1. Mwakamulana ni Ahebeli 12:1, ana tukusosekwa kutenda chichi kuti tukayiche kumbesi kwa mpikisano wakuja kupata umi?

 BAIBULO jikusalandanya umi wetu wa Chiklistu ni mpikisano wakuwutuka. Ŵandu ŵakombwele kuwutuka chenene pa mpikisano welewu chachipata umi wangamala. (2 Tim. 4:7, 8) Myoyo tukusosekwa kutenda yiliyose yampaka tukombole kuti tukaleka kuwutuka pa mpikisanowu mnopemnope mbesi ja mpikisanowu pajiŵandichile mnope kupunda kalakose. Ndumetume Paulo jwakombwele kuwutuka chenene mpaka kumbesi kwa mpikisanowu. Mwamti jwalakwe jwasasile yindu yampaka yitukamuchisye m’weji kuti tukombole kuwutuka chenene mpaka kumbesi kwa mpikisanowu. Jwalakwe jwapeleche malangiso gakuti “tutyosye chakusitopesya chilichose, soni . . . tuwutuche mwakupilila mpikisano watukusosekwa kuwutukawu.”—Aŵalanje Ahebeli 12:1.

2. Ana ‘kutyosya chakusitopesya chilichose’ kukusagopolela chichi?

² Ana Paulo pajwalembega kuti tukusosekwa ‘kutyosya chakusitopesya chilichose’ jwagopolelaga kuti pangali katundu jwalijose jwakusasosekwa kunyakula Mklistu? Iyayi, jwalakwe nganagopolelaga yeleyo. Mmalomwakwe, jwagopolelaga kuti tukusosekwa kutyosya yakusitopesya yiliyose yangasosekwa. Yakusitopesya yeleyi mpaka yitutendekasye kuti tupele mnope soni mpaka yituwujikasye munyuma. Kuti tukombole kupilila patukuwutuka pa mpikisanowu, tukusasosekwa kumanyililaga mwachitema naga tunyakwile yakusitopesya yangasosekwa yampaka yituwujasyeje munyuma ni kuyityosya mwachitema. Nambope pandaŵi jijojo tukusasosekwa kulolechesya kuti ngatukutyosya katundu jwatukusosekwa kunyakula. Naga tukulepela kunyakula katundu jwakusosekwajo mpaka tulityosye achimsyewe pa mpikisanowu. (2 Tim. 2:5) Ana ni katundu jwapi jwatukusasosekwa kunyakula?

3. (a) Mwakamulana ni Agalatiya 6:5, ana tukusasosekwa kunyakula chichi? (b) Ana chitukambilane chichi mu nganiji? Ligongo chichi chitukambilane yeleyi?

 ³ Aŵalanje Agalatiya 6:5. Paulo jwalosisye kuti pana yindu yatukusasosekwa kunyakula. Jwalakwe jwalembile kuti “jwalijose chachitwichila katundu jwakwe.” Pelepa Paulo jwagambaga yindu yele Mklistu jwalijose uli udindo wakwe kumtendela Mlungu. Yindu yele pangali mundu jwine jwalijose jwampaka atutendele. Munganiji chitukambilane ya “katundu” jwakusosekwa kunyakula mundu jwalijose soni mwampaka tunyakulile. Chitukambilanesoni yakusitopesya yangasosechela yampaka tuyinyakule mwangamanyilila soni chitulole yampaka tutende kuti tuyityosye. Kunyakula katundu jwetu ni kwasa yakusitopesya yangasosechela kuchitukamuchisya kuti tukombole kuwutuka chenene pa mpikisano wakuja kupata umi.

4. Ligongo chichi chilanga chitwatesile chakuti tuchimtumichila Yehofa kwa umi wetu wosope nganichiŵa chakusitopesya? (Alole chiwulili.)

⁴ Chilanga chitwatesile chakuti tuchimtumichila Yehofa mpaka kalakala. Patwalipeleche kwa Yehofa, twatesile chilanga chakuti chitumtumichileje soni kutenda yakusasaka jwalakwe. Myoyo, ndaŵi syosope tukusasosekwa kukumbuchila yeleyi. Yisyene kuti kulipeleka kwetu kwa Mlungu uli udindo  wekulungwa, nambo nganiwuŵa wakusawusya kuwukwanilisya. Yili myoyo ligongo lyakuti Yehofa ŵatupele mtima wakusachilila kutenda yakusasaka jwalakwe. (Chiw. 4:11) Nambosoni jwalakwe jwatupanginyisye m’chiwanichisyo chakwe soni jwatupele mtima wakuti tusachilileje kumtumichila. Yakuyichisya yakwe tukusakombola kumŵandichila jwalakwe nambosoni kuŵa ŵakusangalala patukutenda yakusasaka jwalakwejo. (Sal. 40:8) Nambosoni patukutenda yakusasaka Mlungu ni kumkuyaga Mwanache jwakwe, ‘tukusakola mtendele wamumtima.’—Mat. 11:28-30.

