1. Mwawiiwanana ni Ahepri 12:1, tiheeni nnaphwanelaahu weera wi niphiye okhomo ntakhara ochimaka wahu wa okumi?

 PIIPILIYA onnalikanyiha okumi wa Akristu ni ochimaka. Alipa oochimaka yaawo anawerya ophiya okhomoni ananwerya waakhela okumi woohimala. (2 Tim. 4:7, 8) Ti nthowa nene nnaphwanelaahu opaka owetha wahu wi ntitelele ochimaka, xaxaxa nthowa nawi makuchuwelo a ochimaka wahu aakhuveela. Murummwa Paulo oowerya okwaaxa ochimaka ntakhara okumi nave owo ooloca yeeyo enahaala onikhaviherya tho weerano emohamoha. Paulo ooloca wi ‘nrihe soothene inanlimela nave nchimake ni ovilela mu ochimaka yoowo nthoonyeryiwaahu.’—Mwaalakhanye Ahepri 12:1.

2. Enataphulela eheeni oriha “soothene inanlimela”?

² Vaavaa Paulo aalonceiye wi “nrihe soothene inanlimela,” apwanne aachuna oloca wi Mukristu hanaphwanela oteexa echu vyakala yoolimela? Hooye. Ohiya yeeyo, owo olonce wi nnaphwanela ohiya echu vyakala yoolimela yoohichuneya. Ichu soolimela ntoko seiho inanwerya onceecheiha ni onikomiha. Ti nthowa nene, wakhala wi ninnachuna otitelela ovilela nnaphwanela woona waakhanle wi ninnateexa ichu soolimela ntoko seiho ni oriha mwawaakuveya. Nyenya sookhalavo ichu ikina soolimela, naari maphuta, nnaphwanelaahu oteexa. Nave nnaphwanela weerano yeeyo, woona wi naaheerano enahaala okhala ntoko wi nnamuhiya ochimaka. (2 Tim. 2:5) Vano taavi ari maphuta yaawo?

3. (1) Mwawiiwanana ni Akalatiya 6:5, echu taani nnaphwanelaahu oteexa? (2) Tiheeni nnahaalaahu othokororya mmwaha yoola, nave ntakhara heeni?

³ Mwaalakhanye Akalatiya 6:5. Paulo ooloca sa echu yeeyo  nnaphwanelaahu oteexa. Owo olonce wi “mmoha ti mmoha onarwa ateexa murici awe.” Paulo vala aachuna oloca wi oothene ahu nookhalano mirici seiho Yehova onaweheryeiye wi naakhwaniherye. Mmwaha yoola, nnahaala woona yeeyo enavolowela muchu oteexa “murici awe” ni mukhalelo wa weerano yeeyo. Nave tho, nnahaala woona ichu savakhaani soolimela seiho akhweya ntenxaahu nihisuwelaka ni mukhalelo wa oriha seiho. Oteexa murici ahu ni oriha mirici soohichuneya onahaala onikhaviherya otitelela ochimaka ni ophiya omakuchuwelo wa ochimaka wahu ntakhara okumi.

4. Ntakhara heni waakhwaniherya nlakano nahu na wiiveleela tahi woovila? (Moone tho eruku.)

⁴ Nlakano nahu na wiiveleela. Vaava niiveleelaahu wa Yehova, naahimuroromeliha wi naahaala omulapela ni opaka yookhwela awe okhala wookhala. Nave nnaphwanela waakhwaniherya nlakano nenla. Opaka soothene nimuroromelinhaahu Yehova murici mutokweene, nyenya tahi woolimela. Mweeparipari, Yehova onipatunxe wi neereke yookhwela awe. (Wup. 4:11) Owo onipanke ni yoochuna ya omusuwela ni omulapela nave onipatunxe  moophwanaphwana ni yoowo. Ti nthowa nene nnamwaacamelaahu Yehova nave ti yoohakalaliha opaka yoochuna awe. (Sal. 40:8) Opwaha yeeyo, vaavaa nnapakaahu yookhwela ya Muluku ni omwiiwelela Mwanawe ‘ninnaphwanya wiichuuwa’ wa hiyo aneene.—Mat. 11:28-30.

