1. Kej kiijtoua Hebreos 12:1, ¿tlake moneki tijchiuasej tlaj tijneki tiasisej kampa tijselisej nemilistli?

 BIBLIA kiijtoua katli tijtekipanouaj Jehová kejuak timotlalouaj ipan se ojtli. Uan katli asij kampa tlami nopa ojtli, kiseliaj nemilistli tlen axkema tlamis (2 Tim. 4:7, 8). Nama más moneki tijchijtosej kampeka timotlalosej, pampa nechka tiasisej kampa tlami. Apóstol pablo, katli asik kampa tlami nopa ojtli, kiijtok se keski tlamantli tlen uelis techpaleuis nojkia ma tiasikaj. Ya kiijtok: “Ma timokixtilikaj nochi tlen techtsakuilia [...]. Ma timoyoltetilikaj uan ma timotlalokaj ipan nopa ojtli tlen Toteko technextilijtok” (xijpoua Hebreos 12:1).

2. ¿Tlake kinejki kiijtos Pablo kema kiijtok “ma timokixtilikaj nochi tlen techtsakuilia”?

² Kema Pablo kiijtok “ma timokixtilikaj nochi tlen techtsakuilia”, kinekiyaya kiijtos amo kinamiki ma tijuikakaj tlamamali tlen amo techpaleuis, pampa nopa kichiuas yolik ma tiakaj ipan nopa ojtli uan ma tisiauikaj. Tlaj nojua tijnekij timotlalojtosej ipan ni ojtli, moneki tikitasej tlaj tijuikaj se tlamamali tlen amo kinamiki uan moneki nimantsi tijmajkauasej. Pero onka se keski tlamantli tlen kena kinamiki tijuikasej. Tlaj tijmajkauasej, uajka ayokmo uelis timotlalosej ipan nopa ojtli (2 Tim. 2:5). Ma tikitakaj tlake kiixnextia nopa tlamamali.

3. 1) Kej kiijtoua Gálatas 6:5, ¿tlake tlamamali kena kinamiki tijuikasej? 2) ¿Tlake tikitasej ipan ni tlamachtili, uan kenke?

³ (Xijpoua Gálatas 6:5). Ipan ni versículo, Pablo kiijtok tlake tlamamali kena kinamiki tijuikasej. Ya kiijtok: “Sejse  tojuantij tijpiaj toteki para tijmokuitlauisej tlen tojuantij tonemilis”. ¿Tlake kinejki kiijtos Pablo? Kinejki kiijtos nopa tekitl tlen moneki tijchiuasej kema tijtekipanouaj toTeotsij, nopa san tojuantij moneki tijchiuasej. Ipan ni tlamachtili tikitasej tlake tlamantli moneki tijchiuasej uan tlake techpaleuis ma tijchiuakaj. Nojkia tikitasej tlake tlamamali amo kinamiki tijuikasej uan tlake uelis tijchiuasej tlaj ayokmo tijnekij tijmamajtosej. Moneki tijuikasej san nopa tlamamali tlen kinamiki pampa kiampa uelis tiasisej kampa tlami nopa ojtli uan tijselisej nemilistli tlen axkema tlamis.

4. ¿Kenke amo eli se ueyi tekitl tlen tikiljuijkej Jehová kema tijmaktilijkej tonemilis? (Nojkia xikita tlaixkopinkayomej).

⁴ Tlen tikiljuijkej Jehová kema tijmaktilijkej tonemilis. Kema timotemaktilijkej ika Jehová, tikiljuijkej san ya tijueyichiuasej uan tijchiuasej tlen kineki. Uajka, moneki tijchiuasej tlen tijtenkajkej. Maske eli se ueyi tekitl, amo tlauel ouij. ¿Kenke? Pampa Jehová techchijchijki ma tiuelikaj tijchiuasej tlen ya kineki (Apoc. 4:11). Ya techchijchijki ma tijnekikaj  tikixmatisej uan tijueyichiuasej, uan nojkia techchijchijki ika itlachialis. Yeka uelis tijnechkauisej uan tlauel techpaktis tijchiuasej tlen kineki (Sal 40:8). Nojkia, kema tijchiuaj tlen Jehová kineki, tijchiuaj sanse kej iKone. Uan nopa techpaleuia ma tiyolpakikaj (Mat. 11:28-30).

