1. Wanunanchicama Diosta sirviycänapaj, ¿imatataj rurashwan Hebreos 12:1 nishganno?

 YALINACOJCUNAGA chayananpaj cajman chayayta munapäcun, chaynolami Diospa sirvejnincunapis imaycamapis cawayta tarinapaj carreracho caycanchi (2 Tim. 4:7, 8). Ichanga cay ushanan tiempucho chay carreracho corriycänapaj masrämi calpachacunanchi. Apóstol Pablupis wanunancama Diosta sirvergan, chaynola noganchipis ruraycänapaj cayta nimarganchi: “Cörriq runa qepinta kachaykuqno […] noqantsipis Tayta Dios munashqanno wanunantsiyaq kawashun” (leiriy Hebreos 12:1).

2. ¿Pabluga ima niytataj munaycargan “corriq runa qepinta kachaykuqno kawashun” niptin?

² “Corriq runa qepinta kachaykuqno kawashun” Pablo nishganwanga, manami niycarganchu jinayla corriycänapaj, chaypa trucanga niycargan lasaj guepino caycajcunata jaguirinapämi. Chaycunaga uticächimashwan y gänasninchitapis ushacächinmanmi Diosta manana sirvinapaj. Chay mana pasamänanchipäga jucla lasaj guepino cajcunata cachaycushun. Ichanga premiuta chasquiyta munarga, waquin ruranapaj cajcuna lasaj guepino captinpis manami cachaycushwanchu (2 Tim. 2:5). ¿Ima ruraycunapitataj parlaycanchi? Ricärishun.

3. 1) Gálatas 6:5 nishganno, ¿imatataj cada cristiano ruranman? 2) ¿Imapitataj canan yachacushun, y imanir?

³ (Leiriy Gálatas 6:5). Pablo cristiano masincunata caytami nergan: “Lapantsimi kawashqantsiman tupu Tayta Diosta cuentata qoshunpaq”. Chaywanga niycargan Diosta sirvinapaj  ruraycunaga cada ununchi rurananchi. Chaymi canan ricärishun imataj caycan chay ruraycuna cada uno ruranapaj, y imata yanapämäshun mana yamacaypa cumplinapaj. Jinamanpis yachacushun imacunataj caycan alapa lasaj guepicunano y imanotaj chaycunata jaguirishwan mana ushacaj cawayta chasquinapaj.

4. Jehovalata sirvinapaj aunishganchega, ¿imanirtaj lasaj guepino caycanchu? (Fotucunatapis ricay).

⁴ Jehovalata sirvinapaj aunishganchi. Juc mañacuycho Jehovata aunishcanchi paylata mana guelanaypa sirvinapaj. Öraga chayta cumplinapaj sasano captinpis manami lasaj guepinochu caycan. ¿Imanir? Jehová camamashganchi voluntäninta ruranapaj (Apoc. 4:11). Jinamanpis shongunchicho churashga paylata reguinapaj y sirvinapaj, payno cuyacoj canapäpis. Chaymi Jehová munashganta ruranapaj listo caycanchi (Sal. 40:8). Jehovapa voluntäninta ruraptinchi y churin Jesús rurashganta ruraptinchega alapa cushishgami cawacushun (Mat. 11:28-30).

5. ¿Imatataj ruranayqui Jehovata aunicushgayquita cumplinayquipaj? (1 Juan 5:3).

 ⁵ Cayta ruranquiman: Naupata, Jehovata más cuyay. Chaypäga lapan rurashgancunaman y shamoj tiempucho bendicimänanchipaj cajman yarpachacuy, chaynopa Diosta masraj cuyar cäsucuytapis munanqui. Jehovapa mandätuncunata cäsucunapäga manami sasachu caycan (leiriy 1 Juan 5:3). Nircur, Jesús rurashganta ruray. Payga Taytanpa voluntäninta rurananpäga cutin cutinmi mañacoj yanapänanpaj y premiuta chasquinanpaj cajmanpis yarparaycargan (Heb. 5:7; 12:2). Jesusnopis Jehová calpata goycushunayquipaj mañacuy y ali cawanayquipaj cajmanpis yarparay. Chauraga Jehovata cuyaptiqui y Jesusta gatiraptiqui aunishgayquita cumplinquimi.

