1. Ngekusho kwembhalo waKumaHebheru 12:1, yini lokufanele siyente kuze siwucedze lomncintiswano wekuphila?

 NJENGOBE singemaKhristu, liBhayibheli lifananisa kuphila kwetfu nemncintiswano. Labo labatawugijima baze bawucedze lomncintiswano batawutfola kuphila lokuphakadze. (2 Thim. 4:7, 8) Kufanele sente konkhe lesingakwenta kuze sichubeke sigijima, ikakhulukati ngobe sekusedvute kutsi sishaye intsambo. Umphostoli Pawula lowawugijima waze wawucedza lomncintiswano wekuphila, washo loko lokungasisita kuze natsi sikhone kushaya intsambo. Watsi kufanele ‘silahle konkhe lokusindzako siwugijime ngekucinisela umncintiswano losembikwetfu.’​—Fundza KumaHebheru 12:1.

2. Kusho kutsini ‘kulahla konkhe lokusindzako’?

² Ngesikhatsi Pawula atsi kufanele ‘silahle konkhe lokusindzako,’ bekasho kutsi kute yini umtfwalo emaKhristu lokufanele awetfwale? Cha, bekangasho njalo. Kunaloko, bekasho kutsi kufanele siyekele kwetfwala imitfwalo lokungakafaneli siyetfwale. Imitfwalo lenjalo ingasenta kutsi sinciphise lizinga lesigijima ngalo futsi isente siphelelwe ngemandla. Kuze sichubeke sigijima, kufanele sisheshe siyibone imitfwalo lengakadzingeki lengasicedza emandla futsi siyilahle. Ngesikhatsi lesifanako, asifuni kulahla imitfwalo lokufanele siyetfwale. Ngale kwaloko singatenta singasakufaneli kuba kulomncintiswano. (2 Thim. 2:5) Ngumiphi imitfwalo lokufanele siyetfwale?

3. (a) Ngekusho kwembhalo waKubaseGalathiya 6:5, yini lokufanele siyetfwale? (b) Sitawucoca ngani kulesihloko, futsi leni?

³ Fundza KubaseGalathiya 6:5. Pawula washo lokutsite lokufanele  sikwetfwale. Watsi “ngulowo nalowo uyawutetfwalela umtfwalo wakhe.” Lana Pawula bekakhuluma ngaloko Nkulunkulu lakulindzele esikhontini sakhe ngasinye, lokuyintfo umuntfu lokufanele atentele yona. Kulesihloko, sitawucoca ngekutsi ufaka ekhatsi ini ‘lomtfwalo’ umuntfu lokufanele atetfwalele wona nekutsi angawetfwala njani. Sitawuphindze sicoce ngekutsi ngumiphi imitfwalo lokungenteka siyetfwele nyalo lokungakadzingeki kutsi siyetfwale, futsi sitawufundza ngekutsi singayilahla njani. Kutetfwalela imitfwalo nekulahla leyo lokungakadzingeki kutsi siyetfwale kungasisita kutsi sichubeke sikulomncintiswano wekuphila.

4. Yini leyenta sifungo setfu sekutinikela singabi ngumtfwalo? (Buka nesitfombe.)

⁴ Sifungo setfu sekutinikela. Ngesikhatsi sitinikela kuJehova, safunga kutsi sitamkhonta futsi sente intsandvo yakhe. Kufanele sisigcine lesifungo. Akusiwo umdlalo kufeza lesifungo, kodvwa ngesikhatsi lesifanako akusiwo umtfwalo. Ngetulu kwako konkhe, Jehova wasidala kutsi sente intsandvo yakhe.  (Semb. 4:11) Wasidala saba nesifiso sekumati nesekumkhonta futsi wasidala ngemfanekiso wakhe. Ngenca yaloko, siyakhona kusondzelana naye futsi sijabule ngekwenta intsandvo yakhe. (Hla. 40:8) Ngetulu kwaloko, nangabe senta intsandvo yaNkulunkulu futsi silingisa iNdvodzana yakhe ‘sititfolela kuphumula.’​—Mat. 11:28-30.

