1. Mukuzwirana no Vahebheru 12:1, ngozvapi zvatinodikana kuita kuti tikwanise kwenderera mberi tecigogoma mbhera kumagumo?

 BHAIBHERI rinoezanisa upenyu hwedu inga Makristu no upenyu wo mugogomi. Vagogomi vanoguma mbhera ku magumo vanozoashira upenyu ucingaperi. (2 Timoti 4:7, 8) Tinodikana kuita zvese zvatinokwanisa kuti tienderere mberi tecigogoma, ngokuti taaphedo kamare kuti tigume kumbhiri. Mupostori Pauro, uwo wakakwanisa kwenderera mberi ecigogoma mbhera kumagumo ko upenyu hwake, wakananga zviro zvinozotibesera kuti tikwanise kuguma kumbhiri. Iyena wakati: “Ngativhise zviro zvese zvinorema . . . , togogoma ngo simba rese tecienda pambeji.”—Verenganyi Vahebheru 12:1.

2. Zvinorevenyi ‘kuvhisa zviro zvese zvinorema’?

² Waro Pauro paakatara kuti tinodikana ‘kuvhisa zviro zvese zvinorema,’ wainga ecinanga kuti Makristu aadikani kuthwara zviri zvese? Haiwa, andizvopi zvaaida kunanga. Iyena waida kunanga kuti tinodikana kuvhisa zviro zvinorema zvaticikadikani kuthwara. Kurema kwakadari kwaizotiita kuti tigumire pakuremba. Kuti tikwanise kucungirira, tinodikana kuvhisa ngo kukasika zviro zvese zvaticikadikani kuthwara. Asi pa mukuvo wondhowo, atidikani kuvhisa zviro zvatinodikana kuthwara. Ngokuti izvo zvaizoita kuti titame kufanerazve kwenderera mberi tecigogoma kuti tiwane upenyu. (2 Timoti 2:5) Waro ngozvapi zviro zvatinodikana kuthwara?

3. (a) Mukuzwirana no Vagaratiya 6:5, ngozvapi zviro zvatinodikana kuthwara? (b) Ngozvapi zvatinozovona pa musoro uwu, ngenyi?

³ Verenganyi Vagaratiya 6:5. Pauro wakananga kuti zviripo zviro zvimweni zvatinodikana kuthwara. Iyena wakananga kudari: “Umwe na umwe anozothwara mutoro wake.” Apa iyena  wainga ecinanga kuti umwe nga umwe waidikana kuthwara mutoro wake pamberi pa Mwari, apana mundhu angaitira umweni zviro izvi. Pa musoro uwu, tinozovona kuti ngozvapi zvinobatanijwa pa “mutoro” unodikanari kuthwahwa ngo mundhu umwe nga umwe no kuvona kuti tingaitisa kudini kuti tienderere mberi teciuthwara. Tinozovonazve kuti ngojapi mutoro jaticikadikani kuthwara no kuvona manera okujivhisa ndiwona. Kuthwara mutoro wedu no kuvhisa jicikadikani zvinozotibesera kuti tikwanise kwenderera mberi tecigogoma mbhera kumagumo.

4. Ngenyi kujipira kwatakaita asipi mutoro unorema? (Vonanyi foto.)

⁴ Cigondiso cotakaita cokuti tinozoshandira Jehovha kwenda no kwenda. Patakajipira kuna Jehovha, takagondesa kunamata iyena basi no kuita kuda kwake. Tinodikana kwenderera mberi tecikwanirisa zvatakanangari. Kupona mukuzwirana no kujipira kotakaita, imutoro, asi auremi. Izvi zvinoitika ngokuti Jehovha wakatisika kuti tiite kuda kwake. (Apokaripsi 4:11) Iyena wakatisika no cido co kuda kumuziva no kumunamata.  Wakatisikazve ngo muezaniso wake. Inga muviyo, tinokwanisa kuva no ushamwari wo phedo naye no kudakajihwa ngo kuita kuda kwake. (Nduyo 40:9) Cimwenizve, patinoita kuda ka Mwari no kutevera zvakanangwa ngo Mwana wake, ‘tinozotondhojwa.’—Mateu 11:28-30.

