1. Ukufwana na Bahiburi 12:1, ngimba tukulondiwa ukubomba isyafiki ukuti tufwanisye ukubopa kanunu pampalano uwakwisakubwagha ubumi?

 IBAIBOLO likubufwanikisya ubumi bwitu bwa Bukristu numpalano. Linga aba bikubopa bamalile umpalano wabo, bisakubwagha ubumi bwa bwila na bwila. (2 Tim. 4:7, 8) Tukulondiwa ukubomba syosa isi tubaghile ukufwanisya ukuti tukindilileghe ukubopa, panongwa yakuti ubumalilo bwa mpalano witu buli pipi fiyo. Untumiwa Pauli, uyu afwanisye ukubopa kanunu pampalano, ayobile ifindu ifi fibaghile ukututula. Umwene atukasisye ukuti, “twiyepusyeko kuli fyosa ifi fikutupinga . . . , twiyuleghe ukubopa pafinganilo iyi yili nkyeni mmyitu.”​—Belenga Bahiburi 12:1.

2. Ngimba amasyu aghakuti, “twiyepusyeko kuli fyosa ifi fikutupinga” ghikusanusya isyafiki?

² Pakabalilo aka Pauli alembagha amasyu aghakuti, “twiyepusyeko kuli fyosa ifi fikutupinga,” ngimba asanusyagha ukuti Unkristu atikulondiwa ukupimba ikindu kilikyosa? Hayi. Mmalo mwake, asanusyagha ukuti tutikulondiwa ukupimba ifindu ifisito ifi fikaya fyakulondiwa. Ifindu ifisito fibaghile ukutumala amaka nukutukatasya fiyo. Ukuti twifimbilisye, tukulondiwa ukusyaghania mwanakalinga linga tupimbile ifindu fimo ifisito nukufitagha. Loli tutikulondiwa ukutagha ifindu ifi tukulondiwa ukupimba. Linga tutaghile ifindu ifi tukulondiwa ukupimba, tutikuya pakukindilila ukubopa pampalano. (2 Tim. 2:5) Ngimba tukulondiwa ukupimba ifindu fiki?

3. (a) Ukufwana na Bagalatia 6:5, ngimba tukulondiwa ukupimba ifindu fiki? (b) Ngimba tukuya pakuyobesania isyafiki munkhani iyi kangi nongwa yafiki?

³ Belenga Bagalatia 6:5. Pilemba ili Pauli ayobile ikindu  kimo iki tukulondiwa ukupimba. Umwene alembile ukuti, “umundu wesa isakupimbagha ki kitwalo kyake.” Apa Pauli ayobagha isi Kyala ikulonda ukuti aliwesa abombeghe. Munkhani iyi, tukuya pakuyobesania isi “ikitwalo” pamo ukuti katundu witu ikusanusya namuno tubaghile ukumpimbila. Tukuya pakuyobesania kangi isya findu ifisito ifi lumo tubaghile ukupimba namuno tubaghile ukufitaghila. Ukupimba katundu witu nukutagha uyu akaya wakulondiwa, kukuya pakututula ukuti tukindilileghe ukubopa pampalano uwakwisakubwagha ubumi bwa bwila na bwila.

4. Nongwa yafiki kukaya kukafu ukufwanisya isi twafingile kwa Yehova? (Keta kangi ikithuzi.)

⁴ Ukwiyipa ukuti tosiwe. Linga twiyipile kwa Yehova, tukufinga kumyake ukuti tukumwiputagha mwene nukubomba ubwighane bwake. Tukulondiwa ukufwanisya isi tufingile. Ukubomba syosa isi twafingile kwa Yehova, budindo bunywamu loli kukaya kukafu. Tukulondiwa ukubomba isi panongwa yakuti Yehova atupelile ukuti tubombeghe ubwighane bwake. (Ubuset. 4:11) Atupelile ukuti tuyeghe nubwighane bwa kummanya nukumwiputa kangi  atupelile nkifwani kyake. Ifyakukongapo fyake, tukuya pabumanyani ubununu na Kyala kangi tukuhoboka ukubomba ubwighane bwake. (Sal. 40:8) Mwakongelelapo, linga tukubomba ubwighane bwa Kyala nukunkonga Umwanake, tukubwagha “ubutusyo.”​—Mat. 11:28-30.

