1. Kurugiirira aha Abaheburaayo 12:1, twine kukora ki kubaasa kuhika aha kimariro omu mpaka z’okutunga amagara?

 BAIBULI neegyeragyeranisa obuheereza bwaitu bw’Ekikristaayo n’okwiruka okw’empaka. Abairuki abarikuhika aha kimariro nibatunga ekiconco ky’amagara agatahwaho. (2 Tim. 4:7, 8) Twine kuteeraho nk’oku turikubaasa kugumizamu nitwiruka, na munonga obu turi haihi kuhika aha kimariro. Entumwa Paulo, owaahendeire gye empaka z’okutunga amagara, akooreka ekirikubaasa kutuhwera kusingura. Akatuhiga ‘kujuura ebirikuremeera byona twirukye okwiruka okw’empaka oku tuteereirweho n’okugumisiriza.’—Shoma Abaheburaayo 12:1.

2. ‘Okujuura ebirikuremeera byona’ nikimanyisa ki?

² Mbwenu shi obu Paulo yaahandiika ngu ‘tujuure ebirikuremeera byona,’ akaba naamanyisa ngu tihaine ebi Omukristaayo ashemereire kuba aine? Ngaaha. Kureka, akaba naayoreka ngu twine kweihaho ebitarikwetengyesa byona. Ebirikuremeera ebyo nibibaasa kuturemesa nari kutureetere kuruha. Kubaasa kugumisiriza, twine kurahuka kumanya byona ebirikubaasa kuremeera kandi tukabyeihaho. Kwonka nabwo, titushemereire kweihaho ebi twine kwekorera. Twaba tutabyekoreire, nitubaasa kutaguma omu mpaka ezo. (2 Tim. 2:5) Ni bintu ki ebi twine kwekorera?

3. (a) Kurugiirira aha Abagalatia 6:5, ni kintu ki eki twine kwekorera? (b) Nituza kushwijuma ki omu kicweka eki, kandi ahabw’enki?

³ Shoma Abagalatia 6:5. Paulo akagamba aha kintu eki twine kwekorera. Akahandiika ati: ‘Omuntu weena naija  kwekorera omutwaro gwe wenka.’ Paulo akaba naamanyisa obujunaanizibwa obu omuntu aine ahari Ruhanga, obu buri omwe aine kuhikiiriza ahabwe. Omu kicweka eki, nituza kugamba aha bi twine kwekorera n’oku turikubaasa kubyekorera. Kandi tureebe ebirikuremeera ebi turikubaasa kuba twekoreire n’oku turikubaasa kubyeihaho. Okwekorera omutwaro gwaitu n’okweihaho ebirikuremeera ebitarikwetengyesa nikiija kutuhwera kusingura okwiruka okw’empaka z’okutunga amagara.

4. Ahabw’enki okuhikiiriza okuraganisa kw’okwehayo kwaitu kitari mugugu?

⁴ Okuraganisa kw’okwehayo kwaitu. Ku turikwehayo ahari Yehova, nitumuraganisa kumuheereza n’okukora ebi arikukunda. Twine kuhikiiriza okuraganisa okwo. Okuhamira aha kwehayo kwaitu n’obujunaanizibwa buhango, kwonka ti mugugu. Ahakuba Yehova akatuhanga turikubaasa kukora ebi arikukunda. (Kush. 4:11) Akatuhanga omu kishushani kye kandi twine ekyetengo  ky’eby’omwoyo. N’ahabw’ekyo, nitubaasa kumwirira haihi kandi nitushemererwa kukora ebi arikukunda. (Zab. 40:8) Ekindi, twakora ebi Ruhanga arikukunda kandi tukakuratira Omwana we, ‘nitutunga obuhuumure.’—Mat. 11:28-30.

5. Niki ekirikubaasa kukuhwera kuhikiiriza okwehayo kwawe? (1 Yohaana 5:3)

⁵ Noobaasa kuhikiiriza ota okuraganisa okwo? Ebintu bibiri ebi nibibaasa kuhwera. Eky’okubanza, gumizamu noohamya omukago gwawe na Yehova. Ekyo noobaasa kukikora orikuteekateeka ahari byona ebi Yehova akukoreire n’emigisha ei akubiikiire. Waayongyera kukunda Ruhanga, torikwija kugumirwa kumworobera. (Shoma 1 Yohaana 5:3.) Ekya kabiri, tooreza Yesu. Akaba omusinguzi omu kukora ebi Yehova arikukunda ahabw’okumushaba kumuhwera n’okuta omutima aha kihembo. (Heb. 5:7; 12:2) Nka Yesu, nitushaba Yehova kutuha amaani kandi tuguma nituteekateeka aha matsiko g’amagara agatahwaho. Waayongyera kukunda Yehova kandi okatooreza Omwana we, noija kubaasa kuhikiiriza okuraganisa kwawe.