5. Tiheeni enahaala wookhaviheryaani waakhwaniherya nlakano nanyu na wiiveleela? (1 Yohani 5:3)

⁵ Nni nteexe hai niphuta? Ichu piili inanwerya okhaviherya. Yoopacerya, mutitelele olipiha osivela wanyu ntakhara Yehova. Munanwerya weerano yeela moorweela wa wuupuwelela ichu soothene saphaama owo oweerenleiyeni ni mareeliho oothene onahaaleiye woovahaani omwaahiyu. Vaava osivela wanyu ntakhara Muluku oninnuwaaya, onahaala okhala wookhweya omwiiwelela. (Mwaalakhanye 1 Yohani 5:3.) Yanawiili, mmutakiherye Yesu. Owo aahiwerya opaka yookhwela ya Yehova nthowa nawi aahivekela avekaka nikhaviheryo nave aanatikitheryeya mu yoochuwela awe. (Ahe. 5:7; 12:2) Hiiha ntoko Yesu, mvekele wa Yehova mvekaka ikuru nave muhirwe muyeleele ewehereryo ya ekumi yoohimala. Moorweela wa waaceererya osivela wanyu wa Yehova ni omutakiherya Yesu, nyuwaano munahaala owerya waakhwaniherya nlakano nanyu na wiiveleela wa Yehova.

6. Ntakhara heeni nnaphwanelaahu othokororya mirici sahu sa veemusini? (Moone tho eruku.)

⁶ Mirici sahu sa veemusini. Mu ochimaka wahu ntakhara okumi, nnaphwanela omusivela vancipale Yehova ni Yesu opwaha mummo nnaasivelaahu achu aveemusini vahu. (Mat. 10:37) Nyenya eyo henataphulela wi hinnaphwanela othokororya mirici sahu sa veemusini. Moohiyana ni yeeyo, nnachuna omuhakalaliha Yehova ni Yesu, nave nnaphwanela othokororya mirici sahu sa veemusini. (1 Tim. 5:4, 8) Wakhala wi noheerano yeela, nnahaala okhala oohakalalaxa. Yehova onnasuwela wi ichoko inanwerya okhala soohakalala pahiru wakhala wi mulopwana ni muthiyana ennakhalihana mwa osivela ni ncicimiho, vaavaa asitiithi anaasivelaaya ni waahusiha anaaya ni vaavaa anamwane anawiiwelelaaya asitiithi aya.—Aef. 5:33; 6:1, 4.

7. Ti mwawiihai nyuwaano munahaalaanyu waakhwaniherya murici anyu wa veechokoni?

⁷ Nni nteexe hai niphuta? Moohipwacha waakhanle wi nyuwaano mwa mulopwana othenle, muthiyana otheliwe naari mwaana, echu yoochuneya ori opharihela ikano sa miruku sa Mpiipiliyani. Muheereryeke opaka echu yeeyo munoonaanyu wi ti yaphaama vamiithoni vanyu naari yookhovelela yawunlaana weiwo munakhalaanyuwo. Muheererye ochara ichu seiho achu aniiseera a masuwelelo analocaaya wi nyuwaano mpake. (Mas. 24:3, 4) Mpharihele phaama soolaleeryiwa sahu inathipeleya Mpiipiliyani. Iho chiri, sinnaniruuhela sookhumelela saphaama vooloca sa opharihela malakiheryo a Mpiipiliyani. Ntoko yootakiherya, miyaha sa mu jw.org “Ajuda Para a Família” sookhalano sooleeliherya vooloca sa makacamiho atheli, asitiithi ni amiravo anahoolelaaya mmahiku ahu. b Mukhale oolakelela opharihela yeeyo Piipiliya onaloceiye, naamwi achu akina a veemusini ehichunaka weerano yeeyo. Mweerano yeela, achu a emusi anyu anahaala ophuravo nave nyuwaano munahaala oreelihiwa ni Yehova.—1 Pet. 3:1, 2.

