1. Kusigikirra ha Abaheburaniya 12:1, kiki ekitusemeriire kukora kusobora kuhika ha kumalirra kw’akaliitango k’obwomeezi?

 BAIBULI erengesaniza obwomeezi bwaitu nk’Abakristaayo, n’okwiruka akaliitango. Abairuki boona abahika ha kumalirra nibaija kutunga ekisembo ky’obwomeezi obutahwaho. (2 Tim. 4:7, 8) Nitwetaaga kwiruka n’amaani gaitu goona kukira muno nk’oku tuli haihi kuhika ha kumalirra. Omukwenda Paulo ayasoboire kwiruka akaliitango ak’obwomeezi kandi yahika ha businguzi akatugambira ebiratukonyera kusingura. Akatutererra ngu “tujule ekirukulemera kyona . . . tuiruke nokuguma akaliitango akatutairweho omu maiso.”​—Soma Abaheburaniya 12:1.

2. Nikimanyisa ki ‘kujuura ekirukulemeera kyona’?

² Paulo obuyagambire ngu ‘tujuule ekirukulemeera kyona,’ akaba namanyisa ngu busaho mugugu gwona Omukristaayo ogw’asemeriire kwetweka? Nangwa. Oihireho akaba namanyisa ngu tusemeriire kweyihaho ebintu byona ebirukulemeera ebitarukwetaagisa. Ebirukulemeera binu nibisobora kutulemesa kwiruka kurungi kandi nibituleetera kujwaha. Kusobora kwikara nitwiruka kurungi, tusemeriire kwanguha kumanyirra kandi tweyiheho ekintu kyona ekisobora kutulemeeza. Baitu nabwo, titurukugonza kweyihaho emigugu eitusemeriire kwetweka. Kitali eki, nitusobora kweremesa itwenka nituruga omu kaliitango. (2 Tim. 2:5) Migugu ki eitusemeriire kwetweka?

3. (a) Kusigikirra ha Abagaratiya 6:5, kiki ekitusemeriire kwetweka? (b) Omu kicweka kinu nitwija kubazaaho ki kandi habwaki?

 ³ Soma Abagaratiya 6:5. Paulo akabazaaho ekintu ekitusemeriire kwetweka. Akahandiika ati: “Wena alyetweka omutwarogwe wenka.” Hanu, Paulo akaba namanyisa omutwaro rundi omugugu Ruhanga ogw’arukunihirramu buli omu haliitwe kwetweka, kandi busaho ondi asobora kutwetwekeraho. Omu kicweka kinu, nitwija kubazaaho omugugu gunu ekigurukutwarramu, n’omulingo tusobora kugwetweka. Nitwija n’okubazaaho ebirukulemeera ebitarukwetaagisa ebitusobora kuba tuhimbire n’omulingo tusobora kubinaga. Kuhimba omugugu gwaitu, n’okweyihaho ebirukulemeera ebitarukwetaagisa nikiija kutukonyera kwiruka akaliitango k’obwomeezi kuhikya tusingwire.

4. Habwaki kitagumire kuhikiiriza omurago gwaitu ogw’okuheereza Yahwe? (Rora ekisisani.)

⁴ Omurago gwaitu ogw’okuheereza Yahwe. Obutwayehaireyo hali Yahwe tukamuraganiza kumuramya n’okukora eby’agonza  ebiro n’ebiro. Tusemeriire kulinda omurago ogu. Kuhikiiriza omurago gunu buli kiro, bujunanizibwa bw’amaani, baitu tikigumire. Yahwe akatuhanga nukwo tukole eby’agonza. (Kus. 4:11) Akatuhanga omu kisisani kye kandi yatuteekamu ekyetaago eky’okuhurra nitugonza kumuramya. Nahabweki, nitusobora kumwirra haihi kandi kitusemeza obutukora eby’agonza. (Zab. 40:8) Ekindi, obutukora Ruhanga eby’agonza kandi tukahondera Omwana we, tutunga “okuhumura.”​—Mat. 11:28-30.