5. ¿Tlake mitspaleuis xijchiua tlen tikiljuik Jehová kema tijmaktilik monemilis? (1 Juan 5:3).

⁵ ¿Tlake mitspaleuis xijuika ni tlamamali? Se, xijchiua kampeka más tikiknelis Jehová. Tlaj timoyoliljuis kenijkatsa mitspaleuijtok uan kenijkatsa mitsteochiuas teipa, mitspaleuis más xikikneli. Uan tlaj tlauel tikiknelis Jehová, amo ouij tijmatis tijchiuas tlen ya kineki. Nojkia tijmatis itlanauatiljuaj amo ouij (xijpoua 1 Juan 5:3). Ome, xijchiua kej Jesús. Ya uelki kichiua tlen iTata kinekiyaya pampa kiiljuiyaya ma kipaleui uan kiilnamikiyaya tlen kiseliskia teipa (Heb. 5:7; 12:2). Sanse kej Jesús, xikiljui Jehová ma mitsmaka chikaualistli uan ma mitspaleui tikilnamiktos teipa uelis tijselis nemilistli tlen axkema tlamis. Tlaj tijchiuas kampeka más tikiknelis toTeotsij uan tijchiuas kej iKone, mitspaleuis xijchiua tlen tijtenkauilik Jehová kema tijmaktilik monemilis.

6. ¿Kenke moneki tikinmokuitlauisej tochampoyouaj? (Nojkia xikita tlaixkopinkayomej).

⁶ Moneki tikinmokuitlauisej tochampoyouaj. Maske moneki más tikiniknelisej Jehová uan Jesús, amo moneki tikintlauelkauasej tochampoyouaj (Mat. 10:37). Nojkia amo kinamiki tikinitasej kejuak techtsakuiliaj uan yeka amo ueli tijtekipanouaj Jehová kej tijnekiskiaj. Tlaj tijnekij tijyolpakiltisej Jehová uan Jesús, moneki tikinmokuitlauisej tochampoyouaj uan tijchiuasej nopa tekitl kej kinamiki (1 Tim. 5:4, 8). Tlaj kiampa tijchiuaj, tlauel tiyolpakisej. Jehová kimati tlauel yolpakisej tlaj katli mosenkajtokej moikneliaj uan motlepanitaj, tlaj tetajmej kinikneliaj uan kinmachtiaj ininkoneuaj, uan tlaj konemej kinneltokaj inintatauaj (Efes. 5:33; 6:1, 4).

7. ¿Tlake mitspaleuis xijchiua nopa tekitl tlen mitsmakatokej?

⁷ ¿Tlake mitspaleuis xijuika ni tlamamali? Tlaj tieli tetaj o titekone, xijchiua kampeka timotemachis ipan tlen Biblia tetlajtolmaka. Amo ximoyakana ika tlen timoiljuia, ika tlen momajtokej kichiuaj kampa tiitstok yon ika tlen kiijtouaj ixtlamatinij (Prov. 24:3, 4). Xijpoua amatlajkuiloli, pampa nopaya tikitas kenijkatsa uelis tijchiuas tlen Biblia tetlajtolmaka. Ipan nopa tlaxeloli “Tlen kinpaleuis mochampoyouaj”, uelis tijpantis tlen kinpaleuis ma kiixnamikikaj kuesoli katli mosenkajtokej, tetajmej uan telpokamej. b Xijchiua kampeka timoyakanas ika tlen Biblia tetlajtolmaka maske sekinok amo kiampa kichiuaj. Tlaj kiampa tijchiuas, tikitas kenijkatsa kinpaleuis mochampoyouaj uan mitsteochiuas Jehová (1 Ped. 3:1, 2).

