1. Kemej kijtoua Hebreos 12:1, ¿toni moneki tikchiuaskej para tiksentokaskej titsikuiniskej hasta keman tinemiskej nochipaya?

 BIBLIA kijtoua ke akin tikchiuaj kemej Cristo kemej yeskia titsikuintokej. Akin tamitsikuiniskej uelis nemiskej nochipaya (2 Tim. 4:7, 8). Moneki tiksentokaskej timochikauaskej titsikuiniskej uan okachiok axkan porin tiajsitokejya kampa moneki. Tatitanil Pablo akin no tamitsikuinik, kijtoj toni uelis techpaleuis maj tiajsikan kampa moneki. Yejua kijtoj: “Maj […] timokixtilikan tein techetilia […] uan maj titsikuinikan itech ojti tein yetok toixpan” (xikonixtajtolti Hebreos 12:1).

2. ¿Toni kijtosnekik Pablo keman kijtoj maj “timokixtilikan tein techetilia”?

² Keman tatitanil Pablo kijtoj maj “timokixtilikan tein techetilia” amo kinekia kijtos ke akin tikchiuaj kemej Cristo amo teyi moneki tikchiuaskej keman titsikuintoskej, ta ke amo moneki tikchiuaskej seki taman tein amo techpaleuis. Porin nejon kichiuas maj yolik titsikuinikan uan maj niman tisiouikan. Yejua ika moneki tikitaskej ox tikchiujtokej teisa tein amo moneki uan maj niman tikauakan. Sayoj ijkon uelis tiksentokaskej titsikuintoskej, sayoj ke onkak okseki taman tein kemaj moneki tikchiuaskej uan amo moneki tikauaskej, komo amo tikchiuaj kemej ixyetok amo uelis tiksentokaskejok titsikuiniskej (2 Tim. 2:5). Maj tikitakan toni kemaj moneki tikchiuaskej.

3. 1) Kemej kijtoua Gálatas 6:5, ¿toni moneki tikchiuaskej tisejsemej? 2) ¿Toni tikitaskej itech nejin tamachtilis uan keyej?

³ (Xikonixtajtolti Gálatas 6:5). Itech nejin versículo Pablo kijtoj toni moneki kichiuas sejse itekitikauj Dios: “sejse  moneki kichiuas tekit tein kimakatokej”. ¿Toni kijtosnekia? Yejua tein Dios kichia maj tisejsemej tiitekitikauan tikchiuakan, nejin amo akin ueli toka kichiua. Itech nejin tamachtilis tikitaskej seki taman tekit tein techmakatokej tein moneki tikchiuaskej uan toni techpaleuis maj ijkon tikchiuakan. No ika titajtoskej seki taman tein xa tikchiujtokej uan amo moneki, uan toni techpaleuis maj amo tikchiuakanok. Semi moneki maj amo tikchiuakan tein amo techpaleuis porin sayoj ijkon uelis titamitsikuiniskej uan tinemiskej nochipaya.

4. ¿Keyej amo semi ouij techkisa tikchiuaskej tein timotenkaujkej iuan Jehová? (No xikonita taixkopimej).

⁴ Keman timotemaktijkej iuan Jehová. Keman timotemaktijkej iuan Jehová tikiluijkej ke tikueyichiuaskej uan tikchiuaskej tein kiyolpaktia. Moneki tikchiuaskej ijkon kemej tikiluijkej. Maski nejin se ueyi tekit, amo ouij techkisa tikchiuaskej. ¿Keyej? Porin Jehová techchijchiuak kemej tiknekiskej tikyolpaktiskej (Apoc. 4:11). Techchijchiuak maj tiknejnekikan tikueyichiuaskej uan tikixmatiskej uan no techchijchiuak  kemej yejuatsin tamati. Yejua ika ueli iuan timotokiaj uan tiyolpakij keman tikchiuaj tein kineki (Sal. 40:8). Uan no, keman tikyolpaktiaj Jehová uan tikchiuaj kemej iKonetsin, tiyolseuij (Mat. 11:28-30).

5. ¿Toni mitsonpaleuis xikonchiua tein tionmotenkauak? (1 Juan 5:3).

