1. Segun Hebreonan 12:1, kiko nos tin ku hasi pa krusa e liña final di e kareda pa bida?

 BEIBEL ta bisa ku nos, komo kristian, ta den un kareda. E premio pa e koredónan ku krusa e liña final ta bida eterno. (2 Tim. 4:7, 8) Nos tin ku hasi tur nos esfuerso pa sigui kore pasó nos ta kasi yega e liña final. Apòstel Pablo, kende a krusa e liña final, a menshoná loke lo yuda nos krusa e liña ei. El a bisa nos pa “kita tur peso i . . . kore ku perseveransia e kareda ku tin nos dilanti.”—Lesa Hebreonan 12:1.

2. Kiko Pablo tabata ke men ku “kita tur peso”?

² Ora Pablo a bisa ku nos mester “kita tur peso,” akaso e tabata ke men ku un kristian no tin nada di karga? Nò. Loke e tabata ke men ta ku nos mester kita tur peso innesesario. E pesonan innesesario ei por pone nos baha spit i kansa. Pa nos por krusa e liña final, nos tin ku hasi sigur ku nos no ta karga nada innesesario ku por baha nos spit. Pero, tin sierto karga ku nos no por kita. Si nos hasi esei tòg, nos mes lo deskualifiká nos mes. (2 Tim. 2:5) Pues kiko ta loke sí nos tin ku karga?

3. (a) Segun Galationan 6:5, kiko nos tin ku karga? (b) Kiko nos lo trata den e artíkulo akí, i dikon?

³ Lesa Galationan 6:5. Pablo a splika ku kada kristian tin ku “karga su propio karga di responsabilidat.” Responsabilidat di kiko? Responsabilidatnan ku Dios ke pa nos kumpli kuné i ku niun hende no por karga pa nos. Den e artíkulo akí, nos lo wak kiko nos tin ku komprondé bou di “propio karga,” i kiko lo yuda nos karg’é.  Tambe nos lo papia di tres peso innesesario ku kisas nos ta kargando, i kiko lo yuda nos kita nan. Ta masha importante pa nos karga solamente e karganan ku ta nesesario, pasó asina ei nos por krusa e liña final i haña e premio di bida eterno.

4. Dikon nos promesa na Yehova no ta un karga pisá? (Wak e plachi.)

⁴ Promesa di sirbi Yehova pa semper. Ora nos a dediká nos mes na Yehova, nos a primintié di ador’é i hasi su boluntat. Nos mester kumpli ku nos palabra. Aunke esei ta un responsabilidat grandi, e no ta un karga pisá. Dikon nò? Pasobra Yehova a krea nos pa hasi su boluntat. (Rev. 4:11) El a hinka den nos kurason e deseo di konos’é i ador’é, i el a krea nos den su imágen. P’esei nos por hala serka dje i sinti goso den hasi su boluntat. (Sal. 40:8) I no ta esei so; ora nos hasi Yehova su boluntat i sigui ehèmpel di su Yu, nos lo sinti nos aliviá i refreská.—Mat. 11:28-30.

5. Kiko por yuda bo kumpli ku bo promesa na Yehova? (1 Huan 5:3)

 ⁵ Kiko lo yuda bo karg’é? Promé, sigui laga bo amor pa Yehova bira mas fuerte. Pa logra esei, pensa riba tur e bon kosnan ku el a i lo hasi pa bo. Mas bo stima Yehova, mas fásil lo ta pa bo obedes’é. (Lesa 1 Huan 5:3.) Di dos, imitá Hesus. El a logra hasi Yehova su boluntat pasobra el a resa pa yudansa i a keda tene su rekompensa na mente. (Heb. 5:7; 12:2) P’esei, meskos ku Hesus, pidi Yehova duna bo forsa i keda tene bo speransa di bida eterno na mente. Si bo laga bo amor pa Yehova bira mas fuerte i bo imitá Hesus, lo bo por kumpli ku e promesa ku bo a hasi na Yehova.

6. Dikon nos tin ku kumpli ku nos obligashon di famia? (Wak e plachi.)

⁶ Obligashon di famia. Den e kareda pa bida, nos mester stima Yehova i Hesus mas ku nos famia. (Mat. 10:37) Pero esei no ta nifiká ku nos por neglishá nos obligashonnan di famia. Al kontrario, si nos ke agradá Yehova i Hesus, nos tin ku kumpli ku e papel ku nos tin den nos famia. (1 Tim. 5:4, 8) Ora nos hasi esei, nos lo ta mas felis. Al fin i al kabo, Yehova sa ku un famia lo ta felis ora esposo i esposa ta trata otro ku amor i rèspèt, ora mayornan ta stima i eduká nan yunan i ora yunan ta obedesé nan mayornan.—Efe. 5:33; 6:1, 4.