8. Ti mwawiihai soolakelela sahu sinahaalaaya onivolowela?

⁸ Weemererya sookhumelela sa soolakelela sahu. Yehova oonivaha yamahala ya othanla woochuna, owo onachuna wi nipake soolakelela saphaama ni okhala oohakalala. Nyenya wakhala wi noopaka yoolakelela yoonanara, Yehova hanikhapelela ni makacamiho enahaala okhumelela. (Aka. 6:7, 8) Ti nthowa nene,  nnaphwanelaahu weemererya sookhumelela inarweela mu soothanla soonanara, enavolowela masu oohuupuwelela naari opaka soothanla nihuupuwelenle. Moohipwacha yeeyo nipankaahu, nnanwerya okhala ni yawuupuserya-ya-murima yawuukhuwa. Nyenya osuwela wi nookhalano murici wa weemererya sookhumelela sa soolakelela sahu enanwerya onikhaviherya olokoha soocheka sahu, oreherya yeeyo nipankaahu ni osepa wuuluulela echu emohamoha. Opaka ichu seiho inamunikhaviherya otitelela mu ochimaka wahu ntakhara okumi.

9. Tiheeni enahaala wookhaviheryaani ovilela ni soolakelela soonanara? (Moone tho eruku.)

⁹ Nni nteexe hai niphuta? Wakhala wi moopaka yoolakelela nave mukhalano ekeerelani, tiheeni munaphwanelaanyu weera? Mweemererye wi nyuwaano himutoroka yeeyo yeeren’ye. Muhiyeleele elukuluku anyu ni ikuru sanyu mweereryaka wiikuphelela wa nthowa na yoolakelela mpamkaanyu naari waaphwanyerya mathowa akina wa nthowa na yoohesa anyu. Ohiya yeeyo, mweemererye wi moohesa nave mpake owetha mwawiiwanana ni mikhalelo sanyu sa hiihaano. Wakhala wi munniiphwanyerya mathowa wa echu yeeyo mpankaanyu, mukhale awiiyeviha ni mvekele wa Yehova mweemereryaka yoohesa anyu nave mveke wi owo ooleveleleeni. (Sal. 25:11; 51:3, 4) Mveke nikhurumuwelo wa yaale mwaachekenlaanyu, wakhala wooweryeya mveke nikhaviheryo wa asiitokweene a muloko. (Tiy. 5:14, 15) Muhuseryevo echu va yoohesa anyu nave musepe opaka yeeyo wanaawiili. Mweerano yeela, muroromele wi Yehova onahaala woomorelaani ikharari ni woovahereryaani nikhaviheryo nenlo munachunaanyu.—Sal. 103:8-13.

10. Ntakhara heeni nchuno nahu na opaka sincipale nryaaya niphuta noolimela? (Aka. 6:4)

¹⁰ Moonelo wa ochuna opaka sincipale ilukuluku soothene. Nnanwerya wiihokoliha nniphuta mukhatiihu moorweela wa oweeherya ichu ihinahaala waakhwanela vaavaa nniilikanyihaahu ni akina. (Mwaalakhanye Akalatiya 6:4.) Wakhala wi ninniilikanyiha ni akina, nnamukhala a nrima ni oowanawana ni akina. (Aka. 5:26) Vaavaa nnapakaahu owetha wahu wi niwerye opaka yeeyo akina awenryaaya waakhwaniherya, nnamukhinyereryeya opaka ichu inapwaha mavyakelo ni mikhalelo sahu. Nave tho muupuwele ela: Piipiliya onnanleela wi enanwerya okhala yooceecheiha owehererya echu yammoori. (Mas. 13:12) Mwawiihiiha, enamukhala yooceecheihaxa owehererya echu akhweya nihinahaalaahu ophwanya! Weerano yeela, enamunaakha ikuru ni okhala oovelavela mu ochimaka wahu ntakhara okumi.—Mas. 24:10.

