1. Еврей-влаклан 12:1 дене келшышын, финишыш куржын шуаш да суаплан курымашлык илышым налашлан мыланна мом ыштыман?

 БИБЛИЙ христиан илышым дистанцийым куржмо дене таҥастара. Финишым эртыше куржшо-влак суаплан курымашлык илышым налыт (2 Тим. 4:7, 8). Умбакыжат куржашлан мыланна уло вийым пыштыман. Поснак таче тидым ышташ кӱлеш, вет кызыт финиш пешак лишне. Дистанцийым куржын эртыше апостол Павел каласен, мо мыланна тиде дистанцийым куржмаште сеҥаш полша. Тудо возен: «Чыла нелым... кудалтышаш да ончылнына улшо корным чытен эртышаш улына». (Еврей-влаклан 12:1 лудын лекса.)

2. «Чыла нелым... кудалтышаш... улына» манме мом ончыкта?

² «Чыла нелым... кудалтышаш... улына» Павелын манмыжым кузе умылаш? Мыланна чыла кӱлдымӧ нумалтышым кудалташ кӱлеш. Вет тиде мыланна куржаш мешая да вийнам налеш. Кеч-мом ончыде, финишыш куржын шуашлан мыланна вашкерак умылаш кӱлеш, мо мыланна мешая, да тидын деч утлыман. Но уло тыгай нумалтыш, кудыж деч утлыман огыл. Тудын деч утлена гын, мемнам куржмо дистанций гыч кораҥден кертыт (2 Тим. 2:5). Могай нумалтышым ме нумалшаш улына?

3. а) Галат-влаклан 6:5 дене келшышын, мом ме нумалшаш улына? б) Тиде статьяште ме мом лончылен налына да могай цель дене?

³ Галат-влаклан 6:5 лудын лекса. Павел возен: «Кажне шке нумалтышыжым наҥгайышаш». Тыште Юмын ончылно шуктышаш обязанностьна нерген ойлалтеш, кудыжым  мемнан олмеш иктат шуктен огеш керт. Тиде статьяште лончылен налына, «шке нумалтышыш» мо пура да кузе ме тудым нумалын кертына. Тыгак ме палемдена, могай нумалтыш деч мыланна утлаш кӱлеш. Шке нумалтышнам нумалына да уто нелым кудалтена гын, финишыш шуын кертына.

4. Юмылан служитлаш сӧрымашна почеш илаш мыланна молан неле огыл? (Тыгак сӱретым ончыза.)

⁴ Иеговалан служитлаш сӧрымашна. Кунам ме Иеговалан ӱшанле лияш сӧрымашым пуэнна, ме тудлан курымеш служитлаш да тудын эрыкшым шукташ сӧренна. Мыланна сӧрымӧ мутнам кучаш кӱлеш. Тиде сӧрымаш дене келшышын илаш — кугу ответственность, но тидым ышташ мыланна йӧсӧ огыл. Вет Иегова мемнам тудын эрыкшым шукташлан ыштен (Почм. 4:11). Юмо мыланна тудым палаш кумылым пуэн да мемнам шкеж гайым ыштен. Сандене ме тудын деке лишемын кертына, да мыланна тудын эрыкшым шукташ келша (Пс. 39:9). А эше кунам Юмым колыштына  да Эргыже почеш каена, ме вийым налына (Матф. 11:28—30).

5. Иеговалан пуымо сӧрымашым шукташ тыланда мо полшен кертеш? (1 Иоаннын 5:3).

⁵ Тиде нумалтышым нумалаш мо полшен кертеш? Икымше, Иегова деке йӧратымашдам умбакыжат вияҥдыза. Тудо тыланда уже шуко пӧлекым ыштен да ончыкыжым эше шуко пӧлекым ышташ шона. Кунам тидын нерген шонкаледа, Иегова деке йӧратымашда вияҥеш. А тидлан кӧра тудым колышташ куштылгырак лиеш. (1 Иоаннын 5:3 лудын лекса.) Кокымшо, Иисус деч примерым налза. Молан кӧра тудо Юмын эрыкшым шуктен кертын? Тудо Иегова деч полышым йодын да шинчаончалтышыжым суаплан виктарен (Евр. 5:7; 12:2). Иисус семын Иеговалан вий нерген кумалза да тыланда сӧрымӧ суапше нерген, курымашлык илыш нерген, нигунамат ида мондо. Иегова деке йӧратымашдам вияҥдеда да Эргыжын кышаже почеш каеда гын, тунам Иеговалан сӧрымыдам шуктен кертыда.

