1. Guya khu Vahebheru 12:1, ginani hi yedego gu gira gasi gu vboha mahegiso nya gu tutume gwathu?

 BHIBHILIYA ya gu fananisa womi nya Makristo ni gu tutuma. Vatutumi va na si kodzago gu tutuma kala mahegiso, va na hakha womi nya mba vbeya. (2 Thim. 4:7, 8) Hi yede gu simama gu tutuma, ngudzu-ngudzu olu hi wonago gu khethu hi ngu vboha mahegiso. Mupostoli Pawulo, a si kodzide gu vboha mahegiso nya gu tutume gwaye gasi a si kodza gu mana womi nya mba vbeya, nigu a ganede esi si nga hi phasago gu gira sasimweso. Uye a di hi embeya gasi hi ‘dzudzuga satshavbo si hi lemeyago . . . hi tutuma khu gu timiseya mapalisana hi gomogo ga ayo.’ — Leri Vahebheru 12:1.

2. Malito ma gu khayo “dzudzugani satshavbo si [mi] lemeyago” ma gu tshamuseya ginani?

² Tepo Pawulo a nga lova khuye “dzudzugani satshavbo si [mi] lemeyago,” ina a di vbweta khuye Makristo mamwalo rwalo nyo khaguri ma yedego gu wu rwala? Ahihi. Ganiolu a di vbweta khuye kha hi yeli gu rwala mirwalo yi gu mba vbwetega. Kholu mirwalo yoyo, yi nga hi vbedza tshivba ni gu hi garadzisa. Gasi gu timiseya, ethu hi yede gu vbiredziseya gu tugula mirwalo yi gu mba vbwetega hi bwe hi dzegeya gu yi rula. Ganiolu, yomo yimbe mirwalo hi yedego gu simama gu yi rwala, nigu ha gu tshuka hi rula mirwalo yoyo hi na ba hi ema gu tutuma. (2 Thim. 2:5) Khu yevbini mirwalo yoyo?

3. a) Guya khu Vagalatiya 6:5, ginani hi yedego gu rwala? b) Ginani hi na bhulago khigyo avba nya ndrima yeyi nigu khu ginani?

³ Leri Vagalatiya 6:5. Pawulo ganede khesi hi yedego gu rwala. Uye a di khuye: “Muthu ni muthu a na rwala abune rwalo waye.” Pawulo a di ganeya malito yaya na gu vbweta khuye hatshavbo  hi na ni mithumo hi yedego gu yi gira. Avba nya ndrima yeyi, hi na wona esi si pategago avbo nya gu ‘rwale habune’ ni edzi hi nga girago khidzo isoso. Hi na bwe hi wona gambe yimbe mirwalo hi gu mba yela gu yi rwala ni edzi hi yedego gu yi rula khidzo. Gu rwala rwalo wathu ni gu rula rwalo wu gu mba vbwetega, si na hi phasa gu tutuma kala hi mana womi nya gupindruge.

4. Khu ginani si gu mba garadza gu tadzisa gitumbiso hi giredego nya gu thumeye Jehovha kala gupindruga? (Wona fotu.)

⁴ Gitumbiso hi giredego Jehovha nya gu mu thumeye kala gupindruga. Tepo hi nga dzi hendzeledza ga Jehovha hi di mu tumbisa gu khethu hi na mu khozeya hi bwe hi gira gugola gwaye kala gupindruga. Hi yede gu tadzisa gitumbiso gyathu. Gu gira satshavbo esi hi tumbisidego Jehovha i rwalo nya lisima ngudzu, ganiolu kha wu lemeyi kholu Jehovha a hi giride ni gudogoreya nya gu gire gugola gwaye. (Gutu. 4:11) A hi giride ni gudoreya nya gu muti ni gu mu khozeya a bwe a hi gira khu mufananiso waye. Kha nga handro wakone, hi ngu si kodza gu hidzimeya vbafuvbi gwaye nigu hi ngu tsaka khu gu gira gugola gwaye. (Ndzi. 40:8) Nigu gambe, tepo hi girago gugola ga Nungungulu hi bwe hi  landreya gyanana gyaye hi na “mana guhefemula.” — Mat. 11:28-30.

