1. Tintwari na Bahebre 12:1, nti tufweti sa mu tula ha titini ti sukisinaka ntinu za diokela za luzingu?

 BIBILA mbo difwanakasaka luzingu lweto lwa Bakristo na ntinu za diokela. Bô badiokaka mpe batulaka ha titini tisukisinaka ntinu za diokela mbo babaka luzingu lwa mankululu. (2 Tim. 4:7, 8) Tufweti sarila ngolo mu tatamana mu dioka, mu bungu ti tweka nguria penepene na titini tisukisinaka ntinu za diokela. Ntumwa Paulo, watula ha titini tisukisinaka ntinu za diokela mu baka musendo, wazonzela ka nti bilendi tu bakisa mu baka musendo wa ntinu za diokela. Watulomba “Taloseno dema ni dema [. . . ], tadiokeno na fuki ntinu zi batûriri ku matu meto.”—Tanga Bahebre 12:1.

2. Ngano nzonzolo ya “Taloseno dema ni dema,” bwe yita zolo tâ?

² Paulo bu katsoneka ti “Taloseno dema ni dema,” ngano mbo keri zolo tâka ti ka kwena dema ko Mukristo di kalendi nata? Kâni, keri’â zolo tâka bo ko. Kâ, mbo keri zolo tâka ti talosa madema malembolo salu. Madema mo malendi tu kabakasa, mpe malendi tu fwatikisa. Mu tatamana, tufweti sarila manzangu mu zaba tala ti madema malembolo salu me neto na mu losa. Kâ mu ntangu yo kwa mpe, ka tuzololo’â ko mu losa madema ma tufweti nata. Tala ti tubikiri mu nata mo, ka tuvutu’â tatamana ko mu dioka. (2 Tim. 2:5) Ngano ntia madema tufweti nata?

3. a) Tintwari na Bisi-Ngalate 6:5, nti tufweti nata? b) Nti tutaluzula mu timoko ti, mpe mu bungu dia nti?

 ³ Tanga Bisi-Ngalate 6:5. Tima ti tufweti nata Paulo tia kazaba. Watsoneka ti ‘muna muntu muntu dema dia yandi beni kanata.’ Paulo mbo keri zonzelaka dema die neto ha meso ma Nzambi, tima ti tufweti nata beto beni. Mu timoko ti, mbo tutaluzula ka nti bie mu kati dia ‘madema meto’ mpe bwe tulendi ma natina. Mbo tumona madema ma tulendi nata malembolo salu, mpe mbo tulongoka ka bwe tulendi malosela. Tamana nata madema meto, mpe tulosele mo ma lembolo salu, mbo wutubakisa mu dioka ntinu za luzingu tii ku nsuka.

4. Mu bungu dia nti kani di tasa dia sarila Yehova dilembolo mpasi mu lungisa? (Tala mpe tifwani.)

⁴ Kani di tasa dia sarila Yehova ntangu zazansoni. Bu tatihana kwe Yehova, tadia ndefi ti mbo tumusarila mpe mbo tusarila luzolo lwandi. Tufweti lungisa ndefi yi tadia. Mio mi takanisina kwe Yehova mu lungisa, dema diena di tufweti bongela mu bunsungu, kâ diena mpasi ko mu nata. Mu mpila ni mpila, Yehova  watusala ngatu tasarila luzolo lwandi. (Nza. 4:11) Watusala na nsatu ya mu zaba na ya mu sarila, mpe mu tifwani tiandi katusarila. Buna, lenda die neto dia pusana kwe Yandi na dia bâ mu nsayi bu tusarila luzolo lwandi. (Mik. 40:8) Mpe bu tusarilaka luzolo lwa Yehova na bu tulanda tifwani tia mwana’andi mbo tubakaka lutindusu.—Mat. 11:28-30.

5. Nti bilendi ku bakisa mu lungisa kani diaku? (1 Za 5:3)

⁵ Bwe lendi natina dema dio? Bima biole bilendi ku bakisa. Tia ntete, tatamana mu yika luzolo lwaku ngolo mu Yehova. Mbo lenda mu sila bo bu dimbitila mu misamu mia mbote mi keka yirika mu nge na mu tusakumunu tu kakukubikiri. Luzolo lwaku mu Nzambi bu lukwe kuri, mbo wubâ musamu wa fioti kwe nge mu mu tumamana. (Tanga 1 Za 5:3.) Tia nzole, landa tifwani tia Yezu. Yandi walenda mu sarila luzolo lwa Nzambi mu bungu ti wasambila Yehova kamubakisa, mpe watûla mabanza mandi mu musendo’andi. (Ebr. 5:7; 12:2) Ntiana Yezu, sambila Yehova mu baka ngolo na mu tûla mabanza maku mu tivuvu tia luzingu lwa mankululu. Bu kwe kurisi luzolo lwaku mu Nzambi mpe bu kwe landi tifwani tia Yezu, mbo kwizi bâ na lenda dia lungisa kani diaku.

