1. Arake ty Hebreo 12:1, ino ty raha mila ataontika mba hiaviantika amy i tsipike fara’e amy i lay ataontika mba hahazoagne i fiaignagneỳ?

 AMPITOVIE ty Baiboly amy ty korsa lay ty fiaignantika Kristiana. Ze mahavita i laỳ hatrake ampara’e, le hahazo valesoa. Tsy ino zay, fa ty fiaignagne nainai’e. (2 Tim. 4:7, 8) Mila mikezake mafe tika mba hanohy i laỳ avao satria fa marine i tsipike fara’ey tika tie amy izao. Fa nahavita hatrake ampara’e i lay mba hahazoagne fiaignagney ty apostoly Paoly. Nirehafe’e ty raha hagnampe antika hahavita i laỳ hatrake ampara’e. Nanoro hevetse antika reke mba ‘hagnafake ze raha magnavesatse antika ... sady hiaretse avao amy i lay ataontikagney.’​—Vakio ty Hebreo 12:1.

2. Ino ty dika tihoe “magnafake ze raha magnavesatse antika”?

² Nanoratse ty Paoly tie tsy maintsy magnenga ze raha magnavesatse antika tika. Faie midika vao zay tie, mandeha tagnam-polo avao tika? Aha’a, tsy izay. Ty tea’e horehafegne le tihoe mila engantika ze raha iaby tsy paiagne fa hagnavesatse antika avao. Hahavy antika tsy hahalay naho ho rokake i raha rey. Mba hahavitantika hiaretse, le tsy maintsy fantarentika malaky ze raha tsy ilaegne magnavesatse hahavy antika tsy hahalay. Faie kindraike ka, misy raha ila’e teantika engagne faie mila andesegne. Naho engantika rey le va’e tsy hahavita i korsa laỳ hatrake am-para’e tika. (2 Tim. 2:5) Ino areke ty raha tsy maintsy andesentika?

3. a) Arake ty Galatianina 6:5, ino ty raha tsy maintsy andesentikagne? b) Ino ty raha hodinehentika amy ty lahatsoratse toy ato, le ino ty anto’e?

 ³ Vakio ty Galatianina 6:5 naho ty fagnamarehagne ambane peje. Nirehake raha tsy maintsy andesentika ty Paoly. Hoe reke tie “sambe hinday ty enta’e iaby ty tsikiraidraike.” Ty dika izay, le ty entantika manokagne miomba ty andraikintika agnatrehan’Agnahare eo, sady toe tsy misy afake manao izay ho antika. Hodinehentika ato tie ino ty tafilitse amy tihoe “entantika”, le akore ty hahafahantika minday aze. Hotreantika ato ka ty raha tsy ilaegne magnavesatse antika naho ty fomba hagnafahantika aze. Hagnampe antika hahavita i laỳ hatrake ampara’e sady hahazo i fiaignagney ty fanoantika ze raha rezay.

4. Nagnino ro tsy enta-magnavesatse ho antika ty magnatanterake ty vava nataontika tamy i Jehovah tie hanompo aze? (Henteo i sarey.)

⁴ Ty fanokanan-tegnantika. Naho fa nanokan-tegna hoahy i Jehovah tika, le nanao vava tie hanompo aze naho hanao ty zoton’arofo’e. Mila tanantika ze vava nanoentika zay.  Andraikitse lahibey ty miaigne mifagnarake amy izay fa tsy tihoe enta-mavesatse. Ty anto’e, finoro i Jehovah mba hanao ty zoton’arofo’e tika. (Apok. 4:11) Finoro’e mba hagniry hahafantatse aze, hanompo aze, vaho hitovy vintagne ama’e ka tika. Manjare afake minamagne ama’e areke tika sady falefale manao ty zoton’arofo’e. (Sal. 40:8) Naho manao izay tika sady manonjohy ty lia i Ana-dahi’ey, le “ho velombolo.”​—Mat. 11:28-30.

5. Ino ty hagnampe azo hagnatanterake ty fanokanan-tegna’o? (1 Jaona 5:3)

⁵ Ino ty hagnampe azo hahavita hinday ty enta’o? Misy raha roe retoa. Voaloha’e, ampitombò ty hatea’o i Jehovah. Hahavita izay rehe naho misaintsaigne ty raha fa natao’e ho azo naho ty fitahiagne mbe homea’e azo amy ty hoavy. Ho mora ama’o ty hankatò aze naho fa mitombo ty hatea’o aze. (Vakio ty 1 Jaona 5:3.) Faharoe, tsikombeo ty Jesosy. Nahavita nanao ty zoton’arofo i Jehovah reke satria nangatake fagnampeagne tama’e sady nifantoke tamy ty valesoa ho azo’e. (Heb. 5:7; 12:2) Mivavaha ka amy i Jehovah, manahake ty natao i Jesosy, mba hahazo hery naho hifantoke amy i fiaignagne nainai’ey. Naho fa mitombo ty hatea’o i Jehovah sady mitsikombe i Ana-dahi’ey rehe, le ho vita’o ty hitagne i vava natao’oy.