5. Ginani gi nga gu phasago gu tadzisa gitumbiso u nga gireya Jehovha? (1 Johane 5:3)

⁵ U nga rwala kharini pingo wago mwendro rwalo? Gu na ni silo sivili si nga hi phasago. Nyo pheye, gu simama gu tiyisa lihaladzo lago khu Jehovha. U nga gira isoso khu gu dundruga satshavbo silo nya sadi esi Jehovha a gu giredego ni gu dundrugeya khesi a na gu gireyago mindru watshigu. Tepo lihaladzo lago khu Nungungulu li engedzeyago, si na gu vbevbugeya gu mu engisa. (Leri 1 Johane 5:3.) Nya wuvili, pimedzeya Jesu. Uye a si kodzide gu gira esi Nungungulu a nga ba a si vbweta, kholu a di gombeya ga Jehovha a mu lomba giphaso a bwe a dundrugeya khu tshatshazelo a nga hadzi gu wu mana. (Hebh. 5:7; 12:2) Gufana ni Jesu, gombeya ga Jehovha u bwe u mu lomba gasi a gu phasa gu tiyisa gutumba u gu nago khu womi nya gupindruge. Tepo lihaladzo lago khu Nungungulu li dandrago u bwe u pimedzeya Jesu, u na si kodza gu tadzisa esi u tumbisidego Jehovha.

6. Khu ginani hi yedego gu ninga lisima esi hi yedego gu gira ndrangani? (Wona fotu.)

⁶ Esi hi yedego gu gira ndrangani. Avba nya gu tutume gwathu gasi gu mana womi, hi yede gu haladza ngudzu Jehovha ni Jesu guvbindra edzi hi haladzago khidzo valongo vathu. (Mat. 10:37) Ganiolu, isoso kha si thuli gu khiso kha hi yeli gu ninga lisima ndranga yathu. Khu kharato, gasi gu tsakisa Jehovha ni Jesu hi yede gu tadzisa sipandre sathu ndrangani. (1 Thim. 5:4, 8) Tepo hi girago isoso, hi na tsaka ngudzu. Nigu gambe, Jehovha a ngu dziti khuye gasi mwama ni ngadzi va mana gutsaka va yede gu haladzana ni gu ningana githawo. Vavelegi va yede gu haladza ni gu hevbudza sanana sawe, nigu sanana si yede gu engisa vavelegi vaso. — Efes. 5:33; 6:1, 4.

7. U nga tadzisa kharini esi Jehovha a vireyago gu khuye u gira ndrangani?

⁷ U nga rwala kharini pingo wago mwendro rwalo? Gani u mwama, mwangadzi mwendro gyanana, nya lisima ngudzu khu gu mwatshavbo mu yede gu engisa wusingalagadzi nya Bhibhiliya. U nga gire basi esi u pimisago khuwe si lulamide mwendro gu gira esi si girwago omu u vbanyago umo, ambari kamu gu gira esi vathu va hevbudego ngudzu va ganeyago gu khavo hi yede gu gira. (Mav. 24:3, 4) Thumisa wusingalagadzi hi wu manago umo nya mabhuku yathu ma seketedwago umo nya Bhibhiliya, kholu ayo ma na hi phasa gu thumisa matshina nya Milayo nya Bhibhiliya. Khu giyeyedzo, ndrima yi gu khiyo “Ajuda para a Família” yi na ni wusingalagadzi wu nga phasago mipatwa, vavelegi ni vaphya gu emisana ni sigaradzo va tshanganago naso. b Dzi emiseyi gu thumisa esi Bhibhiliya yi ganeyago, ambari valongo vago va gu tshuka va bomba gu gira isoso. Tepo u girago isoso, ndranga yago yi na phasega nigu uwe u na tsakiswa khu makategwa u na ningwago khu Jehovha.— 1 Ped. 3:1, 2.