8. ¿Tlake uelis techpanos kema amo kuali tijtlapejpeniaj se tlenijki?

⁸ Tikixnamikisej kuesoli pampa amo kuali tijtlapejpenijkej se tlenijki. Jehová techkajtok toselti ma tijtlapejpenikaj tlen tijchiuasej. Uan kineki ma tiyolpakikaj kema kuali tijtlapejpeniaj se tlenijki. Pero kema amo kiampa tijchiuaj, kikaua ma tikixnamikikaj nopa kuesoli (Gál. 6:7, 8). Yeka tlaj amo kuali tijtlapejpenijkej se tlamantli, tikijtojtiuetskej tlen  amo kinamiki o tijchijkej tlen amo kuali, moneki tikixnamikisej nopa kuesoli tlen techpanos. Kemantika uelis tlauel timotlajtlakoltisej uan tlauel timoyolkokosej. Tlaj tikitas kena elki motlajtlakol tlen panok, mitspaleuis xikijto tlen tijchijki, sampa kuali ximonejnemilti uan xijchiua kampeka ayokmo tijchiuas nopa tlamantli. Tlaj kiampa tijchiuaj, techpaleuis amo ma tichikokisakaj ipan nopa ojtli tlen techuika kampa tijselisej nemilistli tlen axkema tlamis.

9. ¿Tlake mitspaleuis tlaj amo kuali tijtlapejpenik se tlenijki? (Nojkia xikita tlaixkopinkayomej).

⁹ ¿Tlake mitspaleuis xijuika ni tlamamali? Xikilnamiki kema tijchiua se tlenijki, ayokmo uelis tijpatlas. Yeka, amo ximoseniljuijto ipan tlen tijchijki, amo ximotetsopa, amo xikintlajtlakolti sekinok yon ximotechti. Tlauel mitspaleuis tlaj tikijtos kena timokuapolok uan tijchiuas kampeka tijsenkauas nopa kuesoli. Tlaj tlauel timoyolkokoua, xikiljui Jehová tlen tijyolmati, xikiljui timokuapolok uan xijtlajtlani ma mitstlapojpoljui (Sal. 25:11; 51:3, 4). Tlaj tijchiuilik tlen amo kuali se akajya, xikiljui ma mitstlapojpoljui. Uan tlaj monekis, xikiniljui ueuejtlakamej ma mitspaleuikaj (Sant. 5:14, 15). Ximotlalnamikti ika tlen mitspanok uan xijchiua kampeka ayokmo kiampa tijchiuas. Ximotemachi Jehová mitspaleuis uan mitstlapojpoljuis (Sal. 103:8-13).

10. ¿Kenke eli kejuak se tlamamali kema tijnekij tijchiuasej tlen amo tiuelij? (Gálatas 6:4).

¹⁰ Kema tijnekij tijchiuasej se tlenijki tlen amo tiuelij o amo tiyajatij. Kejuak tijuikasej se tlamamali tlaj tikitaj tlen tijchiuaj ika tlen sekinok kichiuaj (xijpoua Gálatas 6:4). Tlaj timomajtokej kiampa tijchiuaj, uelis tijnekisej tikintlanisej sekinok uan tikinkualankaitasej (Gál. 5:26). Kema tijnekij tijchiuasej se tlamantli kej sekinok, peuas toselti timotetsopasej ika tlen amo tiuelij. Biblia techtlajtolmaka: “Kema se tlakatl mojmostla kichia para kiselis se tlenijki uan axasi imako, nelia kiyolkokoua” (Prov. 13:12). Uan nojua más timoyolkokosej tlaj tijnekij se tlenijki uan amo kema uelis tijchiuasej. Nopa tlamantli uelis kichiuas ayokmo ma tijpiakaj chikaualistli uan ayokmo kuali timotlalosej ipan nopa ojtli tlen teuika kampa tijselisej nemilistli (Prov. 24:10).