5. Ana chichi champaka chakamuchisye kuti akomboleje kutenda yindu yakamulana ni kulipeleka kwawo kwa Yehofa? (1 Yohane 5:3)

⁵ Ana mpaka anyakule chamtuli katundu jweleju? Pana yindu yiŵili yampaka yakamuchisye. Chandanda, atendeje yindu yakwakamuchisya kuti apitilisye kumnonyela Yehofa. Mpaka atende yeleyi mwakuganichisya yindu yambone yaŵele ali mkwatendela Yehofa nambosoni yindu yambone yaŵasunjile kusogoloku. Pakumnonyela mnope Mlungu yichiŵa yangasawusya kuti ampikanileje. (Aŵalanje 1 Yohane 5:3.) Chaŵili, amsyasyeje Yesu. Jwalakwe jwakombwele kupikanila ligongo lyakuti jwamŵendaga Yehofa kuti amkamuchisye soni ndaŵi syosope jwaganichisyaga yindu yambone yachachimtendela Mlungu. (Aheb. 5:7; 12:2) Mwakulandana ni Yesu nombe wawojo amŵendeje Yehofa kuti ŵakamuchisyeje nambosoni ndaŵi syosope aganichisyeje ya chembecheyo chakwete cha umi wangamala. Myoyo, pakumnonyela mnope Mlungu soni kumsyasya Mwanache jwakwe, yichiŵa yangasawusya kuti akombole kutenda yindu yosope yakamulana ni kulipeleka kwawo kwa Yehofa.

6. Ligongo chichi tukusasosekwa kusamalila maudindo getu ga m’liŵasa? (Alole chiwulili.)

⁶ Maudindo gatukusakola mwiŵasa. Pampikisano wetu wakuja kupata umi wangamala tukusasosekwa kumnonyela mnope Yehofa soni Yesu kupunda yatukusati pakwanonyela ŵachibale ŵetu. (Mat. 10:37) Nambotu yeleyi ngayikugopolela kuti tukasamalilaga maudindo getu ga mwiŵasa. Ligongo yeleyo mpaka yitendekasye kuti tukamsangalasya Mlungu soni Klistu. Mmalomwakwe, kuti tumsangalasye Mlungu soni Klistu tukusasosekwa kukwanilisya maudindo getu gosope gatukwete mwiŵasa. (1 Tim. 5:4, 8) Patukutenda yeleyi, tuchiŵa ŵakusangalala mnope. Chakusangalasya mnope, Yehofa akusamanyilila kuti maŵasa mpaka gaŵe gakusangalala mnope naga jwamlume soni jwamkongwe akusanonyelana soni kuchimbichisyana mnope. Nambosoni maŵasa gakusaŵa gakusangalala mnope naga achinangolo akusiŵanonyela soni kwajiganya ŵanache ŵawo, nambosoni naga ŵanachewo akusiŵapikanila achinangolowo.—Aef. 5:33; 6:1, 4.

7. Ana mpaka atende wuli kuti akwanilisyeje udindo wakwete mu liŵasa?

⁷ Ana mpaka anyakule chamtuli katundu jweleju? Chinga ali jwamlume kapena jwamkongwe jwamlombele kapena mwanache, ndaŵi syosope akamulichisyeje masengo yajikusasala Baibulo. Akusosekwa kutenda yeleyi mmalo mwakwamba kutenda yindu yakuyiwona kuti yili yakuŵajilwa kapena yayili yakuwanda kumangwawoko. (Mis. 24:3, 4) Akamulichisyeje masengo mwalunda mabuku getu gakulondesya ya m’Baibulo. M’mabukuga mwana yindu yambone yampaka yitukamuchisye kumanyilila yampaka tutende kuti tukamulichisyeje mfundo sya m’Baibulo. Mwachisyasyo, ngani sya mtwe wakuti “Yakamuchisya Liŵasa” sikusakola mfundo syakamuchisya pa yakusawusya yagakusasimana nago maŵasa, achinangolo, soni ŵachinyamata. b Ndaŵi syosope akamulichisyeje masengo yajikusasala Baibulo atamose yili mkuti maŵasa gane kumangwawoko gangatendaga yeleyo. Naga akutenda yeleyi, chachilikamuchisya liŵasa lyawo nambosoni chachisangalala ni upile wachachapa Yehofa.—1 Pet. 3:1, 2.