5. Ngimba findu fiki fibaghile ukututula ukufwanisya isi twafingile kwa Yehova? (1 Yohani 5:3)

⁵ Ngimba tukupimba bulebule katundu uyu? Filipo ifindu fibili ifi fibaghile ukututula. Ikyakwanda, tukindilileghe ukukusya ulughano lwitu kwa Yehova. Tubaghile ukubomba isi mwakwinong’onela ifindu fyosa ifinunu ifi Kyala atubombile na ifi isakutubombela nkyeni. Linga tunganile fiyo Kyala, kukuya kupepe fiyo ukumpilikila. (Belenga 1 Yohani 5:3.) Ikyabubili, tunkongeghe Yesu. Umwene afwanisye ukubomba ubwighane bwa Kyala panongwa yakuti iputagha kwa Yehova ukuti antule kangi inong’onelagha ulusayo ulu ayagha pakwambilila. (Hib. 5:7; 12:2.) Mwakufwana na Yesu, tunsumeghe Yehova ukuti atupe amaka kangi tusubileghe nindumbula yosa ukuti twisakubwagha ubumi bwa bwila na bwila. Bo mukukindilila ukungana Kyala nukunkonga Umwanake, mukuya pakufwanisya ukubomba syosya isi mwafingile kwa Yehova.

6. Nongwa yafiki tukulondiwa ukufwanisya ubudindo bwa mumbumba yitu? (Keta kangi ikithuzi.)

⁶ Ubudindo bwa mumbumba. Pampalano witu uwakwisakubwagha ubumi, tukulondiwa ukungana fiyo Yehova na Yesu ukukinda abakamu bitu. (Mat. 10:37) Loli isi sitikusanusya ukuti tubusuleghe ubudindo bwitu ubwa mumbumba. Mmalo mwake, ukuti tunhobosye Kyala na Kristu, tukulondiwa ukufwanisya ubudindo bwitu mumbumba. (1 Tim. 5:4, 8) Linga tukubomba isi, tukuya balusekelo. Mwakongelelapo, Yehova asimenye ukuti imbumba sibaghile ukuya syalusekelo linga unnyambala nunkasi wake bikunangisania ulughano nulughindiko. Imbumba sikuya syalusekelo kangi linga abapapi babaghanile nukubamanyisya abanabo, bope abanabo bikulondiwa ukubapilikila abapapi babo.​—Ef. 5:33; 6:1, 4.

7. Ngimba mubaghile ukufwanisya bulebule ubudindo ubu muli nabo mumbumba yinu?

⁷ Ngimba tukupimba bulebule katundu uyu? Kali uli nnyambala, nkikulu pamo mwana, musubileghe ubulongosi bwa mahala ubwa mu Baibolo. Komma ukubomba itolo isi mukuketa ukuti nunu pamo isi abandu bikubomba kuno mukwikala pamo isi abakalyoto bamo bikuti syo mubombeghe. (Mbu. 24:3, 4) Mubombeleghe amabuku ghitu agha ghikulingania isya Baibolo. Amabuku agha ghali ninjila sya muno mubaghile ukukongela ifundo sya mu Baibolo. Mwakifwanikisyo, inkhani isyakuti “Vyakovwira Mabanja” sili nubulongosi ubwakutula kundamyo isi abapapi, aba bali pabweghi na bakilumyana bikwaghana nasyo amasiku agha. b Mughelegheleghe ukukonga isi Ibaibolo likuyoba nalinga ukuti bamo mumbumba yinu batikukonga ifundo sya mu Baibolo. Linga mukubomba isi, imbumba yinu yikuya pakusayiwa kangi Yehova isakubasaya fiyo nkyeni.​—1 Pet. 3:1, 2.

