1. Olsem Hebrew 12:1 storyim, wat nao iumi need for duim for kasem finising laen lo reis for laef?

 BIBLE comparem laef blo iumi olketa Christian witim wanfala reis. Olketa wea ran and kasem end blo reis and krosim finising laen bae kasem reward for laef olowe. (2 Tim. 4:7, 8) Iumi need for duim best for gohed ran, especially bikos iumi klosap tumas for kasem finising laen. Aposol Paul wea winim finis datfala reis for laef, storyim wat bae helpem iumi for win lo datfala resis. Hem sei for “iumi mas no givap for ran long resis wea iumi insaed. Iumi mas aotem evri hevi samting . . . wea savve isi for spoelem wei wea iumi ran gud.”​—Readim Hebrew 12:1.

2. Wat nao hem minim for “aotem evri hevi samting”?

² Taem Paul sei “iumi mas aotem evri hevi samting,” waswe, datwan minim olketa Christian bae no karem eni load nao? Nomoa, bat hem minim iumi need for aotem evri unnecessary load. Olketa load olsem savve mekem iumi for slow daon and for givap. For iumi no givap, iumi mas kwiktaem for luksavve and torowem eni unnecessary load wea savve mekem iumi for slow daon. Bat iumi no laek for torowem olketa load wea iumi shud karem, nogud iumi disqualifyim iumiseleva from datfala reis. (2 Tim. 2:5) Wat nao olketa load wea iumi mas karem?

3. (a) Olsem Galatia 6:5 storyim, wat nao iumi mas karem? (b) Wat nao bae iumi storyim lo disfala article, and why nao olsem?

³ Readim Galatia 6:5. Paul helpem iumi for luksavve lo  samting wea iumi mas karem. Hem sei “samting wea man seleva mas duim, hem no waka bilong narawan bat hem waka bilong hemseleva nao.” Lo disfala scripture, Paul storyim personal responsibility blo iumi front lo God, hem samting wea iumi mas karem seleva. Lo disfala article, iumi bae storyim olketa load wea insaed personal responsibility blo iumi and hao for iumi karem. And tu, bae iumi storyim olketa unnecessary load wea maet iumi karem, and lanem hao for iumi savve torowem. Taem iumi karem olketa load wea insaed lo personal responsibility blo iumi and torowem olketa unnecessary load, datwan bae helpem iumi for win lo reis for laef.

4. Why nao hem no hard for keepim dedication vow blo iumi? (Lukim tu piksa.)

⁴ Dedication vow blo iumi. Taem iumi dedicate lo Jehovah, iumi promis for worshipim hem and for duim will blo hem. Iumi mas keepim datfala vow. Hem wanfala serious responsibility for iumi keepim datfala vow, bat hem no hard for iumi duim datwan. Diswan hem bikos Jehovah creatim iumi for duim will  blo hem. (Rev. 4:11) Hem wakem iumi for laek savve lo hem and worshipim hem, and hem creatim iumi lo image blo hem. Dastawe, iumi fit for fren gud witim hem and hapi for duim will blo hem. (Ps. 40:8) And tu, taem iumi duim will blo God and followim example blo Son blo hem, datwan bae “strongim” iumi.​—Matt. 11:28-30.

5. Wat nao bae helpem iu for keepim dedication vow blo iu? (1 John 5:3)

⁵ Hao nao iu savve karem datfala load? Tufala samting savve helpem iu. First wan, gohed strongim love blo iu for Jehovah. Iu savve duim datwan taem iu ting raonem evri gud samting wea hem duim for iu finis, and olketa blessing wea bae iu kasem lo future wea hem promisim. Taem iu garem strongfala love for God, datwan bae mekem hem isi for iu obeyim hem. (Readim 1 John 5:3.) Second, followim example blo Jesus. Hem win for duim will blo God bikos hem prea lo Jehovah for help and hem gohed focus lo reward wea bae hem kasem. (Heb. 5:7; 12:2) Olsem Jesus, prea lo Jehovah for strongim iu and gohed tingim hope for laef olowe. Taem iu garem strongfala love for God and followim example blo Son blo hem, iu bae fit for keepim dedication vow blo iu.

6. Why nao iumi mas duim olketa famili responsibility? (Lukim tu piksa.)

⁶ Olketa famili responsibility. Lo reis for laef, love blo iumi for Jehovah and Jesus mas winim love blo iumi for olketa relative. (Matt. 10:37) Bat datwan no minim iumi mas ignorem famili responsibility blo iumi from iumi tingse datwan bae mekem God and Christ no hapi lo iumi. Bat for God and Christ hapi lo iumi, iumi need for duim famili responsibility blo iumi. (1 Tim. 5:4, 8) Taem iumi duim datwan, iumi bae hapi. Jehovah designim olketa famili for hapi taem hasband and waef lovem and respectim each other, taem parents lovem and trainim olketa pikinini, and taem olketa pikinini obeyim parents.​—Eph. 5:33; 6:1, 4.

