1. Base ed Hebreo 12:1, antoy gawaen tayo pian makasabi tayo ed finish line na lumba parad bilay?

 SAY bilay tayo ran Kristiano et inkompara na Biblia ed lumbay batik. Saramay makasabi ed finish line et awaten day premyo ya bilay ya andi-anggaan. (2 Tim. 4:7, 8) Itultuloy tayo sirin so ombatik, lalo la ta amta tayon asingsingger tayo la ed finish line. Sakey ed saray lingkor na Dios ya akasabi la ed finish line et si apostol Pablo. Oniay imbaga ton gawaen tayo pian manalo tayo ed sayan lumba: “Ekalen tayo . . . so amin a pakakabelatan . . . tan mananos itayon ombatik ed lumba.”—Basaen so Hebreo 12:1.

2. Antoy punto nen Pablo nen imbaga ton “ekalen tayo . . . so amin a pakakabelatan”?

² Nen imbaga nen Pablo ya “ekalen tayo . . . so amin a pakakabelatan,” labay to kasin ibaga et anggapo lan balot so awiten tayo? Andi, aliwan ontan so punto to. Say labay ton ibaga et ekalen tayoy amin ya agtayo kailangan ed lumba ta makabela-belat labat iratan. No agtayo iratan ekalen, ombagal tayo tan maganggano tayon onkesaw. Usisaen tayo sirin so sarili tayo ta ompan wala ra manayay awit tayon makapabelat. Kaukolan tayon ibantak iratan ya tampol. Pero siempre, seguradoen tayo met ya awit tayo iray kailangan tayo ed lumba. Ta no andi, na-disqualify tayo. (2 Tim. 2:5) Anto iratay kaukolan tayon awiten?

3. (a) Base ed Galacia 6:5, antoy nepeg tayon awiten o sakbaten? (b) Antoy aralen tayo ed sayan artikulo, tan akin et importantin pantongtongan tayo itan?

³ Basaen so Galacia 6:5. Insulat dia nen Pablo so nepeg tayon awiten o sakbaten. Imbaga to ya “kada sakey et nepeg ton  sakbaten so dilin responsabilidad to.” Anton responsabilidad so tutukoyen nen Pablo? Ontutukoy itan ed saray iilaloan nen Jehova ya gawaen tayo ya agtayo nayarin ipagawa ed arum. Pantongtongan tayo ed sayan artikulo no anto ray kaiba ed satan ya responsabilidad tan no panon tayon sakbaten iratan. Pantongtongan tayo met no anto ray makapabelat ya awi-awit tayo tan no panon tayon naibantak iratan. No sakbaten tayo so dilin responsabilidad tayo tan ibantak tayoy amin ya makapabelat, seguradon manalo tayo ed lumba parad bilay.

4. Akin et aliwan pabelat iray obligasyon tayo ed si Jehova? (Nengnengen met so litrato.)

⁴ Saray obligasyon tayo ed si Jehova. Nen indedika tayoy sarili tayo ed si Jehova, insipan tayo ya sikato labat so dayewen tayo tan gawaen tayoy panlabayan to. Kailangan tayon tooren itan ya sipan. Seryoso itan ya responsabilidad, pero ag-itan makapabelat. Ta diad tua, say rason no akin ya pinalsa itayo nen Jehova et pian gawaen tayoy panlabayan to. (Apo. 4:11) Aliwan kompleto so bilay tayo no  agtayo mandayew ed Dios, ta ontan ya talagay inkadesinyo tayo. Kanian nalikna tayo labat so tuan liket no gawaen tayoy panlabayan to, tan atan so sekreto pian nakaaro tayoy Dios. (Sal. 40:8) Ibabaga met na Biblia ya no unoren tayoy ganggan na Dios tan tumboken tayoy Anak to, “nainawaan [tayo].”—Mat. 11:28-30.