6. Молан ешыште обязанностьнам шуктышаш улына? (Тыгак сӱретым ончыза.)

⁶ Ешыштына шуктымо обязанность-влак. Христиан-влак Иегова ден Иисусым лишылже-влак деч утларак йӧратышаш улыт (Матф. 10:37). Но мутат уке, тиде огеш ончыкто, пуйто Юмо ден Христосым куандарашлан ме ешыште обязанностьнам она шукто. Мӧҥгешла, Юмо ден Христослан йӧрышӧ лияшлан ешыштына шкенан рольнам шуктыман (1 Тим. 5:4, 8). Иегова пала: еш пиалан лийже манын, марий ден вате икте-весыштым йӧратышаш да пагалышаш улыт, ача-ава-влак йочаштым йӧратышаш да туныктышаш улыт, а йоча-влаклан ача-аваштым колыштман (Еф. 5:33; 6:1, 4).

7. Ешыште шкендан рольдам шукташ тыланда мо полшен кертеш?

⁷ Тиде нумалтышым нумалаш мо полшен кертеш? Марий-влак, вате-влак да йоча-влак, Библий гыч уш-акылан каҥаш-влаклан ӱшаныза. Шке шонымо семын, кундемыштыда илыше еҥ-влак семын але эксперт-влакын ойлымышт почеш гына ида ыште (Прит. 24:3, 4). Библиеш негызлыме публикацийна-влакым кучылтса. Тушто сай каҥаш-влак улыт, кузе библийысе принцип-влакым кучылташ. Мутлан, «Помощь семье» рубрикыште тыгай нелылык-влак палемдалтыт, кудышт дене таче марий ден вате-влак, ача-ава-влак да самырык-влак тӱкнат b. Библийын ойлымыжым илышыш пуртыза, кеч ешыштыда весе-влак тидым огыт ыште. Уло ешланда тиде пайдам веле конда, а те Иеговалан келшеда манын шижаш тӱҥалыда (1 Пет. 3:1, 2).

8. Кузе решенийна-влак илышналан влиятлен кертыт?

⁸ Лукмо решенийналан мутым кучымаш. Иегова мыланна решенийым лукташ правам пуэн. Тудын кумылжо почеш сай решенийым лукмаш мыланна куаным кондышаш. Но тыгак тудо мемнам уда решенийнан лектышыж деч огеш арале (Гал. 6:7, 8). Сандене шоныде каласыме мутна але вашкен ыштымына мом кондат, тидын дене илаш логалеш. Мемнам совестят индырен кертеш. Лукмо решенийналан мутым кучена манын умылена гын, тиде мемнам сулыкым ыштымаште ӧкынаш, йоҥылышнам  тӧрлаташ да сулыкым угыч ыштыме деч шекланаш тарата. Тиде мыланна умбакыжат дистанцийым куржаш полша.

9. Йоҥылышым ыштенда гын, мом ыштен кертыда? (Тыгак сӱретым ончыза.)

⁹ Тиде нумалтышым нумалаш мо полшен кертеш? Те йоҥылышым ыштенда да нимомат тӧрлаташ ок лий гын, тиде ситуаций дене келшыза. Умылыза, эртышым пӧртылташ ок лий. Шкем чыныш ида лук але, мӧҥгешла, мо лиймылан шкем але весе-влакым ида титакле. Тиде вийдам налеш. Тидын олмеш йоҥылыш ыштымыдам умылыза да ситуацийыштыда мом ыштен кертыда, тудым ыштыза. Ыштымылан титакан улыда манын шижыда гын, Иеговалан ӱҥышын кумалза да тендам проститлаш сӧрвалыза (Пс. 24:11; 50:5, 6). Кӧлан чон корштымашым конденда, тудым тендам проститлаш йодса. Тыгак кӱлеш гын, тыланда кугурак иза-влак деч полышым йодман (Иак. 5:14, 15). Йоҥылышда гыч тунемза да тидым угыч ыштыме деч шекланаш тыршыза. Тидлан кӧра те пеҥгыдын ӱшанен кертыда: Иегова тендан дене поро лиеш да тыланда кӱлешан полышым пуа (Пс. 102:8—13).