11. Tiheeni eni enikhaviherye osepa moonelo wa ochuna opaka sincipale ilukuluku soothene?

¹¹ Muni murihe hai niphuta noolimela? Muhiwehererye sincipale wa nyuwo opwaha yeeyo Yehova onachuneiye. Owo hanaweherya wi mumvahe yeeyo muhiryaanyuno. (2 Ako. 8:12) Muroromele wi Yehova hanalikanyiha yeeyo muneeraanyu ni yeeyo akina aneeraaya. (Mat. 25:20-23) Owo onnavaha esisapo muteko munapakaanyu ni murima woothene, ororomeleya wanyu, ni ovilela wanyu. Mwawiiyeviha, mweemererye wi iyaakha sanyu, okumi anyu ni mikhalelo sanyu inanwerya woohiihaani opaka yeeyo munachunaanyu hiihaano. Moolikana ni Parsilai, mukhale oolakelela okhooca ikari ikina moona wi mikhalelo sa okumi anyu hasineemererya. (2 Sam. 19:35, 36) Moolikana ni Mose, mweemererye nikhaviheryo nave mvahererye mirici wa akina wakhala woophwanelela. (Muk. 18:21, 22) Wiiyeviha ntoko yoola onahaala onikhapelela wa moonelo wa ochuna opaka sincipale ilukuluku soothene yoowo onahaala onivelaveliha mu ochimaka wahu ntakhara okumi.

12. Apwanne ninnaphwanela wiisoona okhalano nthowa ntakhara soolakelela soonanara akina apankaaya? Mutharihe.

 ¹² Wiisoona okhalano nthowa ntakhara soolakelela soonanara akina apankaaya. Hiniwerya opaka soolakelela ntakhara akina, naari ilukuluku soothene owerya waakhapelela wa sookhumelela soonanara sa yoolakelela aya. Ntoko yootakiherya, mwaana onanwerya olakelela ohiya omurumeela Yehova. Ela enanwerya otannya othanana woohiloceya wa asitiithi. Mwawiihiiha, asitiithi yaawo aniisoona okhalano nthowa ntakhara soolakelela soonanara anaaya apankaaya, aniireya niphuta noohokola. Nla tahi niphuta nenlo Yehova onaweheryeiye wi asitiithi yaala eteexe.—Aro. 14:12.

13. Asitiithi eni evilele hai ni soolakelela soonanara seiho mwanaya opankeiye?

¹³ Muni murihe hai niphuta nenla? Muupuwele wi Yehova oonivaha oothene ahu othanla woochuna. Owo onnamuhiya muchu ti muchu wi apake yoothanla awe. Ela enaphitaanyerya omurumeela yoowo naari hooye. Yehova oosuwela wi nyuwo tahi mwa tiithi naari maayi oophaameya; pahiru owo onachuna wi mpake owetha wanyu ophiyerya munaweryelaanyuvo. Yoothanla yeeyo mwaninyu opankeiye murici awe, ohiya wawinyu. (Mas. 20:11) Naamwiihiiha, nyuwo munanwerya wiisoonaka okhalano nthowa ntoko tiithi naari maayi. Waakhanle wi ti hiiha, mmuleele Yehova mukhalelo muniisoonaanyu nave mumveke nikhurumuwelo. Owo onnasuwela wi hinwerya okookiha sakhalai ni opaka matorokelo sa yeeyo yeeren’ye. Mu ilukuluku ikina, owo hanaweherya wi mmukhapelele mwaninyu wa sookhumelela sa yeeyo aaminseiye. Musuwele wi wakhala wi mwaninyu onnapaka owetha wawe wi akookele wa Yehova, Owo onahaala omwaakhela moohakalala.—Luka 15:18-20.

