1. Ndomo ca tangiwa ku va Heveru 12:1, nye tu sukila oku linga oco tu malusule olupesi luoku yolokela omuenyo?

 EMBIMBILIYA li sokisa omuenyo Wakristão loku yoloka. Vana va yoloka toke kesulilo va ka tambula omuenyo ko pui. (2 Tim. 4:7, 8) Kuenje tu sukila oku likolisilako oco tu amameko oku yoloka, ca piãla enene omo tu panda kesulilo. Upostolo Paulu, wa tẽla oku mala oku yolokela omuenyo kuenda wa tukula eci ci pondola oku tu kuatisavo oku ci linga. Paulu wa popia hati: “Tu liupivo ocilemo cosi . . . kuenda tu lupuki lepandi oku lupuka kua tu kapiwila.”—Tanga Va Heveru 12:1.

2. Nye ci lomboloka oku liupa “ovilemo viosi”?

² Eci Paulu a popia okuti ‘tu liupi ocilemo cosi,’ anga hẽ eye wa kala oku popia okuti Ukristão ka citava oku ambata ocilemo lacimue? Sio, hacoko. Pole, eye o tu vetiya oco tu liupi ocilemo cosi ka ci sukiliwa. Ocilemo caco ci pondola oku tu kokela esumuo kuenda ekavo. Omo liaco, nda tu yongola oku amamako oku pandikisa, tu sukila oku kũlĩhĩsa nda tu kasi oku ambata ovilemo ka vi kuete esilivilo kuenda oku vi liupa lonjanga. Pole, kuli ovilemo vikuavo ale ovikele tu sukila oku ambata. Ci sukila oku ci linga, momo nda ka tua ci lingile ci kasi ndoku lembua olupesi. (2 Tim. 2:5) Oco hẽ ovilemo viaco nye?

3. (a) Ndomo ca lekisiwa ku va Galatia 6:5, nye tu sukila oku ambata? (b) Nye tu konomuisa vocipama cilo kuenda momo lie?

 ³ Tanga Va Galatia 6:5. Paulu wa lombolola eci catiamẽla kocina tu sukila oku ambata. Eye hati: “Omunu lomunu o kambata ocitele caye muẽle.” Paulu wa yonguile oku popia okuti vosi yetu tu kuete ovikele vimue Yehova a lavoka kokuetu okuti tu vi tẽlisa. Vocipama cilo, tu konomuisa eci ca kongela voku ‘ambata ocitele’ cetu kuenda ndomo tu ci linga. Tu konomuisavo ovilemo vimue ka vi sukiliwa okuti, tua vi yenjeka lonjila yimue ka yi limbukiwa kuenda oku lilongisa ndomo tu vi liupa. Oku ambata ovitele vietu muẽle kuenda oku liupa ovilemo ka vi sukiliwa, ci tu kuatisa oku amamako oku yoloka kuenda oku tẽlisa olupesi luoku yolokela omuenyo.

4. Nye ci tu kuatisa oku tẽlisa elitumbiko lietu? (Talavo ociluvialuvia.)

⁴ Ohuminyo yelitumbiko lietu. Eci tua litumbika ku Yehova, tua likuminya oku u fendela kuenda oku linga ocipango caye otembo ka yi pui. Tu sukila oku tẽlisa ohuminyo yaco.  Oku tẽlisa ovina viosi tua likuminya ku Yehova ocikele cimue cinene, pole, hacilemoko. Momo, Yehova wa tu lulika oco tu linge ocipango caye. (Esit. 4:11) Eye wa tu lulika lonjongole yoku u kũlĩha, oku u fendela kuenda wa tu lulikavo lesetahãlo liaye. Eli olio esunga lieci tu tẽlela oku amẽla ku Yehova kuenda oku linga ocipango caye. (Osa. 40:8) Handi vali, eci tu linga ocipango ca Suku loku pokola komõlaye, tu “sanga ekavuluko.”—Mat. 11:28-30.