5. Zvicinyi zvinozomubesera kuti mukwanirise cigondiso cenyu? (1 Johani 5:3)

⁵ Mungaitisa kudini kuti muthware mutoro uwu? Zviro zviviri zvingamubesera. Cokutanga, kwenderera mberi mecivangisa rudo hwenyu kuna Jehovha. Mungaita izvi ngo kurangarijisisa zviro zvese zvaushoni zvaanomuitira no makomborero aanozomupa kumbejiyo. Kuda kwamunoita Jehovha pakunoengejeka, zvinozomurerukira maningi kuti mumuzwire. (Verenganyi 1 Johani 5:3.) Cocipiri, tevejeranyi Jesu. Iyena wakakwanisa kubudirira pakuita kuda ka Mwari ngokuti waiita mukumbiro ecikumbira besero no kusotesesa mupfupo wake. (Vahebheru 5:7; 12:2) Inga ndi Jesu, itanyi mukumbiro kuna Jehovha mecikumbira simba no kuenderera mberi mecisotesesa mupfupo wenyu wokuzoashira upenyu ucikaperi. Pamunoenderera mberi mecida Jehovha no kutevejera Mwana wake, munozokwanisa kupona mukuzwirana no zvamakagondesa.

6. Ngenyi tinodikana kukwanirisa mutoro wedu pa mbhuri? (Vonanyi foto.)

⁶ Mutoro wedu pa mbhuri. Pa kugogoma kwatiri kuita kuti tiwane upenyu, tinodikana kuda maningi Jehovha na Jesu kupinda kuda kwatinoita ukama hwedu. (Mateu 10:37) Asi izvi azvirevi kuti atidikani kukwanirisa mutoro wedu pa mbhuri, inga kuti kuita zvondhozvo kunotiita kuti titame kudakajisa Jehovha na Jesu. Mukusiyana, kuti tikwanise kutendehwa ndi Mwari na Kristu, tinodikana kukwanirisa mutoro wedu pa mbhuri. (1 Timoti 5:4, 8) Patinoita izvi, tinozodakara. Jehovha anozviziva kuti mbhuri jinozodakara maningi kudari mwamuna no mukaji vakatajana ngo rudo no nderemejo, kudari vabari vakada no kujijisa vana vavo nokutizve kudari vana vakazwira vabari vavo.—Vaefeso 5:33; 6:1, 4.

7. Mungaitisa kudini kuti mukwanirise mutoro wenyu pa mbhuri?

⁷ Mungaitisa kudini kuti muthware mutoro uwu? Azvinenyi kuti ngowapi mutoro wenyu pa mbhuri, shandisanyi mazano anonangwa ngo Bhaibheri. Mucadoita zviya zvamunorangarira kuti zvakanaka kana zvinonyanya kuitwa maningi kwamunogararo kana zvinonangwa ngo vaya vanonangwaya kuti vazivi. (Mazwi Akangwara 24:3, 4) Nasanyi kushandisa mabhuku edu akacijikira mu Bhaibheri. Iwona anovonesa manera atingashandisa ndhungamiriro jo Bhaibheri. Inga muezaniso, mutevejwana unoti, “Besero ro Mbhuri” uno masoko anodakajisa maningi angakwanisa kubesera vakacadha, vabari no majaha kuti vakwanise kuhwisana no zvineso zvakasiyana-siyana zvatinosongana nazvo nyamasi uno. b Temanyi civaringo co kushandisa zvinonangwa ngo Bhaibheri, pikija vamweni pa mbhuripo avaripi kuzviita. Mukaita kudaro, mbhuri yenyu inozobesereka maningi, zvoita kuti muzoashire makomborero anovha ka Jehovha.—1 Pedhru 3:1, 2.

