1. Tuir Ebreu 12:1, ita presiza halo saida atu halai toʼo rohan?

 BÍBLIA kompara ema Kristaun nia moris ho halai-taru. Ema neʼebé halai toʼo rohan mak sei hetan moris rohan-laek. (2 Tim 4:7, 8) Ita presiza hakaʼas an atu kontinua halai, liuliu tanba ita besik ona rohan. Apóstolu Paulo, halai ona toʼo rohan ho susesu no fó sai buat neʼebé bele ajuda ita atu halai toʼo rohan. Nia anima ita atu “soe tiha buat hotu neʼebé hatodan ita . . . , no mai ita tahan hodi halai toʼo rohan iha halai-taru neʼebé iha ita-nia oin”.​—Lee Ebreu 12:1.

2. Liafuan “soe tiha buat hotu neʼebé hatodan ita” katak sá?

² Bainhira Paulo hakerek katak ita presiza “soe tiha buat hotu neʼebé hatodan ita”, neʼe la dehan katak la iha todan ida neʼebé ema Kristaun presiza lori. Maibé ninia liafuan signifika katak ita presiza husik tiha todan sira neʼebé ita la presiza. Todan sira-neʼe bele hanetik ita atu halai ka halo ita sente kole. Atu bele halai toʼo rohan, ita presiza buka-hatene no soe tiha todan sira neʼebé ita la presiza. Maibé ita mós lakohi husik todan ka responsabilidade neʼebé ita presiza lori. Se ita la lori todan sira-neʼe, ita sei labele kontinua halai iha halai-taru. (2 Tim 2:5) Ita tenke lori todan saida deʼit?

3. (a) Tuir Galásia 6:5, ita presiza lori saida? (b) Iha lisaun neʼe, ita sei koʼalia kona-ba saida, no tanbasá?

³ Lee Galásia 6:5. Paulo temi buat ida neʼebé ita presiza lori. Nia hakerek katak “ema ida-idak sei lori ninia todan rasik”. Iha neʼe, Paulo refere ba todan neʼebé Maromak nia atan ida-idak presiza lori. Iha lisaun neʼe, ita sei  koʼalia kona-ba saida mak ita-nia “todan rasik” no oinsá ita bele lori ida-neʼe. Ita mós sei aprende kona-ba todan sira neʼebé ita la presiza lori no oinsá atu soe ida-neʼe. Hodi halo nuneʼe bele ajuda ita atu halai toʼo rohan.

4. Tanbasá ita-nia dedikasaun la susar liu ba ita atu kumpre? (Haree mós foto.)

⁴ Ita-nia dedikasaun. Bainhira ita dedika an ba Jeová, ita promete atu adora nia no halo tuir ninia hakarak. Ita tenke kumpre ita-nia promesa neʼe. Maski ita-nia dedikasaun mak responsabilidade neʼebé sériu, maibé ida-neʼe la susar liu ba ita atu kumpre tanba Jeová kria ita atu halo tuir ninia hakarak. (Apok 4:11) Nia kria ita tuir ninia ilas no tau iha ita-nia laran hakarak atu hatene no adora nia. Tan neʼe, ita bele hakbesik ba nia no hetan ksolok hodi halo tuir ninia hakarak. (Sal 40:8) Bainhira ita halo tuir Maromak nia hakarak no halo tuir ninia Oan-Mane, ita sei “sente kmaan”.​—Mt 11:28-30.

5. Saida mak bele ajuda Ita kumpre Ita-nia dedikasaun? (1 João 5:3)

 ⁵ Oinsá Ita bele lori todan neʼe? Iha buat rua neʼebé bele ajuda Ita. Primeiru, kontinua hametin Ita-nia domin ba Jeová. Ita bele halo ida-neʼe hodi medita kona-ba buat diʼak hotu neʼebé nia halo ona ba Ita no bensaun neʼebé nia promete iha futuru. Bainhira Ita-nia domin ba Maromak sai boot liután, neʼe sei fasil ba Ita atu halo tuir nia. (Lee 1 João 5:3.) Segundu, banati-tuir Jesus. Jesus konsege halo tuir Maromak nia hakarak ho susesu tanba halo orasaun ba Jeová atu husu ajuda no tau fokus nafatin ba ninia kolen. (Ebr 5:7; 12:2) Hanesan Jesus, Ita bele halo orasaun ba Jeová hodi husu kbiit no kontinua hanoin kona-ba Ita-nia esperansa moris rohan-laek. Bainhira Ita-nia domin ba Jeová sai boot liután no Ita banati-tuir Jesus, Ita bele kumpre Ita-nia dedikasaun.

