1. Ngokuya ngokwamaHebheru 12:1, khuyini ekufuze siyenze nasizakuqeda umjarho wokuphila?

 IBHAYIBHELI limadanisa ukuphila kwethu njengamaKrestu njengomjarho. Abagijimi abaqeda umjarho ngokuphumelelako bafumana unongorwana wokuphila okungapheliko. (2 Thim. 4:7, 8) Kufuze senze woke umzamo ukuthi siragele phambili sigijima khulukhulu njengombana umjarho lo sele usekugcineni. Umpostoli uPowula, oqede umjarho wokuphila ngokuphumelelako ukhulume ngezinto ezingasisiza sithumbe umjarho lo. Usinqophise bona ‘silahle woke umthwalo . . . siwugijime ngokukghodlhelela umjarho obekwe phambi kwethu.’—Funda amaHebheru 12:1.

2. Kutjho ukuthini ‘ukulahla woke umthwalo’?

² Lokha uPowula nakatlola athi ‘silahle woke umthwalo’ kghani bekatjho ukuthi amaKrestu akunamthwalo ekufuze awuthwale? Awa. Kunalokho bekatjho ukuthi silise ukuthwala imithwalo engatlhogekiko. Imithwalo enjalo ingasenza bona singakghoni ukugijima kuhle besidinwe. Bona sikghone ukukghodlhelela kufuze silemuke msinyana nanyana ngimuphi umthwalo ongasidisibeza bese siwulahle. Ngesikhathi esifanako asifuni ukulahla umthwalo ekufuze siwuthwale. Nasenza njalo sizokubhalelwa ukuhlala emjarhweni loyo. (2 Thim. 2:5) Ngimiphi imithwalo ekufuze siyithwale?

3. (a) Ngokuya ngokwebeGalatiya 6:5, khuyini ekufuze siyithwale? (b) Sizokukhuluma ngani esihlokwenesi begodu kubayini?

³ Funda kwebeGalatiya 6:5. UPowula waveza umthwalo ekufuze siwuthwale. Watlola ukuthi “omunye nomunye uzozithwalela  umthwalwakhe.” La uPowula bekakhuluma ngalokho uZimu alindele bona iinceku zakhe zikwenze, okuyinto abanye abantu engekhe basenzela yona. Esihlokwenesi sizokukhuluma ngokuthi khuyini esingayifaka ‘emthwalwenethu’ nokuthi singayithwala njani. Sizokukhuluma nangemithwalo esingayithwala engatlhogekiko sifunde nokuthi singayilahla njani. Ukuthwala imithwalwethu nokulahla imithwalo engatlhogekiko kuzosisiza sigijime umjarhwethu wokuphila ngokuphumelelako.

4. Kubayini kungasimthwalo ukuzalisa isithembiso esisenze kuJehova sokumlotjha ukuphila kwethu koke? (Qala nesithombe.)

⁴ Isithembiso esisenzileko sokulotjha uJehova ukuphila kwethu koke. Nasizinikela kuJehova, sithembise ukumlotjha nokwenza intandwakhe. Kufuze sisizalise isithembisweso. Ukwenza koke esikuthembise uJehova mthwalo oqakathekileko kodwana awusibudisi. Kungebanga lokuthi uJehova wasidala sinesifiso sokwenza intandwakhe.  (IsAm. 4:11) Wasenza saba nesifiso sokumazi nesokumlotjha begodu wasenza ngomfanekiswakhe. Ngebangelo sikghona ukutjhidela kuye besithabe ngokwenza intandwakhe. (Rhu. 40:8) Godu nasenza intando kaZimu silandele neNdodanakhe ‘sizozifumanela ukuphumula.’—Mat. 11:28-30.

5. Khuyini engakusiza uzalise isithembiso sakho? (1 Jwanisi 5:3)

⁵ Ungawuthwala njani umthwalo? Kunezinto ezimbili ezingakusiza. Kokuthoma, ragela phambili uqinisa ithando lakho ngoJehova. Ungakwenza lokho ngokucabangisisa ngazo zoke izinto ezihle akwenzele zona nangeembusiso akubekele zona. Njengombana ithando lakho ngoZimu likhula kuzokuba lula ukuthi umlalele. (Funda yoku-1 kaJwanisi 5:3.) Kwesibili, lingisa uJesu. Waphumelela ekwenzeni intando kaZimu ngombana wathandaza kuJehova wabawa isizo bewadzimelela neembusisweni azozifumana. (Heb. 5:7; 12:2) NjengoJesu, thandaza kuJehova umbawe akuphe amandla udzimelele, uhlale ucabanga ngethemba lokuphila okungapheliko. Njengombana ukhulisa ithando lakho ngoZimu bewulingise neNdodanakhe, uzokukghona ukuthi uzalise isithembiso osenze kuJehova.