8. Zvivaringo zvatinotema zvinotipsasisa kudini?

⁸ Mutoro wo kutema zvivaringo zvedu. Jehovha wakatipa cipo co rusujunuko wo kuita zvatinoda. Iyena anoda kuti tidakajihwe ngo muviyo jatinova najo ngo kutema zvivaringo zvaushoni. Asi anotivhunjazve kuti kudari  tikatema zvivaringo zvakashata, tinozovavo no muviyo jakashata. (Vagaratiya 6:7, 8) Ngo iyo ndava tinodikana kutendera muviyo jinovepo ngo pamusoro po zvivaringo zvatinotema, zvatinonanga pomwe no zvatinoita. Zvecifira pa zviro zvotaitaro, hana yedu ingatotanga kutipa ndava. Asi kuziva kuti ndusu tinodikana kuthwara muviyo wo zvivaringo zvedu, zvinotiita kuti tidekece zvishaishi zvedu, tiitise nane zvotakaposa no kutama kuitazve zvishaishi zvondhozvo. Kuita izvi kunozotibesera kuti tienderere mberi tecigogoma mbhera kuwana upenyu.

9. Zvicinyi zvamunodikana kuita kudari matema civaringo cakashata? (Vonanyi foto.)

⁹ Mungaitisa kudini kuti muthware mutoro uwu? Kudari matema civaringo cicikaripi caushoni, ngozvapi zvamunodikana kuita? Zwisisanyi kuti amukwanisi kucinja zvaitikaro. Mucadoshandisa nguva yenyu no simba pa kueja kuvonesa kuti muno razau kana kueja kupa ndava vamweni ngo zvishaishi zvomakaita. Kusiyapo zvondhozvo, tenderanyi zvomaposaro perapo moshanda ngo simba pa mugariro wenyu. Kudari muri kujipa ndava ngo zvishaishi zvomakaita, jidodokesenyi ngo kuita mukumbiro kuna Jehovha, monanga zvomashaisharo, mokumbira kuregerehwa. (Nduyo 25:11; 51:3, 4) Kumbiranyi kuregerehwa ngo vandhu vomashaishiraro, zvikatodiwa, psakanyi besero kuno vakuru. (Jakobo 5:14, 15) Jijanyi ngo zvamaposaro no kutama kuitazve zvishaishi zvondhozvo. Pamunonga meciita izvi, ivanyi no cokwadi cokuti Jehovha anozomukhombijira unyasha no kumubesera.—Nduyo 103:8-13.

10. Ngenyi kuva no mazwiro okuda kuita zvakawanda maningi kupinda zvatinokwanisa imutoro unorema maningi? (Vagaratiya 6:4)

¹⁰ Mazwiro okuti tinodikana kuita zvizinji kupinda zvatinokwanisa. Kudari tikagara tecijiezanisa no vamweni zvingaita kuti tiremehwe maningi. (Verenganyi Vagaratiya 6:4.) Kugara tecijiezanisa no vamweni zvingaita kuti tive no cishatihwa no kuda kuphikizana. (Vagaratiya 5:26) Kudari tikaeja kuita zviro zviri kuithwa ngo vamweni, kuveni mugariro wedu pa mukuvo wondhowo autitendereri, tingatogumira pa kujikhuvaza pacedu. Bhaibheri rinonanga kudari: “Ruvetero hunononoka kuguma, hunohwaja mwoyo.” Izvi zvinoitikavo maningi kudari tinoda kuti zviro zviitike mu njira yotaida, zvotama kuitika. (Mazwi Akangwara 13:12) Tikaita izvi zvinozoita kuti tirembe maningi pa kugogoma kwatiri kuita kuti tiwane upenyu.—Mazwi Akangwara 24:10.