7. Wat nao savve helpem iu for duim famili responsibility blo iu?

⁷ Hao nao iu savve karem datfala load? Nomata wat nao responsibility blo iu insaed famili, trustim wise advaes lo Bible and no followim nomoa feeling, culture, or advaes from olketa expert. (Prov. 24:3, 4) Duim research lo olketa Bible pablikeson blo iumi. Olketa pablikeson hia garem olketa practical idea lo hao for followim olketa Bible principle. For example, datfala article series “Help for Olketa Famili” garem olketa information abaotem olketa challenge wea olketa couple, parents, and olketa teenager feisim distaem. b Disaed strong for followim wat Bible talem, nomata olketa narawan lo famili no followim. Taem iumi duim olsem, datwan bae helpem famili blo iu and Jehovah bae blessim iu.​—1 Pet. 3:1, 2.

8. Hao nao olketa disison wea iumi mekem savve affectim iumi?

⁸ Acceptim responsibility for eni nogud disison wea iumi mekem. Jehovah givim iumi freedom for chus, and hem laekem iumi for kasem gud samting from olketa gud disison wea iumi mekem. Bat hem bae no protectim iumi tu from olketa nogud samting wea kamaot from bad disison wea iumi mekem. (Gal. 6:7, 8) Dastawe iumi mas acceptim eni  responsibility for eni rong disison wea iumi mekem, toktok wea iumi talem wea spoelem narawan, and wat iumi duim bikos iumi no tingting gud firstaem. From datwan, maet iumi garem guilty konsens. Bat from iumi luksavve iumi mas acceptim eni responsibility for eni disison wea iumi mekem, datwan savve helpem iumi for confessim sin blo iumi, stretem datwan, and no duim moa datfala mistek. Taem iumi duim olsem, iumi savve gohed ran lo reis for laef.

9. Wat nao iu savve duim if iu mekem wanfala bad disison? (Lukim tu piksa.)

⁹ Hao nao iu savve karem datfala load? If iu kasem nogud samting from wanfala bad disison, acceptim datfala situation. Hem gud for luksavve iu no savve changem wat hem happen finis. No weistim taem and energy blo iu for trae pruvim why nao iu stret, or blamem iuseleva or for blamem olketa narawan for mistek blo iu. Bat luksavve lo mistek blo iu and duim best for deal witim situation wea iu insaed. If iu feel guilty abaotem wanfala sin wea iu duim, hambol and prea lo Jehovah, talem mistek blo iu, and askem hem for forgivim iu. (Ps. 25:11; 51:3, 4) Apologize lo olketa wea iu mekem olketa feel nogud, and if hem samting wea olketa elder need for savve, askem help from olketa. (Jas. 5:14, 15) Lane from olketa mistek blo iu, and trae for no duim moa. Taem iu duim olsem, iu savve sure Jehovah bae showimaot mercy lo iu and provaedem help wea iu needim.​—Ps. 103:8-13.

10. For laek duim samting wea iumi no fit for duim, why nao datwan savve spoelem iumi? (Galatia 6:4)

¹⁰ For laek duim moa samting winim wat iumi fit for duim. Taem iumi laek for duim samting wea iumi no fit for duim and iumi comparem iumiseleva witim olketa narawan, datwan savve spoelem iumiseleva. (Readim Galatia 6:4.) If iumi gohed comparem iumi witim olketa narawan, datwan bae mekem iumi jealous and laek for compete. (Gal. 5:26) If iumi trae for duim wat olketa narawan duim nomata iumi no fit for duim, bae iumi spoelem iumiseleva. And if “samting wea man expectim hem delay savve mekem heart sik,” bae iumi spoelem iumi go moa if iumi laek for duim samting wea iumi no fit for duim! (Prov. 13:12) Taem iumi duim olsem, datwan savve mekem iumi wik and slow daon lo reis blo iumi for laef.​—Prov. 24:10.

11. Wat nao savve helpem iu for no duim wat iu no fit for duim?

¹¹ Hao nao iu savve torowem datfala load? Iu no laek for duim samting wea winim wanem Jehovah expectim iu for duim bikos hem no expectim iu for givim samting wea iu no garem. (2 Cor. 8:12) Hem gud for tingim Jehovah no comparem wanem iu duim witim wat olketa narawan duim. (Matt. 25:20-23) Hem tinghae lo wat iu duim witim full heart, faithful fasin blo iu, and wei wea iu no givap. Hem gud for hambol and luksavve iu no fit for duim samting wea iu fit for duim bifor bikos lo age, health, and situation blo iu distaem. Olsem Barzillai, mas willing for sei no if health or age blo iu hem mekem hem no isi for iu duim datwan. (2 Sam. 19:35, 36) Olsem Moses, acceptim help and sharem responsibility lo olketa narawan taem need kamap. (Ex. 18:21, 22) Taem iu hambol, iu bae no duim olketa samting winim wanem iu fit for duim bikos datwan bae mekem iu taed lo reis blo iu for laef.