14. Ntakhara heeni nnaphwanelaahu oriha niphuta nnaneeriha wiiphwanyerya mathowa moopwahererya?

¹⁴ Wiiphwanyerya mathowa moopwaha mphimo. Vaavaa nnachekaahu, enakhala yawooneya wi ninniisoona okhalano nthowa. Naamwiihiiha, wiisoona okhalano nthowa murici yoowo nihinaphwanelaahu oteexa. Nla niphuta nenno nnaphwanelaahu oriha. Nni nsuwele hai waakhanle wi ninniiphwanyerya mathowa moopwaha  mphimo? Waakhanle wi noolokoha yoocheka ahu, ncharuwa, nave nnapaka ichu wi nsepe wuuluulela yoocheka ahu, nnaphwanela ororomela wi Yehova oonilevelela. (Saw. 3:19) Nimanle weerano yeela, Yehova hanaweherya wi nititelele wiiphwanyerya mathowa. Owo onnasuwela wi natitelela wiiphwanyerya mathowa nnahaala ohooxeya. (Sal. 31:10) Wakhala wi nookhala oothananaxa, nnamukhala oovelavela mu ochimaka wahu ntakhara okumi.—2 Ako. 2:7.

15. Tiheeni enahaala wookhaviheryaani ohoolela moonelo wa wiiphwanyerya mathowa moopwaha mphimo? (1 Yohani 3:19, 20) (Moone tho eruku.)

¹⁵ Muni murihe hai niphuta nenlo? Vaavaa muniiphwanyeryaahu mathowa moopwaha mphimo, munaphwanela otikitheryeya mu ‘okhurumuwela weeparipari’ yoowo Muluku onanivaheiye. (Sal. 130:4, NN) Vaavaa owo onaakhurumuweleiye yaale acharunwe mweeparipari, owo onnaroromeliha: “Nkirwa kuupuwela sootxheka saya.” (Yer. 31:34, BNM) Ela enataphulela wi Yehova harwa atitelela wuupuwela soocheka sanyu sakhalai. Mwawiihiiha, muhooneke sookhumelela sa soocheka sanyu ntoko yawooniherya yawi Muluku hookhurumuwenleeni. Nave muhiithoriheke mukhatiinyu wa nthowa na soocheka sanyu sakhalai, woona wi eyo enahaala okukuca yeeyo munaphwanelaanyu opaka mmuteko awe hiihaano. Yehova hanatitelela wuupuwelela soocheka sanyu, nave nyuwaano tho hamunaphwanela weerano yeeyo.—Mwaalakhanye 1 Yohani 3:19, 20.

16. Ntoko alipa oochimaka, tiheeni nnaphwanelaahu osuwela?

¹⁶ Vaavaa nryaahu mu ochimaka ntakhara okumi nnaphwanela ‘ochimaka wi nivoothe.’ (1 Ako. 9:24) Nnahaala weerano yeela moorweela wa osuwela ohiyaniha maphuta nnaphwanelaahu oteexa ni maphuta nnaphwanelaahu oriha. Mmwaha yoola, nthokoronrye pahiru ichu savakhaani seiho nnaphwanelaahu oteexa ni seiyo nnaphwanelaahu oriha. Nyenya sookhalavo ichu ikina. Yesu ooloca ariki: “Phoole, mwiivareryeleke wi muhiipiwe murima ni olyavo, ohapaliwa, naari ni sawuukhula sa okumi yoola.” (Luka 21:34) Yoorepa yeela ni ikina, inanwerya wookhaviheryaani woona matorokelo munaphwanelaanyu opaka vaavaa munachimakaanyu ntakhara okumi.

17. Ntakhara heeni nnaphwanelaahu ororomela wi nnahaala ovootha mu ochimaka wahu ntakhara okumi?

¹⁷ Nnaphwanela ororomela wi nnahaala ovootha mu ochimaka ntakhara okumi woona wi Yehova onahaala onivaha ikuru seiho nnachunaahu. (Yes. 40:29-31) Mwawiihiiha, muhivelavele! Mmutakiherye murummwa Paulo, yoowo aachimaka moowetha wi aakhele nchuwelo. (Afi. 3:13, 14) Haavo muchu onahaala ochimaka mu nipuro nanyu, nyenya nnikhaviheryo na Yehova munamukhumelela phaama. Yehova onamookhaviheryaani oteexa mirici sanyu ni oriha maphuta oohiphwanelela. (Sal. 68:19) Ni Yehova, munahaala owerya ochimaka moovilela ni waakhela nchuwelo!