1. Спрема Евреија 12:1, со ваљани те кера те шај те завршина и трка е животоскири?

 И БИБЛИЈА спорединела амаро христијанско живото јекхе тркаја. Окола со успешно прастана ки акаја трка ка добинен вечно живото (2. Тим. 4:7, 8). Ваљани те да амендар са те шај понадари да те праста, посебно адалеске со џанаја кај о крајо акале тркакоро тано паше сар никогаш англедер. О апостол Павле кова со успешно завршинѓа акаја трка, вакерѓа аменге со шај те поможинел аменге те шај те победина. Ов поттикнинѓа амен „те фрда амендар секова товар... хем те праста истрајно ки трка која сој англи аменде“. (Читин Евреија 12:1.)

2. Со значинела „те фрда секова товар“ амендар?

² Кеда о Павле пишинѓа кај мора „те фрда секова товар“, дали ов адалеа мислинѓа кај јекх христијани на ваљани те пхиравел нисаво товар? На. Наместо адава, ов мангља те вакерел аменге кај ваљани те цида секова непотребно товар. Асавко товар шај те уморинел амен хем те керел аменге пхаро те праста. Те шај те истрајна, мора сигате те открина асавко непотребно товар хем те фрда ле амендар. Ама тари јавер страна, на мангаја те ослободина амен таро товар со мора те пхирава ле, соске аѓаар нане те икера амен ко правилија хем ка нашти те ачхова ки трка (2. Тим. 2:5). Саво товар мора те пхирава аменцар?

3. а) Спрема Галатјања 6:5, со мора те пхирава аменцар? б) Со ка дикха ки акаја статија, хем соске?

³ Читин Галатјања 6:5. О Павле вакерѓа аменге со мора те пхирава аменцар. Ов пишинѓа: „Секој ка пхиравел пло товар“. О Павле акате керела лафи баши лично одговорност со иси амен англо Девел, кова со секова јекх мора лично те пхиравел  пеа. Ки акаја статија ка дикха сој тано вклучимо ко адава товар хем сар шај те пхирава ле. Исто аѓаар, ка дикха дали пхираваја несаво непотребно товар хем ка сикљова сар шај те цида ле амендар. Адава со ка пхирава амаро товар а ка цида о товар сој непотребно ка поможинел аменге успешно те праста ки трка е животоскири.

4. Соске о завет со денѓем е Јеховаске нане товар со нашти те пхирава ле? (Дикх хем и слика.)

⁴ Амаро завет со денѓем ле е Јеховаске. Кеда денѓем завет е Јеховаске, денѓем леске лафи кај ка служина леске хем кај ка кера лескири волја. Амен мора те живина спрема акава завет. Адаја тани бари одговорност, ама адава товар нане добором пхаро со нашти те пхирава ле. Соске шај те вакера адава? Адалеске со о Јехова створинѓа амен те кера лескири волја (Отк. 4:11). О Јехова створинѓа амен духовна потребенцар хем спрема пло лико. Адалеске шај те ова паше леа, хем те ова радосна џикоте кераја лескири волја (Пс. 40:8). Исто аѓаар, кеда кераја е Девлескири волја хем оваја са повише сар лескоро  Чхаво, тегани ка овел амен неви сила (Мат. 11:28-30).

5. Со шај те поможинел туке те икере тут ко тло завет? (1. Јованескоро 5:3).

⁵ Сар шај те пхираве акава товар? Дуј буќа шај те поможинен туке ко адава. Прво, понадари да бајрар тло мангипе спрема о Јехова. Шај те кере адава аѓаар со ка размислине башо са о шукар буќа со керѓа лен туке хем башо благословија со ка добине лен ки иднина. Кобор повише ка бајрол тло мангипе спрема о Девел, добором полокхо ка овел туке те шуне ле. (Читин 1. Јованескоро 5:3.) Дујто, џа пало е Исусескоро пример. Ов успешно керѓа е Девлескири волја адалеске со молинѓа е Јехова баши помош хем мислинѓа ки пли награда (Евр. 5:7; 12:2). Исто сар о Исус, молин е Јехова баши сила хем понадари да нека овел тут ки годи и надеж башо вечно живото. Ако бајрола тло мангипе спрема о Девел хем ако овеа са повише сар лескоро Чхаво, тегани ка шај те икере тут ко тло завет.

6. Соске мора те грижина амен башо амаре фамилијарна обврске? (Дикх хем и слика.)

⁶ Амаре фамилијарна обврске. Ки трка башо живото, амаро мангипе башо Јехова хем о Исус ваљани те овел побаро таро мангипе со иси амен амаре фамилијаке (Мат. 10:37). Ама адава на значинела кај на ваљани те исполнина амаре фамилијарна обврске мислиндор кај ола ка чхинавен амен те угодина е Девлеске хем е Исусеске. Напротив, те шај те угодина е Девлеске хем е Исусеске мора те грижина амен башо амаре фамилијарна одговорностија (1. Тим. 5:4, 8). Ако кераја адава, ка ова порадосна. Уствари, о Јехова — окова со керѓа и фамилија — џанела кај о фамилие ка овен радосна ако о ром хем и ромни мангена пе хем поштујнена пе јекх јекхеа, ако о родителија мангена хем воспитинена пумаре чхавен хем ако о чхаве тане послушна пумаре родителенге (Еф. 5:33; 6:1, 4).

