1. De acordo con Ebrei 12:1, cossa che ghemo de far par finir la carera par la vita?

 LA BÌBLIA la dise che quei che i serve a Geovà i ze drio corer come che nte una carera e che quei che i ze boni de finirla i guadagnarà la vita eterna. (2 Tim. 4:7, 8) Par quela, volemo sforsarse par seitar a corer parché savemo che semo pròpio darente de finir questa carera. El apòstolo Paolo l’è stà bon de corer fin el fin e el ga mostrà che sol saremo boni de finirla anca noantri se ‘butemo distante tuto el peso e coremo con perseveransa’. — Ledi Ebrei 12:1. b

2. Cossa che Paolo el volea dir quando el ga parlà che ghemo de ‘butar distante tuto el peso’?

² Sarà che Paolo l’era drio dir che no ne ocore preocuparse de far gnente e che ghemo de molar tuti i pesi? Nò! Invesse, lu l’era drio dir che, se portemo pesi che no ne ocore mia, restaremo desanimadi e strachi. Par quela, ne ocore veder se semo drio portar pesi che no ghemo de bisogno e molarli. Magari, ghemo de star atenti de no molar i pesi che ne ocore portar par seitar a corer nela carera par la vita. (2 Tim. 2:5) Che pesi i ze questi?

3. (a) De acordo con Gàlati 6:5, che peso ne ocore portar? (b) Cossa che ndaremo imparar in questo stùdio, e parché?

³ Ledi Gàlati 6:5. c Paolo el ga dito che un dei pesi che ne ocore portar l’è la nostra “pròpia responsabilità”. Ma cossa che lu el volea dir? Lu l’era drio parlar de quel che Geovà el speta che cada un de noantri el fae. In questo stùdio,  ndaremo imparar sora questa responsabilità, o sia, i pesi che Geovà el vol che portemo, e cossa pol giutarne a seitar a portarli. Ndaremo anca imparar sora arquanti pesi che no ne ocore portar e cossa ghemo de far par assarli indrio. Se femo cossita, saremo boni finir la carera par la vita.

4. Parché no l’è massa fadiga far quel che ghemo prometesto a Geovà? (Varda anca la ilustrassion.)

⁴ La nostra dedicassion a Geovà. Quando ghemo fato la nostra dedicassion a Geovà, ghemo prometesto che ndarìssino servirlo e far tuto quel che el vol. Alora, l’è tanto importante far tuto quel che ghemo prometesto, ma no l’è mia massa fadiga farlo. Parché? Parché Geovà el ne ga creà cole qualità che lu el ga e cola voia de servirlo e cognosserlo. (Apo. 4:11) Par quela, ne piase servirlo, semo boni de esser so amighi e restemo contenti quando lo obedimo e femo compagno a so Fiol. — Sal. 40:8; Mat. 11:28-30.

5. Cossa che ndarà giutarte a far quel che te ghè prometesto a Geovà? (1 Gioani 5:3)

 ⁵ Come che podemo portar questo peso? Ghen’è due robe che le pol giutarte. Prima, fà cada volta pi forte el to amor par Geovà. Te ghè de pensarghe sora le bele robe che lu el te ga belche dato e sora le benedission che lu el te darà. Sarà pi fàcile obedir a Geovà se el to amor par lu el resta cada volta pi forte. (Ledi 1 Gioani 5:3. d) Seconda, fà compagno a Gesù. Lu l’è stà bon de esser leal a Geovà parché sempre el preghea par domandarghe aiuto e el pensea nele benedission che el riceveria. (Ebr. 5:7; 12:2) Alora, prega a Geovà anca ti par domandarghe forsa, e sfòrsate de sempre pensarghe sora la speransa de viver par sempre. Se te fè cada volta pi forte el to amor par Geovà e te fè compagno a Gesù, te sarè bon de far tuto quel che te ghè prometesto.

6. Parché che l’è importante tender ben dela nostra fameia? (Varda anca la ilustrassion.)

⁶ Tender ben dela nostra fameia. Nela nostra carera par la vita, ghemo de amar de pi a Geovà e a Gesù che ala nostra fameia. Ma questo no vol mia dir che podemo assarla de banda o che saria un peso tenderla. (Mat. 10:37) Invesse, Geovà e Gesù sol i ndarà acetar quel che femo par lori se tendemo ben dela nostra fameia. (1 Tim. 5:4, 8) E Geovà el sa che, quando el omo e la dona i mostra rispeto e amor un al altro, i genitori i ama e i insegna i so fioi e i fioi i obedisse so pare e so mare, tuti nela fameia i ze felici. (Efe. 5:33; 6:1, 4) Alora, quando femo quel che Geovà el ne domanda, semo pi felici.