⁵ ¿Toni mitsonpaleuis xikonchiua tein tikonijtoj keman tionmotemaktij iuan Jehová? Yekinika, xikontemo okachi tikontasojtas Jehová. Okachi tikontasojtas komo itech tiontanemilia keniuj mitsonpaleuiani uan keniuj mitsontatiochiuis satepan. Uan keman okachi tikontasojtas, niman tikontakamatis, tikonitas ke amo semi ouij tein technauatia (xikonixtajtolti 1 Juan 5:3). Ojpatika, xikonchiua kemej Jesús. Yejua uelik kichiuak tein Jehová kinekia porin kitajtaniaya maj kipaleui uan nochipa kielnamikia tein kiseliskia (Heb. 5:7; 12:2). Ijkon kemej kichiuak Jesús, xikontajtani Jehová maj mitsonpaleui uan nochipa xikonelnamiki ke uelis tionnemis nochipaya. Komo tikontemoua keniuj okachi tikontasojtas Jehová uan tikonchiua kemej iKonetsin, uelis tikonchiuas tein tionmotenkauak.

6. ¿Keyej moneki tikinyekpiaskej tochankauan? (No xikonita taixkopimej).

⁶ Moneki tikinyekpiaskej tochankauan. Keman tiktekitiliaj Jehová, moneki okachi tiktasojtaskej yejuatsin uan Jesús ke tochankauan (Mat. 10:37). Sayoj ke nejin amo kijtosneki ke tochankauan techtsakuiliaj para tiktekitiliskej Jehová uan ke yejua ika amo moneki tikinyekpiaskej. Ta komo tiknekij tikyolpaktiskej Jehová uan Jesús, moneki tikinyekpiaskej tochankauan kemej yejuatsin kineki (1 Tim. 5:4, 8). Komo ijkon tikchiuaj, okachi tiyolpakiskej. Jehová kimati ke kalyetonij yolpakiskej komo takat uan isiuatsin motasojtaj uan motakachiuaj, komo tetatmej kintasojtaj uan kinmachtiaj ininkoneuan uan komo tekoneuan kintakamatij inintatuan (Efes. 5:33; 6:1, 4).

7. ¿Toni mitsonpaleuis xikonchiua tein Jehová kineki para tikonpaleuis mochankauan?

⁷ ¿Toni mitsonpaleuis xikonyekpia mochankauan? Komo tiontetakatsin, tesiuatsin oso tekonetsin, xikonneltoka ke mitsonpaleuis tein Biblia tayolmajxitia. Amo xikonchiua tein tikonnemilia ke kuali yetok, tein kichiuaj kampa tionnemi oso tein mitsoniluiaj akin motelmachtijkej ke moneki tikonchiuas (Prov. 24:3, 4). Kuali xionmomachti toamaixuan porin ompa tikonajsis tein uelis tikonchiuas para tikontakamatis tein Biblia tayolmajxitia. Nejin tamachtilismej kinpaleuia akin monamiktijkejya, tetatmej uan telpochmej maj kimatikan toni kichiuaskej keman kipiaskej ouijkayomej. b Xikonixtali nochipa tikonchiuas tein tayolmajxitia Biblia maski mochankauan amo kichiuaskej, tikonitas ke nochi mokalyetonij kinpaleuis uan Jehová mitsontatiochiuis (1 Ped. 3:1, 2).

8. ¿Toni uelis techpanos komo amo kuali titaixpejpenaj?

⁸ Tein uelis techpanos komo amo kuali titaixpejpenaj. Jehová techkaua maj toselti titaixpejpenakan, uan yejuatsin kineki maj tiyolpakikan keman kuali titaixpejpenaj. Sayoj ke kikaua maj titajyouikan keman amo kuali titaixpejpenaj (Gál. 6:7, 8). Yejua ika moneki tikseliskej tein uelis panos komo amo kuali titaixpejpenkej, tikijtojkej oso tikchiujkej teisa uan amo achto tiknemilijkej. Kemansa hasta uelis timotajtakoltiskej uan techkuejmolos totanemilil. Kemej tikmatij ke tejuan titajyouiskej  komo amo kuali titaixpejpenaj, nejon techpaleuia maj tikijtokan tein amo kuali tein tikchiujkej, maj tikpatakan tein tikchiuaj uan maj timochikauakan amo oksepa tikchiuaskejok, sayoj ijkon uelis tiksentokaskej tiktekitiliskej Jehová para tinemiskej nochipaya.

9. ¿Toni uelis tikonchiuas komo amo kuali tiontaixpejpenak? (No xikonita taixkopimej).

⁹ ¿Toni mitsonpaleuis komo amo kuali tiontaixpejpena? Xikonelnamiki ke amo uelisok tikonpatas tein tikonchiuakya. Amo sayoj ika xiontanemilijto, amo semi xionmotayokoltijto, amo xikontajtakolti oksekin tein tikonchiuak nion xionmotenpaleui. Ta xikonajsikamati ke tionmopoloj uan xionmochikaua tikonyektalis kuejmol. Komo semi mitsonyolkokoua tein tikonchiuak, xikontataujti Jehová maj mitsonpaleui, xikonilui ke tionmopoloj uan xikontajtani maj mitsontapojpolui (Sal. 25:11; 51:3, 4). Komo tikonyolkokoj aksa xikonilui maj mitsontapojpolui. Uan komo moneki, xikonilui tayekananij maj mitsonpaleuikan (Sant. 5:14, 15). Xikonita tein panoua keman amo kuali tiontaixpejpena uan maj nejon mitsonpaleui amo oksepa xikonchiua. Xikonmati ke Jehová mitsonpaleuis uan mitsoniknelis (Sal. 103:8-13).