5. Anto ray makatulong pian nagawaan tayo ray obligasyon tayo ed Dios? (1 Juan 5:3)

⁵ Panon mon nasakbat iyan responsabilidad mo? Walay duaran makatulong. Unona, tuloytuloy mon pabiskegen so panangarom ed si Jehova. Isip mo so amin ya kamaongan ya ginawa to ed sika tan saray bendisyon ya ipaparaan to ni parad sika. No diman mas ombibiskeg so panangarom ed si Jehova, mas mainomay mon unoren iray ganggan to. (Basaen so 1 Juan 5:3.) Komadua, alig moy Jesus. Asumpal toy ipapagawa na Dios ta lanang ya manpipikasi tan manpapatulong ed si Jehova, tan sankanonot toy premyo ya iter nen Jehova ed sikato. (Heb. 5:7; 12:2) Singa si Jesus, lanang kan manpikasi tan manpatulong ed si Jehova. Lanang mo met ya isipen so ilalo tayon manbilay ya andi-anggaan. No pabiskegen moy panangarom ed si Jehova tan aligen moy Jesus, nagawaan mo iray obligasyon mo ed Dios.

6. Akin et nepeg tayon gawaen iray obligasyon tayo ed pamilya? (Nengnengen met so litrato.)

⁶ Saray obligasyon tayo ed pamilya. Diad lumba parad bilay, dapat mas inaro tayoy Jehova tan si Jesus nen saray kapamilya o kakanayon tayo. (Mat. 10:37) Pero agto labay ya ibaga ya paulyanan tayo la ray obligasyon tayo ed pamilya tan ibaraan tayo ya makahadlang iratan ed saray responsabilidad tayo bilang Kristiano. Diad tua, ibabaga na Biblia ya importantin gampanan tayoy responsabilidad tayo ed pamilya pian awaten nen Jehova tan Jesus so panlilingkor tayo. (1 Tim. 5:4, 8) Tan parad pankaabigan tayo lanlamang no gawaen tayo ray kanya-kanyan obligasyon tayo ed pamilya. Amta nen Jehova ya mas maliket so pamilya no walay aroan tan respeto ed baetan na sanasawa, no aroen tan ibangat na atateng iray ananak da, tan no unoren na ananak iray atateng da.—Efe. 5:33; 6:1, 4.

7. Panon mon nagawaan so papel mo ed pamilya?

⁷ Panon mon nasakbat iyan responsabilidad mo? Antokaman so papel mo ed pamilya, unor mo iray prinsipyo ed Biblia. Agka dapat akadepende ed ididikta na emosyon mo, kultura yo, odino opinyon na saray eksperto. (Pro. 24:3, 4) Man-research ka ed saray publikasyon tayo, ta ditan mo nabasa no panon mon naiyaplika iray prinsipyo ed Biblia. Singa bilang, nabasa ed saray artikulo ed seryen “Tulong Parad Pamilya” iray prinsipyo ed Biblia ya makatulong ed sanasawa, atateng, tan saray tinedyer, tan no panon dan nakaya iray probleman aarapen da. b Iyaplikam so ibabaga na Biblia anggano ag-itan iyaaplika na arum ya kapamilyam. Walay maabig ya epekto to ’tan ed interon pamilya yo, tan seguradon bendisyonan ka nen Jehova.—1 Ped. 3:1, 2.

8. Antoy epekto ed sikatayo na saray desisyon tayo?

⁸ Saray resulta na desisyon tayo. Inikdan itayo nen Jehova na kalayaan ya mandesisyon parad sarili tayo, tan labay to ya duga iray desisyon tayo pian maong so pansumpalan tayo. Pero no aliway desisyon tayo,  talagan anien tayo no antoy intanem tayo. (Gal. 6:7, 8) Kanian no bilang ta akagawa kay lingo, akapangibaga kay ansakit, o padalus-dalos kan kinmilos, labay nen Jehova ya akoen moy resulta na ginawam. Natural met labat ya nakonsiensia ka, pero pian talagan nipanengneng mo ya aakoen moy lingom, importante ya ipatuam itan, ipetek moy ginawam, tan agmo la uuliten. No ontay gawaen mo, tuloytuloy kan makabatik ed lumba parad bilay.

9. Antoy gawaen mo no aliway nansumpalan na desisyon mo? (Nengnengen met so litrato.)

⁹ Panon mon nasakbat iyan responsabilidad mo? No aliway nansumpalan na desisyon mo, awat mo ya alingo ka tan agmo la nauman so apalabas. No manggawa ka ni baraan o mananap ka ni tetelen mo, anggapoy naitulong to ’tan. Mas marakep no aminen mo ya aliway ginawam tan pansagpotan mon ipetek itan. No nakokonsiensia ka, maabig no manpikasi kad si Jehova, ipatuam ed sikato so kasalanan mo, tan kerew moy panamerdona to. (Sal. 25:11; 51:3, 4) Kerew ka met na perdona ed saramay asakitan mo. Tan no kaukolan, manpatulong ka ed saray elder. (Sant. 5:14, 15) Makaaral ka komon ed saray lingom, tan agmo la iratan uuliten. No gawaen mo iratan ya amin, seguradon kasian ka nen Aman Jehova tan tulongan to ka pian nagawaan moy duga.—Sal. 103:8-13.