8. Ana yakusagula yetu mpaka yitukwaye chamtuli?

⁸ Udindo watukusakola pa yindu yatusagwile kutenda. Yehofa ŵatupele ufulu wakuti tulisagulileje yakutenda. Mwamti jwalakwe akusasaka kuti tusangalaleje ligongo lyakuti tusagwile yindu mwalunda. Nambo jwalakwe jwangatuchenjelaga kuti tukasimana ni yakusawusya patusagwile yindu yakulemwecheka.  (Agal. 6:7, 8) Ligongo lya yeleyi, tukusasosekwa kulimbana jika ni yakusawusya yiliyose yatusimene nayo ligongo lyakusagula yindu mwakulemwecheka, kuŵecheta maloŵe gakulemwecheka, kapena kutenda yindu mwakuwutuka myasi. Myoyo, ndaŵi sine mpaka tusimane ni yakusawusya yekulungwa ligongo lya yindu yatutesile. Nambope kumanyilila kuti uli udindo wetu kulimbana ni yakusawusya yiliyose yayiyiche ligongo lyakusagula yindu mwakulemwecheka mpaka kututendekasye kuti tujitichisye ulemwa watutesile, kuleka kutenda ulemwawo, nambosoni kuŵambala kuwilisya kutenda ulemwawo. Kutenda yeleyi kuchitukamuchisya kuti tupitilisye kuwutuka pa mpikisano wakuja kupata umi.

9. Ana akusosekwa kutenda chichi naga asagwile yindu mwakulemwecheka? (Alole chiwulili.)

⁹ Ana mpaka anyakule chamtuli katundu jweleju? Ana mpaka atende chichi pasagwile yindu mwakulemwecheka? Akumbuchileje kuti nganaŵa akombwele kuyichenga yindu yayitendekwe kala. Mwamti ngakusosekwa konanga machili gawo kapena kulagasikaga nganisyo mwakuliŵichila kunyuma kapena kulijimba magambo mwinesoni kwajimba magambo ŵane pa yindu yaŵasagwile mwakulemwecheka. Mmalomwakwe, ajitichisyeje yakulemwa yawo ni kulingagalingaga kutenda yambone apano. Naga akulijimba magambo pa yindu yakulemwecheka yaŵatesile, mwakulinandiya apopeleje kwa Yehofa. Amsalileje chakulemwa chawo soni kumŵenda kuti ŵakululuchile. (Sal. 25:11; 51:3, 4) Ŵapepesyeje ŵandu wosope ŵaŵaleŵele nambosoni naga yakomboleka ŵaŵendeje achakulungwa ŵa mumpingo kuti ŵakamuchisye. (Yak. 5:14, 15) Alijiganyeje pa yakulemwa yatesile nambosoni aŵambaleje kuwilisya chakulemwa chichocho. Kutenda yeleyi kuchakamuchisya kuti aŵe ŵakusimichisya kuti Yehofa chachatendela chanasa soni kwapa chikamuchisyo chilichose chakusosechela.—Sal. 103:8-13.

10. Ligongo chichi kusachilila kutenda yindu yanganituŵa tukombwele chili chindu chakusitopesya mnope? (Agalatiya 6:4)

¹⁰ Kusachilila kutenda yindu yanganituŵa tukombwele. Mpaka tulisitopesye mnope paumi wetu naga tukulilandanya ni ŵane. (Aŵalanje Agalatiya 6:4.) Naga ndaŵi syosope tukusatamila kulilandanya ni ŵane mpaka tutande kukola mtima wa jelasi nambosoni mtima wampikisano. (Agal. 5:26) Naga tukulingalinga kutenda yindu yakombwele kuyitenda ŵandu ŵane atamose yili mkuti m’wejo nganituŵa tukombwele kuyitenda mpaka tulipweteche achimsyewe. Nambosoni naga “chindu chakusachijembecheya pati chilepeleche, chikusapwetesya mtima” nikuti mpaka yiŵe yakupweteka mnope kwembecheyaga yindu yanganiyiŵa yikomboleche. (Mis. 13:12) Kutenda yeleyi mpaka kutumalile machili getu mwamti mpaka tuwujile munyuma pa mpikisano wetu wakuwutuka kuja kupata umi wangamala.—Mis. 24:10.