6. Tanbasá ita tenke tau matan ba ita-nia família? (Haree mós foto.)

⁶ Tau matan ba ita-nia família. Iha ita-nia halai-taru ba moris, ita presiza hadomi Jeová no Jesus liu fali ita-nia família. (Mt 10:37) Maibé neʼe la dehan katak ita la presiza tau matan ba ita-nia família. Atu halo kontente Maromak no Kristu, ita presiza kumpre ita-nia responsabilidade iha família laran. (1 Tim 5:4, 8) Bainhira ita halo ida-neʼe, neʼe sei halo ita kontente. Jeová hatene katak família sira sei moris kontente bainhira feen-laʼen hadomi no respeitu malu, inan-aman hadomi no treinu sira-nia oan, no oan sira halo tuir inan-aman.​—Éf 5:33; 6:1, 4.

7. Oinsá Ita bele kumpre Ita-nia responsabilidade iha família laran?

⁷ Oinsá Ita bele lori todan neʼe? Maski Ita mak laʼen, feen, ka oan ida, Ita presiza aplika Bíblia nia matadalan. Ita labele halo tuir deʼit Ita-nia hakarak rasik, Ita-nia kultura, ka buat neʼebé matenek-naʼin sira fó sai. (Prov 24:3, 4) Aproveita didiʼak ita-nia publikasaun sira neʼebé fó sai sujestaun kona-ba oinsá ita bele aplika Bíblia nia prinsípiu. Porezemplu, iha série informasaun “Ajuda ba família” ita bele hetan informasaun oioin neʼebé bele ajuda feen-laʼen, inan-aman, no joven sira atu bele tahan hasoru susar oioin. b Maski Ita-nia família la halo tuir Bíblia nia matadalan, maibé Ita hakarak hakaʼas an atu halo tuir. Bainhira Ita halo ida-neʼe, Ita-nia família sei hetan benefísiu no Ita sei simu bensaun husi Jeová.​—1 Ped 3:1, 2.

8. Oinsá mak ita-nia desizaun sira bele afeta ita?

⁸ Rezultadu husi ita-nia desizaun sira. Jeová fó ita liberdade atu halo desizaun rasik, no nia hakarak ita hetan benefísiu hodi halo desizaun neʼebé matenek. Maibé se ita halo desizaun neʼebé la matenek, Jeová sei husik ita atu hetan konsekuénsia husi desizaun neʼe. (Gal 6:7, 8) Tan neʼe, se ita halo desizaun neʼebé sala, koʼalia hodi la hanoin uluk, no mós halo hahalok neʼebé sala, ita sei hasoru susar. Dala ruma buat neʼebé ita halo book ita atu fó-sala ba ita-nia an. Maski nuneʼe, hodi hatene katak ita tenke simu  rezultadu husi ita-nia desizaun sira, neʼe bele book ita atu fó sai ita-nia sala, troka ita-nia hahalok, no hakaʼas an atu la halo sala neʼebé hanesan. Hodi halo nuneʼe bele ajuda ita kontinua halai toʼo rohan.

9. Se Ita halo ona desizaun neʼebé sala, saida mak Ita bele halo? (Haree mós foto.)

⁹ Oinsá Ita bele lori todan neʼe? Se Ita halo ona desizaun neʼebé sala, saida mak Ita bele halo? Ita presiza rekoñese katak Ita labele troka Ita-nia pasadu. Keta gasta Ita-nia tempu no enerjia atu koko defende an ka koko atu duun ema seluk ba desizaun sala neʼebé Ita halo. Duké halo nuneʼe, rekoñese Ita-nia sala no hakaʼas an atu halo buat neʼebé Ita bele halo agora daudaun. Se Ita fó-sala ba Ita-nia an kona-ba buat neʼebé Ita halo, hakbesik ba Jeová liuhusi orasaun, fó sai kona-ba Ita-nia sala, no husu perdua. (Sal 25:11; 51:3, 4) Husu deskulpa ba ema neʼebé Ita hakanek, no buka ajuda husi katuas sira, se presiza. (Tgo 5:14, 15) Aprende husi Ita-nia sala, no koko atu la halo tan sala neʼebé hanesan. Bainhira Ita halo nuneʼe, Ita bele fiar metin katak Jeová sei hatudu laran-sadiʼa no apoia Ita.​—Sal 103:8-13.

