1. ებრაელეფიშ 12:1-იშ თანახმას, მუ ოკო ვაკეთათ, ნამდა გეგნობკვათათ ფინიშიშ ხაზ?

 ᲑᲘᲑᲚᲘᲐ ქრისტიანულ ცხოვრებას, რულას უდარენს. თინა, მით გეგნოკვათუნს ფინიშიშ ხაზის, ჯილდოთ მარადიულ სიცოცხლეს მიღენს (2 ტიმ. 4:7, 8). ჩქი მონდომა ოკო ვადვარკათ დო ირფელ ოკო გუვაკეთათ, ნამდა ვემვოტუათ რულა, მუშენდა ფინიშიშ ხაზწკუმა ასე ვორეთინ თიცალ ხოლოს დღას ვა პჸოფეთ. მოციქულ პავლე, მიდგაქ ბოლოშა მიოჭირინუ ფინიშიშ ხაზის, მირაგადნა, ჩქი მუ მიმეხვარებნა თეშ კეთებას. თინა ელამჩანა, ნამდა „ჩეფთხინუათ ირფელ, მუთ მამონკენა დო მოთვინებათ იბრულათ წოხოლე ეწომიძნან თი შარა“ (წეკითხით ებრაელეფიშ 12:1).

2. მუს ნიშნენს ჩეფთხინუათ „ირფელ, მუთ მამონკენა“?

² მუჟამსით პავლე მოციქულქ მიწის, ნამდა ჩეფთხინუათ „ირფელ, მუთ მამონკენა“, თის ვა უგულისხმებ, ნამდა ქრისტიანქ სიცოცხლეშ შარას შურო მუთუნ ოკო ვეგლეღას. თინა გულისხმენდჷ ზედმეტ ოღალს, ნამდგაქ შილებე მეცილან რულას დო დოფშულიდან. სიცოცხლეშ შარას რულას მუთუნქ ვემეცილანინ, საჭირო რე, ხეთეშე გეგშეფჩინათ, მუ მამონკენა დო დრო ვებღათინ თეშ, უცფას ჩეფთხინუათ. მარა ფრთხილას ოკო ვორდათ, ნამდა თინეფს თიცალ მუდგარენეფ ხოლო ვა ვუჸუნუათ, მუთ აუცილებერო ოღალ მაფნა, მუშენდა თაშ ქიმიფქციებუთ-და, ვეშმალებენა გუვაგრძელათ სიცოცხლეშო რულა (2 ტიმ. 2:5). მორთ ასე გუვარჩუათ, მუ მიშურს აუცილებერ ოღალშა.

3. ა) გალატელეფიშ 6:5-იშ თანახმას, მუ ოკო გილებღათ? ბ) მუს გუვარჩიენთ თე სტატიას დო მუშენ?

³ წეკითხით გალატელეფიშ 6:5. მუჟამსით პავლე მოციქულქ ჭარჷ, ნამდა „თითოულს მუშ ოღალ გილუღ“, გულისხმენდჷ პირად პასუხიშმგებლობას, ნამუთ ღორონთიშ წოხოლე მიღნა დო ნამდგაშ გილაღალა ჩქინ მანგიორო შხვას ვეშიალებე.  თე სტატიას გუვარჩიენთ, მუ მიშურს თე „ოღალშა“ დო მუჭო შემლებნა თიშ გილაღალა. თეს გეძინელ, ქობძირუნთ, მუ შილებე რდას ზედმეტ ოღალ დო ქიგებგენთ, მუჭო შემლებნა თიშ ჩათხინაფა. თე სტატიას მოჩამილ რჩევეფს ქიმვაჸუნუთ-და, შემალებენა ქიმვოჭირინუათ ფინიშიშ ხაზის დო გეგნობკვათათ თინა.

4. მუშენ ვა რე ჩქინო ტვირთ მეძღვინუაშ აღთქმაშ შესრულება? (ქოძირით სურათ).