5. Nye ci pondola oku ku kuatisa oku tẽlisa elitumbiko liove (1 Yoano 5:3)

⁵ O tẽlisa ndati ocikele cove? Kuli ovina vivali vi pondola oku tu kuatisa. Catete, ove o sukila oku amamako oku pamisa ocisola o kuetele Yehova. O pondola oku ci linga poku sokolola kovina viosi viwa eye a ku lingila ale kuenda kasumũlũho a ka ku ĩha kovaso yoloneke. Osimbu ocisola cove ku Suku ci livokiya, ci ka leluka oku pokola kokuaye. (Tanga 1 Yoano 5:3.) Cavali, setukula Yesu. Eye wa litunda ciwa koku linga ocipango ca Yehova omo a enda oku likutilila oku pinga ekuatiso kuenda oku sokolola konima a kala oku lavoka. (Va Hev. 5:7; 12:2) Ndeci Yesu a linga, likutilila ku Yehova oku pinga ongusu kuenda amamako oku tiamisila utima kelavoko liomuenyo ko pui. Oku vokiya ocisola cove ku Yehova loku setukula Yesu, o ka tẽla oku tẽlisa elitumbiko liove ku Yehova.

6. Momo lie tu sukilila oku kapako ovikele vietu vepata? (Talavo ociluvialuvia.)

⁶ Ovikele vietu vepata. Voku yolokela omuenyo, mua kongela oku sola vali calua Yehova kuenda Yesu okuti epata lietu ci sule. (Mat. 10:37) Pole, eci ka ci lomboloka okuti tu likala ovikele vietu viepata. Momo nda tu yongola oku sanjuisa Yehova la Yesu, tu sukila oku tẽlisa ovikele vietu vepata. (1 Tim. 5:4, 8) Nda tua ci linga tu ka kuata esanju lialua. Yehova wa kũlĩha okuti apata a pondola lika oku kuata esanju, nda ulume lukãi waye va li tata locisola kuenda lesumbilo, nda olonjali vi sole omãla vavo loku va longa kuenda eci omãla va pokola kolonjali.—Va Efe. 5:33; 6:1, 4.

7. O tẽlisa ndati ocikele cove vepata?

⁷ O tẽlisa ndati ocikele cove? Ocikele cosi o kuete vepata ci kaile okuti vuhueli, kuenda wumõla, kolela kalungulo olondunge a sangiwa Vembimbiliya. Ku ka linge ño ovina ndomo ove o sima, ale ndomo ca siata pocitumãlo o kasi. Ku ka seteke oku kuama olonumbi via vana va litenda okuti va loñoloha kukũlĩhĩso. (Olosap. 24:3, 4) Kuama olonumbi vi sangiwa valivulu etu. Valivulu aco, mu sangiwa olonumbi ndomo tu kapako alongiso Embimbiliya. Ndeci, ponepa yovipama losapi hati: “Ekuatiso Kepata” pa sangiwa ovolandu atiamẽla kovitangi olohueli, olonjali kuenda amalẽhe va siata oku liyaka lavio koloneke vilo. b Likolisilako oku kapako eci Embimbiliya li popia, ndaño okuti vakuene vepata ka va yongola oku ci linga. Nda wa ci linga, epata liove li ka kuatisiwa kuenda o ka sumũlũisiwa la Yehova.—1 Pet. 3:1, 2.

8. Onima yipi yi tunda konjila tu nõla? (Talavo ociluvialuvia.)

⁸ Onima yi tunda konjila tu nõla. Yehova wa tu ĩha elianjo lioku li nõlela eci tu yongola oku linga kuenda o yongola okuti tu nõla olonjila via sunguluka vina vi tu nenela esanju. Pole, nda tua nõla onjila ka ya sungulukile,  Yehova ka ka tu teyuila kovitangi vi yililako. (Va Gal. 6:7, 8) Omo liaco, tu sukila oku tava ovitangi vi yilila konjila yimue ka ya sungulukile tua nõla, ci kale kolondaka tu popia, ale kovilinga vietu. Kovina viosi evi, owanji wutima wetu u pondola oku tu vetela evelo. Pole, oku kũlĩha okuti tu sukila oku tava onima yi tunda konjila tua nõla, ci tu vetiya oku likekembela akandu etu, oku siapo ovina tua linga kuenda oku yuvula oku pitulula elinga liaco lĩvi. Oku ci linga ci tu kuatisa oku amamako oku yolokela omuenyo.