10. ¿Keyej amo kuali yetok maj tiknekikan tikchiuaskej tein amo tiuelij? (Gálatas 6:4).

¹⁰ Keman tiknemiliaj ke nochipa moneki tikchiuaskej hasta tein amo tiuelij. Komo tikitaj tein oksekin kichiuaj peuas tiknekiskej tikchiuaskej hasta tein amo tiuelij (xikonixtajtolti Gálatas 6:4). Komo nochipa ijkon titanemilijtokej peuas tikintataniskej oksekin uan hasta uelis tikinnexikoluiskej (Gál. 5:26). Komo peua tikchiuaj tein oksekin kichiuaj maski amo tiuelij, xa timoyolkokoskej uan tisiouiskej. Xikonnemili nejin: Biblia techiluia ke “tein tikchiaj uan amo niman mochiua techtayokoltia” (Prov. 13:12). Yejua ika, komo tiknekij tikchiuaskej teisa tein amo tiuelij okachi timoyolkokoskej. Nejon uelis techsioujtis uan kichiuas maj amo semi tiktekitilikanok Jehová (Prov. 24:10).

11. ¿Toni mitsonpaleuis amo xikonneki tikonchiuas hasta tein amo tionueli?

¹¹ ¿Toni mitsonpaleuis amo xikonnejneki tikonchiuas hasta tein amo tionueli? Xikontemo tikonchiuas sayoj tein Jehová mitsontajtania, porin yejuatsin amo mitsontajtanis tein amo tionueli (2 Cor. 8:12). Uelis tionyolseujtos porin Jehová amo kiita tein tejuatsin tikonchiua ika tein oksekin kichiuaj (Mat. 25:20-23). Yejuatsin kitasojkamati nochi tein tikonchiua porin tikontekitilia ika nochi moyolo, amo tikonkaua uan tiontaxikoua. Komo tionyolyemanik tikonajsikamatis ke amo ueli tikonchiuaok tein achto tikonchiuaya porin tionxiuejya, tionmokokoua oso mitsonpanoua okseki taman. Komo tionmokokoua, xikonchiua kemej Barzilái uan xikonijto ke amo ueli tikonchiua teisa (2 Sam. 19:35, 36). Oso kemej Moisés, xikonkaua maj mitsonpaleuikan uan komo ueli xikonilui oksekin maj kichiuakan tein tikonchiuaskia (Éx. 18:21, 22). Komo tionyolyemanik amo tikonnekis tikonchiuas tein amo tionueli, tein mitsontsakuilis amo xikontekitiliok Jehová.

12. ¿Tejuan totajtakol maj oksekin amo kuali taixpejpenakan?

¹² Keman timotajtakoltiaj porin oksekin kiixpejpenaj kichiuaskej tein amo kuali. Tejuan amo uelis tikixpejpenaskej tein tiknekij maj kichiuakan oksekin, nion uelis tikchiuaskej maj amo tajyouikan porin amo kuali taixpejpenkej. Xa se tekoneuj  kiixtalis kikauas Jehová, uan nejon uelis semi kinyolkokos itatuan. Sayoj ke tetatmej akin motajtakoltiaj porin ininkoneuj amo kuali taixpejpenak, kemej yeskia momamaltiaj teisa tein semi etik, uan nejon se taman tein Jehová amo kineki maj kichiuakan (Rom. 14:12).

13. ¿Toni uelis kichiuas se tepopaj komo ikonetsin amo kuali taixpejpena?

¹³ ¿Toni mitsonpaleuis amo xionmotajtakolti keman oksekin amo kuali taixpejpenaj? Xikonelnamiki ke Jehová techkaua maj tosejselti tikixpejpenakan toni tikchiuaskej uan ox tiktekitiliskej oso amo, uan no kimati ke tejuatsin tiontajtakolej. Yejuatsin sayoj kineki kuali xikonixyekana mokoneuan. Komo mokonetsin kiixtalia amo kitekitilisok Jehová, amo xionmotajtakolti tejuatsin porin yejua ijkon taixpejpenak (Prov. 20:11). Maski ijkon, xa nochipa tikonnemilijtos toni amo kuali tikonchiuak keman tikoniskaltij. Xikontapoui Jehová keniuj tionmomachilia uan xikontajtani maj mitsontapojpolui. Yejuatsin kimati ke amo uelis tikonpatas tein panok. Uan Jehová amo no kichia xikonpaleui mokonetsin maj amo tajyoui porin amo kuali taixpejpenak. Sayoj ke komo mokonetsin mochikaua oksepa kitekitilis Jehová, yejuatsin kuali kiselis (Luc. 15:18-20).