5. Kiki ekisobora kukukonyera kuhikiiriza omurago gwawe ogw’okuheereza Yahwe? (1 Yohana 5:3)

⁵ Kiki ekirakukonyera kwetweka omugugu gunu? Ebintu binu bibiri nibisobora kukukonyera. Eky’okubanza, gumizaamu n’ogumya enkoragana yaawe na Yahwe. Kinu n’osobora kukikora kuraba omu kutekerezaaho ebirungi byona Yahwe ebyakukoliire n’emigisa ey’akuraganiize omu kasumi ak’omumaiso. Obworayeyongera kugonza Yahwe nikiija kukwanguhira kumworobera. (Soma 1 Yohana 5:3.) Ekyakabiri, yegera hali Yesu. Yesu akasobora kwikara nakora Ruhanga eby’agonza, habwokuba yasabaga Yahwe kumukonyera kandi akateeka omutima ha mpeera ye. (Baheb. 5:7; 12:2) Nka Yesu, saba Yahwe akuhe amaani kandi oikale n’otekerezaaho okunihira kw’obwomeezi obutahwaho. Kakuba oyeyongera kugonza Ruhanga kandi okahondera ekyokurorraho ky’Omwana we, noija kusobora kuhikiiriza omurago gwawe.

6. Habwaki tusemeriire kuhikiiriza kurungi obujunanizibwa obutwine omu ka? (Rora ekisisani.)

⁶ Obujunanizibwa bwaitu omu ka. Omu kaliitango ak’obwomeezi, okugonza okutwiniire Yahwe na Yesu kusemeriire kukira okugonza okutwiniire abanyabuzaale baitu. (Mat. 10:37) Baitu eki tikirukumanyisa ngu tunagiirize obujunanizibwa bwaitu omu ka, nitwekwasa ngu nibutulemesa kusemeza Yahwe na Kristo. Kusobora kwikara nitusiimwa omu maiso ga Ruhanga na Kristo, tusemeriire kuhikiiriza kurungi obujunanizibwa bwaitu omu ka. (1 Tim. 5:4, 8) Obuturakora eki, nitwija kweyongera kutunga okusemererwa. Yahwe akimanyire ngu eka ebamu okusemererwa, nyineeka na nyinabwenge obubagonzangana kandi bakateekamungana ekitiinisa, abazaire obubagonza abaana baabo kandi bakabatendeka, n’abaana obu boorobera bazaire baabo.​—Bef. 5:33; 6:1, 4.

7. N’osobora ota kuhikiiriza kurungi obujunanizibwa bwawe omu ka?

⁷ Kiki ekirakukonyera kwetweka omugugu gunu? Koobe oli nyineeka, nyinabwenge, rundi omwana, wesige obuhabuzi bwa Baibuli. Otakora ekyorukutekereza ngu nikyo kihikire, rundi abantu abandi ekibarukukora kandi otahondera amagezi gaabo abeyeta abakugu. (Nfu. 24:3, 4) Hondera amagezi agali omu bitabu byaitu na vidiyo. Ebirumu nibisobora kukukonyera kuteeka omu nkora emisingi ya Baibuli. Ekyokurorraho, burocuwa Musobora Kuba n’Amaka Amarungi n’ekitabu Wegondeze omu Bwomeezi Ebiro n’Ebiro! isomo 49 na 50 harumu emisingi esobora kukonyera abali omu buswere, abazaire, n’ensinganto. Cweramu kimu kuteeka omu nkora Baibuli eky’egamba, abandi omu ka n’obubarayanga kukikora. Obworakikora, noija kugasirwa kandi Yahwe naija kukuha emigisa.​—1 Pet. 3:1, 2.

8. Encwamu zaitu nizisobora kutukwataho zita?

⁸ Ebiruga omu ncwamu zaitu. Yahwe atuhaire obugabe bw’okwecweramu, kandi nagonza twegondeze omu birungi ebiruga omu kukora encwamu enungi. Baitu obutukora encwamu ezitahikire, tatanga ebizibu kutuhikaho. (Bag. 6:7, 8) Nahabweki, obutukora encwamu  embi, tukabaza tutabandize kutekereza, rundi tukanguhiriza kukora ekintu hanyuma tukatunga ebizibu, tubigumira. Kusigikirra ha kituba tukozere, omuntu waitu ow’omunda n’asobora kutandika kuturumiiriza. Baitu kukimanya ngu tukozere encwamu etahikire nikisobora kutwekambisa kwatura ekibi kyaitu, nituterekereza ensobi zaitu kandi nitwetantara kuzigarukamu. Kukora ebintu ebi nikisobora kutukonyera kwikara omu kaliitango k’obwomeezi.

