1. As Hebrews 12:1 talk, wetin we fit do to fit run the race for life reach the end?

 BIBLE talk say the life wey servants of Jehovah de live, be like race. Anybody wey succeed to run reach the end go get life wey no go end. (2 Tim. 4:7, 8) All of us need to do our best to continue to run especially as we don near the end of the race. Apostle Paul na one person wey succeed to run this race reach the end. E tell us wetin go help us fit succeed. E say make we “troway all the load . . . , and make we endure as we de run the race wey dey our front.”—Read Hebrews 12:1.

2. Wetin apostle Paul mean when e talk say make we “troway all the load”?

² When apostle Paul write say make we “troway all the load,” e mean say servants of Jehovah no suppose carry any load? No be wetin e mean be that. E mean say we need to troway any load wey we no suppose carry. This kind load fit drag us down and make us quick tire. So to fit endure as we de run, we need to quick know the load wey de drag us down and troway-am. But we no go troway any load wey we suppose carry because if we troway-am, we no go qualify for the race again. (2 Tim. 2:5) Which load we suppose carry?

3. (a) As e dey Galatians 6:5, wetin we must carry? (b) Wetin we go talk about for this article, and why?

³ Read Galatians 6:5. Apostle Paul de talk about wetin each person must do by imself as e de worship Jehovah. For this article, we go talk about the things wey be our “own load” and how we fit carry them. We go still talk about some load wey we de carry, wey we no suppose carry and how we fit troway them. When we carry our own load and troway the one  wey we no suppose carry, e go help us fit run the race for life reach the end.

4. Why our promise to worship Jehovah forever no be heavy load? (Still check the picture.)

⁴ Our promise to worship Jehovah forever. The time wey we give our life to Jehovah, we promise-am say we go worship-am and do wetin e want. So we must do wetin we promise. To do wetin we promise Jehovah na serious matter, but no be heavy load, because the reason why Jehovah make us na to do wetin e want. (Rev. 4:11) E make us for im image and put-am for our mind to like to know-am and worship-am. Because of this one, we go fit be im friend and de happy to do wetin e want. (Ps. 40:8) Another thing be say when we do wetin God want and follow im Son, e go make our life better.—Matt. 11:28-30.

5. Wetin fit help you do wetin you promise? (1 John 5:3)

⁵ Wetin go help you fit carry-am? Two things go fit help you. Number one, continue to make your love for Jehovah strong  more-more. One way you go fit do this one na to de think deep about all the good things wey e don do for you and the blessing wey de come. The more your love for God de grow, the more e go dey easy to obey-am. (Read 1 John 5:3.) Number two, copy Jesus example. Two of the things wey help Jesus fit do wetin God want be say e pray make Jehovah help-am and e put mind for the blessing wey de wait for-am. (Heb. 5:7; 12:2) Like Jesus, make you pray to Jehovah to help you fit do wetin you don promise-am, and put mind for the hope wey you get to enjoy life forever. As your love for God de grow and you de copy im Son example, this one go help you do wetin you promise.

6. Why e dey important make we de care for our family? (Still check the picture.)

⁶ The work wey we must do for our family. As we de run the race for life, our love for Jehovah and Jesus must pass our love for our family people. (Matt. 10:37) But this one no mean say we go leave the work wey we suppose do for our family like say na heavy load wey de make us no fit do wetin Jehovah and Jesus want. The truth be say to fit make Jehovah and Jesus happy, we need to care for our family. (1 Tim. 5:4, 8) When we de care for our family, we go de happy more-more. This one na because Jehovah arrange make family succeed when husband and wife love and respect each other, when papa and mama love and train their children, and when children obey their papa and mama.—Eph. 5:33; 6:1, 4.

7. Wetin go help you fit do wetin you suppose do for your family?

⁷ Wetin go help you fit carry-am? Whether you be husband, wife or pikin, make you trust the better advice for Bible instead to follow how you feel, your tradition, or wetin people talk. (Prov. 24:3, 4) Use our book them do research. Them get good advice wey fit help you follow wetin Bible talk. For example, for jw.org, you go see things wey go fit help husband and wife, papa and mama, and young people handle problems wey them de face today. b Make up your mind to follow wetin Bible talk even if people for your family no follow-am. If you do like that, e go help your family and Jehovah go bless you.—1 Pet. 3:1, 2.

8. How wetin we decide fit affect us?

⁸ Accept anything wey come from the decision wey you make. Jehovah make us to fit make decision by ourself. And e want make we de make good decision and enjoy the result. But e no de cover us make we no suffer from the result of our bad decision. (Gal. 6:7, 8) So when we talk wetin we no suppose talk or do wetin we no suppose do, we go suffer the bad result. If na serious sin we commit, e go really worry our mind well-well. But when we know say we need to accept anything wey come from the decision wey we make, we go quick confess our sin, correct our mistake and do our best make we no make the mistake again. When we do like that, e go help us continue to run the race for life.

9. Wetin you fit do if you don make bad decision? (Still check the picture.)

⁹ Wetin go help you fit carry-am? If you no go fit change wetin happen because of your bad decision, accept the way things be for  you. Know say you no go fit change wetin don happen. No de waste your time and de give yourself headache to de try prove say wetin you do correct or de blame yourself or other people for your bad decision. Instead, accept your mistake and do the best wey you fit do now. If wetin you do still de worry you, pray to Jehovah, tell-am your mistake and beg-am make e forgive you. (Ps. 25:11; 51:3, 4) Beg the people wey you offend, and if na wetin elders need to know about, tell them make them help you. (Jas. 5:14, 15) Learn from your mistake and try make e no happen again. If you do this one, make you dey sure say Jehovah go pity you and give you the help wey you need.—Ps. 103:8-13.