7. Come che podemo far nela nostra fameia quel che Geovà el ne domanda?

⁷ Come che podemo portar questo peso? No importa se te sì omo, dona o fiol, fìdate nei bei consili che ghen’è nela Bìblia. No stà far quel che ti te pensi che l’è giusto gnanca ndar drio a quel che le persone o i studiosi i dise. (Pro. 24:3, 4) Invesse, stùdia le publicassion e i bei consili che vien dela Bìblia. Par esémpio, i artìcoli “Ajuda para a família” i mostra come che i genitori, i gióveni e quei che i ze maridadi i pol dàrghene fora cole dificoltà che fursi i infronta. e Anca se qualchedun dela to fameia no’l mete in pràtica i consili dela Bìblia, ti te ghè de sforsarte par meterli in pràtica. Se te fè cossita, te ndarè giutar la to fameia a esser pi felice, e te riceverè tante benedission de Geovà. — 1 Pie. 3:1, 2.

8. Cossa che ghemo de ricordarse se femo una bruta dessision?

⁸ Quel che vien fora par causa dele nostre dessision. Geovà el ne ga dato la libertà de far le nostre scólie, e lu el vol che femo polito par esser felici. Magari, se femo una bruta dessision, lu no’l ndarà protegerne dele robe rugne che le pol vegner fora. (Gàl. 6:7, 8) Par quela, se semo drio sofrir par causa de una bruta dessision o parché ghemo parlà qualcossa sbaliada, ghemo de capir che la colpa la ze nostra. Fursi semo fin drio sentirse in colpa par causa de una roba sbaliada che ghemo fato. Ma ricordarse che semo noantri  che ghemo la colpa de una bruta dessision, ndarà giutarne a far quel che ne ocore. Alora, se ghemo fato un pecato, saremo boni de confessarse, cambiar e sforsarse par mai farlo nantra volta. Se femo cossita, saremo boni de seitar a corer nela carera dela vita.

9. Cossa che pol giutarte se te ghè fato una bruta dessision? (Varda anca la ilustrassion.)

⁹ Come che podemo portar questo peso? Fursi te ghè fato una bruta dessision e no te pol pi cambiarla. Alora, no stà doperar del to tempo e dela to forsa par catar fora scuse o par darghe la colpa ai altri. Pitosto, aceta che te ghè sbalià e sfòrsate de far polito de adesso avanti. Invesse de seitar a sentirte in colpa par causa dei to sbali, sìpia ùmile e prega a Geovà par parlarghe del to sbàlio e par domandar che el te perdone. (Sal. 25:11; 51:3, 4) E se te ghè assà qualchedun disgustà, domandaghe scusa, e se ghe vol, domanda el aiuto dei ansiani. (Tia. 5:14, 15) Proa imparar dei to sbali, e sfòrsate par mai pi farli. Se te fè cossita, te pol esser sicuro che Geovà el ndarà mostrarte misericòrdia e che el ndarà darte el aiuto che te ocore. — Sal. 103:8-13.

10. Parché che pensar che mai femo che basta l’è un peso massa fadiga de portar? (Gàlati 6:4)

¹⁰ Pensar che mai femo che basta. Noantri ndaremo restar tanto desanimadi se pensemo che ghemo de far tuto quel che i altri i fà. (Ledi Gàlati 6:4. f) Se seitemo a pensar cossita, deventaremo persone invidiose e volaremo sempre mostrar che semo meio che i altri. (Gàl. 5:26) Se proemo far de pi de quel che semo boni, gavaremo tanti problemi. La Bìblia la dise che sofrimo tanto quando le robe no le sucede nela ora che spetemo. Alora, podemo restar ancora pi desanimadi se volemo far una roba che no saremo mai boni farla. (Pro. 13:12) Se femo cossita, restemo desanimadi e no semo pi boni de ndar avanti nela carera par la vita. — Pro. 24:10.

11. Come che te pol molar el peso de pensar che mai te fè che basta?

¹¹ Come che podemo molar questo peso? Ricòrdate che Geovà no’l vol che te fae de pi de quel che te sì bon. (2 Cor. 8:12) Sìpia sicuro che Geovà no’l speta che te fè tuto quel che i altri i fà. (Mat. 25:20-23) Geovà el ghe dà tanto valor al laoro che ti te fè, ala fede che ti te ghè, e ala perseveransa che ti te mostri. Anca te ghè de esser ùmile e capir che fursi no te sì mia pi bon de far quel che te volarissi parché te sì belche vècio, te sì malà o par causa de altri problemi. Alora, compagno a Barzilai, dighe de nò quando te vedi che no te sì bon de far un laoro. (2 Sam. 19:35, 36) Fà compagno a Moisè, domanda aiuto ai altri e daghe i laori che no te sarè bon de far. (Éso. 18:21, 22) Se te sì ùmile, te restarè contento con quel che te sì bon de far e te gavarè forsa de seitar a corer nela carera par la vita.