7. Kiko lo yuda bo kumpli ku bo obligashon di famia?

⁷ Kiko lo yuda bo karg’é? Sea ku bo ta un kasá, un mayor òf un yu, konfia e bon konsehonan di Beibel. No djis bai tras di sintimentu, emoshon, kultura òf supuesto ekspertonan. (Pro. 24:3, 4) Usa nos publikashonnan. Nan tin sugerensianan práktiko i ta splika kon pa apliká prinsipionan di Beibel. Por ehèmpel, nos website jw.org tin informashon ku lo yuda pareha-, mayor- i tinernan sa kon pa dil ku retonan ku kada un di nan por haña nan kuné. b Sea desididu pa pone konsehonan di Beibel na práktika, asta si ta abo ta e úniko den bo famia ku ta hasi esei. Bo famia lo benefisiá, i Yehova lo bendishoná bo.—1 Ped. 3:1, 2.

8. Kon nos desishonnan por afektá nos?

⁸ Konsekuensia di bo desishonnan. Yehova a duna nos e libertat pa tuma nos mes desishonnan, i e ke pa nos tuma desishon ku di bèrdat ta bon pa nos. Pero si nos tuma mal desishon, e no ta protehá nos di e konsekuensianan. (Gal. 6:7, 8) P’esei si nos tuma mal desishon òf bisa òf hasi algu sin pensa, nos tin ku gewon aseptá e konsekuensianan. Tin biaha, nos por sinti nos malu i nos konsenshi por kansa nos. Pero, komo nos sa ku nos tin ku para responsabel pa nos desishonnan, nos lo konfesá e malu ku nos a hasi, kambia nos kondukta i hasi esfuerso pa no kai den e mesun eror. Asina ei nos por sigui den e kareda pa bida.

9. Kiko lo yuda bo si bo a tuma un mal desishon? (Wak e plachi.)

⁹ Kiko lo yuda bo karg’é? Si bo a tuma  un mal desishon, aseptá ku loke a pasa a pasa i ku bo no por kambia pasado. No tormentá bo mes, ni keda pensa demasiado riba e asuntu, ni hustifiká bo mes òf tira falta riba otro hende. Mas bien, aseptá ku loke bo a hasi no tabata bon i hasi loke bo por pa mehorá e situashon. Si bo ta sinti bo malu pa algu ku bo a hasi, resa na Yehova, bis’é loke bo a hasi i pidié pordoná bo. (Sal. 25:11; 51:3, 4) Si bo a hùrt un hende, pidié despensa. I si ta nesesario bai serka e ansianonan pa mas yudansa. (Sant. 5:14, 15) Siña for di bo fayonan i purba di no bolbe hasi nan. Segun ku bo ta hasi esfuerso, bo por tin sigur ku Yehova lo yuda bo i lo tene kompashon ku bo.—Sal. 103:8-13.

10. Dikon eksigí muchu di nos mes ta un peso innesesario? (Galationan 6:4)

¹⁰ Eksigí muchu di bo mes. Ora nos kompará nos mes ku otro hende, nos ta poniendo un peso innesesario riba nos mes. (Lesa Galationan 6:4.) Si nos tin kustumber di kompará nos mes, nos por kuminsá envidiá i kompetí ku otro. (Gal. 5:26) Si nos ta fòrsa pa hasi loke otronan ta hasi, nos por hasi nos mes daño. Anto si “speransa ku ta tarda pa bira realidat” mes “ta hasi kurason ferdrit,” imaginá kuantu mas ferdrit nos lo sinti si nos pone un meta ku nos sa bon bon ku nunka nos no por logra. (Pro. 13:12) Esei por kita tur energia ku nos mester pa sigui kore den e kareda pa bida.—Pro. 24:10.

11. Kiko lo yuda bo pa no eksigí muchu di bo mes?

¹¹ Kiko lo yuda bo kit’é? No eksigí di bo mes mas di loke Yehova ta ferwagt di bo. Nunka lo e no pidi bo pa duna loke bo no tin. (2 Kor. 8:12) Bo por tin sigur ku Yehova no ta kompará bo ku niun hende. (Mat. 25:20-23) E ta balorá loke abo ta hasi, bo sirbishi di henter kurason, bo fieldat i bo perseveransia. Rekonosé ku bo edat, salú i sirkunstansia por limitá loke bo por hasi awor. Meskos ku Barzilai, sea dispuesto pa entregá òf bisa nò na un asignashon si bo ta mira ku bo salú òf edat ta pone ku ta difísil pa bo kumpli kuné. (2 Sám. 19:35, 36) Anto meskos ku Moises, aseptá ku bo mester di yudansa i delegá responsabilidat na otro hende ora ta apropiá pa hasi esei. (Éks. 18:21, 22) Ora bo ta modesto asina, lo bo no eksigí muchu di bo mes i keda sin forsa pa sigui den e kareda pa bida.