10. Молан шукталтдыме вучымаш — тиде кӱлдымӧ нумалтыш? (Галат-влаклан 6:4).

¹⁰ Шукталтдыме вучымаш. Ме шкенам весе-влак дене таҥастарена да шке деч утыжым вучена гын, шкаланна эҥгекым конден кертына. (Галат-влаклан 6:4 лудын лекса.) Шкенам эре весе-влак дене таҥастарена гын, нунылан кӧранаш да весе-влак дене таҥасаш тӱҥалын кертына (Гал. 5:26). Мом весе-влак ыштен кертыт, а ме ыштен она керт, тидым ышташ тӧчена гын, шкаланна эҥгекым гына кондена. Библийыште возымо дене келшышын, иктаж-мом вучена гын, мемнан чонна коршташ тӱҥалын кертеш (Прит. 13:12). А кунам ме вучена тыгайым, мо нигунамат огеш шукталт, тиде эше чотрак чон корштымашым конда! Тиде мемнан вийнам налеш да умбакыже куржаш мешаен кертеш (Прит. 24:10).

11. Шукталтдыме вучымаш деч кораҥаш тыланда мо полшен кертеш?

¹¹ Кузе тиде нумалтышым кудалташ? Иегова мемнан деч мо мемнан уке, тидым тудлан пуаш огеш йод. Теат шкендан деч утыжым ида вучо (2 Кор. 8:12). Палыза, Иегова тендам весе-влак дене огеш таҥастаре (Матф. 25:20—23). Тудо тендан служымашдам, тендан ӱшанле улмыдам да тендан пеҥгыдын шогымыдам чот акла. Ӱҥышӧ лийза да умылыза: тазалык, ийгот але ситуацийдалан кӧра те ожнысо семынак ыштен ода керт. Тидын верч заданийым шуктен огыда керт гын, Барзиллай семын тиде заданийым шукташ ида пиж (2 Сам. 19:35, 36). Моисей деч примерым налын, кунам йӧн уло, тыланда ӱшанен пуымо пашам шкетын ышташ ида тырше да весе-влак деч полышым налза (Исх. 18:21, 22). Барзиллай ден Моисей семын ӱҥышӧ лийыда гын, тунам шке деч утыжым вучаш ода тӱҥал да куржашлан вийда кодеш.

12. Весе-влакын уда решенийыштлан титакан улына мо? Умылтарыза.

¹² Весе-влакын уда решенийыштлан шкем титаклымаш. Ме весе-влак олмеш решенийым луктын она керт да шукыж годым нуным уда решенийыштын лектышыж деч арален огына керт. Мутлан, иктаж-кӧн эргыже але ӱдыржӧ Иеговалан служитлаш чарна. Мутат уке, тиде решений ача-аважлан кугу чон корштымашым  конда. Нуно йочаштын решенийжылан шкем титаклаш тӱҥалыт гын, шке ӱмбакышт пеш неле нумалтышым пыштат. А Иегова нунын деч тиде нумалтышым нумалмым огеш вучо (Рим. 14:12).

13. Йоча уда решенийым луктын гын, ача-аважлан мом ышташ?

¹³ Кузе тиде нумалтышым кудалташ? Иегова кажныжлан решенийым лукташ правам пуэн. Тышке тыгаят решений пура — Иеговалан служитлаш але уке. Йоҥылышым ыштыдыме ача-ава уке. Иегова тидым шотыш налеш да тендан деч мом кертыда, тудым ыштымыдам вуча. Йочада лукмо решенийжылан шке мутым куча, а те огыл (Прит. 20:11). Туге гынат ыштыме йоҥылышда верч тургыжланен кертыда. Тунам Иеговалан шижмашда нерген каласыза да тендам проститлаш йодса. Тудо пала: жапым пӧртылтен да мо лиймым вашталтен ода керт. Те йочадам лукмо решенийже-влакын лектышышт деч аралаш тӱҥалыда манын, Иегова тендан деч ок вучо. Шарныза: йочада Иегова деке пӧртылаш шонен пышта гын, Иегова тудым шке ешышкыже уло кумылын пурта (Лук. 15:18—20).