10. Akin et ambelbelat ed liknaan no piliten tayon gawaen so agtayo kaya? (Galacia 6:4)

¹⁰ No piliten tayon gawaen so agtayo kaya. No ikompara tayoy sarili tayo ed arum, ompan piliten tayon gawaen so agtayo met kaya. (Basaen so Galacia 6:4.) Ompan agtayo naliklikas ya naiinggit tayo la manaya tan mikokompetensia tayo lad sikara. (Gal. 5:26) No pantayan mo so nagagawaan na arum, anta agmet iyabuloy na biskeg o situasyon mo, nasagad ka kanian agka lanlamang maliket. Tan ibabaga na Biblia ya “no agnagawa so iilaloan, makapasakit na puso.” (Pro. 13:12) No piliten moy sarilim ya gawaen so sakey ya bagay ya agmon talaga kaya, onkapuy so liknaan mo, naupot labat so biskeg mo, tan ombagal ka laingen ed pilulumbam.—Pro. 24:10.

11. Antoy makatulong pian agtayo piliten so sarili tayo ya gawaen so agtayo kaya?

¹¹ Panon mon naibantak iyan pabelat? Tandaan mo ya agbalot kerewen nen Jehova ed sika so agmo sarag ya iter. Kanian agmo dapat ipre-pressure so sarilim ya gawaen so sakey ya bagay ya agmet la iilaloan nen Jehova ya gawaen mo. (2 Cor. 8:12) Ag-ikokompara nen Jehova so nagagawaan mo ed nagagawaan na arum. (Mat. 25:20-23) Papablien to so interon-puso ya panlilingkor mo, say katooran mo, tan say panaanos mo. Mapaabebam ya bidbiren ya wala ran talagay agmo nagawaan lapud situasyon, edad, o sakit mo. Makaaral kad alimbawa nen Barzilai. Aliwan mauges no tanggian mo so sakey ya pribilehyo no agmo lan talaga kaya. (2 Sam. 19:35, 36) Makaaral ka met ed si Moises. Manpatulong ka tan ipasam so arum ya responsabilidad, no matukoy. (Exo. 18:21, 22) No awaten mo ya wala ray limitasyon mo, agmo piliten ya gawaen so agmo kaya, kanian agka nakesawan ed lumba parad bilay.

12. Duga kasi ya tetelen tayoy sarili tayo ed makapuy ya desisyon na arum? Ipaliwawa.

¹² No tetetelen tayoy sarili tayo ed makapuy ya desisyon na arum. Agtayo naidesisyonan so arum. No mauges so nansumpalan na desisyon da, kaukolan dan arapen itan. Tan no maminsan et agtayo la ran talaga nipaliis  ed resulta na ginawa da. Singa bilang, ompan mandesisyon so sakey ya anak ya agto la labay so manlingkor ed si Jehova. Seguradon ansakisakit ed saray atateng no ontan so gawaen na anak da. Pero no tetelen day sarili da, ambelbelat itan ed liknaan. Aglabay nen Jehova ya ontan so nalikna da.—Roma 14:12.

13. Antoy gawaen na ateng no aliway desisyon na anak to?

¹³ Panon mon naibantak iyan pabelat? Tandaan ya kada sakey ed sikatayo et inikdan nen Jehova na kalayaan ya mandesisyon. Ag-itayo didiktaan nen Jehova. Agto tayo ingen pipiliten ya manlingkor ed sikato. Amta nen Jehova ya anggapo ta’y perpekton ateng. Basta say labay to, gawam so anggaay nayarian mo ed pamapabaleg ed anak mo. No bilang ta aliway desisyon na anak mo, tandaan mo ya sikatoy walay pananagutan, aliwan sika. (Pro. 20:11) Pero bilang ateng, ompan sankanonot mo ya wala ray nankulangan mo. No ontan so naliliknam, ibagam ed si Jehova tan kerew moy panamerdona to. Amta to ya agmo la naipawil so apalabas tan agmo la nauman no antoy agawa. Tan agto iilaloan ya ipaliis moy anak mo ed saray resulta na ginawa to. No pagbabawian toy ginawa to tan ompawil ed si Jehova, sikatoy mabulos ya perdonaen tan awaten na Dios.—Luc. 15:18-20.