10. Why we fit talk say to want do wetin pass our power na heavy load? (Galatians 6:4)

¹⁰ To want do wetin pass our power. When we de compare ourself with other people, we fit start to feel say we no de try. (Read Galatians 6:4.) And if we continue to do like that, we fit start to jealous them or force ourself to do pass them. (Gal. 5:26) If we de force ourself to do wetin other people de do when our power no reach, we fit wound ourself. E no de make us happy when we no get wetin we de expect. So how we go come feel if we put hand for wetin big pass us? (Prov. 13:12) E fit make us tire for the race for life.—Prov. 24:10.

11. Wetin go help you no do pass where your power reach?

¹¹ Wetin go help you fit troway-am? No force yourself pass wetin Jehovah expect from you. E no expect make we do pass where our power reach. (2 Cor. 8:12) Make you know say Jehovah no de compare you to other people. (Matt. 25:20-23) E value the way you de use all your mind worship-am, the way you hold-am tight and how you de endure. Carry body down, make you know say no be everything wey you like to do for Jehovah, you go fit do now because you fit don de old, de sick or your condition don change. Make you follow Barzillai example, if your power no reach the work wey them give you, tell them say e pass your power. (2 Sam. 19:35, 36) And as Moses do, allow people make them help you and share work for people when e too much for you. (Ex. 18:21, 22) When you no de do pass where your power reach, e go help you no do wetin go make you tire to de run the race for life.

12. You suppose blame yourself for the bad decision wey other people make? Why you talk like that?

¹² To de blame yourself for other people mistake. We no go fit make decision for people, or cover them from the result wey fit come from their bad decision. For example, young brother or sister fit talk say e no want be Jehovah servant again. This bad decision fit pain im papa and mama well-well. When papa and mama de blame theirself for the bad decision wey their pikin make, na heavy load them de carry. Jehovah no want make them carry this kind load.—Rom. 14:12.

13. Wetin papa and mama go do if their pikin make bad decision?

¹³ Wetin go help you fit troway-am? Remember say Jehovah don allow all of us choose how we want live our life. E de allow each person choose wetin e want. So na we go choose by ourself if we go serve-am. Jehovah know say as papa and mama, una no dey perfect but na una best Jehovah want. So anything wey your pikin choose to use  im life do, na im hand e dey, no be una own. (Prov. 20:11) But the mistake wey una make as una de train una pikin them, fit still de worry una for mind. If this kind thing de worry una for mind, pray to Jehovah about-am and beg-am make e forgive una. E know say una no go fit go back go change wetin don happen. Even with this one, Jehovah no expect say make una cover una pikin make e no suffer from the result of im bad decision. Always get-am for mind say if una pikin come back to Jehovah, e go welcome-am back with all im heart.—Luke 15:18-20.

14. Why over worry about our sin na heavy load wey we need to troway?

¹⁴ To de over worry about our sin. When we sin, na normal thing for our mind to de worry us. But Jehovah no want make we de over worry about our sin. To de over worry about our sin na heavy load wey we need to troway. If we don confess our sin, repent and we don de do our best to make sure say e no happen again, we fit trust Jehovah say e don forgive us. (Acts 3:19) After we don do all this one, Jehovah no want make we continue to de worry about our sin. E know say if we continue to worry about-am, e go really affect us. (Ps. 31:10) If we de over worry about our sin, e fit make us tire to run the race for life.—2 Cor. 2:7.

15. Wetin fit help you no de over worry about your sin? (1 John 3:19, 20) (Still check the picture.)

¹⁵ Wetin go help you fit troway that load? If you still de worry about your sin even after you don repent, make you put-am for mind say when Jehovah forgive, e de “forgive finish.” (Ps. 130:4) When Jehovah de talk about people wey e don forgive, e talk say: “I no go remember their sin again.” (Jer. 31:34) This one mean say when Jehovah don forgive us, e no go use the sin punish us again. So if you de suffer because of the bad result of your sin, no think say na because Jehovah never  forgive you. And make you no vex for yourself because wetin you don do no make you qualify for some things wey you for like do for Jehovah organization. When Jehovah don forgive you, e no de continue to think about your sin, so you yourself no suppose continue to think about-am.—Read 1 John 3:19, 20.

16. As we de run the race for life, wetin we suppose know?

¹⁶ As we de run the race for life, make we “run for way wey [we] go fit win.” (1 Cor. 9:24) We go fit do this one when we know the load wey we suppose carry and the one wey we suppose troway. For this article, we don talk about some of them. But other ones still dey. Jesus talk say “make [we] dey careful so that to de chop too much, to de drink too much, and over worry about life” no go drag us down. (Luke 21:34) This kind verse them fit help you know some things wey you need to change for your life so that you go fit run this race well.

17. Why we dey sure say we go win the race for life?

¹⁷ We dey sure say we go win the race for life because Jehovah go give us the power wey we need. (Isa. 40:29-31) So make you continue to do your best! Make you copy apostle Paul example as e do everything wey e fit do to win the race. (Phil. 3:13, 14) Nobody fit run the race for life for you, but Jehovah go help you succeed as you de run. Jehovah go help you fit carry the load wey you suppose carry and troway the ones wey you need to troway. (Ps. 68:19) With Jehovah help, you go fit endure as you de run and you go win!