⁴ მეძღვინუაშ დროს დოდვალირ აღთქმა. მუჟამსით დუდ მევუძღვინით იეჰოვას, პირობა მეფჩით, ნამდა ირო თის ვემსახურებუდით დო თიშ ნებას შევასრულენდით. ჩქი ოკო შევასრულათ ჩქინ დოდვალირ სიტყვა. მეძღვინუაშ თანახმას ცხოვრება დიდ პასუხიშმგებლობა რე, მარა მუშო ოკო რაგად, ტვირთო ვეგებჯანნა, მუშენდა იეჰოვაქ მუშ ნებაშ შეიოსრულებერო გუმოჭყეს (გამოცხ. 4:11). ღორონთიქ მუშ ამნახანტო დო თიშ სურვილით გუმოჭყეს, ნამდა გეფჩინებაფუათ დო თაყვან ქოფცათ თის. ათეშენ, ვეახლოებუთ ჩქინ ზეციერ მუმას დო ხიოლს ბგინაფლენთ თიშ ნებაშ შესრულებათ (ფსალმ. 40:8). თეს გეძინელ, ღორონთიშ ნებაშ შესრულება დო თიშ სქუაშ ნაკვალუშ მეჸუნა ძალეფით ემოფშანა (მათ. 11:28—30).

5. მუ მიგეხვარებნა მეძღვინუაშ დროს დოდვალირ აღთქმაშ შესრულებას? (1 იოან. 5:3).

 ⁵ მუჭო შეილებნა თე ოღალიშ ღალა? თეშ კეთებას ჟირ მუდგარენ მიგეხვარებნა. პირველ, იეჰოვაშ მიმართ ჸოროფაშ გამანგარება. თეშო საჭირო რე, დეფიქრათ თი ირფელ ჯგირშე, მუთ იეჰოვას თქვანო ულირს უკეთებ დო თი კურთხევეფშე ხოლო, ნამუთ წიმი გელნა. მუთ უმოსო ქიჸოროფუანთ იეჰოვას, თით უმოს ადვილ გაჸინა, დემორჩილათ თის (წეკითხით 1 იოანეშ 5:3). მაჟია, იესოშ მაგალითიშ მეჸუნა. თინა ირიათო ასრულენდჷ ღორონთიშ ნებას, მუშენდა იეჰოვას ლოცვას მოხვარას თხინდჷ დო მთელ ყურადღება თი ჯილდოშა აფუდ გინოღალირ, ნამუთ წიმი ელუდ (ებრ. 5:7; 12:2). იესოცალო, თქვა ხოლო ლოცვას ქოთხით ღორონთის, გუგამანგარან დო ირიათო თოლშა ეწირინეთ მომავალიშ იმენდ. მუჟამსით უმოსო ქიჸოროფუანთ ღორონთის დო მიაჸუნუთ თიშ სქუაშ მაგალითის, შეგალებენა შეასრულათ მეძღვინუაშ დროს დოდვალირ აღთქმა.

6. მუშენ ოკო შევასრულათ ოჯახურ მოვალეობეფ? (ქოძირით სურათ).

⁶ ოჯახურ მოვალეობეფ. ფინიშიშ ხაზ გეგნობკვათათინ, იეჰოვა დო იესო ჩქინ ოჯახიშ წევრეფშე უმოსო ოკო მიჸორდან (მათ. 10:37). მარა მუშო ოკო რაგად, თენა ვა ნიშნენს, ნამდა ხე ავოღათ ოჯახურ მოვალეობეფს დო ვარია ფთქუათ თინეფიშ შესრულებაშე, თი მიზეზით, ითამ ღორონთიშ მსახურებას მოცილდან. თეშ გინაწონს, ქოთ იეჰოვაშო დო ქოთ იესოშო ჩქინ მსახურება მოსაწონ იჸუაფ, მუჟამსით შევასრულენთ ოჯახურ პასუხიშმგებლობეფს (1 ტიმ. 5:4, 8). მუშო ოკო რაგად, თეშ კეთება ბედნერობას მომღანა. იეჰოვას ჯგირო უჩქჷ, ნამდა ოჯახ ბედნერ იჸუაფ, მუჟამსით ჩილ დო ქომონჯ ართიანიშ მიმართ ჸოროფას დო პატიცემას გეგმირჩქინანს, მშობლეფ ჸოროფათ დაგურუანა მუნეფიშ სქუალეფს დო სქუალეფ დემორჩილებნა მუნეფიშ მშობლეფს (ეფეს. 5:33; 6:1, 4).

7. მუ მიგეხვარებნა ოჯახურ მოვალეობეფიშ შესრულებას?