6. Ahabw’enki twine kuhikiiriza obujunaanizibwa bwaitu omu ka?

⁶ Obujunaanizibwa obu twine omu ka. Omu kwiruka okw’empaka z’okutunga amagara, twine kwongyera kukunda Yehova na Yesu kukira oku turikukunda abanyabuzaare baitu. (Mat. 10:37) Kwonka ekyo tikirikumanyisa ngu twine kwehuzya obujunaanizibwa bwaitu omu ka, orikushusha ngu nibuturemesa kushemeza Ruhanga na Kristo. Kubaasa kusiimwa Ruhanga na Kristo, twine kuhikiiriza obujunaanizibwa bwaitu omu ka. (1 Tim. 5:4, 8) Twakora tutyo, nitwija kushemererwa. Yehova naamanya ngu amaka nigabamu okushemererwa omushaija n’omukazi baakundana kandi bakahaana ekitiinisa, abazaire baakunda abaana baabo kandi bakabatendeka, n’abaana bakorobera abazaire baabo.—Efe. 5:33; 6:1, 4.

7. Noobaasa kuhikiiriza ota obujunaanizibwa bwawe omu ka?

⁷ Noobaasa kwekorera ota obujunaanizibwa obwo? Yaaba oine bujunaanizibwa ki omu ka, kuratira obuhabuzi oburi omu Baibuli omu mwanya gw’okugyendera aha nyehurira zaawe, entwaza y’omu kicweka kyanyu nari ebi abahangu barikugamba. (Enf. 24:3, 4) Koresa gye ebiri omu bitabo by’ekibiina. Nibikuhwera kumanya oku orikubaasa kugyendera aha misingye ya Baibuli. Nk’eky’okureeberaho, omu bicweka ebikurataine ahansi y’omutwe “Help for the Family” harimu obuhabuzi burungi oburikubaasa kuhwera abari omu bushwere, abazaire, n’eminyeeto kusingura oburemeezi obu barikutunga obunaku obu. b Mariirira kugyendera aha buhabuzi bwa Baibuli n’obu abandi omu ka barikuba batarikubugyenderaho. Waakora otyo, eka yaanyu neija kugasirwa kandi Yehova naija kukuha emigisha.—1 Pet. 3:1, 2.

8. Nitukwatwaho tuta ebi turikucwamu?

⁸ Ebi turikucwamu nibitukwataho. Yehova akatuha obugabe bw’okwecweramu, kandi naayenda ngu tugasirwe ahabw’okucwamu gye. Kwonka tarikuturinda kutahikwaho ebirikuruga omu kucwamu kubi. (Gal. 6:7, 8) Ahabw’enshonga egyo, nitwikiriza ebirikutuhikaho ahabw’okucwamu kubi, okugamba  tutabandize kuteekateeka, n’okukora ebitahikire. Kurugiirira aha ki turikuba tukozire, nitubaasa kugira omutima ogurikweshinja. Kwonka, okumanya ngu nitujunaanwa ahabw’ebi turikucwamu nikibaasa kutuhiga kweteisa ebibi byaitu, tukateereza enshonga kandi tukeetantara kugaruka kubikora. Okukora ebyo nikituhwera kuguma omu mpaka z’okutunga amagara.