12. Sarà che noantri ghemo la colpa dele dessision sbaliade che i altri i fà? Spiega.

¹² Sentirse in colpa par causa dele brute dessision dei altri. Noantri no podemo mia far dessision nel posto dei altri gnanca protegerli de quel che vien fora dopo che i fà una bruta dessision. Par esémpio, se un fiol el desside che no’l vol pi servir  a Geovà, sicuro che i genitori i ndarà sofrir tanto. Ma, se lori i se sente in colpa par causa dele brute dessision del so fiol, i ndarà portar drio la schena un peso massa fadiga. Geovà no’l vol mia che i porte questo peso. — Rom. 14:12.

13. Cossa che un pare e una mare i ga de far quando so fiol el fà brute dessision?

¹³ Come che podemo molar questo peso? Ricòrdate che Geovà el ga dato la libertà de far dessision a tuti noantri e che cada persona la ga de far le so scólie. Par quela, pol esser che qualchedun dessida che no’l vol pi servirlo. Te ghè anca de ricordarte che Geovà el sa che no te sì mia perfeto e che te fae quel che te sì bon. Magari, quel che el to fiol el desside far no l’è colpa toa. (Pro. 20:11) Ma cossa far se te seiti a pensar nei sbali che te ghè fato intanto che te slevei to fiol? Prega a Geovà par contarghe tuto quel che te sì drio sentir e domandaghe perdon. L’è vera che lu el sa che no te pol cambiar quel che ga belche sucedesto. Ma Geovà no’l vol che te protegi to fiol de quel che vien fora par causa dele brute dessision che lu el fà. E ricòrdate che, se el to fiol el desside tornar a far quel che l’è giusto, Geovà el gavarà caro de perdonarlo. — Luc. 15:18-20.

14. Parché che no ghemo mia de seitar a sentirse in colpa?

¹⁴ Seitar a sentirse in colpa par causa dei sbali del passà. Quando femo un bruto sbàlio, noantri se sentimo colpa. Ma seitar a sentirse in colpa l’è un peso che ne ocore assar indrio. Parché? Parché se ghemo confessà el nostro pecato, se ghemo ciamà grami e ghemo fato tuto quel che podemo par cambiar, podemo esser sicuri che Geovà el ne ga perdonà. (Ati 3:19) Savemo che Geovà no’l vol che seitemo a sentirse in colpa parché ndaremo sofrir tanto e podemo fin fermarse de corer nela carera par la vita. — Sal. 31:10; 2 Cor. 2:7.

15. Cossa che te pol far se te seiti a sentirte in colpa? (1 Gioani 3:19, 20) (Varda anca la ilustrassion.)

 ¹⁵ Come che podemo molar questo peso? Se te seiti a sentirte in colpa, ricòrdate che Geovà el pol perdonarte del tuto. (Sal. 130:4) Geovà el ga dito che no’l ndarà mai ricordarse dei pecati de quei che i se ga ciamà grami. (Ger. 31:34) Alora, lu no’l va mai castigarte par i sbali che te ghè fato nel passà. E no stà mai pensar che Geovà no’l te ga perdonà se te sì drio tribolar parché te ghè fato una bruta dessision. Gnanca no te ocore seitar a sentirte in colpa se ghen’è qualche laoro nela congregassion che no te pol pi farlo par causa de un sbàlio del passà. Invesse, ricòrdate che, se Geovà no’l se pensa pi dei sbali che te ghè fato, gnanca ti te gavarissi de farlo. — Ledi 1 Gioani 3:19, 20. g

16. Cossa che ghemo de capir par seitar a corer nela carera par la vita?

¹⁶ Sicuro che volemo finir la carera par la vita. (1 Cor. 9:24) Ma sol saremo boni de seitar a corer se capimo le robe importante che ne ocore portar e quele che ghemo de molar. In questo stùdio, ghemo imparà sora un per de queste robe, ma ghen’è tante altre che ne ocore capir. Par esémpio, in Luca 21:34, Gesù el ga dito che magnar e bever massa, e le ansietà dela vita pol deventar un peso che ne ocore molarlo. Testi dela Bìblia come questo ndarà giutarne a veder se ghemo de cambiar qualcossa par seitar a corer nela carera par la vita.

17. Parché che podemo esser sicuri che podemo finir la carera par la vita?

¹⁷ Noantri semo sicuri che podemo finir la carera par la vita parché Geovà el ndarà darne la forsa che ghemo de bisogno. (Isa. 40:29-31) Alora, no podemo mia restar desanimadi. Pitosto, ghemo de far come el apòstolo Paolo, e méterghela tuta par finir la carera. (Fil. 3:13, 14) L’è vera che nissuni pol corer nel to posto. Ma ricòrdate che Geovà el ndarà giutarte a portar le robe che te ocore e a molar i pesi che ghe vol. (Sal. 68:19) Sìpia sicuro che, con Geovà dela to banda, te sarè bon de finir de corer la carera par la vita!