11. Zvicinyi zvingamubesera kuti mutame kuva no mazwiro okuda kuita zvizinji kupinda zvamunokwanisa?

¹¹ Ngenyi tinodikana kuvhisa mutoro uwu? Mucadovetera kuita zvizinji kupinda zvaanokumbira Jehovha kuti muite. Iyena aaveteri kuti muite zvamucikakwanisi. (2 Vakorinte 8:12) Ivanyi no cokwadi cokuti Jehovha aezanisi zvamunoita no zvinoithwa ngo vamweni. (Mateu 25:20-23) Iyena anoreremeja maningi zvese zvamunoita ngo simba renyu rese, kugondeka kwenyu kwese no kucungirira kwenyu kwese. Jidodokesenyi no kuzwisisa kuti amuzokwanisi kuita zvese zvamunoda kuita ngo ndava yo mupira wenyu, uhomi hwenyu no mugariro jimweni jamungasongana najo. Inga ndi Bharzirai, rambanyi mabasa amweni amungapuwa kudari amukwanisi kumaita. (2 Samueli 19:35, 36) Inga ndi Mosi, tenderanyi kubesera no kupa vamweni mabasa, pazvinodikana weya. (Exodo 18:21, 22) Kujidodokesa kwakadari, kunozomubesera kuti mutame kuita zvizinji kupinda zvamunokwanisa, zvoita kuti mutame kukwanisa kwenderera mberi mecigogoma mbhera kuwana upenyu.

12. Kunanga kuti itusu tinodikana kujipa ndava ngo zvivaringo zvakashata zvatemwa ngo vamweni? Sananguranyi.

 ¹² Kujipa ndava ngo zvivaringo zvakashata zvakaithwa ngo vamweni. Itusu atikwanisi kutemera vamweni zvivaringo nee atitokwanisizve kuita kuti vatame kuwana muviyo wo zvivaringo zvovakatemaro. Inga muezaniso, mwana angasana kutamazve kushandira Jehovha. Civaringo ici cingaita kuti vabari vahwajihwe maningi. Asi vabari vanojipa ndava ngo civaringo cakatemwari ngo mwana wavo, vanonga vecijithwarisa mutoro unorema maningi. Jehovha aadi kuti ivona vathware mutoro wakadaro.—Varoma 14:12.

13. Vabari vangajizwa kudini ngo zvivaringo zvakashata zvinotemwa ngo vana vavo?

¹³ Ngenyi tinodikana kuvhisa mutoro uwu? Zwisisanyi kuti Jehovha wakapa umwe nga umwe rusujunuko wo kukheta zvaanoda. Iyena anoda kuti mundhu wese ateme ega zvivaringo zvake. Izvo zvinobatanija civaringo co kuda kumushandira kana kuti haiwa. Jehovha anoziva kuti imwimwi vabari amuzivi kukwana, iyena anoda basi kuti muite zvamunokwanisa. Civaringo cinotemiwa ngo vana venyu imutoro wavo, kuciripi wenyu. (Mazwi Akangwara 20:11) Pikija zvakadaro, mungatoneseka ngo zviro zvomakaposa inga mubari. Kudari aya ndiwona mazwiro enyu, bhuyanyi na Jehovha no kukumbira kuregerehwa. Iyena anoziva kuti amukwanisi kuhwirira sure, mocinja zvakaitikaro. Cimwenizve, iyena aaveteri kuti imwimwi muite kuti mwana wenyu atame kuwana muviyo wo zviro zvaakaita. Garanyi mecirangarira kuti, kudari mwana wenyu akaita zvese zvaanokwanisa kuti ahwirire kuna Jehovha, iyena anozomuashira ngo mwoyo wese.—Ruka 15:18-20.