10. Se ita hakarak kumpre buat neʼebé ita labele kumpre, oinsá neʼe bele hatodan ita? (Galásia 6:4)

¹⁰ Sente katak ita presiza kumpre buat neʼebé ita labele kumpre. Ita sei hatodan ita-nia an se ita kompara ita-nia an ho ema seluk. (Lee Galásia 6:4.) Se ita sempre kompara ita-nia an ho ema seluk, neʼe bele halo ita laran-moras no kompete malu. (Gal 5:26) Tanba ita hakarak kumpre buat neʼebé ema seluk kumpre, karik ikusmai ita obriga demais ita-nia an atu halo liu fali ita-nia abilidade no situasaun. Hanoin toʼok kona-ba neʼe: Bíblia hatete katak ita bele sai laran-kanek se ita hein kleur ba buat ruma. (Prov. 13:12) Entaun ita sei sai laran-kanek liután se ita hakarak halo buat neʼebé ita nunka bele kumpre. Se ita halo nuneʼe, neʼe bele halo ita kole no hanetik ita atu halai toʼo rohan.​—Prov 24:10.

11. Saida mak bele ajuda Ita atu la koko halo buat neʼebé Ita labele kumpre?

¹¹ Oinsá Ita bele soe tiha todan neʼe? Keta obriga Ita-nia an atu halo liu fali buat neʼebé Jeová husu. Jeová nunka husu Ita atu fó buat neʼebé Ita la iha. (2 Kor 8:12) Ita bele fiar metin katak Jeová la kompara buat neʼebé Ita halo ho ema seluk. (Mt 25:20-23) Nia hafolin Ita-nia laran-metin, Ita-nia kbiit atu tahan, no dalan neʼebé Ita serbí nia ho laran tomak. Hatudu haraik an no rekoñese katak dala ruma iha buat balu neʼebé Ita labele halo tanba idade, saúde, ka situasaun. Hanesan Barzilai, diʼak atu la simu knaar neʼebé Ita labele kumpre tanba Ita-nia saúde ka idade la permite. (2 Sam 19:35, 36) Hanesan Moisés, simu ajuda no fahe Ita-nia knaar ho ema seluk, se presiza. (Éx 18:21, 22) Bainhira Ita hatudu haraik an, Ita sei la koko halo buat neʼebé Ita labele kumpre no hanetik Ita atu halai toʼo rohan.

12. Ita mak iha responsabilidade ba ema seluk nia desizaun neʼebé sala ka lae? Esplika toʼok.

¹² Sente katak ita iha responsabilidade ba ema seluk nia desizaun neʼebé sala. Ita labele halo desizaun ba ema seluk. Ita mós labele hanetik konsekuénsia neʼebé ema seluk hetan husi desizaun  sala neʼebé sira halo. Porezemplu, karik oan ida deside atu la serbí tan Jeová. Desizaun neʼe bele halo inan-aman sente triste tebes. Maski nuneʼe, se inan-aman fó-sala ba sira-nia an kona-ba oan nia desizaun, neʼe bele sai nuʼudar todan ba sira. Jeová lakohi sira atu lori todan neʼe.​—Rom 14:12.

13. Inan-aman bele halo saida se sira-nia oan halo desizaun la diʼak?

¹³ Oinsá Ita bele soe tiha todan neʼe? Ita presiza rekoñese katak Jeová fó ba ita hotu liberdade atu hili. Nia husik ema ida-idak atu halo desizaun rasik. Neʼe inklui desizaun atu serbí ka la serbí nia. Jeová hatene katak inan-aman sira la perfeitu, nia hakarak sira atu halo buat neʼebé tuir sira-nia kbiit. Desizaun neʼebé oan sira halo mak sira-nia responsabilidade, laʼós inan-aman nian. (Prov 20:11) Maski nuneʼe, karik Ita hanoin barak kona-ba sala neʼebé uluk Ita halo atu haboot Ita-nia oan. Se nuneʼe, fó sai Ita-nia sentimentu ba Jeová no husu perdua. Nia hatene Ita labele troka Ita-nia pasadu. No Jeová mós lakohi Ita atu proteje Ita-nia oan husi rezultadu aat neʼebé mai husi ninia desizaun rasik. Hanoin-hetan katak Jeová kontente atu simu fali Ita-nia oan se nia koko atu fila fali ba Jeová.​—Lc 15:18-20.