9. Kiki ekisobora kukukonyera kugumira enyikara hanyuma y’okukora encwamu embi? (Rora ekisisani.)

⁹ Kiki ekirakukonyera kwetweka omugugu gunu? Obworaaba omazire kukora encwamu embi, ikiriza enyikara nk’oku eri hati. Kimanye ngu tosobora kuhindura ebya kara. Otasiisa obwire bwawe n’amaani n’olengaho kwoleka ngu okaba ohikire rundi kujunana abandi habw’ensobi zaawe. Oihireho, ikiriza ensobi zaawe kandi olengeho kukozesa kurungi enyikara ey’orumu hati. Obworaaba n’oyehurra kubi habw’ekibi ekiwakozere, saba Yahwe n’obwebundaazi, ikiriza ekibi kyawe kandi omusabe akuganyire. (Zab. 25:11; 51:3, 4) Saba ekiganyiro abo ab’osobora kuba wakozere kubi, kandi obukiraaba nikyetaagisa serra obukonyezi kuruga omu bagurusi b’ekitebe. (Yak. 5:14, 15) Yegera ha nsobi zaawe kandi wetantale kuzigarukamu. Kakuba okora ebi, n’osobora kukigumya ngu Yahwe naija kukuganyira kandi akuhe obukonyezi obworukwetaaga.​—Zab. 103:8-13.

10. Habwaki kunihira ebintu ebitutasobora kukora nikisobora kutulemeeza? (Abagaratiya 6:4)

¹⁰ Kunihira ebintu ebitarukusoboka. Kwerengesaniza n’abandi nikisobora kutulemeeza. (Soma Abagaratiya 6:4.) Kakuba twikara nitwerengesaniza n’abandi, nitusobora kugira ihali kandi tutandike kukora n’amaani kubakira. (Bag. 5:26) Habw’okugonza kutunga abandi ebibaine, nitusobora kwehambiriza kukora ebintu ebitutarukusobora kandi eki ky’akabi haliitwe. Baibuli egamba ngu ‘okunihira okurukuikaraho kusununura omutima.’ Nahabweki, kakuba tutandika kunihira ekintu ekitarukusoboka, nikisobora kutumarramu kimu amaani! (Nfu. 13:12) Eki nikisobora kuba nk’ekirukulemeera haliitwe kandi kituleetere kwiruka mpora omu kaliitango k’obwomeezi.​—Nfu. 24:10.

11. Kiki ekisobora kukukonyera kwetantara kunihira ebintu ebitarukusoboka?

¹¹ N’osobora ota kweyihaho ekirukulemeera kinu? Otenihirramu bingi kukira Yahwe ebyarukukwetaagisa. Tarukukukinihirramu kumuha ebyotaine. (2 Kol. 8:12) Kandi okigumye ngu Yahwe talengesaniza ebyorukusobora kukora n’abandi ebibakora. (Mat. 25:20-23) Nasiima muno habw’okwikara oli mwesigwa haluwe, habw’okwikiriza kwawe hamu n’okugumiisiriza kwawe. Ba mwebundaazi okiikirize ngu okukura omu myaka, obuceke n’enyikara ey’orumu hati nibisobora kukulemesa kuheereza Yahwe nk’oku wakugondeze. Nka Bazilai, n’osobora kwanga obujunanizibwa obumu kakuba okirora ngu torukwija kubuhikiiriza kurungi habw’obuceka bw’omubiri. (2 Sam. 19:35, 36) Nka Musa, ikiriza abandi bakukonyere nambere kisemeriire. (Kurug. 18:21, 22) Kumanya obugarukiro bwawe nikiija kukukonyera kuleka kunihira ebitarukusoboka ekisobora kukumaramu amaani omu kaliitango k’obwomeezi.

12. Nojunanizibwa habw’encwamu embi abandi bakora? Soborra.

¹² Kwehurra ngu nojunanizibwa habw’encwamu embi abandi ezibakora. Titusobora kukorra abandi encwamu rundi kutanga ebizibu kubahikaho kakuba bakora encwamu embi.  Ekyokurorraho, omwana n’asobora kucwamu kuleka kuheereza Yahwe. Eki nikisobora kuleetera abazaire obusaasi bw’amaani. Baitu, abazaire abejunana habw’encwamu embi ey’omwana wabo, baba nibetweka ekirukulemeera ekitarukwetaagisa. Yahwe tarukubanihirramu kwetweka obulemeezi bunu.​—Bar. 14:12.

13. Omuzaire n’asobora kukora ki kakuba omwana we akora encwamu embi?

¹³ N’osobora ota kweyihaho ekirukulemeera kinu? Ijuka ngu Yahwe ahaire buli omu obugabe bw’okwecweramu. Aleka buli muntu kwekorra encwamu. Eki nikitwarramu kucwamu kumuheereza rundi kutamuheereza. Yahwe akimanyire ngu iwe nk’omuzaire tohikiriire kandi n’agonza okole eky’orukusobora. Omwana waawe najunanizibwa ha ncwamuze, hatali iwe. (Nfu. 20:11) Baitu nabwo, n’osobora kwikara notekerezaaho ensobi eziwakozere nk’omuzaire. Obukiraaba nukwo kiri, gambira Yahwe omulingo orukwehurra kandi omusabe ekiganyiro. Akimanyire ngu tosobora kuhindura ebyabaireho. Kandi tarukukunihirramu kulinda omwana waawe nukwo atagesa ebiyasigire. Ikara noijuka ngu omwana waawe obwarateekamu amaani kugaruka hali Yahwe, naija kumutangirra n’okusemererwa.​—Luk. 15:18-20.