14. Ngenyi kujipa ndava imutoro watinodikana kuvhisa?

¹⁴ Kugara mecijipa ndava. Patinoshaisha, zvaushoni kujipa ndava. Asi kugara tecijipa ndava ungava mutoro unorema maningi. Mushovo uwu wo mutoro tinodikana kuuvhisa. Waro tinozvizivisa kudini kuti tiri kunyanyisa pa kujipa kwedu ndava? Kudari tikadekeca  zvishaishi zvedu, tokhauya, toita zviri zvese kuti titame kuitazve zvishaishi zvondhozvo, tingathemba kuti Jehovha watiregerera. (Mabasa o Vapostori 3:19) Pakupera kuita zvese izvi, Jehovha anoda kuti titamezve kujipa ndava. Iyena anozviziva kuti kuita izvi kungatikhuvaza. (Nduyo 31:10) Tikagara takanyangajwa ngo zvishaishi zvotakaita, zvinozotirembesa pa kugogoma kwatiri kuita kuti tiwane upenyu.—2 Vakorinte 2:7.

15. Zvicinyi zvinozomubesera kuti mutame kuva no mazwiro okujipa ndava? (1 Johani 3:19, 20) (Vonanyi foto.)

¹⁵ Ngenyi tinodikana kuvhisa mutoro uwu? Patinogara tecijipa ndava, tinodikana kubatikana pa “rukunguriro” wokadi watinopuwa ndi Jehovha. (Nduyo 130:4) Jehovha paanoregerera vaya vanokhauya ngo mwoyo wese, anovagondesa kuti: “Andizocerecejibze bzixaixi bzavo.” (Jeremia 31:34) Izvi zvinoreva kuti Jehovha aazorangaririzve zvishaishi zvenyu zvaakapera kuregerera. Ngo kudaro, mucadorangarira kuti zvineso zvamuri kusongana nazvo wari ngo ndava yo zvishaishi zvomakaita kare, zvinoreva kuti Jehovha aazivi kumuregerera. Nee mucadogara makanyangajwa ngo mabasa omakaruza mu ungano. Jehovha aagari ecirangarira zvishaishi zvomakaita nee imwimwi amudikani kugara mecizvirangariravo.—Verenganyi 1 Johani 3:19, 20.

16. Inga vagogomi, ngozvapi zvatinodikana kuzwisisa?

¹⁶ Patinonga tecigogoma kuti tiwane upenyu, tinodikana ‘kugogoma ngo njira inoita kuti tiuwane.’ (1 Vakorinte 9:24) Tingakwanisa kuita izvi kudari tikazwisisa musiyano wo mutoro jatinodikana kuthwara no jatinodikana kuvhisa. Mu musoro uwu takwanisa kubhuisana ngo muezaniso munganani jo zviro zvatinodikana kuthwara no zvatinodikana kuvhisa. Asi taizonangavo muezaniso jimweni. Jesu wakananga kuti itusu taizoremehwa “ngo kuhisa, kumwisa no kuthimwa-thimwa ngo upenyu.” (Ruka 21:34) Vhesi iyi no jimweni jingamubesera kuti muvone mativi amunodikana kuitisa nane kuti muenderere mberi mecigogoma mbhera kuwana upenyu.

17. Ngenyi tingava no cokwadi cokuti tinozokwanisa kuwina pa kugogoma kwatiri kuita kuti tiwane upenyu?

¹⁷ Tingava no cokwadi cokuti tinowina kugogoma kwatiri kuita kuti tiwane upenyu ngokuti Jehovha anotipa simba ratinoda. (Isaia 40:29-31) Ngo kudaro, mucadoremba! Tevejeranyi muezaniso wo mupostori Pauro, uwo wakagogoma ngo simba kuti awane mupfupo wake. (Vafiripi 3:13, 14) Apana angakwanisa kugogoma pa ndau yenyu kuti mukwanise kuwana upenyu, asi ngo besero ra Jehovha mungakwanisa kwenderera mberi mbhera kuwina. Jehovha angamubesera kuti muthware mutoro wamunodikana kuthwara no kusiya mutoro jamucikadikani kuthwara. (Nduyo 68:20) Na Jehovha kudivi renyu, munozokwanisa kwenderera mberi mecigogoma mecicungirira mbhera kuwina.