8. Ngimba isi tukusala sikutupalamasya bulebule?

⁸ Ubudindo ubwakusala ifyakubomba. Yehova atupele ubwabuke ubwakuti twisalileghe twibene ifyakubomba kangi ikulonda ukuti tuhobokeghe panongwa yakusala kanunu ifyakubomba. Loli linga tukasala kanunu, ikwitikisya ukuti twaghane nindamyo. (Gal. 6:7, 8) Yonongwa yake bukuya budindo bwitu ukumalana nindamyo isi sisile panongwa yakuti  tukasala kanunu ifindu. Ukufwana nifindu ifi tubombile, amabyebye ghitu ghabaghile ukututamya fiyo. Loli panongwa yakuti tuli nubudindo ubwakusala ifyakubomba, tukuyoba ubutulanongwa ubu tubombile, ukwanda ukubomba kanunu ifindu nukuleka ukwandisya kangi ubutulanongwa. Ukubomba isi kukututula ukuti tukindilile ukubopa pampalano uwakwisakubwagha ubumi.

9. Ngimba mubaghile ukubomba isyafiki linga mukasalile kanunu ifyakubomba? (Keta kangi ikithuzi.)

⁹ Ngimba tukupimba bulebule katundu uyu? Linga mukasala kanunu ifindu ngimba mubaghile ukubomba isyafiki? Mukumbukeghe ukuti mukabaghila ukuchenja isi mwabombile kunyuma. Komma ukumalila akabalilo namaka ghinu ukuti mwihobokele pamo ukubapa abininu inongwa pa isi mukasalile kanunu. Mmalo mwake, mumanye inongwa iyi mwaghene nindamyo nukwanda ukubomba kanunu ifindu. Linga mukwiyipa inongwa pabutulanongwa ubu mwabombile, amughomokele kwa Yehova ndwiputo, mumbule ubutulanongwa bwinu kangi munsume ukuti abahobokele. (Sal. 25:11; 51:3, 4) Mubasume aba mwabonangile ukuti babahobokele, kangi linga kwakulondiwa musume ubutuli kubakulumba bakipanga. (Yak. 5:14, 15) Mumanyilepo simo pabutulanongwa bwinu kangi mungandisyagha ukubomba. Linga mubombile isi, mukuya pakuketa ukuti Yehova abanangisye ikisa kyake nukubapa ubutuli ubu mukulondiwa.​—Sal. 103:8-13.

10. Nongwa yafiki ifindu ifi tukabaghila ukufwanisya yo katundu unsito? (Bagalatia 6:4)

¹⁰ Ifindu ifi tukabaghila ukufwanisya. Tubaghile ukuwa amaka linga tukwifwanikisya nabinitu. (Belenga Bagalatia 6:4.) Linga utubalilo twingi tukwifwanikisya nabinitu, tubaghile ukuya nubufi nukwanda ukulimbana nabo. (Gal. 5:26) Linga twandile ukubomba isi abinitu bikufwanisya nalinga ukuti tukabaghila ukufwanisya, lumo tubaghile ukwifulasya twibene. Kangi linga isi mwasubilagha “ukubombiwa sitoliwe amaka ghikwabuka.” Mwakufwana itolo, sikuya syakubaba fiyo linga tukughulila ifindu ifi tukabaghila ukufwanisya. (Mbu. 13:12) Linga tukubomba isi, tubaghile ukukatala nukuleka ukubopa pampalano uwakwisakubwagha ubumi.​—Mbu. 24:10.