⁷ მუჭო შეილებნა თე ოღალიშ ღალა? ოჯახის, არძაქ ბიბლიურ სიბრძნეთ იხემძღვანელით. ვაკეთათ მუდგარენ თი მიზეზით, ნამდა თაშ მიგორჩქნა სწორ, თაშ რე გავრცელებურ თქვან კულტურას ვარდა თეშ კეთებას ითამ ექსპერტეფ ელაიჩანა (იგავ. 24:3, 4). ჯგირო გეგმირკვით ბიბლიაშა გერსხილ პუბლიკაციეფ. თინეფს მოჩამილ რე პრაქტიკულ რჩევეფ თიწკუმა დაკავშირებით, მუჭო შეილებნა ბიბლიურ პრინციპეფიშ ცხოვრებას გიმორნაფა. მაგალთო, ბროშურას „თქვან ოჯახიშ ბედნერობა თქვან ხეს რე“ დო წიგნიშ, „მარადიულო გეხარით ცხოვრებათ!“, 49-ა დო 50-ა დუდეფს, მოჩამილ რე პრინციპეფ, ნამუთ მეხვარებ წყვილეფს, მშობლეფს დო მოზარდეფს. b გინოჭყვიდილ გაფდან, ცხოვრებას გეგმირინუათ ბიბლიურ რჩევეფ თიმწკუმა ხოლო, მუჟამსით თქვან ოჯახიშ წევრეფ ვართნა თეს. თაშ მოქციება ჯგირ შედეგეფს მუღანს თქვან ოჯახის დო პირადო თქვა ხოლო იეჰოვა ვამგარკენა კურთხევეფს (1 პეტ. 3:1, 2).

8. მუჭო შილებე ჩქინ მეღებულ გადაწყვეტილებეფქ იმოქმედას ჩქინდა?

⁸ პასუხიშმგებლობა ჩქინ მეღებულ გადაწყვეტილებეფშე. იეჰოვაქ ძვირფას ძღვინ, ნებაშ თავისუფლება მუჩეს დო ოკო, მიბღათ ბრძნულ გადაწყვეტილებეფ, მუთ ჯგირობუას მომღანა. მარა გლახა გადაწყვეტილებეფს მიბღენთ-და, თიშ შედეგეფშე ვა დოფთხილანა (გალ. 6:7, 8). ათეშენ, არასწორ არჩევანს გუვაკეთენთ ვარდა მუდგაინს უდუფიქრებუო ქოფთქუანთ დო გუვაკეთენთ-და, თიშ შედეგეფშე პასუხიშმგებლობა ჩქინ დუდშა ოკო ებჭოფათ. შილებე თიშ გურშენ, მუთ ვაკეთით სინდისიქ შემაწუხან დო ბრალ ქიგებდვან, მარა თიშ რჩქინა, ნამდა არასწორ გადაწყვეტილებაშ შედეგეფშე პასუხიშმგებელ პირადო ჩქი ვორეთ, გინმოჭყვიდირაფუანა, ვაღიარათ ცოდეფ, გეგშვასწორათ შეცდომა დო  ირფელ გუვაკეთათ, ნამდა კინ იგივექ ვა მაღოლან. თეცალ მოქმედება მიმეხვარებნა, გუვაგრძელათ სიცოცხლეშ შარას რულა.

9. მუ ოკო აკეთათ არასწორ გადაწყვეტილება მიღით-და? (ქოძირით სურათ).

⁹ მუჭო შეილებნა თე ოღალიშ ღალა? დაშებულიშ გიშასწორება ვეშეილებნან-და, თოლ გუსწორით რეალობას დო ირო რშუდან, ნამდა ულირ ვა გათირენა. ვემკალუათ თქვან დრო დო ენერგია დუდიშ მართლებას დო დაშებულიშ შხვაშა გინობრალებას. თეშ მანგიორო, უჯგუშ იჸუაფ აღიარათ შეცდომა დო თი მომენტშო, მუდგაშ კეთება შეილებნა ირფელ გაკეთათ. დაშებულიშ გურშენ, დუდის გლახათ ქოგინაფლენთ დო გურ ბრალს ქიგერდვანან-და, ლოცვას ალალას ქუდურაგადეთ იეჰოვას, აღიარით შეცდომა თიშ წოხოლე დო ქოთხით პატიება (ფსალმ. 25:11; 51:3, 4). თი პიროვნებას ხოლო ქუწით ბოდიშ, მიდგას გურ უწყუნეთ დო საჭირო ქორენ-და, უხუცესეფს ხოლო ქოთხით მოხვარა (იაკ. 5:14, 15). შეცდომეფშე დიგურეთ დო ირნერო ეცადით კინ ვეგემეორათ თინეფ. თაშ ქიმიქციებუთ-და, შეილებნა დარწმუნებულ რდათ, ნამდა იეჰოვა ჭყოლოფას გეგმირჩქინანს თქვან მიმართ დო მუჭოთ საჭირო რენ თეშ ქიმგეხვარებნა (ფსალმ. 103:8—13).