11. ¿Tlake mitspaleuis amo tijnekis tijchiuas tlen amo tiueli?

¹¹ ¿Tlake mitspaleuis ximokixtili nopa tlamamali? Amo ximochiualti tijchiuas tlen Jehová kiita amo tiuelis, pampa ya amo kema mitsiljuis xijchiua tlen amo tiyajati (2 Cor. 8:12). Jehová amo kema kiita moteki ika tlen sekinok kichiuaj (Mat. 25:20-23). Ya tlauel kipatiita tlen tiueli: kema tijtekipanoua ika nochi moyolo, pampa amo tijtlauelkaua uan pampa tikijiyouijtok miak tlamantli. Tlaj amo timoueyimati, mitspaleuis xikita kemantika amo uelis tijchiuas se keski tlamantli, uelis pampa ayamo tijpia miak xiuitl o pampa ya tiueyi, uelis pampa timokokoua o pampa mopatlatok se keski tlamantli ipan monemilis. Xieli kej Barzilái, kema amo uelis tijchiuas se keski tekitl pampa timokokoua, uelis tikijtos amo tijchiuas (2 Sam. 19:35, 36). Nojkia, uelis tijchiuas kej Moisés, xijkaua uan xikiniljui sekinok ma mitsmapaleuikaj (Éx. 18:21, 22). Tlaj amo timoueyimatis, amo tijnekis tijchiuas tlen amo tiueli uan tlen kichiuas tlauel xisiaui.

12. ¿Eli totlajtlakol kema sekinok amo kuali kitlapejpeniaj se tlenijki?

¹² Kema timotlajtlakoltiaj pampa sekinok amo kuali kitlapejpenijkej se tlenijki. Amo uelis tijtlapejpenisej tlen kichiuasej sekinok.  Nojkia, amo uelis tikinmanauisej tlaj tlaijiyouisej pampa amo kuali kitlapejpenijkej se tlenijki. Tlaj mokone kitlauelkauas Jehová, uelis tlauel mitsyolkokos. Pero kema se tetaj motlajtlakoltia pampa ikone kichijki tlen amo kuali, kejuak momamaltia tlen Jehová amo kiiljuia ma kiuika (Rom. 14:12).

13. ¿Tlake uelis kichiuas se tetaj tlaj ikone amo kuali kitlapejpenia se tlenijki?

¹³ ¿Tlake mitspaleuis ximokixtili nopa tlamamali? Jehová techkaua ma tijtlapejpenikaj tlake tijchiuasej, uan ma tijtlapejpenikaj tlaj tijtekipanosej o amo. Nojkia Jehová kimati ta amo tieli tixitlauak. Ya san kineki xieli se kuali tetaj. Tlaj mokone ayokmo kinekis kitekipanos Jehová, amo eli motlajtlakol pampa ya kitlapejpenik kiampa kichiuas (Prov. 20:11). Maske amo eli motlajtlakol, uelis kena timoiljuis se keski tlamantli tlen amo tijchijki. Xikiljui Jehová tlen tijyolmati uan xikiljui ma mitstlapojpoljui. Ya kimati ayokmo uelis tijpatlas tlen panok. Nojkia, Jehová amo kichia ta xijmanaui mokone ika tlen kipanos pampa amo kuali kitlapejpenik tlen kichijki. Xikilnamiki, tlaj mokone kichiuas kampeka sampa kitekipanos Jehová, ya sampa kiselis ika miak pakilistli (Luc. 15:18-20).

14. ¿Kenke amo kinamiki tlauel timotlajtlakoltisej?