6. Kubayini kufuze sitjheje imithwalo esinayo emndenini? (Qala isithombe.)

⁶ Imithwalo esinayo emndenini. Emjarhweni wethu wokuphila, kufuze sithande uJehova noJesu khulu ukudlula iinhlobo zethu. (Mat. 10:37) Nanyana kunjalo, lokho akutjho ukuthi kufuze singayitjheji imithwalo esinayo emndenini. Ngokuhlukileko, bona samukeleke kuZimu nakuKrestu kufuze sitjheje imithwalo esinayo emndenini. (1 Thim. 5:4, 8) Nasenza njalo sizokuthaba. Ngaphezu kwalokho, uJehova uyazi ukuthi imindeni izokuthaba lokha indoda nomfazi baphathana ngethando nangehlonipho, lokha ababelethi nabathanda bebabandule abantwana babo nalokha abantwana balalela ababelethi babo.—Efe. 5:33; 6:1, 4.

7. Ungakwenza njani lokho uJehova akulindele ukuthi ukwenze emndeninakho?

⁷ Kufuze uwuthwale njani umthwalo? Nanyana ungaba yindoda, mfazi namkha umntwana, thembela eselulekweni esihlakaniphileko esifumaneka eBhayibhelini, ungasebenzisi lokho ocabanga ukuthi kulungile namkha lokho okujayelekileko lapha uhlala khona namkha lokho okutjhiwo babantu abafundileko. (IzA. 24:3, 4) Zisebenzise kuhle iincwadi zethu ezisekelwe eBhayibhelini. Zineemphakamiso ezilisizo zokuthi ungazisebenzisa njani iinkambisolawulo eziseBhayibhelini. Ngokwesibonelo isihloko esithi, “Usizo Lomndeni” sinemininingwana ephuma phambili malungana neentjhijilo abantu abatjhadileko, ababelethi nabantu abatjha abaqalana nazo namhlanjesi. b Zimisele ukusebenzisa lokho okutjhiwo yiBhayibheli ngitjho nanyana amanye amalunga womndeni angakwenzi lokho. Nawenza njalo, umndenakho uzokuzuza begodu uzokuthabela neembusiso zakaJehova.—1 Pit. 3:1, 2.

8. Iinqunto esizenzako zingasithinta njani?

⁸ Ukuqalana nemiphumela yeenqunto esizenzako. UJehova usinikele isipho sokuzikhethela, ufuna sithabe ngeenqunto ezihle esizithathako. Kodwana akasivikeli ekuqalaneni nemiphumela yeenqunto ezingasizihle esizithathako.  (Gal. 6:7, 8) Ngebangelo, siyayamukela imiphumela yokungenzi iinqunto ezihle nokukhuluma amezwi amambi nokwenza okungakalungi. Kuye ngalokho esikwenzileko, kungenzeka sitshwenywe ngunembeza obuhlungu. Ngebanga lokuthi sizokuqalana nemiphumela yeenqunto zethu, siyazivuma izono zethu, silungise imitjhaphwethu besibalekele ukuphinda imitjhapho efanako. Ukuthatha amagadango anjengala kuzosisiza sihlale emjarhweni wokuphila.

9. Khuyini ongayenza nangabe wenze isiqunto esingasisihle? (Qala nesithombe.)

⁹ Ungawuthwala njani umthwalo? Nange uthethe isiqunto esingasisihle khuyini ongayenza? Khumbula ukuthi angekhe wakghona ukutjhugulula lokho esele kudlulile. Ungadlali ngesikhathi sakho nangamandlakho ukulinga ukuveza ukuthi bewurerhe namkha ulinge ukusola abanye ngesiqunto nemitjhapho oyenzileko. Kunalokho, vuma imitjhaphwakho ulinge ukwenza koke ongakghona ukukwenza ebujamweni okibo. Nange uzizwa umlandu ngokumbi okwenzileko, zithobe uthandaze kuJehova, uvume umtjhaphwakho umbawe akulibalele. (Rhu. 25:11; 51:3, 4) Bawa ukulitjalelwa kilabo okungenzeka ubalimazile, nange kutlhogeka bawa isizo kubadala. (Jak. 5:14, 15) Funda emitjhaphwenakho, linga ukubalekela ukuyibuyelela godu. Nawenza njalo ungaqiniseka ukuthi uJehova uzokutjengisa umusa bekakunikele nesekelo olitlhogako.—Rhu. 103:8-13.