11. Ngimba findu fiki fibaghile ukututula ukuleka ukusubila ifindu ifi tukabaghila ukufwanisya?

¹¹ Ngimba tukutagha bulebule katundu uyu? Komma ukubomba nyingi ukukinda pa isi Yehova ikulonda. Umwene atikulonda ukuti mubombeghe isi mukabaghila ukufwanisya. (2 Kor. 8:12) Musubileghe ukuti Yehova atikufwanikisya isi mukubomba na isi abangi bikubomba. (Mat. 25:20-23) Ikuhoboka fiyo nindumbula yinu iyakwiyipa ukuti mumbombeleghe, ubusubiliwa bwinu nukwifimbilisya kwinu. Mwiyisyeghe kangi mukumbukeghe ukuti lumo mukabaghila ukufwanisya ukubomba syosa isi mukulonda lino panongwa yabukangale, ububine pamo indamyo isingi. Mwakufwana na Barazilai, mukaneghe ukubomba imbombo iyi mupeliwe linga ububine pamo ubukangale bukubatolesya ukubomba isi. (2 Samu. 19:37) Mwakufwana itolo na Mose, mwitikisyeghe linga bamo bikulonda ukubatula kangi mubapeghe abininu amabudindo linga kwakulondiwa. (Kuso. 18:21, 22) Linga muli bakwiyisya, mutikuya pakughulilagha ifindu ifi fibaghile ukubawisya amaka nukutoliwa ukubopa pampalano uwakwisakubwagha ubumi bwa bwina na bwila.

12. Ngimba tukulondiwa ukwiyipa inongwa panongwa ya findu ifibibi ifi bamo bikusala? Lingania.

¹² Ukwiyipa inongwa linga bamo basalile ububibi ifyakubomba. Tukabaghila ukubasalila abangi ifyakubomba. Kangi utubalilo tosa tukabaghila ukubafighilila kundamyo isi sikwisa panongwa yakuti bakasalile kanunu ifindu. Mwakifwanikisyo, umwana undumyana pamo undindwana lumo abaghile ukusala  ukuleka ukumbombela Yehova. Isi sibaghile ukubapelela ikitima fiyo abapapi bake. Loli abapapi aba bikwiyipa inongwa panongwa yafindu ifibibi ifi umwanabo asalile, bikupimba katundu unsito. Yehova atikulonda ukuti abapapi bapimbeghe katundu uyu.​—Rom. 14:12.

13. Ngimba umpapi abaghile ukubomba bulebule na isi umwanake asalile ukubomba?

¹³ Ngimba tukutagha bulebule katundu uyu? Tukulondiwa ukumanya ukuti Yehova atupele twesa ubwabuke ubwakusala. Ikulonda ukuti umundu wesa asaleghe mwene ifyakubomba. Isi sikongelelapo ukumbombela umwene pamo hayi. Yehova asimenye ukuti mukaya mpapi ungolofu loli umwene ikulonda ukuti mubombeghe isi mubaghile ukufwanisya. Isi umwaninu ikusala ukubomba, bukuya budindo bwake komma bwinu. (Mbu. 20:11) Loli lumo pakuya mpapi mubaghile ukupasya panongwa ya isi musobile. Linga mosiyilile, mumbuleghe Yehova muno mukwipilikila nukusuma ukuti abahobokele. Umwene asimenye ukuti mukabaghila ukukumbuka isya kunyuma nukuchenja isi mwabombile. Kangi atikughulila ukuti mukuya pakunkanisya umwaninu ukuti angandisyagha isi abombile kunyuma. Mukumbukeghe ukuti linga umwaninu iyipile ukuti aghomokele kwa Yehova, umwene ikuya pakumwambilila.​—Luka 15:18-20.

14. Nongwa yafiki ukwiyipa inongwa yo katundu uyu tukulondiwa ukutagha?

¹⁴ Ukwiyipa inongwa akabalilo kosa. Linga tubombile ubutulanongwa, syakupilikiwa ukuti tukwiyipa inongwa. Loli Yehova atikulonda ukuti tukindilileghe ukwiyipa inongwa. Yo katundu uyu tukulondiwa ukutagha. Ngimba tubaghile ukumanya bulebule ukuti ubutulanongwa bwitu bunywamu? Linga tuyobile ubutulanongwa bwitu, tulapile nukubomba isi tubaghile ukufwanisya ukuti tungandisyagha kangi, tubaghile ukuya nulusubilo losa ukuti Yehova atuhobokile. (Imbo. 3:19) Linga tubombile syosa isi, Yehova atikulonda ukuti tukindilileghe ukwiyipa inongwa. Umwene asimenye ukuti ukwiyipa inongwa kubibi fiyo. (Sal. 31:10) Linga tukukindilila ukusulumania, tubaghile ukuleka ukubopa pampalano uwakwisakubwagha ubumi bwa bwila na bwila.​—2 Kor. 2:7.