6. Mu bungu dia nti tufweti lungisila madema ma mu kanda? (Tala mpe tifwani.)

⁶ Madema meto mu kanda. Mu ntinu zi tudiokaka za luzingu, tufweti zolo Yehova na Yezu yôka bantu ba mu kanda dieto. (Mat. 10:37) Kâ, ka wuta zolo tâ ko ti, tufweti yambirika madema meto ma mu kanda, ntian’eti mbo matukabakasaka mu tâ Nzambi nsayi na Kristo. Kâ tala ti, tuzololo Nzambi na Kristo batutambula, tufweti lungisa madema meto mu kanda. (1 Tim. 5:4, 8) Tamana bwa sa, mbo tubâ mu nsayi. Yehova zebi ti makanda mbo ma bâ mu nsayi tala ti mukento na bakala mbo batibongelaka mu luzolo na buzitu, tala ti mbo bazoloko bala bawu mpe mbo babalongaka, mpe tala ti bala mbo batumamanaka bubuti.—Efz. 5:33; 6:1, 4.

7. Bwe lendi lungisila madema maku mu kanda?

⁷ Bwe lendi natina dema dio? Ni bu bâ bakala, mukento peleko mwana, kwikila malongi ma ndwenga me mu Bibila. Kusarilandi kwa mio mi ta banza ti mia sungama miena peleko mio mi sarilaka bantu ku mbuka yi bêlaka peleko mio mi tâka bantu ba mayela. (Bin. 24:3, 4) Tomo sarilaka mikanda mieto misikamanaka mu Bibila. Mu kati mbo bahanaka malongi malendi kubakisa mu sarila mitieno mia Bibila. Mu tifwani, mutu-diambu wa “Lubakusu mu bungu dia kanda” mwe na malongi mafwanakane mu misamu mi bwabanaka na bantu ba kwelana lumbu ti, bibuti na bala. b Bonga nzengolo ya sarila mio mi tâka Bibila, ni bu sa ti bantu bakaka mu kanda ka basarilaka mio ko. Bu sila bo, kanda diaku mbo dibaka ndandu, mpe mbo baka lusakumunu lwa Yehova.—1 Pi. 3:1, 2.

8. Bwe nzengolo zeto zilendi tu natina nsobolo?

⁸ Dema dia nzengolo zeto. Yehova watuhana kabu dia timpwanza tia sola, mpe zololo ti tabâ mu nsayi mu bungu ti nzengolo za mbote tubongaka. Kâ ka tu kengerelaka ko mu misendo mia mbi minataka nzengolo zeto za mbi. (Nga. 6:7, 8) Buna, mbo tunataka dema dieto mu mpasi zitulumukaka mu bungu ti nsololo za mbi tusiri peleko musamu tutêle peleko tuyirikiri wa mbi. Mu mio mi tuyirikiri  tulendi mona mpasi mu bungu dia ngindu yita tu semba. Kâ, bu tuzaba ti misendo minataka nzengolo zeto dema dieto diena, wulendi tu bakisa mu fungula masumu meto, mu delakasa musamu wa mbi, na mu lembo vutu karila musamu wo. Nsalulu yo yilendi tu bakisa mu tatamana mu dioka ntinu za luzingu.

9. Nti lendi sa tala ti nzengolo ya mbi bongele? (Tala mpe tifwani.)

⁹ Bwe lendi natina dema dio? Tala ti nzengolo ya mbi bongele, ngano nti lendi sa? Tambula ti kulendi’â wasoba misamu miayôka ko. Kuhombesandi ntangu na ngolo zaku bu yêla mu songela ti mpemba ye naku peleko bu dinga mu semba bantu bakaka mu bungu dia fote’aku. Kani wasila bo, tambula fote’aku mpe sarila ngolo mu yirika mio mia mbote. Tala ti mbo tatatamana mu tisemba mu bungu dia fote yisiri, na kuluka kwakwansoni sambila Yehova, tambula fote’aku, mpe mu lomba kakulemvokela. (Mik. 25:11; 51:3, 4) Lomba mulemvo kwe bô ba yirikiri mbi, tala ti wufwanane, lomba lubakusu lwa bakuluntu. (Zaki 5:14, 15) Baka malongi mu bungu dia fote zaku, mpe sa keba mu lembo vutu za kârila. Wamana sila bo, lendi bâ na lukwikulu ti Yehova mbo kakulemvokela mpe mbo kakuhana lubakusu lwe naku nsatu.—Mik. 103:8-13.