12. Waswe, iumi feel responsible for bad disison wea olketa narawan mekem? Explainim.

¹² Feel responsible for bad disison wea narawan mekem. Iumi no savve mekem disison  for olketa narawan, and iumi no savve evritaem protectim olketa from nogud samting wea kasem olketa from bad disison wea olketa mekem. For example, wanfala son or dota maet gogo disaed for stop for worshipim Jehovah. Taem pikinini disaed olsem, datwan savve mekem parents sorre tumas. Bat, olketa parents wea blamem olketa seleva for bad disison blo pikinini karem load wea hevi tumas. Jehovah no expectim olketa parents for karem datfala hevi load.​—Rome 14:12.

13. Hao nao parents savve deal witim bad disison blo pikinini?

¹³ Hao nao iu savve torowem datfala load? Tingim hao Jehovah givim iumi evriwan freedom for chus. Bat hem allowim each wan for disaed seleva. Insaed diswan hem disison for worshipim Jehovah. Hem savve iu wanfala parents wea no perfect, and hem laekem nomoa for iu duim best blo iu. Eni disison wea pikinini mekem, hemseleva nao responsible for datwan, ino iu. (Prov. 20:11) Nomata olsem, from iu parents maet iu gohed wari abaotem samfala mistek wea iu duim. If olsem, storyim feeling blo iu lo Jehovah and ask for forgiveness. Hem savve iu hard for changem wat hem happen finis, and hem no expectim iu for protectim pikinini for harvestim wat hem plantim. Tingim if pikinini blo iu duim samting for kam bak lo Jehovah, Jehovah bae hapi tumas for welkamim hem bak.​—Luke 15:18-20.

14. Why nao wei for gohed feel guilty hem load wea iumi shud torowem?

¹⁴ Gohed feel guilty. Taem iumi duim sin, hem stret for iumi feel guilty. Bat Jehovah no laekem iumi for gohed feel olsem bikos hem wanfala lo olketa load wea iumi mas torowem. Hao nao bae iumi savve if iumi ova tumas for feel guilty? If iumi confessim sin blo iumi, repent, and waka hard for no duim moa datfala sin, iumi savve sure Jehovah hem forgivim iumi. (Acts 3:19) Bihaen iumi duim olketa samting hia, Jehovah no laekem iumi for gohed feel guilty. Hem savve datwan bae spoelem iumi. (Ps. 31:10) If iumi sorre tumas,  maet iumi bae givap lo reis blo iumi for laef.​—2 Cor. 2:7.

15. Wat nao savve helpem iu for deal witim wei for gohed feel guilty? (1 John 3:19, 20) (Lukim tu piksa.)

¹⁵ Hao nao iu savve torowem datfala load? Taem iu gohed feel guilty tumas, tingim hao God hem garem “trufala wei for forgive.” (Ps. 130:4) Taem hem forgivim olketa wea barava repent, hem promis olsem: “Mi bae no tingim moa sin blo olketa.” (Jer. 31:34) Datwan minim Jehovah bae forgetim eni sin blo iu wea hem forgivim finis. So no tingse olketa hard taem wea iu kasem from sin blo iu distaem hem pruvim Jehovah no forgivim iu. And no feel nogud lo iuseleva bikos iu lusim samfala responsibility blo iu lo kongregeson. Jehovah no gohed tingim olketa sin blo iu, and iu tu shud olsem.​—Readim 1 John 3:19, 20.

16. From iumi insaed reis for laef, wat nao iumi mas luksavve lo hem?

¹⁶ Taem iumi ran lo reis for laef, iumi mas “ran for win and tekem datfala prize.” (1 Cor. 9:24) Iumi savve duim datwan if iumi luksavve lo difference between olketa load wea iumi mas karem and olketa load wea iumi mas torowem. Lo disfala article, iumi discussim tu-thri example lo olketa load wea iumi mas karem and load wea iumi mas torowem. Bat olketa nara samting tu stap. Jesus sei: “Wei for kaikai tumas and drink tumas witim wei for wari abaotem olketa samting wea [iumi] needim” savve mekem iumi for “no garem stretfala tingting.” (Luke 21:34) Tufala scripture hia and olketa nara scripture savve helpem iu for luksavve lo samfala adjustment wea iu maet need for mekem taem iu ran lo reis for laef.

17. Why nao iumi sure dat bae iumi win lo reis for laef?

¹⁷ Iumi sure iumi bae winim reis for laef bikos Jehovah bae givim strong wea iumi needim. (Isa. 40:29-31) So iumi mas no slow daon. Followim example blo aposol Paul wea waka hard for kasem prize wea God putim for hem. (Phil. 3:13, 14) No eniwan savve ran lo disfala reis for iu. Bat witim help blo Jehovah iu savve win. Jehovah bae helpem iu for karem olketa load blo iu, and torowem olketa unnecessary load. (Ps. 68:19) From Jehovah stap witim iu, bae iu no givap lo reis blo iu and winim datwan!