9. Noobaasa kukora ki waacwamu kubi?

⁹ Noobaasa kwekorera ota ebirikuruga omu kucwamu kwawe? Ku oraabe ocwiremu kubi, ikiriza ngu torikubaasa kuhindura ekibaireho. Otashiisha obwire orikwenda kworeka ngu ohikire nari kwecwera orubanja nari kucwera abandi orubanja ahabw’okucwamu kubi. Omu mwanya gw’ekyo, ikiriza enshobe zaawe kandi oteereho kukora ekihikire omu mbeera ezi orimu. Waayeshinja ahabw’ekibi eki okozire, yeshengyereze Yehova omu kushaba, oikirize ekibi kyawe, kandi omushabe kukusaasira. (Zab. 25:11; 51:3, 4) Shaba okusaasirwa abu oshobeize, kandi kyaba nikyetengyesa gambira abareeberezi kukuhwera. (Yak. 5:14, 15) Yegyera aha nshobe zaawe, kandi teeraho kutagaruka kuzikora. Waakora ekyo, noobaasa kugira obwesigye ngu Yehova naija kukugirira embabazi kandi akuhwere.—Zab. 103:8-13.

10. Ahabw’enki okwenda kukora ebikurengire guri omugugu? (Abagalatia 6:4)

¹⁰ Okwenda kukora ebikurengire. Nitubaasa kugumirwa twayenda kukora ebiturengire turikwegyeragyeranisa n’abandi. (Shoma Abagalatia 6:4.) Butoosha twaguma nitwegyeragyeranisa n’abandi, nitubaasa kubagirira eihari kandi tuhayahayane nabo. (Gal. 5:26) Twateeraho kukora nk’eby’abandi, nitubaasa kukora ebirengire okubaasa kwaitu n’embeera zaitu. Mbwenu shi “amatsiko gatahwaire [gaaba] nigarusya omutima,” tikirikuturusya munonga twayenda kukora ebi tutarikubaasa? (Enf. 13:12) Okukora ekyo nikibaasa kutumaramu amaani kandi kituremese kusingura empaka z’okutunga amagara.—Enf. 24:10.

11. Niki ekirikubaasa kukuhwera kwetantara kwenda kukora ebikurengire?

¹¹ Noobaasa kweyihaho ota omugugu ogu? Otateekateeka kukora ebirikukira ebi Yehova arikukwenza. Tarikwenda omuhe eki otaine. (2 Kor. 8:12) Gira obwesigye ngu Yehova tarikugyeragyeranisa ebi orikukora n’eby’abandi. (Mat. 25:20-23) Naasiima obuheereza bwawe, obwesigwa bwawe, n’okugumisiriza kwawe. Manya obugarukiro bwawe kandi oikirize ngu noobaasa kutakora ebi orikwenda ahabw’emyaka, amagara mabi n’embeera. Nka Baruzilai, otaikiriza obujunaanizibwa waaba oine amagara mabi. (2 Sam. 19:35, 36) Nka Musa, ikiriza abandi kukuhwera kandi obarekurire obujunaanizibwa obumwe kyaba nikyetengyesa. (Kur. 18:21, 22) Waaba ori omucureezi toraikirize kukora ebikurengire ebirikubaasa kukumaramu amaani omu mpaka z’okutunga amagara.

12. Mbwenu shi nitujunaanwa ahabw’okucwamu kubi kw’abandi? Shoboorora.

¹² Okuteekateeka ngu niiwe oreetaire abandi kucwamu kubi. Titurikubaasa kucweramu abandi; nari kubarinda kutahikwaho ebirikuruga omu kucwamu kubi kwabo. Nk’eky’okureeberaho, mutabani waawe nari muhara waawe naabaasa kucwamu kurekyera aho kuheereza Yehova. Okucwamu nk’okwo nikureetera abazaire kugira obusaasi bwingi. Kwonka, abazaire abarikwecwera orubanja ahabw’okucwamu kubi kw’omwana waabo  nibeekorera ebibarengire. Ogwo ti mugugu ogu Yehova arikwenda ngu beekorere.—Rom. 14:12.

13. Omuzaire naabaasa kukora ki omwana yaacwamu kubi?

¹³ Noobaasa kweyihaho ota omugugu ogu? Ijuka ngu Yehova atuhaire obugabe bw’okwecweramu. Naayenda ngu buri omwe ayecweremu. Ekyo nikitwariramu n’okucwamu kumuheereza. Yehova naamanya ngu ori omuzaire otahikiriire, kwonka naayenda ngu okore ekirikukirayo oburungi eki orikubaasa. Omwana waawe niwe arikujunaanwa ahabw’ebi arikucwamu, beitu tiiwe. (Enf. 20:11) Kwonka noobaasa kuguma nooteekateeka aha nshobe ezi waakozire nk’omuzaire. Kyaba nikwo kiri, gambira Yehova oku orikwehurira kandi omushabe kukusaasira. Naamanya ngu torikubaasa kuhindura ebyabaireho enyima. Kandi, tarikukushaba kurinda omwana waawe kutahikwaho ebirikuruga omu kucwamu kubi kwe. Ijuka ngu omwana waawe yaateeraho kugarukira Yehova, naaba ayeteekateekire kumwakiira.—Luk. 15:18-20.