14. Habwaki kwejunana ekihinguraine kiri kintu ekirukulemeera ekitusemeriire kweyihaho?

¹⁴ Kwejunana ekihinguraine. Obutukora ekibi, kya buli kiro kwehurra kubi. Baitu Yahwe tarukugonza twikale nitwejunana ekihinguraine. N’agonza tweyiheho ekirukulemeera kinu. Tumanya tuta ngu nitwejunana ekihinguraine? Obuturaaba twatwire ekibi kyaitu, twegarukiremu, kandi nituteekamu amaani kutongera kukikora, nitusobora kukigumya ngu Yahwe atuganyiire. (Eng. 3:19) Hanyuma y’okukora ebi, Yahwe tarukugonza twikale nitwehurra kubi. Amanyire omulingo kinu kisobora kuba ky’akabi. (Zab. 31:10) Kakuba twikara nitwejunana  ekihinguraine nikisobora kutumaramu amaani nitumalirra turugire omu kaliitango ak’obwomeezi.​—2 Kol. 2:7.

15. Kiki ekisobora kukukonyera kuleka kwejunana ekihinguraine? (1 Yohana 3:19, 20) (Rora ekisisani.)

¹⁵ N’osobora ota kweyihaho ekirukulemeera kinu? Kakuba otandika kutekerezaaho ekibi ekiwakozere, tekerezaaho ‘okuganyira’ kwa Ruhanga. (Zab. 130:4) Obwaganyira abo abegarukiremu kuruga ha mutima abaraganiza ati: “Nekibi kyabu ndireka okukiijuka.” (Yer. 31:34) Kinu nikimanyisa ngu Yahwe tarukwija kwikara nakujunana habw’ebibi ebiwakozere kara. Nahabweki kakuba otunga ebizibu habw’ebibi ebiwakozere, otatekereza ngu Yahwe atakuganyire. Kandi otejunana kakuba ensobi eziwakozere kara zikulemesa kuheereza Yahwe nk’oku wakugondeze. Yahwe taikara natekerezaaho ebibi byawe kandi naiwe tosemeriire kwikara n’obitekerezaaho.​—Soma 1 Yohana 3:19, 20.

16. Nk’abairuki, kiki ekitusemeriire kumanya?

¹⁶ Nk’abairuki abali omu kaliitango ak’obwomeezi, twine ‘kwiruka nukwo tuhabwe empeera.’ (1 Kol. 9:24) Kinu nitusobora kukikora kakuba tumanya embaganiza eri hagati y’emigugu eitusemeriire kwetweka n’ebirukulemeera ebitusemeriire kweyihaho. Omu kicweka kinu, twabazaaho bimu ha bintu ebitusemeriire kwetweka n’ebitusemeriire kunaga. Baitu haroho n’ebindi. Yesu akagamba ngu nitusobora ‘kulemeererwa obwokukoija, n’okutamiira amaarwa, n’okutabaana okw’obwomeezi bunu.’ (Luk. 21:34) Ebyahandiikirwe binu n’ebindi nibisobora kukukonyera kumanya empindahinduka ez’osemeriire kukora nukwo oikale omu kaliitango ak’obwomeezi.

17. Habwaki nitukigumya ngu nitwija kusingura akaliitango ak’obwomeezi?

¹⁷ Nitukigumya ngu nitwija kusingura akaliitango ak’obwomeezi habwokuba Yahwe naija kutuha amaani agaturukwetaaga. (Is. 40:29-31) Nahabweki, ikara noiruka! Yegera ha mukwenda Paulo ayatairemu amaani ge goona nukwo asobole kuhabwa empeera. (Baf. 3:13, 14) Busaho muntu arakwirukiraho akaliitango kanu baitu habw’obukonyezi bwa Yahwe noija kusingura. Yahwe n’asobora kukukonyera kwetweka emigugu yaawe n’okweyihaho ebirukulemeera ebitarukwetaagisa. (Zab. 68:19) Naija kukukonyera kugumiisiriza omu kwiruka akaliitango ak’obwomeezi kandi ohike ha businguzi!