14. ¿Keyej amo semi moneki timotajtakoltiskej tein amo kuali tein tikchiujkej?

¹⁴ Keman semi timotajtakoltiaj teisa. Keman titajtakolchiuaj ipa tiknemiliaj ke totajtakol tein tikchiujkej. Sayoj ke Jehová amo kineki maj nochipa ijkon timomachilikan, porin nejon kemej yeskia techetilijtoskia, yejua ika moneki timokixtiliskej. ¿Keniuj uelis tikmatiskej komo semi timotajtakoltijtokej teisa? Komo tikijtojkejya tajtakol tein tikchiujkej, timoyolpatakejya uan timochikaujtokej amo oksepa tikchiuaskej, uelis tikyematiskej ke Jehová techtapojpoluijya (Hech. 3:19). Keman tikchiuaskejya nochi nejon, Jehová amo kineki maj timotajtakoltikanok porin kimati ke  komo nochipa ijkon timomachiliaj uelis timotajyouiltiskej (Sal. 31:10). Komo semi timotayokoltiaj xa amo tiknekiskejok kemej yeskia tiksentokaskej titsikuiniskej uan timosenkauaskej (2 Cor. 2:7).

15. ¿Toni mitsonpaleuis komo semi tionmotajtakoltia tein tikonchiuak? (1 Juan 3:19, 20; no xikonita taixkopimej).

¹⁵ ¿Toni mitsonpaleuis amo semi xionmotajtakolti? Komo nochipa tionmotajtakoltijtok xikonelnamiki ke Dios ‘yekmelauj tetapojpoluia’ (Sal. 130:4). Keman aksa yekmelauj moyolpata, Jehová kichiua tein motenkaua: “Amo nikelnamikisok inintajtakol” (Jer. 31:34). Nejin kijtosneki ke keman Jehová mitsontapojpoluia, amo mitsonelnamikilijtokok tein tikonchiuak. Keman titajtakolchiuaj ipa tikseliaj tein amo kuali, komo ijkon mitsonpanoua amo kijtosneki ke Jehová ayamo mitsontapojpoluia. Uan komo amo tikonpiaok tekimej tein tikonpiaya itech nechikol amo xionmoyolkoko. Jehová amo kielnamikiok tajtakol tein tikonchiuak uan tejuatsin no uelis tikonelkauasya (xikonixtajtolti 1 Juan 3:19, 20).

16. ¿Toni moneki tikmatiskej akin kemej yeskia titsikuintokej?

¹⁶ Para uelis tinemiskej nochipaya moneki titsikuiniskej kemej uelis titataniskej (1 Cor. 9:24). Uelis tikchiuaskej nejin komo tikajsikamatij toni sayoj moneki tikchiuaskej uan toni amo. Itech nejin tamachtilis sayoj tikitakej seki taman uan onkakej oksekiok. Kemej tein Jesús kijtoj ke uelis techpanos, ke sayoj ‘tiknemilijtoskej titeltakuaskej uan titeltatayiskej uan sayoj techtekipachojtos tein techpoloua’ (Luc. 21:34, nota). Nejin texto uan oksekiok uelis techpaleuis maj tikmatikan toni moneki tikpataskej para tiksentokaskej tiktekitiliskej Jehová uan tinemiskej nochipaya.

17. ¿Keyej tikmatij ke uelis titataniskej uan tinemiskej nochipaya?

¹⁷ Tikyekmatij ke titataniskej uan tinemiskej nochipaya porin Jehová techpaleuis maj titaxikokan hasta keman ejkos nejon tonal (Is. 40:29-31). Yejua ika amo xionmosenkaua. Xikonchiua kemej tatitanil Pablo, akin semi mochikauak para kiselis tein kitayokoliskiaj (Filip. 3:13, 14). Nejin amo akin ueli moka kichiua, sayoj ke Jehová nochipa mitsonpaleuis. Yejuatsin uelis mitsonpaleuis sayoj xikonchiua tein moneki uan amo tein amo moneki (Sal. 68:19). Kemej Jehová mouan yetok uelis tiontaxikos keman kemej yeskia tiontsikuintos para tiontatanis.