10. Mu bungu dia nti makani malembolo ma delakana malendi bêla dema? (Bisi-Ngalate 6:4)

¹⁰ Makani malembolo ma delakana. Tulendi bâ na tivuvu tilembolo tia delakana bu tutifwanakasa na bantu bakaka. (Tanga Bisi-Ngalate 6:4.) Tala ti mbo tuvulu tifwanakasaka na bantu bakaka, tulendi kwizi bâ na tifu tia dienokena mpe tulendi dinga mu yôka bampwana’eto. (Nga. 5:26) Tala ti tuyêlele mu yirika mio mi yirikaka bantu bakaka ni bu sa ti ka tulenda ko, tulendi timwisa mpasi. Mpe tala ti “tivuvu tilembo kulu lunganaka mutima tibêlesaka,” buna mutima’eto mbo wutomo bela tamana bâ na makani ma tulembo lenda mu lungisa! (Bin. 13:12, NWT) Musamu wo wulendi dimina ngolo zeto na ntinu zeto za diokela mu nzila ya luzingu.—Bin. 24:10.

11. Nti bilendi ku bakisa mu bâ a makani ma delakana?

¹¹ Bwe lendi losela dema dio? Kudingandi mu yirika misamu miyôkele na mio mi ku lombaka Yehova. Kani kabwe Yehova ka kêlaka ko ti wamuhana tima tilembolo naku. (2 Kor. 8:12) Bâ na lukwikulu ti Yehova misamu mi yirikaka ka fwanakasaka mio ko na mio mi yirikaka bantu bakaka. (Mat. 25:20-23) Mbo kazoloko tisalu tiaku ti salaka mu tilundi tiaku tiatiansoni, kwikama kwaku, na korela kwaku. Tambula na kuluka kwakwansoni ti mvula zaku, tikolela tiaku, mpe na misamu mie naku bilendi dimina mio mi lendi lungisa. Ntiana Barzilayi, bâ wa kubama mu kala madema mu bungu ti kusiri’â na ngolo zifwanane ko. (2 Sam. 19:35, 36) Ntiana Mose, tambula lubakusu lwa bantu bakaka mpe hana madema kwe bantu bakaka tala ti wufwanane. (Ndu. 18:21, 22) Kuluka kwa mpila yo mbo ku kukabakasa mu bâ na makani malembolo delakana malendi ku fwatikisa mu ntinu zaku za diokela mu nzila ya luzingu.

12. Ngano nzengolo za mbi zi bongaka bantu bakaka dema dieto diena? Bangula.

¹² Tifu tia nata dema mu nzengolo za mbi zi bongaka bantu bakaka. Ka tulendi’â tabonga nzengolo ko mu bungu dia bantu bakaka; mpe ntangu zazansoni ka tulendi’â tabakengerela ko mu misendo milendi tula mu bungu dia nsololo zawu za mbi. Mu tifwani, mwana wa bakala peleko wa mukento  wubongele nzengolo ya lembo vutu sarila Yehova. Nzengolo yo mbo yimwisa bibuti mpasi. Kâ bibuti bitisembaka mu bungu dia nzengolo ya mwana’awu, dema dia dinene banataka. Ka diena dema ko Yehova di kakêlaka ti banata.—Rom. 14:12.

13. Bwe tibuti tilendi sa mu telamana nzengolo ya mbi yi bongele mwana’andi?

¹³ Bwe lendi losela dema dio? Zaba ti Yehova wahana kwe beto bansoni timpwanza tia solela. Mbo kahanaka nzila kwe muna muntu mu sa nsololo zandi. Mu kati na nsololo ya mu sarila peleko kâni. Yehova zebi ti ka lwena bibuti bia lunga ko; zololo ti lwasa mio mi lulenda. Nsololo ya mwana’eno dema diandi diena, kâ ka diena dia beno ko. (Bin. 20:11) Bu lwena bibuti lulendi tatamana mu bâ na lwaka mu bungu dia fote zi lwasa. Tala ti ni bo, têno kwe Yehova ka bwe luta mona ku mutima mpe mu lombeno mulemvo. Zebi ti ka lulendi’â lwasoba misamu miayôka ko ngatu lwasila mio mu mpila yakaka. Mpe, Yehova ka kêlaka ko lwakabakasa misendo mia mbi milendi turila mwana’eno mu bungu dia mio mi kayirikiri. Zabeno ti, tala ti mwana’eno sariri ngolo mu kâla kwe Yehova, mbo kamubwana na nsayi yayansoni.—Like 15:18-20.