¹⁴ Kema tlauel timotlajtlakoltiaj. Kema titlajtlakolchiuaj, peua timotlajtlakoltiaj. Pero kema tlauel timoyolkokouaj, eli kejuak tijuikaj se tlamamali tlen Jehová amo kineki ma tijuikakaj. ¿Kenijkatsa uelis tijmatisej tlaj tlauel timotlajtlakoltiaj? Tlaj ya tikijtojkej tlake tijchijkej, timoyolkuepkej uan tijchiuaj kampeka ayokmo kiampa tijchiuasej, uelis timotemachisej Jehová ya techtlapojpoljuik (Hech. 3:19). Tlaj ya kiampa tijchijkej, Jehová kineki ayokmo ma timotlajtlakoltikaj, pampa kimajtok kema kiampa tijyolmatij uelis kichiuas tlauel ma timoyolkokokaj (Sal. 31:10). Kema tlauel timotekipachouaj, uelis ayokmo tijnekisej timotlalosej ipan nopa ojtli tlen techuika kampa tijselisej nemilistli (2 Cor. 2:7).

15. ¿Tlake uelis tijchiuas tlaj tlauel timotlajtlakoltia ika tlen tijchijki? (1 Juan 3:19, 20; nojkia xikita tlaixkopinkayomej).

 ¹⁵ ¿Tlake mitspaleuis ximokixtili nopa tlamamali? Tlaj tlauel mitsyolkokoua tlen tijchijki, xikilnamiki Jehová nelnelia tetlapojpoljuia (Sal. 130:4). Kema se akajya moyolkuepa, Jehová kitlapojpoljuia uan ayokmo kiilnamiki tlen kichijki (Jer. 31:34). Ni kiijtosneki kema ya techtlapojpoljuia, ayokmo techixkoiljuia tlen tijchijkej. Maske tlauel titlaijiyouis pampa titlajtlakolchijki, amo kiijtosneki Jehová amo mitstlapojpoljuijtok. Uan tlaj nama ayamo ueli tijpia se tekitl ipan tlanechikoli, amo tlauel ximotekipacho. Ya amo kisenilnamiktok tlen tijchijki. Uajka, ¿nojkia uelis kiampa tijchiuas? (Xijpoua 1 Juan 3:19, 20).

16. ¿Tlake moneki tikilnamiktosej pampa timotlalouaj ipan nopa ojtli tlen teuika kampa nemilistli?

¹⁶ Tlaj tijnekij tiitstosej nochipa, moneki tijchiuasej tlen techtlajtolmaka 1 Corintios 9:24: “Xitekitikaj chikauak ipan Toteko para intlatlanisej”. Tlauel techpaleuis tlaj tikitasej tlake tlamamali moneki tijuikasej uan tlake amo. Ipan ni tlamachtili tikitakej se keski tlen ni tlamantli. Jesús nojkia kiijtok uelis elis kej se tlamamali kema timokuatotoniaj ika tlen tijkuasej, tlen tikisej o ika sekinok tlamantli (Luc. 21:34). Ni uan sekinok textos techpaleuis ma tikitakaj tlake moneki tijpatlasej ipan tonemilis uan kiampa titlatlanisej.

17. ¿Kenke timotemachiaj uelis tiasisej kampa tijselisej nemilistli tlen axkema tlamis?

¹⁷ Timotemachiaj nelnelia uelis tiasisej kampa tijselisej nemilistli tlen axkema tlamis pampa Jehová techmakas chikaualistli uan kiampa uelis tiasisej (Is. 40:29-31). Uajka, nojua ma tijchijtokaj kampeka uan ma tijchiuakaj kej Pablo, ya kichijki kampeka pampa kinejki kiselis nopa tlateochiualistli (Filip. 3:13, 14). Ta moneki tijchiuas kampeka timotlalos ipan nopa ojtli. Pero Jehová mitspaleuis xijuika nopa tlamamali tlen kinamiki tijuikas uan xijkajteua tlen amo kinamiki (Sal. 68:19). Uelis tiasis kampa mitsmakasej nopa nemilistli tlen amo kema tlamis pampa Jehová mitspaleuis.