5. Yini letakusita kutsi ufeze sifungo sakho sekutinikela? (1 Johane 5:3)

⁵ Ungawutfwala njani lomtfwalo? Timbili tintfo letingakusita. Kwekucala, ayichubeke ikhula indlela lomtsandza ngayo Jehova. Loku ungakwenta ngekutsi ucabangisise ngako konkhe lokuhle lakwentele kona kanye netibusiso lakubekele tona. Nawuchubeka umtsandza Nkulunkulu, kutawuba melula kutsi umlalele. (Fundza 1 Johane 5:3.) Kwesibili, lingisa Jesu. Waphumelela kwenta intsandvo yaNkulunkulu ngobe bekathantaza kuJehova acela kutsi amsite futsi wachubeka anake umvuzo wakhe. (Heb. 5:7; 12:2) NjengaJesu, thantaza kuJehova ucele emandla futsi uhlale ucabanga ngekuphila lokuphakadze. Njengobe uchubeka umtsandza kakhulu Nkulunkulu futsi ulingisa iNdvodzana yakhe, utawukhona kufeza sifungo sakho sekutinikela.

6. Kubaluleke ngani kutsi siyidlale indzima yetfu emndenini? (Buka nesitfombe.)

⁶ Indzima lokufanele siyidlale emndenini. Kulomncintiswano wekuphila, kufanele simtsandze kakhulu Jehova naJesu kwendlula tihlobo tetfu. (Mat. 10:37) Kodvwa loku akusho kutsi kufanele singasayidlali indzima lesinayo emindenini kube ngatsi iyasivimbela kutsi sijabulise Nkulunkulu naKhristu. Kepha kuze Nkulunkulu naKhristu basemukele, kufanele siyidlale indzima lesinayo emndenini. (1 Thim. 5:4, 8) Nasenta njalo, sitawujabula. Ngetulu kwako konkhe, Jehova wahlela imindeni kutsi ijabule nangabe indvodza nemfati batsandzana futsi bahloniphana, nangabe batali babatsandza bantfwana babo futsi babacecesha nalapho bantfwana bahlonipha batali babo.​—Ef. 5:33; 6:1, 4.

7. Yini longayenta kuze udlale indzima yakho emndenini?

⁷ Ungawutfwala njani lomtfwalo? Ngisho nobe unayiphi indzima emndenini, yetsemba seluleko lesihlakaniphile lesitfolakala eBhayibhelini kunekutsi wente ngendlela lotiva ngayo, nobe ulandzele lisiko nobe ulalele lokushiwo bantfu labatsi bati kakhulu. (Taga 24:3, 4) Tisebentise kahle tincwadzi tetfu letisekelwe eBhayibhelini. Kuto utawutfola kutsi ungatisebentisa njani timiso teliBhayibheli. Sibonelo nje, luchungechunge lwetihloko lelitsi “Usizo Lomndeni” lunekwatiswa lokumayelana netinkinga labashadene, batali kanye nalabasha lababhekana nato lamuhla. b Timisele kukusebentisa loko lokushiwo liBhayibheli ngisho nobe lamanye emalunga emndeni angakwenti loko. Nawenta njalo, umndeni wakho utawusitakala futsi Jehova utakubusisa.​—1 Phet. 3:1, 2.

8. Tingasitsintsa njani tincumo tetfu?

⁸ Kufanele sibhekane nemiphumela yetincumo tetfu. Jehova usinikete inkhululeko yekutikhetsela futsi ufuna sijabule ngenca yemiphumela yekwenta tincumo letihlakaniphile. Nobe kunjalo, akasivikeli kutsi singabhekani nemiphumela yetincumo tetfu letimbi. (Gal. 6:7, 8) Kungako kufanele semukele imiphumela yetincumo tetfu letingakahlakaniphi, nobe nasisho emagama langakacatjangwa nalapho sente tintfo singakacabangi. Singahle sishaywe ngunembeza kuye ngekutsi yini lesiyentile. Nobe  kunjalo, kwati kutsi kufanele semukele imiphumela yetincumo tetfu kungasenta kutsi sivume tono tetfu, silungise emaphutsa etfu futsi sikugweme kuwaphindza. Kwenta loko kungasisita kutsi sichubeke sikulomncintiswano wekuphila.

9. Yini longayenta nangabe wente sincumo lesikabi? (Buka nesitfombe.)

⁹ Ungawutfwala njani lomtfwalo? Nangabe ungeke usishintje sincumo lesibi losentile, yemukela simo lokuso. Vuma kutsi angeke uze ukushintje lokwentekile. Ungamoshi sikhatsi kanye nemandla akho wetama kuveta kutsi awukenti liphutsa nobe usimoshe utisola nobe-ke usola labanye ngetincumo letimbi lotentile. Kunaloko, vuma emaphutsa akho futsi wetame kamatima kwenta kancono esimeni lokuso manje. Nangabe utiva unelicala ngenca yeliphutsa lolentile, thantaza kuJehova uvume liphutsa lakho futsi umcele akucolele. (Hla. 25:11; 51:3, 4) Colisa kulabo lobonile futsi nangabe kudzingekile ucele lusito kulabadzala belibandla. (Jak. 5:14, 15) Fundza emaphutseni akho futsi wetame kungawaphindzi. Nawenta njalo ungaciniseka kutsi Jehova utakukhombisa umusa futsi akusekele.​—Hla. 103:8-13.