8. Esi hi hungago si na hi kuha kharini?

⁸ Rwalo yi gu nawo nya gu hunge makungo yathu. Jehovha a hi ningide gutshulega nya gu dzi hungeyi habune makungo, nigu a gu vbweta gu khuye hi tsaka khu makungo hi hungago. Ganiolu, ha gu hunga makungo nya mba yadi, Jehovha kha na nga hi vhikeya ga wuyelo nya mba wadi hi na wu manago. (Gal. 6:7, 8) Khu kharato, hi yede gu dzumeya ni gevbini gigaradzo hi na gi manago khu gu ba hi hungide makungo nya mba yadi, gu ganeya mwendro gu gira silo nya mba sadi. Guya khesi hi giridego adzina saye, hi nga dzipwa nandru. Ganiolu, guti gu khethu hi yede gu dzumeya mihandro nya makungo  hi hungidego, si na hi kutsa gu ganeya gighoho hi giredego, hi zama gu gi lulamisa hi bwe hi potsa gu gira gihoso gya gimwegyo. Gu gira silo sesi, si na hi phasa gu tutuma gasi hi mana womi nya mba vbeya.

9. Ginani u nga girago wa gu ba u hungide makungo nya mba yadi? (Wona fotu.)

⁹ U nga rwala kharini pingo wago mwendro rwalo? Wa gu ba u hungide makungo nya mba yadi u bwe u dzi laya, ginani u yedego gu gira? Dundruga gu khuwe kha wu na nga si kodza gu vbindrugedza esi si vbindridego. U nga vbedzi tepo ni tshivba yago na wu zama gu dzi emeleya mwendro gu ninga nandru vambe. Wulangani nya isoso, dzumeya gu khuwe u ghohide u bwe u gira satshavbo u si kodzago gasi gu tshukwadzisa, ga giemo u gomogo ga igyo. Wa gu ba u dzipwa nandru khu gighoho u giredego, dzi nogise, u gombeya ga Jehovha, u dzumeya gu khuwe u ghohide u bwe u lomba gu divaledwa khuye. (Ndzi. 25:11; 51:3, 4) Lomba divalelo ga vale u va ghohedego, nigu so vbwetega vbwetedzeya giphaso gya madhota. (Jak. 5:14, 15) Hevbula khu sihoso sago u bwe u gira satshavbo u si kodzago gasi u si giri gambe. Wa gu gira isoso, u nga tiyisega gu khuwe Jehovha a na gu yeyedza wuhindzi a bwe a gu ninga giphaso u gi vbwetago. — Ndzi. 103:8-13.

10. Khu ginani hi ganeyago gu khethu i rwalo nyo lemeye gupimisa gu khethu kha hi giri nya singi? (Vagalatiya 6:4)

¹⁰ Gupimisa gu khethu kha hi giri nya singi. Hi nga vbeya tshivba ha gu dzi fananisa ni vambe. (Leri Vagalatiya 6:4.) Ha gu dzi fananisa ni vambe tepo yatshavbo, hi na khala vathu nya lidiwe, hi bwe hi manega ni liphuvbo nya mapalisana. (Gal. 5:26) Ho khaleya gu zama gu gira esi si girwago khu vambe, ganiolu na hi mwalo makodzelo nyo gire isoso, hi na hegisa khu gu dzi bayisa. Ambari ‘muthu a gu mba mana igyo a gi dilelago, a vbisegago monyo,’ nga dundrugeya edzi si vbedzanago khidzo tshivba gu vireya gilo hi dzitigo gu khethu gima kha hi na nga gi mana! (Mav. 13:12) Ha gu gira isoso, hi na vbeya tshivba hi bwe hi ema gu tutuma gasi hi mana womi nya mba vbeya. — Mav. 24:10.