6. ¿Imanirtaj familianchicho ruranapaj cajta cumplishwan? (Fotucunatapis ricay).

⁶ Familianchiraycur imaycata ruranapaj captin. Premiuta chasquinapaj corrishganchichoga, Jehovatawan Jesustami imapitapis masraj cuyananchi (Mat. 10:37). Ichanga familianchita yanapänapaj captenga yanapaycushun, y manami lasaj guepitanoga ricashwanchu. Chaypa trucanga Jehovatawan Jesusta cushichiyta munarga familianchicunata yanapashwan (1 Tim. 5:4, 8). Chayta rurar cushi cushila cawacushun. Quiquin Jehovami familiacunata camashga majachacashgacuna cuyacuywan y respetuwan tratanacunanpaj, tayta mamacuna cuyacuywan wamrancunata yachachinanpaj y wamracunapis taytancunata cäsucunanpaj (Efes. 5:33; 6:1, 4).

7. ¿Imaraj yanapäshunqui familiayquiraycur imaycata ruranapaj captin cumplinayquipaj?

⁷ Cayta ruranquiman: Taytacuna, majayoj o wamracuna carpis calpachacärinayqui Bibliacho caycaj consejucunata cäsucärinayquipaj. Ama yarpachacäriychu quiquiqui yarpashgayquino cawacuyga más ali cashganta, ni cay munducho yachaj runacunatapis cäsupaychu (Prov. 24:3, 4). Publicaciunninchicunachoga Bibliapita imayca shumaj yachachicuycuna caycan Dios munashganno cawacunapaj. Caycanmi “Ayuda para las familias” nishgan, chaycho caycan consejucuna majachacushgacunapaj, taytacunapaj y mozucunapäpis. b Familiayquicho waquincuna Biblia nishganta cäsucuyta mana munaptinpis gam ichanga calpachacuy chayta ruranayquipaj. Chayno rurarga familiayquita yanapanquimi y Jehovapis bendicishunquipämi (1 Ped. 3:1, 2).

8. ¿Imanoraj ricacushwan mana alicunata acraptinchi?

⁸ Decidishganchiraycur mana alicunaman chayaptinchi. Diosnilanchi Jehovaga munan quiquinchi imatapis acrarcur ruranapaj y cushicunmi ali cajta acraptinchega. Ichanga manami libramanchichu mana alicunata acrarcur nacayman chayaptinchega (Gál. 6:7, 8). Chaymi imatapis mana ali acrashga carga o aliraj mana yarparcur jucla imatapis nishga carga, ima pasamashganchicunata chasquicunchimi. Öraga nishunrächi ‘¿imanirtaj chayta rurashcä o nishcä?’, conciencianchipis acusamashwanchi. Imalachopis pantashganchiraycur chayno ricacurga, yanapämäshun mana ali rurashganchita wilacunapaj, cawayninchicho cambiucunata ruranapaj y unay rurashganchicunata manana ruranapaj yapay chaycunaman mana ishquinapaj.  Chayno rurarga imaycamapis cawayta chasquinapaj jinala corriycäshun.

9. ¿Imaraj yanapäshunqui mana alita acrashga carga? (Fotucunatapis ricay).

⁹ Cayta ruranquiman. ‘¿Imanirtaj cayta rurashcä?’ nirga laquicuycarla ama cacuychu. Pantashgayquicunalaman ama yarparäcuychu ni piñacuypischu, jina waquincunatapis ama culpanquimanchu rurashgayquipita. Chaypa trucanga reconöcinquiman pantashgayquipita y puedishgayquimanno calpachacuy alicunata ruranayquipaj. Culpayoj ricacuptiquega, ñanpu shongulayquiwan Jehovata mañacur ‘juchäpita perdunaycalämay’ nirmi payta mañacunquiman (Sal. 25:11; 51:3, 4). Y pitapis ofendishga carga disculpacunquimanmi, munarga ancianucunapa yanapacuynintapis ashinquimanmi (Sant. 5:14, 15). Pantashgayquicunapitaga yachacunquiman yapay chaycunata manana ruranayquipaj. Chayta ruraptiquega Jehová yanaparcushunqui y ricaynincho ali caycanquipaj (Sal. 103:8-13).