12. Nos ta responsabel pa e mal desishonnan di otro hende?

¹² Sinti responsabel pa mal desishon di otro hende. Nos no por disidí pa otro hende ni protehá nan semper di e konsekuensianan di nan mal desishonnan. Por ehèmpel, ku tempu un yu kisas por disidí di stòp di sirbi Yehova. Esei por hasi e mayornan masha hopi doló mes. Pero, mayornan ku ta sinti ku ta pa nan falta nan yu a tuma un mal desishon ta pone un peso hopi pisá riba nan mes. Esei no ta un peso ku Yehova ke pa nan karga.—Rom. 14:12.

13. Kiko un mayor tin ku kòrda si su yu tuma un mal desishon?

¹³ Kiko lo yuda bo kit’é? Kòrda ku Yehova a duna nos kada un e libertat pa tuma nos mes desishonnan. Esei ta inkluí si nos ke sirbié òf nò. E sa tambe ku  bo no ta perfekto; e ke pa bo djis hasi esfuerso pa ta un bon mayor. Ta bo yu tin ku karga responsabilidat di su desishonnan, i no abo. (Pro. 20:11) Pero kisas bo no por stòp di pensa riba e fayonan ku bo a hasi komo mayor. Si ta asina, papia ku Yehova, bis’é kon bo ta sinti bo i pidié pordoná bo. E sa ku bo no por bai den pasado i kambia kiko a pasa. Di otro banda, e no ke tampoko pa bo spar bo yu di kosechá loke el a sembra, esta, konsekuensia di su desishonnan. Pero kòrda ku Yehova lo risibí bo yu brasa habrí mané e hasi kualke esfuerso pa bolbe serka dje.—Luk. 15:18-20.

14. Dikon sintimentu di demasiado kulpa ta un peso ku nos tin ku kita?

¹⁴ Sintimentu di demasiado kulpa. Ta normal ku nos ta sinti nos kulpabel ora nos peka. Pero sintimentu di demasiado kulpa ta un peso ku Yehova no ke pa nos karga; nos tin ku kit’é. Kon nos por sa si nos sintimentu di kulpa ta di mas? Wèl, si ya nos a konfesá nos piká, nos a arepentí i ta hasi tur loke nos por pa no bolbe hasi e mesun piká, nos por konfia ku Yehova a pordoná nos. (Echo. 3:19) Yehova no ke pa nos sigui sinti nos kulpabel si nos a dal e stapnan ei. Dikon? Pasó e sa ku esei por hasi nos hopi daño. (Sal. 31:10) Si nos laga tristesa kaba ku nos, nos por sinti ku no tin sentido pa sigui den e kareda i nos mes ta sali for di dje.—2 Kor. 2:7.

15. Ki por yuda bo si bo tin sintimentu di demasiado kulpa? (1 Huan 3:19, 20) (Wak e plachi.)

¹⁵ Kiko lo yuda bo kit’é? Si sintimentu di demasiado kulpa ta tormentá bo, focus riba e echo ku Yehova “di bèrdat ta pordoná piká.” (Sal. 130:4) Ora un hende arepentí di kurason, Yehova ta primintié: “Lo mi no kòrda mas riba [bo] pikánan.” (Yer. 31:34) Esei ke men ku  nunka Yehova lo no benta loke bo a hasi, esta, bo pikánan, na bo kara. Ta bèrdat ku tur piká tin su konsekuensia, pero esei no ke men ku Yehova no a pordoná bo. Si bo a pèrdè un privilegio den kongregashon, no keda tormentá bo mes. Anto kòrda ku Yehova a laga bo pikánan den pasado; lo ta bon pa abo tambe hasi meskos.—Lesa 1 Huan 3:19, 20.

16. Kiko nos ku ta kore den e kareda pa bida tin ku komprondé?

¹⁶ Pa nos risibí e premio di bida eterno, nos mester “kore di tal manera ku [nos] por gana e premio.” (1 Kor. 9:24) Nos por logr’é basta nos komprondé loke nos tin ku karga i loke nos tin ku kita. Den e artíkulo akí nos a papia tokante djis un par di nan, pero no ta eseinan so tin. Hesus a bisa ku nos por “bira demasiado kargá ku komementu di mas, bebementu di mas i e inkietutnan di bida.” (Luk. 21:34) Esaki i otro tekstonan por yuda bo mira ki kambionan bo tin ku hasi pa por sigui kore den e kareda pa bida.

17. Dikon nos por tin sigur ku nos lo gana e kareda pa bida?

¹⁷ Nos por tin sigur ku nos lo gana e kareda pa bida pasó Yehova lo duna nos e forsa ku nos mester. (Isa. 40:29-31) P’esei, no baha spit! Hasi meskos ku Apòstel Pablo, kende a kore duru pa risibí su premio. (Flp. 3:13, 14) Ta bèrdat ku niun hende no por kore e kareda pa bo, pero Yehova t’ei pa yuda bo kab’é. Lo e yuda bo karga loke bo tin ku karga i kita kualke peso innesesario. (Sal. 68:19) Ku Yehova su yudansa, lo bo perseverá i gana e kareda!