7. Сар шај те исполнине тли улога ки фамилија?

⁷ Сар шај те пхираве акава товар? Бизи разлика сави улога иси тут ки фамилија, нека овел тут доверба ки мудрост со аракхљовела ки Библија наместо те постапине спрема тле чувствија, спрема адава сој вообичаено ки тли култура или спрема адава со вакерена несаве мануша коленде со о јавера дикхена сар експертија ки адаја тема (Изр. 24:3, 4). Користин шукар амаре библиска публикацие. Ки ленде иси практична предлогија баши адава сар шај те применине о библиска начелија. На пример, ки амари интернет-страница иси конкретна предлогија башо брачна парија, родителија хем тинејџерија. b Ов одлучно те применине адава со пишинела ки Библија чак ако о јавера тари фамилија на керена адава Ако кереа адава ка поможине тле фамилијаке хем о Јехова ка благословинел тут (1. Пет. 3:1, 2).

8. Сар шај амаре одлуке те влијајнен упри аменде?

⁸ И одговорност со иси амен башо одлуке со анаја лен. О Јехова денѓа амен слободно волја хем ов мангела те уживина ко благословија со добинаја лен кеда анаја шукар одлуке. Ама ако анаја несави лошно одлука тегани ов на аракхела амен таро последице (Гал. 6:7, 8). Адалеске прифатинаја о последице таро погрешна одлуке, лафија хем постапке. Хем зависинела таро адава со керѓем,  шај те мучинел амен амари совест. Ама, адава со џанаја кај иси амен одговорност башо амаре одлуке шај те поттикнинел амен те признајна амаре грешке, те променина амен хем те на повторина лен. Са акала буќа шај те поможинен аменге те ачхова ки трка е животоскири.

9. Со шај те кере ако анѓан несави погрешно одлука? (Дикх хем и слика.)

⁹ Сар шај те пхираве акава товар? Ако више анѓан несави погрешно одлука, прифатин и реалност. Ма бистре кај нашти те менине адава со уло. Ма користин тло време хем тли сила те шај те сикаве кај сиан ко право или палем те кривине тут или некас јавере баши тли грешка. Наместо адава, признајн тли грешка хем кер адава со шај те кере спрема тле моментална околностија. Ако осетинеа тут криво башо нешто со керѓан погрешно, понизно роде е Јехова ки молитва, признајн леске тли грешка хем роде лестар те простинел туке (Пс. 25:11; 51:3, 4). Исто аѓаар, извинин тут околенге каске со грешинѓан хем ако тано потребно роде помош таро старешине (Јак. 5:14, 15). Сикљов таро тле грешке хем трудин тут те на повторине лен. Ако кереа адава, шај те ове сигурно кај о Јехова ка сикавел туке милост хем ка поддржинел тут (Пс. 103:8-13).

10. Соске о очекувања со нане реална тане пхаро товар? (Галатјања 6:4).

¹⁰ Очекувања со нане реална. Шај те чхива панда побаро товар упри аменде ако спорединаја амен јаверенцар. (Читин Галатјања 6:4.) Ако цело време спорединаја амен е јаверенцар, тегани шај те почмина те завидина ленге хем те натпреварина амен ленцар (Гал. 5:26). Ка кера штета коркори аменге ако пробинаја те кера адава со о јавера керена иако нашти те постигнина адава. Тари Библија дознајнаја кај „таро бут аџикерибе насваљовела о вило“, тегани кобор поопасно тано ако иси амен очекувања кола со никогаш нашти те исполнина лен! (Изр. 13:12). Асавко нешто шај те лел амари сила хем те керел попхаро те праста ки трка е животоскири (Изр. 24:10).

11. Со ка поможинел тут те на овен тут очекувања со нане реална?

¹¹ Сар шај те фрде тутар акава пхарипе? Ма очекујн тутар повише таро адава со о Јехова очекујнела тутар. Ов никогаш нане те очекујнел тутар те де ле адава со нане тут (2. Кор. 8:12). Ов уверимо кај о Јехова на спорединела адава ту со кереа адалеа со о јавера керена (Мат. 25:20-23). Ов ценинела тли служба со кереа ла цело вилеа, тли верност хем тли истрајност. Ов скромно аѓаар со ка прифатине кај башо тле берша, тло састипе хем тле околностија шај нашти секогаш те кере адава со мангеа те кере. Ов спремно исто сар о Варзелај те одбине несаве задаче со нашти те кере лен адалеске со сиан ко берша или иси тут проблемија е састипаја (2. Сам. 19:35, 36). Исто сар о Мојсеј, прифатин помош хем доверин одговорностија е јаверенге кеда шај те кере адава (2. Мој. 18:21, 22). Асавки скромност ка поможинел туке те на очекујне тутар буќа со нашти те кере лен соске адава шај те цидел тут тари трка е животоскири.