10. მუშენ შილებე არარეალურ მოლოდინეფქ ტვირთო გინმართან? (გალ. 6:4).

¹⁰ არარეალურ მოლოდინეფ. ჩქინ დუდიშ ირიათო შხვეფშა შედარებაქ, შილებე არარეალურ მოლოდინეფ გომრჩქინან დო ტვირთო გინმართან (წეკითხით გალატელეფიშ 6:4). ჩქინ დუდის ირიათო შხვეფს ქეშუდარენთ-და, შილებე მენჯარიშეფო გინიფრთათ დო ირიათო ვოცადუდათ, შხვეფს ვორჯგინათ (გალ. 5:26). მუჟამსით ირიათო თიშა მაჸინა ყურადღება გინოღალირ, მუს მიოჭირინუანა შხვეფ, შილებე ჩქინ დუდის თიცალ მუდგარენიშ კეთება მოფთხუათ, მუდგაშ შესაძლებლობა სინამდვილეს ვა მიღნა. მუჭოთ ბიბლიას ბკითხულენთ, ბრელ ხანიშ ჯინა გურს ქალახენს-და, წერმიდგინით, მუსხით უმოსო მაწყუნენა გურს, მუჟამსით თიცალ მუდგარენს ველუთ, მუთ დღას ვა მოხვადუ (იგავ. 13:12). არარეალურ მოლოდინეფქ, შილებე თეშ მიდამღან ძალეფ დო გეგნოფშულიდან, ნამდა სიცოცხლეშ შარას რულაშ დუდ ხოლო ვა მიღდან (იგავ. 24:10).

11. მუ მიგეხვარებნა, დუდ ეუჩილითუათ არარეალურ მოლოდინეფს?

¹¹ მუჭო შეილებნა თე ტვირთიშ ჩათხინაფა? ვა მოთხუათ თქვან დუდის თიშე უმოს, ვინემ იეჰოვა ელჷ. თინა დღას ვა მორთხინა თიცალ მუდგარენიშ კეთებას, მუთ ვეშეილებნა (2 კორ. 8:12). დარწმუნებულ რდათ, ნამდა თინა, თქვან კეთებულ საქმეეფს, შხვაშის ვადარენს (მათ. 25:20—23). რშუდან, იეჰოვა აფასენს პირადო თქვან მსახურებას, თქვან ართგურობას დო თქვან მოთვინებას. გეგმირჩქინით მოკრძალება დო თოლ გუსწორით თი ფაქტის, ნამდა ასაკიშ, ჯამრთელობაშ დო მდგომარეობაშ გურშენ, შილებე იზმაქ ვაგაკეთებუან, მუზმაშ სურვილ გიღნა. ჯამრთელობა ხეს ვაინწყუნა ვარდა ასაკიშ გურშენ მუდგაინ საქმეშ კეთება ვეშეილებნან-და, მზათ რდათ ბარზილაიცალო, ვარია ქოთქუათ პასუხიშმგებლობაშე (2 სამ. 19:35, 36). მოსეცალო, დღას ვა თქუათ ვარია მოხვარაშე დო მუჟამსით შეიოლებერ რე, შხვეფს ხოლო გუნაწილით პასუხიშმგებლობეფ (გამ. 18:21, 22). მოკრძალებურ ქიჸუაფუთ-და, თქვან დუდის ვა მოთხინთ თიშ კეთებას, მუთ ვეშეილებნა დო მუთ სიცოცხლეშ შარას რულას გეცილებნა.