9. Nye ci pondola oku ku kuatisa nda wa nõla onjila yimue ka ya sungulukile?

⁹ O tẽlisa ndati ocikele cove? Nda okuti wa nõla onjila yimue ka ya sungulukile kuenje wa likekembela, nye o sukila oku linga? Kũlĩha okuti ove ku tẽla oku pongolola eci ca pita. Ku ka pesele otembo yove, ale ongusu poku seteka oku lisandela esunga omo lionjila wa nõla, ale oku vetela evelo vakuene omo lielinga liove lĩvi. Pole, limbuka okuti wa lueya kuenda likolisilako oku linga eci o tẽla vekalo liove liokaliye. Nda wa limbuka okuti o kuete eko lieci wa linga, lekisa umbombe loku likutilila ku Yehova poku u situluila elinga liove lĩvi kuenda oku u pinga oco a ku ecele. (Osa. 25:11; 51:3, 4) Pinga ongecelo ku vana ove wa lueyela, kuenda nda citava sanda ekuatiso liakulu vekongelo. (Tia. 5:14, 15) Lilongisila kakulueya ove kuenda likolisilako okuti ku ci pitulula vali. Nda wa ci linga, kolela okuti Yehova o ka lekisa ohenda kokuove kuenda oku eca ekuatiso o sukila.—Osa. 103:8-13.

10. Momo lie okuti ocilemo cimue cinene oku sima okuti tu sukila oku linga vali calua? (Va Galatia 6:4)

¹⁰ Oku sima okuti tu sukila oku linga vali calua. Tu pondola oku sumua calua eci tu li sokisa la vakuetu. (Tanga Va Galatia 6:4.) Nda olonjanja viosi tu li sokisa la vakuetu, tu ka va kuatela onya kuenda ocipululu. (Va Gal. 5:26) Nda tu seteka oku linga eci vakuetu va linga, osimbu okuti ka tu kuete epondolo liaco, tu li talisa etu muẽle ohali. Momo nda “elavoko ka lia tẽlisiwile, li koka evalo vutima,” sokolola ndomo ci sumuisa oku kuata elavoko limue okuti lalimue eteke tu ka li tẽlisa! (Olosap. 13:12) Nda tu ci linga tu pondola oku sumua calua, loku liwekapo oku yolokela omuenyo.—Olosap. 24:10.

11. Nye o sukila oku linga oco o yuvule elavoko ka li tẽlisiwa?

¹¹ O liupa ndati ocilemo caco? Ku ka lavoke oku linga eci Yehova ka kisika kokuove. Eye lalimue eteke a lavoka kokuove eci ku tẽla. (2 Va Kor. 8:12) Kolela okuti Yehova ka sokisa eci ove o linga leci vakuene va linga. (Mat. 25:20-23) Yehova wa velisapo calua upange ove o linga lutima wosi, ekolelo liove kuenda epandi liove. Lekisa esunguluko kuenda limbuka okuti ku pondola oku linga cosi wa yonguile omo lioku kuka, uhayele, ale ekalo o sangiwa cilo. Ndeci ca linga Barisilai, likala ocikele cimue, nda kokuove ka ca lelukile oku ci tẽlisa omo liuhayele wove, ale omo lioku kuka. (2 Sam. 19:35, 36) Kuenje ndeci ca linga Mose, pinga ekuatiso ale eca ocikele caco ku vakuene nda citava. (Etu. 18:21, 22) Esunguluko li ka ku kuatisa oku yuvula oku kuata elavoko ka li tẽlisiwa kuenda oku yuvula ekavo poku yolokela omuenyo.

12. Anga hẽ tu sukila oku li kapa eko omo lionjila yĩvi vakuetu va nõlapo? Ci lombolola.

¹² Oku li kapa eko omo lionjila yĩvi vakuetu va nõla. Ka tu pondola oku nõlelako vakuetu onjila yimue va yongola oku kuama, ndaño muẽle oku va teyuila kovitangi vi tunda konjila va nõla. Ndeci, pamue omõla umue o nõlapo oku liwekapo oku vumba Yehova. Onjila  yaco yi pondola oku koka evalo lialua kolonjali. Pole, nda ovo va livetela evelo omo lionjila omõla a nõlapo, ci ka kala ocilemo cinene kokuavo. Kuenje eci hacoko ocilemo Yehova a yongola okuti olonjali vi cambata.—Va Rom. 14:12.

