko. 2:7.

15. Ihi itena ku kukwatekesa kutolola o ukexilu wa kuditatela kyavulu? (1 Nzwá 3:19, 20) (Tala we ofoto.)

 ¹⁵ Kyebhi ki utena kweha o kimbamba kiki kyaneme? Se wamudivwa hanji kyayibha mukonda dya kituxi kiwate, xinganeka jinga ku muloloki wa Jhova. (Jisá. 130:4) Phala yo a dyela o ituxi ya ni muxima woso, Jihova wakanena: “O ituxi yâ kinga kà ixinganeka dingi.” (Jel. 31:34) Kiki kilombolola kwila Jihova nuka dingi wanda xinganeka mu ituxi ya kuloloka kya. Kyenyiki, se wamudibhana ni ibhidi mukonda dya kituxi kiwate, kana kubanza kwila kiki kya mubhita mukonda Jihova ka kuloloka. Kana kuditatela jinga se o ilwezu iwate m’ukulu yabhangesa ku kukatula maujitu mu kilunga. Jihova ka xinganeka mu ima yayibha iwabhange m’ukulu, eye we ki watokala kubhanga kiki.—Tanga 1 Nzwá 3:19, 20.

16. Kuma twamulenga mu nzumbi, ihi itwatokala kulembalala?

¹⁶ Kuma twala mu njila ya mwenyu, twatokala ‘kulenga phala kutambula o kikowe.’ (1 Ko. 9:24) Twanda tena ngo kubhanga kiki, se twijiya kutungula o imbamba yaneme itwatokala kwambata ni imbamba yaneme itwatokala kuxisa kudima. Mu milongi yiyi, twamono ngo ifika yofele yalungu ni ima itwatokala kwambata ni itwatokala kuxisa. Maji kwala dingi ima yamukwa. Jezú wambe kwila tweji tena ‘kutandanganya ngo ni kudya ni kunwa kyavulu ni ibhindamu ya mwenyu yú.’ (Luk. 21:34) O izwelu yiyi ni yamukwa itusanga mu Bibidya, itena ku kukwatekesa kumona o ima nange iwatokala kulungulula phala usuluke ni kulenga mu njila ya mwenyu.

17. Mukonda dyahi tutena kudyelela kwila twandatena kulenga kate bhu mbambe?

¹⁷ Tutena kudyelela kwila, twandatena kulenga kate kitutambula o mwenyu, mukonda Jihova wanda tubhana o nguzu itwabhindamena. (Iza. 40:29-31) Maji ki tutokala kubhwila! Kayela o phangu ya poxolo Phawulu, wabhange yoso phala kutambula o kikowe. (Fil. 3:13, 14) Seku muthu utena ku kulengela bhu kididi, maji ni kikwatekesu kya Jihova wanda tena kuditunda kyambote. Mwene utena ku kukwatekesa kwambata o imbamba yaneme ni kuxisa o ima ikubhangesa ngo kudivwa kyayiha. (Jisá. 68:19) Ni Jihova ku mbandu ye, wanda tena kulenga kate bhu mbambe ni kutambula o kikowe kya mwenyu!