15. Ngimba findu fiki fibaghile ukubatula ukuti mungiyipagha inongwa? (1 Yohani 3:19, 20) (Keta kangi ikithuzi.)

 ¹⁵ Ngimba tukutagha bulebule katundu uyu? Linga tukukindilila ukwiyipa inongwa, twinong’oneleghe ‘uluhobokelo lwa naloli’ ulu Kyala ikutunangisya. (Sal. 130:4) Linga Yehova abahobokile aba balapile naloli, umwene ikufinga kumyabo ukuti: “Nimbibi syabo ndisakusikumbukagha kangi.” (Yere. 31:34) Isi sikusanusya ukuti Yehova atikuya pakwinong’onela kangi ubutulanongwa ubu atuhobokile. Yonongwa yake mutikulondiwa ukwinong’ona ukuti Kyala akabahobokela panongwa yandamyo isi mukwaghana nasyo pabutulanongwa ubu mwabombile. Kangi mungawagha amaka linga babasosisyepo pabudindo ubu mwali nabo panongwa ya isi mwabombile kunyuma. Yehova atikukindilila ukwinong’onela ubutulanongwa ubu mwabombile kangi nanumwe mutikulondiwa ukwinong’onela.​—Belenga 1 Yohani 3:19, 20.

16. Bo tukubopa pampalano, ngimba tukulondiwa ukumanya isyafiki?

¹⁶ Bo tukubopa pampalano ukuti tukabwaghe ubumi bwa bwila na bwila, tukulondiwa “ukubopa munjila iyakuti tukambilile ifihombiwa.” (1 Kor. 9:24 NWT) Tubaghile ukubomba isi linga tukupilikisya kanunu ukukindana kwa katundu uyu tukulondiwa ukupimba na uyu tukulondiwa ukutagha. Munkhani iyi, tuyobesenie ififwanikisyo finandi itolo ifya findu ifi tukulondiwa ukupimba na ifi tukulondiwa ukutagha. Loli fimo fyo ifi Yesu afiyobile. Umwene atile, tungikolaniagha nisya nkisu nubughale, nukwiyaya nifya bumi ubu.” (Luka 21:34) Amalemba agha naghangi ghabaghile ukubatula ukumanya ifi mukulondiwa ukuchenja bo mukubopa pampalano uwakuti mukabwaghe ubumi bwa bwila na bwila.

17. Nongwa yafiki tuli nulusubilo losa ukuti tukuya pakutola pampalano uwakuti tukabwaghe ubumi bwa bwila na bwila?

¹⁷ Tuli nulusubilo losa ukuti tukuya pakutola pampalano panongwa yakuti Yehova ikuya pakutupa amaka agha tukulondiwa. (Yes. 40:29-31) Yonongwa yake mutikulondiwa ukukabila. Munkongeghe untumiwa Pauli, uyu iyipagha pampalano ukuti akambilile ifihombiwa ifi fyabikiwe nkyeni mmyake. (Filip. 3:13, 14) Akayapo uyu abaghile ukubabopela pampalano ughu, loli nubutuli bwa Yehova mubaghile ukufwanisya. Yehova abaghile ukubatula ukupimba katundu winu nukutagha uyu akaya wakulondiwa. (Sal. 68:19) Nubutuli bwa Yehova, mukuya pakufwanisya ukubopa mwakwifimbilisya pampalano ughu nukutola.