11. Ginani gi na gu phasago gu potsa gu pimisa gu gira silo u na si tandrago gu gira?

¹¹ U nga rula kharini rwalo wowu? U nga vireyi nya singi gwago, guvbindra esi Jehovha a si vireyago gwago. Kholu uye kha vireyi esi si gu mwalo tshivbani gwago. (2 Kor. 8:12) Tiyisega gu khuwe Jehovha kha fananise esi u girago ni esi vambe va girago. (Mat. 25:20-23) Uye a ngu ninga lisima thumo uwe u girago, gukhodwa gwago ni gu timiseya gwago. Khu gu dzi nogisa, dzumeya gu khuwe khandri satshavbo u na si kodzago gu gira khu kotani nya tanga yago, mawugelo yago mwendro giemo u gomogo ga igyo. Gu fana ni Bharizilayi, u nga dzumeyi thumo u na wu tandrago gu gira, khu kotani nya tanga yago mwendro wo ba uri ni madwali nyo khaguri. (2 Sam. 19:35, 36) Gufana ni Mosi, phasa ni gu ninga mithumo vambe gasi va yi gira. (Ekiso. 18:21, 22) Wa gu dzi nogisa, kha wu na nga vireya gu gira silo si na gu garadzisago ndrani nya gu tutume gwago gasi u mana womi nya gupindruge.

12. Ina hi yede gudzipwa nandru kho makungo nya mba yadi ma hungidwego khu vambe? Tshamuseya.

¹² Gudzipwa nandru khu kotani nya makungo nya mba yadi ma hungidwego khu vambe. Ethu kha hi yeli gu hungeya makungo vambe mwendro gu va vbulugisa ga mihandro nya mba yadi va vbwerago khu kotani nya makungo va hungidego. Khu giyeyedzo, gyanana gi nga tshuka gi hunga gu ema gu thumeya Jehovha. Makungo yaya, ma nga vbisisa monyo vavelegi vakone. Vavelegi va gu dzipwa nandru khu makungo ma hungidwego khu gyanana gyawe, va na ba va rwala rwalo va gu mba yela gu wu rwala. Nigu  uwowo, khandri rwalo oyu Jehovha a vbwetago gu khuye va wu rwala. — Rom. 14:12.

13. Vavelegi va nga emisana kharini ni makungo nya mba yadi ma hungwago khu sanana sawe?

¹³ U nga rula kharini rwalo wowu? Dundruga gu khuwe Jehovha a hi ningide gutshulega nya gu dzi hatheyi esi hi si vbwetago. Uye ningide lithomo moyo ni moyo wathu gasi gu dzi hungeya makungo. Isoso sa gu pata gu mu thumeya mwendro ne. Jehovha a ngu dziti gu khuye u muvelegi nya mba vbeleya, ganiolu o vbweta gu khuye u gira satshavbo u si kodzago. Yatshavbo makungo gyanana gyago gi hungago, i rwalo wagyo nasiri wago. (Mav. 20:11) Adzina saye u nga khala khu gu pimisa khu sihoso u giredego kha nga muvelegi. Wa gu ba u dzipwa kharato, embeya Jehovha edzi u dzipwago khidzo u bwe u mu lomba a gu divaleya. Uye a ngu dziti gu khuye kha si kodzegi gu u bweleya hwane u ya lulamisa gihoso u giridego. Jehovha kha vireyi gu khuye u vhikeya gyanana gyago ga mihandro gi yi manidego khu sihoso gi giridego. Gyanana gyago gya gu dzi garadza gu wuya ga Jehovha, dundruga gu khuwe, uye a na ma a dzi emisede gu gi hakha. — Luka 15:18-20.