10. ¿Imanirtaj yarpashganchicuna mana camacaptin lasaj guepino canman? (Gálatas 6:4).

¹⁰ Ima yarpashganchicuna mana camacaptin. Rurashganchicuna waquincunawan tincuchiptinchega, lasaj guepino canman (leiriy Gálatas 6:4). Chayno rurarga pitapis chiquipar y ‘waquincunapita más ali cäman’ nir imatapis rurayta galaycushwanchi (Gál. 5:26). Y laquicuypämi canman öraga waquincunano imatapis rurayta munaptinchi, masraj mana puedirga. Bibliapis nin: “Yarpashqanno mana kamakaptinqa pipis pasaypami lakikun” (Prov. 13:12). Y más sasarämi caycan pipis shuyarashgancunata mana chasquicuptin. Chayno captenga calpaynaj ricacur imaycamapis cawayta tarinapaj carreracho ganas ganaswanga corrishunnachu (Prov. 24:10).

11. ¿Imaraj yanapäshunqui yarpashgayquino imapis mana camacaptin?

¹¹ Cayta ruranquiman: Jehovaga manami imaypis mañashunquichu mana puedinayquipaj cajcunata ruranayquipaj (2 Cor. 8:12). Payga rurashgayquicunata manami tincuchinchu jucpatawan (Mat. 25:20-23). Chaypa trucan ali nawilanwan ricashunquimi lapan shonguyquiwan payta sirviptiqui y imacunapa pasarpis jinala valurcharcur mana cachaycuptiqui. Jina humilde cashpayqui yarparay edäniquiraycur, saludniquiraycur lapan munashgayquita rurayta mana puedinayquipaj. Saludniquiraycur ima cargutapis cumplinayquipaj sasa captenga, Barzilaino valurcharcunquiman ‘mana’ ninayquipaj (2 Sam. 19:35, 36). Moisespis humilde cashpan juccunapa yanapacuyninta ashergan, y waquincunata acrargan yanapänanpaj (Éx. 18:21, 22). Humilde captiquega calpachacunquimi puedishgayquicunalata ruranayquipaj, y manami yarparanquichu mana puedinayquipaj cajcunamanga.

12. ¿Culpayojchuraj ricacushwan waquincuna mana alicunata acraptin?

¹² Waquincuna mana alicunata acrashganraycur culpayoj ricacuptinchi. Cada ununchi ima rurashganchipita canga ali caycänapaj o ima nacaymanpis chayanapaj. Öraga juc wamra Jehovata cachaycuptenga, taytancunapäga shonguncunapis alapa nanaycunrämi. Y chayraycur taytacuna culpayoj ricacuptenga laquesanga alapa lasaj guepino canman. Ichanga Jehovaga manami munanchu pipis chayno ricacunanta (Rom. 14:12).

13. ¿Imatataj ruranquiman wamrayqui Jehovata sirviyta jaguiriptin?

 ¹³ Cayta ruranquiman: Yarparay imano Jehová camamashganchita, payga munan jucninchi jucninchi acranapaj payta sirvinapaj o manapis. Jina musyanmi juchasapa cashganchita, y cushicunmi calpachacuptiqui ali tayta canayquipaj. Chaura wamrayqui Jehovata sirviyta jaguiriptenga quiquinpitami canga, manami gampa culpayquichu (Prov. 20:11). Chayno captinpis, öraga ‘¿imachotaj fallashcä?’ nir yarpachacur laquicunquiman. Chayno captenga Jehovata shonguyquita mashtapar mañacuy y perdunashunayquipaj niriy, payga musyanmi imata rurarpis chayta manana cambianapaj. Jehovaga manami munanchu wamrayqui rurashganraycur laquicuycarla caycänayquipaj. Ichanga ama gongaychu wamrayqui calpachacuptin Jehovaman cutinanpäga pay listo caycanga chasquinanpaj (Luc. 15:18-20).