14. Молан утыждене шкем титаклымаш — тиде нумалтыш, кудыж деч мыланна утлаш кӱлеш?

¹⁴ Утыждене шкем титаклымаш. Сулыкым ыштымеке, ме шкенам титаканлан шотлена гын, тиде сай. Но Иегова мемнан деч шкенам утыждене титаклымынам огеш вучо. Тиде лач тыгай нумалтыш, кудыжым ме кудалтышаш улына. Сулыкым ыштенна манын умыленна, ӧкыненна да, тудым угыч ышташ огыл манын, чылажымат ыштена гын, ме пеҥгыдын ӱшанен кертына: Иегова мемнам проститлен (Ап. паш. 3:19). Тидын деч варат те шкендам титакледа гын, Иеговам тиде огеш куандаре. Тудо пала, мыняр шуко эҥгекым тиде тыланда конден кертеш (Пс. 30:11). Ме утыждене шӱлыкаҥына гын, куржмо дистанций гыч кораҥын кертына (2 Кор. 2:7).

15. Шкем утыжден титаклыме деч кузе утлаш? (1 Иоаннын 3:19, 20). (Тыгак сӱретым ончыза.)

 ¹⁵ Кузе тиде нумалтышым кудалташ? Те шкем утыждене титакледа гын, шарныза: Иегова проститлыше Юмо (Пс. 129:3). Чынже денак ӧкынышӧ-влаклан тудо сӧра: «Мый... сулыкыштым нигунамат ом шарналте» (Иер. 31:34). Тугеже, Иегова тыланда ыштыме сулыкдам шарныкташ огеш тӱҥал. Сандене ыштыме сулыклан кӧра нелылык дене тӱкнеда гын, тиде огеш ончыкто, пуйто Юмо тендам проститлен огыл. Ыштыме йоҥылышда верч погынымаште иктаж-могай заданийым шуктен огыда керт гын, шкендам ида индыре. Иегова сулыкда нерген тетла огеш шоно. Тыландат тидым ышташ огеш кӱл. (1 Иоаннын 3:19, 20 лудын лекса.)

16. Илыш верч умбакыжат куржашлан мыланна мом ыштыман?

¹⁶ Мыланна суапым налме верч куржаш кӱлеш (1 Кор. 9:24). Молан кӧра ме тидым ыштен кертына? Куржашлан кӱлешан нумалтышым нумалаш да мо куржаш мешая, чылаж дечат утлаш кӱлеш. Тиде статьяште ме икмыняр примерым гына ончалынна, но тыгак вес пример-влакымат палемдаш лиеш. Иисус утыждене кочмо, «чот йӱмӧ, тысе илыш верч тургыжланыме дене шӱмда ынже нелем» манын каласен (Лук. 21:34). Тиде да вес библийысе почеламут-влак мыланна ужаш полшен кертыт, могай вашталтышым мыланна ыштыман. Нине вашталтыш-влак мыланна умбакыжат куржаш полшен кертыт.

17. Дистанцийнам куржын эртен кертына манын, молан пеҥгыдын ӱшанена?

¹⁷ Ме пеҥгыдын ӱшанена: финишыш шуын кертына, вет Иегова мыланна кӱлешан вийым пуа (Ис. 40:29—31). Сандене куржмым ида чарне! Апостол Павел деч примерым налза, тудо суап верч куржмаште уло вийым пыштен (Флп. 3:13, 14). Тендан олмеш тиде дистанцийым иктат куржын огеш керт, но Иегован полшымыж дене тендан чылажат лектеш. Тудо нумалтышдам нумалаш да уто нелым кудалташ тыланда полша (Пс. 67:20). Иегован полшымыж дене те уло вийын куржын кертыда да сеҥеда!