14. Mu bungu dia nti tufweti losela dema dia tisembaka ntangu zazansoni?

¹⁴ Tifu tia tisemba ntangu zazansoni. Bu tusumukaka, wudelakane mu tisemba. Kâ, tifu tia tisembaka ntangu zazansoni dema diena di tufweti lembo nata. Tufweti dia losa. Bwe tuzabila ti mbo tutisembaka ntangu zazansoni? Tala ti tufunguri masumu meto, tala ti tusobele mabanza, mpe tubongele nzengolo ya sa keba mu lembo vutu bwa mu masumu mo, tulendi bâ na lukwikulu ti Yehova tu lemvokele. (Bis. 3:19) Tamana yirika misamu mio, Yehova ka zolo’â ko ti tatatamana mu tisemba. Zebi ti tifu tia tisemba ntangu zazansoni mpasi timwisaka. (Mik. 31:10) Tala ti tubêle mu tiari tiatingi, tulendi bika mu dioka ntinu za luzingu.—2 Kor. 2:7.

15. Nti bilendi ku bakisa mu telamana tifu tia ti sembaka ntangu zazansoni? (1 Za 3:19, 20) (Tala mpe tifwani.)

 ¹⁵ Bwe lendi losela dema dio? Tala ti tatamane mu tisemba, tûla mabanza maku mu mulemvo wa matieleka wu hanaka Yehova. (Mik. 130:4) Bu kalemvokelaka kwe bô basobaka mabanza mu matieleka, mbo kakanisinaka ti: ‘Ka nivutu’â bambukila masumu mawu ko.’ (Yer. 31:34) Wuzololo tâ ti Yehova ka vutu’â ku semba ko mu bungu dia masumu maku ma ntama. Buna, kubanzandi ti misendo mia masumu maku misongele ti Yehova ka ku lemvokele’â ko. Mpe kutisembandi mu bungu ti fote zaku zilendi kukabakasa mu sala bwabwingi mu tisalu tia Yehova bwawu bu. Yehova ka banzaka masumu maku ko, nge mpe fweti sila bo.—Tanga 1 Za 3:19, 20.

16. Bu twena bantu badiokaka, nti tufweti zaba?

¹⁶ Bu tuta kwe dioke ntinu za luzingu, tufweti dioka na kani dia baka musendo. (1 Kor. 9:24) Tulendi lenda tala ti tuzebi mu sa luswaswanu ha kati dia madema ma tufweti nata na mo ma tufweti losa. Mu timoko ti, bala bifwani kwa tuzonzele bia madema ma tufweti nata na ma tufweti losa. Kâ biakaka bie kô bi tulendi zonzela. Yezu watâ ti mitima mieto milendi “dema mu bundiafu bwa dila, mu bundiafu bwa nwina na mu maniongo ma luzingu.” (Like 21:34, NWT) Matsonoko ma na makaka malendi kubakisa mu zaba ka ntia nsobolo fweti sa bu takwe dioke ntinu za luzingu.

17. Mu bungu dia nti tulendi bêla na lukwikulu ti mbo tubaka musendo wa ntinu za luzingu?

¹⁷ Tulendi bâ na lukwikulu ti mbo tubaka musendo wa ntinu za diokela za luzingu, mu bungu ti Yehova mbo katuhana ngolo ze neto nsatu. (Iza. 40:29-31) Kâ, kudiminandi ntinu zaku! Landa tifwani tia ntumwa Paulo wasa miamiansoni mu baka musendo wu bamukanisina. (Flp. 3:13, 14) Ka kwena muntu ko lendi dioka ntinu zo ha tibuka tiaku, kâ na lubakusu lwa Yehova lendi lenda. Yehova lendi kubakisa mu nata madema maku na mu losa mo malembolo salu. (Mik. 68:19) Na Yehova we ku lweka lwaku, lendi dioka ntinu za luzingu na luvilulu na mu baka mpe musendo!