11. Ana chichi champaka chakamuchisye kuti aŵambaleje kusachilila kutenda yindu yanganaŵa ayikombwele?

¹¹ Ana mpaka atyosye chamtuli chakusitopesya chelechi? Akasachililaga kutenda yindu yejinji kupunda yakusasaka Yehofa. Jwalakwe jwangajembecheyaga kuti wawojo chatendeje yindu yanganaŵa ayikombwele. (2 Akoli. 8:12) Ndaŵi syosope akumbuchileje kuti Yehofa jwangalandanyaga yindu yakusakombola kutenda wawojo ni yampaka akombole kutenda ŵane. (Mat. 25:20-23) Jwalakwe akusayamichila mnope pakulipeleka ni mtima wawo wosope pakumtumichila, kulupichika kwawo nambosoni kupilila kwawo. Mwakulinandiya ajitichisyeje kuti yaka yawo, mwachiŵelele chilu chawo, nambosoni yakusawusya yine mpaka yinandiye yindu yampaka akombole kutenda. Mpela Balisilayi, aŵeje ŵakoseka kukana mautumiki gane naga yaka soni mwachikwendela chilu chawo mpaka yitendekasye kuti akakombola kutenda chenene utumikiwo. (2 Sam. 19:35, 36) Nambosoni mpela Mose, akundeje yakuti ŵane ŵakamuchisyeje soni apelecheje yakutenda kwa ŵandu ŵane naga yikusosechela. (Eks. 18:21, 22) Naga akulosya kulinandiya m’litala lyeleli chachiŵambala kwembecheya kutenda yindu yanganaŵa ayikombwele kutenda yampaka yigambe kwapesya ni kwatendekasya kuti alepele kuwutuka pa mpikisano wakuja kupata umi.

12. Ana tulijimbeje magambo pa yakulemwecheka yasagwile ŵane? Alondesye.

¹² Kulijimba magambo pa yakulemwecheka yasagwile ŵane. M’weji nganituŵa twasagulile ŵane yakutenda kapena kwachenjela kuti akasimana ni yakusawusya pa yindu yasagwile mwakulemwecheka.  Mwachisyasyo, mwanache mpaka asagule kuleka kumtumichila Yehofa. Yeleyi mpaka yapweteche mnope achinangolo. Nambope, achinangolo ŵakusalijimba magambo ligongo lya yindu yakulemwecheka yasagwile mwanache jwawo, yikusaŵa kuti akunyakula katundu jwakusitopa mnope. Jwelejutu nganijuŵa katundu jwakusajembecheya Yehofa kuti achinangoloŵa anyakule.—Alo. 14:12.

13. Ana achinangolo mpaka atende wuli kuti alimbane ni yindu yasagwile mwanache jwawo mwakulemwecheka?

¹³ Ana mpaka atyosye chamtuli chakusitopesya chelechi? Ndaŵi syosope akumbuchileje kuti Yehofa ŵampele jwalijose ufulu wakusagula yakutenda. Mwamti akusamleka mundu jwalijose kuti asagule yakusaka. Yeleyi yikupwatikapo kusagula kumtumichila jwalakwe. Yehofa akusamanyilila kuti jemanja ali achinangolo ŵangali umlama mwamti akusagamba kusaka kuti atendeje yampaka akombole. Yiliyose yampaka asagule mwanache jwawo wawojo ngayikwakwaya. (Mis. 20:11) Nambope ndaŵi sine mpaka adandawuleje pa yindu yalepele kutenda mpela nangolo. Naga yili myoyo, amsalileje Yehofa mwakupikanila soni kuŵenda kuti ŵakululuchile. Jwalakwe akusamanyilila kuti wawojo nganaŵa achenjile yindu yayatendekwe kala. Nambosoni jwalakwe jwangajembecheyaga kuti jemanja chiŵachenjeleje ŵanache ŵawo kuti akasimana ni yakusawusya ligongo lya yindu yasagwile. Myoyo, ndaŵi syosope akumbuchileje kuti naga mwanache jwawo akulingalinga kuti awujile kwa Yehofa, jwalakwe chachiŵa jwakoseka kumpochelasoni.—Luk. 15:18-20.