10. Sisho ngani kutsi kungumtfwalo lomkhulu kulindzela lokungetulu kwemandla etfu? (KubaseGalathiya 6:4)

¹⁰ Kulindzela lokungetulu kwemandla etfu. Singatetfwesa kamatima ngekutsi silindzele lokungetulu kwemandla etfu nasiticatsanisa nalabanye. (Fundza KubaseGalathiya 6:4.) Nangabe sihlale siticatsanisa nalabanye, singaba nemona futsi sibe nemoya wekuncintisana. (Gal. 5:26) Kuze setame kuba naloko labanye labanako, singahle sitikhandle kamatima kwendlula loko emakhono etfu netimo tetfu lokusivumela kutsi sikwente. Ngetulu kwaloko, “nangabe solo kungenteki loko umuntfu lakulindzele, ubese ulahlekelwa litsemba,” ngako kubuhlungu kulindzela kutsi sente intfo lesingayuze sikhone kuyenta! (Taga 13:12) Kwenta njalo kungasicedza emandla futsi kusente singasawugijimi kahle lomncintiswano wekuphila.​—Taga 24:10.

11. Yini lengakusita kutsi ugweme kulindzela lokungetulu kwemandla akho?

¹¹ Ungawulahla njani lomtfwalo? Ungalindzeli kwenta lokungetulu kwemandla akho kwendlula loko Jehova lacela kutsi ukwente. Akwenteki alindzele kutsi umnike loko lote kona. (2 Khor. 8:12) Ciniseka kutsi Jehova akakucatsanisi loko lokwentako nalokwentiwa ngulabanye. (Mat. 25:20-23) Uyajabula ngemsebenti wakho lowenta ngemphefumulo wonkhe, ngekwetsembeka kwakho nangekucinisela kwakho. Ngekutfobeka, vuma kutsi kukhula ngeminyaka, simo semphilo kanye netimo takho kungakulawula loko lokwentako nyalo. NjengaBhazilayi, timisele kungayivumi leminye imisebenti nangabe simo sakho semphilo nobe kukhula ngeminyaka kwenta kube matima kutsi wente umsebenti lotsite. (2 Sam. 19:35, 36) NjengaMosi, yemukela lusito futsi ucele labanye kutsi bakusite nangabe timo tivuma. (Eks. 18:21, 22) Kutfobeka ngalendlela kutakusita kutsi ungalindzeli kwenta lokungetulu kwemandla akho, lokungakucedzela emandla kulomncintiswano wekuphila.

12. Kufanele sitisole yini ngetincumo letimbi letentiwa ngulabanye? Chaza.

¹² Kubona ngatsi tiliphutsa lakho tincumo letingakahlakaniphi letentiwa ngulabanye. Angeke sibancumele labanye, futsi angeke ngaso sonkhe sikhatsi sibavikele kutsi bangabhekani nemiphumela yetincumo tabo letimbi labatentako. Sibonelo nje, indvodzana nobe indvodzakati ingahle incume kuyekela kukhonta Jehova. Lesincumo singabavisa  buhlungu kakhulu batali. Nanobe kunjalo, batali labatisola bona ngesincumo lesibi lesentiwe ngulomntfwana batetfwesa umtfwalo losindzako. Jehova akalindzeli kutsi bawetfwale.​—Rom. 14:12.

13. Yini umtali langayenta mayelana nesincumo lesibi lesentiwe ngumntfwanakhe?

¹³ Ungawulahla njani lomtfwalo? Khumbula kutsi sonkhe Jehova usinike inkhululeko yekutikhetsela. Uvumela umuntfu ngamunye kutsi atentele sakhe sincumo. Loko kufaka ekhatsi kwenta sincumo sekutsi sitamkhonta yini nobe cha. Jehova uyati kutsi ungumtali lonesono, ufuna kutsi wente lokusemandleni akho. Sincumo lesentiwa ngumntfwanakho singumtfwalo wakhe, hhayi wakho. (Taga 20:11) Nobe kunjalo, ungahle ukhatsateke ngemaphutsa lowentile njengobe ungumtali. Nangabe kunjalo, tjela Jehova indlela lotiva ngayo futsi umcele akucolele. Uyati kutsi angeke ubuyele emuva futsi ushintje lokwentekile. Ngesikhatsi lesifanako, akalindzeli kutsi uvikele umntfwanakho kutsi avune loko lakuhlanyele. Hlale ukhumbula kutsi nangabe umntfwanakho enta lokutsite kuze abuyele kuJehova, yena uhlale avule tandla takhe.​—Luk. 15:18-20.