6. Nagnino tika ro tsy maintsy magnatanterake ty andraikintika amy ty keleiantika? (Henteo i sarey.)

⁶ Ty andraikintika amy ty keleiantikagne. Naho fa manao i korsa lay hahazoagne fiaignagney tika, le tsy maintsy teantika mandilatse o longontikagneo ty Jehovah naho i Jesosy. (Mat. 10:37) Faie tsy midika zay tie tsy dareantika ty andraikintika amy ty keleiantika eo. Tsy hampifale an’Agnahare naho i Kristy tika naho manao izay. Mila magnatanterake ty andraikitikagne amo o keleiagneo tika naho teantika ty hankasitraha iareo. (1 Tim. 5:4, 8) Ho sambatse tika naho manao izay. Ony i Jehovah fa ho sambatse o keleiagneo naho fa mifankatea sady mifagnaja o mpivalio, tea naho mampiofagne ty ana’e o rae aman-dreneo vaho mankatò iareo ty ana iareo.​—Efes. 5:33; 6:1, 4.

7. Ino ty hagnampe azo hagnatanterake ty andraiki’o amy ty keleia’o?

⁷ Ino ty hagnampe azo hahavita hinday ty enta’o? Ndra inogn’ino ty andraiki’o amy ty keleia’o eo, le atokiso ty torohevetse feno fahendreagne amy Baiboly ao. Ko miantehetse amy ze trea’o fa mete avao, ndra ze atao o ndatio, ndra ze rehafe o ndaty mahilalao. (Ohab. 24:3, 4) Ampiasao soa o boke aman-gazetentikagneo. Atoro ao ty fomba azo ampiharagne ty toro lalagne ty Baiboly. Amy ty andian-dahatsoratse manao tihoe “Ho An’ny Fianakaviana” zao ohatse, le misy fagnazavagne magnampe ty mpivaly, ty rae aman-drene naho ty tanora amy ty olagne atrehe iareo amy izao. b Mikezaha ho tapa-kevetse ty hampihatse ze raha rehafe ty Baiboly ndra tie tsy manao izay aza ty ila’e amo o keleiagneo. Naho manao izay rehe, le handrambe soa i keleia’oy sady ho fale satria tahie i Jehovah.​—1 Pet. 3:1, 2.

8. Ino ty ho voka ty fanapahan-kevetse nirambesentika amantika?

⁸ Tompon’andraikitse amy ty fanapahan-keventikagne tika. Nimea i Jehovah fahafahagne hanapa-kevetse tika. Tea’e ho fale sady handrambe soa amy ty fanapahan-kevetse soa nataontika tika. Faie tsy miaro antika amy ty voka-draty ty fanapahan-keventika reke. (Gal. 6:7, 8) Tompon’andraikitse amy ze voka-draty ty fanapahan-kevetse, ty rehake ndra ty raha raty  nataontikagne tika. Miankigne amy ty raha nataontika ty hahavy antika henjehe ty eretserentika. Faie naho tadidientika ka tie tompon’andraikitse amy ty fanapahan-keventika tika, le izay ty handrisike antika hibebake, hagnitsy naho tsy hagneregne sasa ty fahadisoantika. Hagnampe antika tsy hiala amy i korsa lay hahazoagne fiaignagney zay.

9. Ino ty azo’o atao naho tsy nimete ty fanapahan-kevetse nirambese’o? (Henteo i sarey.)

⁹ Ino ty hagnampe azo hahavita hinday ty enta’o? Naho tsy afake mamoagne ty voka-draty ty fanapahan-keve’o rehe, le ekeo ty raha misy. Tadidio fa tsy afake magnova ty lasa rehe. Ko mandrokake ty fo’o naho mandany hery hagnamarenagne ty vata’o, ndra ka hagnamelohagne ty tegna’o naho ty hafa noho i fanapahan-kevetse tsy nimetey. Ekeo ty hadisoa’o, le manoa ze fara’e soa vita’o amy izao. Miambanea, le mivavaha amy i Jehovah naho tsapa’o tie tsy mete ty raha natao’o. Ambarao ama’e ty hadisoa’o, le mangataha famelan-keloke. (Sal. 25:11; 51:3, 4) Mialà tsiny amy ze ndaty nanoa’o raha tsy mete. Mangataha fagnampeagne amo o androanavi-pagnahio naho ilaegne zay. (Jak. 5:14, 15) Mandrambesa lesogne boake amy ty hadisoa’o, le mikezaha tsy hagneregne aze sasa. Naho manao izay rehe, le matokia fa hamindra fo ama’o ty Jehovah sady hagnomey ze raha ilae’o.​—Sal. 103:8-13.