14. Ahabw’enki okweshinja ekirenga guri omugugu ogu twine kweihaho?

¹⁴ Okweshinja ekirenga. Twayeshinja ahabw’okukora ekibi, nikyetegyerezibwa. Kwonka, okweshinja ekirenga n’omugugu ogu tutashemereire kwekorera. Twine kugweihaho. Nitumanya tuta ngu nitweshinja ekirenga? Twaba twatwire ebibi byaitu, tukeeteisa, kandi tukateeraho kutagaruka kubikora, nitubaasa kugira obwesigye ngu Yehova atusaasire. (Byak. 3:19) Bwanyima y’okukora ebyo, Yehova tarikwenda ngu tugumizemu nitweshinja. Naamanya ngu n’eky’akabi kuguma nitweshinja. (Zab. 31:10) Twayeshinja ekirenga, nitubaasa kuruga omu mpaka z’okutunga amagara.—2 Kor. 2:7.

15. Niki ekirikubaasa kukuhwera kuteeshinja ekirenga? (1 Yohaana 3:19, 20)

¹⁵ Noobaasa kweyihaho ota omugugu ogu? Waaba nooyeshinja ekirenga, ijuka ngu Ruhanga  ‘naasaasirira’ kimwe. (Zab. 130:4) Ku arikusaasira abarikweteisa baihire aha mutima, naabaraganisa ati: “N’ekibi kyabo tindikiijuka bundi.” (Yer. 31:34) Ekyo nikimanyisa ngu Yehova tarikuguma naakujunaana ahabw’ebibi ebi waakozire enyima. N’ahabw’ekyo, otareeba oburemeezi oburikuruga omu bibi ebi waakozire nk’obuhame oburikworeka ngu tosaasiirwe. Kandi oteehurira kubi enshobe ezi waakozire zaakureetera kutatunga obujunaanizibwa obumwe omu kibiina. Yehova tarikuguma naijuka ebibi byawe, kandi naiwe toshemereire kuguma noobiteekateekaho.—Shoma 1 Yohaana 3:19, 20.

16. Nk’abairuki abandi, twine kumanya ki?

¹⁶ Twaba turi omu kwiruka okw’empaka z’okutunga amagara, twine ‘kwiruka, [ngu] tubone kuheebwa ekihembo.’ (1 Kor. 9:24) Nitubaasa kukora ekyo twamanya entaaniso eri aha gati y’ebintu ebi tushemereire kwekorera n’ebi twine kweihaho. Omu kicweka eki, twareeba bimwe aha bi turikubaasa kwekorera n’ebi twine kweihaho. Kwonka hariho n’ebindi. Yesu akagira ngu nitubaasa ‘kuremesibwa omururu n’obusinzi n’amaganya g’amagara aga.’ (Luk. 21:34) Ebyahandiikirwe ebi n’ebindi nibibaasa kukuhwera kumanya ahu oine kuhinduramu omu kwiruka okw’empaka z’okutunga amagara.

17. Ahabw’enki nituhamya ngu nitubaasa kusingura omu mpaka z’okutunga amagara?

¹⁷ Nituhamya ngu nitubaasa kusingura omu mpaka z’okutunga amagara ahakuba Yehova naatuha amaani agarikwetengyesa. (Isa. 40:29-31) N’ahabw’ekyo, otaruha. Tooreza entumwa Paulo, owaataireho n’age goona kusingura ekihembo. (Fil. 3:13, 14) Tihariho orikubaasa kukwirukira empaka ezi, kwonka noobaasa kusingura ahabw’okuhwerwa Yehova. Yehova naabaasa kukuhwera kwekorera omutwaro gwawe n’okweihaho ebirikuremeera ebitarikwetengyesa. (Zab. 68:19) Ahabw’obuhwezi bwe, noobaasa kwiruka empaka ezi n’okugumisiriza kandi osingure.