10. Kubayini ukuhlala sizizwa ngasuthi kufuze senze okungeziweko kungaba mthwalo obudisi? (Galatiya 6:4)

¹⁰ Ukuhlala sizizwa ngasuthi kufuze senze okungeziweko. Singazithwesa umthwalo nasihlala sizimadanisa nabanye. (Funda kwebeGalatiya 6:4.) Nange sihlala sifuna ukuzimadanisa nabanye singagcina sele sinomona besifune nokuphalisana nabo. (Gal. 5:26) Nange silinga ukwenza lokho abanye abakwenzako nanyana singakghoni singazilimaza. Cabanga ngalokhu, iBhayibheli lisitjela ukuthi kuyadanisa ukulinda into, yeke kuzokudanisa khulu ukulinda into engeze sayifumana. (IzA. 13:12) Nasenza njalo, sizokudinwa khulu singasakghoni ukugijima umjarho wokuphila.—IzA. 24:10.

11. Khuyini engakusiza ubalekele ukuzizwa ngasuthi kufuze wenze okungeziweko?

¹¹ Ungawulahla njani umthwalo loyo? Ungalindeli ukwenza okungaphezu kwalokho uJehova akulindele kuwe. Akakalindeli ukuthi unikele ngalokho onganakho. (2 Kor. 8:12) Qiniseka ukuthi akamadanisi lokho okwenzako nalokho abanye abakwenzako. (Mat. 25:20-23) Ukuthatha njengokuligugu lokho omenzela khona ngomphefumulo wakho woke, ukuthembeka kwakho, nokukghodlhelela kwakho. Ngokuthobeka, yamukela ukuthi umnyakakho, ipilwakho namkha obunye ubujamo kungakhandela lokho okghona ukukwenza okwanje. NjengoBharzilayi, zimisele ukwala isabelo esithileko nangabe ipilwakho namkha iminyakakho yenza kube budisi ukuthi wenze isabelo sakho. (2 Sam. 19:35, 36) NjengoMosi yamkela isizo, unikele nabanye umsebenzi nakukghonekako. (Eks. 18:21, 22) Ukuthobeka okunjalo kuzokusiza ungenzi izinto ezingaphezu kwamandlakho bewudinwe emjarhwenakho wokuphila.

12. Kghani kufuze sizizwe simlandu ngeenqunto abanye abantu abazenzako? Hlathulula.

¹² Ukuzizwa umlandu ngeenqunto ezimbi abanye abazenzako. Angekhe sakghona ukwenzela abanye iinqunto begodu angekhe sakghona ukubavikela bona baqalane nemiphumela yeenqunto abazenzako.  Ngokwesibonelo, indodana namkha indodakazi ingaqunta ukulisa ukulotjha uJehova. Isiquntweso singabazwisa ubuhlungu khulu ababelethi. Nanyana kunjalo, ababelethi abazibeka umlandu ngeenqunto ezimbi abantwababo abazenzako bazithwalisa umthwalo obudisi. Akusimthwalo uJehova alindele bona ababelethi bawuthwale.—Rom. 14:12.

13. Umbelethi angaqalana njani nesiqunto somntwana esingakahlakaniphi?

¹³ Ungawulahla njani umthwalo loyo? Khumbula ukuthi uJehova usinikele soke itjhaphuluko yokuzikhethela. Uvumela umuntu ngamunye azenzele isiqunto sakhe. Lokho kuhlanganisa ukuthi umuntu uzomlotjha na. UJehova uyazi ukuthi awusimbelethi onganasono, ufuna kwaphela wenze koke ongakghona ukukwenza. Isiqunto umntwanakho asenzako akusimthwalakho, mthwalakhe. (IzA. 20:11) Nanyana kunjalo, kungenzeka usolo ucabanga ngemitjhapho oyenzileko njengombelethi. Nangabe kunjalo, tjela uJehova ngendlela ozizwa ngayo umbawe akulibalele. Uyazi bona angekhe ukwazi ukubuyisela isikhathi emuva wenze izinto ngendlela ehlukileko. Ngendlela efanako akakalindeli ukuthi uvikele umntwanakho ukuqalana nemiphumela yesiqunto asithetheko. Khumbula ukuthi nange umntwanakho enza umzamo wokuthi abuyele kuJehova uzomamukela ngezandla ezivulekileko.—Luk. 15:18-20.