14. Ligongo chichi kulijimba magambo mnope chili chakusitopesya chatukusosekwa kuchityosya?

¹⁴ Kulijimba magambo mnope. Yisyene kuti patulemwisye yikusaŵa yakupikanika kulijimba magambo. Nambope kulijimba magambo mnope chili chakusitopesya chatukusasosekwa kuchityosya. Ana mpaka tumanyilile chamtuli naga tukulijimba magambo mnope? Naga tujitichisye ulemwa wetu, tugalawiche mtima, nambosoni tukutenda yakutukamuchisya kuti tukawilisyasoni ulemwawo, tukusosekwa kuŵa ŵakusimichisya kuti Yehofa atukululuchile. (Mase. 3:19) Naga tutesile yindu yeleyi, Yehofa jwangasakasoni kuti tupitilisye kulijimba magambo. Jwalakwe akusamanyilila yakusawusya yampaka tusimane nayo naga tukupitilisya kulijimba magambo. (Sal. 31:10) Mwamti naga tukupitilisya kudandawula mnope ligongo lya yakulemwa yetu, mpaka yitutendekasye kuti tulepele kuwutuka pa mpikisano wakuja kupata umi.—2 Akoli. 2:7.

15. Ana chichi champaka chakamuchisye kuti amalane ni kulijimba magambo mnope? (1 Yohane 3:19, 20) (Alole chiwulili.)

 ¹⁵ Ana mpaka atyosye chamtuli chakusitopesya chelechi? Naga wawojo akupitilisya kulijimba magambo mnope, akusosekwa kuganichisya yakuti Mlungu “akusakululuchila yisyesyene.” (Sal. 130:4) Panyuma pakuti Mlungu ŵakululuchile ŵandu ŵagalawiche mtima yisyesyene, jwalakwe akusasala kuti “ngasawukumbuchilasoni ulemwa wawo.” (Yel. 31:34) Yeleyi yikugopolela kuti Yehofa nganaŵa ŵajimbile magambo ŵandu pa yakulemwa yaŵatesile kala. Myoyo, ngakusosekwa kuganisyaga kuti yakusawusya yakusimana nayo apano ligongo lya yakulemwa yaŵatesile kala yikulosya kuti Yehofa nganiŵakululuchila. Nambosoni ngakusosekwa kulijimba magambo kuti ŵalesile kutenda mautumiki gane ligongo lya yakulemwa yaŵatesile. Yehofa jwangaganichisyagasoni yakulemwa yawo, nombe wawojo akusosekwa kutenda yakulandanayo.—Aŵalanje 1 Yohane 3:19, 20.

16. Mpela ŵandu ŵatuli pampikisano wakuwutuka, ana tukusosekwa kumanyililaga chichi?

¹⁶ Patukuwutuka pampikisano wakuja kupata umi ‘tuwutucheje m’litala lyakuti tukapochele mbotojo.’ (1 Akoli. 9:24) Mpaka tukombole kutenda yeleyi patukumanyilila kulekanganya pasikati pa yindu yatukusosekwa kunyakula ni yindu yatukusosekwa kuyityosya. Munganiji tukambilene yisyasyo yamnono ya yindu yatukusosekwa kunyakula soni yatukusosekwa kuyityosya. Nambo yindu yeleyi yipali yejinji. Mwachisyasyo, Yesu jwasasile kuti “ngatukusosekwa kusitopelwa ni kulya mnope kapena kumwa mnope soni yakudandawulisya ya pa umi.” (Luk. 21:34) Malembaga soni gane mpaka gakamuchisye kumanyilila yindu yakusosekwa kuchenga pa umi wawo pakuwutuka pa mpikisano wakuja kupochela umi.

17. Ligongo chichi tuli ŵakusimichisya kuti yili yakomboleka kuwutuka mpaka kumbesi kwa mpikisano wakuja kupochela umi wangamala?

¹⁷ Mpaka tuŵe ŵakusimichisya kuti mpaka tukombole kuwutuka mpaka kuja kupochela umi wangamala, ligongo lyakuti Yehofa chachitupa machili gatukusosechela. (Yes. 40:29-31) Myoyo, akawujila munyuma. Amsyasyeje Paulo juŵawutwiche mwakulimbichila mnope ni chakulinga chakuti akapate mboto jiŵamŵichile pasogolo pakwe. (Afil. 3:13, 14) Amanyilile kuti pangali mundu jwalijose jwampaka ŵawutuchile pa mpikisanowu, nambo ni chikamuchisyo cha Yehofa mpaka akombole. Yehofa mpaka ŵakamuchisye kuti anyakule katundu jwakusosechela ni kutyosya yindu yosope yayikwasitopesya. (Sal. 68:19) Kusala yisyene ni chikamuchisyo cha Yehofa chachikombola kuwutuka mwakupilila pa mpikisanowu mpaka kuja kupata mboto.