14. Akin ya say sobsobran pakakakonsiensia et pabelat ya nepeg tayon ibantak?

¹⁴ No sobsobra so pakakakonsiensia tayo. Natural labat ya nakonsiensia tayo no akagawa tayoy kasalanan. Pero, aglabay nen Jehova ya sobsobra tayon nakonsiensia. Makapabelat itan kanian nepeg tayon ibantak. No impatua tayo lay kasalanan tayo, nagbabawi tayo la, tan gagawaen tayoy anggaay nayarian tayon agla itan uliten, mantiwala tayo ya pinerdona itayo la nen Jehova. (Gawa 3:19) Kanian no ginawam la iratan ya amin, aglabay nen Jehova ya nakonsiensia ka ni. Amta to ya onkapuy so liknaan mo no agmo labanan so pakakakonsiensiam tan ermen mo. (Sal.  31:10) No manpatalo kad naliliknam, ompan onsuko ka la ed lumba parad bilay.—2 Cor. 2:7.

15. Antoy gawaen mo no sobsobray pakakakonsiensiam? (1 Juan 3:19, 20) (Nengnengen met so litrato.)

¹⁵ Panon mon naibantak iyan pabelat? No nakokonsiensia ka ni anta pinerdona ka la nen Jehova, agmo komon lilingwanan ya ‘tua so panamerdona to.’ (Sal. 130:4) No pinerdona to la so sakey ya magbabawin nankasalanan, im-promise to ya “lingwanan [to] lay kasalanan” na satan ya too. (Jer. 31:34) No pinerdona ka la nen Jehova, agto lan balot ungkaten so kasalanan mo. Kanian no aanien mo ray resulta na ginawam ya kasalanan, agmo komon iisipen ya ebidensya itan ya agka ni pinerdona nen Jehova. No bilang ta nakal kad pribilehyo, agmo komon uukomen o bubusolen so sarilim. No pinerdona ka la nen Jehova tan agto la sankanonot so kasalanan mo, perdonam met la sirin so sarilim.—Basaen so 1 Juan 3:19, 20.

16. Antoy dapat tayon tandaan legan tayon ombabatik ed lumba parad bilay?

¹⁶ Legan tayon ombabatik diad lumba parad bilay, komon ta nanengneng ed kababatik tayo ya labalabay tayon naala so premyo! (1 Cor. 9:24) Tandaan, makasabi tayo ed finish line no saramay kailangan tayo labat so awiten tayo tan no ibantak tayo so amin ya makapabelat. Apantongtongan tayo ed sayan artikulo so pigara labat ed saray nepeg tayon awiten tan kaukolan tayon ibantak. Pero wala ni arum ya nabasa ed Biblia. Singa bilang, imbaga nen Jesus ya nabelatan tayo ed “sobran panangan tan alabas a panag-inum tan saray kapagaan ed bilay.” (Luc. 21:34) Maabig no irebyum iyan imbaga nen Jesus tan arum ni ran teksto ed Biblia pian nausisam no anto ni ray kaukolan mon umanen pian tuloytuloy kan makabatik ed lumba parad bilay.

17. Akin et segurado tayo ya manalo tayo ed lumba parad bilay?

¹⁷ Mantiwala tayo ya ikdan itayo nen Jehova na biskeg pian manalo tayo ed lumba parad bilay. (Isa. 40:29-31) Kanian itultuloy moy ombatik; agka ontutunda. Alig moy apostol Pablo—amaspasya pian naawat toy premyo! (Fil. 3:13, 14) Tandaan mo ya sikan mismo so mansumpal ed sayan lumba. Pero agka mapaga ta tulongan ka nen Jehova. Kaibam si Jehova ya mansakbat ed saray responsabilidad mo, tan tulongan to ka ya naibantak iray makapabelat ed bilay mo. (Sal. 68:19) Diad tulong to, naanosan moy ombatik anggad finish line!