12. ჩქი ვორეთო პასუხიშმგებელ შხვეფიშ მეღებულ არასწორ გადაწყვეტილებეფშენ? გენწყით.

¹² შხვეფიშ მეღებულ არასწორ გადაწყვეტილებეფ. ჩქი ვეშემლებნა შხვეფიშ მანგიორო მიბღათ გადაწყვეტილებეფ დო ვართ მითინ მათხილენა თი შედეგეფშე, მუთ თინეფიშ მეღებულ არასწორ გადაწყვეტილებეფს მაჸუნუ. მუშო ოკო რაგად, მშობლეფს მანგარო აწყუნენა გურს, მუნეფიშ სქუა ოჭიშის ქურთინუანს იეჰოვას დო თიშ მსახურებას მიოტენს-და, მარა მშობლეფ, მოხვალამირს მუნეფიშ დუდის ქაბრალუაფნან-და, მონკა ოღალს გეიბუნუანა. იეჰოვა ღორონთ ნამთინ მშობელშე ველჷ თეცალ ოღალიშ ღალას (რომ. 14:12).

13. მუჭო ოკო მიქცუას მშობელქ, მუჟამსით მუშ სქუა არასწორ გადაწყვეტილებას ღებულენს?

 ¹³ მუჭო შეილებნა თე ტვირთიშ ჩათხინაფა? ირიათო რშუდან, ნამდა იეჰოვაქ ნებაშ თავისუფლება მუჩეს დო არძას მარზენა არჩევანიშ კეთებაშ უფლებას. მაგალთო, პირადო ჩქი გინობჭყვიდუნთ, ვემსახურებუთ დო ვარ ღორონთის. მშობლეფ, ვაგგოჭყორდან, იეჰოვას უჩქჷ, ნამდა სრულყოფილეფ ვა რეთ, ათეშენ თქვანდე უბრალოთ თის ელჷ, ნამდა სქუალეფიშ რდუალაშ დროს, მუთ შეილებნან ირფელს გაკეთენთ. თქვან სქუაშ მეღებულ გადაწყვეტილებაშენ მთელ პასუხიშმგებლობა თიშა გინურს დო ვართ ხოლო თქვანდა (იგავ. 20:11). მარა გურ იშენით ბრალს ქიგერდვანა დო დღაშ დო სერით თიშე ქოფიქრენთ, ნამდა თქვან სქუას მუდგარენ დარკით-და, იეჰოვას ლოცვას ალალას ქეჩით, მუს გინაფლენთ დო ქოთხით პატიება. თის ჯგირო უჩქჷ, ნამდა ულირს მოხვალამირ ვა გათირენა. ღორონთ თქვანდე ვართ თის ელჷ, ნამდა თქვან სქუას ეუჩილითუანთ თი შედეგეფს, მუთ მუშ კეთებულ არასწორ არჩევანს მაჸუნუ. თიქ ხოლო ვაგგოჭყორდან, ნამდა თქვან სქუა იეჰოვაშა დორთას ქიმინდომენს-და, ღორონთ ხიოლით მიღენს თის (ლუკ. 15:18—20).

14. მუჭო შილებე დაშებულშე ზედმეტო წუხებაქ ტვირთო გინმართან?

¹⁴ დაშებულიშ გურშენ ზედმეტო წუხება. მუჟამსით სერიოზულო ვაშენთ, ბუნებრივ რე, ნამდა ბწუხენდათ დო გურ ბრალს გებდვანდან. მარა იეჰოვას ვაკო, ზედმეტო იბწუხათ დო ირო ბრალ გებდვათ ჩქინ დუდის. თე ტვირთ ოკო ჩეფთხინუათ. მუჭო ოკო გებგათ ზედმეტო ბწუხენთ დო ვარ? დაშებულ ვაღიარით, მთელ გურით იბნარღით დო ირფელს ქუვორთუთ, ნამდა კინ იგივექ ვამაღოლან-და, შემლებნა ბჯერდან, ნამდა იეჰოვაქ მაპატუეს (საქ. 3:19). ღორონთის ნამდვილო ვაკო, თე ირფელიშ უკულ, გურ კინ გებდვანდან ბრალს, მუშენდა უჩქჷ, ნამდა ზედმეტ წუხებას შეულებ გუმანადგურან (ფსალმ. 31:10). დაშებულშე ნერვიანობას გეგნვაჸუნუთ-და, შილებე გვალო მივოტუათ სიცოცხლეშ შარას რულა (2 კორ. 2:7).