14. Tanbasá Ita labele fó-sala demais ba Ita-nia an?

¹⁴ Fó-sala demais ba ita-nia an. Baibain kuandu ita halo sala, ita fó-sala ba ita-nia an. Maibé Jeová lakohi ita fó-sala demais ba ita-nia an. Ita tenke soe tiha todan neʼe. Oinsá ita bele hatene se ita fó-sala demais ba ita-nia an? Se ita fó sai ona ita-nia sala, arrepende an, no hakaʼas an atu la halo tan sala neʼebé hanesan, ita bele fiar katak Jeová perdua ona ita. (Após 3:19) Kuandu ita halo ona hakat sira-neʼe, Jeová lakohi ita atu kontinua  fó-sala ba ita-nia an. Nia hatene katak neʼe sei lori susar ba ita. (Sal 31:10) Se ita sente triste demais, karik ita sei rende an iha halai-taru ba moris.​—2 Kor 2:7.

15. Saida mak bele ajuda Ita atu la fó-sala demais ba Ita-nia an? (1 João 3:19, 20) (Haree mós foto.)

¹⁵ Oinsá Ita bele soe tiha todan neʼe? Se Ita kontinua fó-sala ba Ita-nia an, diʼak atu fokus ba oinsá Maromak “perdua duni” ema nia sala. (Sal 130:4) Bainhira Jeová fó perdua ba ema neʼebé arrepende an, nia promete katak nia sei “la hanoin-hetan tan sira-nia sala”. (Jer 31:34) Neʼe katak Jeová sei nunka hanoin fali kona-ba sala neʼebé uluk Ita halo se nia perdua ona Ita. Tan neʼe, se Ita hasoru susar tanba Ita-nia sala, keta hanoin katak Jeová seidauk perdua Ita. No keta hirus Ita-nia an tanba Ita lakon knaar balu iha kongregasaun. Jeová haluha ona Ita-nia sala, tan neʼe diʼak atu Ita mós halo nuneʼe.​—Lee 1 João 3:19, 20.

16. Nuʼudar ita halai-taru, ita tenke rekoñese saida?

¹⁶ Nuʼudar ita halai-taru atu hetan moris, ita tenke halai ho ita-nia kbiit tomak ‘atu bele manán prémiu’. (1 Kor 9:24) Ita bele halo nuneʼe hodi rekoñese todan neʼebé ita presiza lori no todan neʼebé tenke soe tiha. Iha lisaun neʼe, ita koʼalia kona-ba ezemplu balu deʼit. Maibé iha todan seluk tan. Jesus dehan katak ema nia laran bele sai “todan tanba han demais no hemu barak, no hanoin resin kona-ba moris neʼe”. (Lc 21:34) Eskritura sira-neʼe no eskritura seluk tan bele ajuda Ita buka-hatene kona-ba mudansa neʼebé Ita presiza halo atu bele kontinua halai toʼo rohan.

17. Tanbasá ita bele iha konfiansa katak ita sei halai toʼo rohan?

¹⁷ Ita bele iha konfiansa katak ita sei halai toʼo rohan tanba Jeová sei fó ita kbiit neʼebé ita presiza. (Isa 40:29-31) Tan neʼe, keta rende an! Banati-tuir apóstolu Paulo neʼebé hakaʼas an atu simu ninia kolen. (Flp 3:13, 14) Ita rasik tenke hola parte iha halai-taru neʼe, no Jeová sei ajuda Ita manán. Jeová bele ajuda lori Ita-nia todan no soe tiha todan neʼebé Ita la presiza lori. (Sal 68:19) Ho ninia ajuda Ita bele kontinua tahan hodi halai toʼo rohan!