14. Gudzipwa nandru tepo yatshavbo, khu ginani wu gu rwalo hi yedego gu wu rula?

¹⁴ Gudzipwa nandru tepo yatshavbo. Tepo hi ghohago si olovelegide gu dzipwa nandru. Ganiolu, Jehovha kha vbweti gu khuye hi simama gu dzipwa khu ndziya yeyi. Owu i rwalo hi yedego gu wu rula. Hi nga dziti kharini gu khethu ha gu dzipwa ngudzu nandru? Ha gu ganeya gighoho hi giridego, hi dzi laya hi bwe hi gira satshavbo hi si kodzago gasi hi si giri gihoso gyagimwegyo, hi nga tiyisega gu khethu Jehovha a hi divalede. (Mith. 3:19) Hwane nya gu ba hi giride satshavbo hi si kodzago, Jehovha kha vbweti gu khuye hi simama gu dzipwa nandru. Uye a ngu dziti gu khuye ha gu simama gu dzipwa nandru, hi na vbeya tshivba. (Ndzi. 31:10) Nigu ha gu vbeya tshivba, hi na ema gu tutuma gasi hi mana womi nya mba vbeya. — 2 Kor. 2:7.

15. Ginani gi nga gu phasago wa gu ba u dzipwa nandru tepo yatshavbo? (1 Johane 3:19, 20) (Wona fotu.)

¹⁵ U nga rula kharini rwalo wowu? Wa gu ba u  simama gudzipwa nandru, vega gupima avba nya “divalelo nya lisine” wa Nungungulu. (Ndzi. 130:4, NM.) Ga vale va dzi layidego khu lisine, uye a gu tumbisa gu khuye: “Gima kha nyi na nga dundruga gighoho gyawe.” (Jer. 31:34, NM.) Isoso so thula gu khiso, Jehovha gima kha na nga dundruga gighoho a gu divaledego gale. Khu kharato, wa gu tshangana ni sigaradzo nyo khaguri si vangidwego khu sihoso u giridego gale, u nga pimisi gu khuwe Jehovha kha gu divaleya. Nigu u nga dzipwi nandru abari gu sighoho u giridego gale si gu giride u luza malungelo nyo khaguri libandlani. Jehovha kha khaleyi gu pimisa khu sighoho u giridego gale, nigu uwe u yede gu mu pimedzeya. — Leri 1 Johane 3:19, 20.

16. Kha nga vatutumi ginani hi yedego gu gi pwisisa?

¹⁶ Kha nga olu hi tutumago gasi gu mana womi nya mba vbeya, ethu hi yede ‘gu tutuma gasi hi hakha gihiwa.’ (1 Kor. 9:24) Ethu hi na si kodza gu gira isoso, ha gu pwisisa gu hambana gu gomogo avba nya mirwalo hi yedego gu rwala ni eyi hi yedego gu yi rula. Avba nya ndrima yeyi, hi bhude khu silo hi yedego gu rwala ni esi hi yedego gu rula. Ganiolu, somo simbe hi si khumbugidego. Jesu a di khuye: “Dzi woneyeni gasi gu myonyo yanu yi si pfhali khu gu hodza ngudzu ni gu seya ngudzu ni gugaradzega khu silo nya guvbanye.” (Luka 21:34) Lowo wowu ni yimbe milowo, yi nga gu phasa gu wona omu u yedego gu tshukwadzisa gasi u simama gu tutuma u bwe u dinganedwa khu gu mana womi nya mba vbeya.

17. Khu ginani hi yedego gu tiyisega gu khethu si ngu kodzega gu tutuma kala mahegiso?

¹⁷ Hi nga tiyisega gu khethu, hi na si kodza gu tutuma gasi hi mana womi nya mba vbeya, kholu Jehovha a na hi ninga tshivba hi yi vbwetago. (Isa. 40:29-31) Khu kharato, kha hi yeli gu vbeya tshivba. Pimedzeya giyeyedzo gya mupostoli Pawulo, a nga gira satshavbo a nga si kodza gasi gu mana gihiwa. (Filp. 3:13, 14) Mwalo a na gu tutumeyago, ganiolu khu gu phaswa khu Jehova u na si kodza. Jehovha a na gu phasa gu rwala mirwalo yi vbwetegago ni gu rula mirwalo yi na gu garadzisago. (Ndzi. 68:19) Khu gu phaswa khu Jehovha, u na si kodza gu tutuma kala mahegiso, u mana womi nya mba vbeya.