10. Nagnino ro magnavesatse antika ty mieretseretse ty raha tsy ho vitantika? (Galatianina 6:4)

¹⁰ Mieretseretse ty raha tsy ho vita’o. Manao raha magnavesatse antika tika naho mampitaha ty tegnantika amy ty hafa satria va’e tsy ho vitantika ty raha vita iareo. (Vakio ty Galatianina 6:4.) Naho mampitaha ty tegnantika amy ty hafa tika, le hanjare hialogne naho hifaninagne. (Gal. 5:26) Hanimba tegna avao tika naho mikezake hanao ty raha vita ty hafa, ie amy izao tsy ho vitantika ty hanao manahake iareo, sady tsy magnenga antika hanao izay ty raha iaignantika. Rehafe ty Baiboly ka tie “marare ty fo naho malaogne ty hiavia ty raha tamaegne.” (Ohab. 13:12) Ho kivy avao tika naho mitamà ty raha tsy ombia ho avy. Hanjare ho rokake ka tika sady hipenepene amy i korsa lay mba hahazoagne fiaignagney.​—Ohab. 24:10.

11. Ino ty hagnampe azo tsy hieretseretse ty raha tsy ho vita’o?

¹¹ Akore ty hahavita’o magnenga ze raha magnavesatse? Ko mitake bey loatse amy ty tegna’o mandikoatse ze take i Jehovah ama’o. Tsy ombia hitamà azo hagnomey ty raha tsy anagna’o reke. (2 Kor. 8:12) Matokia fa tsy hampitaha ty raha vita’o amy ty raha vita ty hafa ty Jehovah. (Mat. 25:20-23) Sarobily ama’e ty fanompoa’o aze amy ty fo, ty tsy fivaliha’o naho ty fiareta’o. Naho miambane rehe le hagneke tie voafetra ty raha vita’o, noho ty tao’o, ty fahasalama’o vaho ty raha iaigna’o. Manahake i Barzilay, le ko matahotse ty handietse naho ohatse sarotse ama’o ty hanao ty andraikitse raike noho ty tsy fahasalama’o ndra ty tao’o. (2 Sam. 19:35, 36) Manahake i Mosesy ka, le ekeo ty fagnampea ty hafa sady mizarà andraikitse naho mete. (Eks. 18:21, 22) Naho miambane rehe, le tsy hametrake tanjogne tsy ho tratse’o satria handrokake azo amy i korsa lay mba hahazoagne fiaignagney zay.

12. Tompon’andraikitse amy ty fanapahan-kevetse raty nirambese ty hafa vao tika? Hazavao.

¹² Magnamelo-tegna noho ty fanapahan-kevetse raty nirambese ty hafa. Tsy afake mandrambe fanapahan-kevetse hoahy ty hafa tika sady tsy afake miaro iareo amy ty voka-draty ty safidy natao’e. Va’e hijanogne tsy hanompo i Jehovah sasa ohatse ty ana-dahi’o ndra ty anak’ampela’o. Va’e hampalahelo o rae aman-dreneo ze fanapahan-keve iareo zay. Faie ze rae aman-drene magnamelo-tegna amy  ty safidy raty natao ty ana’e, le magnavesatse ty tegna’e avao. Tsy tea i Jehovah hinday ze raha magnavesatse zay iareo.​—Rom. 14:12.

13. Ino ty hagnampe o rae aman-dreneo hahavita hiatreke ty safidy raty natao ty ana’e?

¹³ Akore ty hahavita’o magnenga ze raha magnavesatse? Fantaro fa nimea i Jehovah safidy malalake tika iaby. Enga’e hifily ze tea’e hatao ty tsikiraidraike. Agnisa izay tihoe hanompo aze ndra tsy hanompo aze. Ony i Jehovah fa tsy tihoe rae aman-drene voririke rehe, faie tea’e ka rehe naho manao ze fara’e soa vita’o. Ty ana’areo ro tompon’andraikitse amy ty safidi’e fa tsy inareo. (Ohab. 20:11) Faie va’e mbe hinekoneko amy ty hadisoagne natao’o rehe amy ty maha rae aman-drene azo. Naho izay, le ampahafantaro i Jehovah ze raha tsapa’o, le mangataha famelan-keloke ama’e. Oni’e fa tsy afake magneregne ty lasa rehe sady tsy afake magnova ze raha fa niseho. Ony i Jehovah ka fa tsy afake mikalagne ty ana’o tsy hibabe ty voka-draty ty raha nitongise’e rehe. Tadidio fa naho mikezake hiheregne amy i Jehovah ty ana’o, le ho vognogne reke ty handrambe aze indraike.​—Lioka 15:18-20.