15. მუ ოკო აკეთათ, ნამდა დაშებულშე ზედმეტო ვეწუხათ? (1 იოან. 3:19, 20; ქოძირით სურათ).

¹⁵ მუჭო შეილებნა თე ტვირთიშ ჩათხინაფა? დაშებულშე წუხებაქ დიო ხოლო ვეჩქეთხუეს  დო სვანჯის ქოიდინუანან-და, ყურადღება თიშა გეგნიღით, მუნერ მოჭყოლოფე რე ღორონთ დო მუჭო პატიენს თინა (ფსალმ. 130:4). მუჟამსით პიროვნება მთელ გურით ნარღენს დაშებულს, იეჰოვა პატიენს დო თეცალ მუდგარენს ოპირ: „მეტო ვა გუშინანქ ცოდას“ (იერ. 31:34). თენა ნიშნენს, ნამდა ულირს დაშებულიშ გურშენ, იეჰოვა ანწ ვა მორთხინა პასუხის. ათეშენ ვეფიქრათ, ნამდა რახანს დაშებულიშ შედეგეფს ღებულენთ, იეჰოვას თქვანდა პატიებულ ვაფჷ. ულირს დაშებულიშ გურშენ კრებას პასუხიშმგებლობეფ მიოდინეთ-და, ვეფიქრათ, ნამდა მუთუნიშ ღირს ვა რეთ დო ზედმეტო ვეგედვათ ბრალ თქვან დუდის. იეჰოვაქ გიჭყოლიდუ თქვან ცოდეფ დო თქვა მუშენ ოკო გიშინანდათ თის ირიათო?! (წეკითხით 1 იოანეშ 3:19, 20).

16. მუ ოკო მარჩქილედან სიცოცხლეშ შარას მარულეეფს?

¹⁶ სიცოცხლეშ შარას თეშ ოკო იბრულათ, ნამდა ქიმეფრთათ ფინიშიშ ხაზშა დო მიბღათ ჯილდო (1 კორ. 9:24). თეშ კეთება თიმწკუმა შემალებენა, მუჟამსით ჯგირო მაჸინა გააზრებულ, მუ ოკო იბღათ დო მუ ოკო ჩეფთხინუათ თე შარას. თე სტატიას ხვალე მუსხირენ მაგალით გუვარჩით, მარა რე ხოლო შხვა მუდგარენეფ. მაგალთო, იესოქ თქუ, ნამდა დუდ ვედემომნკათ „გინოჸუნელ შუმა-ჭკუმუათ დო ირდღაშიან ოწუხებელით“ (ლუკ. 21:34). ბიბლიას მოჩამილ რე ხოლო შხვა რჩევეფ, მუთ მიგეხვარებნა ქოძირათ, მუ გაფნა ოთირალ, ნამდა შეგალებუან სიცოცხლეშ შარას რულაქ.

17. მუშენ შემლებნა ვორდათ დარწმუნებულ, ნამდა გეგნობკვათუნთ ფინიშიშ ხაზის?

¹⁷ შემლებნა დარწმუნებულ ვორდათ, ნამდა ქიმვოჭირინუანთ ფინიშიშ ხაზის დო მიბღენთ გამარჯვებას, მუშენდა იეჰოვა ქომჩანა საჭირო ძალეფს (ეს. 40:29—31). ათეშენ, ვემიოტუათ რულა! მიაჸუნით პავლე მოციქულიშ მაგალითის, მით დუდუდუზოგებუო მირულედ სიცოცხლეშ შარას თი ჯილდოშ მიოღებელო, ნამუთ წიმი ელუდ (ფილ. 3:13, 14). რშუდან, თქვან მანგიორო მითინს ვეშიალებე რულა, მარა ხვალე ვა რეთ, მუშენდა იეჰოვა ელაირენა. თის შეულებ მიგეხვარან ოღალიშ ღალას დო ტვირთიშ ჩათხინაფას (ფსალმ. 68:19). ზუსტას იეჰოვაშ ელარნათ შეგალებენა მოთვინებათ ირულათ დო გეგნოკვათათ ფინიშიშ ხაზ!