13. Ocituwa cipi olonjali vi sukila oku lekisa omo lionjila yivi omãla va nõlapo?

¹³ O liupa ndati ocilemo caco? Ivaluka okuti Yehova wa tu ĩha elianjo lioku linõlela eci tu yongola oku linga. Eye ecelela okuti omunu lomunu o nõla onjila yaye. Omu mua kongela nda u vumba, ale sio. Yehova wa kũlĩha okuti nda ove u isia ale u ina, kua lipuile. Eye o yongola okuti ove o linga eci o tẽla. Onjila yosi omõlove a nõla, ocikele caco caye, hacoveko. (Olosap. 20:11) Ndaño ndoco, pamue ene vu lonjali vu sokolola konepa yipi ene wa lueyi. Kuenje likutilili ku Yehova oku u sapuila ndomo ene vu liyevite kuenda pingi ongecelo yaye. Yehova wa kũlĩha okuti ku pondola oku pongolola ovina via pita, loku vi linga lonjila ya litepa. Handi vali, Yehova ka lavoka okuti ove wunjali o seteka oku teyuila omõlove kovitangi vi tunda kakulueya aye. Nda omõlove wa likolisilako oco a tiuke ku Yehova, ivaluka okuti Yehova o ko tambula locisola calua.—Luka 15:18-20.

14. Momo lie oku livetela evelo otembo yosi ocilemo cimue tu sukila oku siapo?

¹⁴ Oku livetela evelo otembo yosi. Eci tu lueya ca siata calua oku livetela evelo. Pole, Yehova ka yongola okuti tuamamako oku li yeva ndoco. Eci, ocilemo cimue tu sukila oku siapo. Oco hẽ tu limbuka ndati nda ovisimĩlo vietu vioku livetela evelo vialua? Nda tua litavela akandu etu, tua likekembela kuenda oku likolisilako oco ka tu ka pitulule elinga limuamue, tu pondola oku kolela okuti Yehova o tu ecela. (Ovil. 3:19) Noke lioku linga ovina evi, Yehova ka yongola okuti tuamamako oku livetela evelo. Eye wa kũlĩha okuti, ovisimĩlo viaco vi pondola oku tu panga lãvi. (Osa. 31:10) Nda tua li yukisa lesumuo lialua, tu ka  liwekapo oku yolokela omuenyo.—2 Va Kor. 2:7.

15. Nye ci pondola oku ku kuatisa oku yuvula oku livetela evelo? (1 Yoano 3:19, 20) (Talavo ociluvialuvia.)

¹⁵ O liupa ndati ocilemo caco? Nda o kasi oku amamako oku livetela evelo, tiamisila utima ‘kongecelo yocili’ ya Yehova. (Osa. 130:4) Yehova o sapuila ku vana va likekembela ocili okuti: “Si ka ivaluka vali ekandu liavo.” (Yer. 31:34) Eci ci lomboloka okuti Yehova ka ka sokolola vali catiamẽla kakandu eye a ecela ale. Omo liaco, nda wa lipita locitangi cimue omo lioku lueya kuove, ku ka sime okuti Yehova ka ecelele akulueya aco. Ku ka livetele evelo nda okuti akulueya osimbu, a ku pumbisa ovikele vekongelo. Yehova ka kamamako oku sokolola kakulueya ove kuenda ove ku sukilavo oku ci linga.—Tanga 1 Yoano 3:19, 20.

16. Omo okuti tu kasi oku yolokela omuenyo nye tu sukila oku linga?

¹⁶ Omo okuti tu kasi oku yolokela omuenyo, tu sukila oku ‘yoloka okuti tu tambulavo onima.’ (1 Va Kor. 9:24) Tu ka tẽla oku ci linga, nda tua kuata elomboloko li kasi pokati kovilemo tu sukila oku ambata kuenda ovilemo tu sukila oku siapo. Vocipama cilo, tua konomuisa ovina vimue tu sukila oku ambata, levi tu sukila oku liupa. Pole, kuli ovina vikuavo. Yesu wa popia okuti tua laikele oku ‘lemelelua loku lia calua, loku nyua calua kuenda lasakalalo omuenyo.’ (Luka 21:34) Ocinimbu eci kuenda vikuavo Viembimbiliya, vi tu kuatisa oku kũlĩhĩsa apongoloko amue tu sukila oku linga oco tuamameko oku yolokela omuenyo.

17. Momo lie tu kolelela okuti tu ka yula olupesi luoku yolokela omuenyo?

¹⁷ Tu pondola oku kolela okuti tu ka yula olupesi luoku yolokela omuenyo, momo Yehova o ka tu ĩha ongusu tu sukila. (Isa. 40:29-31) Ka tu sukila oku sumua! Linga ndeci upostolo Paulu, una wa likolisilako calua oco a tambule onima. (Va Fil. 3:13, 14) Lomue o pondola oku ku yolokelako olupesi luaco, pole, lekuatiso lia Yehova o ka tẽla oku yula. (Osa. 68:19) Lekuatiso lia Yehova o ka tẽla oku mala olupesi kuenda oku lu yula!