14. Sisho ngani kutsi kutiva sinelicala ngalokwecile kungumtfwalo lokufanele siwulahle?

¹⁴ Kutiva sinelicala ngalokwecile. Nasenta sono kukahle kutsi sitive sinelicala. Nobe kunjalo, kutiva sinelicala ngalokwecile kungumtfwalo lokungakafaneli siwetfwale. Ngumtfwalo lokufanele siwulahle. Sati njani nangabe sitiva sinelicala ngalokwecile? Nase sisivumile sono setfu, saphendvuka futsi senta lokutsite kuze singasiphindzi lesono, singaciniseka kutsi Jehova usicolele. (Imis. 3:19) Nase sikwentile loko, Jehova akafuni kutsi sichubeke sitiva sinelicala. Uyati kutsi kungasilimata kuchubeka sitiva kanjalo. (Hla. 31:10) Nangabe siva buhlungu ngalokwecile, singahle siyekele kuba kulomncintiswano wekuphila.​—2 Khor. 2:7.

15. Yini lengakusita nangabe utiva unelicala ngalokwecile? (1 Johane 3:19, 20) (Buka nesitfombe.)

 ¹⁵ Ungawulahla njani lomtfwalo? Nangabe uchubeka utiva unelicala ngalokwecile, naka kakhulu kutsi Nkulunkulu “utsetselelana mbamba.” (Hla. 130:4) Naku lakwetsembisako nakacolela labo labaphendvuke mbamba, utsi: ‘Sono sabo angeke ngiphindze ngisikhumbule.’ (Jer. 31:34) Loku kusho kutsi Jehova angeke akujezisele tono lowatenta esikhatsini lesendlulile. Ngako ungatsatsi imiphumela yetono lowatenta njengebufakazi bekutsi Jehova akakucoleli. Ngetulu kwaloko, ungatijeziseli emaphutsa lowawenta esikhatsini lesendlulile ngobe loko kungenta kutsi wente lokuncane nyalo emsebentini waNkulunkulu. Jehova akahlali acabanga ngetono takho, futsi nawe kufanele wente lokufanako.​—Fundza 1 Johane 3:19, 20.

16. Njengobe sitingijimi, yini lokufanele siyikhumbule?

¹⁶ Njengobe sigijima kulomncintiswano wekuphila, kufanele ‘sigijime ngendlela letawusenta sitfole umklomelo.’ (1 Khor. 9:24) Loko singakwenta ngekutsi sati umehluko emkhatsini wemitfwalo lokufanele siyetfwale nalokufanele siyilahle. Kulesihloko, sicoce ngetibonelo letimbalwa taloko lokufanele sikwetfwale naloko lokufanele sikulahle. Kodvwa kunalokunye. Jesu watsi ‘singasindvwa kumita, nekudzakwa kanye netinkhatsato tekuphila.’ (Luk. 21:34) Lombhalo kanye naleminye ingakusita kuze ubone lakufanele wente khona lushintjo njengobe usagijima kulomncintiswano wekuphila.

17. Yini lengasenta siciniseke kutsi sitawutfola umklomelo kulomncintiswano wekuphila?

¹⁷ Singaciniseka kutsi sitawutfola umklomelo kulomncintiswano wekuphila ngobe Jehova usinika emandla lesiwadzingako. (Isa. 40:29-31) Ngako-ke ungacali wehlise litubane! Lingisa umphostoli Pawula lowagijima ngawo onkhe ematubane akhe kuze atfole umklomelo lebewusembikwakhe. (Fil. 3:13, 14) Kute longakugijimela, kodvwa Jehova angakusita kutsi ufike entsanjeni. Jehova angakusita kutsi utfwale imitfwalo yakho uphindze ulahle imitfwalo lengakadzingeki. (Hla. 68:19) Ngekusitwa nguye, utawukhona kucinisela njengobe ugijima kulomncintiswano futsi utfole umklomelo!