14. Nagnino ty fagnamelohan-tegna tsy misy fara’e ro raha magnavesatse mila engantika?

¹⁴ Magnamelo-tegna tsy misy fara’e. Ara-dalàna naho magnamelo-tegna tika naho fa nanota. Faie ty fagnamelohan-tegna tsy misy fara’e le raha magnavesatse tsy ho vitantika ty hinday aze. Agnisa ty raha tsy maintsy engantika zay. Naho itika fa nifogne amy ty fahotantika, nibebake sady mitao mba tsy hagneregne i fahotagney sasa, le afake matoky tika tie fa namela ty helontika ty Jehovah. (Asa. 3:19) Tsy tea i Jehovah hagnamelo-tegna sasa tika naho fa nanao o dingagne rehoe. Fanta’e fa hampijale antika avao ty fagnamelohan-tegna tsy misy fara’e. (Sal. 31:10) Naho lava kivy avao tika, le va’e hijanogne amy i korsa lay mba hahazoagne fiaignagney.​—2 Kor. 2:7.

15. Ino ty hagnampe antika tsy hagnamelo-tegna tsy misy fara’e? (1 Jaona 3:19, 20) (Henteo i sarey.)

¹⁵ Akore ty hahavita’o magnenga ze raha magnavesatse? Naho lava magnamelo-tegna avao  rehe, le izao ro ifantoho: “Tena mamela heloke” ty Andrianagnahare. (Sal. 130:4) Izao ty ampitamae’e i ndaty fa nibebake sady fa nenga’e ty helo’e rey: “Tsy hotsaroeko sasa ty fahota iareo.” (Jer. 31:34) Ty dika izay, fa tsy mametsevetse sasa ty fahotagne fa nenga’e reke. Ko mieretseretse areke tie mbe tsy namela azo ty Jehovah naho ohatse rehe mbe mibabe ty voka-draty ty fahotagne natao’o. Ko magnamelo-tegna naho namoe tombotsoa ila’e amo o fiangonagneo rehe noho ty fahadisoagne natao’o. Fa tsy mametsevetse ty fahota’o sasa ty Jehovah, le hoe izay ka ty toko’e hatao’o.​—Vakio ty 1 Jaona 3:19, 20.

16. Ino ty raha tsy maintsy tadidientika amy ty maha mpanao korsa lay antika?

¹⁶ Amy itika manao i korsa lay mba hahazoagne fiaignagney, le mila anoentika an-tsaigne avao ty ‘hahazoagne i lokay.’ (1 Kor. 9:24) Hahazo i lokay tika, naho takantika ty raha tsy maintsy andesegne naho ty raha tsy maintsy engagne. Nahatrea ohatse tsiampeampe miomba izay tika tamy ty lahatsoratse toy ato. Faie mbe misy raha hafa ka nirehafe i Jesosy. Nirehake reke fa va’e hanjare ‘havesatse noho ty fihinanagne tafahoatse naho ty finoman-toake losotse vaho ty finekonekoagne amy ty fiaignagne ty fontika.’ (Lioka 21:34) Afake magnampe azo hamantatse ze raha mila hahitsy, amy irehe manao korsa lay mba hahazoagne fiaignagney, o andinin-teny reo naho ty andinin-teny hafa.

17. Nagnino tika ro afake matoky fa handrese amy i korsa lay hahazoagne fiaignagneỳ?

¹⁷ Afake matoky tika fa handrese amy i korsa lay hahazoagne fiaignagney satria magnomey ty hery ilaentika ty Jehovah. (Isaia 40:29-31) Ko mitsenetsene areke! Tsikombeo ty apostoly Paoly satria nikezake mafe reke mba hahazo i loka natao taloha’e teoy. (Fil. 3:13, 14) Tsy misy ndaty afake misolo azo amy i korsa laỳ, faie noho ty fagnampea i Jehovah, le afake ty handrese rehe. Afake magnampe azo hinday ty raha mila andesegne naho hagnafake ze raha magnavesatse tsy ilaegne reke. (Sal. 68:19) Noho i Jehovah manohagne azo, le afake ty hahavita hatrake am-para’e i korsay rehe sady hahazo i lokay!