14. Kubayini kufuze silahle ukuzizwa simlandu ngaso soke isikhathi?

¹⁴ Ukuzibeka umlandu ngaso soke isikhathi. Nasenze isono kuyafaneleka bona sizizwe simlandu. Nanyana kunjalo, ukuzizwa umlandu khulu mthwalo okungakafuzi siwuthwale. Mthwalo okufuze siwulahle. Sizokwazi njani ukuthi sesizibetha khulu? Nasele sisivumile isono sethu, satjhuguluka begodu sathatha amagadango wokuthi singasibuyeleli, singaqiniseka ukuthi uJehova usilibalele. (IzE. 3:19) Ngemva kokuthatha amagadango lawo, uJehova akafuni siragele phambili sizibeka  umlandu. Uyazi ukuthi kuzosilimaza lokho. (Rhu. 31:10) Nasivumela ukudana khulu, singazithola sesiphosa itewu emjarhweni wokuphila.—2 Kor. 2:7.

15. Khuyini engakusiza uqalane nokuzibeka umlandu ngokudluleleko? (1 Jwanisi 3:19, 20) (Qala nesithombe.)

¹⁵ Ungawulahla njani umthwalo loyo? Nawuragela phambili uzizwa umlandu, dzimelela ‘ekulibaleleni kwamambala’ uZimu akunikelako. (Rhu. 130:4) Nakalibalela labo abatjhuguluke kwamambala, uthembisa uthi: “Angekhe ngisakhumbula isono sabo.” (Jor. 31:34) Lokhu kutjho ukuthi uJehova angekhe asacabanga ngezono akulibalele ngazo. Nje-ke ungaqali ubudisi oqalene nabo njengebanga lokuthi uZimu akakakulibaleli ngesono osenzileko. Ungazikwateli ukuthi ulahlekelwe malungelo athileko ebandleni. UJehova akasolo acabanga ngezinto ezimbi ozenzileko, nawe lisa ukucabanga ngazo.—Funda yoku-1 kaJwanisi 3:19, 20.

16. Njengabagijimi khuyini okufuze siyizwisise?

¹⁶ Njengombana sigijima emjarhweni wokuphila, kufuze ‘sigijime ngendlela yokobana sithumbe.’ (1 Kor. 9:24) Lokho singakwenza ngokuthi sihlukanise phakathi kwemithwalo okufuze siyithwale nemithwalo okufuze siyilahle. Esihlokwenesi sicoce ngeembonelo ezimbalwa zalokhu okufuze sikuthwale nalokhu okufuze sikulahle. Kodwana kukhona ezinye esingakhuluma ngazo. UJesu wathi, ‘singadisibezwa kukudla khulu, kusela khulu namatshwenyeko wokuphila.’ (Luk. 21:34) Imitlolo le neminye ingakusiza ukghone ukubona la kufuze ulungise khona nawuzakugijima umjarho wokuphila.

17. Kubayini singaqiniseka ukuthi singawuthumba umjarho wokuphila?

¹⁷ Singaqiniseka ukuthi sizowuthumba umjarho wokuphila ngombana uJehova uzosinikela amandla esiwatlhogako. (Isa. 40:29-31) Yeke, ungaphunguli ibelo ogijima ngalo! Lingisa umpostoli uPowula, owagijima khulu bona afumane unongorwana obekwe phambi kwakhe. (Flp. 3:13, 14) Akekho umuntu ongakugijimela umjarho lo kodwana uJehova angakusiza uphumelele. UJehova angakusiza uthwale imithwalo okufuze uyithwale, ulahle engatlhogekiko. (Rhu. 68:19) UJehova nakangehlangothini lakho uzokukghona ukugijima umjarho ngokukghodlhelela bewuthumbe!