14. ¿Imanirtaj perdunashgana caycarga mana niycashwanchu ‘nogami culpayoj cä’ nir?

¹⁴ Ima rurashganchicunapitapis culpayoj ricacuptinchi. Ima juchalatapis rurarga, mana alimi ricacunchi. Pero chaylapita perdunashgana caycarpis cutin cutin ‘culpämi cash’ niycarga, lasaj guepita apaycashganchinomi canga, y chayno ricacunanchitaga Jehová munanchu. Aumi, juchalicushganchipita arrepenticurga y chayta manana ruranapaj calpachacurga, mana laquicushwanchu, Jehovaga perdunamashganchina (Hech. 3:19). Jehovapa naupancho ali conciencialanchiwan caycarga mananami yarpaycashwannachu unay rurashganchicunaman, pajta sinoga mana alichopis ushashwanchi (Sal. 31:10). Waran waran laquishgala caycarga, guepaman cutir rasunpa caj caminupitapis witicurishwanchi (2 Cor. 2:7).

15. ¿Imata rurartaj imacunapitapis culpayoj ricacunquinachu? (1 Juan 3:19, 20, fotucunatapis ricay).

¹⁵ Cayta ruranquiman. Unay pantashgayquilaman  yarpachacunayquipaj trucanga, Jehová perdunacoj cashganman yarpachacunquiman (Sal. 130:4). Rasunpa arrepenticojcunapaj parlarmi Jehová cayno nin: “Ima jutsata rurashqantapis manami yarparäshaqnatsu” (Jer. 31:34). Alimi tantiaycanchi Jehovaga pitapis perdunaptenga yarpaylapis yarpannachu pantashgancunaman. Öraga pipis juchalicushganraycur nacarpis nacangachi tiempuwanga, pero ama gonganmanchu Jehovaga juchanta perdunashgana. Juchalicushgayquiraycur congregaciuncho ima cargulatapis ograshga captiquega, Jehovaga gongashgana juchalicushgayquita. Mana laquicushpayqui gampis chayta ruray (leiriy 1 Juan 3:19, 20).

16. Ushanancama corrinapäga, ¿imatataj gongashwanchu?

¹⁶ Bibliaga ninmi “ali cörriq kaqla premiuta chaskishqanta” (1 Cor. 9:24). Correj runacunaga manami imatapis aprir adrede apanchu. Chaura gongashwanchu paynolami Diosta sirvir ushanancama chayanapäga importante cajcunalata ruranchi. Canan yachacushcanchi Diosta sirvir imacunata ruranapaj, pero imapita cuidacunapaj parlar Jesuspis nirganmi micuycarla, upyaycarla y imacunapitapis yarpachacuycarla mana caycänapaj (Luc. 21:34). Cay textucunapis waquin textucunapis tantiachimäshunmi imata ruranapaj mana ushacaj cawayta tariyta munarga.

17. ¿Imanirtaj seguro caycanchi ushanancama corrinapaj cajpita?

¹⁷ Ama gongashwanchu ushanancama corrinapäga Jehovami calpalanta gomäshun (Is. 40:29-31). Guepaman cutinayquipäga yarpaylapis yarpaychu. Apóstol Pabluno calpachacuy premiuta chasquinayquipaj (Filip. 3:13, 14). Maquiquichomi caycan ushanancama corrinayquipäga, Jehovaga espiritunwanmi yanapäshunqui. Imalapis lasaj guepino caycaptenga Diosninchega calpanta goshunquimi (Sal. 68:19). Pay yanapäshuptiquirämi ushanancama mana uticaypa corrinqui.