12. Дали амен сием одговорна башо лошна одлуке со анена лен о јавера? Објаснин.

¹² Ако осетинаја амен одговорна башо лошна одлуке е јаверенгере. Амен нашти те ана одлуке е јаверенге ко тхан, а ни нашти секогаш те заштитина лен таро последице кеда анена несави погрешно одлука. На пример, ки јекх фамилија шај о чхаво или и чхај те одлучинел те на служинел више е Јеховаске. Асавки одлука шај те анел бари дукх  е родителенге. Ама, о родителија кола со кривинена коркори пес башо лошна одлуке пумаре чхавенгере чхивена песке ко пике јекх баро товар. О Јехова на очекујнела те пхиравен адава товар (Рим. 14:12).

13. Со шај те керен о родителија кеда ленгере чхаве анена несави лошно одлука?

¹³ Сар шај те фрде тутар адава пхарипе? Ма бистре кај о Јехова сариненге аменге денѓа слободно волја. Ов дозволинела секова јекх те анел пли лично одлука. Ко адава тани вклучими хем и одлука дали ка служина леске. О Јехова џанела кај на сиан совршено родители, ов едноставно мангела тутар те де тло најшукар. О одлуке со анена тле чхаве тани ленгири одговорност, а на тли (Изр. 20:11). Сепак, шај панда мучинена тут о грешке со керѓан лен сар родители. Ако тано аѓаар, вакер е Јеховаске сар осетинеа тут хем роде лестар те простинел туке. Ов џанела кај нашти те иране о време хем те менине адава со случинѓа пе. А ко исто време, ов на очекујнела тутар цело време те заштитине тле чхаве таро последице. Нека овел тут ки годи кај ако тло чхаво дела пестар са те шај те иранел пе ко Јехова, ов пхравде вастенцар ка доџакерел ле (Лука 15:18-20).

14. Соске адава со осетинаја амен претерано криво тано товар со ваљани те фрда ле амендар?

¹⁴ Кеда претерано осетинаја амен криво. Ако керѓем несаво грево, нормално тано те осетина амен криво. Ама претерано те осетина амен криво тано товар кова со о Јехова на мангела те пхирава ле. Асавко товар мора те фрда ле амендар. Ако признајнѓем амаро грево, ако каинѓем амен хем ако керѓем нешто те шај те на повторина адава грево, шај те овел амен доверба кај о Јехова простинѓа аменге (Апо. 3:19). Откеда керѓем са акала буќа, о Јехова на мангела понадари да те осетина амен крива. Ов џанела кобор адава шај те перавел амен (Пс. 31:10). Ако сием пхаге тари дукх, адава шај те керел те откажина амен тари трка е животоскири (2. Кор. 2:7).

15. Со шај те поможинел туке кеда осетинеа тут претерано криво? (1. Јованескоро 3:19, 20). (Дикх хем и слика).

 ¹⁵ Сар шај те фрде тутар адава пхарипе? Ако понадари да претерано осетинеа тут криво ма бистре кај о Девел „чаче простинела“ (Пс. 130:4). Кеда простинела околенге со чаче каинена пе, ов ветинела: „Нане више те сетинав ман ко ленгоро грево“ (Ерем. 31:34). Адава значинела кај о Јехова никогаш више нане те мислинел ко гревија со керѓан лен. Значи, ма дикх ко последице со иси тут башо грешке со керѓан лен сар доказ кај ов на простинѓа туке. Хем ма кривин коркори тут адалеске со ко моменти шај нашти те кере нешто повише ки служба е Јеховаске башо грешке со керѓан лен. О Јехова на размислинела башо тле гревија, а ни ту на ваљани те кере адава. (Читин 1. Јованескоро 3:19, 20.)

16. Со ваљани те џана џикоте прастаја ки трка е животоскири?

¹⁶ Џикоте прастаја ки трка е животоскири, мора „те праста аѓаар те шај те победина“ (1. Коринќања 9:24). Шај те успејна ко адава ако џанаја и разлика машкар о товар со мора те пхирава хем о товар со мора те фрда. Ки акаја статија дикхлем некобор примерија башо адава со мора те пхирава а со мора те фрда. Ама на ваљани само адава те кера. О Исус вакерѓа те на ова оптовариме „буте хајбаја, пијбаја хем е секирациенцар таро живото“ (Лука 21:34). Акала хем јавера стихија шај те поможинен туке те дикхе кола промене шај ка ваљани те кере џикоте прастаја ки трка е животоскири.

17. Соске шај те ова сигурна кај ка победина ки трка е животоскири?

¹⁷ Шај те ова сигурна кај ка победина ки трка е животоскири адалеске со о Јехова дела амен и сила со ваљани аменге (Иса. 40:29-31). Адалеске ма мукх нешто те уморинел тут! Џа пало е Павлескоро пример, кова со денѓа пестар са те шај те добинел и награда (Фил. 3:13, 14). Никој нашти ки акаја трка те прастал туке ко тхан, ама о Јехова шај те поможинел туке те успејне хем те пхираве тло товар, а те фрде о товар со на ваљани туке (Пс. 68:19). Кеда о Јехова тано туја ту шај те праста хем те победине!